1	GEN 1:1	Pathen in Semtilin van le leiset asem tai.
2	GEN 1:2	Leiset chu agong bei le ahomkeu ahin, muthim chun twipi thuhtah chu akhukhum ahin, Hiche twipi chung’a chu Pathen lhagao chu ana lhale ahi.
3	GEN 1:3	Pathen in; “Vah hung umhen,” atin, Vah chu aum tai.
4	GEN 1:4	Pathen in vah chu aven pha asah e. Chule Pathen in vah chu muthim akon in asep khen tai.
5	GEN 1:5	Pathen’in vah chu sun asah in muthim chu jan asah tai. Hiche apat chun nilhah le jingkah ahung umdohtan hichu nikho masa pen ahung hitai.
6	GEN 1:6	Hichun Pathenin aseiyin, “Twipi sukhen dingin, vanthamjol hung kidal hen lang Van, twipi le leiset twipi chu alang alang ah sukhen hen,” atin.
8	GEN 1:8	Pathen in onghom chu vanthamjol asah in, hichun nilhah le jingkah achedoh kitin ahileh nikho nina ahi tai.
9	GEN 1:9	Chule Pathen in aseiye, “Vantham jol'a twi umjouse chu mun khat’a kikhol khom hen lang chule tolgo lai um doh hen,” ati. Asei bang chun aum jeng tai.
10	GEN 1:10	Pathen in tolgo lai chu leiset asah in chule twi jouse kikhol na mun chu twikhanglen asah e. Pathen in aven pha asa lheh jeng in ahi.
11	GEN 1:11	Chuin Pathen’in aseiye, “Leiset in hamphung ho, amu nei hamphung, agathei hamhing chi chom chom leh thingphung aga amunei ho, hiche ho chun ama ama chi dungjui cheh ahin sepdoh kit diu ahi,” ati. Hiti chun ahung kehdoh tauve.
12	GEN 1:12	Leiset’in hamphung thingphung ama ama chi dung juiyin ahung kehdoh in, agathei amu nei thingphung ama ama chi dungjui yin ahung kehdoh tauvin ahi. Pathen’in aven pha asah lheh jeng in ahi.
13	GEN 1:13	Nilhah khat le jingkah khat achekit in nithum alhing tai.
14	GEN 1:14	Chuin Pathen’in aseiye, “Sun le jan sepkhen dingin vanthomjol avah thei vahho hung kigol uhenlang, hiche ho chu kum kihei chin melchihnan jong, nikho simtoh nan jong chule kum simtoh nan jong pang’u hen.
15	GEN 1:15	Chujong le hiche ho chu vana vanthamjol akon in leiset salvah-in pang u-hen,’’ atin ahileh, hiti chun aum tai.
16	GEN 1:16	Hiche achun Pathen in vah alen cheh ni asem in, vah alenjo chu sunlaiya thunei ding in apansah-in, chule vah aneojo chu janlaiya thunei ding in apansah tai; hiti chun ahsi ho jong ahin sem tai.
17	GEN 1:17	Pathen in vahho chu vanthamjol apat in leiset salvah din apansah tai.
18	GEN 1:18	Sunlaiya thunei ding, janlaiya thunei ding, chule khovah le muthim sepkhen ding in apansah tan ahi. Pathen in aven ahileh pha asa lheh jeng in ahi.
19	GEN 1:19	Hichu nikho li alhin ni ahi.
21	GEN 1:21	Hiti chun Pathen in twikhanglen'a ganhing ahing thei jouse ahona kijot le ding in asem in, hiche ho chun twi a kidil sah sah-uvin, ama ama jat cheh in alha uvin ahi, chujong le ajat jat in alhanei vachate jong asem in ahi. Hichu Pathen in aven pha asalheh jeng in ahi.
22	GEN 1:22	Pathen in abonchauvin phatthei aboh in, “Hinpha uvin lang chule pung uvin, twikhanglen'a twi lah dimset uvin, chule leiset chunga vachate jong pung u-hen,’’ ati.
23	GEN 1:23	Chuin nilhah khat le jingkah khat achen ni nga lhinna ahi tai.
24	GEN 1:24	Chuin Pathen in aseiye, “Leiset in ama akon in sa jat chom chom hin hingdoh hen! Ama ama jat dungyui cheh in, vah ngui thei gancha, tol'a kithol ganhing, leh gamsa ho jong hihen” ati. Hiti chun aum jeng tai.
