1	GEN 1:1	Kuyie nyóó dɔɔ̀ kutenkù kɛ́dɔɔ̀ tiwɛtì nti nɛ̀ kɛtenkɛ̀.
2	GEN 1:2	Kɛ̀ kɛtenkɛ̀ í mmɔkɛ kɛ̀ dòmmɛ̀, dɛ̀marɛ̀ í mbo, kɛ̀ do dò nkubinku nku kɛ dò mbì. Kɛ̀ Kuyie nYaá nnɔ́nkɛ́ ku ĩ́nkɛ̀ kɛ nampú.
3	GEN 1:3	Kɛ̀ Kuyie mbɛ́i nkɛ dɔ̀: Kuwennikuu yɛ̀nní! Kɛ̀ kùu yɛ̀nní.
4	GEN 1:4	Kɛ̀ kùu pɛ́nsìrì kuwenniku kɛ́ kù cã̀ńnɛ́ nɛ̀ dibiìnnì,
5	GEN 1:5	kɛ́yú kuwenniku kɛ dɔ̀ kuyie, nkɛ́yú dibiìnnì kɛ dɔ̀ kɛyènkɛ̀. Kɛ̀ kuyuokuu buotɛ́ kɛ̀ dikṹnweńnìi buotɛ́. Diyiè ketirì ndi.
6	GEN 1:6	Kɛ̀ Kuyie ndɔ̀: Tiwɛtìi buotɛ́ kɛ́totɛ́ mɛniɛ kɛ̀ miɛ nní ḿbo kɛĩ́nkɛ̀ kɛ̀ mɛtɛ̃mɛ̀ bo kɛtenkɛ̀.
7	GEN 1:7	Kù bɛ́i mmɛmmɛ kɛ̀ tiwɛtìi buotɛ́ kɛ́totɛ́ mɛniɛ, miɛ nkɛĩ́nkɛ̀ mɛtɛ̃mɛ̀ kɛtenkɛ̀.
8	GEN 1:8	Kɛ̀ kùu yú kɛĩ́nkɛ̀ kɛ dɔ̀ tiwɛtì. Kɛ̀ kuyuokuu buotɛ́ kɛ̀ dikṹnweńnìi buotɛ́. Diyiè dɛ́rì ndi.
9	GEN 1:9	Kɛ̀ Kuyie mbɛ́i nkɛ dɔ̀: Mɛniɛ mmɛ̀ɛ̀ kpaá mɛ̀ɛ tíí ndɛ̀marɛ̀ máà, kɛ̀ kɛtenkɛ̀ɛ feitɛ́. Kɛ̀ dɛ̀ɛ dɔɔ̀ kù yɛ̃mmɛ̀.
10	GEN 1:10	Kɛ̀ kùu yú dɛ̀ɛ̀ waánnì kɛ dɔ̀ kɛtenkɛ̀, kɛ́yú mɛniɛ nkɛ dɔ̀ dàmɛ́ɛ̀rì.
11	GEN 1:11	Kɛ̀ Kuyie ndɔ̀: Titieti nɛ̀ timútì dɛ̀ɛ yɛ̀nní dɛbotí dɛbotí kɛ́mpɛí yɛbɛ. Kɛ̀ dɛ̀ɛ dɔɔ̀ kù yɛ̃mmɛ̀.
12	GEN 1:12	Timútì nɛ̀ titieti kɛ̀ dɛ̀ɛ yɛ̀nní kɛ́mpɛí dɛ bɛ, dɛ bɛ. Kɛ̀ kùu dɛ̀ pɛ́nsìrì.
13	GEN 1:13	Kɛ̀ kuyuokuu buotɛ́ kɛ̀ dikṹnweńnìi buotɛ́. Diyiè tãã́nnì ndi.
14	GEN 1:14	Kɛ̀ Kuyie nyíɛ́ kɛ́bɛ́i nkɛ dɔ̀: Kuwenniku ḿbo kɛĩ́nkɛ̀ kɛ́mbaàtì kɛyènkɛ̀ nɛ̀ kuyie nnɛ̀ yɛmɔ̀rɛ̀ nɛ̀ yɛwe nɛ̀ yɛbie,
