5	GEN 1:5	Brom deya God bin kadimat det lait brom det dakbala, en imbin gulum det lait Deitaim, en imbin gulum det dakbala Naitaim. Brom deya naitaim bin gowei, en wen imbin ailibala, imbin det sekan dei na.
51	GEN 2:20	Det men bin gibit neim langa ola bard en ola enimul. Bat ol detlot bard en enimul nomo bin meit blanga im. Najing.
81	GEN 4:1	Brom deya Edam en Ib dubala bin silipsilip gija, en Ib bin jidan femiliwei na. Bambai imbin abum lilboi, en imbin tok, “Nobodi bin album mi abum dijan lilboi. Oni God na.” En blanga tharran na imbin gulum det lilboi Kein.
95	GEN 4:15	Wal YAWEI bin tok, “Nobodi kaan kilim yu ded. If enibodi kilim yu ded, wal sebenbala pipul garra dai blanga peibek blanga yu.” Afta na YAWEI bin pudum mak langa Kein, en det mak bin jidan woning blanga enibodi wen dei midim Kein, en det mak bin dalim olabat nomo blanga kilim im.
96	GEN 4:16	Wal Kein bin gowei brom det pleis weya YAWEI bin jidan garram im, en imbin jidan langa det kantri gulum Nad deya sanraiswei brom det gadin gulum Idin.
102	GEN 4:22	Det najawan waif blanga Leimek neim Sila bin abum wanbala lilboi, en imbin gulum im neim Tubalkein. En wen Tubalkein bin gro, imbin meigim olkain tul garram aiyan en kopa, en imbin abum wanbala sista neim Neima.
135	GEN 5:29	en Leimek bin gulum det lilboi neim Nowa, en imbin tok, “YAWEI det trubala God bin meigim dijan graun adwan. Bat main lilboi garra gibit melabat spel brom dumbat adwek.”
138	GEN 5:32	Wal Nowa bin merrit, en wen imbin olmen 500 yiya ol, imbin abum thribala lilboi neim Shem, Hem en Jeifeth.
142	GEN 6:4	Afta na detlot gel hubin merrit langa detlot spirit bin abum biginini olabat, en deibin gulum olabat Nefalim pipul, en afta wen olabat mami bin dai, detlot Nefalim pipul bin kipgon jidanbat langa olabat mami kantri, en deibin ol brabli strongbala pipul, en deibin jidan bigneim.
146	GEN 6:8	Wal oni wanbala men deya bin meigim YAWEI gudbinji. Det men bin neim Nowa.
147	GEN 6:9	Imbin abum thribala san neim Shem, Hem en Jeifeth, en imbin gudbala men. Nobodi bin oldei faindim eni rong langa im, en imbin oldei bulurrum God brabliwei.
151	GEN 6:13	Afta na God bin tok langa Nowa, “Ai garra binijimap ola pipul, dumaji olabat oldei dumbat nogudbala ting. Ebri kantri jidan oni garram detlot nogudbala ting. Wal ai garra binijimap olabat holot na.
158	GEN 6:20	Yu garra gajim olkain bard en olkain enimul. Nomeda olabat bigwan o lilwan, bat stil yu garra gajim olabat, en yu garra pudum olabat langa det bout weya olabat kaan draun.
160	GEN 6:22	Wal Nowa bin duwit langa God, en imbin dum ebrijing weya God bin dalim im blanga dum.
161	GEN 7:1	Afta na YAWEI det trubala God bin tok langa Nowa, “Aibin luk ebribodi langa ola kantri oldei dumbat nogudbala ting, en aibin faindim oni yu na dumbat gudbala ting. Wal yu gowin insaid langa det bout na garram yu femili olabat, dumaji ai garra seibum yumob.
165	GEN 7:5	Wal Nowa bin lisin langa det wed weya YAWEI bin dalim im, en imbin duwit langa im.
167	GEN 7:7	Wal Nowa en im waif en detlot thribala san blanga dubala en detlot thribala waif blanga olabat bin ol gowin langa det bout, dumaji imbin gulijap taim blanga det fladwoda,
168	GEN 7:8	en Nowa bin duwit langa God, en imbin deigim ol detlot enimul langa det bout. Imbin deigim ol detlot enimul weya deibin yusum langa serramoni en ol detlot enimul weya dei nomo bin yusum langa serramoni, en imbin deigim ol detlot bard du. Boiwan en gelwan imbin deigim langa det bout.
