23214	MAT 1:1	Yeesu Kirisi yɛ Tafiti kɛyasɛ lɛ, Tafiti pɔ́ɔn kɔ Apiraham kɛyasɛ. Upikpurɛ anyiri yɛ nnyɛ́:
23215	MAT 1:2	Apiraham yɛɛ Isaaki mari, Isaaki pɔ́ɔ Yakupu maru, Yakupu pɔ́ɔ Yuta nɛ upimarɛcɔ márɛi,
23216	MAT 1:3	Yuta pɔ́ɔ Perɛsi nɛ Sera maru. Piuni yɛɛ Tamaa. Perɛsi pɔ́ɔ Hɛsirɔɔ maru, Hɛsirɔɔ pɔ́ɔ Aram maru,
23217	MAT 1:4	Aram pɔ́ɔ Aminatapi maru, Aminatapi pɔ́ɔ Nasɔɔ maru, Nasɔɔ pɔ́ɔ Salimani maru,
23218	MAT 1:5	Salimani pɔ́ɔ Poosi maru. Pi yɛ Poosi uni sée rɛ Rahapi. Poosi pɔ́ɔ Opɛti maru. Uyɛ̃ uni yɛɛ Ruuti. Opɛti pɔ́ɔ Yesee maru,
23219	MAT 1:6	Yesee pɔ́ɔ uyɔ́ɔpi Tafiti maru, Tafiti pɔ́ɔ Salomɔɔ maru. Salomɔɔ uni yɛ mɛkɛɛ-mɛ Urii sɔ́ɔnlɛnlɛ.
23220	MAT 1:7	Salomɔɔ pɔ́ɔ Ropowam maru, Ropowam pɔ́ɔ Apiya maru, Apiya pɔ́ɔ Asaa maru,
23221	MAT 1:8	Asaa pɔ́ɔ Yosafati maru. Yosafati pɔ́ɔ Yoram maru. Yoram pɔ́ɔ Osiyasi maru,
23222	MAT 1:9	Osiyasi pɔ́ɔ Yotam maru, Yotam pɔ́ɔ Akaasi maru, Akaasi pɔ́ɔ Esekiyasi maru,
23223	MAT 1:10	Esekiyasi pɔ́ɔ Manasee máru, Manasee pɔ́ɔ Amɔɔ maru, Amɔɔ pɔ́ɔ Yosiyasi maru,
23225	MAT 1:12	Kapi Isirayɛɛli pikɔ́ n cɔ́pii apí nɛ Papilɔɔni kuyu sĩ mɛmáá kɛ Yekoniya pɔ́ɔ pɛɛ Sealitiyɛli mari, Sealitiyɛli pɔ́ɔ Soropapɛɛli maru,
23226	MAT 1:13	Soropapɛɛli pɔ́ɔ Apihuuti maru, Apihuuti pɔ́ɔ Eliyakim maru, Eliyakim pɔ́ɔ Asɔɔ maru,
23227	MAT 1:14	Asɔɔ pɔ́ɔ Satɔki maru, Satɔki pɔ́ɔ Akim maru, Akim pɔ́ɔ Eliwuuti maru,
23228	MAT 1:15	Eliwuuti pɔ́ɔ Eleyasaa maru, Eleyasaa pɔ́ɔ Matani maru, Matani pɔ́ɔ Yakupu maru,
23230	MAT 1:17	Lɛ̃ nnya, kaí nɛ Apiraham-i n kpísi aí nɛ Tafiti-i pá, li walɛ ncɔpuri anai kɛfi nɛ ana. Kai Tafiti-i n kpísi aí nɛ kumúŋɛ́ kpɛ-i kapi Isirayɛɛli pikɔ́ n cɔ́pii apí nɛ Papilɔɔni kuyu sĩ pá, li walɛ ncɔpuri anai kɛfi nɛ ana. Kai kɔ kei n kpísi aí nɛ Kirisi imarɛtuŋɛ pá, li walɛ ncɔpuri anai kɛfi nɛ ana acɔ.
23231	MAT 1:18	Lɛ̃ kapi Yeesu Kirisi m mári yɛ nní: Uuni Maari kapí pɛɛ Yosɛfi feleilɛ̃, amá Nfáasɔnɛ nn tíyɛsɛ uu fapisi u nɛ Yosɛfi ápi kɔ kahanɛ kulee rimpɛ́nɛ.