15	GEN 1:15	kɛ́mmí kɛĩ́nkɛ̀ nɛ̀ kɛtenkɛ̀. Kɛ̀ dɛ̀ɛ dɔɔ̀ kù yɛ̃mmɛ̀.
16	GEN 1:16	Kɛ̀ Kuyie ndɔɔ̀ dɛ̀marɛ̀ dɛ̀dɛ́rɛ̀ dɛ̀ɛ̀ bo mmí, kɛ̀ dɛdiɛrɛ̀ ntú diyiè dìì bo mmí kuyie, kɛ̀ dɛsám̀pɔ́rɛ̀ ntú otã̀nkù wèè bo mmí kɛyènkɛ̀, kɛ yíɛ́nɛ̀ siwã̀ã.
17	GEN 1:17	Kɛ̀ Kuyie ndɛ̀ ãnnɛ́ kɛĩ́nkɛ̀ kɛ̀ dɛ̀ mmí kɛtenkɛ̀.
18	GEN 1:18	Kɛ̀ dɛ̀ mmí kuyie nnɛ̀ kɛyènkɛ̀, kɛ baàtì kuwenniku nɛ̀ dibiìnnì. Kɛ̀ kùu dɛ̀ pɛ́nsìrì.
19	GEN 1:19	Kɛ̀ kuyuokuu buotɛ́ kɛ̀ dikṹnweńnìi buotɛ́. Diyiè naannì ndi.
20	GEN 1:20	Kɛ̀ Kuyie ndɔ̀: Dɛsĩ́ntɛ́kpɛrɛ dɛmɔuu buotɛ́ mɛniɛ mmiɛkɛ, kɛ̀ sinɔɔ buotɛ́ kɛ́nhɛintɛ kɛĩ́nkɛ̀, kɛ̀ dɛ̀ɛ dɔɔ̀ kù bɛ́immɛ̀.
21	GEN 1:21	Kɛ̀ kùù dɔɔ̀ siyĩĩ diɛsì nɛ̀ dɛ̀ɛ̀ kó dimàà fòù mɛniɛ mmiɛkɛ, dɛbotí dɛbotí nɛ̀ sinɔɔ sibotí sibotí. Kɛ̀ kùu dɛ̀ pɛ́nsìrì,
22	GEN 1:22	kɛ́ dɛ̀ pã mɛsàà nkɛ dɔ̀ dɛ̀ɛ piɛ́ kɛ́sṹṹ, nkɛ̀ siyĩĩ sṹṹ mmɛniɛ mmiɛkɛ, kɛ̀ sinɔɔ sṹṹ nkɛtenkɛ̀ ĩ́nkɛ̀.
23	GEN 1:23	Kɛ̀ kuyuokuu buotɛ́ kɛ̀ dikṹnweńnìi buotɛ́. Diyiè nummurì ndi.
24	GEN 1:24	Kɛ̀ Kuyie ndɔ̀: Kɛtenkɛ̀ɛ pɛitɛ́ iwũɔ̃ imɔu botí. Icɛ̃wũɔ̃ diɛyì nɛ̀ isám̀pɔ́ì nɛ̀ ikpawũɔ̃ ibotí ibotí nɛ̀ dɛbambaànnɛ̀ dɛbotí dɛbotí. Kɛ̀ dɛ̀ɛ dɔɔ̀ kù yɛ̃mmɛ̀.
25	GEN 1:25	Kɛ̀ Kuyie ndɔɔ̀ iwũɔ̃ ibotí ibotí nɛ̀ icɛ̃wũɔ̃ nɛ̀ dɛbambaànnɛ̀ dɛmɔu. Kɛ̀ kùu dɛ̀ pɛ́nsìrì.
26	GEN 1:26	Kɛ̀ Kuyie ndɔ̀: Tí dɔɔ̀nɛ̀ onìtì kòo nti dònnɛ̀, kɛ́mbakɛ́ siyĩĩ nɛ̀ sinɔɔ sìì pùtì kɛĩ́nkɛ̀, nɛ̀ iwũɔ̃ ìì bo kɛtenkɛ̀ nɛ̀ dɛbambaànnɛ̀ dɛmɔu.
