35	GEN 2:4	Galewa eo tanoubu huia hetubudi wasadi. Asubena eai ne GUIAU Eaubada tanoubu eo galewa i ginauridi.
36	GEN 2:5	Huiana ne sora nige oea ginaurina ini’inina esau tano eai i tubu, eo sora nige oea lagauna i inisaema, paana GUIAU Eaubada sora nige nabu i hetaru tano eai, eo sora nige tau esau tano i giari;
38	GEN 2:7	Abotai GUIAU Eaubada tau i hetubu tanoubu muamuana eai, mauri eahuana i eahualau isuna eai; abo tau wa i hemala doga ma earuana maumaurina.
39	GEN 2:8	Abo GUIAU Eaubada oea i umai Edena eai, tupo aruabu eai, temetai abo tau wa ie tore, iaede i ginauri wa.
40	GEN 2:9	Eo tano eai GUIAU Eaubada oeagi gamagaridi i hetubudi, isi ede adi ao se lolo, eo isi hinage aiaidi se lolo; mauri oeagina hinage oea duaduarina eai, eo lolo eo baaea italobaina oeagina hinage.
46	GEN 2:15	GUIAU Eaubada tau wa ie abi ie tore Edena oeana eai, bena i giari eo i itawatai.
47	GEN 2:16	GUIAU Eaubada tau wa i lauhesom, i ene, “Oea ta oeagina gamagaridi uauadi abo au ainapaidi;
49	GEN 2:18	Abo GUIAU Eaubada i ene, “Nige i lolo tau iabom mo i mia; ana sagu abo ea ginauri abo i lau loloei.”
50	GEN 2:19	Arinai tano eai GUIAU Eaubada oea suisuidi gamagaridi, eo eada manudi gamagaridi i hetubudi, eo i woeaidima Adamu arinai, ia bena esadi i toredi, eo Adamu wa esa saha i mosedi ginauri maumauridi gamagaridi eai, isi esadi ede.
52	GEN 2:21	Arinai GUIAU Eaubada Adamu i heenomate, ia ma eno‐matena oitarina esau i abihai eo bulumana i hemauuioi;
53	GEN 2:22	eo wau oitarina wa GUIAU Eaubada tau lisilisina eai i niusihai wa, arinai sine i ginauri, eo i woeaiyama tau arinai.
57	GEN 3:1	Nuura suisuidi GUIAU Eaubada i hetubudi wa, boeadi eai mota iabom i sonoga ariri. I ribalau sine arinai i ene, “Eaubada i ene taba nige oea ta oeagina uauadi au aidi, wa?”
64	GEN 3:8	Abo GUIAU Eaubada dagudaguguna se ataiei, oea eai wa i laulauwaiyo maimailahi wayawayauna eai, Adamu ma monena GUIAU Eaubada matana eai se bawayamui oea wa oeagina boeadi eai.
65	GEN 3:9	Na GUIAU Eaubada i eogalau Adamu arinai i ene, “Oa ede haedi?”
69	GEN 3:13	GUIAU Eaubada sine wa arinai ie riba, i ene: “Saha ina u ginauri ta?” Sine i ene, “Mota i boraigu, to ea ai.”
70	GEN 3:14	GUIAU Eaubada mota arinai ie riba, i ene; “Paana teina oa u ginauri, ea ribahematem ta suisui gamagaridi eo suisui manamanabaradi boeadi eai; bogam eai abo u nenene, tano muamuana abo u ai, em mauri asubenadi gamagaridi eai.
