23214	MAT 1:1	Yeesu Kirisi yɛ Tafiti kɛyasɛ lɛ, Tafiti pɔ́ɔn kɔ Apiraham kɛyasɛ. Upikpurɛ anyiri yɛ nnyɛ́:
23215	MAT 1:2	Apiraham yɛɛ Isaaki mari, Isaaki pɔ́ɔ Yakupu maru, Yakupu pɔ́ɔ Yuta nɛ upimarɛcɔ márɛi,
23216	MAT 1:3	Yuta pɔ́ɔ Perɛsi nɛ Sera maru. Piuni yɛɛ Tamaa. Perɛsi pɔ́ɔ Hɛsirɔɔ maru, Hɛsirɔɔ pɔ́ɔ Aram maru,
23217	MAT 1:4	Aram pɔ́ɔ Aminatapi maru, Aminatapi pɔ́ɔ Nasɔɔ maru, Nasɔɔ pɔ́ɔ Salimani maru,
23218	MAT 1:5	Salimani pɔ́ɔ Poosi maru. Pi yɛ Poosi uni sée rɛ Rahapi. Poosi pɔ́ɔ Opɛti maru. Uyɛ̃ uni yɛɛ Ruuti. Opɛti pɔ́ɔ Yesee maru,
23219	MAT 1:6	Yesee pɔ́ɔ uyɔ́ɔpi Tafiti maru, Tafiti pɔ́ɔ Salomɔɔ maru. Salomɔɔ uni yɛ mɛkɛɛ-mɛ Urii sɔ́ɔnlɛnlɛ.
23220	MAT 1:7	Salomɔɔ pɔ́ɔ Ropowam maru, Ropowam pɔ́ɔ Apiya maru, Apiya pɔ́ɔ Asaa maru,
23221	MAT 1:8	Asaa pɔ́ɔ Yosafati maru. Yosafati pɔ́ɔ Yoram maru. Yoram pɔ́ɔ Osiyasi maru,
23222	MAT 1:9	Osiyasi pɔ́ɔ Yotam maru, Yotam pɔ́ɔ Akaasi maru, Akaasi pɔ́ɔ Esekiyasi maru,
23223	MAT 1:10	Esekiyasi pɔ́ɔ Manasee máru, Manasee pɔ́ɔ Amɔɔ maru, Amɔɔ pɔ́ɔ Yosiyasi maru,
23224	MAT 1:11	Yosiyasi pɔ́ɔ Yekoniya nɛ upimarɛcɔ márɛi. Likumúŋɛ́ kpɛ-i kapi Isirayɛɛli pikɔ́ cɔ́pii apí nɛ Papilɔɔni kuyu sĩ.
23225	MAT 1:12	Kapi Isirayɛɛli pikɔ́ n cɔ́pii apí nɛ Papilɔɔni kuyu sĩ mɛmáá kɛ Yekoniya pɔ́ɔ pɛɛ Sealitiyɛli mari, Sealitiyɛli pɔ́ɔ Soropapɛɛli maru,
23226	MAT 1:13	Soropapɛɛli pɔ́ɔ Apihuuti maru, Apihuuti pɔ́ɔ Eliyakim maru, Eliyakim pɔ́ɔ Asɔɔ maru,
23227	MAT 1:14	Asɔɔ pɔ́ɔ Satɔki maru, Satɔki pɔ́ɔ Akim maru, Akim pɔ́ɔ Eliwuuti maru,
23228	MAT 1:15	Eliwuuti pɔ́ɔ Eleyasaa maru, Eleyasaa pɔ́ɔ Matani maru, Matani pɔ́ɔ Yakupu maru,
23229	MAT 1:16	Yakupu pɔ́ɔ Maari ula Yosɛfi maru. Maari kɛ́mɛɛ́ kɛ Yeesu kapi yɛ kɔ n sée rɛ Kirisi uu léemɛ.
23230	MAT 1:17	Lɛ̃ nnya, kaí nɛ Apiraham-i n kpísi aí nɛ Tafiti-i pá, li walɛ ncɔpuri anai kɛfi nɛ ana. Kai Tafiti-i n kpísi aí nɛ kumúŋɛ́ kpɛ-i kapi Isirayɛɛli pikɔ́ n cɔ́pii apí nɛ Papilɔɔni kuyu sĩ pá, li walɛ ncɔpuri anai kɛfi nɛ ana. Kai kɔ kei n kpísi aí nɛ Kirisi imarɛtuŋɛ pá, li walɛ ncɔpuri anai kɛfi nɛ ana acɔ.
