28	GEN 1:28	Ka Na padhai lii ho sèna ka hia berkat mi rèngu, aku Nèngu na, “Miu hudꞌi bèba-kacanga ku, sèna ka pea papènu rai-haha ne, ho mi ator ne. Jaꞌa hia miu koasa, sèna ka mi ator iꞌa, manu-bhui, dènge badha-manu aaꞌi-aaꞌi ra ètu rai-haha ne.
29	GEN 1:29	Mi nanene paie-iie! Jaꞌa hia miu rupa-rupa ngangaꞌa ètu rai-haha neꞌe. Sèmi: ana aajꞌu dhu dènge hua, dhu dènge lamusi, aa dhu dènge rèu mangèru.
35	GEN 2:4	Dꞌai sange neꞌe ka, lii lolo Ama Lamatua pajꞌajꞌi dedha-liru dènge rai-haha ne. Lodꞌo Ama LAMATUA heka pajꞌajꞌi dedha-liru dènge rai-haha èèna,
38	GEN 2:7	Èle èèna ka, Ama LAMATUA nare rai ciki, ka Na pajꞌajꞌi dhèu rai-haha. Hèia Na tiu aꞌae Na asa dꞌara sahènga dhèu na, ka na mamuri dènge ka.
39	GEN 2:8	Hèia Ama LAMATUA bhoke oka cue ètu rai Eden, re bèka dhimu. Hèia Na hia dhèu ne pea ètu dꞌara oka na.
46	GEN 2:15	Ka Ama LAMATUA hia dhèu pea ètu dꞌara Eden, ho na ladhe-leru oka èèna.
49	GEN 2:18	Ka Ama LAMATUA tuhu haru lii Na, aku Nèngu na, “Babeꞌa na aadꞌo, ladhe dhèu ne mamuri mesa na. De Jaꞌa neo pajꞌajꞌi hia ne, anga ca dhèu dhu pamèci dènge ne.”
50	GEN 2:19	Lodꞌo èèna, Ama LAMATUA nare rai ciki, ka Na tao rupa-rupa badha dènge manu-bhui. Hèia Na pangèdꞌu si asa dhèu ne, sèna ka na pangare si. Ka dhèu ne pangare badha se dènge manu-bhui aaꞌi-aaꞌi ra, èci-èci ka dènge ngara ra. Te ngaa dhèu ne abhu mèka anga dhu pamèci dènge nèngu.
52	GEN 2:21	Hèia Ama LAMATUA pabhèjꞌi luu dhèu neꞌe. Ropa na bhèjꞌi, Ama Lamatua nare rui karasa na calaa, ka Na pakateme hari nuꞌa deo na.
57	GEN 3:1	Nèti badha aaꞌi-aaꞌi dhu Ama LAMATUA pajꞌajꞌi ètu rai-haha ne, mege ka dhu mèu risi kapodꞌe-kabèli. Ca lodꞌo, mege karèi bhèni na, aku nèngu na, “Tareꞌa, do? Ama Lamatua kai miu baku miꞌa hua aajꞌu aaꞌi-aaꞌi ètu dꞌara oka neꞌe.”
60	GEN 3:4	Te ngaa mege na dhaa, aku nèngu na, “Waa! Sèmi boe èèna! Miu se madhe boe!
64	GEN 3:8	Dꞌai lodꞌo nihia, dua ra tadèngi lii core haga Ama LAMATUA ètu dꞌara oka èèna. Ka dua ra rai lasi luꞌu asa ca bèka ajꞌu, sèna ka LAMATUA baku nèdhi si.
65	GEN 3:9	Te ngaa Ama LAMATUA paroa mi dhèu mone èèna, aku Nèngu na, “Adam! Èu ètu mia?”
69	GEN 3:13	Hèia Ama LAMATUA peka dènge bhèni na, aku Nèngu na, “Nga tao ka, èu adꞌu madha jꞌara èèna?” Ka bhèni ne dhaa, peka na, “Te mege ne ka dhu agꞌo jaꞌa! Nèti èèna ka, jaꞌa kuꞌa.”
