23214	MAT 1:1	Yesu Kilistu afumili mulukolu lwa Dawudi na Dawudi afumili mulukolu lwa Ibulahimu. Alu ndi lulalanda lwa lukolu lwaki.
23215	MAT 1:2	Ibulahimu kamulela Isaka na Isaka kamulela Yakobi na Yakobi kamulela Yuda na vakulumundu.
23216	MAT 1:3	Yuda amlelili Pelesi na Zela, mawau aveli Tamali. Pelesi kamulela Hesilomi, na Hesilomi kamulela Lami na
23217	MAT 1:4	Lami kamulela Aminadabu na Aminadabu kamulela Nashoni na Nashoni kamulela Salumoni na
23218	MAT 1:5	Salumoni kamulela Boasi, mamundu Boasi aveli Lahabu. Boasi na Lutu vaveli valeli va Obedi. Na Obedi kamulela Yesi.
23219	MAT 1:6	Yesi kamulela Mutwa Dawudi. Na Dawudi kamulela Solumoni, mawaki Solumoni mwanja mtasi aveli mdala wa Uliya.
23220	MAT 1:7	Solumoni kamulela Lehoboamu na Lehoboamu kamulela Abiya na Abiya kamulela Asa,
23221	MAT 1:8	na Asa kamulela Yehoshafati na Yehoshafati kamulela Yolamu na Yolamu kamulela Usia.
23222	MAT 1:9	Na Usia kamulela Yofamu, na Yofamu amlelili Ahasi, na Ahasi kamulela Hezekia.
23223	MAT 1:10	Na Hezekia kamulela Manasi, na Manasi kamulela Amosi, na Amosi kamulela Yosia.
23224	MAT 1:11	Na Yosia kamulela Yekomia na vahaja vaki fyosi afi fyaveli chipindi Vayawudi pavatoliwili vavanda kuyenda Babiloni.
23225	MAT 1:12	Vayawudi pavatoliwili kala kuuvanda kuluhamila aku Babiloni, Yekonia kamulela Shealitieli, Shealitieli kamulela Zelubabeli.
23226	MAT 1:13	Na Zelubabeli kamulela Abyudi, na Abyudi kamulela Eliyakimu, na Eliyakimu kamulela Azoli.
23227	MAT 1:14	Azoli kamulela Sadoki na Sadoki kamulela Akimu na Akimu kamulela Eliyudi.
23228	MAT 1:15	Eliyudi kamulela Eliyazali na Eliyazali na mweni kamulela Matani na Matani kamlela Yakobi.
23229	MAT 1:16	Yakobi kamulela Yosefu bambu waki Maliya na Maliya kamulela Yesu yivamkema Kilistu.
23230	MAT 1:17	Topi kwavelili na fileli lilongu na mchechi kukandila Ibulahimu mbaka Dawudi, Fileli lilongu mchechi tangila Dawudi mbaka kuluhamila kula Babiloni, kwaveli na fileli lilongu na mchechi kukandila kutoliwa kuyenda kula Babiloni mbaka chipindi cha Kilistu Mgombola.
23231	MAT 1:18	Topi ndi wawonikili Yesu Kilistu. Maliya mamudu Yesu aveli nondi ya Yosefu. Ngajila tanila kumufika amanyikili kala kucha aveli na suliya yapatili kwa uwesu wa Mfuki Mng'alili.
23232	MAT 1:19	Yosefu nondi yaki Maliya aveli goleki, alemili kumupa soni nondi waki pawelu. Kwanongwa ayi ayiholili amuleki kwa chifisu.
23233	MAT 1:20	Paghaveyi akwihola chilongu achi, topi, makungu wa Bambu kamwisila mung'onju, kamuwombela, “Yosefu wa lukolu lwa Dawudi kotoo kutila kumheta Maliya kwanongwa kana suliya kwa uwesu wa Mfuki Mng'alili.