170	GEN 7:10	Langa det seim dei Nowa en im waif en detlot thribala san blanga im neim Shem, Hem en Jeifeth en detlot thribala waif blanga olabat bin ol gowin insaid langa det bout garram ol detlot difrinkain enimul en bard olabat.
174	GEN 7:14	Ola wailwan enimul en ola kwaitwan enimul en ola buligimob en ol detlot lisid en sneik en ola bard en olkain insek, ol detlot na bin kaman langa Nowa, boiwan en gelwan,
176	GEN 7:16	en deibin ol gowin insaid langa det bout jis laik weya God bin dalim Nowa. En det seim dei YAWEI det trubala God bin jadimap det dowa blanga det bout. Wal afta wan wik na det fladwoda bin gidap. Langa det namba 3 dei langa det sekan wik blanga det sekan manth det skai bin opinap, en woda bin kamat detmatj, en rein bin buldan deitaim en naitaim nomo stap 40 dei gulijap 6 wik.
180	GEN 7:20	Nomo enijing bin kamat na, en det woda bin jidan 7 mita dip ontop langa ola haibala hil.
183	GEN 7:23	Langa ebri kantri ola pipul en ola enimul bin binij. Nomo enijing bin jidan laibala. Najing na. Holot bin ded. Oni Nowa en detlot langa det bout bin jidan laibala.
185	GEN 8:1	Afta na God bin jadimap det skai, en imbin klosimap ola bigbala springwoda langa graun, en det rein bin stap buldanbat na. Bat det fladwoda bin stil jidan ontop langa ola kantri, en det woda bin gaburrumap ola graun ebriweya longtaim. Wal God nomo bin fogedabat Nowa. Imbin stil jinggabat im en im femili olabat en ola enimul langa det bout, en imbin jandim win ebriweya langa det kantri blanga draiyimap ola woda.
190	GEN 8:6	Wal det bout bin jidan deya ontop langa det hil 40 dei gulijap 6 wik, en afta Nowa bin opinim det windo blanga det bout,
192	GEN 8:8	Wal afta wen Nowa bin larramgo det kro, imbin larramgo wanbala pijin blanga faindat if det woda bin godan,
193	GEN 8:9	en det pijin bin trai. Bat im nomo bin faindim pleis blanga meigim nes, dumaji woda bin stil leidan ebriweya ontop langa graun, en det pijin bin lafta flaibek langa det bout, en Nowa bin gajim im en pudum im insaid langa det bout.
194	GEN 8:10	Afta na wanwiktaim Nowa bin larramgo det pijin brom det bout igin,
195	GEN 8:11	en wen det pijin bin kambek sangodantaim, imbin abum grinwan lif langa im mawus brom det tri gulum olibtri, en Nowa bin sabi na det woda bin godan en ola graun bin gulijap drai.
196	GEN 8:12	Wal Nowa bin weit wanmo wik, en afta imbin larramgo det pijin brom det bout igin, en distaim det pijin bin flaiwei, en im nomo bin kambek.
197	GEN 8:13	Wal Nowa bin brabli olmen na 601 yiya ol, en langa det feswan dei langa det feswan manth ola woda bin ol drai, en Nowa bin opinim det dowa blanga det bout, en imbin luk nomo woda bin deya. Det woda bin ol gowei.
198	GEN 8:14	Bat det graun bin stil jidan sofwan, en Nowa en im femili bin lafta jidan insaid langa det bout 2 mants. Afta na langa det namba 6 dei blanga det namba 3 wik langa det sekan manth, ola graun langa ebri kantri bin jidan brabli draiwan.
199	GEN 8:15	Wal God bin dalim Nowa,
202	GEN 8:18	Wal wen God bin tok lagijat, Nowa en im femili olabat bin kamat atsaid brom det bout,
204	GEN 8:20	Afta na wen Nowa en im femili bin ol kamat atsaid brom det bout, Nowa bin pailimap ston blanga meigim teibul blanga ofring, en imbin gajim sambala gudwan enimul en bard, en imbin kilim olabat, en imbin barnimap olabat ontop langa detlot ston blanga sei theingkyu langa YAWEI det trubala God.
206	GEN 8:22	Nomo. Dijan kantri garra jidan longtaim, en ola bush daga garra oldei kipgon gro en bulurrum detlot sisan, en ol detlot sisan garra oldei kipgon, en det san en det mun garra kipgon gidap en godan ebridei du.” God imselp bin tok lagijat na.
