23233	MAT 1:20	Co are José jiẍaxaon jañá, ná ángel de Dios joí ngain cottac̈hin are tajijoa José co ángel mé ndac̈ho: ―José, jaha tti razé David, ẍaonha que ixin María soan c̈hiha, ixin chjan que jehe rrochonda joixin xan de ngain Espíritu Santo.
23240	MAT 2:2	co nttiha joanchiangui xa: ―¿Quettinó jí tti rey de chojni judío que oconcjihi? Janha na desde ngain lado oriente viconxin na conotsé rey mé, co jai janha na joihi na nttihi para sinttasayá na rey mé.
23243	MAT 2:5	Jehe na vinttendac̈ho na: ―Ngain rajna Belén ngain nonttehe Judea, ixin profeta dicjin janhi:
23246	MAT 2:8	Cottimeja Herodes coetonhe canio xí mé para cjoi xa ngain rajna Belén co ndac̈ho ngain xa: ―Ttji ra nttiha, co danchiangui ra jian ttinó jí chjan yá. Co are osinchí ra xan, nchenona ra para que janha cai tsji sinttasayá xan.
23251	MAT 2:13	Después de savinttecji jehe tti canio xí que vinttequixin de ngain lado oriente, are tajijoa José, ná ángel de Dios joí ngain cottac̈hín José co ndac̈ho ángel mé: ―Dingattjen co sattingacoho xanxichjan conixin janné xan. Sattji ra para ngain nonttehe Egipto co tadintte ra nttiha hasta que janha rrondattjo ra, ixin Herodes tsjé xanxichjan para nasoenxon xan.
23258	MAT 2:20	―Dingattjen co sacjancoho xanxichjan conixin janné xan para ngain nontte Israel ixin ondavintteguenhe tti chojni que joinao narrogoenxon xanxichjan.
23263	MAT 3:2	co vandac̈ho ngain na: ―Ẍo tenchehe ra jianha, incheha ra jamé. Ttentoxinhi ra vidá ra ixin tti ttetonha Dios ochian joí.
23268	MAT 3:7	Pero are Juan vicon que atto tsje xifariseo co xisaduceo cjoi xa ngain para rrojiguitte xa cai, jehe ndac̈ho ngain xa: ―¡Jaha ra razé conché! ¿Quensen jointtanoha ra ixin nchao setanha ra tti castigo anto soji que jitonchian?
23275	MAT 3:14	Pero Juan c̈hoha para rrojincheguitte Jesús, co ndac̈ho ngain Jesús: ―Jaha tti jiquininxin sincheguitte na janha; ¿quedonda janha sinttaguitte jaha?
23276	MAT 3:15	Pero Jesús ndac̈ho: ―Pero jaxon sonttoha na jamé ixin ján na jiquininxin sonttoho na inchin rinao Dios. Cottimeja Juan vitticaon.
23278	MAT 3:17	Cottimeja coinhi na tté Dios de ngajni, que ndac̈ho: ―Jehe jihi tti Xanhna que janha anto rinaho, co de ixin jehe Xan janha anto chahna.
23281	MAT 4:3	Cottimeja inchínji conchienhe ngain Jesús para rrojincheyehe, co ndac̈ho ngain Jesús: ―Si ndoa jaha Xenhe Dios, ttetonha que ẍo tehe rrocjan ẍo niottja.
23282	MAT 4:4	Pero Jesús ndac̈ho: ―Tti jitaxin Palabré Dios ndac̈ho: “Chojni sinttechonxin na jeoha de tti jine na, sino cai de cain palabra que Dios ndac̈ho.”
23284	MAT 4:6	Co nttiha ndac̈ho inchínji ngain Jesús: ―Si ndoa jaha Xenhe Dios, daritsingaxin de nttihi hasta tti nontte, ixin ndac̈ho ngain tti jitaxin Palabré Dios: Dios tsetonhe ángel de jehe para senda jaha. Cain ángel mé rrocaha conixin rá para que ẍonhi tti tsonihi rottea de ixin ẍo.
23285	MAT 4:7	Jesús ndac̈ho: ―Cai ndac̈ho ngain tti jitaxin Palabré Dios: “Daqueha prueba ngain Dios tti chonda joachaxin para ixin jaha.”