27	GEN 1:27	Kɛ̀ Kuyie ndɔɔ̀ onìtì kòo nkù dònnɛ̀. Kù do dɔ̀ɔ̀ onitidɔ̀ù nɛ̀ onitipòkù nwe. Kù bɛ̀ dɔ̀ɔ̀ kɛ̀ bɛ̀ nkù dònnɛ̀mu.
28	GEN 1:28	Kɛ̀ kùu bɛ̀ pã mɛsàà nkɛ́ bɛ̀ nàkɛ́ kɛ dɔ̀: Piɛ́nnɛ̀ kɛ́sṹṹ nkɛ́píɛ nkɛtenkɛ̀ kɛmɔu, kɛ́ nkɛ̀ bakɛ́, kɛ́mbakɛ́ siyĩĩ nɛ̀ sinɔɔ sìì pùtì kɛĩ́nkɛ̀, nɛ̀ iwũɔ̃ imɔu ìì bo kɛtenkɛ̀ ĩ́nkɛ̀.
29	GEN 1:29	Kɛ̀ Kuyie ndɔ̀: N di duɔ́mmu timútì timɔu tìì pɛí nɛ̀ dɛtie ndɛmɔu dɛ̀ɛ̀ pɛí, kɛ̀ dɛ̀ bo ntú di kó mudiì.
30	GEN 1:30	N duɔ́mmu timútì nɛ̀ titieti kɛ̀ tì bo ntú iwũɔ̃ imɔu nɛ̀ tinɔ̀tì timɔu, nɛ̀ dɛbambaànnɛ̀ dɛmɔu dɛ kó mudiì. Kɛ̀ dɛ̀ɛ dɔɔ̀ kù yɛ̃mmɛ̀.
31	GEN 1:31	Kɛ̀ kùu yà kù dɔ̀ɔ̀ dɛ̀ dɛmɔu kɛ́ dɛ̀ pɛ́nsìrì. Kɛ̀ kuyuokuu buotɛ́, kɛ̀ dikṹnweńnìi buotɛ́. Diyiè kuɔ́nnì ndi.
32	GEN 2:1	Mɛm̀mɛ kɛĩ́nkɛ̀ nɛ̀ kɛtenkɛ̀ dɛ̀ dɔ̀ɔ̀mɛ̀ nɛ̀ dɛ̀ɛ̀ kó dimàà bo.
33	GEN 2:2	Kuyie mpĩ́ nku tɔ̃mmú mumɔu yɛwe yɛ̀kuɔ̀ ndi, kɛ́om̀pɛ̀ diyiè yiénnì yiè.
34	GEN 2:3	Kù dì pãmu mɛsàà nkɛ dì cã̀ńnɛ́ kɛ̀ dì tu ku kpɛri, kɛ yɛ̃́ kù dèèmɛ̀ ku tɔ̃mmú mumɔu kɛ òmpɛ̀ diì yiè.
35	GEN 2:4	Miɛ m̀botí nku Kuyie ndɔ̀ɔ̀mɛ̀ kɛĩ́nkɛ̀ nɛ̀ kɛtenkɛ̀, nɛ̀ dɛ̀ɛ̀ kó dimàà bo. Ti Yiɛ̀ nKuyie ndɔ̀ɔ̀ dìì mɔ̀nnì kɛtenkɛ̀ nɛ̀ kɛĩ́nkɛ̀,
36	GEN 2:5	titieti nɛ̀ timútì dɛ̀ do í bo, ti Yiɛ̀ nKuyie mmu ndo í duɔnní fɛtaafɛ̀, onìtì mu ndo í bo kɛ bo nkuuti.
37	GEN 2:6	Mupã̀ã mmamù muù do yiɛ̀ní kɛ yɔ́ɔ́rì kɛtenkɛ̀.
38	GEN 2:7	Kɛ̀ ti Yiɛ̀ nKuyie ndɔɔ̀ onìtì nɛ̀ mutã́ã́, nkɛ́fuutɛ o ɔ̃nnì muyaá nkòo mɔɔtɛ mufòmmu.
39	GEN 2:8	Kɛ̀ ti Yiɛ̀ nKuyie mbuɔtí dɛtie nkupúú sààkù Edɛnni, diyiè yìɛ̀ní kɛ̀ɛ̀ bíɛ́kɛ̀, kɛ́kannɛ kù dɔ̀ɔ̀ wèè nìtì dɛ miɛkɛ.