207	GEN 9:1	Wal God bin gudbinji blanga Nowa en im san olabat, en imbin dalim olabat, “Yumob garra abum bigmob biginini, en olabat garra spredat ebriweya langa ebri kantri.
211	GEN 9:5	“Najawan ting deya du. If eni pipul kilim najalot pipul ded, wal ai garra panishim olabat. En if enimul kilim pipul ded, wal ai garra panishim det enimul du.
213	GEN 9:7	“Wal, Nowa, yumob garra abum bigismob biginini olabat, en dei garra spredat ebriweya langa ola kantri, en dei garra abum bigmob biginini du.
224	GEN 9:18	Wal detlot thribala san blanga Nowa hubin kamat brom det bout bin neim Shem, Hem en Jeifeth, en bambai ola pipul langa ebri kantri bin ol kamat brom detlot thribala men na. En detlot Keinanait pipul bin kamat brom Hem, dumaji imbin abum san neim Keinan.
226	GEN 9:20	Wal afta wen det fladwoda bin godan, Nowa bin meigim gadin, en imbin growimap loda daga gulum greip,
228	GEN 9:22	Afta na det yangwan san blanga Nowa neim Hem bin wokin langa det tent, en imbin luk im dedi leidan deya neigidbala. Wal imbin go atsaid na, en imbin dalim Shem en Jeifeth det dubala braja blanga im,
230	GEN 9:24	Bambai na wen Nowa bin gidap sobawan, deibin dalim im wanim det yangwan san bin dum langa im,
231	GEN 9:25	en Nowa bin tok, “Wal im nogud blanga Keinan det san blanga Hem! Im garra oldei jidan jis laiga prisana en dumbat ola adwek blanga im braja olabat.
233	GEN 9:27	En ai wandim God garra gibit loda biginini en loda kantri langa Jeifeth, en im garra meigim Keinan jidan jis laiga prisana en dumbat ola adwek blanga im du. En ola klen blanga Jeifeth en ola klen blanga Shem garra jidan kantrimen gija langa det kantri blanga Shem.” Lagijat na Nowa bin tok.
234	GEN 9:28	Wal afta na Nowa bin jidan laibala 350 yiya,
236	GEN 10:1	Wal afta det fladwodataim loda difrin traib bin kamat brom Shem, Hem en Jeifeth detlot thribala san blanga Nowa.
237	GEN 10:2	Det san blanga Nowa neim Jeifeth bin abum sebenbala san neim Goma, Meigog, Medai, Jeiban, Tubal, Mishek en Tairas.
241	GEN 10:6	Det san blanga Nowa neim Hem bin abum fobala san neim Kush, Misraim, Put en Keinan.
243	GEN 10:8	Kush bin abum najawan san du neim Nimrod. Imbin jidan bigneim langa ola kantri,
244	GEN 10:9	en imbin nambawan hantingmen, dumaji YAWEI det trubala God bin oldei albumbat im. En ola pipul bin oldei tok, “Nimrod im nambawan hantingmen. En maitbi YAWEI garra meigim yumob jidan seimwei laik im du.”
245	GEN 10:10	Wal deibin meigim Nimrod jidan bos blanga loda taun langa det kantri gulum Bebalon, en imbin jidan bos blanga detlot taun gulum Bebalon, Irek, Ekad en Kalna,
246	GEN 10:11	en afta imbin go langa det najawan kantri gulum Asiriya, en deya na imbin bildimap fobala taun gulum Ninaba, Reiyabothiya,
247	GEN 10:12	Keila en Resen. Resen bin jidan langa midul langa Ninaba en Keila. Bat Keila bin det nambawan taun.
248	GEN 10:13	Loda traib bin kamat brom det san blanga Hem neim Misraim en deibin gulum neim blanga ol detlot traib Ladait, Einamait, Leiyabait, Neftahait,
250	GEN 10:15	Det feswan grensan blanga Nowa det san blanga Hem neim Keinan bin abum san neim Saidan, en loda traib bin kamat brom Keinan, en deibin gulum neim blanga ol detlot traib Hitait,
256	GEN 10:21	Det san blanga Nowa neim Shem bin bigwan braja blanga Jeifeth,
267	GEN 10:32	Wal afta det fladwodataim bigmob difrinwan traib bin kamat brom detlot thribala san blanga Nowa, en ol detlot traib bin spredat ebriweya, en deibin ol jidan langa olabat ron kantri.
