23216	MAT 1:3	reꞌ Jurah xacꞌunej cho i Pa̱res chꞌi̱l i Sa̱ra naxicꞌam i Tama̱r chi rehqꞌue̱n, reꞌ Pa̱res xacꞌunej cho Hesrom eh reꞌ Hesrom xacꞌunej cho i Aram.
23239	MAT 2:1	Chipam take cho kꞌi̱j naxasjic i Jesus ar pan tinamit Welen pa riyukꞌul i Jure̱ya reꞌ wilic wi̱ꞌ i Hero̱res chi kꞌatal kꞌoric, xicꞌulic lok ar Jerusalen quib xib chi winak jeꞌ ru̱cꞌ aj noꞌjbal aj tijem take ri̱j chꞌimi̱l. Reꞌ take reꞌ xichalic pan jenaj tinamit reꞌ njohtic cho wi̱ꞌ i kꞌi̱j. Naxiponic ajic Jerusalen,
23241	MAT 2:3	Nok ribiram chi asjanak chic i haꞌlacꞌun naricahnic chi kakꞌatal kꞌoric, reꞌ Hero̱res xoquic chi xa ntuquic chic pa ra̱mna ruꞌum reh ricapewjic chi reꞌ chic i haꞌlacꞌun reꞌreꞌ naroquic pa rijelow-bal wi til coric chi jeꞌ reꞌ. Jeꞌ woꞌ reꞌ xquicꞌul take cꞌacharel ruꞌum reh ricapewjic chi reꞌ Hero̱res naricꞌamam je jenoꞌ cꞌaxquilal chi quina̱ ruꞌum reh i haꞌlacꞌun reꞌreꞌ.
23242	MAT 2:4	Chi ntuquic i ra̱mna, reꞌ Hero̱res kꞌuruꞌ xitakꞌa̱ꞌ rimoloric quiwach take nahsil aj kꞌahsem si̱ chiwach i Dios chꞌi̱l take aj tijem ri̱j Cꞌuhbal Yeꞌo̱j reh Moyses eh nok wilque̱b chic cok chiwach, xibiraj queh haj tinamit kꞌoro̱j cahnok ribiral chi narasjic wi̱ꞌ i cꞌacharel reꞌ chi quiwach take ra̱ꞌ riꞌsil cho maꞌ Israhel til reꞌreꞌ i Pahbamaj chi Kꞌatal Kꞌoric.
23243	MAT 2:5	Reꞌ take reꞌ jeꞌ wili xquikꞌor reh Hero̱res: «Reꞌ hoj kehtꞌalim chi pa riyukꞌul Jure̱ya ar chipam i tinamit Welen ribihnal, ar narasjic i haꞌlacꞌun reꞌreꞌ maj reꞌ aj kꞌorol riCꞌuhbal cho i Dios, reꞌ Mique̱yas ribihnal, xitzꞌihmbaj cho chipam rihu̱j chi reꞌ Dios jeꞌ wili rikꞌorom cho chiri̱j:
23244	MAT 2:6	“Hat-tak cꞌacharel wilca̱t tak pa riyukꞌul Jurah ar pan tinamit Welen, maꞌ reꞌ ta chic take toco̱m chic tinamit jeꞌ ru̱cꞌ wilque̱b chipam i yukꞌul reꞌreꞌ nariqꞌuic na̱ quilokꞌil chiwach atinami̱t tak, maj pan atinami̱t tak narasjic i kꞌatal kꞌoric narikꞌatbic kꞌoric chana̱ hat-tak ra̱ꞌ riꞌsil cho maꞌ Israhel reꞌ tilokꞌonic tak wi̱n nqui cho Dios aweh tak, nqui aj kꞌorol cꞌuhbal reꞌreꞌ, nqui take reh.
23245	MAT 2:7	Nok rehtꞌalim chic i Hero̱res haj tinamit xasjic i haꞌlacꞌun reꞌreꞌ, chiri̱j chic naxiꞌelic take je nahsil reꞌreꞌ ru̱cꞌ, reꞌ chic take winak aj tijem ri̱j chꞌimi̱l reꞌ take xiponic chipam i tinamit reꞌreꞌ xiyukꞌej take chi maꞌ hab ta wach nehtꞌalanic reh eh ar xirak chiri̱j rihabil i haꞌlacꞌun reꞌreꞌ naxquikꞌor reh jarub chic kꞌi̱j pꞌuhtunak quilom cho wach i chꞌimi̱l reꞌreꞌ.
23246	MAT 2:8	Chiri̱j chic reꞌreꞌ, xitakꞌa̱ꞌ take je ar Welen chi rehtꞌaljic haj cok reh tinamit reꞌreꞌ wilic i haꞌlacꞌun eh jeꞌ wili takꞌanic xiban je queh naxiꞌo̱j: «Hiy tak ar Welen kꞌuruꞌ eh nok anaꞌbem tak chic chi coric haj wilic cok i haꞌlacꞌun reꞌreꞌ, hiy tak ru̱cꞌ. Nacharak tak chatakꞌa̱ꞌ tak cho rikꞌormojic wi̱n haj wilic cok, reh chi reꞌ hin ewoꞌ nitikꞌa̱ꞌ je wi̱b chi equino̱j chi riyeꞌeric rilokꞌil, nqui je Hero̱res. Jeꞌ reꞌ xikꞌor maj pa ricapew-bal cho ruꞌ cꞌahchiꞌ ricapam ri̱j ricansjic i haꞌlacꞌun reꞌreꞌ.
23247	MAT 2:9	Jeꞌ aj reꞌ chiri̱j nok quibiram chic je xikꞌor Hero̱res, reꞌ take winak aj tijem ri̱j chꞌimi̱l reꞌreꞌ xquichop je quibe̱h chi cꞌahchiꞌ quitahkem je i chꞌimi̱l quilom cho wach cu pan quitinami̱t xichalic wi̱ꞌ. Reꞌ chꞌimi̱l reꞌreꞌ maꞌ xa ta reꞌ xicꞌuhtaj i be̱h, til reꞌ peꞌ woꞌ chic reꞌ xitꞌora̱ꞌ cho risakomil china̱ i pa̱t reꞌ wilic wi̱ꞌ haꞌlacꞌun naxiponic ar.
23250	MAT 2:12	Chiri̱j chic quiwihꞌic ru̱cꞌ Mari̱ya chꞌi̱l Chep, reꞌ take winak aj tijem ri̱j chꞌimi̱l xisoljic woꞌ chic je pan quitinami̱t, xa reꞌ cok ruꞌ pan toco̱m chic be̱h xisoljic je wi̱ꞌ ruꞌum nok reꞌ jenaj raj tzꞌeꞌ wa̱ch i Dios xicꞌuhtaj ri̱b queh pan quiwiric, xikꞌor queh chi maꞌxta chic quisoljic je ru̱cꞌ Hero̱res.
