23214	MAT 1:1	Ia atsh mahsi g Jesus Christ jewed dahm k ab d amjedkamaj hegai t‑kekelibad ha‑kownalig mash hab chehgig David. Kush g Davidbad ab d amjedkamaj hegai mash d t‑shohshon ahchim Tutuligo ch hab chehgig Abraham. In ant wo oꞌoha g ha‑chechgig hegam mash d Jesus Christ shohshonbad.
23229	MAT 1:16	Tsh g Jacob an alidt g Joseph. Kush ihda Joseph d kunaj hegai mo d Jesus jeꞌe ch hab chehgig Mary. K ihda Jesus hab e aꞌaga Christ.
23230	MAT 1:17	Pegih, nt gamai giꞌik an oꞌoha g ha‑chechgig hegam mo d e‑oꞌogbad am i amjed mash eda am oimmed g Abrahambad ch am hugkam mash eda am oimmed g Davidbad. Kunt hab waꞌap gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh eda gam hu hab i e juh g t‑shohshon Babylon wui. Kunt gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh ab mahsi hegai mo hab e aꞌaga Jiosh si Kehsha (Christ).
23231	MAT 1:18	Ia ant wo oꞌoha matsh has e juh matsh eda mahsi g Jesus Christ. Am amtsh i apꞌech matsh idam Joseph ch Mary wo e hohont. Tsh am hahawa s‑e mai mat g ali wo bei.
23291	MAT 4:13	k am jiwia Nazareth t ab. K am hema ep d kihhim mo d Capernaum ch an hugidaj an g Galilee kahchki. Kutsh am i dahiwua g Jesus.
23347	MAT 5:44	Nt wabshaba am wo em‑ahgi mamt pi hegam waꞌi ab wo si ha tatchuad e‑naipijju. Chum o hems g pi ap hemajkam ab si ha tatchua g e‑naipijju ch wabshaba pi heg hekaj wo e doꞌibia. Neh, ahpim amt chum hems g e‑obga wo si ha tatchuad ch am ha wehhejed wo e hoꞌigeꞌidahunad Jiosh wui. Jiosh o chum hems g pi ap hemajkam ab si ha tatchua ch ab ha mahk g tash tonlig ch juhki. Kumt ahpim hab wo chum masmak mo g Jiosh nam pi d aꞌaligaj.
23396	MAT 7:11	Chum ams d pi apꞌekam ch eda s‑mahch mamt s‑kehg haꞌichu wo ha mah g e‑aꞌaliga. Wahm hig g em‑ohg Jiosh at woho baꞌich i s‑kehg haꞌichu ab wo em‑mah mamt ab wo tahnid haꞌichu.
23419	MAT 8:5	Kutsh gam hu hahawa hihi idam Jesus k am dada Capernaum t am. Sh amai am hema d shondal ha‑geꞌejig ch ab Rome t amjed am d ha kehsha ch ab si tahni g i wehmtadag ch hab kaij,
23449	MAT 9:1	Tsh an hahawa gahi ep hihi g wahlkokaj idam Jesus k am dada Capernaum t am mo am kih.
23551	MAT 11:23	Capernaum t am hemajkam o ab si e haschud. T wabshaba g Jiosh gam hu wo shul Jiawul kih ed. Hegam mash wa am kih Sodombad t am at gam hu wo s‑ohhod g pi ap e‑chegitoi matp wo nei ihda s‑hasig haꞌichu. Kut pi wo chum padch g ha‑kihhim.
23552	MAT 11:24	Idam at pi am hu hugkam wo bei g s‑koꞌok e‑namkidadag mat g Capernaum t am hemajkam mat hekid wo e ai g geꞌe lodaita.”
23622	MAT 13:14	K hekaj am wohokamchud hegai mo an hab chuꞌig Isaiabad oꞌohana ed mash wa hab kaij Jiosh. Bo chuꞌig: Chum am hekid ab kah g haꞌichu ni‑ahga ch ab neidchug g ni‑apꞌechuda ch wabsh pi amichud
23736	MAT 15:34	D hab kaij g Jesus, “Heꞌekia at am i wih g sismito?” Chd hab kaij, “Al wewaꞌak sismito ch al heꞌekia chuꞌuchum waptopi.”
23754	MAT 16:13	Kuchd gam hu hahawa hihim k am i miabi g Cesaria Philippi kihhim. D g Jesus ab t‑kakke ch hab kaij, “Am g wo ni‑ahgid Dohꞌo ni‑elid g hemajkam?”
