35	GEN 2:4	Manetualain adu lalai ma dae-bafoꞌ a, tutui na riꞌ naꞌ so. Tepoꞌ fo MANETUALAIN besaꞌ ko mulai adu lalai no dae-bafoꞌ a,
38	GEN 2:7	Basa boe ma, MANETUALAIN hai na dae baiꞌ, de tao nan dadi neuꞌ lahenda. Basa de Ana fuu ani hahaeꞌ leo idu bolon daleꞌ neu, boe ma lahenda ria nasoda tutiꞌ a.
39	GEN 2:8	Basa de MANETUALAIN buka okaꞌ esa nai dae Eden pooꞌ dulu. Boe ma Ana fee lahenda a leo neuꞌ okaꞌ ria.
41	GEN 2:10	Hapu lee esa nai naa, faa kalua neme okaꞌ ria mai. Lee ria nanuu baꞌe haa.
44	GEN 2:13	Lee ria baꞌe kadua na, nade Gihon. Baꞌe ria rule-feo basa dae Kus.
46	GEN 2:15	MANETUALAIN fee lahenda ria leo nai Eden, ela nafaduli natalolole okaꞌ ria.
49	GEN 2:18	Basa de MANETUALAIN dedea bali, nae, “Maneniko lahenda ia nasoda mesaꞌ ana, sona ta malole a fa. De Au nau adu-tao feen, nonooꞌ esa naraa noo ni.”
50	GEN 2:19	Tepoꞌ ria, MANETUALAIN hai na dae, de tao na banda rupaꞌ ma manupuiꞌ. Basa de Ana neni banda ra, ma manupuiꞌ ara leo lahenda ria neu, ela leoꞌ bea na ana foi nade nara. De lahenda ria foi banda ra ma manupuiꞌ ara esaꞌko noꞌ naden. Tehuu ria mesaꞌ ana bei ta hapu nonooꞌ esa fo naraa non boeꞌ.
52	GEN 2:21	Basa de MANETUALAIN tao na lahenda ria suku namanee. Tepoꞌ fo ana suku, Manetualain hai na dui aiusun esa, boe ma napoti faliꞌ hinaꞌ ria.
54	GEN 2:23	Lahenda a nita inaꞌ ria, boe ma nae, “Naa! Ia dei! Ia besaꞌ ko naraa no au! Dui na sama leoꞌ au dui ka, ma aopaa na boe, sama leoꞌ au aopaa ka. Huu no ana dadi neme touꞌ a mai, de au foi ni, nade ‘inaꞌ’.”
57	GEN 3:1	Nemeꞌ basa banda fo MANETUALAIN tao naa si nai dae-bafoꞌ ia so, meke a riꞌ malela napuputa na seli. Laiꞌ esa de, meke a natane inaꞌ ria nae, “Tebe do? Manetualain horo nae, ‘Emi ta bole mia ai boaꞌ neme ai huuꞌ fo rai okaꞌ ia, hete?’ ”
64	GEN 3:8	Leodaen ria, boe ma ramanene MANETUALAIN laꞌo-laꞌo nai okaꞌ ria daleꞌ. Basa de ara reu tamaꞌ nai ai huuꞌ, fo ela MANETUALAIN bosoꞌ nita si.
65	GEN 3:9	Tehuu MANETUALAIN naloo touꞌ ria nae, “Ae! Adam, o nai bea?”
67	GEN 3:11	Basa de Manetualain nae, “Bea riꞌ nafada nae, o poiraoꞌ? Leoꞌ bea? Tantu o mua ai boaꞌ fo Au horo a, hete?”
69	GEN 3:13	Basa boe ma MANETUALAIN dedea no inaꞌ a nae, “Ubeaꞌ taon de o tao leo naꞌ?” Boe ma inaꞌ a nataa nae, “Te meke a eꞌediꞌ nalaꞌ au! Huu ria na, de au ua ai boaꞌ ria, so te.”
70	GEN 3:14	Basa ria, boe ma MANETUALAIN kutuk meke a nae, “Huu no o nonoi-tataom ia, Au huku o. Neme basa banda fekeꞌ ara mai, adaꞌ noi o riꞌ hapu kutuk leo iaꞌ. Mulai neme besaꞌ ia mai losa o mate, o lodo muniꞌ ara dale ma, ma o malelaꞌ noi mua nai dae a.