40	GEN 2:9	Kɛ̀ ti Yiɛ̀ nKuyie nduɔ́ nkɛ̀ dɛtesààrɛ̀ dɛbotí dɛbotíi yɛ̀nní, kɛ́mpɛí yɛbɛ kɛ̀ yɛ̀ wenni kɛ naati. Kɛ̀ kùu soó nkupúú cuokɛ̀ mutie mùù duɔ̀ mmufòmmu nɛ̀ mùù yĩ́ɛ̃́kùnko mɛsàà ǹnɛ̀ mɛyɛi.
41	GEN 2:10	Kɛ̀ kukó ndiɛkù nyiɛ̀ní Edɛnni kɛ yɔ́ɔ́rì dɛ kó kupúú kɛ́totɛ́ kucɛ mɛ̀nàà.
42	GEN 2:11	Kuketikù yètìrì tu Pisɔ̃ɔ̃ kɛ̀ kù fitɛ́ dihɛì bɛ̀ tu dì Afidaa. Kɛ̀ mɛsɔɔ mbo dɛ kó dihɛì miɛkɛ,
43	GEN 2:12	mɛsɔɔ nkperímɛ̀ nɛ̀ tihúúntì fɔ̃ɔ̃ti nɛ̀ yɛtã́sààyɛ̀ yɛ̀ɛ̀ donku dɛu.
44	GEN 2:13	Kɛ̀ kudɛ́ríkù yètìrì tu Kiyɔ̃ɔ̃ kuù fitɛ́ dihɛì bɛ̀ tu dì Kuusi.
45	GEN 2:14	Kɛ̀ kutãã́nkù kpɛri tú Tikidi, kuù pũɔ̃̀ ndiyiè yìɛ̀ní kɛ̀ɛ̀ bíɛ́kɛ̀ kɛ firì dihɛì bɛ̀ tu dì Asidii, kɛ̀ kunaankù kpɛri tú Efadati.
46	GEN 2:15	Kɛ̀ ti Yiɛ̀ nKuyie nkannɛ onìtì dɛ kó kupúú miɛkɛ kòò bo nkù kuuti kɛ kù bàa.
47	GEN 2:16	Kɛ̀ ti Yiɛ̀ nKuyie nhò nàkɛ́ yɛtannɔ̀ kɛ dɔ̀: A bo na kɛ́nyo ndɛtie ndɛmɔu dɛ̀ɛ̀ bo kupúú dɛ kó yɛbɛ.
48	GEN 2:17	A nɛ́ báá di mùù yĩ́ɛ̃́kùnko mɛsàà nnɛ̀ mɛyɛi mmu bɛ, kàa yɛ̀ di dìì yiè a kumu.
49	GEN 2:18	Kɛ̀ ti Yiɛ̀ nKuyie mbɛ́i nkɛ dɔ̀: Dɛ̀ í wenni onìtì bo mbomɛ̀ omáà, m bo ò dɔ̀ɔ̀ wèè yó nhò dònnɛ̀ koò teénnɛ̀.
50	GEN 2:19	Kɛ̀ ti Yiɛ̀ nKuyie ntúótɛ́ mutã́ã́ nkɛ́dɔɔ̀nɛ̀ iwũɔ̃ imɔu, nɛ̀ tinɔ̀tì timɔu kɛ́duɔ́ nkɛ̀ dɛ̀ nkɔrìní onìtì borɛ̀, kɛ̀ kù bo yà ò yóó dɛ̀ yu yɛ̀ɛ̀ yètɛ̀. Bá dɛ̀, dɛ̀ do dò nkɛ́mmɔkɛmu diyètìrì.
51	GEN 2:20	Kɛ̀ Adammuu duɔ́ nyicɛ̃wũɔ̃ i yètɛ̀ kɛ́duɔ́ nyikpakpɛyi i yètɛ̀, kɛ́duɔ́ nsinɔɔ si yètɛ̀. Ò mɛ nyí mpɛ̀tɛ́ wèè bo nhò dònnɛ̀ koò teénnɛ̀.
