13956	PSA 2:7	Kunanka ñuka willaykichi Tata Dios munananta. Payka willawashka: “Kanka wambraynimi kanki. Kantami churashkayki sinchi kamachikuk kanaykipa.
13959	PSA 2:10	Chashna Tata Dios wambranta willaptin Kankuna sinchi kamachikukkuna, awtoridarkuna, willanaynita allita entiendiychi. Yachachinaynita yachakuychi.
13960	PSA 2:11	Tata Diosta manchashpa sirviychi. Kushikushpa payta kuyaychi.
13965	PSA 3:4	Chashna rimaptinkunapish, Tata Dios, kanmi arkanashina arkawanki. Kanmi kuyawashpa yanapawashpa animuchiwanki.
13969	PSA 3:8	A, Tata Dios, yanapawashpayki favorninipi atarimuy. Chikniwak runakunamanta salvaway. Kanmi chikniwak runakunata makashkankisapa. Tukuy mana alli rurak runakunapa armankunata wakllichishkanki.
13970	PSA 3:9	Kanmi, Tata Dios, ñukaykunata salvawankisapa. Chayrayku kanta kuyaptinikuna yanapawaysapa.
13973	PSA 4:3	Kankuna, chikniwak runakuna, ¿aykapikamantí llullakushpa chatawankichi? ¿Aykapikamantí mana kuskata yuyashpa llullakuyllata munankichi?
13978	PSA 4:8	Aypa mikunayuk aypa upyanayuk runakuna sukaman kushikunsapa. Kan, Tata Dios, paykunamanta ashwanta kushichiwashkanki.
13979	PSA 4:9	Kan kuydawaptiki mana manchakushpa sirishpayni kunanlla gustu puñuni.
13981	PSA 5:2	Kamachiwak Tatayni Dios, parlachiptini uyariway. Llakishpa roygaptini yanapaway. A, Tata Dios, kantami tukuy ima yuyanaynita parlachiyki.
13985	PSA 5:6	Kikinkunalla kreyinakuk runakuna mana ñawpaknikipi kawsankasapachu. Mana alli rurak runakunata sukaman chikninkisapa.
13991	PSA 5:12	Ñukaykuna amachawanaykipasapa munashpaynikuna kushikunisapa. Kushikushpa kantanisapa kan, Tata Dios, amachawaptikisapa. Kanta kuyashpaynikuna kushikunisapa kan yanapawaptikisapa.
13997	PSA 6:5	A, Tata Dios, shamuy yanapawak. Kuyawashpayki wañuymanta salvaway.
14001	PSA 6:9	Kankuna, mana alli rurak runakuna, ñukamanta anchuychi. Sukaman llakiptini ñami Tata Dios uyariwashkana.
14010	PSA 7:7	A, Tata Dios, piñakushpa atariy. Favorninipi chikniwak runakunata tinkuysapa. Kanmi rimashkanki mana alli rurak runakunata kastiganaykipa. Chayrayku favorninipi llukshiy.
14023	PSA 8:2	A, Tata Dios, ashwan sinchi kamachiwakninikunami kanki. Kanmi tukuy allpapi kamachikunki. Sieluta kawashpaynikuna yachanisapa sukaman tukuy laya atipak kanaykita.
14057	PSA 10:5	A, Tata Dios, chay runakuna sukaman mana allita rurashpa chashnalla tukuy tiempu kawsansapa. Kanpa, Tata Dios, kamachikunaykita mana nimatashina kawansapa. Chikninakukmasinkunata mana kreyishpankuna rabyachinsapa.
14066	PSA 10:14	A, Tata Dios, kikiki kawashkanki sakra mana allikunata ruraptinkuna. Chayrayku paykunata kastiganayki tiyan. Chashna kastigakuk kaptiki mana amachanakuy atipak runakuna kanta maskashunkisapa amachakunaykipa. Kanmi tukuy wakcha runakunata yanapankisapa.
14068	PSA 10:16	Kanmi, Tata Dios, mana tukuyniyukta kamachikunki. Mana kreyishuk runakunata llaktankunamanta wishchunkisapa.