23232	MAT 1:19	Uula Yosɛfi yɛ asei ute lɛ, úu pɛɛ́ la ukɛ́ unɔ́si isɛi lukɛisɛ kuyu kukɛ́ kṍ, uu pɛɛ́ n la ukɛ́ risɛ́ɛ́ nɛ u lakasɛ.
23233	MAT 1:20	Kuu ń we un likɛcáá músu, Upíima uleecaatumɛ unyinɛ uu kɛlárɛ́-i u kpáfúmɛ uu u maa rɛ: Tafiti kɛpirɛ̃ Yosɛfi, Maari pikpíkɛ́ ápi kapɛ pɔ́ n cɔ́ŋlɛ̃. Nfáasɔnɛ mɛɛ tíyɛsɛ kuu fapisi.
23235	MAT 1:22	Lɛ̃ nnɛ́í ai wai, Upíima rinɔɔ kuu mɛkɛɛ antepu Esayi m máasɛ rikɛ́ nɛ n li nnya. Lɛlɛɛ rɛ:
23236	MAT 1:23	Ukpére yɛɛ úu utisi n nyu yɛ́ kɛfa wa, uu kɛwántisi maru api kɛ séi rɛ Emanuyɛɛli, liasei rɛ Uléécaa yɛ kɛrɔ́mɛɛ́ we.
23237	MAT 1:24	Kɛ Yosɛfi uu n yisi, uu lɛ̃ kɛ Upíima uleecaatumɛ uu u n símisi wai, uu Maari kunɔ́si kpísi.
23238	MAT 1:25	Amá u nɛ uyɛ̃ ápi kulee ripɛ́nɛ uú ha nɛ kɛwántisi maru. Kuu kɛ m mári, Yosɛfi uu kɛ séi rɛ Yeesu.
23241	MAT 2:3	Kɛ uyɔ́ɔpi píima Erooti uu lɛ̃ n kṍ, ai u nɛ Yerusalɛm pikɔ́ nnɛ́í mpɔ́ɔcaai tani.
23244	MAT 2:6	Pɔ̃́ Pɛtɛlɛhɛm kuyu! Ái pɔ́ɔ Yutee kɛtẽ kɛcáá ayu kɛcɔpɛ ríyu paalɛ̃. Li we rɛ kɛpɔ́mɛɛ́ kɛ uyɔ́ɔpi píima uu léerinɛ, uyɛɛ yɛ́ pinɛ́soi Isirayɛɛli pikɔ́ n séni.
23246	MAT 2:8	Uu pɛɛ limɛmáá Pɛtɛlɛhɛm-pɔ pi tum uu pi maa rɛ: ani n ŋme ani ha kɛwã́ kɛ̃ kɛcáá ńsɔnɛ písɛi ani kóm. Nɔn kɛ n yɛ̃, ani pɛɛri ani nɛ́ símisi nɛ́ɛkɛ́ ha kɔ kɛ yáási kɛ́ riwula.
23247	MAT 2:9	Kɛ Erooti uu lɛ̃ pisímɛ́ pi ḿ masí, api yisi api ncée pɔlɔ. Kei kapi pɛɛ ripaí, api yɛ́nu riwárɛpi tɛ̃ kapí pɛɛ kɛtuŋɛleemɛ-pɔ n yɛ̃́ tin pikɛyu sɔ́nɛ pin ti tikilɛ̃. Ari kɛlõ kɛ-i kɛ kɛwã́ kɛ̃ akɛ ń we tulu, ari nyɛrɛ.
23248	MAT 2:10	Kapi kei ri n yɛ̃́, ai mɛyíkíyiki pi larisi.
23249	MAT 2:11	Api kɛ́yɔ loni api kɛwã́ nɛ kɛuni Maari yɛnu, api kɛ yáási apí nɛ wula. Api pɛɛ pimɛmá fénnɛ api wura nɛ tulaali ŋmaa-ŋmaa nɛ mɛ́kpɔ kapi yɛ n sée rɛ miiri lesɛ api kɛ hɛkɛsi.
23251	MAT 2:13	Kɛ pinyuwɛ pɛ̃ api n tɔ́mpɔ, Upíima uleecaatumɛ unyinɛ uu kɛlárɛ́-i Yosɛfi kpáfúmɛ uu rɛ: A yisi, a kɛwã́ nɛ kɛuni kpísi aa wuru aa Esipiti kɛtẽ loni. Erooti yɛ lalɛ ukɛ́ kɛ kpu. Lɛ̃ nnya, ani ha kei-pɔ n tũ likɛ́ ha nɛ tu kumúŋɛ́ kpɛ-i kam yɛ́ nɔ́ n símisi rɛ ani pɛɛmɛ.
