4	GEN 1:4	GALA ge kaani ga wozakalagi ʋagɛ. GALA ge wozakalagi ta kpidii yeeɠaaɠwɛɛni.
14	GEN 1:14	GALA ge ɠɛni ma: «Wozakalagiti ti ɠɛ geezuʋɛ geei ɠaaʋɛ, ti foloi ta kuai yeeɠaaɠwɛ. Naati ti ɠɛ ga poogiti, é lo siɛgiti ba, ta foloiti, ta konagiti,
18	GEN 1:18	ti zei foloi ta kuai unda, ti wozakalagi ta kpidii yeeɠaaɠwɛ. GALA ge kaani ga naa ʋagɛ.
22	GEN 1:22	GALA ge tuya looni ti ʋɛ, é ɠɛ ma: «À ɓuɠu, wo mɔin, wo kpoloɗɛiti buulaave, wɔniiti ti mɔin eteai zu.»
28	GEN 1:28	GALA ge tuya looni ti ʋɛ, é ɠɛ ti ma: «À ɓuɠu, wo mɔin, wo eteai laave, wo maaɠolo. À zei kaleiti unda, ta wɔniiti, ta suai kpein é yɛnvuzu zooi ɠa.»
34	GEN 2:3	GALA ge tuya looni foloi lɔfelasiɛi ʋɛ, é makɛ ɓɔɠɔ ʋɛ, tɔɔzei naama voloi é looɠoni, é lo ná-botii pɛ ba, aniiti kpɛtɛ vai zu é kɛɛni.
37	GEN 2:6	Kɛlɛ ɓumugi ɠɛni wuzeɠezu, é ɗa zooi ma yɛɓɛ.
38	GEN 2:7	Ɠɔoɠɔ GALAGI zooi ma ʋɔlɔi zeɠeni, é kpɛtɛ ga zunui, é zɛnvu viilɛi ʋu sokpayeɠeiti su, zunui ɠɛ ga zɛnvu su anii.
39	GEN 2:8	Naa ʋolu Ɠɔoɠɔ GALAGI kpelei leʋeni Edɛn yooi zu, folo ɠulazu ʋelei. É zunui ʋilɛni su, nii é kpɛtɛai.
40	GEN 2:9	É gului ma zii kpein pɔnɔni zooi ɠa, ti ʋɛtɛga maanɛai, ti-ma waaiti nɛai. Zɛnvu wului ɠɛni loni kpelei zaamaʋɛ, naa ʋɛɛ gului ʋa, nii é faa ʋagɔi ta faa ɲɔi yɔɠɔzuɠwɛɛ pelei lɛɛzu.
41	GEN 2:10	Ziɛ wolai ɠɛni ɠulazu Edɛn yooi zu, é ɗa ʋu kpelei ma. Kulaai ma ná ʋa, gaaɠwɛɛni su ga ma ɓeke naanigɔ.
42	GEN 2:11	Ma mɔungi laaseigi ɠɛni ga Pison, naa ɠa kakuɠakugai Ɠavila yooi ná pɛ su. Zanugi ɠa ɗa ɠa zooi naa zu,
44	GEN 2:13	Felesiɛi laaseigi ɠɛni ga Giyon, naa ɠa kakuɠakugai Kuse yooi ná pɛ su.
45	GEN 2:14	Saʋasiɛi laaseigi ɠɛni ga Tigele, naa ɠa é yeizu Asuul laai zu folo ɠulazu ʋelei. Ziɛ wolai naanisiɛi ɠa é ga Ufelate.
47	GEN 2:16	É devei nii veeni zunui ya, é ɠɛ ma: «Ɗa zoo è guluiti kpein ma waaiti ta mi, niiti ti kpelei zu,
48	GEN 2:17	kɛlɛ nii é faa ʋagɔi ta faa ɲɔi yɔɠɔzuɠwɛɛ pelei lɛɛzu, mina naama waai ta mi, mazɔlɔɔ voloi ɗa naa ta miina la, ɗa za.»