14183	PSA 19:2	Kawananchi sielu yachachiwanchisapa Tata Dios tukuy laya atipak kananta. Sieluta kawashpanchikuna yachanchisapa Tata Dios tukuy layata rurashkanta.
14255	PSA 23:3	Chashna kuydawashpa animuchiwan. Kuska ñankunata pushawan riksinaynipa alli kuydakuk kananta.
14256	PSA 23:4	Kan, Tata Dios, kuydawaptiki tuta likidu urku sikinkunata puriptinipish mana wañuyta manchakunichu. Kan, Tata Dios, ñukawan kaptiki varaykiwan bastonnikiwan kuydawaptiki kushikushpalla kawsasha.
14257	PSA 23:5	Chikniwak runakuna tiyaptinpish aypa allima mikunata rurapashkanki. Kuyawashpa mishkilla asnak wirata umaynipi tallishkanki sukaman kushichiwanaykipa. Chaymanta upyakunayni kopata untachikshina sukaman yanapawanki.
14308	PSA 27:6	Chashna Tata Dios salvawaptin atipani chikniwak runakunata kallpachiyta. Chaypina payta agradesishpayni paypa wasinpi ofrendakunata kusha kuyanaynipa. Kushikushpa himnokunata Tata Diosta kantasha.
14310	PSA 27:8	Kikini yuyanakushpa rimani: “Tata Diosta roygasha yanapawananpa.” Chayrayku, Tata Dios, roygayki yanapawanaykipa.
14311	PSA 27:9	A, Tata Dios, yanapaway. Ama piñakushpa karkuwaychu. Kanlla atipanki salvawayta. Ama sapallaynita sakiwaychu. Kanmi kanki salvawak Tatayni Dios.
14410	PSA 34:3	Tata Dios yanapawaptin sukaman kushikuni. Kankuna, alli modoyuk runakuna, chayta yachashpa kushikuychi.
14416	PSA 34:9	Kankuna mishkik mikunata mallikshina Tata Diosta kuyaychi yachanaykichipa alli rurak kananta. Tata Dios yanapashunaykichita yachashpaykichi sukaman kushikunkichi.
14417	PSA 34:10	Kankuna, Tata Diosta kasuk runakuna, payta kuyaychi. Chashna kuyaptikichi manami nima illapushunkichichu.
14419	PSA 34:12	Wambraynikuna, shamuychi uyariwak. Kunanka yachachiykichi imashnami Tata Diosta kuyankichi nishpa.
14420	PSA 34:13	Kunanka tapuykichi: ¿Munankichichu unayta kawsayta? ¿Munankichichu kushikushpalla kawsayta?
14473	PSA 37:2	Chay runakunata Tata Dioska utka kastigankasapa. Kastigaptinkuna tipidu kiwashina tukunkasapa.
14474	PSA 37:3	Tata Dios yanapashunaykita yachashpa allita rurashpalla kawsay. Kay allpapi kawsashpaykira Tata Diosllata allita kasushpa kawsay.
14647	PSA 46:5	Suk yaku kallpashpa kushichiwanchisapa Tata Dios chay yakushina yanapawashpanchikuna kushichiwanchisapa. Kamachiwakninchikuna Tata Dios ñukanchikunapi kawsan.
14652	PSA 46:10	Kuchun mañan allpapi kamachikushka amana makanakunankunapa. Ñami balistankunata pakishkana. Makanakunankuna lansankunata ñami paki pakina rurashka. Makanakunankuna karrunkunata ñami rupachishkana.
14653	PSA 46:11	Chayrayku Tata Dios willawanchisapa: “Kasillayaychi. Riksiwaychi sinchi kamachikuk Tata Dios kanaynita. Yachaychi tukuy allpapi tukuy llaktakunata sinchita kamachinaynita.”
14727	PSA 51:4	Kuyawashpayki mana alli rurashkaynimanta perdonawashpa mayllaway. Tukuy uchaynikunamanta pichaway.
14729	PSA 51:6	A, Tata Dios, uchallikushpayni mana allikunata rurashpayni kanta mana kasunayashkaykichu. Chashna mana kasunayashpayni rabyachishkayki. Uchallikushkaynirayku kastigawanayki tiyan. Kan kastigawashpayki allininpi kastigawanki.