74	GEN 3:18	Leo mae o sele-tande rupaꞌ ara, tehuu dae a namomoriꞌ adaꞌ noi ko-kauꞌ ma matemaꞌ.
77	GEN 3:21	Basa de MANETUALAIN tao papakeꞌ nemeꞌ banda a rou na mai, fo fee dua si pake.
78	GEN 3:22	Boe ma MANETUALAIN dedea nae, “Besaꞌ ia lahenda ia ra bubuluꞌ bea riꞌ malole, ma bea riꞌ tadaluꞌ, sama leoꞌ Ita so. Bosoꞌ losa sira boe raa ai boaꞌ fo fee si rasoda raroo.”
81	GEN 4:1	Laiꞌ esa de, Adam neu suku noꞌ saon Hawa. Boe ma inaꞌ a nairu. Basa de boki na ana touꞌ esa. Boe ma ana nae, “Au boki a ana touꞌ esa, nana huu MANETUALAIN tulu-fali neuꞌ au so.” Basa de ana foi anaꞌ ria nade, Kaen (sosoa na nae, ‘kalua henin’).
83	GEN 4:3	Laiꞌ esa boe ma, Kaen neni oka-tinen buna-boan ruma, fee neuꞌ MANETUALAIN.
84	GEN 4:4	Habel boe neni ria bibi-lopo ina nara ana ulu na. Ana pau bibi-lopo sira, basa de neni katemaꞌ paaꞌ fo malole naan seli, fee neuꞌ Manetualain. MANETUALAIN nita leoꞌ na, dale Na namahoꞌo neuꞌ Habel tutunu-hohotun ria.
86	GEN 4:6	Boe ma MANETUALAIN dedea no Kaen nae, “He, Kaen! Ubeaꞌ taon de o mamanasa leoꞌ na? Ubeaꞌ taon de o mata-idum rutuꞌ-rutu leoꞌ na?
88	GEN 4:8	Laiꞌ esa de, Kaen leleꞌo Habel nae, “Fadi, ee! Mai fo dua kata lalaꞌo leo okaꞌ teu.” Ara losa naa, kekeneu te Kaen naisa fadi na.
89	GEN 4:9	Boe ma MANETUALAIN natane Kaen nae, “He, Kaen! O fadi ma nai bea?” Kaen nataa nae, “Au ta bubuluꞌ ana nai bea. Ee mae au homu ei na, do?”
93	GEN 4:13	Kaen nadedea laka neuꞌ MANETUALAIN nae, “Awii! Manetualain, ee! Ubeaꞌ taon de Manetualain fee au kutuk mabera-ina ia, losaꞌ au ta bisa lepa a beꞌin soꞌ.
95	GEN 4:15	Tehuu MANETUALAIN nataa ni nae, “Ta leo naꞌ fa! Bea naisa o, neuꞌ ko Au huku ni bera lena laiꞌ hitu!” Basa de MANETUALAIN tao tanda neuꞌ Kaen, ela lahenda ra bubuluꞌ, sona ara ta bole raisa ni fa.
96	GEN 4:16	Basa de Kaen laꞌo ela mamanaꞌ ria, de dooꞌ a nemeꞌ MANETUALAIN mai. Ana laꞌo losa mamanaꞌ esa nai oka Eden na pooꞌ dulu. Mamanaꞌ ria nade Nod. Sosoa na nae, ‘masararalaꞌ’. De ana leo neuꞌ na.
98	GEN 4:18	Henok ana na, riꞌ Irad. Irad ana na, riꞌ Mehuyael. Mehuyael ana na, riꞌ Metusael. Ma Metusael ana na, riꞌ Lamek.
99	GEN 4:19	Lamek saon dua. Esa nade Ada, ma esa nade Sila.
102	GEN 4:22	Lamek saon Sila boki na Tubal Kaen. Ria tititi-nonosi nara mantutu besi, de ara tao hata rupaꞌ ara reme besi ma riti. Tubal Kaen feto na, nade Naꞌama.