25	GEN 1:25	Chuin leiset chunga gamsa ho ama ama jat cheh in chule gancha ho jong ama ama jat cheh in a-opma kithol ajat jat in asem’e. Pathen in hiche ho chu aven pha asa lheh jeng in ahi.
26	GEN 1:26	Hichun Pathen in aseiye, “Eihon mihem ho, eiho lim pu'in sem u-hitin. Amaho chun twikhanglen sunga nga ho jouse chunga thunei diu, vanlai jol'a leng le vacha ho chule vah ngui thei gancha ho, le gam sa ho, chule a opa a kithol chengse chung’a thunei vaihom in pang’u hen,” ati.
27	GEN 1:27	Hiti chun Pathen in ama lim mong mong in mihem chu asem in, Pathen lim tobang bang in ama lim chu asem tai, pasal le numei asem doh tan ahi.
28	GEN 1:28	Pathen in amani chu phatthei aboh in amani jah’a aseiye, “Chipha lhon in chule pung jing lhon in simseng louvin leiset chung hinlo dimset un, chule nangni noiya vaihom na umhen, vanlai jol'a leng vachate chunga jong chule twikhanglen'a ahingthei jouse chunga hijong le aboncha ganhing namkim hihen chule leiset chunga lhale ganhing jouse hile achung uva thunei vaihom in pang lhon tan,’’ ati.
29	GEN 1:29	Pathen in hitin jong seiye, “Ve lhon in keiman leiset chunga muchi gathei phung jouse le thingphung gathei jouse aboncha hi nangni kihinso theina dinga kapeh lhon nahitai.
30	GEN 1:30	Chule leiset chunga um gamsa jouse hihen chunga leng vachate ho hijongle tol'a aop’a kithol ganhing jouse hijongle ahaithei hinna nei jouse aneh ding uva hamhing jouse kapeh doh ahi tai,’’ atile, hitobang chun aum tai.
31	GEN 1:31	Chuin Pathen in asemsa chengse chu aboncha’n aven, “Apha lheh jeng in ahi,” hichea chun nilhah le jingkah khat ahung um doh in nigup lhinni ahung hitai.
32	GEN 2:1	Hiti chun van le leiset chule asunga thil umjouse chu loupi tah a sem chai ahi tai.
33	GEN 2:2	Hichun ni sagi lhin nin Pathen in athilsem chu aboncha achaiyin, hiti chun a thilsem ho jouse akon in ama akicholdo tai.
34	GEN 2:3	Hiche ni sagi lhinni chu Pathen in phatthei aboh in chule atheng ahi tin aphongdoh tai, ajeh chu athilsem le anatoh jousea kon’a akicholdo ni ahi.
35	GEN 2:4	Hiche hi van le leiset ahung kisemdoh a akhanggui hung kipatdoh dan ho chu hiti hi ana hi. Pakai Pathen in leiset le van ahinsem patni chun.
36	GEN 2:5	Leiset chunga tollhang a jong hamphung keh doh loulai ahi, ajeh chu Pathen in gotwi leiset chunga ajuhsah loulai ahin chule hia chu koima natong ding umlou lai ana hi.
37	GEN 2:6	Ahin leiset’a kon in twimei a hung kaiyin chule leichung jouse chu twiyin achapnou vin ahi.
38	GEN 2:7	Chuin Pakai Pathen in leichunga kon in vutvai achun mihem asemin, chule a nahhom’a hinna hu alhakhum a ahile mihem chu hinna nei ahung hitai.
39	GEN 2:8	Chuphat in Pathen injong niso lama Eden hon aphut dohin hiche achun asem sa mihem chu akoi tai.
40	GEN 2:9	Chuin Pakai Pathen in leichung a kon in vetnom nom umle neh ding thingga namkim akedoh sah in ahi, chule honlai lung’a chun hinna thingphung jong chule ase le apha hetna thing-phung jong akesah in ahi.
41	GEN 2:10	Hiche Eden hon'a kon chun honlei chapnou jing ding in vadung along in, vadung chu vadung li in ahung long khen’in vadung li asohdoh e.