23234	MAT 1:21	Dayihongeshi mwana mlumi na yuwi dawumupi litawa Yesu, kwanongwa mweni ndi davalowoli vandu vaki kufuma mu sambi shawu.”
23235	MAT 1:22	Topi afi fyosi fiva ili chivi chila chilongu cha detili Bambu kwa lishu lya mbuyi wa Chapanga kucha,
23236	MAT 1:23	“Muyenji dayimi yinda na daamuleli mwana mlumi na davamkemi litawa lyaki Imanueli” Mana yaki, “Chapanga kava pamu na yufwi.”
23237	MAT 1:24	Topi, Yosefu payimukili, kamuheta Maliya kucha makungu wa Bambu Chapanga wamuwombilili.
23238	MAT 1:25	Yosefu kawonja ha na Maliya mbaka pawonikili mwana. Topi Yosefu kamupa litawa lya Yesu mwana yula yawonikili.
23239	MAT 2:1	Yesu awonikili mumbwani ya Betelehemu, mumkowa wa Yudeya, chipindi cha Helodi paghavaya mutwa. tepu, vandu yivasikawula ndondwa vafikili Yelusalemu kufuma kundamba.
23240	MAT 2:2	Vadasha, “kava koti mwana yawonikili daghavi mutwa wa Vayawudi? Tuyiwona ndondwa yaki payibwitukili kundamba, tuyisa kumutundamila.”
23241	MAT 2:3	Mutwa Helodi papikanishili afi, ang'ong'utekili nendu, mweni pamu na vandu vosi va Yelusalemu.
23242	MAT 2:4	Topi, kavakema vatambika vakomi vosi pamu na vawula va Malawu kavadasha, “Kilistu Mgombola dawonikeli koti?”
23243	MAT 2:5	Veni vamuyangula, “Dawonikeli kumbwani Betelehemu, mkoa wa Yudeya. topi ndi wayandikili mbuyi wa Chapanga.
23244	MAT 2:6	‘Yuwi Betelehemu mlima wa Yuda, kuva mkomi gati ya mbwani sha Yuda, nongwa kwa yuwi dabwituki chilongosi, davalongoshi vandu vangu, Vayisilaeli.’ ”
23245	MAT 2:7	Topi Helodi avakemili vasimanyili ndondwa kwa chifisu ili vamumanyishi chipindi choti nakaka ndondwa payibwitukili.
23246	MAT 2:8	Pambeli kavalayila Betelehemu padeta, “Muyendi mukakombikeshi kwa chiganu nongwa ya mwana ayu. Pamumuwona mwisi kung'ombela na nenga nyendi ngamutundamili.”
23247	MAT 2:9	Pavapikanishili kala filongu fya Mutwa vayendilela na mwanja na yila ndondwa yivayiwonili kundamba yivalongulela, payiyenda mbaka yiwoloka pambindi ya pavelili mwana.
23248	MAT 2:10	Pavawonili ndondwa vasekelela munu.
23249	MAT 2:11	Topi vayingila munyumba, vamuwona yula mwana pamu na Maliya, vawa vamtundamila, pambeli vawopola mbembu shawu vamupa fupu: chumang'andu na ubani na mafuta vatalamili yivavakema manimani.
23250	MAT 2:12	Chapanga avakayikili vala yivayisili kumlola mwana Yesu vakotoo kumuwuyila Helodi, topi vawuya kaya kupitila deha yingi.
23251	MAT 2:13	Pavawukili kala vala vahenja, Topi makungu wa Bambu Chapanga amfumbukilili Yosefu mung'onju, kamuwombela, “Tandamuki! Umtoli mwana pamu na mamundu, mutuvili Misili mukayikali aku mbaka pandivawombela, kwanongwa Helodi akwilata amuwulayi mwana ayu.”
23252	MAT 2:14	Topi Yosefu atandamukili, kamtola mwana pamu na mamundu pamihi yiyila yila, vawuka vayenda Misili.
23253	MAT 2:15	Kayikala aku mbaka Helodi pasovili. Topi, chilongu chadetili Bambu kwa deha ya vambuyi wa Chapanga fiva, “Ndamkemili mwana wangu kufuma Misili.”