23789	MAT 17:20	D hab kaij g Jesus, “Heg amt hekaj pi e nako mam pi ab hu wohochud mat hab wo e juh. Nt wo si shel em‑ahgi mamt wo e nakog k wabsh chum haschu hab wo juh mamt hab wo chei s‑wohochudch mat hab wo e juh. Chum at hems g geꞌe doꞌag gan hu hab wo i kekiwua mamt wabsh wo ahgi s‑wohochudch mat hab wo e juh. [
23793	MAT 17:24	Kuchd ged hu dada Capernaum t am. D am hema jiwia Peter wui hegam mo an hemapad g cheopi kowlanta k ab kakke ch hab kaij, “No ha namkid g cheopi kowlanta g em‑mashchamdam?”
23796	MAT 17:27	Ch wabshaba pi tatchua machs wo ha kudu idam hemajkam. Kupt heg hekaj am wo hih shuhdagi wui k am wo wua g waptopi hukshpakud. Kut g si wehpeg watopi mapt wo huksh g lial ab wo kamshchid mat wo ai hegai cheopi kowlanta an ni‑wehhejed ch ep m‑wehhejed. Pt am wo be k hekaj wo ha namkid.”
23803	MAT 18:7	Chum o hekid an hab e wua g pi apꞌekam jewed dahm. K hegam mo hab wua am haꞌi ep ha wanchshulig pi apꞌekam wui. T g Jiosh hemho wo wa ha namkid.
24071	MAT 24:45	“Chum amt hedai wo e nahtokch mamtp wo s‑wapagimak ch wo s‑chu aꞌamichudad. S‑mahch am mat g ha‑ahmo hema wo e‑gahgi g hab mahs pion k wo nuhkudach g e‑kihdag. T heg s‑ap wo ha chikpanchudad ch wo ha dagioꞌidad g e‑wehm pion mat eda pi an hu wo haꞌichugk g ha‑ahmo.
24085	MAT 25:8	“K hab kaij hegam mo pi haꞌichu nenꞌoid, ‘Ab g wo i ha t‑mahki g e‑a‑saidiga. Chuhchkim o g t‑lalampa.’
24149	MAT 26:26	Chd am wabsh kia t‑gegosid. D g Jesus am bei g chemait k ab hoꞌigeꞌel g Jiosh k am hahawa i hahain k ab t‑mah k hab kaij, “Oi g wo huhgi ihda. Do ni‑honshpadag.”
24164	MAT 26:41	Si g wo haꞌichu nenashanad ch ab wo tai g Jiosh g gewkdag mamt pi am hu wo shul pi apꞌekam ch ed. Chum am hi wa g s‑apꞌekam hab elid ch eda pi e nakog.”
24180	MAT 26:57	Kumtsh am i bei g Jesus heg kih wui uhgchu pahl mo hab chehgig Caiaphas. Tsh eda am heki hu i e hemapai g chehanig t‑mashchamdam ch geꞌeged.
24230	MAT 27:32	Tsh ab hema i ha nam g oꞌodham mo ab Cyrene kihhim t ab d kihkam ch hab chehgig Simon. Id amtsh ab wabsh si kushwiotach hegai kots mamt ab ab wo naggia g Jesus.
24242	MAT 27:44	Chum wa hema hegam s‑chu eꞌeskam mamt ab hab waꞌap ha nahngia kots t ab hab waꞌap s‑koꞌokam has ahg.
24285	MRK 1:1	Id o d s‑kehg haꞌichu ahgaj g Jiosh ab amjed g alidaj Jesus Christ. Shonaj ihda haꞌichu ahgaj.
24305	MRK 1:21	Kutsh am hihim k am dada Capernaum kihhim t am. Tsh am i e ai g shahwai mach heg eda t‑mihshmad. Kutsh am i wahp ha‑cheopi ed. Tsh g Jesus am ha mihshmad.
24330	MRK 2:1	Kush d wabsh i heꞌekia tash matsh am ep dada hegam Jesus Capernaum t am. Tsh gan hu wa hekaj kaida matsh am dada.