70	GEN 3:14	Èle èèna ka, Ama LAMATUA dhoo mege èèna, aku Nèngu na, “Jaꞌa huku èu, lula tatao èu. Nèti badha aaꞌi-aaꞌi, dhoka èu di dhu abhu huku sèmi neꞌe. Mulai nèti deo neꞌe toke èu madhe, èu dhoka rodꞌo dènge kakara, aa muꞌa ètu rai di.
72	GEN 3:16	Èle èèna ka, Ama Lamatua peka dènge bhèni ne, “Èèna na, Jaꞌa pasusa tabha èu, ropa èu dènge babia; lodꞌo mora iisi, èu asa tabha jꞌèra. Masi ka sèmi èèna, dꞌara èu dꞌèi taruu dhèu èmu èu, aa nèngu ka dhu ator èu.”
74	GEN 3:18	Masi ka èu sèle rupa-rupa hini èèna ka, te ngaa dhu muri mai dhodhoka dhudhu-sete di.
77	GEN 3:21	Hèia Ama LAMATUA tao mèdha-papake nèti kaꞌuri badha, ka papake dua ra.
78	GEN 3:22	Ka Ama LAMATUA peka, “Limuri ne, dhèu reꞌa le, mia dhu beꞌa dènge mia dhu karehe, sèmi Èdhi kahèi. De mage dhoka, rèngu raꞌa hua ajꞌu dhu èci hari na, dhu hia mamuri taa-taa.”
81	GEN 4:1	Hèia Adam jꞌunu dènge dhèu èmu na, Hawa. Ka bhèni ne dènge babia. Hèia nara iisi ana mone ca dhèu. Ka na peka, aku nèngu na, “Jaꞌa abhu le ana mone ca dhèu, lula Ama LAMATUA soru nare le jaꞌa.” Ka na pangare ana ne, Kaen (dhu sasoa na ‘abhu’).
83	GEN 4:3	Ca lodꞌo, Kaen nèti isi rai na cahagꞌe, ka hia LAMATUA.
86	GEN 4:6	Ka LAMATUA lii dènge Kaen, aku Nèngu na, “Kaen! Nga tao ka èu nasa sèmi èèna, ka rèhu èu mare boe?
88	GEN 4:8	Ca tèka, Kaen gale Habel, na peka na, “Mai lati ngadꞌo oka, we.” Ropa dua ra dꞌai dꞌara oka, Kaen kalabhe pamadhe ari na.
89	GEN 4:9	Ka LAMATUA karèi Kaen, aku Nèngu na, “Kaen! Ari mu ka mia?” Hèia Kaen dhaa, aku nèngu na, “Jaꞌa keꞌa boe na ètu mia! Èu ngee na, jaꞌa dhèu kèpe haga na, do?”
93	GEN 4:13	Te ngaa Kaen bꞌala LAMATUA, aku nèngu na, “Haii! Ama Lamatua, ee! Lamatua dhoo jaꞌa bia titu kèna, de jaꞌa pasae mèke boe nga.
95	GEN 4:15	Te ngaa LAMATUA dhaa na, “Aadꞌo sèmi èèna! Dhèu cee dhu pamadhe èu, èèna na Jaꞌa huku ne, babia na pidhu hari risi nèti èu.” Hèia LAMATUA tao tadha mi Kaen, sèna ka dhèu reꞌa ho baku pamadhe ne.
96	GEN 4:16	Hèia Kaen tèke eele dènge era èèna. Laꞌe pakajꞌèu nèti LAMATUA, asa era èci, ètu bèka dhimu oka Eden. Era neꞌe, ngara na Nod dhu sasoa na, ‘lole-laa’. Ka na pea ètu era èèna.
98	GEN 4:18	Ka Henok matana Irad. Hèia Irad matana Mehuyael. Mehuyael matana Metusael. Aa ana Metusael, Lamek.
100	GEN 4:20	Ana Ada, ngara na Yabal. Ana-èpu na, jꞌajꞌi dhèu piara badha. Mamuri ra ètu boe ca era, aa ra pea dhoka ètu dꞌara paleo di.