77	GEN 3:21	GUIAU Eaubada Adamu ma monena adi lulu suisui opidi eai i ginauridi, eo i heluidi.
78	GEN 3:22	Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
79	GEN 3:23	Arinai GUIAU Eaubada Edena oeana eai i hepesa, i hetamari bena wau tano arinai ia se hetubu wa i giari.
81	GEN 4:1	Adamu monena Eva i nuatui, to ie boga abo Kaina i labasi, i ene, “Tau esau GUIAU arinai ea aabi.”
83	GEN 4:3	Huiana abo ie lage, Kaina oea uauana i leama GUIAU arinai, ena ainauia.
84	GEN 4:4	Na Abela ena mamoe eawoina natu‐ealahoudi, tubutubu‐lolodi i ledima. GUIAU Abela ena ainauia i heasisiei,
86	GEN 4:6	GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?
88	GEN 4:8	Kaina i ribalau ena tau Abela arinai i ene, “U laoma ta lau oea eai.” Isi taudi labui se lage’o oea eai abo Kaina i toro ena tau Abela i lului abo i eatu’nui.
89	GEN 4:9	GUIAU abo i ribalau Kaina arinai ie ene, “Em tau Abela wa ia haedi?” I heuio i ene, “Ibai: bena eau egu tau tauitawataina wa?”
90	GEN 4:10	GUIAU i ene, “Saha ue abi ina? Em tau osinana arinana tano eai i dou‐saema arigu eai.
93	GEN 4:13	Kaina abo i ribalau GUIAU arinai i ene, “Egu maisa i lai ariri, nige gonoana ea bahei.
94	GEN 4:14	U ita, wau tano eai ta u aiduiegu; oa matam eai hinage abo ea tauyamui; eau abo taudago eo tauelitata tanoubu eai ta, ena esau i lobaigu abo i unuigu.”
95	GEN 4:15	Abo GUIAU arinai ie riba i ene, “Taba nige’e! Ena taba esau Kaina i unuhemate, ana gum abo i hearo, ma haligigi‐labui.” Abo GUIAU heiheinoina ie tore Kaina arinai, ata tau esau i lobai abo i unui.
96	GEN 4:16	Kaina GUIAU matana abo i laugabaei, ia abo Nodi oeana eai ie mia, Edena teha aruabu eai.
106	GEN 4:26	Seta hinage natuna tau se labasi ia esana Inosi. Meta huia eai ne tatao se hetubu GUIAU esana se atai.
135	GEN 5:29	To esana wa ie tore Noa, i ene, “Tano GUIAU i ribahemate wa boeana eai te ina ta abo aba‐aiyawasina i leama, ada paisoa arinai eo nimada edi paipaisoa aridi eai.”
141	GEN 6:3	Abo GUIAU i ene, “Earuagu taba nige i haiabi da’oi tau nuana eai, ia buluma, ena asubena abo se lau borimai handere esega eo tau‐esega‐i‐mate.”
143	GEN 6:5	GUIAU tau ena abi baaea tanoubu eai ie ita i lai ariri, eo nuaboeana eai ena itaitasipo eo ena nuanuatu se baaea mo, huia gamagari,
144	GEN 6:6	GUIAU tau i hetubu tanoubu eai wa i nuadubuei, eo nuana i heamamna aririei.
145	GEN 6:7	Abo GUIAU i ene, “Tau ea hetubu wa abo ea saugabaei tanoubu potana eai, tau eo suisui eo ginauri se daladalausi eo malagaibu manudi, hede nuagu i baaea ea hetubudi wa.”
146	GEN 6:8	Na GUIAU matana eai Noa iabom arinai i nualoloei.
161	GEN 7:1	Abotai GUIAU i ribalau Noa arinai i ene, “U awasae ake arona eai, oa eo maem numa taumia gamagaridi, paana ea itam’o oa tau abidudurai matagu eai, teina isi ta boeana eai.
165	GEN 7:5	Abo Noa riba gamagaridi GUIAU i lauhesom wa, i ginauriheohidi.
176	GEN 7:16	Isi tau awasae, buluma maudoina enadi tamoana eo bawesina, se awasae doha Eaubada i lauhesom wa, abotai GUIAU i birigudui.