23251	MAT 2:13	Jeꞌ woꞌ, pan jenaj chakꞌab pa riwiric i Chep, jenaj woꞌ chic raj tzꞌeꞌ wa̱ch i Lokꞌ laj Ajabe̱s Dios xicꞌuhtaj ri̱b reh eh jeꞌ wili xikꞌor reh: «Chatikꞌa̱ꞌ awi̱b chi ricꞌamaric je haꞌlacꞌun chꞌi̱l i ritu̱t eh hiy ar pan tinamit Eji̱pto chi ricꞌoloric awi̱b tak ar maj reꞌ Hero̱res naritokꞌom ribe̱h chi risiqꞌuiric rihaꞌlacꞌu̱n i Mari̱ya reh chi naricansam. Tiwi̱ꞌ tak ar cu rehtal chic nikꞌor aweh jaruj chic tisoljic tak cho, nqui reh.
23253	MAT 2:15	eh ar xo̱j cahnok chi cꞌacharic cu rehtal xquimic je Hero̱res. Chi jeꞌ reꞌ kꞌuruꞌ xponic wach rikꞌorbal i kAja̱w Dios rikꞌorom cho chi jeꞌ wili ru̱cꞌ chi̱ꞌ raj kꞌorol riCꞌuhbal reꞌ Ose̱yas ribihnal: “Cu pa riyukꞌul i Eji̱pto xnitakꞌa̱ꞌ je ricꞌamaric i wAcꞌu̱n, nqui Dios, nqui aj kꞌorol reꞌreꞌ.
23254	MAT 2:16	Naxilow i Hero̱res chi xjotꞌoric cuꞌum take winak aj tijem ri̱j chꞌimi̱l, kꞌe̱ꞌ naxchalic ricꞌa̱. Chi jeꞌ reꞌ, reꞌreꞌ ruꞌum chi xicapaj chi reꞌ Jesus wilic pan tinamit Welen on maꞌ naht ta ar, xitakꞌa̱ꞌ rikꞌormojic chi naquicansjic nicꞌ nimal take cucꞌ acꞌun cu reꞌ xiꞌasjic cu rehtal quib ha̱b quihabil reꞌ wilque̱b pan tinamit reꞌreꞌ chꞌi̱l pan tak tinamit wilque̱b pa ricꞌulaꞌt. Jeꞌ aj reꞌ quihabil take cucꞌ acꞌun xicansaj take ruꞌum chi jeꞌ reꞌ habil xinaꞌbej chi wilic reh i Jesus naxibiraj queh take aj tijem ri̱j chꞌimi̱l jarub kꞌi̱j quipꞌutum rilmijic wach i chꞌimi̱l reꞌreꞌ.
23255	MAT 2:17	Ru̱cꞌ aj cansanic xiban i Hero̱res reꞌreꞌ, xo̱j elok wach i xikꞌor cho raj kꞌorol riCꞌuhbal i Dios reꞌ Jeremi̱yas ribihnal chi jeꞌ wili:
23257	MAT 2:19	Chiri̱j chic ruꞌ nok camnak chic i Hero̱res, ar aj pan tinamit Eji̱pto, reꞌ raj tzꞌeꞌ wa̱ch i Lokꞌ laj Ajabe̱s Dios xicꞌuhtaj woꞌ chic ri̱b pa riwiric i Chep
23258	MAT 2:20	eh jeꞌ wili xikꞌor reh: «Chep, yuꞌna maꞌxta chic yohbal chi reh i haꞌlacꞌun maj xquimic chic i Hero̱res reꞌ til xa̱j nak ricansam. Chatikꞌa̱ꞌ awi̱b kꞌuruꞌ, chacꞌam woꞌ chic je i haꞌlacꞌun chꞌi̱l i ritu̱t eh hiy ar pan ayukꞌul i hat-tak ra̱ꞌ riꞌsil cho maꞌ Israhel, nqui xikꞌor reh.
23260	MAT 2:22	xa reꞌ laꞌ ruꞌum riyoꞌjic xoquic cho naxibiraj chi reꞌ racꞌu̱n i Hero̱res, reꞌ Arquela̱yo ribihnal xcahnic chi kꞌatal kꞌoric pa rijelow-bal i raja̱w chipam i yukꞌul reꞌreꞌ, maꞌ xcahnic ta chic ar, reꞌ laꞌ reꞌ ruꞌum chi jenaj raj tzꞌeꞌ wa̱ch i Dios reꞌ xicꞌuhtaj woꞌ chic ri̱b reh pa riwiric xikꞌor reh chi cu yohbal chi queh chi equicahnic ar, reꞌreꞌ xicora̱ꞌ je pa riyukꞌul i Calile̱ya
23284	MAT 4:6	eh jeꞌ woꞌ chic wili xkꞌormojic reh ruꞌum aj Yahm: «Reꞌ hat Jesus rAcꞌu̱n i Dios, reꞌ take raj tzꞌeꞌ wa̱ch quichaꞌjanic aweh maj pan Lokꞌ laj Hu̱j reꞌ wilic wi̱ꞌ i riCꞌuhbal i Dios jeꞌ wili tzꞌihmbimaj: “Reꞌ Dios eritakꞌa̱ꞌ cho take raj tzꞌeꞌ wa̱ch chi etichalic quichaꞌjej i hat racꞌu̱n, nqui tzꞌihmbimaj. «Jeꞌ woꞌ chic tzꞌihmbimaj woꞌ chi jeꞌ wili: “Wi ta nak etikꞌehbic jok wach acꞌal reꞌ take reꞌ etiquicꞌul pan te̱w reh chi maꞌ eta nachꞌey awi̱b wach abaj, nqui tzꞌihmbimaj. «Chacut jok awi̱b kꞌuruꞌ eh ru̱cꞌ reꞌreꞌ encꞌutunic chi til coric i chiꞌnchel reꞌreꞌ, nqui reh Jesus.
23285	MAT 4:7	Reꞌ Jesus jeꞌ wili xikꞌor reh: «Coric xakꞌor, xa reꞌ laꞌ maꞌ riyew ta ri̱b chi enipaj i Dios maj jeꞌ wili tzꞌihmbimaj chipam i Lokꞌ laj Hu̱j reꞌ wilic wi̱ꞌ riCꞌuhbal i Dios: “Ma̱yew chi pajaric awAja̱w Dios, nqui tzꞌihmbimaj, nqui Jesus.
23290	MAT 4:12	Nok ribiram chic Jesus chi reꞌ Wa̱n aj kahsem haꞌ xcojoric pan che̱ꞌ ruꞌum Hero̱res, xsoljic woꞌ chic je pa riyukꞌul Calile̱ya,
23417	MAT 8:3	Reꞌ Jesus jeꞌ wili xikꞌor reh winak reꞌreꞌ naxiyew je kꞌab china̱ chi ritzꞌaꞌjic: «Ho̱ꞌ nwa̱j! Elok lok ayaꞌbilal kꞌuruꞌ, nqui reh. Xa reꞌ woꞌ ti xikꞌor i Jesus chi jeꞌ reꞌ, xelic woꞌ ti lok i xilim wilic nak chiri̱j i winak reꞌreꞌ.
23439	MAT 8:25	reꞌ hoj raj tahkanel xkacꞌaꞌsaj wach naxkilow chi pan yohbal chic wilco̱j eh jeꞌ wili xkakꞌor reh: «Ha̱w, Ha̱w, cꞌaꞌchok awach alah, nakacuxꞌic yuꞌna. Koj-acoꞌlej kꞌuruꞌ, kojqui reh.