23254	MAT 2:16	Helodi pamanyili kucha vala vasimanyili ndondwa vaveli vamujanga, akalalili munu. Alayishili vana valulumi vosi mumbwani ya Betelehemu na vala yivaveli mumbali mbali yaki yivaveli na myaka mivili na pasi ya mwaka mivili vawulaghiwi. Agolili nahau ngimu wakashili chipindi cha vala vasimanyili ndondwa pavadashili milandu ya mwana.
23255	MAT 2:17	Nahawu ndi wuyivelili chilongu chila chadetili mbuyi wa Chapanga Yelimiya,
23256	MAT 2:18	“Lishu lipikanika aku Lama, chivembu na kudedeka nendu. Raheli akuvalilila vana vaki. Wala akudayila ha kushisha moyu, kwanongwa vosi vayaghamila.”
23257	MAT 2:19	Helodi asovili kala, topi makungu wa Bambu amubwitukilili Yosefu mulilotu kula Misili.
23258	MAT 2:20	Kamuwombela “Tandamuki! Mtoli mwana na mamundu muyendi Mlima wa Isilaeli, nongwa vala yivadayileyi kumuwulagha mwana ayu vasova kala.”
23259	MAT 2:21	Katandamuka kamtola mwana pamu na mamundu vawuya kumlima wa Isilaeli.
23260	MAT 2:22	Lakini papikanishili kucha Alikelau aveli mutwa wa Yudeya badili ya Helodi tatimundu, aveli akutila kuyenda aku. Mweni pavamukayikili mumilotu ayendili mwambu wa Galilaya.
23261	MAT 2:23	Kayenda ayikalili mumbwani ya Nazaleti nahau ndi wufivelili filongu fyawombili kwa deha ya Vambuyi “Davamkemi mundu wa Nasaleti.”
23262	MAT 3:1	Majuva vala Yohani Mbatisha abwitukili: palandula kuchivala aku Yudeya:
23263	MAT 3:2	Mweni kawomba, “Mupomeli sambi nongwa wutwa wa kumbindi kwa Chapanga samba wisa.”
23264	MAT 3:3	Yohani ayu ndi yula Isaya yaveli mbuyi wa Chapanga yamudetili: “Mundu yumu akukema kucheja: ‘Mutandi njila ya Bambu, Muhololi deha yaki.’ ”
23265	MAT 3:4	Yohani mbatisha afwalili yingwa sivasonili kwa mingoma ya ngamia. Na lufunga lwa ngwembi muchiwunu chaki. Filivi fyaki fyaveli vangumbingumbi na njuki.
23266	MAT 3:5	Topi, vandu kufuma Yelusalemu na kufuma mbembi shosi sha mlima wa Yudeya pamu na mbembi shosi sha mumbali mbali ya lweni Yoludani, vamuyendela.
23267	MAT 3:6	Vayipetili sambi shawu na mweni kavabatisha mulweni Yoludani.
23268	MAT 3:7	Lakini pavawonili Mafwalisayu na Masadukayu vakumwisila ili vabatishiwi. Kavawombela, “Yumwi vanjoka! Ghani yavapwepwilili mwilyepi na asabu yiyisayi?”
23269	MAT 3:8	Mulangushi kwa fivelekwa kucha mupomela.
23270	MAT 3:9	Mukotoo kuyihola kucha damuyilyepi asabu nongwa tati wenu ndi Ibulahimu! Nguvawombela Chapanga akuwesha kuyigola migonguveli ayi yivi vana va Ibulahimu.
23271	MAT 3:10	Topi, livawu liva kala kudumula mikigha ya libiki, ndamboyi kila libiki lingajila kulela fivelekwa finofu likudumuliwa na kudangiwa mumotu.