14733	PSA 51:10	A, Tata Dios, kushichiway. Kastigawashkaykimanta kashkan kushichiway.
14868	PSA 61:3	Kay allpapi kuchun mañanpi kashpaynipish manana yachashpa imatami rurasha nishpa kanta roygayki. Roygaptini manllayba rumi sawanpishina churawashpayki chikniwak runakunamanta salvaway.
14871	PSA 61:6	A, Tata Dios, kanmi tukuy promesakushkaynita uyarishkanki. Chayrayku yanapawashkanki. Kanka tukuy kuyashushpa kawsak runakunata yanapankisapa.
14873	PSA 61:8	Yanapaway allita kamachikunaynipa. Kuyawashpayki ama shaykushpa kuydaway.
15078	PSA 73:3	Kikinkunalla kreyinakuk tukuy imayuk mana allita rurashpa kawsak runakunata kawarkani. Ñukapish paykunashina kanayashpayni yakallapa uchallikurkani.
15100	PSA 73:25	Kanlla sielumanta yanapawanki. Kanwan kawsashpayni mana nima ashwanta munanichu.
15102	PSA 73:27	A, Tata Dios, mana kasushunayak runakuna wañunkasapa. Kanmi mana kreyishuk runakunata kulluchinkisapa.
15103	PSA 73:28	Paykuna mana kreyishuptinkunapish ñukaka kanwan tantalla kawsanayani. Kanmi, Tata Dios, amachawanki. Chayrayku runamasinikunata willashasapa alli rurak kanaykita.
15576	PSA 100:2	Kushikushpa Tata Diosta kuyaypachi. Kushikuywan kaparikushpa ñawpakninman shamuypachi.
15578	PSA 100:4	Chayrayku Tata Diospa wasinman shamuypachi. Kushikushpa payta alabashpa kantukunata kantashpa punkunta yaykuypachi. Tata Dios sukaman yanapawaptinchikuna kushichishpa kuyaypachi.
15641	PSA 104:3	Kan tukuy layata kamachishpa sielupi wasikipa orkonninkunatashina manllayba kochapi sinchichishkanki. Puyukunata rurashkanki purinayki karrukunashina kanankunapa. Wayrashina maytapish rinayashpa rinki.
15645	PSA 104:7	Kan, Tata Dios, yakukunata willaptiki kallparkansapa. Troynoshina rimakuptiki yakukuna uyarishpa nitikurkansapa.
15650	PSA 104:12	Pawak animalkuna yaku mañankunapi wasichakunsapa. Kaspikuna ramanpi kantansapa.
15654	PSA 104:16	Kan, Tata Dios, chay yakullawan kaspikunata saksachinki. Libano partipi tarpushkayki sedrukunatapish saksachinkisapa.
15657	PSA 104:19	Killata rurashkanki yachanaynikunapa ima laya tiempumi nishpa. Intipish yachan imay orasmi urkukunapi chinkanka nishpa.
15662	PSA 104:24	A, Tata Dios, rikchak layata rurashkanki. Kay allpaka tukuy rurashkaykiwan untami.
15666	PSA 104:28	Kan, Tata Dios, mikunankunata kunkisapa. Chashna kuptiki chay animalkuna apinsapa. Paykunata kuptiki munashkankunawan saksansapa.
15673	PSA 104:35	Kushikushpa rimani: Allpamanta tukuy ucha rurak runakuna chinkachunsapa. Mana alli rurak runakuna amana kawsachunsapanachu. Ñukaka Tata Diosta tukuy shunku kuyashpa alabani. Munani tukuy runakuna Tata Diosta alabanankunapa.
15978	PSA 119:12	A, Tata Dios, kanta sukaman alabayki. Kamachikunaykikunata yachachiway.
16065	PSA 119:99	Kamachikunaykikunata yuyashpa kawsashpayni rimanaykita yachachiwak runakunamanta ashwan allita entiendini.