23254	MAT 2:16	Kɛ Erooti uu ń ka uu céru rɛ pinyuwɛ pɛɛ u kiraasɛlɛ, kuwɔ́i píima kunyinɛ aku u wai. Uu pɛɛ kumúŋɛ́ kpɛ̃ kɛ pinyuwɛ pɛ̃ api u n símisi nɛ pámɛ uu tíyɛsɛ api siwántisi nnɛ́í sɛɛ aŋmɛ̃ atɛ́ n tu nɛ sɛ̃ sisíńsá Pɛtɛlɛhɛm nɛ ayu nyɛɛ nɛ kei n kɔ́lɛ̃ kɛ́mɛɛ kóni.
23256	MAT 2:18	Rama-pɔ kari nní nnɛ̃́ kómɛiri. Sicááila nɛ ikpɔtu kɛ unyinɛ uu wɔ́rii Rasɛɛli yɛɛ lɛ̃ usiwã kɛcáá téni. Úu nkpáni la pikɛ́ u kpurɛi. Nɛ kɛsɛ, ái nkpáni u tisɛ.
23257	MAT 2:19	Upíima uleecaatumɛ unyinɛ uu Esipiti-pɔ Erooti mɛkpɔ-maá kɛlárɛ́-i Yosɛfi kpáfúmɛ,
23258	MAT 2:20	uu rɛ: A yisi, a kɛwã́ nɛ kɛuni kpísi aá nɛ Isirayɛɛli kɛtẽ pɛlɛ. Pɛpɛɛ pɛɛ ń la pikɛ́ kɛwã́ kɛ̃ kpu yɛ kpínlɛ.
23260	MAT 2:22	Amá kɛ Yosɛfi uu n kṍ tɛ Aricelayuusi yɛɛ usáa Erooti iyɔɔpi Yutee kɛtẽ kɛcáá tónɛ, iwamɛ ii u wai uu pɛɛ́ n yulu rɛ úu kei tonɛnɛ. Uléécaa uu kɔ kɛlárɛ́-i u símisi uu yisi uu Kalilee kɛtẽ-mɛ̃ tɔ́mpɔ,
23263	MAT 3:2	Ani mɛfinɛ consɛ, Uléécaa iyɔɔpi yɛ nyahaimɛlɛ!
23264	MAT 3:3	Yohani nsímɛ́ kɛ antepu Esayi uú pɛɛ maa rɛ: Usoi rinɔɔ yɛ ri tɛɛ kucɛsi kóima-i n yóólɛ̃ tɛ: Ani Upíima ncee nyɔ́ɔnsɛ, ani usiceepi tɛ̃iisɛ.
23266	MAT 3:5	Yerusalɛm pikɔ́ nɛ Yutee kɛtẽ nnɛ́í pikɔ́ nɛ Yuritɛɛ nkoi kɛtẽ pikɔ́ nnɛ́í yɛ pɛɛ ukɛmɛɛ sɔ́naapɔlɛ,
23270	MAT 3:9	Áni kapɛ n nyu rɛ kani nní ḿ máikɛɛ rɛ Apiraham yɛɛ nɔ́unɛ́sáayaha nnya, lɛɛ nɛ nɔ́ piyɛ. Amá nɛ kalɛ kɛ́ nɔ́ símisi rɛ Uléécaa yɛ́ fe uu aparɛ nnyɛ́ pansɛsɛ Apiraham siyasɛ.
23271	MAT 3:10	Isɔ yɛ pinaŋaa máálɛnlɛ pikɛ́ nɛ aléé iníŋí sémni. Lɛ̃ nnya, kuléé kúye kunsá apipi sɔnɛ m maru, pi yɛ́ ku riké api nna-i sápɔ.
23273	MAT 3:12	U nkpáni yarɛ usoi nkó yɛɛ kulũ kapí nɛ n cácai m múílɛ̃. U yɛ́ kukpépi pééi uu mɛlukɛpipi risímɛ-i súúni, uu kɔ acɔ́lɛ́ ilúkɛ́ té ukɛ́ wa ukɛ́ nna tɛnɛcirɛ́ kɛ́mɛɛ a risɛ́.
23275	MAT 3:14	Amá Yohani uu yúlu uu rɛ: Nɛ̃́ kaí nɛ sá rɛ kɛ́ kɛpɔ́mɛɛ́ hapɔ pɔkɛ́ nɛ́ wolɛ, ái pɔ́ɔ yɛ́ mɛníŋɛ kɛnɛ́mɛɛ́ kam.