49	GEN 2:18	Ɠɔoɠɔ GALAGI ɠɛni ma: «É la ʋani ga zunui ɠila ko yɛ de. Nà kpɔba nu ʋagɔ ɓɛtɛzu bɛ.»
50	GEN 2:19	Ɠɔoɠɔ GALAGI dɔɓɔ zuaiti ta wɔniiti kpɛtɛni ga pɔlɔi. É ʋaani ga tiye zunui ʋɔ, é pɛtɛ, ʋelei a ti-laaseigiti pɛɛ la, naa ɠa a kɛ ti kpein ti daaseigi zɔlɔɔ, nii zunui a pɛɛ ti ʋa.
61	GEN 3:5	Kɛlɛ GALA ge kwɛɛ ga foloi nɔpɛ wo ta miizu la, wo-ɠaazuʋɛti ta zeɠe ma, wa ɠɛ eɠɛ GALA, wa faa ʋagɔi ta faa ɲɔi yɔɠɔzuɠwɛɛ.»
62	GEN 3:6	Anzanui kaani ga gului naa ma waaiti pɛtɛ ga maanɛɛʋɛ, ta pagɛ ga nu mi, fizɔgɛ ga é keleɠelegi ve nu ya. É ma waai ta ɠulani, é mi. Naa ʋolu é ta veeni sinigi ya, nii é ɠɛni koba, naa ɓalaa ge miini.
69	GEN 3:13	Ɠɔoɠɔ GALAGI ɠɛni anzanui ma: «Leeni vaa zu è naa ɠɛai?» É gooɠaaʋoteni, é ɠɛ ma: «Kaalii ɠa é yàava, gè gulu waai ta mi.»
71	GEN 3:15	Nà kpaai lɔ wo yɔɠɔzu wa anzanui, naa ɠa ɠɛ mavofodai ta ɗɔnɔi ti zɔɠɔzu. Nɔnɔi ɠa ɗɔungi maawana, ɗɔun ɗa kɔɠɔ libiligi maawana.»
72	GEN 3:16	É ɠɛni anzanui ma: «Nà ta la ɗa-ɓɔlɔi ma, kogi a ɠɛna è ma, ɗa ɓɔlɔ pɛ, ɗa ʋa dointi sɔlɔɔ. È yiima vai ɠa è mɛɛn è-zinigi ʋɔ pelei, toɠa zei è unda.»
75	GEN 3:19	Ɗa è-laamianigi zɔlɔɔ, kɛlɛ kɛni fɔdɔi ɠula è-loʋalaʋɛ, eyɛsu è ɠale ma zooi wu, ʋɛ è zeɠeni ná. Mazɔlɔɔ è ɓɛtɛʋɛ ga pɔlɔi, ɗa ɠale ma pɔlɔi zu.»
78	GEN 3:22	Ɠɔoɠɔ GALAGI ɠɛni ma: «Pɛtɛ, zunui ɠɛa eɠɛ ade taɠila, faa ʋagɔi ta faa ɲɔi yɔɠɔzuɠwɛɛ fai zu. Ade pele leʋe tuɠɔ niina, é mina yeemaale, é ʋa zɛnvu wului ma waai ɠula, a ʋa mi, a ʋa yɛ vulua ɠɔoɠɔ.»
81	GEN 4:1	Zunui anzai Ɛve laani ʋolu, naa kogi zeɠe, é sɔlɔɔ ga Kayɛn, é ɠɛni ma: «Gè zunu zɔlɔɔga ga Ɠɔoɠɔ GALAGI ná-kpɔbai maaʋele.»