52	GEN 2:21	Kɛ̀ ti Yiɛ̀ nKuyie nduɔ́ nkòo yɛ̃̀ nkɛ́duɔ́, kɛ̀ kùu dɛitɛ kucĩntóo kùmáà kɛ́wɛ̃tɛ kɛ́pɔ̃nnɛ́ tikɔ̃̀ntì,
53	GEN 2:22	kɛ́túótɛ́ dɛ kó kucĩntóo kɛ́dɔɔ̀nɛ̀ onitipòkù kóò duɔ́ nhonitidɔ̀ù.
54	GEN 2:23	Kòo ò yà kɛ dɔ̀: ɛ̃̀hɛ̃́ɛ̃̀! Ntɛ wèè tu n kṹɔ̃̀ kó dikɔ̃́ũ̀, n kɔ̃̀ntì kó tikɔ̃̀ntì. Bɛ̀ bo nhò yu kɛ tú onitipòkù kɛ yɛ̃́ Kuyie nhò dɔ̀ɔ̀nɛ̀mɛ̀ onitidɔ̀ù kó dikɔ̃́ũ̀ ndi.
55	GEN 2:24	Dɛɛ̀ te kòo nitidɔ̀ù bo yóu o cicɛ nɛ̀ o yɔ̃, kɛ́taunnɛ̀ o pokù kɛ̀ bɛ̀ɛ naá nhonìtì omáà.
56	GEN 2:25	Onitidɔ̀ù nɛ̀ o pokù bɛ̀ do bo yɛfɔ̃̀kperɛ̀ nyɛ, ifɛi mɛ nyí mbɛ̀ bo.
57	GEN 3:1	Fɛwààfɛ̀ fɛɛ̀ do ciìnɛ̀ tiwanwantì timɔu ti Yiɛ̀ nKuyie ndɔ̀ɔ̀ tì. Kɛ̀ fɛ̀ɛ bekɛ onitipòkù kɛ dɔ̀: Mɔ́mmuɔ nwe Kuyie nyɛ̃mmɛ̀ di bá nyo nkupúú kó yɛtebɛ yɛmɔuà?
58	GEN 3:2	Kòo nitipòkùu fɛ̀ tɛ̃̀ńnɛ́ kɛ dɔ̀: Ti yommu kupúú kó yɛtebɛ.
59	GEN 3:3	Mutie mùù nɛ́ bo kupúú cuokɛ̀, Kuyie ntú ti báá di mu kó yɛtebɛ, ti ketɛ́ kɛ báá yɛ̀ kàákɛ́. Kɛ̀ ti yɛ̀ di ti bo kú.
60	GEN 3:4	Kɛ̀ fɛwààfɛ̀ dɔ̀: Di í yóó kú bìtì.
61	GEN 3:5	Kuyie nyɛ̃́mu kɛ tú kɛ̀ di yɛ̀ di dìì yiè, di nuɔ ḿbo wéntɛ́, kɛ̀ di kù naánnɛ̀ kɛ́yĩ́ɛ̃́tɛ́ mɛsàà ǹnɛ̀ mɛyɛi.
62	GEN 3:6	Kòo nitipòkùu wéntɛ́ kɛ́yà yɛtebɛ bo nnaatimɛ̀, kɛ wenni fɛnɔ̀nfɛ̀, kɛ bo na kóò duɔ́ mmɛciì, kɛ́tɔ̃tɛ, kɛ́di kɛ́duɔ́ nho dɔù wèè ò bonɛ̀, kòo di.