23276	MAT 3:15	Yeesu uu pɛɛ u pɛsɛ rɛ: A riyá likɛ́ pɛɛ lɛ̃ n we kɛlenɛ. Lɛ̃ kari yɛ́ fe arí nɛ lɛ̃ nnɛ́í kɛ Uléécaa uu ń la ńsɔnɛ wai. Kuu lɛ̃ ḿ ma, Yohani uu pɛɛ kóm uu míni u wolɛ.
23277	MAT 3:16	Kɛ Yohani uu lɛ̃ Yeesu piwólɛ ḿ masí, Yeesu uu míni-i léepɔ. Kɛyómɛ akɛ kei nní wúkulɛ uu Uléécaa Nfaasɔnɛ yɛnu nn kɛyómɛcaa-pɔ súiri yarɛ rilɔ́ɔlã, nn ukɛcáá tonɛ.
23278	MAT 3:17	Tinɔ́ɔ rinyinɛ ari pɛɛ kɛyómɛcaa-pɔ leeri rɛ: Nkó yɛɛ Kɛnɛ́pipi lala kɛcirɛ, ám yɛ ukɛcáá kṍ.
23279	MAT 4:1	Lɛ̃ mɛmáá, Uléécaa Nfaasɔnɛ nn pɛɛ Yeesu kpísi nń nɛ kucɛsi kóima loni rɛ Setani ukɛ́ ha u peikɛɛ.
23280	MAT 4:2	Kɛ Yeesu uu sitúŋɛ́ afɛɛna nɛ sisinɛ afɛɛna anɔ́ɔ m paasi, nkṹ nn u wai.
23281	MAT 4:3	Setani yɛɛ m peikɛɛ uú nɛ u kɔ uu u maa rɛ: Pɔn mɛsei Uléécaa Kɛpipi, a aparɛ nnyɛ́ rinɔ́ɔ maa akɛ́ pansɛ akpɔ́nɔ́, aa le.
23282	MAT 4:4	Yeesu uu u pɛsɛ rɛ: Li Nléécaasimɛ́ kɛ́mɛɛ wɔ́laalɛ̃ tɛ: Ái ilukɛ ŋmanɛ yɛɛ yɛ usoi nfáa hɛ, amá ḿpá nsímɛ́ ń-ye mɛɛ Uléécaa nnɔɔ-i n léemɛ yɛɛ kɔ usoi nfáa hɛlɛ.
23283	MAT 4:5	Setani uu kɔ Yeesu kpísi uú nɛ Uléécaa kuyu Yerusalɛm sĩ, uú ha kei Uléécaa kɛyɔ kɛhórɛ́-pɔ u tɔsi
23284	MAT 4:6	uu rɛ: Pɔn mɛsei Uléécaa Kɛpipi, a mɛpɔ́círɛ kɛteni-i risápɔ. Li we rɛ li Nléécaasimɛ́ kɛ́mɛɛ wɔ́laalɛ̃ tɛ: Uléécaa yɛ́ pɔ̃́ nnya upileecaatumɛ rinɔ́ɔ hɛ api pɔ́ yéu kupɔ́na áku kapɛ nɛ riparɛ rinyinɛ rinkpɔ́u nnya.
23287	MAT 4:9	uu pɛɛ kɔ u maa rɛ: Pɔn n ŋmurɛi aa wúla aa nɛ́ yáási, am nní nnɛ́í pɔ́ hɛ.
23288	MAT 4:10	Yeesu uu u maa rɛ: A kɛnɛ́kúrí yisi, Setani. Li Nléécaasimɛ́ ritɛlɛ́-i wɔ́laalɛ̃ tɛ: Upíima Upɔ́léécaa mɛcirɛ kóló kaí pisɛ rɛ usoi ukɛ́ riwula ukɛ́ yáási.
23289	MAT 4:11	Kei kɛ Setani uu pɛɛ Yeesu riyá, piléécaatumɛ api ukɛkúrí hapɔ api pɛɛ ukɛcáá m paílɛ̃.
23290	MAT 4:12	Kɛ Yeesu uu n kṍ tɛ Yohani yɛ kukpaniilee-i we, uu yisi uu Kalilee kɛtẽ-mɛ̃ pɛlɛ.
23291	MAT 4:13	Kuu n hápɔ, úu Nasarɛti-i tónɛ, amá Kapɛrinawum-mɛ̃ kuu tɔ́mpɔ. Kei yɛ kupiyɛ ritimɛ welɛ, Sapilɔɔ nɛ Nɛfitalii kɛtẽ-pɔ.
