23214	MAT 1:1	Rey Davidpa castan aywagmi cara Jesucristoga. Paypa unay awilluncunaga caycunam capäcura:
23215	MAT 1:2	Abrahammi. Abrahampa churinga cara Isaacmi. Isaacpa churinga cara Jacobmi. Jacobpa churinga cara Judäwan shulca wauguencunam.
23216	MAT 1:3	Judäpa warmin cara Tamarmi. Paychru churin cara Fareswan Zaram. Farespa churin cara Esrommi. Esrompa churinga cara Arammi.
23217	MAT 1:4	Arampa churinga cara Aminadabmi. Aminadabpa churinga cara Naasonmi. Naasonpa churinga cara Salmonmi.
23218	MAT 1:5	Salmonpa warmin cara Rahabmi. Paychru churin cara Boozmi. Boozpa warmin cara Rutmi. Paychru churin cara Obedmi. Obedpa churinga cara Isaïmi.
23219	MAT 1:6	Isaïpa churinga cara Rey Davidmi. Rey Davidpa churinga cara Salomonmi. Salomonpa mamanmi cara Uriaspa viüdan.
23220	MAT 1:7	Salomonpa churinga cara Roboammi. Roboampa churinga cara Abiasmi. Abiaspa churinga cara Asam.
23221	MAT 1:8	Asapa churinga cara Josafatmi. Josafatpa churinga cara Jorammi. Jorampa churinga cara Uziasmi.
23222	MAT 1:9	Uziaspa churinga cara Jotammi. Jotampa churinga cara Acazmi. Acazpa churinga cara Ezequiasmi.
23223	MAT 1:10	Ezequiaspa churinga cara Manasesmi. Manasespa churinga cara Amonmi. Amonpa churinga cara Josiasmi.
23224	MAT 1:11	Josiaspa churinga cara Jeconiasmi, nätan Jeconiaspaga caram shulca wauguencunas. Jeconías cawanan wichanmi cay casta runacuna Babiloniaman aywachisha capäcura.
23225	MAT 1:12	Chaychrümi Jeconiaspa churin Salatiel näcirura. Salatielpa churinga cara Zorobabelmi.
23226	MAT 1:13	Zorobabelpa churinga cara Abiudmi. Abiudpa churinga cara Eliaquimmi. Eliaquimpa churinga cara Azormi.
23227	MAT 1:14	Azorpa churinga cara Sadocmi. Sadocpa churinga cara Aquimmi. Aquimpa churinga cara Eliudmi.
23228	MAT 1:15	Eliudpa churinga cara Eleazarmi. Eleazarpa churinga cara Matanmi. Matanpa churinga cara Jacobmi.
23229	MAT 1:16	Jacobpa churinga cara Josëmi. Paymi cara Mariapa gowan. Nätan Mariapa wawanmi cara Jesusga. Paymi cara ‘Salvacugtam cachramushag’ Diosga ningan.
23230	MAT 1:17	Abrahampita Rey Davidcama Jesuspa awilluncuna cara chrunca chruscuyogmi. Nätan Rey Davidpita Babiloniaman cay casta runacunata aywachipäcungancama Jesuspa awilluncuna cara chrunca chruscuyogmi. Chay Babiloniata aywachisha capäcunganpita Jesucristo näcingancamas awilluncuna cara chrunca chruscuyogmi Jesuspagga.
23231	MAT 1:18	Jesús näcingan caynuymi cara: Jesuspa maman Mariaga Josëwan nä rimasham capäcura casarapäcunanpag. Chauraga manaragsi juclapapäcuptilanmi Mariaga pachrayog ricacarura Santu Espiritupa munayninwan.
23232	MAT 1:19	Chaymi rimaynin Josëga Dios ningannuy ali rurag car, jinaman Mariata mana wanuchipäcunanta munarga pacaylapa ushacaruyta munara.