103	GEN 4:23	Ca tèka, Lamek padedha iisi na ètu madha dhèu èmu dua ra, peka na, “Mi nanene, ee! Deo na, ana mone ngèru èci neo game jaꞌa. Te ngaa jaꞌa dhadhedhe ne, toke madhe.
106	GEN 4:26	Pe dꞌai nèbhu ku, Set abhu ana mone ca dhèu, dhu pangare na Enos. Tèu èèna, dhèu mulai manèngi-mangajꞌi mi Ama LAMATUA.
118	GEN 5:12	Lodꞌo Kenan dꞌai 70 (pidhu nguru) tèu, na matana ana mone ca dhèu, ngara na Mahalalel.
121	GEN 5:15	Lodꞌo Mahalalel dꞌai 65 (èna nguru lèmi) tèu, na abhu ana mone ca dhèu, ngara na Yared.
122	GEN 5:16	Ka Mahalalel mamuri hari dꞌai 830 (aru ngasu tèlu nguru) tèu, na abhu hari ana mone dènge ana bhèni.
123	GEN 5:17	Umur Mahalalel 895 (aru ngasu ceo nguru lèmi) tèu, heka na madhe kèna.
127	GEN 5:21	Ropa Henok mamuri dꞌai 65 (èna nguru lèmi) tèu, na matana ana mone ca dhèu, ngara na Metusalak.
131	GEN 5:25	Lodꞌo Metusalak dꞌai 187 (cangasu aru nguru pidhu) tèu, na matana ana mone èci, ngara na Lamek.
132	GEN 5:26	Èle èèna ka, Metusalak mamuri hari dꞌai 782 (pidhu ngasu aru nguru dua) tèu, ka na abhu hari ana mone dènge ana bhèni.
133	GEN 5:27	Umur Metusalak 969 (ceo ngasu èna nguru ceo) tèu, heka madhe kèna.
141	GEN 6:3	Ka LAMATUA peka na, “Jaꞌa roca le dènge tatao dhèu dhu lèke-lèke boe se. Roh Jaꞌa dhu pamamuri rèngu sa, dꞌèi heka hia ra mamuri manèro. Hudꞌi rèngu madhe ku. De èèna na, mamuri rèngu se dhoka dꞌai 120 (ca ngasu dua nguru) tèu di.”
143	GEN 6:5	Taa èèna, LAMATUA ladhe nèdhi bhabhelu-katubꞌa dhèu rai-haha dhu seli-kolane. Dꞌara rèngu pangee dhoka bhabhelu di.
144	GEN 6:6	Ka LAMATUA manyasa, lula Na pajꞌajꞌi le rèngu se ho pea ètu rai-haha ne. Tatao rèngu neꞌe ka dhu papèdꞌa dꞌara Lamatua.
145	GEN 6:7	Nèti èèna ka, Na peka na, “Dènge tatao rèngu sèmi èèna na, Jaꞌa huku pamadhe dhèu rai-haha aaꞌi-aaꞌi dhu pajꞌajꞌi kore si le. Manu-bhui dènge badha leo sèra, Jaꞌa palaho aaꞌi si kahèi. Te Jaꞌa manyasa, nèti Jaꞌa ka pajꞌajꞌi si.”
146	GEN 6:8	Te ngaa Noh di dhu pakarejꞌe dꞌara LAMATUA.
153	GEN 6:15	Mu sabꞌe kapa na, madhera na 133 (ca ngasu tèlu nguru tèlu) meter; bhabhèla na 22 (dua nguru dua) meter; dènge katitu na 13 (canguru tèlu) meter.
161	GEN 7:1	Èle èèna ka, LAMATUA peka dènge Noh, “Jaꞌa ladhe le palème, te ngaa abhu dhoka èu di dhu dꞌara mola. Nèti èèna ka, èu dènge bhèni-ana niki èu, lami ka asa dꞌara kapa.
162	GEN 7:2	Mèti dènge badha-badha dhu bisa miꞌa, aa bisa hia Jaꞌa kahèi, de mèti pidhu-pidhu pasa asa dꞌara kapa. Mèti kahèi rupa-rupa manu-bhui pidhu-pidhu pasa. Te ngaa badha dhu leo, mèti dhoka ca pasa-ca pasa di. Sèna ka badha dènge manu-bhui se, jꞌajꞌi hini, ho baku maꞌète.