204	GEN 8:20	Noa abo aitalasam hatahatana i hetoro GUIAU arinai, eo suisui aa’aadi udoi udoi wa, eo manu aa’aadi, esega esega i abidi ena aitalasam hatana eai i gabudi.
205	GEN 8:21	Abo pane lolona GUIAU i ataiei, to GUIAU ia nuana eai i ene, “Taba nige huia esau tano ea ribahemateuioi tau debana eai, paana tau nuana kamanina i baaea mo, ma hewarina eai i laoma; taba nige huia esau ginauri maumauridi gamagaridi ea hebaaeauioidi, doha ea ginauriyao wa.
232	GEN 9:26	Hinage i ene, “GUIAU egu Eaubada ia abo Sema i ainauiai, abo Kanana ia ena heaheari tauauauna.
244	GEN 10:9	Ia tauailoea saesaena GUIAU matana eai; arinai ede se ribaei si ene, “Doha Nimoroda, tauailoea saesaena GUIAU matana eai.”
258	GEN 10:23	Arama nanatunayao tatao: Usa, Hula, Getera eo Masaha.
262	GEN 10:27	Hadorama, Usala, Dikala,
272	GEN 11:5	Abo GUIAU i dobima eanua i itasipoi, eo numa lailaina wa tatao nanatudiyao se hetoro.
273	GEN 11:6	Abo GUIAU i ene, “Iaede, isi tatao peledi esega, eo arinadi esega; ina aba hetubuna mo, sora saha abo se ginauri; saha se nuatui bena se ginauri abo gonoadi se ginauri.
275	GEN 11:8	Arinai GUIAU i hetatagorigoridi, nei eai se lau tanoubu tupo gamagari, eo eanua se ginauri wa arinai se paisoa lautom.
276	GEN 11:9	Arinai esana se ribaei Babela, paana nei eai GUIAU tanoubu tataodi arinadi i hepilipilidi, eo nei eai i hetatagorigoridi tanoubu potana eai se lau tupo gamagari.
295	GEN 11:28	Harana ia i mate baguna, sora tamana ma miana eai, edi eanua edi aba‐labasina eai, ede Uro, Kalidea tataodi enadi wa.
298	GEN 11:31	Teraha natuna Aberama eo tubuna Lota, Harana wa natuna, eo bosiana‐sine Sara natuna Aberama wa monena, i woeahaidi Uro, Kalidea tataodi edi eanua, se laugabaei se lau Kanana oeana eai; na Harana eai se lage abo se tarutoro eo nei eai se miahai.
300	GEN 12:1	GUIAU i ribalau Aberama arinai i ene, “Em eanua, am bogaoyao, eo tamam ena numa, u torohaigabaedi, u lau eanua esau arinai, iaede abo ea heitam.
303	GEN 12:4	Arinai Aberama i torohai, doha GUIAU i heriba wa; Lota hinage maena se lau. Aberama ena borimai tatao‐haiona‐se‐mate saudoudoi‐haligigi, huiana ne Harana i torohaigabaei.
306	GEN 12:7	Abo GUIAU i taumasaraha Aberama arinai, i ene, “Am isimurita aridi eai tano ta abo ea mosedi.” Arinai aba‐aitalasam esau i hetoro metai, GUIAU enana wa i taumasaraha arinai.
307	GEN 12:8	Abo i taulau oea tupina Beteli tupo aruabuna eai, ena numa‐lulu i hetoro, Beteli tupo ealasi eai, eo Eiai tupo aruabu eai, nei eai aba‐aitalasam esau i hetoro GUIAU enana, eo GUIAU esana i atai.
312	GEN 12:13	U riba u ene oa lougu, arinai abo i lau loloegu oa debam eai eo abo se eari ea mauri.”
316	GEN 12:17	Na GUIAU Parao i heai’iwala, ma ena numa taumiana, iwala lailaidi se hearodi, Sara, Aberama monena wa, debana eai.