23233	MAT 1:20	Chaynuy pinsiayaptilanmi, José punuyaptin sueñuyninchru Diospita shamusha angelga cay nirura: “Davidpa castan José, ama piñäcuychu rimashay Mariawanga casaracuy. Payga Santu Espiritupa munayninwanmi pachrayog cayan.
23234	MAT 1:21	Gueshyacungasi olgo wamratam. Jinaman jutintam chrurapunqui Jesusta. Chaynuy jutin canga juchacunapita perdonarcur runancunata salvanan captinmi” nira.
23236	MAT 1:23	“Mana olgo regueg jipashmi pachrayog ricacunga, jinaman gueshyacunga juc olgo wamratam. Nätan jutintam chrurapunga Emanuelta”. (‘Emanuel’ ninanga ‘Diosga cayan noganchiwan’ ninanmi.)
23237	MAT 1:24	Chaura Josëga punuyanganpita riccharamurga Diospa angelnin ningannuylam Mariawan casararura.
23238	MAT 1:25	Nätan wamra näcimungancamaga Mariawan Josëga manam parëju punupäcuraragchu. Chauraga nä wamra näciruptinga jutinta chrurapura Jesustam.
23239	MAT 2:1	Jesusga näcirura Belén marcachrümi Herodes nipäcungan Judea nacionchru rey cayaptin. Chauraga cieluchrüshi juc goyllar ricacarura. Chayta ricapururshi goyllarcunawan tantiag runacunaga inti yargamunan lädu caru marcapita chrarärimun Jerusalenman.
23240	MAT 2:2	Chauraga Rey Herodesman chrarärimurga tapucarärin cay nirmi: “¿Maychrütag cayan chay Israel casta runacunapa reynin cananpag näcisha wamra? Marcäcunachrümi ricapusha capäcü paypa goyllarninta. Chaymi aywararcayämü alawapäcunäpag”.
23241	MAT 2:3	Nipäcugta mayaruptinga, chay Herodespaga manam imanänansi yachracarachu. Chaynuymi ricacarärira Jerusalenchru lapan mayagcunas.
23243	MAT 2:5	Chaynuy tapuptin paycunaga cay nirärinmi: “Judea ningan Belén marcachrümi. Diospa willacugnin isquirbinganchru cay niyanmi:
23244	MAT 2:6	‘Gam Belén, manam ichiclapag ricashachu canqui Judeachru marcacunapita. Gampita juc mandagmi yargamunga uysha michig runanuysi Israel runacunata ricananpag’ ”.
23245	MAT 2:7	Chaynuy nigta mayarur Rey Herodesga goyllarcunapita tantiag runacunatam pacaylapa gayarachin. Jinarcurmi chraräriptin shumag musyananpag tapurun: “¿Imaynuytag chay goyllarta ricapapäcuray?” nir.
23246	MAT 2:8	Nä willaparäriptinga Belenta aywapäcunanpagmi cachrarun “Aywapäcuy wamra ashig. Tarirurga cutipäcamuy willapäcamänaypag nogas alawag aywanäpag” nir.
23247	MAT 2:9	Chaynuypa rey niruptinga aywacurcaram. Nätan chay aywapäcuptin goyllarga aywara naupancunatam. Nä wamra wichanninman chrarur chay goyllarga nä manam masta cuyurachu.
23248	MAT 2:10	Chaura pachalanchru chay goyllar cayagta ricaparärirga aliscam cushicarärira.
23249	MAT 2:11	Nä wayiman yaycarärirga ricarärin wamrata maman Mariatawan cayagtam. Jinarcurmi naupanman gongorpacayärir wamrata alawarärin cushisha. Chaypitaga apapäcungantam gorärin öruta, inciensuta, ‘mirra’ ningan alisca chranin välig perfümita.
23250	MAT 2:12	Chaura chay runacunataga sueñuyninchrümi Diosga willarunag mana Herodespa cutipäcunanpag. Chauraga marcanta cuticurcänag juclä camiñupam.
