2	GEN 1:2	Tanoubu nige ana ao, eo aha’ahana, eo gabogabo potana eai masigiri mo; na Eaubada Earuana gabogabo wa i moimoiutawaidi.
9	GEN 1:9	Abo Eaubada i ene, “Bena goila galewa ubuna eai i abigogoi ena aba’ota esega, bena tano pitapitarina i taumasaraha.” Hinage doha, ie tubu.
10	GEN 1:10	Eaubada tano pitapitarina wa esana ie tore Tanoubu, eo goila se he’esegaidi wa esadi ie tore Gabogabo. Eo Eaubada ie ita i lolo.
11	GEN 1:11	Abo Eaubada i ene, “Bena tano ginauri ini’inidi se ini, ma tumadi, eo uaua oeagidi, uauadi se toredi boeadi eai tumadi, esa, esa ano ao i lauwatai tano potana eai.” Hinage doha, ie tubu.
12	GEN 1:12	Tano ginauri ini’indi i he’inidi, ma tumadi adi ao udoi udoi eai, eo oeagi uauadi se toredi, uauadi wa ma tumadi, adi ao udoi udoi se lauwataidi. Eo Eaubada ie ita i lolo.
14	GEN 1:14	Abo Eaubada i ene, “Galewa tehana eai bena maradi, asubena eo maiona aba‐abi’udoiedi; isi abo heiheinoi, eo huia aba‐nonoidi, asubena eo borimai.
29	GEN 1:29	Eo Eaubada i ene, “Au ita, ginauri ini’inidi gamagaridi tuma se hetuhetubudi, tanoubu maudoina potana eai, isi ede ea lediwa’o, oeagi gamagaridi hinage uauadi eai tumadi; abo au abidi ami aiai.
30	GEN 1:30	Eo tano suisuidi gamagaridi, eo eada manudi eo ginauri gamagaridi tano eai taudala, ginauri maudoidi aridi eai mauri eahuana aridi eai hinage ginauri in’inidi ea mosedi’o adi aiai.” Hinage doha, ie tubu.
36	GEN 2:5	Huiana ne sora nige oea ginaurina ini’inina esau tano eai i tubu, eo sora nige oea lagauna i inisaema, paana GUIAU Eaubada sora nige nabu i hetaru tano eai, eo sora nige tau esau tano i giari;
43	GEN 2:12	eanua ne ena gold i lolo dumaduma; bedelium eo onyx we’una hinage metai.
59	GEN 3:3	na Eaubada i ribaei mo i ene, ‘Oeagi wa oea duaduarina eai i totoro, temeta mo uauana taba nige au ai, hinage taba nige au abilau arinai, ata au mate’.”
73	GEN 3:17	Adamu arinai i ene, “Paana monem arinana u ataiei, eo oeagi wa ue ai, ea lauhesom wa, ‘Tabu u ai,’ tano ea ribahebaaea ta debam eai; paisoa amamnana mo abo aiaina u ai em mauri asubenadi gamagaridi eai;
74	GEN 3:18	nurinuri eo lagau baabaaeadi abo i he’inidiwa; eo oea wa aiaidi se ini iaede abo au aidi.
80	GEN 3:24	Arinai tau wa i aiduiei; to oeana tupo aruabu eai serubim esau i hetoro, eo elepa balebalelemna i he’ode tupo gamagari eai, mauri oeagina dobilana wa i taugudui.
87	GEN 4:7	Ena em abi se dudurai, abo se nualoloem, e nige’e? Ena em abi nige se dudurai, baaea dobila eai i wesewesem, ena gadosisi bena i abim, na oa mo bena u saepoini.”
88	GEN 4:8	Kaina i ribalau ena tau Abela arinai i ene, “U laoma ta lau oea eai.” Isi taudi labui se lage’o oea eai abo Kaina i toro ena tau Abela i lului abo i eatu’nui.
92	GEN 4:12	Oa tano abo u giari, iamo adidirina taba nige i leawa’uioi; oa abo taudago eo tauelitata tanoubu eai ta.”
95	GEN 4:15	Abo GUIAU arinai ie riba i ene, “Taba nige’e! Ena taba esau Kaina i unuhemate, ana gum abo i hearo, ma haligigi‐labui.” Abo GUIAU heiheinoina ie tore Kaina arinai, ata tau esau i lobai abo i unui.