23443	MAT 8:29	jeꞌ wili xquikꞌor cho reh Jesus chi xa qꞌueric chic quichi̱ꞌ: «Hat Jesus rAcꞌu̱n i Dios, reꞌ hat xatcꞌulic ti lok chi kayeꞌeric je pan tiꞌcꞌaxic chi jaꞌ nponic ta woꞌ rikꞌijil. Maꞌxta bih nacoj-atzꞌa̱b wi̱ꞌ kꞌuruꞌ chi katꞌermejic lok, nqui take winak reꞌreꞌ chi yeꞌo̱j quikꞌorbal cuꞌum take maꞌ tob laj uxlabal wilic cu̱cꞌ.
23454	MAT 9:6	‹Cꞌuhtbal aj aweh tak chi wilic wajawric chi ricuyuric quimahc i tinamit ayuꞌ wach acꞌal, reꞌ hin Acꞌunbe̱s reꞌ wilic wajawric chi quina̱ cꞌacharel nanikꞌorom reh si̱c wili chi paꞌlajok johtok, nqui queh. Chiri̱j chic reꞌ, reꞌ Jesus xikꞌor reh si̱c chi jeꞌ wili: «Ha̱w, yuꞌna echic riban chi enawihkaj je achꞌaht. Tipa̱ꞌ johtok kꞌuruꞌ maj yuꞌna na̱soljic je pan apa̱t chi behic chic enaꞌn je, nqui reh.
23457	MAT 9:9	Pan jenaj chic kꞌi̱j nok reꞌ Jesus xa cu reꞌ pe ti xipꞌut ribehsjic pa̱m i tinamit Capernahum, reꞌreꞌ xilow niwach i hin maꞌ Tiyoh chi tzꞌukulqui̱n ar reꞌ wilic wi̱ꞌ i me̱xa reꞌ nbanaric wi̱ꞌ to̱j ntakꞌabjic je Ro̱ma eh ar jeꞌ wili xikꞌor wi̱n: «Ha̱w tak chiwi̱j, nwa̱j chi na̱woquic chi hat waj tahkanel, nqui wi̱n. Naxinbiraj chi jeꞌ reꞌ, xnicana̱ꞌ cahnok i nicamaj eh xnitahkej je i Jesus.
23466	MAT 9:18	Chiri̱j chic reꞌ, nok xa cu jaꞌ ricohlaj ta woꞌ i kꞌoric i Jesus cu̱cꞌ take cꞌacharel reꞌreꞌ chi tzꞌuklic cu̱cꞌ, xo̱j cꞌolok ar jenaj winak nim riwaꞌric chi quixilac take ra̱ꞌ riꞌsil cho maꞌ Israhel eh jeꞌ wili xikꞌor reh Jesus chi xuclic cok chiwach: «Ha̱w, reꞌ hin til nicapaj chi reꞌ wixkꞌu̱n xquimic na chic cho yuꞌna maj xa chic qꞌuisi̱n maꞌ nquimic ruꞌum riyaꞌbilal naxinchalic. Chacuy kꞌuruꞌ, tak chiwi̱j pan pa̱t eh chacoj akꞌab china̱ reh chi encꞌacharic woꞌ chic, nqui reh.
23514	MAT 10:28	Jeꞌ woꞌ chic, maꞌ tiyoꞌjic woꞌ tak chi rikꞌormojic niCꞌuhbal chi quiwach take nimak quiwach. Jeꞌ reꞌ nikꞌor maj reꞌ take reꞌ xa reꞌ woꞌ ti acansjic encaꞌn canar. Haj cok wilic i chayohbalej tak wach chi coric chi quiwach take cꞌacharel, reꞌ Dios maj reꞌ cok reꞌ wi xacana̱ꞌ tak rikꞌormojic niCꞌuhbal, til wilic rajawric maꞌ xa ta reꞌ chi resmejic acꞌacharic tak jeꞌ laꞌ woꞌ chi atakꞌabjic tak pan cꞌulbal reh tiꞌcꞌaxic.
23532	MAT 11:4	Reꞌ Jesus naxibiraj i chaj bih xponic quikꞌor take raj tahkanel i Wa̱n, jeꞌ wili kꞌoric xiban queh: «Hiy tak, tisoljen woꞌ tak chic je ru̱cꞌ i Wa̱n eh chakꞌor tak reh reꞌ xabiraj tak chi cꞌahchiꞌ nicꞌuhbalem eh jeꞌ woꞌ chakꞌor take reh i cꞌahchiꞌ awilom tak wili:
23561	MAT 12:3	Reꞌ Jesus jeꞌ wili xicꞌuꞌlej take wi̱ꞌ: «Reꞌ hat-tak xa jaꞌ woꞌ nchel narak ta tak chiri̱j i ribiral nawilow tak wach chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios chiri̱j chaj bih xiban cho i maꞌ Tawiy reꞌ kꞌatal kꞌoric najtir kꞌi̱j. Reꞌreꞌ ruꞌum reh jenaj rinimal laj cꞌahric wilic ru̱cꞌ chꞌi̱l take jarub paꞌ quihchꞌilinic ponok reh, xisicꞌ ri̱j nicꞌ wach naxcaꞌn quiwaꞌ.
23605	MAT 12:47	jeꞌ wili xikꞌor cok reh: «Ha̱w, reꞌ atu̱t chꞌi̱l take acha̱kꞌ wilque̱b lok ri̱j pa̱t, nca̱j ca̱t quikꞌoꞌrem, nqui cok reh.
23635	MAT 13:27	Ar ajic reꞌ take raj tzꞌeꞌ wa̱ch i winak reꞌreꞌ naxquicoj rehtal reꞌ xcꞌuluric, xo̱j quikꞌor reh ajabe̱s chi jeꞌ wili: ‹Ha̱w, reꞌ hat holohic laj ijaꞌ xatic pan ayeꞌa̱b, majeꞌ? Haj xchalic i maꞌ holohic ta laj ijaꞌ wilic chipam ayeꞌa̱b kꞌuruꞌ? nqui take reh.
23636	MAT 13:28	«Reꞌ ajabe̱s reꞌreꞌ, jeꞌ wili xikꞌor queh: ‹Reꞌ xticbic reh maꞌ holohic ta laj ijaꞌ, jenaj aj ixowonel wi̱n, nqui queh raj tzꞌeꞌ wa̱ch. «Naxquibiraj chi jeꞌ reꞌ, jeꞌ woꞌ chic wili xquikꞌor reh ajabe̱s: ‹Ha̱w, ta na re̱t chi eno̱j kachuk take maꞌ holohic ta laj tic reꞌreꞌ? nqui take reh.
23662	MAT 13:54	eh xo̱j chipam i tinamit Nasaret reꞌ qꞌuihinak cho wi̱ꞌ. Nok wilic aj chic ar, xipꞌut cꞌuhtunic chipam i pa̱t ntijiljic wi̱ꞌ ri̱j Cꞌuhbal Yeꞌo̱j reh Moyses, xa reꞌ laꞌ take tinamit jeꞌ wili nquikꞌor chiri̱j chi xa sahchanak chic quicꞌux ru̱cꞌ i cꞌuhtunic chꞌi̱l take lokꞌ laj nawa̱l riban: «Haj woꞌ rirak i rinoꞌjbal i Jesus reꞌreꞌ chi kꞌe̱ꞌ nchol cꞌuhtunic? Eh haj woꞌ nchalic rajawric chi ribanaric take lokꞌ laj nawa̱l riban chi kaxilac?