23251	MAT 2:13	Goyllarwan tantiagcuna nä cuticurcaptinga, Munayniyog Diospa angelninmi Josëta sueñuyninchru cay nirun: “¡Jucla sharcuy! Aywacuy Egiptota, wamrata mamantinta pushacurcur. Chaychru camunqui cutimuy ningagcamam. Herodesga wamrata ashinga wanuchinanpagmi”.
23252	MAT 2:14	Niruptinga chayüram Josëga sharcurun. Chauraga wamrata mamanta pushacurcurmi pagaspa aywacun Egiptota.
23253	MAT 2:15	Chaychru yachrapäcamusha Herodes wanungancamam. Chaynuy cara Munayniyog Dios unay willacugninwan “Churïta Egiptopitam gayamusha cä” ningan ruracänanpagmi.
23254	MAT 2:16	Chay goyllarwan tantiagcuna jucläpa cutipäcunganta Herodes nä musyarurga aliscam piñäcurura. Chaura chay goyllarwan tantiagcuna willanganta yuparcurmi cachrarun Belenta, jinaman muyuragninchru yachrag runacunapa olgo wamrancunata wanuchipäcamunanpag. Chauraga ishcay watayogpita iñashacamam lapanta wanurärichin.
23256	MAT 2:18	“Ramá marcachrümi mayacasha alisca gapachracungan, alisca wagangan, alisca laquicungan. Raquelmi wamrancunapita alisca juyupa waganag. Payga ama wagaychu nircayaptinsi, manam upälayta munanchu chay wanusha wamrancunapita” ningan ruracänanpagmi.
23257	MAT 2:19	Chaypitam Egiptochru José yachrayaptin, Herodesga wanurun. Chaylam Munayniyog Diospa angelnin sueñuyninchru Josëta cay nirun:
23258	MAT 2:20	“José, canan Israel castaycunacagta cuticuy wamrata mamantinta pushacurcur. Wamrata wanuchiy munagcuna nämi wanurärin”.
23259	MAT 2:21	Niruptin Josëga chayüram Israel castancunacagta cutimura, wamrata mamantinta pushacurcur.
23260	MAT 2:22	Chaura Judeachru Herodespa churin ‘Arquelao’ jutiyog taytanpa trucan mandayanganta musyarurmi, Josëga Judeaman chrayta mancharirun. Chauraga sueñuyninchru willachisha carga ‘Galilea’ ninganta aywacura.
23261	MAT 2:23	Nä Galileaman chrarurga aywacura Nazaret marcatam yachrag. Chaynuy ruracara Diospa unay willacugnincuna “Nazareno runa nisham canga” nipäcungan ruracänanpagmi.
23263	MAT 3:2	“Diospa munayninchru cawanaypag nämi nachrgayämun. Chauraga juchaycunapita wanacurcur Diosman cutipäcuy” nir.
23264	MAT 3:3	Bautizag Juan chaynuy willapacunanpita Diospa unay willacugnin Isaías nämi isquirbisha cara: “Jäpagchrümi juc runa gayacuypanuy rimayan: ‘Munayniyog Diosta chrasquicurcänaypag camaricurcay. Lutan ruraycunata dëjarcur alicagta rurapäcuy’ nir”.
23265	MAT 3:4	Nätan Bautizag Juanpa jacunmi cara ‘camellu’ jutiyog uywapa milwanpita rurasha. Jinaman wachrucunmi cara garapita rurasha, micuyninsi cara salta piricu nirayag langosta jutiyog curum, jinaman chrinyashpa mishquincunalam.
23266	MAT 3:5	Chauraga Juan cayangancagmanmi runacuna aywapäcura Jerusalenpita, entëru Judeapita, Jordán mayu lädunchru marcacunapita.