103	GEN 4:23	Lameka i ribalau monenayao aridi eai, “Ada eo Silaha e, arinagu ta au ataiei, Omi Lameka monenayao e, hage egu riba au ataiei: tau esau ea eatu’nui paana agu gai ie tore, hewari esau paana i talaigu:
130	GEN 5:24	Enoka Eaubada maena se laulau esega, i lau e ia nige’e, paana Eaubada ia i abiya’o.
141	GEN 6:3	Abo GUIAU i ene, “Earuagu taba nige i haiabi da’oi tau nuana eai, ia buluma, ena asubena abo se lau borimai handere esega eo tau‐esega‐i‐mate.”
150	GEN 6:12	Eaubada tanoubu ie ita, hede ie posa, paana buluma gamagari edi dobila se hebaaea’o tanoubu eai.
152	GEN 6:14	Oa bena ake enam u ginauri, gopa oeagina eai, aroarona u biliutu’utusidi, murimurina eai eo arona eai tar arinai u aibadini.
155	GEN 6:17	Paana u ita, eau abo dibori utu’utu lailaididigana ea leama tanoubu eai ta, buluma maudoina arinai abo ea hebaaeadi, saha eo saha mauri eawasina aridi eai, galewa ubuna eai, ginauri gamagari tanoubu potana eai abo se mate.
161	GEN 7:1	Abotai GUIAU i ribalau Noa arinai i ene, “U awasae ake arona eai, oa eo maem numa taumia gamagaridi, paana ea itam’o oa tau abidudurai matagu eai, teina isi ta boeana eai.
166	GEN 7:6	Noa ena borimai handere haligigi‐esega, nei huia ne dibori utu’utu i lagema tanoubu potana eai.
167	GEN 7:7	Abo Noa ma nanatunayao tatao, ma monena, ma nanatunayao wa monediyao, se awasaegogo ake eai dibori utu’utu goilana wa bena se dagoei.
168	GEN 7:8	Suisui aa’aadi, eo suisui nige se aa, ea manu eo ginauri tano eai tau daladalausi,
170	GEN 7:10	Asubena haligigi‐labui muridi eai, abotai abo dibori utu’utu tanoubu i unuhai.
177	GEN 7:17	Dibori utu’utu wa i laulau asubena tatao‐labui‐se‐mate tanoubu potana eai; goila tanoubu i laugirihai abo ake wa i lausini, i poupouli, i sae ariri tanoubu ewana eai.
187	GEN 8:3	Eo huia gamagari magu tanoubu eai i hetubu i laulau. Asubena handere esega eo tatao‐labui‐se‐mate‐saudoudoi adisiga eai goila se dobi’o.
191	GEN 8:7	Ao’ao i heloi; ie loi sae, ie loi dobi i lau e goila tanoubu eai se guma’o.
192	GEN 8:8	Abotai bunebune esau i heloi, bena i ita, goila tanoubu eai se guma’o e sora.
194	GEN 8:10	I bagibagiuio asubena haligigi‐labui se lau’o, abotai bunebune ake eai wa i hetamariuioi.
195	GEN 8:11	Maimailahi eai bunebune wa i uioma arinai, to ne, awana eai olive luguluguna harihariuna ie losi arinai Noa ie ita, omihede goila se guma’o tanoubu eai.
196	GEN 8:12	Abo i bagibagiuio asubena haligigi‐labui headi se lau’o bunebune wa i heloiuioi, na nige i uioma ia arinai.
197	GEN 8:13	Borimai handere hehaligigi‐esegana eai, nawalai bagubagunana asubenana bagubagunana eai, goila se guma’o tanoubu eai; Noa ake atohina abo i abihai, i italau tanoubu ana ao ie ita, i pitari’o.
204	GEN 8:20	Noa abo aitalasam hatahatana i hetoro GUIAU arinai, eo suisui aa’aadi udoi udoi wa, eo manu aa’aadi, esega esega i abidi ena aitalasam hatana eai i gabudi.
208	GEN 9:2	Tano suisuina eo malagaibu manuna abo matausimiu eo mae’emiu eai se laulau, ginauri gamagaridi tano eai se daladalausi hinage gabogabo eamana; nimamiu eai ede se lediwa.
209	GEN 9:3	Ginauri maumauridi moimoyudi isi abo ami aiai ede, doha hinage ginauri ini’inidi eo ginauri gamagaridi eau ea lediwa’o.
217	GEN 9:11	Egu aigora ea ribaei arimiu eai, ede taba nige huia esau buluma maudoina ea tomgabaeuioidi dibori utu’utu goiladi eai, eo taba nige huia esau i diboriuio doha nei bena tanoubu i hebaaea.”
