42	GEN 2:11	Bagubagunana esana Pisona; ia ede i lau Havila tehana maudoina i hetaiiri, temetai gold wa;
70	GEN 3:14	GUIAU Eaubada mota arinai ie riba, i ene; “Paana teina oa u ginauri, ea ribahematem ta suisui gamagaridi eo suisui manamanabaradi boeadi eai; bogam eai abo u nenene, tano muamuana abo u ai, em mauri asubenadi gamagaridi eai.
73	GEN 3:17	Adamu arinai i ene, “Paana monem arinana u ataiei, eo oeagi wa ue ai, ea lauhesom wa, ‘Tabu u ai,’ tano ea ribahebaaea ta debam eai; paisoa amamnana mo abo aiaina u ai em mauri asubenadi gamagaridi eai;
78	GEN 3:22	Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
86	GEN 4:6	GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?
155	GEN 6:17	Paana u ita, eau abo dibori utu’utu lailaididigana ea leama tanoubu eai ta, buluma maudoina arinai abo ea hebaaeadi, saha eo saha mauri eawasina aridi eai, galewa ubuna eai, ginauri gamagari tanoubu potana eai abo se mate.
164	GEN 7:4	Paana asubena haligigi‐labui eai abo nabu ea hetaru tanoubu potana eai abo asubena tatao‐labui‐se‐mate, maiona tatao‐labui‐se‐mate, i lauesegai; ginauri maumauridi ea ginauridi, gamagaridi abo ea hearugabaedi tano potana eai ta.”
211	GEN 9:5	Paana emi mauri osinana abo ea hetala suisui enana hinage abo ea nuatui eo tau enana; tau ena doga ena mauri maisana ede tau ena mauri.
241	GEN 10:6	Hama nanatunayao tatao: Kusa, Aigupito, Puta eo Kanana.
249	GEN 10:14	Eo Paturusim eo Kasuluhim (Pilistia tataodi edi aba‐laoma) eo Kapotorim.
260	GEN 10:25	Ebera arinai tatao labui se labasidi: esau esana Pelege, paana ena mauri asubenadi eai, tanoubu se soiei, eo ena tau esana Ioketana.
283	GEN 11:16	Ebera borimai tau‐esega‐i‐mate‐saudoudoi‐hasi ie mia, abotai i hemala Pelege tamana.
284	GEN 11:17	Pelege se labasi murina eai Ebera borimai handere hasi eo tau‐esega‐i‐mate‐saudoudoi ie mia, eo nanatunayao headi, tatao eo sisine, i hetubudi.
285	GEN 11:18	Pelege borimai tau‐esega‐i‐mate‐saudoudoi ie mia, abotai i hemala Reu tamana;
286	GEN 11:19	Reu se labasi murina eai Pelege borimai handere labui eo haligigi‐hasi ie mia eo nanatunayao headi, tatao eo sisine, i hetubudi.
314	GEN 12:15	Parao ena wasawasa headi ia se ita hinage se ribatausaei Parao arinai. Abo sine wa se abi se laei Parao ena numa eai.
316	GEN 12:17	Na GUIAU Parao i heai’iwala, ma ena numa taumiana, iwala lailaidi se hearodi, Sara, Aberama monena wa, debana eai.
317	GEN 12:18	Abo Parao Aberama i eogai, i ene, “Saha ina ue abi arigu eai ta? Paana saha nige u heribagu u ene ia monem?
318	GEN 12:19	Paana saha u ene, ‘Ia lougu’ arinai ea abi bena monegu? Ehei, monem ede ina, u woeai au lau.”
319	GEN 12:20	Parao tatao abo i lauhesomdi Aberama debana eai; abo dobila eai se woeai se woeai se hetamari, ma monena eo maena ginauri maudoidi.
326	GEN 13:7	Eo hinage Aberama ena bulumakau tauitawataidi eo Lota ena bulumakau tauitawataidi se haihaiabi. Huia eai ne Kanana tataodi eo Perisi tataodi tano ne se haihaimiai.