16152	PSA 121:3	Tata Diosmi kantapish yanapashunki ama uchata rurashpa urmanaykipa. Kuydashuk Tata Dios manami puñunchu.
16309	PSA 139:2	Kan yachanki tukuy ima ruranaynita. Kanmanta karupi kaptinipish tukuy yuyanaynita yachanki.
16320	PSA 139:13	Kanmi mamaynipa wiksanpi rurawashkanki. Tukuy kuerpuynita rurashkanki.
16323	PSA 139:16	Kuerpuyni wiñaykaptin kawawashkanki. Libruykipi tukuy chaykunata killkashkanki. Manara kawsaptinira yachashkanki mashna diyakunatami kawsasha nishpa.
16331	PSA 139:24	Kawaway ichará mana allikunata ruraykani nishpa. Chashna mana allita ruraptini yanapaway allita rurashpa alli ñannikita katinaynipa.
23229	MAT 1:16	Jakoboka Josepa tatan karkan. Joseka Mariyapa kusan karkan. Mariyaka karkan Jesuspa maman. Tata Dios Jesustaka kachamurkan kay allpaman runakunata uchankunamanta salvanankunapa. Chayrayku Jesuspa suk shutin karkan Kristu.
23233	MAT 1:20	Sakinanpa yuyaykuykaptinna suk tuta muskuyninpi Tata Diospa angelnin willarkan: “Kanmi ñawpa Davidpa miraknin kanki. Chayrayku Tata Dios munan noviayki Mariyawan kasaranaykipa. Chay wawanka Tata Diospa Espiritunpami. Manami ullkupachu. Ama pinkakuychu noviayki Mariyawan kasarayta.
23238	MAT 1:25	Kasarashkankunawasha Mariyaka wawayanankaman manami Josewanka puñurkanrachu. Mariyapa wawan nasiptin Joseka shutiyachirkan Jesus.
23242	MAT 2:4	Chaypina Herodeska tukuy saserdotekunapa kamachikukninkunata Moisespa killkadunta yachachikkunata kayachishpa tapurkansapa: —Kankunaka Tata Diospa rimananta yachashpaykichi willawaychi ¿maypiti nasinka Tata Diosmanta shamuk salvakuk runa?
23243	MAT 2:5	Chaypina chay runakuna aynirkansapa: —Kay Judea partipi Belen llaktapi nasinka. Ñawpa yachachikuk runa Tata Dios rimashkanta killkarkan:
23265	MAT 3:4	Juanpa llachapan kamellu millwanmanta awadu karkan. Karapamanta ruradu chumbiwan sinturanta watak. Atun marukunata sacha amukunapa mishkinta mikuk.
23268	MAT 3:7	Chaymanta Fariseo runakunawan Saduseo runakuna rirkansapa Juanta willak bawtisanankunapa. Chaypina Juanka paykunata willarkansapa: —Kankuna sukaman llullachikushpaykichi machakuyshina kankichi. Tata Dios kankunata utkana sukaman kastigashunkichi. ¿Pití willashushkankichi kastiguykichimanta kishpinaykichipa?
23278	MAT 3:17	Chaypina sielumanta Tata Dioska willarkan: —Kay Jesuska sukaman munanayni wambraynimi. Paymi sukaman kushichiwan.
23287	MAT 4:9	Willarkan: —Kan kunkurikushpa ñukata kuyawaptikika tukuy kay kawashkaykitami kushkayki.
23291	MAT 4:13	Galileapi kashpa manana Nasaret llaktapi kawsarkannachu. Rirkan kawsak Kapernaum llaktapi. Chay llaktaka karkan Sabulon Neptali partipi Galilea kocha ladunpi.
23295	MAT 4:17	Chaymanta Jesus chay Kapernaum llaktapi kawsashpana kallarirkan yachachikuyta: —Tata Dios sukaman munan mandunpi kawsanaykichipa. Chayrayku tukuy mana alli ruranaykichimanta wanaychi.
23297	MAT 4:19	Chaypina Jesuska paykunata willarkansapa: —Kankuna allita yachankichi challwakunata apiyta. Kunanmantapacha ñukata katiwaychi. Katiwaptikichi ñuka allita yachachishkaykichi runakunata yachachinaykichipa.
23306	MAT 5:3	Willarkansapa: —Kankuna kikikichi mana kreyinakushpaykichi Tata Dios yanapashunaykichita yuyashpa kushikuypuru kawsankichi. Chashna kawsashpaykichi Tata Diospa mandunpi kawsaykankichi.