23293	MAT 4:15	Nɔ̃́ Sapilɔɔ nɛ Nɛfitalii sitẽ pikɔ́, nɔ́ɔ mínimaa ritimɛ ń we nɛ nɔ́ɔ Yuritɛɛ nkoi mɛtɛ́ŋ́ ń we, nɔ̃́ mpuri sanɛ pikɔ́, nɔ́ɔ Kalilee kɛteni-i ń we,
23294	MAT 4:16	nɔ́ɔ pɛɛ kuŋmaha-i ń we, ani kõ tɛ nɔ nkpéni mɛtɛ́í píima yɛnlɛ. Nkpɔ kuhorɛ-i kaní pɛɛ́ we, mɛtɛ́í yɛ nkpéni nɔ́ lɛɛpɔlɛ.
23295	MAT 4:17	Kaí nɛ kei n kpísi kɛ Yeesu uu pɛɛ piyóó lõ tɛ: Ani mɛfinɛ consɛ, Uléécaa iyɔɔpi yɛ nyahaimɛlɛ.
23299	MAT 4:21	Kuu kei n yisi, uu kɛ́yu-mɛ̃ sĩ uu kɔ Sepetee piŋmánɛ pitɛ́ Yakupu nɛ uuwã Yohani yɛnu pi nɛ piusaa Sepetee pin pikuninɔi-i we pin pianyɛŋ́ nyɔ́ɔnsɛntɛ. Uu pi séi
23304	MAT 5:1	Kɛ Yeesu uu lɛ̃ tisoiwuí n yɛ̃́, uu yisi uu riyɔ́pɛ yopoi uú ha tonɛ. Upipirɛtiki api pɛɛ kei u lɛɛpɔ,
23312	MAT 5:9	Pɛpɛɛ n wɛ́ɛ́si rɛ pin yei n we, likɛ́ kei n niŋú pɛɛ pínarɛkomɛ. Uléécaa yɛ́ kam uu pi séi rɛ usipipi.
23313	MAT 5:10	Pɛpɛɛ asei n tíkilɛ̃, pisoi pin lɛ̃ nnya pi wéékusɛlɛ̃ pɛɛ pínarɛkomɛ. Pɛpɛɛ Uléécaa iyɔɔpi pikɔ́.
23314	MAT 5:11	Nɔ́ mpí kapi n lámisi pin nɔ́ wéékusɛlɛ̃ pin nɛ̃́ nnya nɔ́kɛnɛ́cáá nnɔ́ɔmɛ símaankɛɛ, nɔ́ɔ pínarɛkomɛ.
23316	MAT 5:13	Nɔ́ɔ kɛtẽ kɛcáá nnyási. Nnyási mɛlõ mɛn nkpéni n kpu, yo kapi yɛ́ pɛɛ́ nɛ mɛlõ n pɛsɛ? Li tisɛ pikɛ́ kɛtahai-mɛ̃ n fómpɔ pisoi pikɛ́ tɛ́lɛisɛ.
23320	MAT 5:17	Yeesu uu kɔ pimáa pi kpá rɛ: Áni kapɛ m músu rɛ Moisi isé nɛ antepuyɛ icélaa kam pikópɛ ka. Ám ka rɛ kɛ́ i kpu, amá nɛ kalɛ rɛ likɛ́ lɛ̃ li.
23321	MAT 5:18	Asei kam nní nɔ́ símisi, kɛtẽ nɛ kɛyómɛ yɛ kpére we, kɛwɔ́ipi cíú-cíú kɛ́ka nɛ́ɛ kɛsímɛ́pi kɛ́ka ákɛ isé kɛ́mɛɛ mɛ́lelɛ má, likɛ́ ha nɛ ḿpá yo kɛtɔ tu.
23322	MAT 5:19	Lɛ̃ nnya, úye un isé rinɔɔ rinyinɛ n kɛsi uu kɔ picɔ céési rɛ pikɛ́ ri kɛsi, ḿpá rinɔ́ɔ tɛ̃ tinsá pitíki m páápú, uyɛɛ yɛ́ masí Uléécaa iyɔɔpi kɛ́mɛɛ usíńsá. Amá úye un ti m pakarɛ un kɔ picɔ n céési rɛ pikɛ́ limɛcɔ wa, uyɛɛ yɛ́ masí Uléécaa iyɔɔpi kɛ́mɛɛ úyukɔɔ́.