24461	MRK 5:28	hab e ahgch, “Chum anis hems an wabsh wo taht g wehschugaj, t wo ni‑apꞌet.”
24596	MRK 8:27	Kutsh gam hu hahawa hihi idam Jesus am haꞌi ep ha wui g kihhim am miabidch g Cesaria Philippi kihhim. Kush g Jesus ab ha kakke ch hab kaij, “Am g wo ni‑ahgid, dohꞌo ni‑elid g hemajkam?”
24640	MRK 9:33	Kutsh am hihim k ged hu dada Capernaum t am k am i wahp kih ch ed mash hebai dadha. Sh eda haꞌi haꞌichukaj e neꞌowin hihimadch. Kush ab hahawa ha kakke ch hab kaij, “Shahchukaj am e neꞌowinahim mach ab hihim?”
24777	MRK 12:35	Kush am ha mashcham g Jesus geꞌe cheopi ch ed ch hab kaij, “Am g wo oidahim mas hedai d wo Jiosh si Kehshak. Chehanig em‑mashchamdam o em‑mashcham matsh heg d wo amjedkamk hegai t‑kownaligbad mash hab chehgig David.
24782	MRK 12:40	Chum as si chew e hoꞌigeꞌidahun am em‑tahgio ch eda haꞌichu s‑aꞌagi ha wohppoꞌid hegam mo d heheꞌejel wihpkam. T g Jiosh baꞌich i s‑koꞌokam wo ha namkid heg hekaj pi ap ha‑chuꞌijig no pi wabsh pehegia e hoꞌigeꞌidahun.”
24830	MRK 14:7	Chum o hekid ia em‑shahgid g shoꞌigkam. Kumt wabsh chum hekid wo i ha wehmt. Kunt ahni hi pi tash ia hu wo em‑shahgidk.
24861	MRK 14:38	ch ab wehs ha wui hab kaij, “Si g wo haꞌichu nenashanad ch ab wo tai g Jiosh g gewkdag mamt pi am hu wo shul pi apꞌekam ch ed. Chum am hi wa g s‑apꞌekam hab elid ch eda pi e nakog.”
24916	MRK 15:21	D ab hema i ha nam g oꞌodham ch ab him Jerusalem wui ch ash hab chehgig Simon. Id ad an bei g shondal k ab kushwiotach hegai kots mamt ab ab wo naggia g Jesus. Ihda Simon ash ab d kihkam Cyrene kihhim t ab ch d ha‑ohg idam Alexander ch Rufus.
24986	LUK 1:24	Kush amai i mia amjed matsh woꞌiwua g ali. Kush am wabsh s-ap e tahtk ch am e ehstokch g Elisabed e-kih ed hetasp mashad hab kaijhim, “Chum ani hekid si ni-elid mani pi ha mahmadt. Kutki wabshaba id hab ni-juni g Jiosh k hekaj gam hu hab i juh g si ni-edadag am hemajkam ha-nena ed.”
25091	LUK 2:49	Kush hab kaij ab ha wui, “Chum am wa s-mahch mant hemho wa am wo haꞌichugk ni-ohg Jiosh kih ed.”
25095	LUK 3:1	Tsh am hebai i cheka. Kush am daha ihda John mo d Zacariabad alidag am tohono jewed ch ed. Sh wenog am hema d si uhgchu lai wehs ha dahm g jejewed ch hab chehgig Tiberius. Kush am hema ep d kownal Judea chekshani t am ch hab chehgig Pilate. Kush g Herodbad aꞌalidag hab waꞌap d kokownal. Hema ash hab waꞌap chehgig Herod ch ash am d kownal Galilee chekshani ch ed k ch hema hab chehgig Philip ch am d kownal Iturea ch ed ch Traconitis ch ed. Sh g Lisanias am d kownal Abelene ch ed. Kush iaꞌi idani hegam am d si uꞌugchu ha‑papalig g Tutuligo mash hema hab chehgig Annas ch hema hab chehgig Caiaphas. Tsh g Jiosh ab mah g John g haꞌichu e‑ahga mash eda hegai Tiberius am waꞌi daha gamai hetasp aꞌahid ab.
25122	LUK 3:28	Sh g Neri ohgbad d Melchi. Sh g Melchi ohgbad d Addi. Sh g Addi ohgbad d Cosam. Sh g Cosam ohgbad d Elmadam. Sh g Elmadam ohgbad d Er.
25130	LUK 3:36	Sh g Shelah ohgbad d Cainan. Sh g Cainan ohgbad d Arphaxad. Sh g Arphaxad ohgbad d Shem. Sh g Shem ohgbad d Noah. Sh g Noah ohgbad d Lamec.