63	GEN 3:7	Kɛ̀ bɛ nuɔ nwéntɛ́, kɛ̀ bɛ̀ɛ bantɛ́ bɛ̀ bomɛ̀ yɛfɔ̃̀kperɛ̀, kɛ́waá ntifãã̀tì kɛ́yi.
64	GEN 3:8	Kuyuoku mɔ̀nnì kɛ̀ ti Yiɛ̀ nKuyie nní nceǹtì kupúú miɛkɛ kɛ náá nkɛ̀ bɛ̀ yo, kɛ́sɔri titieti miɛkɛ.
65	GEN 3:9	Kɛ̀ ti Yiɛ̀ nKuyie nyú onitidɔ̀ù kɛ dɔ̀: A borɛ?
66	GEN 3:10	Kòo kù tɛ̃̀ńnɛ́ kɛ dɔ̀: N kèè a tammɛ̀ mmɛ kupúú miɛkɛ kɛ̀ kufɔ̃waá nni mpĩ nkɛ̀ n sɔ̀ri, kɛ yɛ̃́ m bomɛ̀ difɔ̃̀kperì.
67	GEN 3:11	Kɛ̀ ti Yiɛ̀ nKuyie ndɔ̀: We nda nàkɛ́ kɛ tú a bo difɔ̃̀kperì, yáà a di ditebii n yɛ̃ nha báá di dì ndi?
68	GEN 3:12	Kòo nitidɔ̀ù dɔ̀: Onitipòkù a mɛ nni nduɔ́ nwè kɛ̀ ti bo, weè ǹ duɔ́ ndɛ kó ditebii kɛ̀ ǹ di.
69	GEN 3:13	Kɛ̀ ti Yiɛ̀ nKuyie mbekɛ onitipòkù kɛ dɔ̀: Dɛ̀ yĩ́mɛ kàa dɔ̀ɔ̀ mɛmmɛ? Kòò dɔ̀: Fɛwààfɛ̀ fɛɛ̀ ǹ soutɛ́ kɛ̀ ǹ di ditebii.
70	GEN 3:14	Kɛ̀ ti Yiɛ̀ nKuyie nnákɛ́ fɛwààfɛ̀ kɛ dɔ̀: Fɔ̃́ɔ̃̀ mɛ ntemɛ̀ kɛ̀ dɛ̀ dɔ̀ɔ̀ miɛ n da cɔ̃ɔ̃mu tiwanwantì timɔu miɛkɛ, a bo nfũrì a pɔutì, kɛ yo mmutã́ã́ nsã́ã̀.
71	GEN 3:15	Nɛ̀ a bo mbomɛ̀, fɔ̃́ nnɛ̀ onitipòkù di báá narikɛ, o fuku nɛ̀ a kɔku dɛ̀ báá narikɛ. O fuku bo pɔntɛ a yuu, kàa kɔkuu dɔntɛ́ o nacɛ̀nkénnì.
72	GEN 3:16	Kɛ̀ ti Yiɛ̀ nKuyie nnákɛ́ onitipòkù kɛ dɔ̀: A pɛitímù bo yonkɛ mɛdiɛ̀. A níí bo fɛ̃́ṹtɛ́ mɛdiɛ̀ nkɛ nɛ́ na kɛ́pɛitɛ́, a bo mbúɔ́ a dɔù kòò da bakɛ́.
73	GEN 3:17	Kɛ̀ ti Yiɛ̀ nKuyie nnákɛ́ onitidɔ̀ù kɛ dɔ̀: A mɛ̀ nyiemmɛ̀ a pokù kpɛti kɛ di ditebii n yɛ̃ nha báá di dì. M bo cɔ̃ɔ̃ kɛtenkɛ̀, a níí bo kúútí kɛ́fɛ̃́ṹtɛ́ mɛdiɛ̀ nkɛ nɛ́ na kɛ́pɛ́tɛ́ kɛ́di.
74	GEN 3:18	Kɛtenkɛ̀ bo mpɛí ipo nɛ̀ tisãmpotì, kàa nyo ndɛpaa nkpɛrɛ.
75	GEN 3:19	A níí yóó kã́tɛ́ mɛyɔ̃́ɔ̃̀ mmɛ kɛ́na kɛ́pɛ́tɛ́ kɛ́di, kɛ yàa wɛ̃tɛnɛ̀ mutã́ã́ mmiɛkɛ n da dɔ̀ɔ̀nɛ̀ mù. N da dɔ̀ɔ̀nɛ̀ mutã́ã́ mmu kàa yóó wɛ̃tɛ kɛ́naá mmutã́ã́.