23323	MAT 5:20	Asei yɛ nyɛ rɛ nɔnsá Uléécaa mɛla n tikilɛ̃ likɛ́ isé picélaa nɛ Pifarisi n fe, áni yɛ́ Uléécaa iyɔɔpi kɛ́mɛɛ lõ.
23324	MAT 5:21	Yeesu uu kɔ pimáa pi kpá rɛ: Nɔ kõ tɛ Uléécaa yɛ pirɔ́kpurɛ maa rɛ: Kapɛ usoi kpu. Úye un usoi n kpu, pikɛ́ liute nɛ túhaanɛ.
23325	MAT 5:22	Amá nɛ̃́ nɛ nɔ́ maa rɛ: Úye un nɛ uucɔ n wɔ́ɔsi, pikɛ́ nɛ liute túhaanɛ. Úye un uucɔ m maa rɛ: Pɔ́ uníri nkó, pikɛ́ liute nɛ pɛpɛɛ yɛ kɛtúhaanɛ píima-i n túhaanɛ kɛ́mɛɛ ha. Úye un uucɔ m maa rɛ: Pɔ́ uníri nkó, li tu rɛ pikɛ́ liute nna tɛnɛcirɛ́ iwɛ kɛ́mɛɛ risápɔ.
23326	MAT 5:23	Lɛ̃ nnya, pɔn Uléécaa kɛyɔ-i kɛnyɔ́ɔnsɛ-i linyinɛ nɛ Uléécaa pihɛɛ n ha, pɔn n léisɛ rɛ upɔ́cɔ yɛ nɛ pɔ́ wɔ́laalɛ̃,
23327	MAT 5:24	li pisɛ rɛ pɔkɛ́ kei ipɔ́hɛɛ iyɛ̃ tiyá pɔkɛ́ liute lɛɛpɔ nɔkɛ́ nsímɛ́ nyɔ́ɔnsɛ kɛlenɛ, aa pɛɛ inyɔ́ɔnsɛ piwai pɛlɛ.
23328	MAT 5:25	Pitele pin nɔ́ nɛ unyinɛ kɛcɔpɛ n we, nɔn kɛtahai pitúhaanɛ n sĩ, a tíyɛsɛ nɔ́ nɛ uyɛ̃ ani ncée kómɛinɛ. Insá lɛ̃, u yɛ́ nɛ utúhaanɛ-i pɔ́ ha, uyɛ̃ uu pɔ́ kpísi uu pisɔ́ɔ́ca pa, pɛ̃ api kukpaniilee pɔ́ tani.
23329	MAT 5:26	Asei kam nní pɔ́ símisi, pɔnsá ripɔ́wómɛ nnɛ́í n hɛ́ɛlɛ tikɛ́ tɛnɛ cáká-cáká nɛ kɛtanká tɔrɔɔ-pɔ, áa kei mɛ́lelɛ má.
23331	MAT 5:28	Amá nɛ̃́ nɛ nɔ́ maa rɛ: Utisi úye un ucɔ unɔsi n yɛ̃ uu káipi, u ukɛmúŋɛ́ kɛ́mɛɛ iwásá nɛ unɔ́si uyɛ̃ piwai masilɛ lɛ̃.
23332	MAT 5:29	In tɛ mɛpɔ́nípɛɛ lukɛ-lukɛ mɛɛ akópɛ pɔ́ waisɛ, a mɛ lesɛ aa kɛtaa-pɔ fómpɔ. Li kutɔsi we usoi ukɛ́ uipiŋɛ likɔ́ linyinɛ paa uú nɛ nfáa yɛnu nɛ kuu yɛ́ uipiŋɛ nnɛ́í ḿ má apí nɛ nna tɛnɛcirɛ́ kɛ́mɛɛ u sápɔ.
23333	MAT 5:30	In tɛ kupɔ́nípɛ lukɛ-lukɛ kpɛɛ yɛ akópɛ pɔ́ waisɛ, a ku riké aa kɛtaa-pɔ ku fómpɔ. Li kutɔsi we pɔkɛ́ kupɔ́nípɛ lukɛ-lukɛ paa aá nɛ nfáa yɛnu nɛ kaa yɛ́ ipɔ́piŋɛ nnɛ́í ḿ má apí nɛ nna tɛnɛcirɛ́ kɛ́mɛɛ pɔ́ sápɔ.