381	GEN 15:20	eo Hito, eo Perisi, eo Repaima.
438	GEN 18:13	GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’
443	GEN 18:18	Paana ia abo i hemala basileia saesaena eo gigigiborina, eo tanoubu basileiadi gamagaridi abo se helolouioidi ia debana eai.
471	GEN 19:13	Paana teha ta abo ai hebaaea, paana oipilina taumiaina debadi eai i lai ariri, GUIAU matana eai, arinai ede GUIAU i hetamarimai bena ai hebaaea.”
514	GEN 20:18	Paana GUIAU Abimeleko ena numa taumia sisinedi gamagaridi bogadi i he’agaridi, Saraha, Aberahama monena wa debana eai.
535	GEN 21:21	Parana barabarana eai ie mia to sinana Aigupito oeana eai sine esau i woeaiama abo monena.
536	GEN 21:22	Huiana eai nei Abimeleko eo Pikolo ena tauiala bodadi tauwoeaidi se ribalau Aberahama arinai si ene, “Em abiabi gamagaridi eai ea ita Eaubada maem,
546	GEN 21:32	Arinai Biera‐siba eai edi ribahesunuma se ginauri, abotai Abimeleko maena Pikolo ena iala bodana tauwoeaina wa se torohai se uio Pilistia edi tano eai.
548	GEN 21:34	Abo Aberahama Pilistia eai ie mia asubena gamagamagari.
570	GEN 22:22	Kesa, Haso, Piledasa, Iedelapa eo Betuela.
679	GEN 25:20	Isaako ena borimai tatao labui se mate, na Rebeka ie abi monena, ia Betuela natuna siu, Arama tauna wa Padana‐arama eai ie mia, eo louna Labana Arama tauna.
681	GEN 25:22	Merumeru tauna boeana eai se haiabi, to i ene, “Paana saha doha ina ea hearo?” To ie lau GUIAU arinai i oimuri.
694	GEN 26:1	Abotai guriam lailai eanua eai ne ie tubu doha guriam bagubagunana wa, Aberahama ena huia eai. Isaako abo ie dobi Gerara eai Abimeleko Pilistia edi wasawasa arinai.
698	GEN 26:5	Paana Aberahama arinagu ie ataiei eo egu riba i sogohi, egu lauhesom egu laugagaeo eo egu riba hedudurai.”
701	GEN 26:8	Isi huia lohaloha ma miadi nei eai, Abimeleko, Pilistia edi wasawasa ena numa tamlapaina eai i italau Isaako ie ita monena Rebeka i haitalagadoi.
702	GEN 26:9	To Abimeleko Isaako i eogai i ene, “Hedeomi monem meta, paana saha u ene ‘ia lougu’?” Isaako ena riba i heuio, “Paana ea nuatui ata ia debana eai ea mate.”
707	GEN 26:14	Ena gogo ede mamoe eawoidi, bulumakau eawoidi, eo ena numa taumiaidi se gamagari ariri, to Pilistia tataodi se aiaromagigiriei.
708	GEN 26:15	(Arinai goila huadi ia tamana ena heaheari tataodi se saradi wa, Pilistia tataodi abo se gududi, eo tano eai se wuidi, isi ede tamana Aberahama ene huia eai se saradi wa.)
711	GEN 26:18	Goila huadi wa tamana Aberahama ena huia eai se saradi wa, Isaako i sarauioidi, paana Aberahama ie mate abo Pilistia tataodi se wuidi, eo esadi tamana i toredi wa i toreuioidi.
719	GEN 26:26	Abotai Abimeleko ma ana sagu Ahusata, eo Pikolo ena iala bodana tauwoeaina, isi Gerara eai se torohai se lau Isaako hesabana.