23287	MAT 4:9	Co ndac̈ho inchínji ngain Jesús: ―Janha rrochjaha jaha cain yá si jaha sarittoxin nttajochjiha co sinchesayana janha.
23288	MAT 4:10	Cottimeja Jesús ndac̈ho ngain inchínji: ―Sattjixin de nganji janha, Satanás, ixin ndac̈ho ngain tti jitaxin Palabré Dios: “Nchesayehe jeho Dios tti chonda joachaxin para ixin jaha, co jeho ngain jehe ditticaon jaha.”
23295	MAT 4:17	Desde are mé Jesús coexinhi ndache chojni de ixin Dios. Jehe vandac̈ho ngain na: ―Ttentoxinhi ra de tti jianha que jaha ra tenchehe ra ixin Dios que ttjen ngajni otoin tsetonha nganji ra.
23297	MAT 4:19	Jesús ndac̈ho ngain cayoi xí mé: ―Ẍacoi ra chjin na; jaha ra ttjejo ra copescado pero jai janha sinttacoanha ra queẍén tsjejo ra chojni para ixin Dios.
23306	MAT 5:3	―Anto c̈hjoin para ixin tti chojni que ẍaxaon ixin rrogondehe na que Dios tsjenguijna na, ixin chojni mé tequininxin na ngajni tti ttetonha Dios.
23320	MAT 5:17	Co Jesús ndac̈ho cai: ―Ẍaxaonha jaha ra que janha joihi para jointtaxantte ley que vayé Moisés ni cain tti ndac̈ho cain profeta are saho; janha joiha para jointtaxantte cain mé, janha joihi para joindattjo ra tti mero ndoa quehe rroc̈ho cain mé.
23336	MAT 5:33	Cai ndac̈ho Jesús: ―Cai jaha ra ocoinhi ra ixin vitonhe nindogoelitoa ra ẍanc̈hjen janhi: “Ttinttoeha de nchehe tti jaha joincheprometé conixin ná juramento de ixin nombré Dios.”
23356	MAT 6:5	Co Jesús ndac̈ho cai: ―Are jaha ra sinchecoanxinhi ra Dios, ncheha ra inchin nchehe tti chojni que ncheẍoxinhi na nchecoanxinhi na Dios tatengattjen na ngaxinhi nihngo co ngain esquiné nttiha, para que icha chojni sicon na. Chojni mé ndac̈ho na ixin nchehe na jañá para ixin Dios, pero ndoaha. Janha rrindattjo ra que Dios tsjengueha hna chojni mé tti jehe na tenchehe na, ixin ochonda na tti sacha na.
23367	MAT 6:16	Co Jesús ndac̈ho cai: ―Are jaha ra sinttecjáño ra para ixin Dios, dinttechinha ra inchin tti chojni que ncheha inchin ndac̈ho. Chojni mé ndac̈ho na ixin tecjáño na para ixin Dios pero nahi, ixin chojni mé dinttechín na para que icha chojni dicon que ixin jehe na tecjáño na. Pero janha rrindattjo ra seguro que chojni mé Dios ẍonhi tsjenguehe na hna ixin ochonda na tti sacha na.
23370	MAT 6:19	Cai ndac̈ho Jesús: ―Datseha ra tsje cosa nttihi ngataha nontte, nttihi tti ndattjehe cochí co nttihi tti cain cosa ndaditján, co nttihi tti jí tti chehe que tté cain cosa.
23373	MAT 6:22	Cai ndac̈ho Jesús: ―Jmacon jí inchin ná lámpara ngain cuerpoa. Mexinxin si jmacon jian, cai ngoixin cuerpoa rrochonda joadingasán. Rroc̈ho si joadingasán que Dios rroanha jí ngain ansean, jaha ná chojni jian.
23376	MAT 6:25	Cai ndac̈ho Jesús: ―Co janha rrindattjo ra que taha ra joachjaon de ixin tti sintte ra co de ixin tti sihi ra para sinttechonxin ra, ni taha ra joachjaon de ixin lontto para sinttengaha ra ixin icha rentte vidé ni que tti jine ni, co icha rentte cuerpoe ni que lonttoe ni. Ixin Dios chjá ra vida que techonxin ra, mexinxin jehe tti rrochjá ra cain cosa que rrogondaha ra ngain vida jihi.