23664	MAT 13:56	Jeꞌ woꞌ chic maꞌ reꞌ ta na nchel rana̱b take ixkꞌun quicꞌacharic ayuꞌ pan katinami̱t pa ricꞌux? Haj woꞌ xirak cho rinoꞌjbal kꞌuruꞌ chi kꞌe̱ꞌ nchol cꞌuhtunic eh haj woꞌ xchalic rajawric chi ribanaric take lokꞌ laj nawa̱l riban? nqui take.
23667	MAT 14:1	Chiwach aj woꞌ take kꞌi̱j nok reꞌ Jesus wilic ar Nasaret, reꞌ Hero̱res reꞌ kꞌatal kꞌoric pa riyukꞌul i Calile̱ya naxibiraj i kꞌoric ncaꞌn i tinamit chiri̱j i Jesus,
23669	MAT 14:3	Jeꞌ reꞌ xicapaj maj til reꞌ woꞌ Hero̱res xtakꞌanic je richoporic chi naritzꞌaparic pan che̱ꞌ reꞌ xpixaric wi̱ꞌ chi cꞌaham chꞌihchꞌ. Reꞌ riwi̱ꞌ chi jeꞌ reꞌ xiban reh Wa̱n ruꞌum chi reꞌ Hero̱res xicꞌam cok chi rehqꞌue̱n i Herori̱yas reꞌ rehqꞌue̱n richa̱kꞌ reꞌ Pili̱po ribihnal.
23670	MAT 14:4	Chi jeꞌ reꞌ ajic reꞌ Wa̱n jeꞌ wili rinakaric i Hero̱res riban chiri̱j i noꞌjbal xiban: «Reꞌ Cꞌuhbal Yeꞌo̱j reh Moyses maꞌ riyew ta kꞌab chi encꞌamaric chi ehqꞌuenbe̱s jenoꞌ ixok cu cꞌachlic cho ribahi̱l. Reꞌ xaꞌn kꞌuruꞌ chi xamakꞌ cho rehqꞌue̱n acha̱kꞌ maꞌ holohic ta, nqui rikꞌor reh.
23671	MAT 14:5	Ruꞌum aj reꞌ, reꞌ Hero̱res xa ra̱j nak chic ricansam i Wa̱n, xa reꞌ laꞌ jaꞌxta pe bih xiban reh ruꞌum chi nyoꞌjic chi quiwach take tinamit chi naricansam maj reꞌ take reꞌ quehtꞌalanic chi reꞌ Wa̱n jenaj raj kꞌorol riCꞌuhbal i Dios nok wilic.
23672	MAT 14:6	Pan jenaj aj kꞌi̱j nok reꞌ Hero̱res xininkꞌijej wach rihabil, reꞌ rixkꞌu̱n i Herori̱yas xiban riso̱n chi quiwach take chiꞌnchel ula̱ꞌ eh ruꞌum chi kꞌe̱ꞌ xponic chiwach i Hero̱res i so̱n xiban,
23674	MAT 14:8	Reꞌ ixkꞌun reꞌreꞌ naxhunjic pa̱m ruꞌum ritu̱t, jeꞌ wili xikꞌor reh Hero̱res: «Reꞌ hin nwa̱j chi chatakꞌa̱ꞌ je riyocꞌoric chi ralak i Wa̱n aj kahsem haꞌ eh chayew wi̱n pan jenoꞌ perepic wach culc rehtalil chi xquimic chic, nqui reh.
23675	MAT 14:9	Reꞌ Hero̱res reꞌ wilic chi raj toꞌo̱l i kꞌatal kꞌoric aj Ro̱ma chipam i yukꞌul reꞌreꞌ, naxibiraj i pahkanic xiban ixkꞌun reꞌreꞌ, xchalic riyotꞌquil ricꞌux, xa reꞌ laꞌ ruꞌ ruꞌum chi xiyew chic rikꞌorbal reh ixkꞌun reꞌreꞌ chi quiwach take rula̱ꞌ wilque̱b pan ninkꞌi̱j, xitakꞌa̱ꞌ woꞌ rikꞌormojic chi nariyeꞌeric reh rina̱ i Wa̱n.
23679	MAT 14:13	Nok ribiram chic chi xcansjic i Wa̱n ruꞌum Hero̱res, reꞌ Jesus xelic je chipam i tinamit Nasaret eh naxichop je jenaj cano̱wa, xo̱j wihꞌok chipam jenaj yeꞌa̱b chik yu̱kꞌ reꞌ maꞌxta wi̱ꞌ patanel. Naxquehtꞌalij haj xicora̱ꞌ je i Jesus, qꞌuihal take tinamit xiꞌelic je chi co̱k pan tak quitinami̱t, xiꞌo̱j chi pe̱t be̱h reh chi naquikꞌetem ponok chiwach
23681	MAT 14:15	Nok reꞌ Jesus cꞌahchiꞌ ricꞌuhbalem take riqꞌuihal cꞌacharel, reꞌ hoj raj tahkanel naxkilow chi xo̱j chic i kꞌi̱j, xkajil cok ki̱b ru̱cꞌ eh jeꞌ wili xkakꞌor reh: «Ha̱w, reꞌ riꞌorahil i waꞌbal reh xikꞌek xiqꞌuic chic na̱ eh ayuꞌ maꞌ haj ta enkarak wiꞌc quetbal queh tinamit wili maj wilco̱j pan jenaj yeꞌa̱b chik yu̱kꞌ reꞌ maꞌxta wi̱ꞌ patanel. Ra̱j wili chakꞌor ta nak queh chi equiꞌo̱j pan tak abixbal wilque̱b je maꞌ naht ta take ayuꞌ reh chi eno̱j quilokꞌ quiwaꞌ quiha̱ꞌ, kojqui reh.
23683	MAT 14:17	Reꞌ hoj jeꞌ wili xkacꞌuꞌlej wi̱ꞌ: «Ha̱w, chaj bih quiqueteric nakaꞌnam i hoj xa ru̱cꞌ ti hoꞌo̱b chi caxlan wiꞌc chꞌi̱l quib chi joxomaj car wilic ku̱cꞌ? kojqui reh.
23696	MAT 14:30	Chiri̱j ruꞌ, reꞌ maꞌ Luch naxilow take ribohl haꞌ quiꞌuctic ruꞌum ransil i te̱w, xoquic cho riyoꞌjic eh pꞌuht ributꞌlujic jok pan haꞌ. Ruꞌum aj reꞌ xiqꞌuer je chi̱ꞌ ru̱cꞌ Jesus chi jeꞌ wili: «Chacuy Ha̱w, quinacoꞌlej, nqui je reh.