23231	MAT 1:18	Lɛ̃ kapi Yeesu Kirisi m mári yɛ nní: Uuni Maari kapí pɛɛ Yosɛfi feleilɛ̃, amá Nfáasɔnɛ nn tíyɛsɛ uu fapisi u nɛ Yosɛfi ápi kɔ kahanɛ kulee rimpɛ́nɛ.
23232	MAT 1:19	Uula Yosɛfi yɛ asei ute lɛ, úu pɛɛ́ la ukɛ́ unɔ́si isɛi lukɛisɛ kuyu kukɛ́ kṍ, uu pɛɛ́ n la ukɛ́ risɛ́ɛ́ nɛ u lakasɛ.
23233	MAT 1:20	Kuu ń we un likɛcáá músu, Upíima uleecaatumɛ unyinɛ uu kɛlárɛ́-i u kpáfúmɛ uu u maa rɛ: Tafiti kɛpirɛ̃ Yosɛfi, Maari pikpíkɛ́ ápi kapɛ pɔ́ n cɔ́ŋlɛ̃. Nfáasɔnɛ mɛɛ tíyɛsɛ kuu fapisi.
23234	MAT 1:21	U kɛwántisi marunɛ aa kɛ séi rɛ Yeesu. Kɛkɛɛ sɔ́nti kɛkɛ́ kɛmpuri pikɔ́ akópɛ kɛ́mɛɛ lesɛ.
23235	MAT 1:22	Lɛ̃ nnɛ́í ai wai, Upíima rinɔɔ kuu mɛkɛɛ antepu Esayi m máasɛ rikɛ́ nɛ n li nnya. Lɛlɛɛ rɛ:
23236	MAT 1:23	Ukpére yɛɛ úu utisi n nyu yɛ́ kɛfa wa, uu kɛwántisi maru api kɛ séi rɛ Emanuyɛɛli, liasei rɛ Uléécaa yɛ kɛrɔ́mɛɛ́ we.
23237	MAT 1:24	Kɛ Yosɛfi uu n yisi, uu lɛ̃ kɛ Upíima uleecaatumɛ uu u n símisi wai, uu Maari kunɔ́si kpísi.
23238	MAT 1:25	Amá u nɛ uyɛ̃ ápi kulee ripɛ́nɛ uú ha nɛ kɛwántisi maru. Kuu kɛ m mári, Yosɛfi uu kɛ séi rɛ Yeesu.
23239	MAT 2:1	Yutee kɛtẽ kɛ́mɛɛ kapi Pɛtɛlɛhɛm-pɔ Yeesu mari. Erooti yɛɛ pɛɛ kei kumúŋɛ́ kpɛ-i uyɔ́ɔpi píima. Pinyuwɛ píima pinyinɛ api kɛtuŋɛleemɛ-mɛmpɔ yisi api Yerusalɛm tulu.
23240	MAT 2:2	Apí ha pisɛ rɛ: Yei yɛ kɛwã́ kɛ̃ kapi m mári pin tee rɛ kɛkɛɛ sɔ́nti kɛkɛ́ Pisuifi iyɔɔpi tonɛ? Hái kɛtuŋɛleemɛ-pɔ kari riwárɛpi tɛɛ n nyísɛlɛ̃ tɛ pi kɛwã́ kɛ̃ mari yɛ̃. Lɛ̃ nnya karí ka rɛ tɔkɛ́ kɛ yáási ari wúla.