165	GEN 7:5	Ka Noh tao aaꞌi sèmi lii paredha LAMATUA.
168	GEN 7:8	Madhutu lii paredha LAMATUA, ka Noh pamaso manu-bhui dènge badha leo sèra, èci-èci ka dènge pasa na, nèti dhu bisa raꞌa, dènge dhu bisa boe raꞌa.
175	GEN 7:15	Ca pasa-ca pasa nèti aaꞌi-aaꞌi dhu mamuri, lasi asa dꞌara kapa palere dènge Noh, madhutu sèmi lii paredha Ama Lamatua. Ropa aaꞌi-aaꞌi ra dꞌai dꞌara kapa, LAMATUA bèdho babèdho kapa èèna.
185	GEN 8:1	Masi ka sèmi èèna, Ama Lamatua bhèlu boe Noh si dènge badha-manu aaꞌi-aaꞌi dhu ètu dedha kapa. Hèia Na hia ngèlu gꞌoro, ka èi na kura ka noo-noo.
191	GEN 8:7	Ka na patalale lakaa ciꞌu. Manu-bhui ne lela laꞌe-mai, toke èi puru. Ka na lèpa heka asa kapa.
204	GEN 8:20	Hèia Noh pudhi hadhu, tao mei korban hia LAMATUA. Nèti badha-badha dhu bisa raꞌa sèra, Noh nare ciꞌu-ciꞌu, ka na roro, tunu ètu dedha mei deo na, ho jꞌajꞌi mi tadha makasi mi LAMATUA.
205	GEN 8:21	Ropa LAMATUA sangèdꞌu nare hèu gèmu korban deo na, dꞌara Na karejꞌe. Ka Na ngee na, “Nèti deo neꞌe ne, Jaꞌa huku heka rai-haha ne, lula bhabhelu-katubꞌa dhèu. Masi ka rèngu dhoka ngee bhabhelu di, Jaꞌa paꞌele iie heka ngaa-ngaa dhu mamuri, sèmi dhu Jaꞌa heka tao kore èèna.
207	GEN 9:1	Hèia Ama Lamatua pala-bagi berkat mi Noh dènge ana-ana na, peka na, “Miu matana paꞌae-ae, sèna ka papènu rai-haha ne.
208	GEN 9:2	Ladhe èèna na, badha hui, manu-bhui dènge iꞌa aaꞌi-aaꞌi ra madhaꞌu dènge miu. Miu ka dhu ator si.
213	GEN 9:7	Miu se hudꞌi matana paꞌae-ae ku, sèna ka papènu hari rai-haha ne.”
232	GEN 9:26	Koa-kio LAMATUA, lula Sem! Te ngaa Kanaꞌan jꞌajꞌi ènu Sem.
237	GEN 10:2	Ana-èpu Yafet, nuka: Gomer, Magog, Madai, Yawan, Tubal, Mesek dènge Tiras. Èci-èci ka dènge lii, suku, aa dènge rai ra. Ana-èpu Gomer, ka: Askenas, Rifat dènge Togarma. Ana-èpu Yawan, ka: Elisa, Tarsis, dhèu Kitim, dènge dhèu Dodanim dhu pea ètu sebhe dhasi.
241	GEN 10:6	Ana-èpu Ham, ka: Kus, Misraim, Put, dènge Kanaꞌan.
244	GEN 10:9	Aꞌèra na mai nèti LAMATUA, aa nèngu kahèi jꞌajꞌi dhèu dhu èra bia magèla badha. Nèti èèna ka, dhèu biasa peka na, “Sèna ka èu more dhèu dhu èra bia magèla badha, sèmi Nimrod, dhu abhu aꞌèra nèti LAMATUA.”