227	GEN 9:21	arinai waina i ginauri, to i nom‐eaueaure to ena numa‐lulu alona eai ie guri, ie ota tau aha’ahana.
230	GEN 9:24	Abotai Noa ena waina nomna arinai i siliata, natuna taumurita wa ena abi i nuatuiya’o.
234	GEN 9:28	Dibori utu’utu wa murina eai, Noa borimai handere haiona eo tatao‐labui‐se‐mate‐saudoudoi ie mia.
236	GEN 10:1	Noa ma nanatunayao Sema, Hama eo Iapeta, isidi ede ina; ma nanatudiyao hinage dibori utu’utu wa murina eai se labasidi.
267	GEN 10:32	Teina Noa nanatunayao adi bogaoyao ede, ma adi isi edi basileia eai; basileia ta aridi eai se tadada tanoubu tupo gamagari eai, dibori utu’utu wa murina eai.
270	GEN 11:3	Abo se oiriba si ene, “Ehei, hage bricks tano eai ta ginauridi, ta gabu komakomanidi.” Wau bricks wa se wa se hepaisoaedi doha edi we’u, eo tar se hepaisoa aba hepatu guduidi.
271	GEN 11:4	Abo si ene, “Ehei, hage eda eanua lailaina ta hetoro, eo numa lailaina ewana i sae e galewa, abo esada edi aba’ataina abo tanoubu matana eai taba nige se hetatagorigorida.”
277	GEN 11:10	Sema ana isimurita ede ina. Sema ena borimai handere esega, abotai i hemala Arepakasa tamana borimai labui dibori utu’utu murina eai.
304	GEN 12:5	Aberama monena Sara i woeai, eo Lota ena tau natuna wa, eo edi gogo gamagari se lauheagogo, eo edi tataoyao Harana eai se abidi; eo se torohai bena se lau Kanana tanona eai. Se lage’o Kanana tanona eai.
311	GEN 12:12	Aigupito tataodi se itam abo si ene, ‘Teina monena ede;’ arinai eau abo si unuigu, oa mo abo se hemiam.
316	GEN 12:17	Na GUIAU Parao i heai’iwala, ma ena numa taumiana, iwala lailaidi se hearodi, Sara, Aberama monena wa, debana eai.
318	GEN 12:19	Paana saha u ene, ‘Ia lougu’ arinai ea abi bena monegu? Ehei, monem ede ina, u woeai au lau.”
328	GEN 13:9	Tano maudoina ede matam eai me, e nige’e? Besi u abihesuara’uioim. Ena tupo nima‐seuseurim eai u abi, eau abo tupo tutu eai ea lau; e ena oa bena tupo tutu u abi, eau abo ea lau tupo seuseuri eai.”
333	GEN 13:14	Lota i abihesuara’uioi wa murina eai GUIAU i ribalau Aberama arinai, i ene, “Matam u helabaisinidi, em aba‐toro eai me u italau, tupo bauri, tupo eawana, tupo aruabu, tupo ealasi,
351	GEN 14:14	Aberama wasa i ataiei ana boga esau se abi se pai, abo ia ena tataoyao se heata komakomanidi’o, ena numa eai se labasidi, tataodi handere haiona eo saudoudoi‐haligigi‐haiona, i woeaidi se aihenau se lau e se lage Dani eai.
359	GEN 14:22	Na Aberama Sodoma edi wasawasa arinana i heuio i ene, “GUIAU Eaubada Saesaearirina galewa eo tanoubu tauginauridi, arinai ea riba aigora’o.
360	GEN 14:23	Oa em ginauri taba nige maina bodibodi e ae’um aba‐auna e oa em ginauri esa enam ea abilau arinai, ata u ene, ‘Eau Aberama ana gogo lailai taumoseina.’
361	GEN 14:24	Eau taba nige saha ea abi, egu hewari adi aiai mo se aiya’o, eo tatao maeguyao taulau wa edi tupo abo se abi, Anera, Esekola, eo Mamare isi hinage edi tupo taba se abi.”
376	GEN 15:15	Na oa mo abo u lau tamamyao aridi eai ma nuabigam; u tautaubada‐ariri’o abotai se torem.
378	GEN 15:17	Mahana i dui’o eo i masigiri’o, abo ne gulewa ginaha aba baheina ma asuasuna, eo osiri ala‐balebalelemna se taumasaraha wau aitalasam suisui eaudi wa boeadi eai.