289	GEN 11:22	Wal Serug bin merrit, en wen imbin 30 yiya ol, imbin abum lilboi neim Neihowa.
291	GEN 11:24	Wal Neihowa bin merrit, en wen imbin 29 yiya ol, imbin abum lilboi neim Tera.
292	GEN 11:25	En Neihowa bin kipgon abumbat biginini raidap imbin brabli olmen, en imbin dai wen imbin 148 yiya ol.
293	GEN 11:26	Wal Tera bin merrit, en wen imbin 70 yiya ol, imbin abum thribala san neim Eibram, Neihowa en Heran.
294	GEN 11:27	Wal iya na det stori blanga Tera. Imbin abum thribala san neim Eibram, Neihowa en Heran.
296	GEN 11:29	Wal Milka bin merrit langa im ronwan anggul neim Neihowa. Det najawan anggul blanga im neim Eibram bin merrit langa wan wuman neim Serai,
303	GEN 12:4	Wal Eibram bin gowei brom det pleis gulum Heran jis laik weya YAWEI bin dalim im blanga dum. Nomeda imbin olmen 75 yiya ol, bat stil imbin go trebulin olawei raidap langa det kantri gulum Keinan,
308	GEN 12:9	Brom deya Eibram bin kipgon wokwok langa det deset kantri gulum Neigib.
309	GEN 12:10	Bambai na ola daga bin ranat langa det kantri gulum Neigib weya Eibram bin jidan, dumaji deibin abum brabli draisisan langa det kantri, en Eibram bin lafta go en lukabat blanga daga langa det najawan kantri gulum Ijip, en deya na imbin jidan lilbit longtaim.
321	GEN 13:2	Imbin brabli ritjwan men garram silba en gol en olkain enimul, en garram ol detlot enijing na imbin go langa det kantri gulum Neigib.
359	GEN 14:22	Bat Eibram bin tok, “Nomo. Ai kaan kipum enijing lagijat, dumaji aibin meigim pramis langa YAWEI det brabli haibala God hubin meigim ola kantri en skai.
365	GEN 15:4	Wal YAWEI bin tok, “Nomo. Det wekinmen kaan teikoba ebrijing blanga yu. Yu ron san garra jidan bos.”
366	GEN 15:5	Afta na YAWEI bin deigim Eibram atsaid brom im tent, en imbin tok, “Yu luk langa det skai na. Yu luk detlot sta olabat? Yu reken yu gin kaundimap olabat? Najing. Yu kaan kaundimap olabat. En ai garra gibit yu detmatj biginini na.”
417	GEN 17:19	Wal God bin tok, “Nomo. Sera na garra faindim beibi, en im garra abum ronwan san blanga yu, en yu garra gulum im neim Aisik. En ai garra kipum main strongwan pramis garram im en garram ola biginini blanga im olagija.
435	GEN 18:10	Wal det wanbala men deya bin YAWEI det trubala God, en imbin dalim Eibrahem, “Neksyiya wen ai kambek igin langa yu kemp, yu waif Sera garra abum beibi. Lilboiwan im garra abum.” Wal Sera bin lisin brom insaid langa det tent,
439	GEN 18:14	Yu dalim mi na. Yu reken enijing brabli ad blanga mi blanga dum? Neksyiya ai garra kambek igin en yunbala Sera garra abum boiwan beibi.”
453	GEN 18:28	Wotabat maitbi oni 45 gudbala pipul jidan deya langa det taun. Yu kaan binijimap det taun dumaji faibala pipul shot, indit?” Wal YAWEI bin tok, “Najing. Ai kaan panishim det taun if 45 gudbala pipul jidan deya.”
460	GEN 19:2	en imbin tok, “Yunbala kaman langa main haus. Deya na yunbala gin abum bogi, en yunbala gin silip deya du, en ailibala yunbala gin kipgon. Wal yunbala kaman langa main haus na, en ai garra lukaftum yunbala.” Lagijat na Lot bin tok. Bat dubala bin tok, “Nomo. Minbala go en silip eniweya langa pak.”
465	GEN 19:7	en imbin tok langa olabat, “Nomo, main fren olabat. Yumob nomo wandi dum eni nogudbala ting langa det dubala streinja.
466	GEN 19:8	Yumob lisin langa mi. Ai garram main doda dubala deya. Nomo eni men bin tatjim dubala. Wotabat ai bringimap dubala iya atsaid langa yumob en yumob gin dum enijing langa dubala? Bat langa det dubala streinja yumob kaan tatjim dubala, dumaji dubala bin kaman langa main haus en ai garra lukaftum dubala.” Lagijat na Lot bin tok.