23334	MAT 5:31	Yeesu uu kɔ pimáa pi kpá rɛ: Nɔ kõ tɛ pi pɛɛ pirɔ́kpurɛ maa rɛ: Úye un unɔ́si n lakasɛ, ukɛ́ rítɛlɛ́ wa ukɛ́ unɔ́si rimúísɛ rɛ u u yɛlɛ.
23335	MAT 5:32	Amá nɛ̃́ nɛ nɔ́ maa rɛ: Úye un unɔ́si n lakasɛ linsá iwásá nnya, iwásá kuu lɛ̃ u tani. Úye un kɔ unɔ́si kɛ ucɔ uu n lákasɛ n kpísi, iwásá kɛ liute uu lɛ̃ wa.
23336	MAT 5:33	Yeesu uu kɔ pimáa pi kpá rɛ: Nɔ kõ tɛ pi pɛɛ pirɔ́kpurɛ maa rɛ: Pɔn tinɔ́ɔ n yekei, a ti ritiki. Pɔn tinɔ́ɔ n yekei rɛ pɔ́ Upíima linyinɛ wa, kapɛ piwai li riyá.
23338	MAT 5:35	Áni kapɛ yɛ kɔ wéeri aní nɛ kɛtẽ séi, kai nní kei yɛ Uléécaa ritũ nnya. Áni kapɛ yɛ kɔ wéeri aní nɛ Yerusalɛm séi, kai nní kei yɛ uyɔ́ɔpi wɛ́ɛ́sɛ kuyu nnya.
23339	MAT 5:36	Áni kapɛ yɛ kɔ wéeri aní nɛ nɔ́rinɛ́yu séi, káni yɛ́ nní n fe nɔkɛ́ ḿpá nnyúpi cirɛníŋɛ riwárarasɛ nɛ́ɛ nɔkɛ́ risɔmaasɛ nnya.
23340	MAT 5:37	Nɔn yɛ m maa rɛ "ɛɛɛ", likɛ́ "ɛɛɛ"! Nɔn yɛ m maa rɛ "eehei", likɛ́ "eehei"! Nɔn lɛ̃ mɛmáá nnyinɛ ncɔ rinkpásɛ, Setani nkɔ́ yɛ mmɛ̃.
23341	MAT 5:38	Yeesu uu kɔ pimáa pi kpá rɛ: Nɔ kõ tɛ pi maa rɛ: Úye un ucɔ mɛnípɛɛ n fori, pikɛ́ liute mɛnípɛɛ piforɛ cɛɛi. Úye un ucɔ kunĩ́ n wɛhɛ, pikɛ́ liute kunĩ́ piwɛ́hɛ cɛɛi.
23342	MAT 5:39	Amá nɛ̃́ nɛ nɔ́ maa rɛ: Áni kapɛ yɛ usoi mɛwai kópɛ cɛɛi. Usoi un kulukɛ-lukɛ-mɛ̃ kɛpɛsɛ pɔ́ n tɔ, a kumíi-mɛ̃ pansɛ ukɛ́ kɔ kei kɛpɛsɛ pɔ́ tɔ.
23343	MAT 5:40	Usoi un n la ukɛ́ kɛtahai pɔ́ sée ukɛ́ kɛpɔ́túkanka tene yɔsí, aa mɛsɛ kupɔ́kpɛ́lɛnku mahani aa u múísɛ.
23344	MAT 5:41	Usoi un pɔ́ n tĩ un ilũ pɔ́ n cɔnsɛ rɛ a nɛ rinã tisɛ u sarumpɔ, aa mɛsɛ i cɔni aá nɛ tinã tɛ̃ mɛtɛ́ u sarumpɔ.
23345	MAT 5:42	Úye un linyinɛ pɔ́ n we, a u hɛ, úye un kɔ rɛ u yɛ́ linyinɛ pɔ́ lõ, a u lonsɛ.
23347	MAT 5:44	Amá nɛ̃́ nɛ nɔ́ maa rɛ: Ani nɔ́pinɛ́láarɔ n la, ani yɛ pɛpɛɛ nɔ́ n wéékusɛlɛ̃ kɛcáá kɛyómɛ yáási.
23348	MAT 5:45	Nɔn lɛ̃ n wai, nɔ pɛɛ mɛsei Nɔ́unɛ́sáa Uléécaa yɛɛ kɛyómɛcaa-pɔ ń we sipipi lɛ. U yɛ tíyɛsɛlɛ ituŋɛ ii pisoi sɔnɛ nɛ pikópɛ leeri, uu kɔ tíyɛsɛ ikónɛ ii cuuni ai pɛpɛɛ u m pakarɛlɛ̃ nɛ pɛpɛɛ ápi u m pakarɛlɛ̃ yoriyɛ.