385	GEN 16:3	Arinai Aberama Kanana tehana eai borimai saudoudoi i mia’o, abotai Sara, Aberama monena, ena heaheari Aigupito sinena wa Hagara i woeai monena Aberama arinai, bena monena.
395	GEN 16:13	Arinai GUIAU enana tauriba wa esana i atai, “Oa tauitagu Eaubadana,” paana i ene “Mamohoi ede, wa, Eaubada ea i’ita, ea itayao na sora mamaumaurigu.”
399	GEN 17:1	Aberama ena borimai se lage’o tatao‐hasi‐se‐mate‐saudoudoi‐harigigi‐hasi GUIAU i taumasaraha Aberama arinai, i ribalau i ene, “Eau Gigibori‐aririna Eaubadana; matagu eai bena u laulau eo nige aba hegirum.
415	GEN 17:17	Aberahama abo i gurisalaoba matana eai, to i maruhi iabom nuana eai, ie riba i ene, “Abo merumeru se labasi tau ena borimai handere esega arinai? Abo Saraha natuna i labasi, ia i lage’o borimai tatao‐hasi‐se‐mate saudoudoi?”
417	GEN 17:19	Eaubada i ene, “Nige’e, na monem Saraha abo natum i labasi, eo esana abo u atai Isaako. Egu aigora abo ea hemamohoiei ia arinai, aigora miamiatahitahina eo ana isimurita murina eai enadi hinage.
418	GEN 17:20	Na Isamaela wa, em riba ea ataieiya’o; u ita, abo ea ainauiai hinage, ea he’ua eo ea hegamagari aririei; wasawasa saudoudoi‐labui ia abo tamadi ede, abo ea hetoro i hemala basileia saesaena.
430	GEN 18:5	Na aiai ami begana ea leama, amnamiu se lolo abotai emi eda eai au lau; paana au laoma’o ina emi heaheari tauna arinai.” To si ene, “Besi, doha u ribaei wa u ginauri.”
433	GEN 18:8	Abo bata eo susu ie abi, eo bulumakau natuna se henonohaiya’o wa, eo i toredi matadi eai wa na isi se aiai.
435	GEN 18:10	I ene, “Abo ea uioma arimiu eai, borimai sigana eai, monem Saraha abo natum i labasi.” Na Saraha wa ia numa‐lulu guduna murina eai i ata’atai, dagelana eai.
436	GEN 18:11	Aberahama eo Saraha se tautaubada se sinesinebada ariri, eo edi borimai se gamagari; sisine kamanidi wa Saraha arinai i lautom’o.
437	GEN 18:12	Arinai Saraha nuaboeana eai i maruhi, i ene, “Ea sinesinebada’o, eo monegu i tautaubada’o, abo gonoamai kodena ai lobai?”
438	GEN 18:13	GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’
440	GEN 18:15	Na Saraha i halele, i ene, “Eau nige ea maruhi” — paana i matausi. GUIAU i ene, “Nige’e, na u maruhi wa!”
444	GEN 18:19	Nige’e, paana ia egu hineri tauna, abo nanatunayao eo ena numa tataodi murina eai i heatadi GUIAU ena laulau se sogohidi, laulau dudurai eo abi dudurai hinage; bena GUIAU saha i ribahesunumadi wa abo i hetubudi Aberahama arinai.”
446	GEN 18:21	Arinai abo ea dobi ea ita, lauhegiru i laoma arigu eai wa, mamohoi se ginauri ede; eo ena nige’e, abo abina ea ata.”
453	GEN 18:28	Ena taba ta ene, wau tau laulau duduraidi tatao‐labui‐se‐mate‐hesaudoudoina wa haligigi wa nige’e? Abo eanua maudoina u hebaaea, paana haligigi wa nige’e?” I ene, “Taba nige ea hebaaea ena tatao‐labui‐se‐mate‐haligigi nei eai ea lobaidi.”
460	GEN 19:2	I ene, “Egu guiau e, ea aibodaimiu bena au awasaema emi heaheari ta ena numa eai au eno, eo aemiu au deuridi; maraitom abo au toro heula emi dobila eai au lau.” Si ene, “Nige’e, ai abo maiona ta ai abi eanua dobiladi eai.”
469	GEN 19:11	Tatao numa dobilana eai se totoro wa matadi se oihegibudi, gagiridi eo lailaidi, i lau e se heoheoidada dobila se eo’oeo’oi, to se heamnabaaeauioidi.