23714	MAT 15:12	Nok rikꞌorom chic reꞌreꞌ, reꞌ hoj raj tahkanel xkajil cok ki̱b ru̱cꞌ eh jeꞌ wili xkakꞌor reh: «Ha̱w, xacoj na rehtal chi reꞌ take cow laj aj niminel reh Cꞌuhbal Yeꞌo̱j reh Moyses xiban quib quicꞌux ru̱cꞌ take kꞌoric xakꞌor queh? kojqui reh.
23717	MAT 15:15	Chiri̱j aj chic reꞌreꞌ, reꞌ maꞌ Luch jeꞌ wili xikꞌor reh Jesus: «Chacuy Ha̱w, chasakomej wach keh i kꞌoric xakꞌor queh tinamit chiri̱j reꞌ nchꞌuwaꞌrsanic wach i ka̱mna, nqui reh.
23725	MAT 15:23	Raj laꞌ Jesus maꞌ xicꞌuꞌlej ta ixok reꞌreꞌ. Naxkilow i hoj raj tahkanel chi jeꞌ reꞌ, xkajil cok ki̱b ru̱cꞌ Jesus eh jeꞌ wili xkakꞌor reh: «Ha̱w, chacuy, chawesaj woꞌ lok i riyaꞌbilal rixkꞌu̱n ixok wili reh chi eno̱j pa ripa̱t. Jeꞌ reꞌ nkapahkaj aweh maj xa chiꞌkꞌor riban chiki̱j, kojqui reh.
23729	MAT 15:27	Chalic woꞌ chic i ixok reꞌreꞌ jeꞌ wili xikꞌor reh: «Ha̱w, til coric aweh nakꞌor xa reꞌ laꞌ jeꞌ ricab naquiqueteric take haꞌlacꞌun maꞌ xa reꞌ ta take reꞌ ncaꞌn quiwaꞌ, jeꞌ laꞌ woꞌ quehtric woꞌ ti chic take tzꞌiꞌ ru̱cꞌ rixe̱r caxlan wiꞌc quikꞌehbic jok rehquen rime̱xa i quico̱ꞌ, jeꞌ ok woꞌ ti reꞌ chaꞌn ku̱cꞌ i hoj maꞌ reꞌ ta hoj ra̱ꞌ riꞌsil cho maꞌ Israhel koj-ehtrok woꞌ ti nechꞌ ok ru̱cꞌ i toꞌbal yeꞌo̱j chi queh take ra̱ꞌ riꞌsil cho maꞌ Israhel, nqui ixok reꞌreꞌ.
23735	MAT 15:33	Reꞌ hoj raj tahkanel jeꞌ wili xkakꞌor reh: «Ha̱w, chipam i yeꞌa̱b wilco̱j wi̱ꞌ maꞌxta patanel. Haj enkarak cho i wiꞌc quetbal queh riqꞌuihal cꞌacharel wili? kojqui reh.
23743	MAT 16:2	Jeꞌ reꞌ kꞌuruꞌ, reꞌ Jesus jeꞌ wili xicꞌuꞌlej take wi̱ꞌ: «Reꞌ hat-tak, nanawilow tak chi cak pa̱m i taxa̱j pan tak xikꞌek, jeꞌ wili nakꞌor tak: ‹Holohic poꞌ kꞌi̱j naribanam ikal, nqui nakꞌor tak.
23748	MAT 16:7	Naxkabiraj chi jeꞌ reꞌ i hoj raj tahkanel, jeꞌ wili pꞌuht kakꞌorom pan kacꞌux: «Ha̱ꞌ, reꞌ Jesus cꞌahchiꞌ rikꞌorom keh wili ruꞌum chi xicoj chic rehtal chi maꞌ manlic ta kawaꞌ xkacꞌam cho, nqui pꞌuht kakꞌorom.
23754	MAT 16:13	Nok pononak chic pan tinamit Sesare̱ya Pili̱po ribihnal, reꞌ Jesus jeꞌ wili xibiraj keh hoj cablaj chi nahsil raj tahkanel: «Reꞌ hin, hin i Acꞌunbe̱s reꞌ wilic wajawric chi quina̱ cꞌacharel xa reꞌ laꞌ, chaj bih nquikꞌor take cꞌacharel chiwi̱j i hin? Hab woꞌ wach i hin chi quiwach ruꞌ? nqui keh.
23756	MAT 16:15	Chi jeꞌ aj reꞌ, xibiraj aj woꞌ chic keh chi jeꞌ wili: «Raj hat-tak, chajaric nacapaj chiri̱j nquikꞌor take reꞌ? Hab woꞌ wach i hin chaweh hat-tak? nqui keh.
23763	MAT 16:22	Nok cu reꞌ ti pe̱t keh ribirmijic reꞌreꞌ, reꞌ maꞌ Luch xesaj lok pa reh i Jesus eh jeꞌ wili xikꞌor reh chi rinakaric: «Chaj waꞌric nanakꞌor chi jeꞌ reꞌ, Ha̱w! Chacapaj soꞌ i Dios chi reꞌ ta nak reꞌreꞌ quetelenok awach chi maꞌ eta nacꞌul i tiꞌcꞌaxic xakꞌor, nqui reh.
23779	MAT 17:10	Chiri̱j wili reꞌ take xib chi kich aj tahkanel reꞌreꞌ, jeꞌ wili xquikꞌor cok reh Jesus: «Ha̱w, reꞌ hoj nkacoj wach chi reꞌ hat i Pahbamaj chi Kꞌatal Kꞌoric. Jeꞌ reꞌ kacapew-bal i hoj xa reꞌ laꞌ chaj bih riwi̱ꞌ chi reꞌ take aj tijem ri̱j Cꞌuhbal Yeꞌo̱j reh Moyses nquikꞌor chi reꞌ maꞌ Eli̱yas naricꞌulic lok chi pe̱t chiwach i Pahbamaj chi Kꞌatal Kꞌoric? nqui take reh.
23786	MAT 17:17	Ar ajic reꞌ Jesus jeꞌ wili quicꞌuꞌljic xiban take tinamit reꞌreꞌ: «Ha̱ꞌ, reꞌ cok hat-tak tinamit, hat-tak chic cow chi rinimjic niCꞌuhbal ruꞌum jotꞌo̱j chic anoꞌjbal tak! Ma̱capaj tak nchel kꞌuruꞌ chi chiwach i quib xib chic kꞌi̱j wilqui̱n chaxilac tak xa cu naca̱t woꞌ nicuyum tak ru̱cꞌ ricowil anoꞌjbal tak reꞌreꞌ, nqui chi kꞌilbal queh. Chiri̱j chic ruꞌ, xikꞌor reh winak chi jeꞌ wili: «Chacꞌam cho wi̱n awacꞌu̱n, nqui reh.
23788	MAT 17:19	Nok reꞌ hoj cablaj chi nahsil raj tahkanel Jesus xa kutquel chic wilco̱j lok, wilic take kichꞌi̱l jeꞌ wili xquikꞌor reh Jesus naxquijil cok qui̱b ru̱cꞌ: «Ha̱w, chaj waꞌric nok reꞌ hoj maꞌ xkaꞌn ta canar ritꞌermejic lok i maꞌ tob laj uxlabal ru̱cꞌ acꞌun reꞌreꞌ? nqui take reh.