23416	MAT 8:2	Co conchienhe ná xí que veninxin chin dinhi lepra. Xí mé vettoxin nttajochjihi xa ngattoxon con Jesús co ndac̈ho xa: ―Si rinao soixin, nchao nchexingamana de ixin chin que janha rrichonda.
23417	MAT 8:3	Cottimeja Jesús catte xí mé co ndac̈ho ngain xa: ―Ján, rinaho. Co jaxon oxingamaha jaha. Co are Jesús ndac̈ho yá jehe tti venihi mé xingamehe de ixin tti chin que jehe vechonda.
23418	MAT 8:4	Co Jesús ndac̈ho ngain tti xí mé: ―Tsjenxin, ẍonhi chojni ndache. Jeho ttji co tonchienhe ngain xidána para que jehe xa sicon xa ixin jaha oxingamaha, co danjo para ixin Dios inchin ttetonha ley que vayé Moisés, para que cain chojni nttiha tsonohe na que jaha oxingamaha de ixin tti chin que joarichonda.
23420	MAT 8:6	co ndac̈ho xa: ―Nttatsanha ñao soixin nchexingamehe ná xinchehe ẍana ixin nihi xa. Tajitsinga xa ngain nchia co c̈hoha ttingui xa co cai anto jittín xa.
23421	MAT 8:7	Jesús ndac̈ho: ―Janha tsji sinttaxingamá xí mé.
23422	MAT 8:8	Co xicapitán mé ndac̈ho xa: ―Nttatsanha ñao soixin, janha ni jiquininxinha na para soixin sixinhi nchiania. Jeho rinaho janha que soixin ttetonha co xinchehe ẍana orroxingamehe xa.
23424	MAT 8:10	Are Jesús coinhi jihi jehe goan admirado co ndac̈ho ngain chojni que jidicao: ―Janha rrindattjo ra ndoa que cainxin rajna de Israel ẍonhi chojni vetan janha que anto jian ditticaon inchin xí jihi.
23427	MAT 8:13	Cottimeja Jesús ndac̈ho ngain xicapitán mé: ―Sattji nchiandoi, co tsonhe inchin jaha ditticaon. Co xinchehe ẍé mé xingamehe xa ngain rato mé.
23433	MAT 8:19	Co ngain rato mé conchienhe ná ximaestroe ley Israel ngain Jesús co ndac̈ho xa: ―Maestro, janha rinaho sacjin na tti soixin sacji.
23434	MAT 8:20	Jesús ndac̈ho: ―Cain condaniẍa chonda va cuevé va co cain conttoa chonda va caqué va; pero janha, tti Xí que joixin de ngajni, chondaha ni ttinó saric̈hin.
23435	MAT 8:21	Co iná de tti chojni que vacao Jesús ndac̈ho: ―Janha ján sacjin na, pero chonna na hasta ndasenja ndodana para que janha tsjavá ndo.
23436	MAT 8:22	Co Jesús ndac̈ho: ―Chjin na co tanc̈hjanda tti chojni que ditticaonha na janha tsjavá chó na.
23439	MAT 8:25	Cottimeja cain chojni que joicao cjoi na joinchexingamehe na Jesús co ndac̈ho na ngain: ―Nttatsanha na ñao soixin, tanc̈hjandaha ni ra ndasenhe na ixin barco ndajixincanjingui jinda.
23440	MAT 8:26	Jesús ndac̈ho ngain na: ―¿Quedonda anto ẍaon ra? ¡Jaha ra antoha jian ditticaon ra tti janha ndattjo ra! Cottimeja vingattjen Jesús co nichjé c̈hintto conixin jinda, co ngain rato mé tavehe c̈hintto conixin jinda.
23441	MAT 8:27	Co cain chojni mé vinttegoan na admirado, co vinttendac̈ho na: ―¿Quehe joachaxin chonda xí jihi que hasta c̈hintto co jinda ditticaon tti ndac̈ho xa?
23443	MAT 8:29	Co vinttendac̈ho xa sén: ―¿Quedonda joihi nganji na, jaha Jesús, Xenhe Dios? ¡Ẍa jeha tiempo para que jaha sincheguetan ni ra tangui!
23445	MAT 8:31	Co cain espíritu jianha joinchetsenhe ñao Jesús co ndac̈ho: ―Si senguixin na de ngaxinhi cayoi cuerpo tehe, nttatsanha na ñao tanc̈hjanda na sixinhi na ngaxinhi cocochi taha.
