2	GEN 1:2	Kɛ̀ kɛtenkɛ̀ í mmɔkɛ kɛ̀ dòmmɛ̀, dɛ̀marɛ̀ í mbo, kɛ̀ do dò nkubinku nku kɛ dò mbì. Kɛ̀ Kuyie nYaá nnɔ́nkɛ́ ku ĩ́nkɛ̀ kɛ nampú.
3	GEN 1:3	Kɛ̀ Kuyie mbɛ́i nkɛ dɔ̀: Kuwennikuu yɛ̀nní! Kɛ̀ kùu yɛ̀nní.
6	GEN 1:6	Kɛ̀ Kuyie ndɔ̀: Tiwɛtìi buotɛ́ kɛ́totɛ́ mɛniɛ kɛ̀ miɛ nní ḿbo kɛĩ́nkɛ̀ kɛ̀ mɛtɛ̃mɛ̀ bo kɛtenkɛ̀.
9	GEN 1:9	Kɛ̀ Kuyie mbɛ́i nkɛ dɔ̀: Mɛniɛ mmɛ̀ɛ̀ kpaá mɛ̀ɛ tíí ndɛ̀marɛ̀ máà, kɛ̀ kɛtenkɛ̀ɛ feitɛ́. Kɛ̀ dɛ̀ɛ dɔɔ̀ kù yɛ̃mmɛ̀.
11	GEN 1:11	Kɛ̀ Kuyie ndɔ̀: Titieti nɛ̀ timútì dɛ̀ɛ yɛ̀nní dɛbotí dɛbotí kɛ́mpɛí yɛbɛ. Kɛ̀ dɛ̀ɛ dɔɔ̀ kù yɛ̃mmɛ̀.
12	GEN 1:12	Timútì nɛ̀ titieti kɛ̀ dɛ̀ɛ yɛ̀nní kɛ́mpɛí dɛ bɛ, dɛ bɛ. Kɛ̀ kùu dɛ̀ pɛ́nsìrì.
14	GEN 1:14	Kɛ̀ Kuyie nyíɛ́ kɛ́bɛ́i nkɛ dɔ̀: Kuwenniku ḿbo kɛĩ́nkɛ̀ kɛ́mbaàtì kɛyènkɛ̀ nɛ̀ kuyie nnɛ̀ yɛmɔ̀rɛ̀ nɛ̀ yɛwe nɛ̀ yɛbie,
15	GEN 1:15	kɛ́mmí kɛĩ́nkɛ̀ nɛ̀ kɛtenkɛ̀. Kɛ̀ dɛ̀ɛ dɔɔ̀ kù yɛ̃mmɛ̀.
16	GEN 1:16	Kɛ̀ Kuyie ndɔɔ̀ dɛ̀marɛ̀ dɛ̀dɛ́rɛ̀ dɛ̀ɛ̀ bo mmí, kɛ̀ dɛdiɛrɛ̀ ntú diyiè dìì bo mmí kuyie, kɛ̀ dɛsám̀pɔ́rɛ̀ ntú otã̀nkù wèè bo mmí kɛyènkɛ̀, kɛ yíɛ́nɛ̀ siwã̀ã.
17	GEN 1:17	Kɛ̀ Kuyie ndɛ̀ ãnnɛ́ kɛĩ́nkɛ̀ kɛ̀ dɛ̀ mmí kɛtenkɛ̀.
18	GEN 1:18	Kɛ̀ dɛ̀ mmí kuyie nnɛ̀ kɛyènkɛ̀, kɛ baàtì kuwenniku nɛ̀ dibiìnnì. Kɛ̀ kùu dɛ̀ pɛ́nsìrì.
21	GEN 1:21	Kɛ̀ kùù dɔɔ̀ siyĩĩ diɛsì nɛ̀ dɛ̀ɛ̀ kó dimàà fòù mɛniɛ mmiɛkɛ, dɛbotí dɛbotí nɛ̀ sinɔɔ sibotí sibotí. Kɛ̀ kùu dɛ̀ pɛ́nsìrì,
24	GEN 1:24	Kɛ̀ Kuyie ndɔ̀: Kɛtenkɛ̀ɛ pɛitɛ́ iwũɔ̃ imɔu botí. Icɛ̃wũɔ̃ diɛyì nɛ̀ isám̀pɔ́ì nɛ̀ ikpawũɔ̃ ibotí ibotí nɛ̀ dɛbambaànnɛ̀ dɛbotí dɛbotí. Kɛ̀ dɛ̀ɛ dɔɔ̀ kù yɛ̃mmɛ̀.