23267	MAT 3:6	Chay Jordán mayuchru Juanga runacunata bautizara “Wactam u caytam juchäcusha cä” nigcunatam.
23269	MAT 3:8	Chauraga juchaycunapita wanacurcur Diosman razonpa cutipäcungayrag musyacächun ali cawapäcungaypa.
23270	MAT 3:9	Nätan ama nicurcaychu: ‘Taytä Abrahampa castan cayarga manam cunchushagchu’ nirga. Noga nipäcug: Diosga cay rumicunatas Abrahampa churincunamanga muyurachinmanmi.
23271	MAT 3:10	Nätan monticunata sagtananpag juc runa jächan aptashanuymi Diosga nä camarayämun mana ali ruragcunata ninachru cunchuchinanpag.
23272	MAT 3:11	Chaura jucha rurayanganpita wanacurcur Diosman cutigcagtam nogaga yacuwan bautizayä. Nätan nogapa guepäta aywayämugga mas munayniyogmi nogapitaga cayan. Nogaga manacag runam cä paypa sandalianta apapunaläpagsi. Paymi ichaga cachramunga Santu Espirituta gamcunaman Dios munangannuy ali cawayta yanapapäcushunaypag, nätan imatas nina rupar ushagnuymi juchaycunata illacächinga.
23273	MAT 3:12	Diosga cayan trïguta wauyachinanpag wauyachicunan nä aptashanuymi. Chaypitam wauyarcachir trïguta gotunga chruracunanman. Nätan muchruntam rupachinga mana imaysi upig ninawan” nin.
23274	MAT 3:13	Chaura Galileapitam chraramun Jesussi Juan cayangan Jordán mayuman Juan bautizänanpag.
23275	MAT 3:14	Nätan Bautizag Juanga manam munarachu, “Manam nogaga gamta bautizagmanchu, antis nogatam gamga bautizämanquiman” nir.
23276	MAT 3:15	Chaynuy niptinmi Jesusga nirun: “Cananga ima-ayga captinsi bautizämay. Chaynuymi rurananchi cayan. Nätan chaynuy rurarga Dios mandangantam rurayanchi”. Chay niruptinmi Juanga bautizarun.
23277	MAT 3:16	Chaura bautizächicurcur yacupita yargayämurmi, Jesusga ricapurun Santu Espíritu jana pachapita palömanuy payman aywayämugta.
23278	MAT 3:17	Chaylam Diosga jana pachapita rimaramun: “Payga cuyayangä Dios-mayïmi. Paypitaga alisca cushisham cayä” nir.
23279	MAT 4:1	Chaypitam Santu Espirituga Jesusta pusharunag chunyag pampaman, Asyag casquinwan juchäcachiyta munananpag.
23280	MAT 4:2	Chaychru cara Jesusga chruscu chrunca pagaswan chruscu chrunca junagmi mana micular. Chaypitam ichaga alisca juyupa micanarura.
23282	MAT 4:4	Niptinmi Jesusga “Dios isquirbichinganchru cay niyanmi: ‘Manam micuylawanragchu runaga cawan. Dios mandangancunata cäsucursi runaga cawanmi’ niyanmi” nirun.
23283	MAT 4:5	Chaura Jesusta Asyagga pusharun Diospa marcan Jerusalentam. Jinarcurmi Diospa wayin jananman jegarcachir, Asyagga cay nirun:
23284	MAT 4:6	“Diospa-mayin carga mä caypita jegarpuy. Dios isquirbichinganchru cay niyanmi: ‘Cachramushag angelnïcunatam maquincunalaman ishquinaypag, chauraga manam rumicunaman sagtacunquichu’ niyanmi” nirun.
23285	MAT 4:7	Chaynuy niptinmi Jesusga “Dios isquirbichinganchru caynuymi niyan: ‘Amam Munayniyog Diosniquita shongoy munangannuy rurachiyta munanquichu’ ” nirun.
23286	MAT 4:8	Chaypitas yapaymi Asyagga Jesusta pusharun mas altunnin jircata. Chaychrümi ricarachin cay pachachru lapan nacioncunata jinaman chaychru ima-ayga alinnincagcunatas.