25131	LUK 3:37	Sh g Lamec ohgbad d Methusela. Sh g Methusela ohgbad d Enoc. Sh g Enoc ohgbad d Jared. Sh g Jared ohgbad d Mahalaleel. Sh g Mahalaleel ohgbad d Cainan.
25132	LUK 3:38	Sh g Cainan ohgbad d Enos. Sh g Enos ohgbad d Seth. Sh g Seth ohgbad d Adam. Sh g Adambad d amjedkamaj g Jiosh.
25155	LUK 4:23	Sh hab kaij g Jesus, “No hig pi woho mamt ab ni‑wui hab wo chei hegai hab ha‑cheꞌidag mo hab chuꞌig, Am g i e maskogid maptp d ge mahkai, k hab ep wo chei, Ia g hu hig hab ep juhni g s‑hasig haꞌichu e‑kih am mapsh has masma am hab ge junihim Capernaum kihhim t am.”
25163	LUK 4:31	Tsh gam hu hahawa hih g Jesus Capernaum wui heg eda chekshani k am ha mashcha g hemajkam cheopi ch ed mo am d i ha‑mihshmda tash.
25247	LUK 6:32	“Pi at wo em‑mah g s‑ap tahhadkam g Jiosh mamtp hegam ab wo waꞌi ha tatchuad mo ab uhpam em‑tatchua. Chum o hems g pi ap hemajkam ab ha tatchua hegam mo ab uhpam ha tatchua.
25248	LUK 6:33	Pi at wo em‑mah g s‑ap tahhadkam g Jiosh mamtp hegam waꞌi ha wehhejed hab wo juh g s‑ap haꞌichu mo s‑ap haꞌichu hab em‑junid. Chum o hems g pi ap hemajkam hab wa masma hab e wua.
25249	LUK 6:34	Pi at wo em‑mah g s‑ap tahhadkam g Jiosh mamtp hegam waꞌi haꞌichu wo ha hiwigi mam hab ha elid mat wo wa uhpam em‑mah. Chum o hems g pi ap hemajkam hab waꞌap aꞌai haꞌichu e hiwgid hab e elidch mat ab uhpam ep wo ui haꞌakia mat heꞌekia ha hiwigi.
25265	LUK 7:1	Neh, tsh am i haꞌasa haꞌichu ha mashcha g Jesus amai k gam hu hahawa hih Capernaum wui. Kutsh g chuhchaij am wehmaj hihi.
25317	LUK 8:3	Kush hema d Joanna. Sh g wehmaj kihkam ihda hab chehgig Chusa ch d haꞌichu am kownal wecho. Kush hema ehp d Susanna. Tsh idam uꞌuwi wo em‑nolawt hegai mash haschu i tatchua hegam Jesus.
25438	LUK 10:6	Kut s‑ap ab wo i em‑nei matp ab wo s‑em‑wohoch k ab wo i em‑wahpki mamt am wo dadkkad. Kumt pi has wo elid k am wo dadkkad ch wo e gegosidad ch an wo i ha ahgidahid g s‑kehg haꞌichu ahgaj g Jiosh am hugkam mamt gam hu wo hihi ab amjed hegai kihhim. Chikpandam o ab d wuikam mat ab wo bei g e‑nam‑kidadag. K idam d ha wuikam mat am hab wo juh. Pi amt inhas wo wahpkid k am wo dadkkad am hugkam mamt ep wo baꞌich hihi.
25447	LUK 10:15	Capernaum t am hemajkam o ab si e haschud. T wabshaba g Jiosh gam hu wo i ha shul jiawul kih ed.”
25570	LUK 12:42	Sh hab kaij g Jesus, “Chum amt hedai wo e nahtokch mamtp wo s‑wapagimak ch wo s‑chu aꞌamichudad. S‑mahch am mat g ha‑ahmo hema wo e gahgi g hab mahs chikpandam k wo nuhkudach g e‑kihdag. T heg s‑ap wo ha chikpanchudad ch wo ha dagioꞌidad g e‑wehm pion mat eda pi an hu wo haꞌichugk g ha‑ahmo.
25581	LUK 12:53	Cheoj atp hems wo s‑kehꞌidad g e‑ohg o g e‑alidag. T g uwi g e‑jeꞌe o g e‑mad o g e‑kahkma jeꞌe wo s‑kehꞌidad.”