23241	MAT 2:3	Kɛ uyɔ́ɔpi píima Erooti uu lɛ̃ n kṍ, ai u nɛ Yerusalɛm pikɔ́ nnɛ́í mpɔ́ɔcaai tani.
23242	MAT 2:4	Uu pɛpɛɛ yɛ Uléécaa inyɔ́ɔnsɛ n wa piwɛ́ɛ́sɛ nnɛ́í nɛ isé picélaa cápinɛ uu pi pisɛ rɛ kɛlõ kɛ́ye-i kapí uyɛ̃ kɛ Uléécaa uu n wɛ́ɛ marunɛ.
23243	MAT 2:5	Api u pɛsɛ rɛ: Yutee kɛteni-i, Pɛtɛlɛhɛm-pɔ le. Antepu Misee yɛ mɛkɛɛ-mɛ wɔi rɛ:
23244	MAT 2:6	Pɔ̃́ Pɛtɛlɛhɛm kuyu! Ái pɔ́ɔ Yutee kɛtẽ kɛcáá ayu kɛcɔpɛ ríyu paalɛ̃. Li we rɛ kɛpɔ́mɛɛ́ kɛ uyɔ́ɔpi píima uu léerinɛ, uyɛɛ yɛ́ pinɛ́soi Isirayɛɛli pikɔ́ n séni.
23245	MAT 2:7	Kei kɛ Erooti uu pɛɛ pinyuwɛ píima pɛ̃ mɛyaa sée uu pi pisɛ rɛ pikɛ́ u símisi ńsɔnɛ ukɛ́ céri kumúŋɛ́ kpɛ-i kɛ riwárɛpi tɛ̃ ari n léemɛ.
23246	MAT 2:8	Uu pɛɛ limɛmáá Pɛtɛlɛhɛm-pɔ pi tum uu pi maa rɛ: ani n ŋme ani ha kɛwã́ kɛ̃ kɛcáá ńsɔnɛ písɛi ani kóm. Nɔn kɛ n yɛ̃, ani pɛɛri ani nɛ́ símisi nɛ́ɛkɛ́ ha kɔ kɛ yáási kɛ́ riwula.
23247	MAT 2:9	Kɛ Erooti uu lɛ̃ pisímɛ́ pi ḿ masí, api yisi api ncée pɔlɔ. Kei kapi pɛɛ ripaí, api yɛ́nu riwárɛpi tɛ̃ kapí pɛɛ kɛtuŋɛleemɛ-pɔ n yɛ̃́ tin pikɛyu sɔ́nɛ pin ti tikilɛ̃. Ari kɛlõ kɛ-i kɛ kɛwã́ kɛ̃ akɛ ń we tulu, ari nyɛrɛ.
23248	MAT 2:10	Kapi kei ri n yɛ̃́, ai mɛyíkíyiki pi larisi.
23249	MAT 2:11	Api kɛ́yɔ loni api kɛwã́ nɛ kɛuni Maari yɛnu, api kɛ yáási apí nɛ wula. Api pɛɛ pimɛmá fénnɛ api wura nɛ tulaali ŋmaa-ŋmaa nɛ mɛ́kpɔ kapi yɛ n sée rɛ miiri lesɛ api kɛ hɛkɛsi.
23250	MAT 2:12	Uléécaa uu pɛɛ́ masí kɛlárɛ́ kɛ́mɛɛ pi símisi rɛ ápi kapɛ Erooti kɛ́mɛɛ pɛlɛ. Kei kapi pɛɛ ncée féé kpísi apí nɛ pikuyu pɛlɛ.
23251	MAT 2:13	Kɛ pinyuwɛ pɛ̃ api n tɔ́mpɔ, Upíima uleecaatumɛ unyinɛ uu kɛlárɛ́-i Yosɛfi kpáfúmɛ uu rɛ: A yisi, a kɛwã́ nɛ kɛuni kpísi aa wuru aa Esipiti kɛtẽ loni. Erooti yɛ lalɛ ukɛ́ kɛ kpu. Lɛ̃ nnya, ani ha kei-pɔ n tũ likɛ́ ha nɛ tu kumúŋɛ́ kpɛ-i kam yɛ́ nɔ́ n símisi rɛ ani pɛɛmɛ.