103	GEN 4:23	Laiꞌ esa, Lamek dedea koa ao neuꞌ saon dua si mata nara nae, “Emi nenene, ee! Bisinaaꞌ a ana touꞌ esa boa fee au, tehuu au popoꞌo aisa ni.
104	GEN 4:24	Lahenda fo raisa Kaen, ara hapu huhukuꞌ laiꞌ hitu. Tehuu maneniko hapu bea rapeda daleꞌ fo nau balas au, sona ara hapu huhukuꞌ laiꞌ hitu hulu hitu.”
106	GEN 4:26	Doo-doo boe ma, Set hapu ana touꞌ esa, nade Enos. Tepoꞌ ria, besaꞌ ko lahenda ra mulai doꞌo-tabe neuꞌ MANETUALAIN.
107	GEN 5:1	Tepoꞌ fo Manetualain adu lahenda, Ana taon tuka Ria rupa-lolen, sama leoꞌ ao-ina na. Ana adu naa si, touꞌ no inaꞌ. Ana nanade si nae, “lahenda”, ma Ana fee si ua-naleꞌ. Lahenda masososaꞌ a, nade Adam. Adam tititi-nonosin, nade nara siꞌ iaꞌ:
131	GEN 5:25	Metusalak teun natun esa faluhulu hitu, ana hapu ana touꞌ esa nade, Lamek.
134	GEN 5:28	Tepoꞌ fo Lamek teun natun esa falu hulu dua, ana hapu ana touꞌ esa.
135	GEN 5:29	Lamek foi anaꞌ ria nade Noh, (sosoa na nae, ‘fee oꞌoe-nanasiꞌ’), nana huu nae, “Anaꞌ ia neuꞌ ko oꞌoe-nanasi tao namahoꞌo ita daleꞌ na neme memela-mamakuꞌ nai dae ia, fo Manetualain kutuk ana so a.”
136	GEN 5:30	Basa ria, Lamek bei nasoda seluꞌ teuꞌ natun lima siohulu lima, ana hapu tamba seluꞌ ana touꞌ ma ana inaꞌ bali.
141	GEN 6:3	Boe ma MANETUALAIN nae, “Au sotaꞌ no lahenda ia ra masoda taohiro-taohari nara so. Au Dula-dale Ka fo riꞌ fee si sodaꞌ a, ta nau fee si rasoda raroo soꞌ. Ara muste mate. De neuꞌ ko ara rasoda losa adaꞌ noi teuꞌ natun esa dua huluꞌ a.”
143	GEN 6:5	Tepoꞌ ria, MANETUALAIN nita lahenda dae-bafoꞌ a tadalu nara talalu so. Sira dale nara afi raroo adaꞌ noi tadaluꞌ.
144	GEN 6:6	Boe ma MANETUALAIN nasale dale adu naa si fo leo rai dae-bafoꞌ ia. No enoꞌ ria, riꞌ tao na dale Na hedis naan seli.
146	GEN 6:8	Tehuu adaꞌ noi Noh riꞌ tao na MANETUALAIN dale na namahoꞌo.
157	GEN 6:19	Neme basa banda ra, o muste mu hai ma pasang be esaꞌ, muni si leo ofaꞌ daleꞌ reu, ela ara rasoda sama-sama roo o. Leo-leoꞌ banda aeꞌ, manupuiꞌ ara, ma banda manlodo-manraeꞌ ara, fo ela basa si rasoda.
161	GEN 7:1	Basa ria boe ma, MANETUALAIN dedea no Noh nae, “Au mete basa mamanaꞌ lalaꞌen, tehuu Au hapu adaꞌ noi o riꞌ dale ma roos a. Huu ria na, mo sao-ana mara masoꞌ ofaꞌ daleꞌ meu leo.
165	GEN 7:5	Basa boe ma Noh tao tuka matetuꞌ MANETUALAIN pareta na katemaꞌ.
168	GEN 7:8	Noh tuka MANETUALAIN pareta na, boe ma ana neni manupui rupaꞌ, ma banda fekeꞌ ara, esaꞌko noꞌ pasang na, leo mae banda fo lahenda bole naa paa na, ma lahenda raluli a.