23446	MAT 8:32	Cottimeja Jesús ndac̈ho: ―Ján, diguixinhi ra nttiha remé. Co cain espíritu jianha vac̈hjexin de ngaxinhi cayoi cuerpoe xí mé co savixinhi ngaxinhi cain cocochi mé. Cottimeja cain jehe va ndavinttecoloco va co coinga va xincanji va ngain ná lago nttiha, co nttiha joingui va jinda co nttiha ndavintteguenxin cainxin va ixin vinttecjonhe va jinda.
23450	MAT 9:2	Nttiha joicaohe na Jesús ná tti xí que c̈hoha vacji, tajitsingataha xa ná camilla. Are Jesús vicon que cain chojni que joicao tti nihi mé chonda seguro que Jesús sinchexingamehe jehe tti nihi mé, Jesús ndac̈ho ngain tti nihi: ―Ẍaonha, janha ojointtatjañaha cain tti jianha que jaha rrica.
23452	MAT 9:4	Pero Jesús ovenohe tti teẍaxaon xí mé, co jehe ndac̈ho ngain xa: ―¿Quedonda anto jianha tti jaha ra ẍaxaon ra?
23454	MAT 9:6	Nchao remé, janha tsjagoha ra que janha, tti Xí que joixin de ngajni, chonda joachaxin nttihi ngataha nontte para nttatjañá chojni tti jianha que nchehe na. Cottimeja ndac̈ho Jesús ngain tti c̈hoha vacji mé: ―Dingattjen co tsinhi camillá co sattjixin rottea para nchiandoi.
23457	MAT 9:9	Cottimeja Jesús sacjoixin de nttiha, co ngatja nttiha Jesús vicon Mateo tají ngaca mesa tti jinchexin cobro cain impuesto. Co Jesús ndac̈ho ngain: ―Ẍacoi, chjin na. Co ngain rato mé jehe Mateo vingattjen co sacjoi conixin Jesús.
23459	MAT 9:11	Pero canxion xifariseo vintteguicon xa jihi, co después vinttejanchiangui xa ngain tti chojni que vacao Jesús co vinttendac̈ho xa: ―¿Quedonda ximaestroa ra jinecaho xa cain xicobrador de impuesto, co icha chojni que nchehe jianha?
23460	MAT 9:12	Jesús coinhi jihi, co jehe ndac̈ho ngain xa: ―Chojni que niha, chojni mé rrogondeha xincheẍoan, jeho tti chojni nihi, mé tti rrogondehe xincheẍoan.
23462	MAT 9:14	Cottimeja chojni que vacao Juan, tti vancheguitte chojni, conchienhe na ngain Jesús co ndac̈ho na: ―¿Quedonda janha na, conixin cain xifariseo anto dinttecjáño na para ixin Dios, co chojni que c̈hjiho jaha dinttecjañoha na?
23463	MAT 9:15	Jesús ndac̈ho ngain na: ―¿Apoco cain chojni que ttji ngain ná vandango tti tottehe na nchao sinttecjáño na si xinovio ẍa jí xa ngayehe na? Pero, ján, tsí tiempo que xinovio satsjixin xa de ngain na, cottimeja jehe na sinttecjáño na.
23466	MAT 9:18	Jesús ẍa jindac̈ho cain palabra yá are joí ná xí que ttetonha ngain nihngo nttiha. Vettoxin nttajochjihi xa ngain Jesús co ndac̈ho xa: ―Ná xannc̈hichjanhna jaxon joexin ndavenhe xan. Pero si soixin sihi co tsín rá ngataha xan, jehe xan rrocjan rroxechon xan iná.
23470	MAT 9:22	Pero Jesús ngaria co jehe vicon nc̈hí mé, co ndac̈ho ngain nc̈ha: ―Ẍaonha, jaha oxingamaha ixin vitticaon. Co desde ngain rato mé, nc̈hí mé ondaxingamehe nc̈ha.
23472	MAT 9:24	Jesús ndac̈ho ngain na: ―Dac̈hjexin cain ra de nttihi, ixin xannc̈hichjan yá jeha ndadiguenhe xan, jeho tajijoa xan. Cain chojni nttiha cjoanoa na Jesús ixin jehe ndac̈ho jañá.