25	GEN 1:25	Kɛ̀ Kuyie ndɔɔ̀ iwũɔ̃ ibotí ibotí nɛ̀ icɛ̃wũɔ̃ nɛ̀ dɛbambaànnɛ̀ dɛmɔu. Kɛ̀ kùu dɛ̀ pɛ́nsìrì.
26	GEN 1:26	Kɛ̀ Kuyie ndɔ̀: Tí dɔɔ̀nɛ̀ onìtì kòo nti dònnɛ̀, kɛ́mbakɛ́ siyĩĩ nɛ̀ sinɔɔ sìì pùtì kɛĩ́nkɛ̀, nɛ̀ iwũɔ̃ ìì bo kɛtenkɛ̀ nɛ̀ dɛbambaànnɛ̀ dɛmɔu.
28	GEN 1:28	Kɛ̀ kùu bɛ̀ pã mɛsàà nkɛ́ bɛ̀ nàkɛ́ kɛ dɔ̀: Piɛ́nnɛ̀ kɛ́sṹṹ nkɛ́píɛ nkɛtenkɛ̀ kɛmɔu, kɛ́ nkɛ̀ bakɛ́, kɛ́mbakɛ́ siyĩĩ nɛ̀ sinɔɔ sìì pùtì kɛĩ́nkɛ̀, nɛ̀ iwũɔ̃ imɔu ìì bo kɛtenkɛ̀ ĩ́nkɛ̀.
29	GEN 1:29	Kɛ̀ Kuyie ndɔ̀: N di duɔ́mmu timútì timɔu tìì pɛí nɛ̀ dɛtie ndɛmɔu dɛ̀ɛ̀ pɛí, kɛ̀ dɛ̀ bo ntú di kó mudiì.
35	GEN 2:4	Miɛ m̀botí nku Kuyie ndɔ̀ɔ̀mɛ̀ kɛĩ́nkɛ̀ nɛ̀ kɛtenkɛ̀, nɛ̀ dɛ̀ɛ̀ kó dimàà bo. Ti Yiɛ̀ nKuyie ndɔ̀ɔ̀ dìì mɔ̀nnì kɛtenkɛ̀ nɛ̀ kɛĩ́nkɛ̀,
36	GEN 2:5	titieti nɛ̀ timútì dɛ̀ do í bo, ti Yiɛ̀ nKuyie mmu ndo í duɔnní fɛtaafɛ̀, onìtì mu ndo í bo kɛ bo nkuuti.
37	GEN 2:6	Mupã̀ã mmamù muù do yiɛ̀ní kɛ yɔ́ɔ́rì kɛtenkɛ̀.
39	GEN 2:8	Kɛ̀ ti Yiɛ̀ nKuyie mbuɔtí dɛtie nkupúú sààkù Edɛnni, diyiè yìɛ̀ní kɛ̀ɛ̀ bíɛ́kɛ̀, kɛ́kannɛ kù dɔ̀ɔ̀ wèè nìtì dɛ miɛkɛ.
40	GEN 2:9	Kɛ̀ ti Yiɛ̀ nKuyie nduɔ́ nkɛ̀ dɛtesààrɛ̀ dɛbotí dɛbotíi yɛ̀nní, kɛ́mpɛí yɛbɛ kɛ̀ yɛ̀ wenni kɛ naati. Kɛ̀ kùu soó nkupúú cuokɛ̀ mutie mùù duɔ̀ mmufòmmu nɛ̀ mùù yĩ́ɛ̃́kùnko mɛsàà ǹnɛ̀ mɛyɛi.
41	GEN 2:10	Kɛ̀ kukó ndiɛkù nyiɛ̀ní Edɛnni kɛ yɔ́ɔ́rì dɛ kó kupúú kɛ́totɛ́ kucɛ mɛ̀nàà.
43	GEN 2:12	mɛsɔɔ nkperímɛ̀ nɛ̀ tihúúntì fɔ̃ɔ̃ti nɛ̀ yɛtã́sààyɛ̀ yɛ̀ɛ̀ donku dɛu.
44	GEN 2:13	Kɛ̀ kudɛ́ríkù yètìrì tu Kiyɔ̃ɔ̃ kuù fitɛ́ dihɛì bɛ̀ tu dì Kuusi.
45	GEN 2:14	Kɛ̀ kutãã́nkù kpɛri tú Tikidi, kuù pũɔ̃̀ ndiyiè yìɛ̀ní kɛ̀ɛ̀ bíɛ́kɛ̀ kɛ firì dihɛì bɛ̀ tu dì Asidii, kɛ̀ kunaankù kpɛri tú Efadati.