23252	MAT 2:14	Yosɛfi uu yisi uu kɛwã́ nɛ kɛuni kpísi uú nɛ kɛsinɛcɔ wuru uú ha Esipiti-pɔ pésu.
23253	MAT 2:15	Uu kei n we Erooti uú ha nɛ kpi. Lɛ̃ kɛ Upíima uú pɛɛ uantepu m máasɛ likɛ́ nɛ n wa nnya kai lɛ̃ wa. U pɛɛ rɛ: Nɛ unɛ́ŋmánɛ sée rɛ ukɛ́ Esipiti kɛteni-i le.
23254	MAT 2:16	Kɛ Erooti uu ń ka uu céru rɛ pinyuwɛ pɛɛ u kiraasɛlɛ, kuwɔ́i píima kunyinɛ aku u wai. Uu pɛɛ kumúŋɛ́ kpɛ̃ kɛ pinyuwɛ pɛ̃ api u n símisi nɛ pámɛ uu tíyɛsɛ api siwántisi nnɛ́í sɛɛ aŋmɛ̃ atɛ́ n tu nɛ sɛ̃ sisíńsá Pɛtɛlɛhɛm nɛ ayu nyɛɛ nɛ kei n kɔ́lɛ̃ kɛ́mɛɛ kóni.
23255	MAT 2:17	Lɛ̃ kɛ antepu Yeremii uú pɛɛ mɛkɛɛ-mɛ ḿ ma kai lɛ̃ wa. U pɛɛ rɛ:
23256	MAT 2:18	Rama-pɔ kari nní nnɛ̃́ kómɛiri. Sicááila nɛ ikpɔtu kɛ unyinɛ uu wɔ́rii Rasɛɛli yɛɛ lɛ̃ usiwã kɛcáá téni. Úu nkpáni la pikɛ́ u kpurɛi. Nɛ kɛsɛ, ái nkpáni u tisɛ.
23257	MAT 2:19	Upíima uleecaatumɛ unyinɛ uu Esipiti-pɔ Erooti mɛkpɔ-maá kɛlárɛ́-i Yosɛfi kpáfúmɛ,
23258	MAT 2:20	uu rɛ: A yisi, a kɛwã́ nɛ kɛuni kpísi aá nɛ Isirayɛɛli kɛtẽ pɛlɛ. Pɛpɛɛ pɛɛ ń la pikɛ́ kɛwã́ kɛ̃ kpu yɛ kpínlɛ.
23259	MAT 2:21	Kei kɛ Yosɛfi uu yisi uu kɛwã́ nɛ kɛuni kpísi uú nɛ Isirayɛɛli pɛlɛ.
23260	MAT 2:22	Amá kɛ Yosɛfi uu n kṍ tɛ Aricelayuusi yɛɛ usáa Erooti iyɔɔpi Yutee kɛtẽ kɛcáá tónɛ, iwamɛ ii u wai uu pɛɛ́ n yulu rɛ úu kei tonɛnɛ. Uléécaa uu kɔ kɛlárɛ́-i u símisi uu yisi uu Kalilee kɛtẽ-mɛ̃ tɔ́mpɔ,
23261	MAT 2:23	uú ha kuyu kpɛ̃ kapi yɛ n sée rɛ Nasarɛti-i tonɛ. Lɛ̃ kɛ antepuyɛ apí pɛɛ ḿ ma kai lɛ̃ tikilɛ̃. Pi pɛɛ rɛ: Pi yɛ́ kam api kɛwã́ kɛ̃ séi rɛ Nasarɛti ukɔ́.