720	GEN 26:27	Isaako i ribalau aridi eai i ene, “Paana saha au laoma arigu eai, omi tau hewaiunuegu eo tau aiduiegu wa?”
748	GEN 27:20	Na Isaako i ribalau natuna arinai i ene, “Natugu e, edohana to u lobai heula aririei?” I ene, “Paana GUIAU em Eaubada i leama arigu eai.”
776	GEN 28:2	U torohai u lau Padana‐arama eai, sinam tamana Betuela, ena asa eai, nei eai Labana, sinam louna wa, natuna esau u abi u tawasorai.
779	GEN 28:5	Doha ina Isaako Iakobo i hetamari ie lau, to ie lau Padana‐arama eai, Labana arinai Betuela natuna, Arama tauna wa, ia Iakobo eo Isoa sinadi, Rebeka, louna.
780	GEN 28:6	Isoa ie ita hede Isaako Iakobo i riba helolo, eo i hetamari ie lau Padana‐arama, nei eai bena monena i abi, eo i ribahelolo hinage i heriba, “Tabu Kanana sinena esau u tawasorai.”
781	GEN 28:7	Eo hinage Iakobo tamana eo sinana i awa abieidi to ie lau Padana‐arama eai.
811	GEN 29:15	Labana abo i ribalau Iakobo arinai i ene, “Paana oa agu boga tauna esau, arinai abo enagu u paisoa gaibu mo? U heribagu abo am maisa saha?”
821	GEN 29:25	Mara ie tom abo Iakobo ie ita, omi hede Lea, to i ribalau Labana arinai i ene, “Saha ue abi arigu eai ta? Rahela debana eai enam ea paisoa, e nige’e? Paana saha u boraegu ina?”
828	GEN 29:32	Lea ie boga eo natuna tau i labasi, eo esana ie tore Reubena, to i ene, “Paana GUIAU egu amamna i itayao, besi abo monegu i godosisiegu.”
829	GEN 29:33	I bogauio, natuna tau esau i labasi, i ene, “Paana GUIAU i ataieyao, se hewaiunuegu, arinai natugu tau esau hinage i leama,” To esana ie tore Simiona.
844	GEN 30:13	Abo Lea i ene, “Egu kode ina! Paana sisine abo esagu se ribaei ‘Kode’.” Arinai esana ie tore Asa.
861	GEN 30:30	Paana sora nige ea laoma wa, em gogo i gagiri ariri, na abotai i lai ariri: aitea tupo ea lau hede GUIAU i ainauiaim. Na auiana abo eaubom nanatuguyao enadi ea paisoa?”
889	GEN 31:15	I abimai doha laolaoma tataodi e nige’e? Paana i unegabaemai’o eo ema maisa monina i hepaisoa he’ohiyao.
892	GEN 31:18	Eo ena bulumakau eo ena suisui gamagaridi isi Padana‐arama eai i abidi wa, i woeahaidi bena se lau Kanana tehana eai tamana Isaako arinai.
901	GEN 31:27	Paana saha u dago eamueamui, u dagogabaegu, nige u heribagu bena abo ma kodegu eo ma nualologu ea hetamarimiu, wana eo boiatu eo huele aridi eai?
906	GEN 31:32	Eai nimana eai em oitau wa u lobaidi tabu i mauri. I lolo ehadayao matadi eai em ginauri u eo’oidi arigu eai eo u abiuioidi.” Paana Iakobo nige abina i ata Rahela oitau wa i aiyaharidio.
948	GEN 32:20	Pei helabuina tauwoeaina hinage doha i lauhesom, hehaionana hinage, abo tatao gamagaridi isi suisui eawoidi se lauwataidi i heribadi i ene, “Ena Isoa au lobai ina doha abo au ribalau arinai,
949	GEN 32:21	hinage abo au heriba, ‘U ita em heaheari tauna Iakobo murimai eai i laolaoma.’” Paana i ene, “Ainauia i bagunaegu abo arinai nuana ea helolo, murina eai abo matana ea ita, nuana doha meta ea ginauri abo nuana ea hebiga.”