49	GEN 2:18	Kɛ̀ ti Yiɛ̀ nKuyie mbɛ́i nkɛ dɔ̀: Dɛ̀ í wenni onìtì bo mbomɛ̀ omáà, m bo ò dɔ̀ɔ̀ wèè yó nhò dònnɛ̀ koò teénnɛ̀.
50	GEN 2:19	Kɛ̀ ti Yiɛ̀ nKuyie ntúótɛ́ mutã́ã́ nkɛ́dɔɔ̀nɛ̀ iwũɔ̃ imɔu, nɛ̀ tinɔ̀tì timɔu kɛ́duɔ́ nkɛ̀ dɛ̀ nkɔrìní onìtì borɛ̀, kɛ̀ kù bo yà ò yóó dɛ̀ yu yɛ̀ɛ̀ yètɛ̀. Bá dɛ̀, dɛ̀ do dò nkɛ́mmɔkɛmu diyètìrì.
51	GEN 2:20	Kɛ̀ Adammuu duɔ́ nyicɛ̃wũɔ̃ i yètɛ̀ kɛ́duɔ́ nyikpakpɛyi i yètɛ̀, kɛ́duɔ́ nsinɔɔ si yètɛ̀. Ò mɛ nyí mpɛ̀tɛ́ wèè bo nhò dònnɛ̀ koò teénnɛ̀.
56	GEN 2:25	Onitidɔ̀ù nɛ̀ o pokù bɛ̀ do bo yɛfɔ̃̀kperɛ̀ nyɛ, ifɛi mɛ nyí mbɛ̀ bo.
60	GEN 3:4	Kɛ̀ fɛwààfɛ̀ dɔ̀: Di í yóó kú bìtì.
64	GEN 3:8	Kuyuoku mɔ̀nnì kɛ̀ ti Yiɛ̀ nKuyie nní nceǹtì kupúú miɛkɛ kɛ náá nkɛ̀ bɛ̀ yo, kɛ́sɔri titieti miɛkɛ.
72	GEN 3:16	Kɛ̀ ti Yiɛ̀ nKuyie nnákɛ́ onitipòkù kɛ dɔ̀: A pɛitímù bo yonkɛ mɛdiɛ̀. A níí bo fɛ̃́ṹtɛ́ mɛdiɛ̀ nkɛ nɛ́ na kɛ́pɛitɛ́, a bo mbúɔ́ a dɔù kòò da bakɛ́.
73	GEN 3:17	Kɛ̀ ti Yiɛ̀ nKuyie nnákɛ́ onitidɔ̀ù kɛ dɔ̀: A mɛ̀ nyiemmɛ̀ a pokù kpɛti kɛ di ditebii n yɛ̃ nha báá di dì. M bo cɔ̃ɔ̃ kɛtenkɛ̀, a níí bo kúútí kɛ́fɛ̃́ṹtɛ́ mɛdiɛ̀ nkɛ nɛ́ na kɛ́pɛ́tɛ́ kɛ́di.
74	GEN 3:18	Kɛtenkɛ̀ bo mpɛí ipo nɛ̀ tisãmpotì, kàa nyo ndɛpaa nkpɛrɛ.
75	GEN 3:19	A níí yóó kã́tɛ́ mɛyɔ̃́ɔ̃̀ mmɛ kɛ́na kɛ́pɛ́tɛ́ kɛ́di, kɛ yàa wɛ̃tɛnɛ̀ mutã́ã́ mmiɛkɛ n da dɔ̀ɔ̀nɛ̀ mù. N da dɔ̀ɔ̀nɛ̀ mutã́ã́ mmu kàa yóó wɛ̃tɛ kɛ́naá mmutã́ã́.
77	GEN 3:21	Kɛ̀ ti Yiɛ̀ nKuyie ńnukú tikɔ̃̀ntì kɛ́ bɛ̀ dàtínnɛ́,
78	GEN 3:22	kɛ́bɛ́i nkɛ dɔ̀: Onìtì naánnɛ̀ tí mbɛ kɛ yɛ̃́ mɛsàà nnɛ̀ mɛyɛi, ti báá yie nkòo tɔ̃tɛ ditebii dìì duɔ̀ mmufòmmu kɛ́di kɛ́nfòù sã́ã̀.