23475	MAT 9:27	Are Jesús sacjoixin de nttiha, rroé yó xí que vaguiconha co vinttendac̈ho xa sén: ―¡Ttiaconoana ni ra soixin, tti razé David co tti chonda joachaxin que vechonda rey David!
23476	MAT 9:28	Co are Jesús joixinhi nchiandoha, jehe cayoi tti vaguiconha mé vintteconchienhe ngaca Jesús co jehe joanchianguihi cayoi xí mé: ―¿Aditticaon ra que janha nchao sinttaẍoán jmacon ra? Cayoi xí mé ndac̈ho xa: ―Ján ditticanho na que soixin nchao sincheẍoanna ni ra.
23477	MAT 9:29	Cottimeja Jesús catte ngataha jmacon cayoi xí mé co ndac̈ho: ―Tsonhe inchin jaha ra ditticaon ra.
23478	MAT 9:30	Co ngain rato mé ndaxingamehe jmacon cayoi xí mé. Cottimeja Jesús anto coetonhe xa co ndac̈ho ngain xa: ―Ẍonhi chojni ttequinhi ra quehe conha ra.
23481	MAT 9:33	Are Jesús joantsje espíritu jianha mé, jehe tti xí mé coexinhi nichja. Cain chojni que vicon nttiha vinttegoan na admirado co ndac̈ho na: ―Nttihi Israel ẍonhi tiempo vocon na ná cosa inchin jihi.
23482	MAT 9:34	Pero xifariseo vinttendac̈ho xa: ―Xí jihi nchao dengui xa espíritu jianha de ixin joachaxín Satanás ixin Satanás tti ttetonhe cain espíritu jianha.
23485	MAT 9:37	Cottimeja jehe ndac̈ho ngain tti chojni que vacao: ―Ján ndoa, que cosecha atto tsje pero ninchehe ẍa tsjeha na.
23491	MAT 10:5	Jesús coetonhe tti tteyó chojni jihi janhi: ―Ttjiha ra ngain región tti te chojni que jeha judío, ni ttjiha ra ngain nonttehe Samaria.
23531	MAT 11:3	ixin quensen jehe, co ndac̈ho na ngain Jesús: ―¿Ajaha tti Cristo tti chonda que tsí, o ẍa rrochonda na que rrochoan na iná chojni?
23532	MAT 11:4	Jesús ndac̈ho: ―Ttji ra co dindache ra Juan tti jaha ra tedicon ra jaxon co tti jaha ra tettinhi ra.
23535	MAT 11:7	Are cayoi tti chojni mé sacjoi na, Jesús coexinhi ndache icha chojni que te nttiha de ixin Juan, tti vancheguitte chojni, co Jesús ndac̈ho: ―Are cjoi ra ngagaha jna tti ẍonhi chojni te para joitsjehe ra Juan, ¿quehe ẍaxaon ra rroguicon ra jehe? ¿Aẍaxaon ra ixin joarrixaoen seguroha inchin nttaxiji que nchequingui c̈hintto,
23549	MAT 11:21	―¡Anto tangui tsonha jaha ra de ngain rajna Corazín, co cai jaha ra de ngain rajna Betsaida! Ixin tti cain milagro que janha jointtaha ngayaha ra, si cain milagro mé rroconhe ngayehe chojni de ngain ciudad de Tiro co ciudad de Sidón, cain chojni mé osé rroquentoxinhi na vidé na de tti jianha que vanchehe na. Co para rrocjago na que ixin jehe na orroquentoxinhi na vidé na, jehe na rroguinttengá na lontto ttie co rrocjinttjitte na nttesoguihi já na.
23553	MAT 11:25	Ngain rato mé Jesús ndac̈ho: ―Padre soixin que joinchechjian ngajni co nontte, janha chjaha gracias soixin ixin soixin coema tti ndoa para ngain tti chojni que anto chonxin co anto sé coangui na, co cjoago tti ndoa mé ngain tti chojni que tsjeha chonxin.
23560	MAT 12:2	Co canxion xifariseo vintteguicon xa mé, co vinttendac̈ho xa ngain Jesús: ―Tsjenxin, chojni que c̈hjiho tenchehe na ẍa co jiquininxinha sinchehe ni ẍa ngain tti nchanho que nchejogaha ni.