23262	MAT 3:1	Aí weri kumúŋɛ́ kunyinɛ-i, Yohani Úniwolɛ uu léeri un Yutee kucɛsi kóima-i yóólɛ̃ tɛ:
23263	MAT 3:2	Ani mɛfinɛ consɛ, Uléécaa iyɔɔpi yɛ nyahaimɛlɛ!
23264	MAT 3:3	Yohani nsímɛ́ kɛ antepu Esayi uú pɛɛ maa rɛ: Usoi rinɔɔ yɛ ri tɛɛ kucɛsi kóima-i n yóólɛ̃ tɛ: Ani Upíima ncee nyɔ́ɔnsɛ, ani usiceepi tɛ̃iisɛ.
23265	MAT 3:4	Kuyooyoo nkpíí kɛtukanka kɛ Yohani uú pɛɛ tanaalɛ̃ un kɛkónɛpampi kɛhalɛ-i télɛ̃. Apááni nɛ mɛtɛ̃́ kuú pɛɛ le.
23266	MAT 3:5	Yerusalɛm pikɔ́ nɛ Yutee kɛtẽ nnɛ́í pikɔ́ nɛ Yuritɛɛ nkoi kɛtẽ pikɔ́ nnɛ́í yɛ pɛɛ ukɛmɛɛ sɔ́naapɔlɛ,
23267	MAT 3:6	api yɛ piakópɛ yámnɛ api tíyɛsɛ uu Yuritɛɛ nkoi kɛ́mɛɛ míni pi wolɛ.
23268	MAT 3:7	Yohani uu yɛ́nu rɛ Pifarisi nɛ Pisatusee pɛɛ ukɛmɛɛ n sɔ́naapɔ rɛ ukɛ́ míni pi wolɛ ápi kusa kulúi we. Uu pɛɛ pi maa rɛ: Nɔ́ akpurii nnyɛ́! Wóo nɔ́ céesi rɛ ani Uléécaa kuwɔi kpɛɛ n nyahaimɛ kaasɛ?
23269	MAT 3:8	Ani nɔ́mɛnɛ́wai nɛ nyísɛ rɛ nɔ mɛsei mɛfinɛ consɛlɛ.
23270	MAT 3:9	Áni kapɛ n nyu rɛ kani nní ḿ máikɛɛ rɛ Apiraham yɛɛ nɔ́unɛ́sáayaha nnya, lɛɛ nɛ nɔ́ piyɛ. Amá nɛ kalɛ kɛ́ nɔ́ símisi rɛ Uléécaa yɛ́ fe uu aparɛ nnyɛ́ pansɛsɛ Apiraham siyasɛ.
23271	MAT 3:10	Isɔ yɛ pinaŋaa máálɛnlɛ pikɛ́ nɛ aléé iníŋí sémni. Lɛ̃ nnya, kuléé kúye kunsá apipi sɔnɛ m maru, pi yɛ́ ku riké api nna-i sápɔ.
23272	MAT 3:11	Míni ŋmanɛ kɛ nɛ́ɛ nɔ́ wolɛ likɛ́ nyísɛ rɛ nɔ mɛfinɛ consɛlɛ. Amá uyɛɛ nɛ̃́ mɛmáá n sɔ́nti yɛ nɛ́ felɛ. Ám tu ricuruu kɛ́ uanɛ́ɛ́ri u mahã. Uyɛɛ sɔ́nti ukɛ́ Nfáasɔnɛ nɛ nna nɔ́ wolɛ.
23273	MAT 3:12	U nkpáni yarɛ usoi nkó yɛɛ kulũ kapí nɛ n cácai m múílɛ̃. U yɛ́ kukpépi pééi uu mɛlukɛpipi risímɛ-i súúni, uu kɔ acɔ́lɛ́ ilúkɛ́ té ukɛ́ wa ukɛ́ nna tɛnɛcirɛ́ kɛ́mɛɛ a risɛ́.
23274	MAT 3:13	Kumúŋɛ́ kpɛ-i kɛ Yohani uu kei ń we un pisoi míni wolɛ kɛ Yeesu uu Kalilee-pɔ yisi uu Yuritɛɛ nkoi mmɛ-i u lɛɛpɔ rɛ ukɛ́ kɔ uyɛ̃ míni wolɛ.