248	GEN 10:13	Ana-èpu Misraim, ka: dhèu Ludim, dhèu Ananim, dhèu Lehabim, dhèu Naftuhim,
258	GEN 10:23	Ana-èpu Aram ka: dhèu Us, dhèu Hul, dhèu Geter, dènge dhèu Mas.
261	GEN 10:26	Ana-èpu Yoktan, ka: Almodad, Selef, Hasar-Mawet, Yera,
265	GEN 10:30	Era pea rèngu, mulai nèti Mesa, taruu dꞌai Sefar, nuka era dhu kabhuku re sebhe dhimu.
270	GEN 11:3	Rèngu aaꞌi-aaꞌi rare lii èci, aku rèngu na, “Aꞌari, ee! Mai ta patitu kota kapai aae cue. Ti tao hadhu bata; ti tunu paꞌadhu. Èèna na, èdhi pudhi sa dedha, ho ti tape dènge èi dama. Ho èèna na, ti patitu manara dedha aae èci, dhu kolo nèngu na dꞌai dedha-liru, sèna ka èdhi abhu kolongara kapai. Ho sèna ka èdhi jꞌajꞌi ca kabarai aae, dhu pahagꞌa ia ka.”
272	GEN 11:5	Hèia LAMATUA puru mai laladhe kota dènge manara dhu ra patitu èèna.
276	GEN 11:9	Nèti èèna ka, ra pangare kota na, Babel (dhu sasoa na ‘pabꞌingu’), lula LAMATUA kakeho lii ra, aa pacèri eele si palème rai-haha ne.
296	GEN 11:29	Abram madhèdi dènge Sarai. Nahor leo dènge ana bhèni Haran, ngara na Milka. Haran abhu ana mone èci kahèi, ngara na Yiska.
300	GEN 12:1	Lodꞌo èèna, LAMATUA peka le dènge Abram, peka na, “Abram! Èu pakèdꞌi nèti era èu ne, tèke eele ina-ama èu, èmu ina-ama mu, dènge rae-lesa èu. Lamu asa era èci, dhu pe Jaꞌa peka dènge èu.
303	GEN 12:4	Lodꞌo èèna, umur Abram 75 (pidhu nguru lèmi) tèu. Na nèti dhèu èmu na Sarai, aa dènge ana ari na, Lot, dènge mèdha-panyau ra aaꞌi-aaꞌi, aa dènge dhèu sabꞌa na aaꞌi-aaꞌi dhu na abhu ètu kota Haran. Hèia Abram si lasi ka, tèke eele kota Haran, asa era dhu LAMATUA peka le dènge ne. Ka ra kako taruu, dꞌai rai èci, ngara na Kanaꞌan.
305	GEN 12:6	Dꞌai era èèna, Abram kako palème rai ne, toke dꞌai padètu dènge rae èci, ngara na Sikem. Ka ra pea taha ètu èèna, padètu dènge ajꞌu aae ca kapua ètu More. Lodꞌo èèna, dhèu Kanaꞌan dhu pea ètu èèna era.
306	GEN 12:7	Ètu era èèna ka, LAMATUA padꞌelo iisi Na mi Abram, peka na, “Èèna na, Jaꞌa hia ana-èpu èu rai neꞌe ne.” Ka Abram pudhi hadhu tao mei korban hia LAMATUA dhu padꞌelo iisi Na dènge nèngu ètu era èèna.
307	GEN 12:8	Èle èèna ka, Abram si pidha hari asa ledhe re balèu. Ka ra pea taha ètu talora rae Betel dènge rae Ai. Ètu èèna, na patitu mei korban èci ho na mangajꞌi mi LAMATUA.
309	GEN 12:10	Ca tèka, rai Kanaꞌan lèke manganga aae. Nèti èèna ka, Abram si lasi asa bèka balèu, ka ra dꞌai rai Masir. Ka ra manubha taha ètu nèi.
310	GEN 12:11	Ropa oe dꞌai Masir, Abram peka dènge dhèu èmu na, Sarai, aku nèngu na, “Sarai, èu bhèni iia, nia boe.
311	GEN 12:12	De ladhe dhèu Masir rèdhi èu bhèni iia sèmi neꞌe, mage dhoka ra pamadhe jaꞌa, lula jaꞌa dhèu èmu-kamali èu. Dènge sèmi èèna, ra parame rare èu.