82	GEN 4:2	Naa ʋolu, é deɠei Aɓɛle zɔlɔɔni. Aɓɛle ɠɛni ga baala makɛ nui, Kayɛn ɠɛ ga tii ɠɛɛ nui.
83	GEN 4:3	Yeeɠɛɠalai ta laawu, Kayɛn ʋaani ga zooi ʋa lɔnɔgi tanigaa, é kɛ ga vebɛanii Ɠɔoɠɔ GALAGI ʋɛ.
84	GEN 4:4	Aɓɛle ɓalaagi ʋaani ga ná-baala kpulugi ma yiʋo mɔungi tanigaa, é ti-ma zuai ʋasuʋɛti kula ga zalaɠai. Ɠɔoɠɔ GALAGI yeezeini Aɓɛle ta ná-vebɛanii wu ga pagɔ.
85	GEN 4:5	Kɛlɛ é la ɠɛni yeezeini Kayɛn ta ná-vebɛanii wu. Kayɛn wola yiiɠaawanani, gaazuɠili.
86	GEN 4:6	Ɠɔoɠɔ GALAGI ɠɛni Kayɛn ma: «Lee vaa zu è yiiɠaawanaai, è ɠaazuɠili?
88	GEN 4:8	Kayɛn ɓɔɛni deɠei Aɓɛle ʋɔ, tɛi ti ɠɛni dɔɓɔi zu, Kayɛn valani Aɓɛle ʋa, é paa.
89	GEN 4:9	Naa ʋoluma, Ɠɔoɠɔ GALAGI ɠɛni Kayɛn ma: «È-leɠei Aɓɛle ɠa mini?» É gooɠaaʋoteni, é ɠɛ ma: «Gè la kwɛɛ. Nà ɠa gè ga dèɠei makɛ nui ɓaa?»
92	GEN 4:12	Siɛgi zu è boti ɠɛɛzu la zooi ma, é la mɔ ná-kulanuma vea è ya. Ɗa ɠɛ ga pela nu, è ɗa leʋeteʋe eteai zu.»
93	GEN 4:13	Kayɛn ɠɛni Ɠɔoɠɔ GALAGI ma: «Nà-faa ɲɔi ma ɓakɔi wola wuiʋɛ ga gè ʋa ziɛ bu.
94	GEN 4:14	Wɛlɛ, ɗa kpɛ̀ɛzu za tii ɠɛɛ yooi ma, gè maaɠooza, gè lɔɔɠu è ʋa. Nà ɠɛ ga pela nu, gè ɗa leʋeteʋe eteai zu. Ni nu a kàana, toɠa pàa.»
95	GEN 4:15	Ɠɔoɠɔ GALAGI ɠɛni ma: «Ɓa-o! Ni nui ta a Kayɛn ʋaana, Kayɛn nɔnɔi ʋoto ka ɠula naama nui ma, ná zeizu ɠɛ lɔfela.» Ɠɔoɠɔ GALAGI poogi ʋɛɛni Kayɛn ʋa ga nu nɔpɛ ka kaana, é mina paa.
96	GEN 4:16	Naa ʋolu, Kayɛn maaɠoozani Ɠɔoɠɔ GALAGI ʋa, é li, é zei Nɔde yooi zu, Edɛn folo ɠulazu ʋelei.
97	GEN 4:17	Kayɛn anzai laani ʋolu, naa kogi zeɠe, é Ɠeenɔke zɔlɔɔ. É taai loni, é ná-doun zunui laaseigi ʋɛɛ ba.
98	GEN 4:18	Ɠeenɔke Iilade zɔlɔɔni, Iilade Meɠuyayɛle zɔlɔɔ, Meɠuyayɛle Metusayɛle zɔlɔɔ, Metusayɛle Leemɛke zɔlɔɔ.
102	GEN 4:22	Sila ɓalaagi Tuɓale-Kayɛn zɔlɔɔni, naa ɠa é ɠɛni ga kɔlu ɓɔigi ta kɔlu aniiti kpein gain nui. Tuɓale-Kayɛn deɠe anzanui ɠɛni ga Naama.