175	GEN 7:15	Basa masodaꞌ ara pasang beesaꞌ, masoꞌ leo ofaꞌ daleꞌ reu sama-sama ro Noh, sama leoꞌ Manetualain pareta ni a. Basa si masoꞌ rala ofaꞌ daleꞌ, boe ma MANETUALAIN koe ofaꞌ a lelesu na.
195	GEN 8:11	Ledo leodaeꞌ boe ma, manupuiꞌ a fali leo Noh neu, ma seu neni ai saitun dooꞌ esa. Noh nalelaꞌ nan oe a reꞌe matetuꞌ so.
198	GEN 8:14	Losa bula kadua na faiꞌ duahulu hitu, te dae a namatuu matetuꞌ so.
204	GEN 8:20	Basa de, Noh lutu batu fo tao mamana tutunu-hohotuꞌ soa neuꞌ MANETUALAIN. Neme basa banda fo bole pake si dadi reuꞌ tutunu-hohotuꞌ, Noh hai na beꞌesaꞌ. Basa de ana hala si, fo tunu si reuꞌ mamana tutunu-hohotuꞌ ria lain, ela dadi tanda makasi neuꞌ MANETUALAIN.
205	GEN 8:21	MANETUALAIN hae na tutunu-hohotuꞌ ria boomeni na, boe ma dale Na namahoꞌo. Ana afi nae, “Mulai nemeꞌ besaꞌ ia, leo mae leoꞌ bea boe Au ta kutuk dae-bafoꞌ ia nana huu lahenda ra tadalun. Leo mae reme aana nara mai, afi adaꞌ noi tadaluꞌ a, tehuu Au ta alulutuꞌ basa hata masodaꞌ ara soꞌ, sama leoꞌ Au tao ia so a.
217	GEN 9:11	Au hehelu-barataa Ka leo iaꞌ: Leo mae leoꞌ bea oo, Au ta fee faa ina mai seluꞌ soꞌ, fo namate basa masodaꞌ ara, ma nalutu heni dae-bafoꞌ ia.
227	GEN 9:21	Laiꞌ esa de, ana ninu oe anggor losaꞌ mafuꞌ naan seli. Boe ma ana olu heni bua-loan, basa de suku poiraoꞌ nai mamana leleo na daleꞌ.
232	GEN 9:26	Io-oa MANETUALAIN! Ela leoꞌ bea na, Ana fee ua-naleꞌ neuꞌ Sem! Tehuu ela leoꞌ bea na, Kanaꞌan dadi neuꞌ Sem atan.
244	GEN 10:9	Ria kahere na nemeꞌ MANETUALAIN mai, losaꞌ ria boe dadi mansopu kahereꞌ naan seli. Huu ria na, lahenda biasa dedea rae, “Ela leoꞌ bea na, o dadi mansopu kahereꞌ, sama leoꞌ Nimrod fo hapu kahere na neme MANETUALAIN mai.”
248	GEN 10:13	Misraim tititi-nonosi nara, siꞌ lahenda Ludim, Anamim, Lehabim, Naftuhim,
249	GEN 10:14	Patrusim, Kasluhim, ma Kaftorim. Lahenda Kasluhim, nana lahenda Filistin nara bei-baꞌin.
254	GEN 10:19	losaꞌ sira dae nara ratoo mulai neme Sidon, naroo leo Gerar, losa Gasa. Neme naaꞌ mai leo Sodom, Gomora, Adma ma Seboim, losa nai Lasa.
257	GEN 10:22	Sem tititi-nonosin siꞌ: Elam, Asyur, Arpaksad, Lud ma Aram.
272	GEN 11:5	Boe ma MANETUALAIN onda, ela memete sudi kota ria no uma madema fo ara rafoa ni a.
273	GEN 11:6	Basa de Ana dedea nae, “Lahenda ia ra basa si lahenda nusaꞌ esa, ma ara pake dedeaꞌ esa. Hata fo besaꞌ ia ara taon ia, besaꞌ ko sauꞌ masososa. Balaha-binesaꞌ maneniko basa si nanahekeꞌ dadi esaꞌ sama leoꞌ besaꞌ ia, neuꞌ ko ara bisa tao sudi laꞌe ubeaꞌ a.