467	GEN 19:9	Wal detlot men bin dalim Lot, “Yu gowei brom melabat roud. Yu streinja du. Yubin kaman langa dijan taun. Yu kaan bosoba langa melabat. Najing. Yu gowei na! Melabat garra dum mowa nogudbala ting langa yu brom wanim melabat bin wandim dum langa det dubala streinja.” Wal wen detlot men bin tok lagijat, deibin pushumwei Lot wansaid blanga breigimdan det dowa.
471	GEN 19:13	en yumob gowei brom dijan taun kwikbala, dumaji minbala garra panishim ola pipul langa dijan taun. Minbala garra binijimap dijan taun garram ola pipul. Nogudwan wed blanga dislot pipul bin kaman langa YAWEI det trubala God, en imbin jandim minbala blanga binijimap dijan taun.”
475	GEN 19:17	en deya na det wanbala streinja bin jingat langa olabat, “Ranawei! Ranawei! Nomo lukbek! Yumob garra kipgon olawei langa det hil kantri. Yumob kaan stap hafwei, wulijim yumob kaan dai du.”
476	GEN 19:18	Wal Lot bin tok, “Nomo! Ai kaan dum lagijat!
497	GEN 20:1	Bambai na Eibrahem bin shifdim im kemp brom detlot tri blanga det men neim Memrei, en imbin go langa det kantri gulum Neigib, en deya na imbin ringimap im tent langa midul langa det dubala taun gulum Keidish en Shuya. Bambai na imbin go en imbin jidan langa det kantri gulum Gera,
500	GEN 20:4	Wal det king bin tok, “Nomo! Ai nomo bin sabi det dubala bin merrit. Yu kaan binijimap mi en main pipul olabat.
568	GEN 22:20	Bambai na Eibrahem bin gedim nyus blanga im braja Neihowa en im waif dubala.
572	GEN 22:24	Ruma det sekanwan waif blanga Neihowa bin abum fobala lilboi, en deibin gulum olabat neim Teba, Geiham, Teihash en Meiyaka.
596	GEN 24:4	Nomo. Yu garra gobek raitbek langa main ronwan kantri, en brom main ronwan kantrimen yu garra gajim waif blanga main san.” Lagijat na Eibrahem bin tok.
598	GEN 24:6	Wal Eibrahem bin tok, “Nomo. Yu kaan deigimbek main san langa main kantri,
602	GEN 24:10	Afta na det wekinmen blanga Eibrahem bin deigim 10 kemul en imbin loudimap detlot purdiwan enijing, en imbin go langa det kantri gulum Mesapoteimiya, en imbin go raidap langa det taun weya det braja blanga Eibrahem neim Neihowa bin jidan.
616	GEN 24:24	Wal det gel bin tok, “Main dedi im Bethyuwel det san blanga Neihowa en Milka.
629	GEN 24:37	En det bos main bin meigim mi pramis blanga gajim waif blanga im san Aisik brom ola ronwan rileishan blanga im dedi. Ai kaan gajim waif blanga im brom detlot Keinan pipul weya im jidanbat. Najing.
639	GEN 24:47	“Afta na aibin askim im, ‘Hu yu dedi?’ En imbin dalim mi, ‘Bethyuwel det san blanga Neihowa en Milka.’ “Wal aibin pudum detlot ring langa im nos en am na,
654	GEN 24:62	Bambai na deibin kamat langa det pleis gulum Lahairoi Spring deya langa det kantri gulum Neigib weya Aisik bin jidan.
672	GEN 25:13	en wen Ishmeil bin merrit, im waif bin abum twelbala boi blanga im. Olabat neim bin Neibayoth, Keda, Edbiyel, Mibsam, Mishma, Duma, Mesa,
674	GEN 25:15	Heided, Tema, Jetuwa, Nefish en Kedema.
783	GEN 28:9	en Isau bin go langa im anggul Ishmeil det najawan san blanga Eibrahem, en imbin merrit langa det doda blanga im neim Mahalath det sista blanga Neibayoth.
801	GEN 29:5	Wal Jeikob bin tok, “Yumob sabi det grensan blanga Neihowa neim Leiban?” En detlot stakmen bin tok, “Yuwai, melabat sabi im.”
833	GEN 30:2	Wal Jeikob bin gitwail langa Reitjul, en imbin tok, “Mi nomo God! Im na bin meigim yu jidan weya yu kaan abum beibi. Nomo mi.”