23349	MAT 5:46	Asei kɛcáá, in tɛ pɛpɛɛ nɔ́ ń la ŋmanɛ kaní la, ihɛ́ɛ́ íye kani pɛɛ mɛ̃́ tɛ Uléécaa ukɛ́ nɔ́ pa? Pilampooyɔɔ́ ŋmaa ricuruu pɔ̃́ nɛ yɛ kɔ limɛcɔ walɛ.
23350	MAT 5:47	In tɛ nɔ́pinɛ́márɛcɔ ŋmanɛ kaní yɛ yáasi, yo kani pɛɛ wa lisáŋa? Pɛpɛɛ ápi Uléécaa m pakarɛlɛ̃ ticuruu yɛɛ kɔ limɛcɔ walɛ.
23352	MAT 6:1	Yeesu uu kɔ pimáa pi kpá rɛ: Ani nɔ́mɛnɛ́círɛ tĩ, áni kapɛ yɛ lɛ̃ kaí nɛ n sá rɛ nɔkɛ́ Uléécaa nnya wa pisoi inipɛɛ-i wa rɛ pikɛ́ nɔ́ yɛ̃́ pikɛ́ pakarɛ nnya. Insá lɛ̃, Nɔ́unɛ́sáa yɛɛ kɛyómɛcaa-pɔ ń we úu ihɛ́ɛ́ íka nɔ́ panɛ.
23353	MAT 6:2	Lɛ̃ nnya pɔn úwɛkɔɔ́ linyinɛ n hɛ, kapɛ kuloo pi pɔkɛ́ riyóó yarɛ kɛ kɛcáá kɛcáá mɛwai pikɔ́ api yɛ ayómɛyáhaalee-i nɛ icée kɛcáá n wai rɛ pisoi pikɛ́ pi pakarɛ mɛcɔ. Asei kɛcáá, pi piihɛ́ɛ́ piyɔ́ɔ́ masilɛ lɛ̃!
23354	MAT 6:3	Amá pɔ́ɔn yɛ linyinɛ úwɛkɔɔ́ n hɛ, kupɔ́nípɛ mii áku kapɛ lɛ̃ kɛ kulukɛ-lukɛ aku n wa ceri.
23356	MAT 6:5	Yeesu uu kɔ pimáa pi kpá rɛ: Nɔn yɛ kɛyómɛ n yáási, áni kapɛ yɛ kɛcáá kɛcáá mɛwai pikɔ́ mɛcɔ n wai. Pi yɛ n lalɛ pikɛ́ ayómɛyáhaalee-i nɛ sicéepɛnɛ-i n nyɛnu pin nɛ kɛyómɛ yáási rɛ pisoi pikɛ́ pi yɛ̃ nnya. Asei yɛ nyɛ kam nní nɔ́ símisi rɛ pi piihɛ́ɛ́ piyɔ́ɔ́ masilɛ.
23357	MAT 6:6	Amá pɔ́ɔn yɛ n la pɔkɛ́ kɛyómɛ yáási, a yɛ kupɔ́lee lõ aa hánɛsi aa pɛɛ Upɔ́sáa Uléécaa kɛ úka úu n nyáni yáási. Upɔ́sáa Uléécaa yɛɛ n nyáni lɛ̃ kaá nɛ risɛ́ɛ́ n wai yɛ́ ipɔ́hɛ́ɛ́ pɔ́ pa.
23358	MAT 6:7	Nɔn yɛ kɛyómɛ n yáási, áni kapɛ yɛ mɛ́woo kusímɛ́naapí n wai yarɛ pɛpɛɛ ápi Uléécaa n nyu mɛcɔ. Pi yɛ m músu rɛ pin lɛ̃ mɛyã́ n símaankɛɛ, Uléécaa yɛ́ nɛ pi kõ.
23360	MAT 6:9	Lɛ̃ kai m pisɛ rɛ nɔkɛ́ yɛ kɛyómɛ n yáási yɛ nní: Urɔ́sáa, pɔ́ɔ kɛyómɛcaa-pɔ ń we,
23361	MAT 6:10	Pisoi pikɛ́ céri rɛ tipɔ́nyíri yɛ kóólɛlɛnlɛ, Ipɔ́yɔ́ɔpi ikɛ́ kam, Mɛpɔ́la mɛkɛ́ kɛtẽ kɛcáá wa yarɛ kɛyómɛcaa-pɔ.