79	GEN 3:23	Kɛ̀ kùu bɛti onìtì kupúú Edɛnni miɛkɛ, kòo kɔtɛ kɛ́nkúútí kɛtenkɛ̀, kù ò dɔ̀ɔ̀nɛ̀ kɛ̀.
80	GEN 3:24	Mɛm̀mɛ ti Yiɛ̀ nKuyie mbɛtimɛ̀ onìtì kupúú Edɛnni miɛkɛ, kɛ́cónnɛ́ bɛĩ́nkɛ̀mbàrìbɛ̀ diyiè yìɛ̀ní kɛ̀ɛ̀ bíɛ́kɛ̀ kɛ̀ bɛ̀ mbaa mutie mùù duɔ̀ mmufòmmu, kɛ ɛinko yɛse kɛ̀ yɛ̀ cɔ̀ú nkɛ dò mmuhãã́.
82	GEN 4:2	Kòo yíɛ́ kɛ́pɛitɛ́ o nantɛ̀ Abɛɛdi. Kɛ̀ Abɛɛdi ntú owũɔ̃cɛ̃nti kɛ̀ Kayɛ̃ɛ̃ tu otenkútì.
84	GEN 4:4	Kɛ̀ Abɛɛdi yie tɔní o pedakɛ̀ yɛketiyɛ̀ kó dìmarì, dìì ã mɛkùɔ̀ nkɛ́pã ti Yiɛ̀ nKuyie. Kɛ̀ kùu ò pɛ́nsìrì kɛ́cɔutɛ́ o pãnnì,
87	GEN 4:7	Kàa dɔ̀ɔ̀ mɛsàà nha yɛ̀mmɛ̀ yóó narikɛmu, kàa mɛ ndɔ̀ɔ̀ dɛ̀ɛ̀ í wenni, mɛyɛi mbo a bòrì kɛ da díí, yetoo kɛ́ mɛ̀ na.
88	GEN 4:8	Mɛm̀mɛ kɛ̀ Kayɛ̃ɛ̃ nákɛ́ o nantɛ̀ Abɛɛdi kɛ dɔ̀: Tí kɔ̃tɛ́. Bɛ̀ kɔ̃tɛ́ dìì mɔ̀nnì kɛ̀ Kayɛ̃ɛ̃ pĩ́ nho nantɛ̀ Abɛɛdi kɛ́kuɔ.
89	GEN 4:9	Kɛ̀ ti Yiɛ̀ nKuyie mbekɛ Kayɛ̃ɛ̃ kɛ dɔ̀: Yé a nantɛ̀ Abɛɛdi borɛ̀? Kɛ̀ Kayɛ̃ɛ̃ dɔ̀: N yí yɛ̃́ tɛ̀ borɛ̀, n túmu n nantɛ̀ kóo bàràà?
91	GEN 4:11	Di mmɔ̀nnì n da cɔ̃ɔ̃mu kàa bo ítɛ́ kɛ́dɛ́tɛ́nɛ̀ kɛtenkɛ̀ kɛ̀ɛ̀ yã̀ a nantɛ̀ kó mɛyĩ̀ĩ̀ nha kùɔ tɛ̀.
92	GEN 4:12	A níí bo kúútí, a báá dɛitɛ, a bo nfirì tipíìtì timɔu kɛ tú ocièntì.
94	GEN 4:14	A mɛ nni mbɛ̀timɛ̀ yíe nkɛtensààkɛ̀, kɛ̀ n yóó da dɛ́tɛ́nɛ̀ kɛ́nfirì tipíìtì timɔu kɛ tú ocièntì, kòò mɔù ǹ yà ò yó n kuɔmu.
96	GEN 4:16	Kɛ̀ Kayɛ̃ɛ̃ ítɛ́ ti Yiɛ̀ nKuyie mborɛ̀, kɛ́kɔtɛ kɛ́mbo bɛ̀ tu dɛ̀ Nɔdi, kupúú Edɛnni, diyiè yìɛ̀ní kɛ̀ɛ̀ bíɛ́kɛ̀.
101	GEN 4:21	Yabaadi nantɛ̀ do tú Yubaadi bɛ̀ɛ̀ bie ntikùtìdùùtì, kɛ eu itãrí bɛ yààrì.
102	GEN 4:22	Kɛ̀ Sida yie múnkɛɛ pɛitɛ́ dɛnitidabirɛ, Tubaadi-Kayɛ̃ɛ̃, kòo mmáátí tinɛntì tibotí tibotí, mɛnatimɛ̀ kpɛti nɛ̀ mɛbiɛrimɛ nɛ̀ timátì. Kòo tãũ̀ yètìrì ntú Naama.
103	GEN 4:23	Kɛ̀ Demɛkii nákɛ́ o pobɛ̀ kɛ dɔ̀: Ada nɛ̀ Sida, kéntɛ́nɛ̀ n kpɛti! Díndi Demɛki pobɛ̀ keènɛ̀ n tú mù! Onìtì n kɔ̀ùtɛ kɛ̀ nh ò kùɔ, odapàà nni mpotɛ́ kɛ̀ dɛ̀ màtìnnɛ kɛ̀ nh ò kùɔ.