323	GEN 13:4	Eanua wa arinai aba‐aitalasam ena aba‐hetorona wa; temetai Aberama GUIAU esana i atai.
329	GEN 13:10	Abo Lota matana i helabaisinidi, Ioridana gonuna ie ita, goilana se gamagari tupo gamagari eai, doha GUIAU ena oea, doha Aigupito tanona, Soara edana eai wa, huiana eai wa GUIAU sora nige Sodoma eo Gomara i hebaaeadi.
332	GEN 13:13	Wau Sodoma tataodi se hemanabara ariri, GUIAU tauhebaaeana saesaedi ede isi.
333	GEN 13:14	Lota i abihesuara’uioi wa murina eai GUIAU i ribalau Aberama arinai, i ene, “Matam u helabaisinidi, em aba‐toro eai me u italau, tupo bauri, tupo eawana, tupo aruabu, tupo ealasi,
336	GEN 13:17	U toro, tano ta u taudadai, lohana eo magagana, paana eau abo ea leawa.”
337	GEN 13:18	Arinai Aberama ena numa‐lulu i hesigilaei, i laoma Mamare aiarudi boeadi eai ie mia, isi ede Heberona eai wa; nei eai hinage aba‐aitalasam hatana i hetoro GUIAU enana.
359	GEN 14:22	Na Aberama Sodoma edi wasawasa arinana i heuio i ene, “GUIAU Eaubada Saesaearirina galewa eo tanoubu tauginauridi, arinai ea riba aigora’o.
362	GEN 15:1	Teina ginauridi ta muridi eai GUIAU ena riba i laoma Aberama arinai, enosuai eai, “Aberama e, tabu u matausi, eau em opea ede, em ainauia abo i lai ariri.”
363	GEN 15:2	Na Aberama i ene, “Guiau EAUBADA, saha abo u leama, paana eau nige natugu, eo egu numa tanuagana hede Eliesera, Damaseko tauna wa.”
364	GEN 15:3	Aberama i ene, “U ita, nige natugu u leama, arinai tau‐auau esau egu numa eai se labasi, ia abo egu gogo tauabina.”
365	GEN 15:4	Na hedeona, GUIAU ena riba i uioma arinai, i ene, “Teina tau ta ia taba nige em gogo tauabina; oabom natum tahunuana em gogo abo i abi.”
366	GEN 15:5	Ia abo i woea‐hepesa, i ene, “U itasae galewa eai, ipora hage u hasiridi ena gonoana u hasiridi.” Abo i ribalau arinai i ene, “Am isimurita abo doha ede.”
367	GEN 15:6	Na ia GUIAU ena riba i awa‐mamohoiei, arinai ede se nuatulaei si ene laulau‐duduraina meta.
368	GEN 15:7	Eo i ribalau arinai i ene, “Eau GUIAU tau‐woeahaim Uro eai, Kalidea tataodi enadi wa, bena eanua ta ea leawa u abi enam.”
369	GEN 15:8	Na ia i heuio i ene, “Guiau EAUBADA e, edohana abo ea nuatui, hede abo ea abi enagu?”
374	GEN 15:13	Abo GUIAU i ribalau Aberama arinai i ene, “Nuam eai bena i masaraha ariri, am isimurita abo eanua udoi arinai se mia, eanuana nige enadi, na ma‐auaudi abo se mia, eo abo se heporohedi borimai handere hasi sorasoradi eai.
379	GEN 15:18	Asubena eai ne GUIAU ena aigora i ginauri Aberama arinai i ene, “Am isimurita tano ta abo ea mosedi, Aigupito sagana eai i lau saga lailaina eai wa, Euparatea sagana.
384	GEN 16:2	Abo Sara i ribalau Aberama arinai i ene, “U itayao GUIAU abi merumeru eai i nuahigu; besi, u lau egu heaheari sinena arinai; ata bena ia debana eai abo nanatuguyao ea lobaidi.” Aberama Sara arinana ea i awaabiei.