23307	MAT 5:4	Llakidu kashpaykichipish kushikuypuru kankichi. Kankunata Tata Dios kuyashushpaykichi kushichishunkichi.
23308	MAT 5:5	Kankuna kikikichi mana alabanakushpaykichi runamasikichiwan mana piñanakushpaykichi kushikuypuru kankichi. Tukuy allpapi maypipish kaptikichi Tata Dios yanapashunkichi kushichishunkichi.
23309	MAT 5:6	Kankuna yakuta munakshina mikuyta munakshina Tata Diospa munananta ruranayashpaykichi kushikuypuru kankichi. Tata Dios kankunata kushichishunkichi.
23310	MAT 5:7	Kankuna runamasikichita llakichishpa yanapashpaykichi kushikuypuru kankichi. Tata Dios kankunatapish llakichishushpaykichi yanapashunkichi.
23311	MAT 5:8	Tukuy shunku Tata Diosllata kuyashpaykichi kushikuypuru kankichi. Kankunaka Tata Diostami kawankichi.
23312	MAT 5:9	Kankuna runamasikichita yanapashpaykichi kuyanakushpa kawsanankunapa kushikuypuru kankichi. Tata Dios kankunata willashunkichi wambrankuna kanaykichita.
23315	MAT 5:12	Kankunatashina ñawpa yachachikukkunatapish chiknishpankuna sufrichirkansapa. Tata Dios kankunata sielupi premyuykichita kushunkichi. Chayrayku sukaman kushikuychi. Kushikushpalla kawsaychi.
23316	MAT 5:13	Kankuna runamasikichita yachachishpa yanapashpaykichi alli kachishinami kankichi. Allpayadu kachi mananami nima layapi kachiyamunkanachu. Chashna mana alli kaptin wishchunchi tukuy pi sarunanpa.
23317	MAT 5:14	Chaymanta suk alkusata apichishpanchikuna churanchisapa altupi tukuy wasita lusichinanpa. Chay apichidu alkusata mana churanchichu kajon ukupi. Kankunaka iden chay apichidu alkusashinami kankichi. Chaymanta suk llakta urku sawanpi kaptin mana atipanchu pakakuyta. Tukuy pi chay llaktata allimata kawan. Iden chay llaktatashina kankunatapish runamasikichi kawashunaykichi tiyan.
23323	MAT 5:20	Allita willaykichi. Moisespa killkadunta yachachikuk runakunawan fariseo runakuna rimansapa Tata Dios kamachikushkankunata kasuykanankunata. Chashna rimashpapish manami allitachu kasuykansapa. Kankuna paykunamanta ashwan allita kasunaykichi tiyan. Mana paykunamanta ashwan allita kasushpaykichika manami Tata Diospa mandunpichu kawsankichi.
23324	MAT 5:21	Kankuna yachashkankichi Moises awilunchikunata willashkankunata: “Ama runamasikichita wañuchiychichu. Wañuchiptikichika llakta kamachikuk runa kankunatapish kastigashunaykichi tiyan.”
23325	MAT 5:22	Chayta yachaptikichipish ñukami willaykichi: Kankuna runamasikichita chikniptikichika llakta kamachikuk runa kastigachishunaykichi tiyan. Chaymanta kankuna runamasikichita mana allita willashpa piñachiptikichika chay ashwan sinchi awtoridarkuna kastigachishunaykichi tiyan. Chaymanta runamasikichita maldisiptikichika Tata Dios mana tukuyniyuk ninapi kastigashunaykichi tiyan.
23334	MAT 5:31	Chaymanta ñawpa awilunchikuna rimarkansapa: Warmikichita wishchunayashpaykichika rillaychi awtoridarpi killkachinakuk: “Kay warmitaka mananami munaninachu.”
23336	MAT 5:33	Chaymanta Jesuska willarkansapa: —Kankuna yachashkankichi Moises awilunchikunata willashkankunata: “Tata Diosta jurashpa suk imata ruranaykichipa willashpaykichika chay willashkaykichita ruranaykichi tiyan.”