23275	MAT 3:14	Amá Yohani uu yúlu uu rɛ: Nɛ̃́ kaí nɛ sá rɛ kɛ́ kɛpɔ́mɛɛ́ hapɔ pɔkɛ́ nɛ́ wolɛ, ái pɔ́ɔ yɛ́ mɛníŋɛ kɛnɛ́mɛɛ́ kam.
23276	MAT 3:15	Yeesu uu pɛɛ u pɛsɛ rɛ: A riyá likɛ́ pɛɛ lɛ̃ n we kɛlenɛ. Lɛ̃ kari yɛ́ fe arí nɛ lɛ̃ nnɛ́í kɛ Uléécaa uu ń la ńsɔnɛ wai. Kuu lɛ̃ ḿ ma, Yohani uu pɛɛ kóm uu míni u wolɛ.
23277	MAT 3:16	Kɛ Yohani uu lɛ̃ Yeesu piwólɛ ḿ masí, Yeesu uu míni-i léepɔ. Kɛyómɛ akɛ kei nní wúkulɛ uu Uléécaa Nfaasɔnɛ yɛnu nn kɛyómɛcaa-pɔ súiri yarɛ rilɔ́ɔlã, nn ukɛcáá tonɛ.
23278	MAT 3:17	Tinɔ́ɔ rinyinɛ ari pɛɛ kɛyómɛcaa-pɔ leeri rɛ: Nkó yɛɛ Kɛnɛ́pipi lala kɛcirɛ, ám yɛ ukɛcáá kṍ.
23279	MAT 4:1	Lɛ̃ mɛmáá, Uléécaa Nfaasɔnɛ nn pɛɛ Yeesu kpísi nń nɛ kucɛsi kóima loni rɛ Setani ukɛ́ ha u peikɛɛ.
23280	MAT 4:2	Kɛ Yeesu uu sitúŋɛ́ afɛɛna nɛ sisinɛ afɛɛna anɔ́ɔ m paasi, nkṹ nn u wai.
23281	MAT 4:3	Setani yɛɛ m peikɛɛ uú nɛ u kɔ uu u maa rɛ: Pɔn mɛsei Uléécaa Kɛpipi, a aparɛ nnyɛ́ rinɔ́ɔ maa akɛ́ pansɛ akpɔ́nɔ́, aa le.
23282	MAT 4:4	Yeesu uu u pɛsɛ rɛ: Li Nléécaasimɛ́ kɛ́mɛɛ wɔ́laalɛ̃ tɛ: Ái ilukɛ ŋmanɛ yɛɛ yɛ usoi nfáa hɛ, amá ḿpá nsímɛ́ ń-ye mɛɛ Uléécaa nnɔɔ-i n léemɛ yɛɛ kɔ usoi nfáa hɛlɛ.
23283	MAT 4:5	Setani uu kɔ Yeesu kpísi uú nɛ Uléécaa kuyu Yerusalɛm sĩ, uú ha kei Uléécaa kɛyɔ kɛhórɛ́-pɔ u tɔsi
23284	MAT 4:6	uu rɛ: Pɔn mɛsei Uléécaa Kɛpipi, a mɛpɔ́círɛ kɛteni-i risápɔ. Li we rɛ li Nléécaasimɛ́ kɛ́mɛɛ wɔ́laalɛ̃ tɛ: Uléécaa yɛ́ pɔ̃́ nnya upileecaatumɛ rinɔ́ɔ hɛ api pɔ́ yéu kupɔ́na áku kapɛ nɛ riparɛ rinyinɛ rinkpɔ́u nnya.