276	GEN 11:9	Huu ria na, de ranade kota ria, Babel (hiiꞌ nae sama no dedeaꞌ esa fo sosoa na nae, ‘lakadileꞌ’), nana huu MANETUALAIN tao taohiro-taohari sira dedea na, ma fee si kofela leo basa mamanaꞌ nai dae-bafoꞌ a.
294	GEN 11:27	Ia nana Tera tititi-nonosi nara. Tera ana nara siꞌ Abram, Nahor ma Haran. Haran hapu ana touꞌ esa nade Lot.
298	GEN 11:31	Laiꞌ esa de, Tera no anan Abram, manafeun Sarai, ma upun Lot, ara laꞌo ela koro Ur. Ara nau leo dae Kanaꞌan reu. Tehuu ara losa nusa Haran, boe ma ara leo reuꞌ na.
300	GEN 12:1	Tepoꞌ ria, MANETUALAIN dedea no Abram so nae, “Abram! O kalua laꞌo ela kileoboboki mara, papa ma uma-loon, ma o koro-tadum. O leo mamanaꞌ esa mu, neuꞌ ko Au atudun neuꞌ o.
303	GEN 12:4	Tepoꞌ ria, Abram teun hituhulu lima. Ana noo saon Sarai, fadi na ana manen Lot, ma basa hata pusaka nara, no basa lahenda manoi fo ana hapu nai kota Haran. Boe ma Abram asa laꞌo ela Haran, de leo mamanaꞌ fo MANETUALAIN nafadan ni a. De ara laꞌo raroo losa mamanaꞌ esa, nade Kanaꞌan.
305	GEN 12:6	Losa na boe ma, Abram laꞌo nafeo basa dae ria, losaꞌ nananeaꞌ no koroꞌ esa nade Sikem. Basa de ara leo lalai reuꞌ na, raneneaꞌ ai huu inaꞌ esa nai More. Tepoꞌ ria, lahenda Kanaꞌan ara bei leo rai naa.
306	GEN 12:7	Nai naa, MANETUALAIN natudu Ao na neuꞌ Abram. Ana nae, “Neuꞌ ko Au fee o tititi-nonosi mara nusaꞌ ia.” Basa de Abram lutu na batu ra, fo pake ni dadi neuꞌ mamana tutunu-hohotu soaneuꞌ MANETUALAIN fo riꞌ Ana natudu Ao na nai naa so.
307	GEN 12:8	Basa ria, boe ma Abram asa lali leo leteꞌ esa nai ona, de ara leo lalai reuꞌ koro Betel no koro Ai talada. Nai naa, ana napadedeiꞌ mamana tutunu-hohotuꞌ esa, ma ana doꞌo-tabe neuꞌ MANETUALAIN.
309	GEN 12:10	Laiꞌ esa de, hapu fai laa-roes inaꞌ nai dae Kanaꞌan. Huu ria na, de Abram asa laꞌo leo dooꞌ a reu bali nai pooꞌ ona, losa dae Masir. Ara leo lalai reuꞌ na.
316	GEN 12:17	Tehuu no maneꞌ a tonda na lahenda saon leo ria uman daleꞌ neu so, de MANETUALAIN feen no uma isi nara huhuku rupaꞌ.
320	GEN 13:1	Basa ria, boe ma Abram laꞌo ela Masir, de fali leo dae Negeb neu. Ana neu no sao na, ma basa hata posaka nara. Fadi na anan Lot boe tuka si.
323	GEN 13:4	Ma ana napadedeiꞌ mamana tutunu-hohotuꞌ boe. Basa de ana doꞌo-tabe neuꞌ MANETUALAIN nai naa.
324	GEN 13:5	Lot, fo riꞌ tuka sama-sama no Abram, boe nanuu banda-manuꞌ dodouꞌ, ma lahenda manoi-mantao nara boe dodouꞌ.
325	GEN 13:6	Tehuu mamanaꞌ ria ta loaꞌ a soaneuꞌ Abram no Lot, ma basa hata-heto nara lalaꞌen, ela leo rabua reuꞌ na. Basa de Abram no Lot manafoo nara mulai rareresiꞌ, nana huu nau-ai doo nai mamanaꞌ ria ta dai sira banda nara raa soꞌ. (Tepoꞌ ria, lahenda Kanaꞌan ro lahenda Feris ara bei leo rai naa boe.)