42	GEN 2:11	Vadung khatna chu ahile Pishon ahin, hiche chu sana kimuna vadung ahin Havilah gam pumpia long kimvel ahi.
43	GEN 2:12	Hiche gam'a sana kimu ho chu ahoi thei lheh in a namtwi jah nom umtah chule song namtwi jong akimui.
44	GEN 2:13	Vadung ni lhinna chu amin Gihon ahin, hiche vadung chu Cush gam pumpia long kimvel ahi.
45	GEN 2:14	Vadung thum lhinna chu ahile Haddekel ahin, hiche vadung hin sah solam gam'a Asshur gam pumpia long ahin, chule vadung li lhinna chu Euphrates ahi.
46	GEN 2:15	Chuin Pakai Pathen in amisem dohpa chu Eden hon sunga apuilut in hiche hon'a natong ding le avetup ding in apansah tai.
47	GEN 2:16	Ahin Pathen in mipa koma athupeh chu, “Nang man hiche honsunga theiga ho khu nadei dei naneh thei cheh ahi.
48	GEN 2:17	Hinlah nangman hon lailung’a ase le apha hetna theiga vang naneh lou beh ding, hichu naneh nini, na thitei tei ding,’’ ahi.
49	GEN 2:18	Chujong le Pakai Pathen in aseiye, “Mihempa achanga a-umhi apha poi hijeh chun keiman a umkhom pi ding khat sempeh ing kate,’’ ati.
50	GEN 2:19	Chuin Pakai Pathen in leivui chu leingan a sosah in chu in leichunga ganhing namkim asem in chule vacha ho chung lam’a alensah in chuin hiche ho jouse hi amin ipi pi asah em tin mihempa kom’a ahinpui khom in hiche a mihem pan amin vo najouse chu tuni geia amin a pangden ahi tai.
51	GEN 2:20	Hiti chun mihempa in ganhing namkim chu aminvo cheh in chunga lengthei vachate ahin, chule loujaova sahang jouse jong aminvo soh keiyin ahin mihempa kithopi ding akimu doh hih laiye.
52	GEN 2:21	Hijeh chun Pakai Pathen in mihempa chu a imut-mil sah in a imut-mil kah chun Pathen in anahgu khat aladoh in anung chu aphe in atom jol peh in ahi.
53	GEN 2:22	Chuin Pakai Pathen in Adam nahgu a lah doh’a kon chun numei khat asemdoh in amanu chu Adam kom’a ahin puilut in ahi.
54	GEN 2:23	Hichun mihempan aseiye, “Amanu hi keima gu akon’a kisemdoh ahin, chule aphevou jang jong keima phevou ahin, amanu hi tu apat’a numei kiti ding ahi, ajeh chu amanu hi pasal’a kona kiladoh ahi,” ati.
55	GEN 2:24	Hijeh a chu pasal in anu le apa a dalhah a aji numei’a beh ding chule amani chu tipum khat kiti lhon ding ahiye.
56	GEN 2:25	Ahin hichepet chun pasalpa ahin numeinu ahin ani gel lhon a sagoh keuva um lhon ahin, ahi vang'in jachat na anei lhon pon ahi.
57	GEN 3:1	Pathen thilsem jouse laha gul hi a lungthim thempen ahi. Nikhat chu aman numeinu adong in, “Pathen in honsunga theiga jouse naneh thei lhon lou beh ding ahi tia asei mong em?” ati.
59	GEN 3:3	Ahin Pathen in hitin aseiye, “Hon lailung a theiga vangkhu naneh lhon lou hel ding, lo jong nalo lhon lou hel ding ahi. Ahin iti ham khat’a nalo lhon a naneh lhon le nathi jeng lhon ding ahi,” tin aseiye.
60	GEN 3:4	Hinlah Satan in numeinu jah a aseiyin, “Nathi lhon loubeh ding ahi.
61	GEN 3:5	Ajeh chu Pathen in ahet ahi hichu naneh nini lhonle namit lhon hung hahdoh intin Pathen toh nabah lhon ding thilpha le thilse hetheiya naum lhon ding ahi ti Pathen in ahet jeh'a asei ahi bouve,” atitai.
62	GEN 3:6	Hiche a chun numeinun theiga chu aven ahile neh dinga tui chule mitvet dinga jong vetnom nom um, chule mi achihsah jeng ding jeh chun ahaduchat cheh tai. Hijeh chun numei nun theiga chu akilo in anetan chule a pasalpa jong them khat apen amapan jong ala in ane tai.
63	GEN 3:7	Hiche apat chun amit lhon chu ahung hahdoh in tahsa sagoh keo ahilhon chu aki hechen lhon tai. Hichun thing-phung na akilo lhon in atahsa lhon chu akisel na lhon tan ahi.