104	GEN 4:24	Potokulai a ɠɛna Kayɛn ma, ná zeizu ɠɛ lɔfela, Leemɛke nɔnɔi zeizu ɠa ɠɛ ga puulɔfela (70).»
105	GEN 4:25	Adama anzai laani ʋolu mɔnɔ, naa kogi zeɠe, é doun zunu zɔlɔɔ, é daasei pɛɛ ga Sɛte, mazɔlɔɔ é ɠɛ ma: «GALA ge doun zunu ɠili fea zèa Aɓɛle ʋotogi zu, nii Kayɛn paani.»
108	GEN 5:2	É zunui ɓɛtɛni ta anzanui, é tuya looni ti ʋɛ, é ti-laasei pɛɛ ga nuɓusɛi, ti ɓɛtɛ voloi nɔ.
118	GEN 5:12	Keenan ná-konagi ɠɛai ma ga puulɔfela (70), é Maɠalaleyɛle zɔlɔɔni.
119	GEN 5:13	Maɠalaleyɛle zɔlɔɔga ʋoluma, Keenan kona undɔsaʋa puunaanigɔ (840) ɠili kɛɛni. É doun zunui ta doun anzanui taɠiligaa zɔlɔɔni.
121	GEN 5:15	Maɠalaleyɛle ná-konagi ɠɛai ma ga puulɔzita maazu lɔɔlugɔ (65), é Yeelɛde zɔlɔɔni.
122	GEN 5:16	Yeelɛde zɔlɔɔga ʋoluma, Maɠalaleyɛle kona undɔsaʋa puusaʋagɔ (830) ɠili kɛɛni. É doun zunui ta doun anzanui taɠiligaa zɔlɔɔni.
123	GEN 5:17	Maɠalaleyɛle zii ma voloi kpein ge ɠɛni ga kona undɔsaʋa untaaʋuu maazu lɔɔlugɔ (895), naa ʋolu é zaani.
130	GEN 5:24	Ɠeenɔke ziɛni ga GALA ziimai, é la ɠɛni yɛni ná, tɔɔzei GALA ge seɠeni.
140	GEN 6:2	GALA doun zunuiti ti kaani ga nuiti ti-loun anzanuiti pagɛ, ti tanigaani seɠeni, ti ti ɠɛ ga ti-anzaiti, naati saama, niiti ti yiimazeɠeni ga tiye.
141	GEN 6:3	Názu ɠa Ɠɔoɠɔ GALAGI ɠɛni ma la: «Nà-zɛnvui la yɛga nuɓusɛi zu ɠɔ, mazɔlɔɔ nui ɠa ga saa ani nɔ, sii ma voloi ɠa ɠɛ ga kona ungila puufelegɔ (120) nɔ.»
143	GEN 6:5	Ɠɔoɠɔ GALAGI kaani ga nuɓusɛiti ta-vaa ɲɔi wola wɔɔlɔni zooi ɠa, ti-yiimaʋɛ ma ɠisiɛiti ti ɠɛni losu nɔ faa ɲɔi ʋa folo-o-folo.
144	GEN 6:6	Ɠɔoɠɔ GALAGI yiiɠoloɠoloni nuɓusɛi ɓɛtɛ vai zu, é pilɛ zooi ɠa, gola ɠaazuɠilini.
156	GEN 6:18	Kɛlɛ nà nà-minazeɠegi ɠɛɛzu de yɔɠɔzu, ɗa lɛ keingi zu, ɗa-o, è-loun zunuiti-yo, é ʋɛɛ è-anzai ta è-loun anzaiti ba.
158	GEN 6:20	Ma zinɛ ta ma zaa, ma zii ɠilagilagi ɠa ʋa è ʋɔ bɛ, wɔniiti su, toganiiti ɓalaa su, ta aniiti kpein ti ɓokposu zooi ma, ga ti pɛ ti yɛnvui makɛ.