23285	MAT 4:7	Yeesu uu kɔ u pɛsɛ rɛ: Li kɔ kɛmɛ́ɛ wɔ́laalɛ̃ tɛ: Kapɛ Upíima Upɔ́léécaa peikɛɛ pɔkɛ́ ukɛtɔ yɛ̃.
23286	MAT 4:8	Setani uu kɔ pikpíkɛ́ u kpá uú ha riyɔ́pɛ maamaa píima rinyinɛ kɛhórɛ́-pɔ tɔsi uu kɛtẽ nkɛ́ kɛcáá ayɔɔpiyu nɛ ammulɛ nnɛ́í u nyísɛntɛ
23287	MAT 4:9	uu pɛɛ kɔ u maa rɛ: Pɔn n ŋmurɛi aa wúla aa nɛ́ yáási, am nní nnɛ́í pɔ́ hɛ.
23288	MAT 4:10	Yeesu uu u maa rɛ: A kɛnɛ́kúrí yisi, Setani. Li Nléécaasimɛ́ ritɛlɛ́-i wɔ́laalɛ̃ tɛ: Upíima Upɔ́léécaa mɛcirɛ kóló kaí pisɛ rɛ usoi ukɛ́ riwula ukɛ́ yáási.
23289	MAT 4:11	Kei kɛ Setani uu pɛɛ Yeesu riyá, piléécaatumɛ api ukɛkúrí hapɔ api pɛɛ ukɛcáá m paílɛ̃.
23290	MAT 4:12	Kɛ Yeesu uu n kṍ tɛ Yohani yɛ kukpaniilee-i we, uu yisi uu Kalilee kɛtẽ-mɛ̃ pɛlɛ.
23291	MAT 4:13	Kuu n hápɔ, úu Nasarɛti-i tónɛ, amá Kapɛrinawum-mɛ̃ kuu tɔ́mpɔ. Kei yɛ kupiyɛ ritimɛ welɛ, Sapilɔɔ nɛ Nɛfitalii kɛtẽ-pɔ.
23292	MAT 4:14	Lɛ̃ kɛ antepu Esayi uú pɛɛ ḿ ma likɛ́ nɛ n wa nnya kai lɛ̃ wa. U pɛɛ rɛ:
23293	MAT 4:15	Nɔ̃́ Sapilɔɔ nɛ Nɛfitalii sitẽ pikɔ́, nɔ́ɔ mínimaa ritimɛ ń we nɛ nɔ́ɔ Yuritɛɛ nkoi mɛtɛ́ŋ́ ń we, nɔ̃́ mpuri sanɛ pikɔ́, nɔ́ɔ Kalilee kɛteni-i ń we,
23294	MAT 4:16	nɔ́ɔ pɛɛ kuŋmaha-i ń we, ani kõ tɛ nɔ nkpéni mɛtɛ́í píima yɛnlɛ. Nkpɔ kuhorɛ-i kaní pɛɛ́ we, mɛtɛ́í yɛ nkpéni nɔ́ lɛɛpɔlɛ.
23295	MAT 4:17	Kaí nɛ kei n kpísi kɛ Yeesu uu pɛɛ piyóó lõ tɛ: Ani mɛfinɛ consɛ, Uléécaa iyɔɔpi yɛ nyahaimɛlɛ.
23296	MAT 4:18	Yeesu yɛ pɛɛ Kalilee kupiyɛ ritimɛ sɔ́nɛlɛ uu Simɔɔ kapi rinyíri n hɛ rɛ Piyɛɛ nɛ uuwã Antiree yɛnu. Pikɛtɛ́ yɛ pikpíntomɛ́cɔ́pii lɛ. Anyɛŋ́ kapí pɛɛ fóm pin nɛ ikpíntomɛ́ cɔ́pii.
23297	MAT 4:19	Uu pɛɛ pi maa rɛ: Ani nɛ́ ritiki kɛ́ tíyɛsɛ ani yɛ pisoi pɛɛ yɛ́ nɛ́ rintíki wɛ́ɛ́si.
23298	MAT 4:20	Api mɛsɛ nɛ mɛsɛ anyɛŋ́ sá api u tiki.
23299	MAT 4:21	Kuu kei n yisi, uu kɛ́yu-mɛ̃ sĩ uu kɔ Sepetee piŋmánɛ pitɛ́ Yakupu nɛ uuwã Yohani yɛnu pi nɛ piusaa Sepetee pin pikuninɔi-i we pin pianyɛŋ́ nyɔ́ɔnsɛntɛ. Uu pi séi