476	GEN 19:18	Lota abo i ribalau aridi eai, i ene, “Agu tanuagayao, taba nige’e.
478	GEN 19:20	Au italau nei, eanua esau hanahanau eai, gonoagu arinai taba ea dago hinage eanua gagirina wa. Metai bena ea dago — i gagiri, e nige’e? — abo nei eai egu mauri ea abi!”
481	GEN 19:23	Mahana i dalasaema’o tanoubu i sinai abotai Lota ie lage Soara eai.
482	GEN 19:24	Abo GUIAU we’u gigibori eo alaalasi galewa eai GUIAU arinai i hetarudobei Sodoma eo Gomara potadi eai.
483	GEN 19:25	Eanua ne i heasibuidi, eo gonuna maudoina i hebaaea, eanua wa taumiaidi gamagaridi hinage, eo saha tano eai se ini’ini.
484	GEN 19:26	Na Lota monena ia murina eai i laulau, i itasinibui, to i hemala arita we’una.
486	GEN 19:28	ie itadobi Sodoma eo Gomara eo gonu ne tehana maudoina arinai, ie ita, eanua asuasuna i ini’inisae doha um lailai abagabugabuna asuasuna.
488	GEN 19:30	Lota abotai Soara i laugabaei, ie sae oea tupidi eai ie mia, ma nanatunayao sisine labui, paana Soara miana i matausiei; to we’u duhana esau eai ie mia, ma nanatunayao sisine labui.
489	GEN 19:31	Abo tau‐bagunana i ribalau taumuritana arinai i ene, “Tamada i tautaubad’o, eo tanoubu eai ta nige tau esau taba arida eai i laoma, doha tanoubu ta kamanina.
490	GEN 19:32	Ehei, tamada hage waina ta henom, arinai abo ta eno’enoei, doha nei ada isimurita abo se tubu, tamada debana eai.”
501	GEN 20:5	Ia i heribagu, e nige’e, i ene, ‘Lougu ina.’ Sine wa hinage i ene, ‘Tau ta lougu.’ Ma nua‐duduraigu eai, eo ma nima‐aagu eai laulau ta ea abi.”
507	GEN 20:11	Aberahama i ene, “Ea ginauri paana egu nuatu ea ene, Eaubada matausina ina tupo maudoina eai ta nige’e, arinai abo se unuigu monegu debana eai.
509	GEN 20:13	Huiana ne Eaubada i hetamarigu bena tamagu ena numa ea laugabaei ea elielitatausi, ea ribalau sine arinai ea ene, ‘Teina em abataubigaigu ede, haedi ta lage abo u ribaegu u ene, ia lougu.’”
512	GEN 20:16	Saraha arinai i ene, “U ita, loum wa moni silver tausani esega ea mosei, em taumaeamaea maisana isi gamagaridi maem wa matadi eai, eo tatao gamagaridi matadi eai oa se heduduraim’o.”
514	GEN 20:18	Paana GUIAU Abimeleko ena numa taumia sisinedi gamagaridi bogadi i he’agaridi, Saraha, Aberahama monena wa debana eai.
521	GEN 21:7	Hinage i ene, “Eai gonoana taba Aberahama i heriba i ene, ‘Saraha ia abo merumeru tauhemadodi esau?’ Ia mo natuna ea labasiyao ia tautaubadana eai ta.”
550	GEN 22:2	Eaubada i ene, “Natum u woeai, natu‐ese’esegam u gadosisie wa, Isaako, abo au lau tupo Moria eai, nei eai ia abo u moselaei em aitalasam gabugabuna oea tupina esau potana eai, sora abo ea heitam.”
554	GEN 22:6	Abo Aberahama aitalasam gabugabuna oeagina ie abi ie tore natuna tau Isaako dabayarona eai; eo nimana eai oeagi ala’alasina eo nigo i abidi, abo taudi labui se lau esega.
557	GEN 22:9	Dimo wa Eaubada i ribaei wa arinai se lage, abotai Aberahama aba‐aitalasam i tarini, potana eai oeagi i hatai komakomanidi, natuna Isaako abo ie pai, eo i he’enosaei oeagi wa potadi eai.
561	GEN 22:13	Aberahama matana i helabaisinidi, i italau, na dagelana eai mamoe tamoana ie ita donana oeagi gagirina eai se aitala’ahi: Aberahama mamoe tamoana wa i toai i toresae ena aitalasam ie gabu, natuna helaudamaina.
562	GEN 22:14	Arinai dimo ne esana Aberahama ie tore ‘GUIAU enada abo i leama’, doha se ribaribaei i laoma e wauta, si ene, “GUIAU ena oea‐tupina eai enada abo se leama.”