23272	MAT 3:11	Nenga nguvabatisha kwa machi kulangusha kucha mupomela. Lakini yula dayisi kumbeli ya nenga yaveli na liwovi pitu nenga. Nenga ngujakwa ha hata kupapa filatu fyaki. Mweni davabatishi kwa Mfuki Mng'alili na kwa motu.
23273	MAT 3:12	Mweni akukamula luselu mumawoku vaki dafyaghili nendu luvagha lwaki na dakungi mbeyu shaki musanja na myeyu akwinyanya mumotu wungajila kujimika
23274	MAT 3:13	Chipindi achi Yesu ayisili kufuma Galilaya kayenda mulweni Yoludani abatishiwi na Yohani mbatisha.
23275	MAT 3:14	Lakini Yohani mbatisha ayeshili kumkanila padeta, “Nenga ngudayila kubatishiwa na yuwi, kandi na yuwi ukwisa kwa nenga?”
23276	MAT 3:15	Lakini Yesu kamuyangula, “Yuwi ujumili hela kwanongwa tugoli fyosi fyadayila Chapanga.” Topi Yohani ajumilili.
23277	MAT 3:16	Yesu pabatishiwi kala, bahala pala kajabuka mumachi topi kumbindi kwa Chapanga kufuwuka kamuwona Mfuki wa Chapanga pasunuka kucha njiva na kumtula pambindi yaki.
23278	MAT 3:17	Lishu kufuma kumbindi kwa Chapanga lideta, “Ayu ndi mwana wangu yindimtamili mayiliwa na mweni.”
23279	MAT 4:1	Pambeli Mfuki Mng'alili amulongushili Yesu mbaka kucheja ili ayeshiwi na Lijangavandu.
23280	MAT 4:2	Kayikaja kulya majuva milongu mchechi pamusi na pamihi, pambeli kawona njala.
23281	MAT 4:3	Topi, Mwafu kamwisila, kamuwombela “Leki yuwi kuva Mwana wa Chapanga nakaka, deti migonguveli ayi yivi filivi.”
23282	MAT 4:4	Yesu kamuyangula, “Yiyandikiwa mumayandiku Vang'alili. Mundu akwikala kwa kulya filivi weka hela ha, ila kwa chilongu chochosi chadeta Chapanga.”
23283	MAT 4:5	Pambeli Lijangavandu kamtola mbaka Yelusalemu, mbwani ying'alili, kamvika pambindi ya mnala wa nyumba ya Chapanga.
23284	MAT 4:6	Kamuwombela, “Leki nakaka yuwi kuva mwana wa Chapanga, widangi pasi, kwanongwa yiyandikiwa mumayandiku Vang'alili ‘Chapanga davalayishi makungu vaki vakuyangi mumawoku vawu, ukotoo kuponikela mumigonguveli’”.
23285	MAT 4:7	Yesu kavawombela, “Yiyandikiwa mumayandiku Vang'alili, ukotoo kumuyesha Chapanga, Bambu waku.”
23286	MAT 4:8	Pambeli Lijangavandu kamtola mbaka pambindi ya chidunda chitali, kamlangusha wutwa shosi na ukomi waki.
23287	MAT 4:9	Lijangavandu kamuwombela, “Fyosi afi ngukupa pawundundamila.”
23288	MAT 4:10	Topi Yesu kamuwombela, “Kopoki apa Lijangavandu! Yiyandikiwa mumayandiku Vang'alili mtundamili Chapanga Bambu waku na kumkimbanikila mweni hela.”
23289	MAT 4:11	Topi, Lijangavandu kawuka kamuleka Yesu na makungu vayisa, kumukimbanikila Yesu.
23290	MAT 4:12	Yesu apikanilili kucha Yohani mbatisha vamutatila muchijaka, ayendili Galilaya.
23291	MAT 4:13	Awukili Nasaleti, kayenda kwikala mumbwani ya Kapelinaumu, muluwongu ya lihiva lya Galilaya mumbaka ya wilaya ya Sebuloni na Nafutali.