387	GEN 16:5	Sara abo ie ribalau Aberama arinai i ene, “Se abi‐baaeaigu ta oa hinage am giru! Egu heaheari sinena eau ea leawa nuapoum eai em haitalagado eai, i lau e i itayao ie boga abotai i isuewaigu. GUIAU abo i hegiruda, oa eo eau!”
389	GEN 16:7	GUIAU ena aneru sine wa abo i lobai, barabara eai, goila bunubunuasina esau gegesina eai, bunubunuasina wa Sura edana eai.
391	GEN 16:9	GUIAU ena aneru abo i ribalau i ene, “U seuio am tanuaga arinai, eo arinai u awaabi.”
392	GEN 16:10	GUIAU ena aneru ie riba hinage, i ene, “Am isimurita abo ea hegamagari aririedi, edi gamagari taba nige si hasiridi.”
393	GEN 16:11	Eo GUIAU ena aneru wa enaba, “U ita, oa ue boga, eo natum tau abo u labasi; esana abo u tore Isamaela; paana GUIAU i atailaowa em nuaamamna arinai.
395	GEN 16:13	Arinai GUIAU enana tauriba wa esana i atai, “Oa tauitagu Eaubadana,” paana i ene “Mamohoi ede, wa, Eaubada ea i’ita, ea itayao na sora mamaumaurigu.”
399	GEN 17:1	Aberama ena borimai se lage’o tatao‐hasi‐se‐mate‐saudoudoi‐harigigi‐hasi GUIAU i taumasaraha Aberama arinai, i ribalau i ene, “Eau Gigibori‐aririna Eaubadana; matagu eai bena u laulau eo nige aba hegirum.
402	GEN 17:4	“U ita, egu aigora wa u abiyao, oa abo basileia gamagaridi tamadi ede.
426	GEN 18:1	GUIAU i taumasaraha ia arinai, Mamare aiarudi eai, ia ena numa‐lulu dobilana eai i babawa, asuasubenalai gigiborina eai.
431	GEN 18:6	Abo Aberahama i heuheula ie lau numa‐lulu alona eai wa, Saraha arinai, eo i ene, “U heula falawa lolololona nonoina haiona u henonohaidi, u helasa eo keke u ginauridi.”
438	GEN 18:13	GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’
439	GEN 18:14	Au ene bena ginauri esau i piripiri ariri GUIAU arinai? Huiana se tauribaei, arinai abo ea uioma, borimai sigana eai, Saraha natuna tau abo i abi.”
440	GEN 18:15	Na Saraha i halele, i ene, “Eau nige ea maruhi” — paana i matausi. GUIAU i ene, “Nige’e, na u maruhi wa!”
442	GEN 18:17	GUIAU i ene, “Laulau abo ea ginauri wa, abo ea toreyamui Aberahama arinai, wa?
444	GEN 18:19	Nige’e, paana ia egu hineri tauna, abo nanatunayao eo ena numa tataodi murina eai i heatadi GUIAU ena laulau se sogohidi, laulau dudurai eo abi dudurai hinage; bena GUIAU saha i ribahesunumadi wa abo i hetubudi Aberahama arinai.”
445	GEN 18:20	Abotai GUIAU i ene, “Lauhegiru Sodoma eo Gomara aridi eai i lai ariri, paana edi baaea i lai ariariri,
447	GEN 18:22	Arinai tatao wa se sinibui, se lau Sodoma hesabana; na Aberahama sora i totoro GUIAU matana eai.
451	GEN 18:26	Abo GUIAU i ene, “Ena Sodoma eai tau laulau dudurai tatao‐labui‐se‐mate‐saudoudoi ea lobaidi, eanuana abo ea nuatoatoaei, isi debadi eai.”
452	GEN 18:27	Aberahama riba ta i heuio i ene, “U ita, nuagu ea tore ina, bena Guiau arinai ea riba, eau doha wenu eo ahu mo.