23794	MAT 17:25	Chalic maꞌ Simon jeꞌ wili xikꞌor queh: «Ho̱ꞌ, reꞌ Jesus riyew i to̱j reꞌreꞌ, nqui xikꞌor queh. Chiri̱j chic ruꞌ nok hoj chic oconak cok chipam i pa̱t reꞌ wilic wi̱ꞌ kapatal, reꞌ Jesus xa reꞌ woꞌ ti xojponic ar jeꞌ wili xikꞌor reh maꞌ Simon: «Chaj bih nacapaj hat chiri̱j wili: Nanquitakꞌa̱ꞌ rimoloric i to̱j take kꞌatal kꞌoric ayuꞌ wach acꞌal, hab wach aj u̱cꞌ nquimol? Cu̱cꞌ take wilque̱b pa ripa̱t on cu̱cꞌ take cꞌacharel richop quina̱? nqui reh.
23825	MAT 18:29	«Reꞌ rich aj camanom jeꞌ wili rikꞌor reh chi xa nchꞌuk chic ricꞌux: ‹Ha̱w, chacuy quinawuyꞌej pe chic soꞌ ru̱cꞌ nicꞌa̱s. Reꞌ hin xa na woꞌ nitojom aweh, nqui reh.
23828	MAT 18:32	Naxibiraj i kꞌatal kꞌoric chaj bih xiban je raj camanom reꞌreꞌ, xiyukꞌej woꞌ chic ru̱cꞌ eh jeꞌ wili xikꞌor reh: ‹Hat cꞌahbil laj aj camanom, reꞌ hin xnicuy amahc ru̱cꞌ riqꞌuihal acꞌa̱s abanam wu̱cꞌ ruꞌum nok xa nchꞌuk chic acꞌux xapahkaj wi̱n chi cu naca̱t wuyꞌem.
23834	MAT 19:3	Ar aj ruꞌ reꞌ wilic wi̱ꞌ i Jesus, xicꞌulic lok juntuhm queh take cow laj aj niminel reh Cꞌuhbal Yeꞌo̱j reh Moyses eh jeꞌ wili xquikꞌor cok reh chi xa pajbal reh chi haj ta nak encalajic ru̱cꞌ rikꞌorbal chi quiwach: «Ha̱w, reꞌ Cꞌuhbal Yeꞌo̱j reh Moyses riyew na kꞌab chi jenoꞌ winak caxa̱ra erichꞌak ri̱b ru̱cꞌ rehqꞌue̱n ruꞌum chi xa paꞌ ti bih encalajic wi̱ꞌ chiwach? nqui take reh.
23835	MAT 19:4	Chalic Jesus jeꞌ wili xicꞌuꞌlej take wi̱ꞌ: «Reꞌ hat-tak til maꞌ narak ta tak chiri̱j i nawilow tak chipam i Lokꞌ laj Hu̱j reꞌ wilic wi̱ꞌ riCꞌuhbal i Dios, chi reꞌreꞌ naxitikꞌa̱ꞌ i winak chꞌi̱l ixok, wilic take kꞌoric rikꞌorom cho naxitikꞌa̱ꞌ take cho pan pꞌutbal cho reh cꞌacharic.
23847	MAT 19:16	Chipam aj woꞌ yukꞌul reꞌreꞌ, jenaj cꞌacharel xcꞌulic lok ru̱cꞌ Jesus chi rikꞌormojic reh chi jeꞌ wili: «Ha̱w ato̱b laj kaj tijinel, chakꞌor wi̱n, chaj bih ra̱j banaric reh chi equinehtric reh i junelic cꞌacharic? nqui reh.
23848	MAT 19:17	Chalic Jesus jeꞌ wili xikꞌor reh: «Wi xa reꞌ woꞌ Dios kꞌe̱ꞌ ato̱b, naxakꞌor wi̱n kꞌuruꞌ chi hin woꞌ ato̱b, narak ta woꞌ nchel chiri̱j chi reꞌ hin wilic woꞌ wajawric chi rikꞌormojic aweh haj wilic ra̱j banaric? nqui reh. Chiri̱j reꞌ jeꞌ woꞌ chic wili xikꞌor reh: «Reh chi na̱wehtric reh i junelic cꞌacharic, chacꞌam na̱ take takꞌanic wilic chipam i Lokꞌ laj Hu̱j wilic chipam riCꞌuhbal i Dios, nqui Jesus.
23849	MAT 19:18	—Haj wilic take takꞌanic nakꞌor reꞌreꞌ, nqui cꞌacharel reꞌreꞌ. Reꞌ Jesus jeꞌ wili xikꞌor reh: «Reꞌ woꞌ take wili: “Ma̱ban i cansanic, ma̱ban i cꞌoyomal, ma̱ban i lekꞌ, ma̱ban i chucuj kꞌoric chiri̱j awas acha̱kꞌ,
23851	MAT 19:20	Reꞌ cꞌacharel reꞌreꞌ, reꞌ cu qꞌuijol, jeꞌ woꞌ chic wili xikꞌor reh Jesus: «Ha̱w, chiꞌnchel take takꞌanic nakꞌor reꞌreꞌ cu pa nitꞌuchal nipꞌutum cho ricꞌamaric na̱. Chaj chic bih jenoꞌ ra̱j banaric kꞌuruꞌ chiri̱j lok take cꞌuhbal reꞌreꞌ? nqui reh.
23858	MAT 19:27	Chiri̱j chic ruꞌ, reꞌ maꞌ Luch jeꞌ wili xikꞌor reh Jesus: «Ha̱w, reꞌ cok i hoj til woꞌ chiꞌnchel paꞌ bih wilic keh xkacana̱ꞌ cho chi atahkaljic. Ra̱j na rikꞌorom kꞌuruꞌ chi ruꞌum reꞌreꞌ, reꞌ Dios nariyeb rijelow-bal keh? nqui reh.
23874	MAT 20:13	«Reꞌ Ajabe̱s reꞌreꞌ naxibiraj i chaj bih nquikꞌor, jeꞌ wili xikꞌor reh jenaj queh camanom reꞌreꞌ: ‹Ha̱w, reꞌ hin maꞌxta bih jenoꞌ cꞌahbilal cꞌahchiꞌ nibanam aweh maj reꞌ hat xacꞌuꞌlej na̱ wi̱n chi xa reꞌ woꞌ ritzꞌakil i jenaj kꞌi̱j chi camanic naniyeb aweh chi atojbal.
23882	MAT 20:21	Reꞌ Jesus jeꞌ wili xikꞌor reh: «Chajaric i atoꞌbil nawa̱j, nqui reh. Reꞌ ixok reꞌreꞌ, jeꞌ wili pꞌuht rikꞌorom cok reh Jesus: «Nok wilca̱t chic chi kꞌatoj kꞌoric, chacuy Ha̱w chacoj ta take wi̱n i wacꞌu̱n wili chi quinahsil take awaj toꞌbonel, nqui reh.
23894	MAT 20:33	—Ha̱w, reꞌ hoj nka̱j nak chi enaꞌn chi ekoj-ilbic, nqui take reh.
23897	MAT 21:2	Jeꞌ aj wili takꞌanic xiban je queh: «Hiy tak cok chipam i tinamit wilic chi kawach wili eh nok wilca̱t tak chic cok ar, enarak tak jenaj racꞌu̱n cawa̱y bacꞌlic ar chꞌi̱l i ritu̱t. Nacharak tak, chachej tak take cho quicabchel eh chacꞌam take cho wi̱n ayuꞌ.