64	GEN 3:8	Chuin nisa dai lhah lamin honsunga Pakai Pathen awgin chu ajalhon in hijeh chun hon lailung’a thinglah a chun amani tah Pakai Pathen masanga akisel mang lhon tai.
66	GEN 3:10	Adam in jong adonbut in “Keiman nangma honsung’a na hung chu ka hen ahile ka sagoh keo ka hijeh a ka kichat’a kisela kahi,” ati.
68	GEN 3:12	Adam in adonbut in, “Keiman ka um khompi dinga nangman neipeh numeinu hin theiga chu themkhat eipen keiman kana netai,” ati.
69	GEN 3:13	Chuphat in Pakai Pathen in numeinu jah’a aseiye, “Nang in ipi dinga hitobang pihi nabol hitam!” atile numei nun adonbut’in, “Hiche gul hin eijol jol phat’a kaneh ahi bouve,” ati.
70	GEN 3:14	Hichun Pakai Pathen in gul jah’a, “Nangman hiche nana boldoh jeh in, ganhing jouse lah a nanghi sapset nachan ding na hinkho lhung keiya na oipoh’a na kithol tho ding, chule na hinkho sunga leivui naneh ding ahi.
72	GEN 3:16	Pathen in numeinu jah’a chun hitin a seiye, “Keiman na naovop hahsatna kabe peh ding, nao-sonat gentheiya cha nahin doh ding ahi. Najipa chung’a vai nahom nom jing ding, ahi vang’a najipan nang chunga vai ahop ding ahi,”ati.
73	GEN 3:17	Chuin Pakai Pathen in Adam jah’a hitin ati, “Nangman naji thu nangaiya naneh louhel ding ahi tia ka thupehsa theiga naneh tah jeh in nangma jeh a leiset hi sapset chang ahitai. Chule na hinkho damlai sungse a gimna le genthei thohpum pum’a neh na kihol a naneh ding ahi.
74	GEN 3:18	Chule nang doudin ling le mi-at thei jong hung kehdoh intin, chule nangma anche louhing a naki vahding ahi.
75	GEN 3:19	Na ti-ul na mai ja long pum’a anneh na kihol’a na neh ding, chule nangma leiset a kisemdoh nahin leiset na leso kit ding ahiye,” ati.
76	GEN 3:20	Hichun Adam in ajinu chu amin Eve asah tai. Ajeh chu amanu mijouse hung pen dohna minu ahi tan ahi.
77	GEN 3:21	Hichun Pakai Pathen in savun akon in Adam le Eve ding von akhui peh in amani chu asilpeh in ahi.
79	GEN 3:23	Hiche’a pat chun Pakai Pathen in Adam chu Eden hon a kon’in achondoh in amopohna chu alah peh tai.
80	GEN 3:24	Hiti chun Pathen in Adam anodoh jouvin, Eden hon nisolam’a hinna thingphung ngah ding in vantil Cherubim chu achen sah in, chule chemjam kou jeju chu akipei kimvel le sahtan ahi.
81	GEN 4:1	Chujouvin Adam le Eve akitimat lhon in ahile Eve’in nao ahin vopin Cain chu ahung peng tai, hiche’a chun amanu’n hitin aseiye, Pathen phatthei bohna jal in cha pasal khat kanei tai ati.
82	GEN 4:2	Phat chomkhat jou chun Eve chun chapa Abel ahing kit tai, hichun khonung in chapang teni chu ahung khanglen lhon tan, Abel chu kelngoi ching in ahung pang in, Cain vang chu loubol mi ahung hi tan ahi.
83	GEN 4:3	Phat phabep jouvin Cain in alousohga alhun phat in alousohga phabep ahin pon Pathen ading in kilhaina ahung sem tai.
84	GEN 4:4	Hitobang ma chun Abel in jong akelngoi lah’a apeng masa athao pen tah khat chu Pathen ading in ahin pedoh tai, Hichun Pathen in Abel lam joh aven athilto jong kipahtah in asanpeh tai.
85	GEN 4:5	Hinlah Pathen in Cain thilto maicham chu asanpeh tapoi, hijeh chun Cain chu hatah in alunghang in akaiku jeng in ahi.