23287	MAT 4:9	Jinarcurmi cay nirun: “Naupachru gongorpacuyur alawämaptiquiga, cay lapan ricangaycunatam goshay” nirun.
23288	MAT 4:10	Chaura Jesusga cay ninmi: “Shumagla aywacuy Asyag. Diospa isquirbichinganchru cay niyanmi: ‘Munayniyog Diosniquipa naupalanchrümi gongorpacunquis, nätan pay munangantam ruranquis’ niyanmi” nirunmi.
23289	MAT 4:11	Chaynuypa niruptin Asyagga aywacunmi. Chaylam Diospa angelnincuna Jesusmanga chrarärin ima-aygachrüsi atendipäcunanpag.
23290	MAT 4:12	Chaypitam Jesusga Bautizag Juan carcelchru wichrgarayanganta mayarur cutira Galileachru Nazaret marcanta.
23291	MAT 4:13	Nätan Nazaretpitaga aywacura yachrag Capernaum marcatam. Chayga cayan Galilea gochra manyanchrümi; Zabulonpa jinaman Neftalïpa mojonnincagchrümi.
23293	MAT 4:15	“Zabulonwan Neftalí yachranganchrümi ali willapa willapacarun. Chayga cayan jatun gochraman camiñu aywagchrümi, Jordán mayu chimpanchrümi, juc casta runacuna yachrangan Galilea ninganchrümi.
23294	MAT 4:16	Chaychru juchäcuyälar cawag runacunam ali willapata mayacarärin. Jinaman imaycamas cunchuyman nä yaycugpag cayag runacunapagmi ali willapa willapacarun” ningan ruracänanpagmi.
23295	MAT 4:17	Nätan Capernaumman chranganpita-pacham Jesusga yachrachiyta galayura cay nir: “Juchaycunapita wanacurcur, Diosman cutipäcuy. Nämi Diospa munayninchru cawapäcunay wichan nachrgayämun” nir.
23296	MAT 4:18	Chay Galilea gochra manyanpa aywayarmi, Jesusga ishcay runata ricapurun ataräyancuna jitarpurcayagta. Paycunapaga uryaynincuna cara pescacuylam. Jucpa jutin cara Simón. Paytaga Pedro nipäcugmi, jucagpam cara Andrés. Chay runacunaga capäcura chay wauguelam.
23297	MAT 4:19	Chaura Jesusga cay nirunmi: “Shamuy, nogawan uryashun. Nogam yachrachipäcushay juc pescacugnuy imanuypa runacunata Diosman aywachimuytas”.
23298	MAT 4:20	Niptinga ataräyancunata chrurayärirmi aywacurcan Jesuswan.
23299	MAT 4:21	Chaypita mas washascata aywayarmi, yapay ricapurun ishcay waugueta, Jacobotawan Juanta. Paycuna ishcayninsi capäcura Zebedeopa churinmi. Paycunaga büquinchrümi taytanwan carcayänag ataräyancunata alchayar. Chaura Jesusga ishcaynintam gayarun.
23300	MAT 4:22	Chaura paycunaga chayüram taytanta büquintawan dëjarcur Jesuswan aywacurcan.
23301	MAT 4:23	Nätan chay Galilea gochra ninganchrüga manyancunapam Jesusga purira, Israel castäcuna gotucarcänan wayicunachru yachrayächir. Payga purira Diospa munayninchru cawaypita ali willapata willapacuyarmi, jinaman runacunata lapan nanaycunapitawan tucuy gueshyacunapita cuticayächirmi.
23302	MAT 4:24	Jesús chaynuy cuticächinganpitaga Siria ninganchru lapanmi rimapäcura. Chaymi payman aywachipäcamura lapan gueshyayagcunata, tucuy nanaywan cunchuyagcunata, Asyagpa munayninchru cayag runacunata, wanupaywan gueshyagcunata, uncutucushacunata, nätan Jesusga lapantam cuticächira.