23561	MAT 12:3	Pero Jesús ndac̈ho ngain xa: ―¿Aẍa tsjeha ra tti jitaxin ngain Palabré Dios ixin quehe joinchehe David conixin cain xicompañeroe ná nchanho are vintteguenhe na jintta?
23568	MAT 12:10	Co ngaxinhi nttiha tají ná xí que ndadixemadoho ná ra, co xifariseo techonhe xa quehe cosa nchaoha rrojinchehe Jesús para rrocjanguihi xa. Mexinxin joanchiangui xa ngain co ndac̈ho xa: ―¿Ají joachaxin para que sinchexingamehe ni chojni nihi mero ngain tti nchanho que nchejogaha ni?
23569	MAT 12:11	Jesús ndac̈ho: ―Si ná de jaha ra chonda ra ná coleco, co si setsingá va ná pozo ngain tti nchanho que nchejogaha ni, ¿atsjiha ra para sigantsjea ra va? ¡Seguro que ján!
23571	MAT 12:13	Cottimeja ndac̈ho Jesús ngain tti xí que dixemadoho rá: ―Ttinxe rá. Co are jehe coinxe rá, ojian vittohe ra inchin ra jngo.
23581	MAT 12:23	Cainxin chojni goan na admirado ngain rato mé, co vinttendac̈ho na: ―Puede jihi tti razé David que rrochonda ẍajeho joachaxin que vechonda rey David.
23582	MAT 12:24	Pero are xifariseo vinttequinhi xa jihi, vinttendac̈ho xa: ―Xí jihi dengui xa espíritu jianha pero de ixin joachaxín Satanás, tti rey de cain espíritu mé co tti dinhi Beelzebú cai.
23583	MAT 12:25	Jesús oconohe quehe tendac̈ho xifariseo mé, mexinxin jehe ndac̈ho ngain xa: ―Si chojni ngain ná nación chjea na para ttetocaho chó na, nación mé tsonc̈hjenha sé, co si ná rajna o ná nindoha anto tteto na, cai tsonc̈hjenha chojni mé sé.
23596	MAT 12:38	Cottimeja canxion xifariseo co canxion ximaestroe ley Israel vinttendac̈ho xa ngain Jesús: ―Maestro, janha na rinaho na sicon na que jaha sinchehe ná milagro.
23597	MAT 12:39	Jesús ndac̈ho ngain xa: ―Chojni jianha que ditticaonha na Dios rinao na sicon na ná milagro, pero chojni mé Dios tsjagoeha na icha milagro que jeho inchin tti conhe profeta Jonás.
23601	MAT 12:43	Co Jesús ndac̈ho cai: ―Are ná espíritu jianha dac̈hjexin de ngain cuerpoe ná chojni, espíritu mé sattji ngain tsje lugar xema para dicjé ttinó sinchejogaha, co are jehe idittjaha lugar mé, jehe ẍaxaon:
23605	MAT 12:47	Ná chojni ndac̈ho ngain Jesús: ―Janná co xanchó ndoja nttihi te na co rinao na rronichja na nganji.
23606	MAT 12:48	Pero Jesús ndac̈ho ngain chojni mé: ―¿Quensen jannana, co quecá xanchian?
23607	MAT 12:49	Cottimeja jehe cjoago ngain chojni que vacao co ndac̈ho: ―Chojni tehe tti inchin jannana co jehe na tti inchin xanchian,
23611	MAT 13:3	Ngain rato mé jehe joinchegonda tsje ejemplo para joinchecoenhe na tsje cosa. Saho jehe ndac̈ho: ―Ná xí cjoi xa joiquenga xa trigo ngataon jngui.
23618	MAT 13:10	Cottimeja tti chojni que vacao Jesús conchienhe na ngain co ndac̈ho na: ―¿Quedonda ndache chojni conixin ejemplo?
23619	MAT 13:11	Jesús ndac̈ho ngain na: ―Jaha ra Dios ndac̈ho para que tsonoha ra queẍén ttetonha jehe ngain ansén chojni, pero jehe na c̈hoha tsonohe na.