87	GEN 4:7	Thilpha bol dinga kilomho chu nabol le na kisan pehda ding ham? Ahin thilpha boldinga kilomho chu na bolnom loule kichih theiyin chonsetnan naval lhum ding ahitai. Hiche hohi na chinpha ding joh ahi,” ati.
89	GEN 4:9	Phat chomkhat jouvin, Pakai Pathen in Cain jah a, “Nasopipa Abel hoiya um hitam?” atile Cain’in jong adonbut in, “Kahe poi, Keima hi ka sopi pa Abel ching tup ka him?” ati.
90	GEN 4:10	Hichun Pathen in jong Cain jah’a “Ipi nabol hitam? Na sopi pa Abel thisan chu tol'a kon’in keima angsung gei in ahung peng in ahi.
91	GEN 4:11	Hijeh chun tua patna nangma hi leiset chunga sapset na noija uma na hitai, na sopi pa Abel thisan in na chup ahitai.
93	GEN 4:13	Chuphat in Cain chun Pathen henga aseiye, “Keima gotna kachan hi kei thoh jou hoi ahi poi.
95	GEN 4:15	Pathen in adonbut in, “Ahipoi koi tobang nangma hinkho sumang dinga kigo a aumle keiman ama chunga sagi vei ka phulah ding ahi.” Hichea chun Pathen in Cain chu koiman atha louna ding in Cain chunga melchihna khat akoipeh in ahi.
96	GEN 4:16	Hichea kon chun Cain in Pathen kom adalhan Eden niso lam a Nod muna chun acheng tai.
97	GEN 4:17	Cain chun ajinu aki timatpin ahile nao ahin vop kit tan hiche nao chu Enoch ahi. Chuin Cain in phat phabep jouvin khopi khat ahinsem dohin, achapa min aput sah in hiche khopi min chu Enoch asah tai.
99	GEN 4:19	Lamech chun ji numei ni anei jin amasa nu chu ahile Adah ahin chule anina nu chu Zillah ahiye.
100	GEN 4:20	Adah in Jabal ahing in, amahi ahiye, khoilupon in a chenga gancha chingho ding’a apau chu.
101	GEN 4:21	Chule asopi pa min chu Jubal ahin, ama chu lathem gosem mut them masa pen ahiye.
102	GEN 4:22	Zillah jong chun Tubal-cain ahing in, ama chun manchah ding abonchan sum-eng jong thih jong ahin kheng’e. Chule Tubal-cain chun sopi numei khat anei jin amin Naamah ahi.
103	GEN 4:23	Chujou vin nikhat chu Lamech chun ajite ni jaha hitin a seiye, “Vo Adah le Zillah ka aw kasei ngai lhon in, ‘Ajeh chu pasal khat in eimavo jeh in ka that’in golhang khat’in eiden jeh-in ka that tai.
105	GEN 4:25	Chuin Adam chun ajinu akitimat pikit in ahile amanun chapa khat ahing kit in, amin Seth asah tai; ijeh inem itile amanun hitin aseiye, “Pathen in chapa eipeh kit hi Abel khel a ei kipe ah ahi, ajeh chu Cain thapa khel ding in eipe tai,” ati.
106	GEN 4:26	Seth chu mipi lhing ahung hiphat in chapa khat aneiyin amin Enosh asah-e. Hiche apat chun mipi hon Pathen chu amin pan in ahou pan tauvin ahi.
107	GEN 5:1	Hiche hohi Adam te insung khanggui umdan kijihna lekhabu ahi. Pathen in mihem asem chu ama lim tobang din asem in ahi.
108	GEN 5:2	Pathenin numei le pasal ana semdoh in aman amisem doh teni chu phatthei aboh in chuin amani chu mihem asah tai.
109	GEN 5:3	Adam chu kum jakhat le kum somthum alhinin ama limle ama mel to kilou cha khat ahing in hichepa chu amin Seth asah tai.
110	GEN 5:4	Seth apen jou chun Adam chu kum jaget tabang ahin be kit in, chu achun Adam in cha numei le pasal anei be na laiye.
111	GEN 5:5	Adam chu kum jako le kum somthum ahing nomsel in hiche jou chun ama athi tai.
112	GEN 5:6	Seth chu kum jakhat le kum nga ahi chun ama chu Enosh pa ahung hi tai.
113	GEN 5:7	Enosh pen jou chun Seth chu kum jaget le kum sagi ahin be nalai in chu achun aman cha numei le pasal adang ahin be nalaiye.