958	GEN 32:30	Iakobo i hesiolau arinai i ene, “Ea aibodaim bena esam u heribagu.” Na i ene, “Paana saha esagu bena abina u ata?” Abo nei eai tau wa Iakobo i ribahelolo.
959	GEN 32:31	Iakobo eanua wa esana ie tore Penuela paana i ene, “Inai Eaubada ea itayao, eo ai hai’itaita, na sora ma miagu.”
960	GEN 32:32	Abotai Penuela i torohaigabaei mahana i daladalasae ie sina potana eai, na i laulaudae.
979	GEN 33:18	Iakobo Padana‐arama eai i laoma ie lage Seilem, Sekema ena eanua esau Kanana tanona eai, abo eanua matana eai ena apa lulu i hetoro.
988	GEN 34:7	Na Iakobo nanatunayao tatao oea eai wasa se ataiei to se laoma, nuadi se amamna, eo edi ouyalayala i lai ariri paana tau wa ginauri baaea mamohoina i ginauri Isaraela boeana eai, Iakobo natuna sine maena se enobili. Paana laulau doha nei tabu si ginauri.
1011	GEN 34:30	Abo Iakobo i ribalau Simiona eo Levi aridi eai, i ene, “Paana saha doha ina au hebaaeagu, esagu hinage au hebaaea aririei eanua tataodi Perisi eo Kanana tataodi matadi eai? Eau nige ea gamagari, arinai isi abo se heoiesega, abo se laoma se ialaigu, abo se unuhemategu, agu bogaoyao maeguyao.”
1021	GEN 35:9	Hinage Eaubada i taumasarahauio Iakobo arinai, huiana wa Padana‐arama i laugabaei abo nei eai i ribahelolo.
1038	GEN 35:26	Eo Silepa, Lea ena heaheari sinena, nanatunayao tatao: Gada eo Asa. Ina Iakobo nanatunayao tatao Padana‐arama eai se labasidi.
1048	GEN 36:7	Paana edi gogo se lai ariri nige gonoana se mia esega, hinage tano wa arinai isi tau laolaoma wa nige gonoadi paana edi suisui se gamagari ariri.
1080	GEN 36:39	Baal‐hanana, Akebore natuna tau i lautom, abo Hadara i helaudamai i hemala wasawasa: ena eanua esana Pau, monena esana Mehetabele, ia Matareda natuna sine, Matareda wa Mesahaba natuna sine.
1082	GEN 36:41	Bada Oholibama, bada Ela, bada Pinoni.
1106	GEN 37:22	Abo Reubena ie riba i ene, “Tabu osinana au hebolili, na au gabalaei ina duha alona eai barabara eai ta.” Paana i aipate bena Iosepa i abihai nimadi eai abo i moseuioi tamana arinai.
1120	GEN 37:36	Abo Midiani tataodi ia se uneunei Aigupito eai Potiparo arinai, Parao ena tau paisoa esau, ia tauiala edi kapena.
1149	GEN 38:29	Abotai nimana i uioei, to ena tau i laoma baguna, abo i ene, “Edohana to u baguna?” Arinai esana se tore Paresi.
1151	GEN 39:1	Iosepa se dobei Aigupito eai, eo Potiparo, Parao ena heaheari tauna esau, iala kapenana, Aigupito tauna, ia Isamaela tataodi aridi eai Iosepa i unehai, isi wa ia se dobei nei eai.
1156	GEN 39:6	Eo Potiparo ena ginauri gamagaridi i toredi Iosepa nimana eai, eo nige ie mode ena ginauri saha eo saha aridi eai, na ana aiai mo arinai. Na Iosepa ana ao i lolo ariri ma anabela.
1175	GEN 40:2	Abo Parao i ouyalayala ana tanutanuaga labui aridi eai, ena bia taubaheina adi tanuaga arinai eo falawa taugabugabu adi tanuaga arinai.