23303	MAT 4:25	Chauraga achcam runacuna Jesusta gatirapäcura Decapolispita, Galileapita, Judeapita, Jerusalenpita, Jordán mayu chimpan inti yargamunan lädupita.
23304	MAT 5:1	Chaura chay alisca achca runacunata ricapururmi, Jesusga juc gotuman jegarcur tacuyun. Chayman discïpuluncuna ashuyaräriptinmi,
23306	MAT 5:3	“Cushisham capäcunga cay nigcuna: ‘Quiquiläpa munayläwan manam Diospag ali cawayta atipämanchu’ nir tantiacugcuna. Chaynuy nigcunaga nämi cawarcayan Diospa munayninchru.
23307	MAT 5:4	Cushisham capäcunga laquisha cawarcayagcuna. Paycunaga cushicachisham capäcunga.
23308	MAT 5:5	Cushisham capäcunga ima-aygata rurarcayaptinsi gasilacagcuna. Paycunaga yachrapäcunga ‘Dios goshagmi’ ningan marcachrümi.
23309	MAT 5:6	Cushisham capäcunga yacunaypanuy micanaypanuy Dios munanganta imanaypanuysi ali ruray munagcuna. Paycunataga Dios yanapangam chay munayangannuy ali rurayta.
23310	MAT 5:7	Cushisham capäcunga cuyapäcug runacuna. Paycunata Dios cuyapangam.
23311	MAT 5:8	Cushisham capäcunga shongoncunapita mana juchachashacuna. Paycunaga Diosta ricapäcungam.
23312	MAT 5:9	Cushisham capäcunga runacuna gasila cawapäcunanpag yanapagcuna. Paycuna capäcunga ‘Diospa castan’ nisham.
23313	MAT 5:10	Cushisham capäcunga ali ruranganpita chregnisha cagcuna. Paycuna cawapäcunga Diospa munayninchrümi.
23314	MAT 5:11	Cushisham capäcunqui, runacuna nogapa janä ashlipäcushuptiqui, imatas lutanta rurapäcushuptiqui, ima-aygatas lutan manacagcunata nipäcushuptiqui.
23315	MAT 5:12	Chaynuy rurapäcushuptiqui cushicurcay, jana pachachru Dios gopäcushunqui aliscannintam. Chaynuymi ima lutantas rurapäcura Diospa unay willacugnincunata”.
23316	MAT 5:13	“Cay pachachru gamcuna carcayanqui cachrinuymi runacunapag. Nätan chay cachri mana puchgogman muyuruptinga ¿imanayparag puchgogman yapay muyunman? Chaynuy carga manam imapagsi välinchu, antis wicapanchi washamanmi runacuna jarunanpag.
23317	MAT 5:14	Cay pachachru gamcuna carcayanqui achquinuymi runacunapag. Juc marca gotuchru captinga, manam pacayta atipanchichu.
23318	MAT 5:15	Manatan lamparinta ratachirsi pacayninmanchu chruranchi, antis chruranchi ricäpayninmanmi wayichru cagta lapanta achicyänanpag.
23319	MAT 5:16	Chaynuy gamcunaga alita rurarcayar cawapäcuy Diospa razonpa capäcungayta runacuna musyapäcunanpag. Chaynuy cawagta ricapäcushurniqui jana pachachru cayag Diosniquicunata alawapäcungam”.
23320	MAT 5:17	“Ama nogapag pinsiapäcuychu cay nir: ‘Payga shamusha Moisés isquirbingancunatawan Diospa willacugnincuna isquirbinganta manacagman muyuchinanpagmi’ nirga. Nogaga manam chaypagchu shamusha cä, antis aywarayämüga paycuna isquirbingancunata imanuypa cawana cangantas cawangäwan musyachigmi.
23321	MAT 5:18	Nipäcushay razoncagta: Jana pachasi cay pachasi cayangancamaga chay isquirbisha cayagcuna ruracanga lapanran. Nätan manam, mana ruracälarga canganchu maygan ichic isquirbishalas.