25663	LUK 15:6	k ab wo i ha wai g e‑naipijju. T am wo i e hemapai. Kumt hab wo ha ah, ‘Si g wo s‑hehgigk ni‑wehm. Cheh ant g ni‑shoiga mat chum heb hu hih.’ Kut am em‑wehm wo si s‑hehgigk.
25666	LUK 15:9	k ab haha wo i ha wai g e‑naipijju. T am wo i e hemapai. T hab wo ha ah, ‘Si g wo s‑hehgigk ni‑wehm. Cheh ant g ni‑lialiga mant chum heb hu wua.’ Kut am wehmaj wo si s‑hehgigk.
25676	LUK 15:19	K hahawa pi d ni‑wuikam mams hab wo ni‑aꞌagad mani d m‑alidag. Chum anis hems d wabsh wo m‑pionagk.’
25721	LUK 17:1	Sh hab hahawa ep kaij g Jesus ab ha wui hegam mash ab hiwig, “Chum o hekid haꞌichu hab e wua mamtp hems heg hekaj am wo i shul pi apꞌekam ch ed. T wabshaba s‑koꞌokam wo e namkid hegai mat hab wo em‑juh mamt am wo i shul.
25758	LUK 18:1	“Chum amt hekid wo e hoꞌigeꞌidahunad am Jiosh wui ch pi hekid wo dagito,” bash kaij g Jesus ch am hahawa ha ahgid ihda haꞌichu wepogida ahga:
25760	LUK 18:3	T am wui hema jiwia g hejel wiꞌikam uwi k ab tai mat am wo i wehmt namsh pi s‑lodaitamk. T pi ab hu wohog el. K wabshaba id chum hekid ab wui jijiwhia. “Kut hab i e ah g usagakam, ‘Chum ani hi wa pi ab hu has elid g Jiosh ch pi ab hu ha haꞌichuchud g hemajkam.
25895	LUK 20:47	Chum as si chew e hoꞌigeꞌidahun am em‑tahgio ch eda haꞌichu s‑aꞌagi ha wohppoꞌid hegam mo d heheꞌejel wiꞌikam. T g Jiosh baꞌich i s‑koꞌokam wo ha namkid heg hekaj pi ap ha‑chuꞌijig no pi wabsh pehegia e hoꞌigeꞌidahun ch hab wua ihda pi apꞌekam.”
26030	LUK 23:26	Kumtsh gam hu i bei g Jesus ab kushwiotachudk g kots. Kush am hu hebai hihim. Tsh ab hema i ha nam g oꞌodham mash ab him Jerusalem wui. Id ash hab chehgig Simon ch ab d kihkam mash am d Cyrene ch ash ab him ga hu oꞌoidag amjed. Kumtsh am wabsh si be k ab kushwiotach g kots k atsh hab juh mat ab oidk wo himad g Jesus.
26078	LUK 24:18	Sh hema idam hab chehgig Cleopas ch id hab kaij ab wui, “Aha nap ahpi waꞌi hejel pi mahch mat haschu has e juh hemuch huꞌi ch eda am daha Jerusalem t am?”
26127	JHN 1:14	Hegai mo d Jiosh Neꞌoki ad e wepogi g hemajkam k woho t-wepo chuꞌig ch ia t-shahgid d doakam. D g John an aꞌaga k si s-kaidam hab kaij, “Id o d hegai mani hab ahg ch am em-ahgid mat ab hema wabsh ni-oidk wo i e maskogid k eda woho d si s-has haꞌichu nash pi chum hekid an haꞌichug.” Neh, bo kaij g John. Kuchd heg amjed s-mahch g Jesus Christ ch am hahawa s-mai moki d Jiosh alidag ch si s-hemajima ch heg waꞌi ahg wohokam ch woho ab si s-t-hoꞌigeꞌid.
26130	JHN 1:17	Dash Mosesbad matsh wa an oꞌoha g Jiosh chehanig am ha wehhejed g hemajkam. K wabshaba d Jesus Christ mad ia uꞌapa g Jiosh hemajimatalig ch wohokam.
26151	JHN 1:38	D ab haꞌab i e wua k ab i t‑neid k hab kaij, “Shahchu am tatchua?” Ch hab kaij, “Bahp dak ch amjed ha mashcham?”