23905	MAT 21:10	Chiri̱j chic reꞌ naxojponic chipam i tinamit Jerusalen, qꞌuihal queh take cꞌacharel ar, naxquibiraj i ahnic cꞌahchiꞌ caꞌnam take cꞌacharel quitahkanic keh, xiꞌuctubic cho chi ilo̱j eh jeꞌ wili pꞌuht quikꞌorom: «Hab wach i winak reꞌreꞌ, reꞌ xa qꞌueric chic quichi̱ꞌ take cꞌacharel chiri̱j? nqui pꞌuht quikꞌorom.
23911	MAT 21:16	jeꞌ wili xquikꞌor reh Jesus: «Ha̱w, nacoj na rehtal nquikꞌor take cucꞌ acꞌun wili? Wi nacoj rehtal, chaj waꞌric kꞌuruꞌ chi maꞌ cꞌahchiꞌ ta akꞌilim take? nqui take reh. Chalic Jesus jeꞌ wili xikꞌor queh: «Ho̱ꞌ, reꞌ hin cꞌahchiꞌ nicojom rehtal i chaj bih nquikꞌor take cucꞌ acꞌun wili, xa reꞌ laꞌ hat-tak til maꞌ narak ta tak soꞌ chiri̱j i nawilow tak pa riCꞌuhbal i Dios reꞌ jeꞌ wili rikꞌor: “Ajabe̱s Dios, reꞌ hat tibanic chi reꞌ take nimak tak acꞌun ixkꞌun, jeꞌ woꞌ take cu cucꞌtak ti take nquibichej awach, nqui rikꞌor, nqui Jesus queh.
23918	MAT 21:23	Nok hoj chic pononak chi chi̱ꞌ i pa̱t reꞌ nlokꞌonjic wi̱ꞌ wach i Dios, reꞌ Jesus xoquic chi cꞌuhtunic cu̱cꞌ take tinamit. Ar ajic, reꞌ take cꞌamol quibe̱h aj cꞌatol si̱ chꞌi̱l take nahsil chipam tinamit xiꞌoquic cok ru̱cꞌ Jesus eh jeꞌ wili xquikꞌor reh: «Hab wach aj u̱cꞌ nchalic awajawric reꞌ nacoj chi cꞌuhtunic cu̱cꞌ take tinamit? Hab wach xpahbanic aweh chi wilic awajawric? nqui take reh chi xa cakranak chic take.
23957	MAT 22:16	Nok quitikꞌa̱b chic wach quinoꞌjbal, reꞌ take cow laj aj niminel reꞌreꞌ xquitakꞌa̱ꞌ cok ru̱cꞌ Jesus quib xib chi aj tahkem reh quicꞌuhbal. Jeꞌ reꞌ ajic chi ihchꞌilimaj take cuꞌum quib xib chi winak reꞌ Herorya̱no ribihnal quicomonil, reꞌ take tahkamaj cok reꞌreꞌ jeꞌ wili xquikꞌor reh Jesus: «Ha̱w aj tijinel keh, reꞌ hoj kehtꞌalim chi xa coric woꞌ wach kꞌoric naꞌn eh ruꞌum reꞌreꞌ ru̱cꞌ coric woꞌ wach kꞌoric nacꞌuhtaj i cꞌuhbal ncꞌambic quibe̱h take cꞌacharel chi naquiponic ru̱cꞌ i Dios. Jeꞌ woꞌ kehtꞌalim chi reꞌ hat maꞌ nachih ta wach take cꞌacharel quibirinic reh coric awu̱cꞌ ruꞌum chi nayohbalej awi̱b xa chiꞌnchel laꞌ nacꞌul take awu̱cꞌ maj chawach i hat xa jenaj wach quiwaꞌric take cꞌacharel.
23959	MAT 22:18	Reꞌ Jesus chi rehtꞌalim cho i cꞌahbil laj noꞌjbal wilic cho pan quicapew-bal, jeꞌ wili xikꞌor queh: «Ha̱ꞌ, reꞌ hat-tak xa hat-tak banol awach tak ru̱cꞌ apahkanic tak wili, xa sicꞌbal reh chi xa haj ta nak equincalajic chawach tak ru̱cꞌ jenoꞌ kꞌoric, nqui queh.
23961	MAT 22:20	reꞌreꞌ jeꞌ woꞌ chic wili xikꞌor queh: «Hab wach aj eh i wachbal chꞌi̱l i bihnal wilic chiwach i tumi̱n wili? nqui queh.
23962	MAT 22:21	—Reh kꞌatal kꞌoric aj Ro̱ma, nqui take reh. Chi jeꞌ reꞌ, reꞌ Jesus jeꞌ woꞌ wili xikꞌor queh: «Haj paꞌ wilic i kꞌoro̱j chi reh i kꞌatal kꞌoric aj Ro̱ma, reꞌ woꞌ reꞌ chayew tak reh eh haj paꞌ woꞌ wilic i kꞌoro̱j chi reh i Dios, reꞌ woꞌ reꞌ chayew tak reh ruꞌ, nqui Jesus queh takꞌamaj take cok reꞌreꞌ.
23965	MAT 22:24	Jeꞌ aj wili i pahkanic xcaꞌn cok reh: «Ha̱w kaj tijinel, chipam jenaj queh hu̱j xitzꞌihmbaj i Moyses rikꞌor chi jenoꞌ asbe̱s acꞌun nquimic je chi maꞌ jaꞌxta cahnok rihaꞌlacꞌu̱n ru̱cꞌ i rehqꞌue̱n, tanlic chiri̱j i chakꞌbe̱s acꞌun chi narehqꞌuenem cahnok rehqꞌue̱n i ras reh chi enwihꞌic quihaꞌlacꞌu̱n chꞌi̱l i cahnel ixok reꞌreꞌ eh chi jeꞌ reꞌ maꞌ eta no̱j sahchok wach ribihnal i asbe̱s acꞌun camnak je.
23969	MAT 22:28	Chakꞌor keh kꞌuruꞌ ajabe̱s Jesus, chaj bih naquicahnic wi̱ꞌ take wuku̱b chi acꞌun reꞌreꞌ pa rikꞌijil cucsbal cho take camnak? Hab woꞌ wach queh ruꞌ narehchenic reh ixok reꞌreꞌ? Jeꞌ reꞌ nkabiraj aweh maj chiꞌnchel xquehqꞌuenej cahnok ixok reꞌreꞌ, nqui take reh Jesus chi cꞌahchiꞌ nak cuyꞌem chi reꞌ Jesus eta nak erikꞌor chi wilic banoj cꞌoyomal ar pan taxa̱j eh ru̱cꞌ reꞌreꞌ enak ti nquitzꞌak rimahc.