104	GEN 4:24	Kɛ̀ bɛ̀ bo kuɔ bɛnìtìbɛ̀ bɛ̀yiekɛ̀ kɛ́pɛitɛ Kayɛ̃ɛ̃ bànnì, bɛ̀ bo kuɔ sipísìyiekɛ̀ nɛ̀ bɛ̀yiekɛ̀, kɛ́pɛitɛ m bànnì.
109	GEN 5:3	Adammu mɔ̀kɛ dìì mɔ̀nnì yɛbie ntɛkɔ̀ùtɛ̀ nɛ̀ sipísìtããti (130) kɛ́pɛitɛ́ dɛnitidabirɛ kɛ̀ dɛ̀ nhò dònnɛ̀ sósó. Kòo dɛ̀ yu kɛ dɔ̀: Sɛti.
110	GEN 5:4	Adammu pɛitɛ́ dìì mɔ̀nnì Sɛti kɛ́deè, kɛ́nfòù kɛ́tuɔkɛ yɛbie nsikɔusìnì (800), kɛ́piɛ́ initidabí nɛ̀ initipobí.
111	GEN 5:5	Ò do mɔkɛ yɛbie nsikɔusìwɛi nɛ̀ sipísìtããti (930) ndi kɛ́kú.
113	GEN 5:7	Ò pɛitɛ́ dìì mɔ̀nnì Enɔsi kɛ́deè kɛ́mmɔkɛ yɛbie nsikɔusìni nɛ̀ yɛ̀yiekɛ̀ (807), kɛ́piɛ́ initidabí nɛ̀ initipobí pɛ́u.
114	GEN 5:8	Sɛti do mɔkɛ yɛbie nsikɔusìwɛi nɛ̀ tɛpíítɛ̀ nɛ̀ yɛ̀dɛ́ɛ̀ (912) ndi kɛ́kú.
115	GEN 5:9	Enɔsi mɔ̀kɛ dìì mɔ̀nnì yɛbie nsipísìwɛi, kɛ́pɛitɛ́ dɛnitidabirɛ Kenanni.
116	GEN 5:10	Dɛ kó difɔ̃nkúò kɛ́mɔɔtɛ yɛbie nsikɔusìni nɛ̀ tɛpíítɛ̀ nɛ̀ yɛ̀nùmmù (815) kɛ́piɛ́ initidabí nɛ̀ initipobí.
118	GEN 5:12	Kɛ̀ Kenanni mmɔkɛ yɛbie nsipísìyiekɛ̀, kɛ́pɛitɛ́ dɛnitidabirɛ Madadeyɛɛdi.
119	GEN 5:13	Dɛ kó difɔ̃nkúò kɛ́mmɔkɛ yɛbie nsikɔusìni nɛ̀ sipísìnàà (840), kɛ́piɛ́ initidabí nɛ̀ initipobí.
120	GEN 5:14	Ò do mɔkɛ yɛbie nsikɔusìwɛi nɛ̀ tɛpíítɛ̀ (910) ntɛ kɛ́kú.
121	GEN 5:15	Madadeyɛɛdi do mɔkɛ yɛbie nsipísìkuɔ̀ nɛ̀ yɛ̀nùmmù ndi, kɛ́pɛitɛ́ dɛnitidabirɛ Yederi.
122	GEN 5:16	Ò pɛitɛ́ Yederi kɛ́deè, kɛ́mmɔkɛ yɛbie nsikɔusìni nɛ̀ sipísìtããti (830), kɛ́wɛ̃tɛ kɛ́piɛ́ initidabí nɛ̀ initipobí pɛ́u.
123	GEN 5:17	Ò do mɔkɛ yɛbie nsikɔusìni nɛ̀ sipísìwɛi nɛ̀ yɛ̀nùmmù (895) ndi kɛ́kú.
124	GEN 5:18	Kɛ̀ Yederi mmɔkɛ yɛbie ntɛkɔ̀ùtɛ̀ nɛ̀ sipísìkuɔ̀ nɛ̀ yɛ̀dɛ́ɛ̀ (162), kɛ́pɛitɛ́ dɛnitidabirɛ Enɔki.
125	GEN 5:19	Ò pɛitɛ́ Enɔki kɛ́deè kɛ́yíɛ́ kɛ́mɔɔtɛ yɛbie nsikɔusìni (800), yɛ miɛkɛ nkɛ ò piɛ́mɛ̀ initidabí nɛ̀ initipobí pɛ́u.