23624	MAT 13:16	Cottimeja Jesús cjan ndac̈ho ngain chojni que vacao: ―Pero janha ndac̈hjan que anto c̈hjoin para ixin jaha ra ixin chonxin ra tti dicon ra, co ttinxin ra tti ttinhi ra de ngain ndatsjoan ra.
23632	MAT 13:24	Cottimeja Jesús ndac̈ho ngain na iná ejemplo jihi: ―Rrondattjo ra queẍén ttetonha Dios que ttjen ngajni. Mé inchin ná xí que coenga jian trigo ngain jnguihi.
23639	MAT 13:31	Cai ndac̈ho Jesús ngain na ejemplo jihi: ―Tti ttetonha Dios ngain ansén chojni, mé inchin ná tsé de ca que dinhi mostaza que ná xí ttenga ngataon jnguihi xa.
23641	MAT 13:33	Cai ndac̈ho Jesús ngain na ejemplo jihi: ―Tti ttetonha Dios ngain ansén chojni, mé inchin levadura que ná chojni ttinttjecjan ngain hariné niottja para que nchegangui nchoho.
23644	MAT 13:36	Jesús joanjo joajna ngain cain chojni mé, cottimeja jehe conixin chojni que vacao sacjan na para ngain tti nchia que vintte na are mé. Are ongain nchia mé cain chojni que vacao conchienhe na co ndac̈ho na ngain: ―Ndanchenji ni ra quehe rroc̈ho ejemploe tti ca que c̈hinhi ngagaha trigo ngataon jngui.
23645	MAT 13:37	Cottimeja Jesús ndac̈ho: ―Tti ttenga jian trigo, mé janha, tti Xí que joixin de ngajni.
23652	MAT 13:44	Jesús ndac̈ho iná ejemplo jihi: ―Tti ttetonha Dios ngain ansén chojni, mé inchin ná tesoro que jiẍavá ngataon ná jngui. Are ná xí dittja xa tesoro mé, cjan xa tjavá xa nttiha iná. Cottimeja anto ché xa sacjan xa nchiandoha xa, nchecji xa cainxin cosa que chonda xa co ttehna xa jehe tti nontte que jiẍavá tesoro mé.
23659	MAT 13:51	Cottimeja Jesús joanchiangui ngain chojni que vacao, co ndac̈ho: ―¿Attinxin jaha ra cain jihi? Jehe na vinttendac̈ho na: ―Ján.
23660	MAT 13:52	Cottimeja Jesús ndac̈ho: ―Mexinxin cain jihi rroc̈ho que are ná ximaestroe ley Israel ditticaon xa tti janha ndac̈hjan, jehe xa inchin ná chojni que diquenchjinha yó tesoro ngaxinhi nchiandoha co jehe nchao dantsje tesoro naroaxin co tesoro nttaxí. Ixin ximaestroe ley mé nchao nchecoenhe xa chojni quehe ttetonha ley mé co jai cai nchao ndache xa chojni tti ndac̈hjan janha. Mexinxin rroc̈ho que chonda xa yó tesoro, tti nttaxí co tti naroaxin.
23662	MAT 13:54	Co sacjoi para Nazaret, tti jehe vanguixin. Nttiha coexinhi joinchecoenhe chojni de ixin Dios ngain ningoe na, co cain chojni nttiha vagoan na admirado co ndac̈ho na: ―¿Queẍén coanguixin xí jihi? Ixin anto nohe xa jai. ¿Queẍén nchao nchehe xa cain milagro jihi?
23665	MAT 13:57	Mexinxin jehe na c̈hoha na joinchehe na caso tti ndac̈ho Jesús. Pero Jesús ndac̈ho ngain na: ―Cain chojni nchesayehe na ná profeta pero nahi profeta que ttixin de ngain ẍajeho rajné na o profeta que ttixin de ngain ẍajeho nindoha na.
23668	MAT 14:2	Co jehe mé ndac̈ho ngain chojní: ―Jehe xí yá, mé Juan, tti vancheguitte chojni, que xechon. Mexinxin chondaxin joachaxin de nchehe milagro yá.
23670	MAT 14:4	Juan vandac̈ho ngain Herodes: ―Jianha ixin rricoho nchí yá.
23674	MAT 14:8	Co jehe xan ocoá xan consejo de ngain janné xan, mexinxin ndac̈ho xan ngain Herodes: ―Chjana ngá na láto já Juan, tti ncheguitte chojni.