76	GEN 3:20	Kɛ̀ Adammuu yú o pokù kɛ dɔ̀ Ɛfu, dɛ̀ɛ̀ tu mufòmmu, kɛ yɛ̃́ weè tumɛ̀ bɛnìtìbɛ̀ bɛmɔu yɔ̃.
77	GEN 3:21	Kɛ̀ ti Yiɛ̀ nKuyie ńnukú tikɔ̃̀ntì kɛ́ bɛ̀ dàtínnɛ́,
78	GEN 3:22	kɛ́bɛ́i nkɛ dɔ̀: Onìtì naánnɛ̀ tí mbɛ kɛ yɛ̃́ mɛsàà nnɛ̀ mɛyɛi, ti báá yie nkòo tɔ̃tɛ ditebii dìì duɔ̀ mmufòmmu kɛ́di kɛ́nfòù sã́ã̀.
79	GEN 3:23	Kɛ̀ kùu bɛti onìtì kupúú Edɛnni miɛkɛ, kòo kɔtɛ kɛ́nkúútí kɛtenkɛ̀, kù ò dɔ̀ɔ̀nɛ̀ kɛ̀.
80	GEN 3:24	Mɛm̀mɛ ti Yiɛ̀ nKuyie mbɛtimɛ̀ onìtì kupúú Edɛnni miɛkɛ, kɛ́cónnɛ́ bɛĩ́nkɛ̀mbàrìbɛ̀ diyiè yìɛ̀ní kɛ̀ɛ̀ bíɛ́kɛ̀ kɛ̀ bɛ̀ mbaa mutie mùù duɔ̀ mmufòmmu, kɛ ɛinko yɛse kɛ̀ yɛ̀ cɔ̀ú nkɛ dò mmuhãã́.
81	GEN 4:1	Kɛ̀ Adammuu duɔ́nɛ̀ o pokù Ɛfu, kòo púó nkɛ́pɛitɛ́ dɛnitidabirɛ kɛ́ dɛ̀ yu kɛ dɔ̀ Kayɛ̃ɛ̃, kɛ dɔ̀: Ti Yiɛ̀ nKuyie nkuù te kɛ̀ m̀ pɛitɛ́ onìtì.
82	GEN 4:2	Kòo yíɛ́ kɛ́pɛitɛ́ o nantɛ̀ Abɛɛdi. Kɛ̀ Abɛɛdi ntú owũɔ̃cɛ̃nti kɛ̀ Kayɛ̃ɛ̃ tu otenkútì.
83	GEN 4:3	Kɛ̀ tidiitìi bi, kɛ̀ Kayɛ̃ɛ̃ waá nkɛ́pã ti Yiɛ̀ nKuyie.
84	GEN 4:4	Kɛ̀ Abɛɛdi yie tɔní o pedakɛ̀ yɛketiyɛ̀ kó dìmarì, dìì ã mɛkùɔ̀ nkɛ́pã ti Yiɛ̀ nKuyie. Kɛ̀ kùu ò pɛ́nsìrì kɛ́cɔutɛ́ o pãnnì,
85	GEN 4:5	kɛ́yetɛ Kayɛ̃ɛ̃ nɛ̀ o pãnnì, kòo miɛkɛɛ pɛikɛ mɛdiɛ̀ n kòo ììkɛ̀ɛ sɔutɛ.
86	GEN 4:6	Kɛ̀ ti Yiɛ̀ nKuyie nhò bekɛ kɛ dɔ̀: Kayɛ̃ɛ̃ dɛ̀ dòmmɛ kàa miɛkɛ pɛikɛ kàa ììkɛ̀ sɔ̀ùtɛ?
87	GEN 4:7	Kàa dɔ̀ɔ̀ mɛsàà nha yɛ̀mmɛ̀ yóó narikɛmu, kàa mɛ ndɔ̀ɔ̀ dɛ̀ɛ̀ í wenni, mɛyɛi mbo a bòrì kɛ da díí, yetoo kɛ́ mɛ̀ na.
88	GEN 4:8	Mɛm̀mɛ kɛ̀ Kayɛ̃ɛ̃ nákɛ́ o nantɛ̀ Abɛɛdi kɛ dɔ̀: Tí kɔ̃tɛ́. Bɛ̀ kɔ̃tɛ́ dìì mɔ̀nnì kɛ̀ Kayɛ̃ɛ̃ pĩ́ nho nantɛ̀ Abɛɛdi kɛ́kuɔ.