23300	MAT 4:22	api mɛsɛ nɛ mɛsɛ kúninɔi nɛ piusaa yá api u tiki.
23301	MAT 4:23	Yeesu yɛ pɛɛ Kalilee kɛtẽ nnɛ́í kɔ́ɔ́núlɛnlɛ un Pisuifi ayomɛyáhaalee kɛ́mɛɛ céési un kɔ Uléécaa iyɔɔpi Nsímɛ́ Kɛcirɛ yóólɛ̃ un kɔ itói ncɔpuri nɛ ncɔ́ŋ ncɔpuri mɛɛ pisoi m pɛkɛsi pɔisɛntɛ.
23302	MAT 4:24	Kei kɛ urinyiri ari pɛɛ Sirii kɛtẽ nnɛ́í kɛcáá rikɔ́ɔ́nú. Api pɛɛ́ nɛ pitóikɔ́ nnɛ́í ncɔpuri nɛ pɛ̃ nnɛ́í pɛɛ piipiŋɛ-i ncɔ́ŋ nnyinɛ n kómɛi u n sɔ́naapɔ un pi pɔisɛntɛ. Lɛlɛɛ nní yarɛ pinírihélaa nɛ rikpínkpĩ́ pikɔ́ nɛ síkankáláká.
23303	MAT 4:25	Asoiwuí píima nyɛɛ Kalilee-pɔ nɛ Ayu Kɛfi kɛtẽ-pɔ nɛ Yerusalɛm-pɔ nɛ Yutee-pɔ nɛ Yuritɛɛ nkoi mɛtɛ́ŋ́-pɔ n léemɛ aa pɛɛ u n tikilɛ̃.
23304	MAT 5:1	Kɛ Yeesu uu lɛ̃ tisoiwuí n yɛ̃́, uu yisi uu riyɔ́pɛ yopoi uú ha tonɛ. Upipirɛtiki api pɛɛ kei u lɛɛpɔ,
23305	MAT 5:2	uu pɛɛ picélaa pi loni. Icélaa iyɛɛ nnyí:
23306	MAT 5:3	Pɛpɛɛ n nyu rɛ ápi Uléécaa inipɛɛ-i líka tulaalɛ̃ pɛɛ pínarɛkomɛ. Pɛpɛɛ Uléécaa iyɔɔpi te.
23307	MAT 5:4	Pɛpɛɛ n téni pɛɛ pínarɛkomɛ. Uléécaa yɛ sɔ́ntilɛ ukɛ́ pi kpurɛi.
23308	MAT 5:5	Pɛpɛɛ ḿ purú pɛɛ pínarɛkomɛ. Uléécaa yɛ́ kɛtẽ kuú nɛ upisoi m mɛ̃́ pi pa.
23309	MAT 5:6	Pɛpɛɛ n náási pikɛ́ mɛwai wa mɛkɛ́ asei n tikilɛ̃ pɛɛ pínarɛkomɛ. Uléécaa yɛ́ kam uu pimɛla pi wai.
23310	MAT 5:7	Pɛpɛɛ yɛ picɔ íwɛ n tẽ́ pɛɛ pínarɛkomɛ. Uléécaa yɛ́ kam uu kɔ pɛ̃ íwɛ téni.
23311	MAT 5:8	Pɛpɛɛ kɛfa n kpã́iilɛ̃ pɛɛ pínarɛkomɛ. Pi yɛ́ kam api Uléécaa yɛ́nu.
23312	MAT 5:9	Pɛpɛɛ n wɛ́ɛ́si rɛ pin yei n we, likɛ́ kei n niŋú pɛɛ pínarɛkomɛ. Uléécaa yɛ́ kam uu pi séi rɛ usipipi.
23313	MAT 5:10	Pɛpɛɛ asei n tíkilɛ̃, pisoi pin lɛ̃ nnya pi wéékusɛlɛ̃ pɛɛ pínarɛkomɛ. Pɛpɛɛ Uléécaa iyɔɔpi pikɔ́.