23292	MAT 4:14	Ayi yagolikili ili chila chilongu chadetili mbuyi wa Chapanga Isaya chivi,
23293	MAT 4:15	“Mlima wa Sebuloni na mlima wa Nafutali yavelili mudeha ya kuyenda kulihiva lya Galilaya mwambu ya lweni Yoludani na mumlima wuvayikala vangajila kuva Vayawudi.
23294	MAT 4:16	Vandu vayikalili kuchisi, vawonili lwengi lukomi. Na vala vayikalili mulisisi lya njifwa, lwengi luvang'alikila!”
23295	MAT 4:17	Kukandila chipindi achi Yesu akandili kulandula, padeta, “Mupomeli, kwanongwa wutwa wa kumbindi kwa Chapanga wuva pabehi!”
23296	MAT 4:18	“Yesu patyangeyi muluwongu lwa lihiva lya Galilaya, avawonili vandu vavili yivavelili ulongu. Vavelili Simoni yivamkema Petili pamu na Andeleya, vaveli mulihiva vakufuva vasomba kwa lwafu. Veni vaveli vafuva.
23297	MAT 4:19	Yesu kavawombela, mungovikeli, nenga danivagoli muvi vafuva va vandu.”
23298	MAT 4:20	Bahala pala, vasileka njafu shawu, vamukovikela Yesu.
23299	MAT 4:21	Payendili pawulongolu, kavawona vandu vengi vavili yivavelili ulongu, vavelili Yakobi na Yohani vana va Sebidayu, veni vavelili muwatu pamu na tati wawu pavasambula njafu shawu. Yesu kavakema.
23300	MAT 4:22	Tepu vawulekili watu pamu na tati wawu, vamukovekela Yesu.
23301	MAT 4:23	Yesu aveli akuyendayenda mumlima wosi wa Galilaya. Pawula munyumba sha kudadavila na kulandula Chilongu cha nyanyi cha wutwa wa kumbindi kwa Chapanga na kulowola matami kafwauti kafwauti.
23302	MAT 4:24	Milandu yaki yakwilili mumlima wosi wa Siliya, vamuyeghela vandu vosi yivavelili na matami, vala yivavelili vakutamika na kuteshiwa, yivavelili na matami va finyamkela na chisilika na vapombalili vamuyeghilili na mweni kavalowola vosi.
23303	MAT 4:25	Mipinga mikomi ya vandu yamukovikelili kufuma Galilaya na Dekapoli, mbwani yikemiwili Mbwani Lilongu na kufuma Yelusalemu na kufuma Yudeya na kufuma mbembu yingi ya Yoludani.
23304	MAT 5:1	Yesu paliwonili lipinga lya vandu, akwenili kuchidunda, kayikala. Vanachuli vaki vamushengitela.
23305	MAT 5:2	Pambeli kakanda kuvawula,
23306	MAT 5:3	“Vanemiliwa vala yivayimanya kucha veni vakuwesha ha kwikala ngajila Chapanga! Nongwa wutwa wa kumbindi ndi wawu.
23307	MAT 5:4	Vanemiliwa vala yivavelili na lung'ong'u, Nongwa Chapanga davavafwamushi.
23308	MAT 5:5	Vanemiliwa vala vashishamoyu, nongwa ava ndi davahali mlima wa shonu.
23309	MAT 5:6	Vanemiliwa vala yivavelili na njala na yivayikaja kulya kwanongwa ya ugoleki, Chapanga davayikutishi.
23310	MAT 5:7	Vanemiliwa yivaveli na lusungu, Chapanga davawoneli lusungu.
23311	MAT 5:8	Vanemiliwa vala yivamtama Chapanga kwa ndima yawu yosi, nongwa davamuwoni Chapanga.
23312	MAT 5:9	Vanemiliwa vala yivavika kusika, kwanongwa davakemiwi vana va Chapanga.
23313	MAT 5:10	Vanemiliwa vala vagobuleka kwanongwa ya ugoleki, kwanongwa wutwa wa kumbindi ndi wa veni.