1180	GEN 40:7	Arinai i hesiolau isi wa Parao ena paisoa tanutanuagadi aridi eai maenayao ana tanuaga ena numatutugudu eai wa, i ene, “Wauta paana saha ami ao se porohe?”
1184	GEN 40:11	Na Parao ena bia nimagu eai, eo vine uauadi ea abidi nimagu eai ea tamdi Parao ena bia arinai, abo bia wa ea toreuioi Parao nimana eai.”
1186	GEN 40:13	Ena asubena haiona se lau abo Parao urum i lausini eo i hetorouioim em abo toro eai, eo Parao ena bia abo u tore ia nimana eai, doha beabeana oa ena bia taubaheina wa.
1187	GEN 40:14	Na ena huia lolo u hearo hage u nuatuigu eo ea aibodaim bena em abilolo hemasaraha arigu eai, eo esagu u atai Parao matana eai, bena abo ina numa eai ta i woea hepesagu.
1188	GEN 40:15	Paana mamohoi Heberu tataodi edi tano eai se aiyaharigu se laeguma, eo inai hinage nige saha ea ginauri debana eai se toregu numa masigiri eai ta.”
1190	GEN 40:17	Bosa pota ariri eai aiai gabugabudi udoi udoi Parao ana, na manu se laoma bosa wa urugu eai aiai wa se aidi.”
1192	GEN 40:19	Ena asubena haiona se ohi, Parao abo i earigabaem na abo i heabasim oeagi ewana eai, abo manu se laoma bulumam se ai.”
1193	GEN 40:20	Asubenana hehaionana eai Parao ena huia labasi eai, ena heaheari tataodi gamagaridi adi mataasi i ginauri, eo ena bia taubaheina adi tanauaga, eo falawa taugabugabu adi tanuaga i earigabaedi ena heaheari tataodi boeadi eai.
1194	GEN 40:21	Abo ana paisoa i toreuio bia taubaheina adi tanuaga nimana eai, abo Parao ena bia i toreuio nimana eai,
1197	GEN 41:1	Abo borimai labui se laoo na Parao i enosuaiei, ia saga gegesina eai i totoro,
1200	GEN 41:4	Abo bulumakau baabaaeadi eo eagaeagadi bulumakau haligigi‐labui lolodi eo tubutubudi se ai heohidi. Arinai Parao i eno toro.
1203	GEN 41:7	Abo sitona aiaidi haligigi‐labui baabaaeadi wa, sitona aiaidi haligigi‐labui lolodi eo lailaidi wa se aiheohidi. Abo Parao i enotoro to ie ita enosuai mo.
1204	GEN 41:8	Abo maratomtom eai nuana ie mode, abo tautabusima tataodi gamagaridi Aigupito eai, eo tatao sonosonogadi gamagaridi i eogaidi, abo Parao ena enosuai i heribadi, na nige esau abina i ata enosuai wa aniodi i hemasarahadi Parao arinai.
1205	GEN 41:9	Arinai ena bia taubaheina adi tanuaga i ribalau Parao arinai i ene, “Egu ponori wauta ea italobaidi
1206	GEN 41:10	Parao ena heaheari tataodi aridi eai i ouyalayala arinai i tutuguduigu iala kapenana ena numa eai, eau eo falawa taugabugabu adi tanuaga hinage.
1210	GEN 41:14	Abo Parao ie riba to Iosepa se eogai, numa masigiri eai se hepesa heuraeyama, i gaeagaeaom, ana lulu a’ana ie lui, abo i laoma Parao matana eai.
1211	GEN 41:15	To Parao i ribalau Iosepa arinai i ene, “Enosuai esau ea enosuaiei, na nige tau esau abina i ata abo aniona i heribagu, na oa wasam ea ataiei gonoam enosuai aniodi u italobaidi.”
1212	GEN 41:16	Abo Iosepa Parao i heuio i ene, “Eau nige’e, na Eaubada iabom abo aniona lolona i hemasaraha Parao arinai.”