313	GEN 12:14	Ropa Abram si dꞌai Masir, dhèu ètu èèna, ladhe laa na, Sarai ne bhèni iia titu kèna.
316	GEN 12:17	Lula na nare dhèu èmu dhèu asa dꞌara èmu na, nèti èèna ka, LAMATUA hia huku rupa-rupa mi dhèu aae dènge isi èmu na.
317	GEN 12:18	Hèia dhèu aae Masir paroa Abram, ka na karèi ne, aku nèngu na, “Èu ne tao tasamia mi jaꞌa ne? Nga tao ka èu peka boe na, bhèni ne dhèu èmu èu?
318	GEN 12:19	Te ngaa aku èu na, nèngu ne ana hèni èu! Nèti èèna ka, jaꞌa oe kore ne jꞌajꞌi dhèu èmu jaꞌa! Dhèu èmu èu ka neꞌe! More hari ka, aa pakajꞌèu ka nèti madha jaꞌa!”
320	GEN 13:1	Ka Abram si tèke eele Masir, lasi asa rai Negeb. Laꞌe dènge dhèu èmu na, aa dènge dhèu aa mèdha-panyau aaꞌi-aaꞌi ra. Ana ari na Lot madhutu ra kahèi.
323	GEN 13:4	Aa dhu Abram patitu le kahèi mei korban, ho na mangajꞌi mi LAMATUA ètu era èèna.
327	GEN 13:8	Ka Abram peka dènge Lot, aku nèngu na, “Èdhi se, paꞌaꞌari. Mage dhoka èdhi, èci dènge èci beꞌa boe, lula dhèu sabꞌa èdhi se patao-palaha taruu.
329	GEN 13:10	Hèia Lot ladhe palème. Ka na ladhe nèdhi rai taleo ètu sebhe loko Yarden dhu madha èi ae, toke dꞌai rae Soar. Era ne, rai hèu mèngi sama sèmi oka LAMATUA, dènge rai Masir kahèi. (Lodꞌo èèna, LAMATUA dhae huku mèka kota Sodom dènge kota Gomora. De rai èèna, beꞌa era.)
332	GEN 13:13	Te ngaa dhèu-dhèu Sodom sèra bhelu-katubꞌa titu kèna. Rèngu roꞌo boe nanene LAMATUA.
333	GEN 13:14	Ropa Lot pacèri dènge Abram, ka LAMATUA padhai lii dènge Abram, peka na, “Èu ladhe palème aaꞌi ku, rai aaꞌi-aaꞌi nèti era titu èu èèna. Ladhe paie re madha, re kabodho, re ca bèka gꞌana, dènge ca bèka kariu mu.
337	GEN 13:18	Hèia Abram si lèpa hari asa era pea ra, dhu dètu dènge ajꞌu-ajꞌu aae ètu Mamre, dhu padètu dènge Hebron. Èle èèna ka, na pudhi hadhu tao mei korban ho na mangajꞌi LAMATUA ètu èèna.
340	GEN 14:3	Dhèu aae, dhèu lèmi sèra pakaboko dènge sordadꞌu ra, ètu dꞌara mamoo Sidim, (dhu limuri ne, ngara na Dhasi Madhe).
344	GEN 14:7	Èle èèna ka, ra lèpa hari asa En Mispat (dhu limuri ne ngara na Kades). Ka ra segi rai dhèu Amalek, dènge dhèu Amori dhu pea ètu rae Haseson-Tamar.
350	GEN 14:13	Te ngaa dhèu èci rai nèti era èèna. Ka laꞌe lolo dènge Abram, dhèu Ibrani èèna. (Lodꞌo èèna, dhèu Amori èci, ngara na Mamre. Aa Abram pea dètu dènge ajꞌu-ajꞌu aae unu Mamre. Aꞌari Mamre dhèu dua, ngara na Eskol dènge Aner. Rèngu se dhu paꞌanga dènge Abram.)
354	GEN 14:17	Ropa Abram segi nare dhèu aae èpa sèra, ka na lèpa. Hèia dhèu aae Sodom mai soru ne ètu dꞌara mamoo Sawe (dhu dhèu biasa peka na, Mamoo Dhèu Aae).