89	GEN 4:9	Kɛ̀ ti Yiɛ̀ nKuyie mbekɛ Kayɛ̃ɛ̃ kɛ dɔ̀: Yé a nantɛ̀ Abɛɛdi borɛ̀? Kɛ̀ Kayɛ̃ɛ̃ dɔ̀: N yí yɛ̃́ tɛ̀ borɛ̀, n túmu n nantɛ̀ kóo bàràà?
90	GEN 4:10	Kɛ̀ Kuyie ndɔ̀: A dɔ̀ɔ̀ ba? A nantɛ̀ yĩ̀ĩ̀ nkuɔ̀ nkɛtenkɛ̀ kɛ tú ḿ pɛitɛ.
91	GEN 4:11	Di mmɔ̀nnì n da cɔ̃ɔ̃mu kàa bo ítɛ́ kɛ́dɛ́tɛ́nɛ̀ kɛtenkɛ̀ kɛ̀ɛ̀ yã̀ a nantɛ̀ kó mɛyĩ̀ĩ̀ nha kùɔ tɛ̀.
92	GEN 4:12	A níí bo kúútí, a báá dɛitɛ, a bo nfirì tipíìtì timɔu kɛ tú ocièntì.
93	GEN 4:13	Kɛ̀ Kayɛ̃ɛ̃ nákɛ́ ti Yiɛ̀ nKuyie nkɛ dɔ̀: A n toú ndìì tɔu cɛ̃́ɛ̃̀mu, m báá na kɛ́ dì tɔ.
94	GEN 4:14	A mɛ nni mbɛ̀timɛ̀ yíe nkɛtensààkɛ̀, kɛ̀ n yóó da dɛ́tɛ́nɛ̀ kɛ́nfirì tipíìtì timɔu kɛ tú ocièntì, kòò mɔù ǹ yà ò yó n kuɔmu.
95	GEN 4:15	Dɛ mɔ̀nnì kɛ̀ ti Yiɛ̀ nKuyie ndɔ̀: Kòò mɔù kùɔ Kayɛ̃ɛ̃ m bo pɛitɛ kucɛ mɛ̀yiekɛ̀. Kɛ̀ ti Yiɛ̀ nKuyie ncannɛ Kayɛ̃ɛ̃ mɛcannimɛ̀ mamɛ̀ mɛ̀ɛ̀ yó nte kɛ̀ wèè ò yà ò báá ò kùɔ.
96	GEN 4:16	Kɛ̀ Kayɛ̃ɛ̃ ítɛ́ ti Yiɛ̀ nKuyie mborɛ̀, kɛ́kɔtɛ kɛ́mbo bɛ̀ tu dɛ̀ Nɔdi, kupúú Edɛnni, diyiè yìɛ̀ní kɛ̀ɛ̀ bíɛ́kɛ̀.
97	GEN 4:17	Kɛ̀ Kayɛ̃ɛ̃ duɔ́nɛ̀ o pokù, kòo púó nkɛ́pɛitɛ́ Enɔki. Kòo maá dihɛì kɛ́ dì yu o birɛ yètìrì kɛ dɔ̀ Enɔki.
98	GEN 4:18	Kɛ̀ Enɔkii pɛitɛ́ Idadi, kɛ̀ Idadi pɛitɛ́ Mɛuyɛɛdi. Kɛ̀ Mɛuyɛɛdii pɛitɛ́ Mɛtusayɛɛdi, kɛ̀ Mɛtusayɛɛdii pɛitɛ́ Demɛki.
99	GEN 4:19	Kɛ̀ Demɛkii puokɛ bɛnitipòbɛ̀ bɛ̀dɛ́bɛ̀, kòo ketiwè yètìrì ntú Ada, kòo dɛ́rì kpɛri ntú Sida.
100	GEN 4:20	Ada weè do pɛitɛ́ Yabaadi bɛ̀ɛ̀ ã titouti, kɛ cɛ̃mmù inààkɛ bɛ yààrì.