26154	JHN 1:41	K g Andrew d wehpegkam mat am i gahghi g e‑wehnag k hekid am i chehg k hab ahgid, “Cheh att hegai moki d Christ.” (Id o hab d ahga ‘Jiosh si Kehsha.’)
26158	JHN 1:45	D g Philip gam hu i gahghi g Nathanael k am i chehgiok hab kaij, “Cheh att hegai matki wa ab amjed an oꞌoha hegam Mosesbad ch kekelibad Jiosh haꞌichu i tashogiddam. Heg oki wud mash d Jesus ch heg d alidag mash d Josephbad ch ab Nazareth kihhim t ab d kihkam.”
26165	JHN 2:1	Am gohk d i tash amjed, tsh am haꞌi wo e hohont Cana kihhim t am. Ihda Cana o am Galilee chekchani ch ed. K am haꞌichug g Jesus jeꞌe.
26166	JHN 2:2	Kumd ahchim ab i t-wai. Chd am hihi g Jesus wehm k am haꞌichug. Kumd am hahawa hab juh g gegosig.
26176	JHN 2:12	D am hahawa hab i e ah g Jesus matt am wo hihi Capernaum kihhim wui. D g jeꞌej ch wepngaj ep t-oi. Ch am haꞌichugkahim heꞌekia tash.
26245	JHN 4:20	Pegih neh, am g ni‑ahgid mam haschu ahgch ahpim Tutuligo hab chechꞌe mo g Jerusalem d waꞌi amai mat am wo e ihmad g Jiosh. Ch eda ahchim Samaria t am kihkam ia haꞌab ihm mo hebai g t‑shohshon ihmahim id ab doꞌag.”
26250	JHN 4:25	Sh am wabsh shaꞌi pi amichud g uwi ch hab kaij ab wui, “Heg ani hi wa s‑mahch mat wo jiwia hegai mo d Jiosh si Kehsha ch hab e aꞌaga Christ k wehs haꞌichu wo t‑ahgi.”
26258	JHN 4:33	Chd hab kaij ab aꞌai t‑wui, “A nat ia heki hu hema gegos?”
26271	JHN 4:46	Kuchd oi wa gam hu haꞌab hihi Cana kihhim wui mat wa am si wehpeg hab juh g si s‑hasig haꞌichu mat wa wabsh g shuhdagi nawaitt. D am hema jiwia g kownal pionag ab Capernaum kihhim t amjed am i kaiok mo am haꞌichug g Jesus. Sh id alidag muhkhim. D hab kaij ihda ab wui g Jesus mat am wo hih Capernaum wui k wo doaj g alidaj.
26333	JHN 6:7	D hab kaij g Philip, “Pi att wo shaꞌi t‑nako. Chum achs hems gohk siant pihshkaj wo ui g pahn, t eda pi wo ha ai g haꞌakia hemajkam.”
26343	JHN 6:17	k am chum i chehchsh g wahlkokaj Capernaum wui nad pi hab t‑ah g Jesus k hab kaij matsh pi oi gam hu wo hih. D am i s‑chuk.
26349	JHN 6:23	D idam an chum gagahim ch pi cheh g Jesus k nei matt pi am hu ep dada. D oi wa am i haꞌi dada g wapalko ab Tiberias kihhim t amjed miabidk mat am ha gegos g Jesus hegam muꞌi hemajkam. D idam hemajkam an e baꞌiham k gam hu i gahgio Capernaum wui
26385	JHN 6:59	Neh, bad kaij g Jesus mad eda am ha mashcham g hemajkam ha‑cheopi ed amai Capernaum t am.
26395	JHN 6:69	Ch hahawa s‑wohochud ch s‑mahch map ahpi d hekia s‑apꞌekam ch ab amjed i hih g Jiosh.”
26479	JHN 8:29	Chum ani hekid ab s‑wohog elid. K heg hekaj ni‑wehmaj.” Neh, bo kaij g Jesus.
26503	JHN 8:53	Chum apki si e haꞌichuchud ch hab kaij ihda. Abrahambad atki muh. Nap hab e elid map gam hu baꞌich d i si haꞌichu mo hegai? T g Jiosh haꞌichu i tashogiddambad hab waꞌap koꞌok k huhug. Dohp hab chum e elid?”