327	GEN 13:8	Basa boe ma, Abram nafada Lot nae, “Ana ki on! Ita dua ia nana toranooꞌ. Bosoꞌ losa ita dua esa ta malole no esa, ma ita lahenda mana noi nara rahuu raroo.
329	GEN 13:10	Basa de Lot memete naleleiꞌ. Boe ma ana nita lee Yarden bafaꞌ a oe-oe mesan losa koro Soar. Mamanaꞌ ria dae mandadiꞌ, sama leoꞌ MANETUALAIN oka Na, ma sama leoꞌ dae Masir. (Tepoꞌ ria, Manetualain bei ta nalulutuꞌ Sodom no Gomora. De dae ria bei malole a.)
330	GEN 13:11	De Lot here na katemaꞌ dae fo nai Yarden bafaꞌ a. Boe ma, dua si rasidaꞌ. Basa de Lot leo pooꞌ dulu neu.
331	GEN 13:12	Tehuu Abram leo nahaniꞌ dae Kanaꞌan. Basa de Lot neu leo nai koroꞌ fo raneneaꞌ kota Sodom, nai Yarden bafaꞌ a.
332	GEN 13:13	Tehuu lahenda Sodom ara, nana tadalu heta. Ma ara ta nau ramanene neuꞌ MANETUALAIN.
333	GEN 13:14	Lot no Abram rasidaꞌ so, boe ma MANETUALAIN nafada Abram nae, “Abram! Soba o mete maleleiꞌ basa mamanaꞌ ara, nemeꞌ mamanaꞌ fo o mapadeiꞌ ria a. Mete matalolole, dea-mataꞌ, ii-onaꞌ.
335	GEN 13:16	Neuꞌ ko Au fee o tititi-nonosim ramefu sama leoꞌ soro aeꞌ nai tasi suuꞌ. Losa lahenda ra ta bisa reke rala o tititi-nonosi mara dedesi na.
337	GEN 13:18	Basa ria, boe ma Abram asa rarali, de reu leo seluꞌ nai mamanaꞌ fo raneneaꞌ ai huu inaꞌ ara nai Mamre, naneneaꞌ koro Hebron. Basa de ana lutu mamana tutunu-hohotuꞌ neuꞌ naa, fo doꞌo-tabe neuꞌ MANETUALAIN.
349	GEN 14:12	Tehuu Abram anan Lot leo nai Sodom. Basa de, mane kahaaꞌ siraꞌ hopu roo Lot asa, ma ralea reni basa hata-heto nara.
353	GEN 14:16	Basa de Abram hapu faliꞌ Lot no lahenda nara, ro basa hata-heto nara, ma lahenda fekeꞌ ara boe.
362	GEN 15:1	Basa ria boe ma, MANETUALAIN natudu Ao Na neuꞌ Abram. Ana nae, “Abram! O bosoꞌ bii. Huu fo Au riꞌ anea-asalaꞌe o nemeꞌ musu a mai. Ma Au fee o ua-nale bau-inaꞌ.”
363	GEN 15:2	Tehuu Abram nae, “Oo Manetualain! Leo mae Manetualain nau fee au hata dodouꞌ boe, ta nanuu sosoa-raraaꞌ hata esa boeꞌ. Huu fo au ta anuu anaꞌ ela fee au tititi-nonosiꞌ. De nau hapu posakaꞌ dodou-inaꞌ, fo tao ubeaꞌ? Mae tao leoꞌ bea boe, au ata ki Eliasar neme Damsik mai, riꞌ hapu katemaꞌ asa.”
365	GEN 15:4	Tehuu MANETUALAIN nataa nae, “Ta leo naaꞌ fa! Huu fo o ana boki ma riꞌ neuꞌ ko hapu basa posakaꞌ sira, ta atam ria fa.”