23970	MAT 22:29	Naxibiraj i Jesus chi jeꞌ reꞌ, jeꞌ wili quicꞌuꞌljic xiban: «Maꞌ riwi̱ꞌ ta nakꞌor tak chi jeꞌ reꞌ. Reꞌ hin nwilow chi maꞌ narak ta tak chiri̱j i rikꞌor chipam i Lokꞌ laj Hu̱j reꞌ wilic wi̱ꞌ riCꞌuhbal i Dios. Jeꞌ woꞌ, maꞌ woꞌ narak ta tak chiri̱j chaj bih til nchol ribanaric i Dios ru̱cꞌ rinimal wach rajawric.
23983	MAT 22:42	«Chaj bih nakꞌor tak chiri̱j i Pahbamaj chi Kꞌatal Kꞌoric reꞌ cꞌahchiꞌ awuyꞌem tak chi naricꞌulic lok? Hab woꞌ wach aj ra̱ꞌ riꞌsil cho reh nanakꞌor tak? nqui queh. Reꞌ take reꞌ xquikꞌor cok reh chi ra̱ꞌ riꞌsil ti cho maꞌ Tawiy.
24024	MAT 23:37	«Hat-tak cꞌacharel aj Jerusalen reꞌ ticansanic tak queh chi abaj take aj kꞌorol riCꞌuhbal i Dios takꞌamaj take cho awu̱cꞌ tak, kꞌe̱ꞌ je njikꞌjitic i wa̱mna chawi̱j tak ruꞌum i tiꞌcꞌaxic na̱cꞌulum tak. Reꞌ hin kꞌe̱ꞌ nak nwa̱j acoꞌljic tak chiwach i tiꞌcꞌaxic reꞌreꞌ, jeꞌ ricab nok jenoꞌ quixlan rimohꞌej take cucꞌ racꞌu̱n pa rixi̱cꞌ chi quicoꞌljic, xa reꞌ laꞌ hat-tak maꞌ jaruj nacꞌuꞌlej tak na̱ niCꞌuhbal.
24026	MAT 23:39	Jeꞌ woꞌ til nikꞌor woꞌ aweh tak aj Jerusalen chi maꞌ jaꞌxta pe chic awilom tak niwach cu rehtal chic na̱kꞌorom tak i jeꞌ ricab tzꞌihmbimaj cho chi jeꞌ wili chipam Lokꞌ laj Hu̱j reꞌ wilic wi̱ꞌ riCꞌuhbal i Dios: “Kayew tak rilokꞌil kꞌuruꞌ i cꞌulic riban lok wili chi takꞌamaj cho ruꞌum i Lokꞌ laj Ajabe̱s Dios, nqui rikꞌor, nqui Jesus.
24027	MAT 24:1	Nok cꞌahchiꞌ chic relic je Jesus chipam i pa̱t reꞌ nlokꞌonjic wi̱ꞌ wach i Dios reꞌ hoj raj tahkanel xkajil cok ki̱b ru̱cꞌ eh jeꞌ wili xkakꞌor reh: «Ha̱w, chawilow ti! Kꞌe̱ꞌ woꞌ chic holonquilal ritikꞌinjic bano̱j i pa̱t wili, kojqui reh.
24088	MAT 25:11	«Ruꞌum aj reꞌ, naxisoljic cho take hoꞌo̱b chic chi kꞌahxokak, jeꞌ wili tohkꞌ quikꞌorom cok reh acꞌun reꞌreꞌ: ‹Ha̱w, chacuy chateh cho keh apa̱t, nqui take cok reh.
24097	MAT 25:20	Jeꞌ reꞌ ajic, reꞌ camanom reꞌ xicꞌul cahnok i hoꞌo̱b tahn chi tumi̱n, naxo̱j cꞌolok chꞌi̱l hoꞌo̱b tahn chic chi tumi̱n xacꞌunej cahnok ri̱b chiwach, jeꞌ wili xikꞌor reh ajabe̱s: ‹Ha̱w, xa hoꞌo̱b ti tahn ruꞌ chi tumi̱n xayew cahnok wi̱n, raj yuꞌna hoꞌo̱b chic tahn xacꞌunej ri̱b atumi̱n chi niwach, nqui reh.
24099	MAT 25:22	«Naxponic woꞌ i jenaj chic aj camanom reꞌ xyeꞌeric quib tahn chic tumi̱n reh, jeꞌ wili xikꞌor reh ajabe̱s: ‹Ha̱w, xa qui̱b ti tahn ruꞌ chi tumi̱n xayew cahnok wi̱n, raj yuꞌna qui̱b chic tahn xacꞌunej ri̱b atumi̱n chi niwach, nqui woꞌ xikꞌor reh.
24101	MAT 25:24	«Raj laꞌ naxponic i jenaj chic aj camanom reꞌ xcꞌulbic cahnok reh juntahn ti chi tumi̱n, jeꞌ wili xikꞌor reh ajabe̱s: ‹Ha̱w, reꞌ hin wehtꞌalim chi reꞌ ricamanjic wach tumi̱n awu̱cꞌ i hat kꞌe̱ꞌ cꞌaxquilal wach. Jeꞌ reꞌ nikꞌor maj reꞌ hat xa reꞌ bihomric nawa̱j ru̱cꞌ quicamaj take toco̱m jeꞌ ricab riban jenoꞌ ajabe̱s reꞌ ritakꞌa̱ꞌ rijacharic pa̱m riyeꞌa̱b reꞌ toco̱m xbanic wi̱ꞌ tic abi̱x on ritakꞌa̱ꞌ rixiric wach take jal reꞌ maꞌ reꞌ ta woꞌ xmolbic reh.
24103	MAT 25:26	«Chalic ajabe̱s reꞌreꞌ, jeꞌ wili xikꞌor reh: ‹Hat maꞌ ato̱b ta laj aj camanom, maꞌ nanimej ta haj wilic nkꞌormojic cahnok aweh. Ruꞌum chi awehtꞌalim woꞌ nak chi reꞌ hin niban jeꞌ ricab i winak reꞌ ritakꞌa̱ꞌ rijacharic pa̱m i yeꞌa̱b reꞌ toco̱m xbanic i ticoj abi̱x on ritakꞌa̱ꞌ rixiric wach take jal maꞌ reꞌ ta xmolbic cho reh,
24114	MAT 25:37	«Ru̱cꞌ take kꞌoric reꞌreꞌ, reꞌ take coric wach quicꞌux naquibiram wi̱n chi jeꞌ wili: ‹Ha̱w, haj xkilow cho awach chi hat aj cuyul wiꞌc haꞌ eh reꞌ hoj xkayew awaꞌ aha̱ꞌ?
24118	MAT 25:41	«Chiri̱j aj chic reꞌ, jeꞌ wili nanikꞌorom queh yeꞌo̱j take je pa nitzꞌe̱t: ‹Telen tak chi niwach hat-tak reꞌ yeꞌo̱j chic chawi̱j tak chi na̱cꞌulum tak i tiꞌcꞌaxic. Hiy tak chipam i kꞌa̱kꞌ reꞌ xa koplic woꞌ cho chi junelic i kꞌi̱j sakom. Reꞌ kꞌa̱kꞌ reꞌreꞌ tikꞌimaj chi reh aj Yahm chꞌi̱l take maꞌ tob laj uxlabal quicamanic chi raj tzꞌeꞌ wa̱ch.