26564	JHN 10:14	“Nt eda ahni wo i nako g shoꞌigdag am ha wehhejed g ni‑wohochuddam hab masma mo g si ha nuhkuddam g kahwal chum anis wo ni‑muhkid am ha wehhejed. Kahwal ch ha nuhkuddam o ab aꞌai s‑e mahch. Kuch g ni‑wohochuddam ch ahni ab hab waꞌap aꞌai s‑t‑mahch. Ch ahchim g ni‑ohg wehm hab wa masma ab aꞌai s‑t‑mahch.
26641	JHN 11:49	Sh am haꞌichug hegai mad d si uhgchu pahl ch hab chehgig Caiaphas ch si s‑gewkam hab ha ahg, “Kaij, ahpim am shaꞌi pi haꞌichu aꞌamichud
26646	JHN 11:54	D heg hekaj hahawa pi an hu s‑masma oimmed g Jesus Judea chekshani ch ed am i dagitok g Bethany. Chd gam hu hihim k am haꞌichugkahim mo am d Ephraim kihhim mo am miabidch g tohono jewed.
26650	JHN 12:1	Chuhdp tash o wa am wiꞌis mat wo e ai g t‑shohshon ha‑doꞌibiadag wuhshda.
26657	JHN 12:8	Chum o hekid ia em‑shahgid g shoꞌigkam. Nt wabshaba ahni hi pi wabsh chum hekid ia wo em‑shahgidk.”
26661	JHN 12:12	D am baꞌich i mahsi. Kuchd am i t‑nakog k gam hu hihi Jerusalem wui. D eda muꞌi am e hemapadch g hemajkam kihhim ch ed mat wo wuhshad g t‑shohshon ha‑doꞌibiadag. Chd am hihim wohg ch ed. D muꞌijj ga hu t‑nam am i kaiok mat am wo jiwia g Jesus.
26777	JHN 15:9	“Bani masma si em‑tatchua ch si pihk em‑elid mo hab masma si ni‑tatchua g ni‑ohg. Ab ani si s‑wohog elid g ni‑ohg. Ch ab aꞌai si pihk t‑elid. Kumt ahpim hab waꞌap ab wo s‑ni‑wohog elidad. Tt ab aꞌai wo si pihk t‑elidad.
26825	JHN 16:30	Ch hahawa s‑mahch map wehs haꞌichu s‑mahch. Pi o hab hahawa mahs machs hedai ab wo ge haꞌichu m‑kakke. Ch hekaj hahawa s‑wohochud map ab amjed g Jiosh.”
26867	JHN 18:13	Am ad kih g uꞌugchu papal. Kud gan hu wehpeg i bei heg wui mo hab chehgig Annas. Ihda Annas o d baꞌamad ohgaj hegai mo d si uhgchu pahl ch hab chehgig Caiaphas.
26868	JHN 18:14	K d ihda Caiaphas mad wa am ha shelinid g hahaꞌichu mat hemako wo muh g oꞌodham wehs ha wehhejed.
26878	JHN 18:24	D g Annas am hahawa ha cheha mat am wo uꞌapa Caiaphas wui. Kud an wabsh kia wulshch g Jesus.
26905	JHN 19:11	D hab kaij g Jesus ab wui, “Jiosh at ab m‑mah hegai gewkdag. K heg hekaj si pi ap hab e wua idam Caiaphas mo m‑piꞌichud mapt pi ap wo hekaj g e‑gewkdag.”
26919	JHN 19:25	D am gegok g jeꞌej ch jiskaj g Jesus miabidch amai mo am naggia. Kud gohk am ep ha wehmaj mo hema d hegai Mary mo g wehmaj kihkam d Clopas ch hema d ep Mary Magdalene.
26962	JHN 20:26	Hemako domig amjed, chd am ep i t‑hemapai kih ch ed. D am hahawa t‑wehmaj g Thomas. Chd ab ep si yahwidadch g kihkjeg. D wabshaba ab i wah g Jesus k am jiwia t‑wui k hab kaij, “Am g wabsh wo si s‑ap e tahtk.”
26970	JHN 21:3	D hab kaij g Simon Peter ab t‑wui, “Ih, nt hi wo sha ha uꞌim g waptopi.” Kuchd hab kaij, “Pegih, tt wo m‑oi.” Chd am hahawa dadhaiwua wahlko ch ed k am i himch shuhdagi oidch k ge chuhug oidam am wuakch g t‑chuagia shuhdagi ch ed ch pi haꞌichu shaꞌi bei.