159	GEN 6:21	Ɗa daamianigiti kpein seɠe, è makɛ ɠoba, naa ɠa a kɛ é ɠɛ ga daamianigi è ʋɛ ta tiya ɓalaa bɛ.»
161	GEN 7:1	Ɠɔoɠɔ GALAGI ɠɛni Nowe ma: «Lɛ keingi zu, ɗa-o, ɗa-ʋɛlɛyeɠei-yo, mazɔlɔɔ gè è ʋɛtɛgɛ ga telebo nu niima yeeɠɛɠalai zu nuɓusɛiti saama.
164	GEN 7:4	Mazɔlɔɔ é yɛga ga folo lɔfela, gè tonai ʋu eteai zu, folo ʋuunaanigɔ (40) ta kpidi ʋuunaanigɔ (40) laawu, fuluaniiti kpein gè ti ɓɛtɛai, gè ti-ma zuwu ɠaaleʋe zooi ɠa.»
169	GEN 7:9	ti kpein ti zeelini Nowe ma keingi ʋɔ bɛ ga felefelegi, ma zinɛ ɠila ta ma zaa ɠila, eɠɛʋelei GALA ge ma levei veeni la Nowe ya.
172	GEN 7:12	Tonai tɔɔzeini ga ʋua eteai zu, eyɛsu folo ʋuunaanigɔ (40) ta kpidi ʋuunaanigɔ (40).
176	GEN 7:16	Ti ɠilagilagi lɛɛni ma zinɛ ma zaa, ti ma ziiti kɛʋelei, eɠɛʋelei GALA ge ma levei veeni la Nowe ya. Naa ʋolu Ɠɔoɠɔ GALAGI daaɠuluni ma.
177	GEN 7:17	Ziɛve golai yɛni lɛɛzu, é kɛ ga folo ʋuunaanigɔ (40) eteai zu. Ziɛi veni, é keingi wuzeɠe zooi maazu.
179	GEN 7:19	Ziɛi ɠɛni lɛɛzu su nɔ, eyɛsu é gize ɠaaɠoozagiti pɛ maaɓɔɔle geeɠɔlɔgi wu eteai zu ná pɛ.
182	GEN 7:22	Nii kpein é ɠɛni yɛnvuzu zou vɔɔi ma, naa pɛ ge zaani.
183	GEN 7:23	GALA ge fuluanii kpein suwuɠaaleʋeni zooi ɠa: nuɓusɛi ta suaiti, naa ʋɛɛ kpokpo ganiiti ta wɔniiti ba. Nowe nɔ ɠa é yɛni ná, ta niiti ti ɠɛni ba keingi zu.
184	GEN 7:24	Ziɛvegi yɛni eteai zu eyɛsu folo ungila folo ʋuulɔɔlugɔ (150).
185	GEN 8:1	GALA ge ɠizɛni Nowe zu, ta dɔɓɔ zuaiti pɛ, ta toganiiti ti ɠɛni ba keingi zu. GALA ge fiilɛi leʋeni eteai zu, ziɛvegi tɔɔzeini ga maa ɗa yei.
187	GEN 8:3	Ziɛi maa ɠɛni yeizu vaa, é ɗa zeɠe zooi ma, maalɔini folo ungila folo ʋuulɔɔlugɔ (150) laawu.
189	GEN 8:5	Ziɛi ɠɛni ba maa ɗa yei, eyɛsu alugi ʋuusiɛi. Naama alugi ma volo mɔungi, gizeiti tɔungiti ti ɠulani kɛlɛma.
191	GEN 8:7	É kalawɔnii ʋilɛni, naa ɠula, é ɗa li, é ɗa ɠaaɠale ma, ná zeizu ɠɛ mɔinmɔin. É ná maaɓɔunni, eyɛsu ziɛi vɔ zooi ɠa.
192	GEN 8:8	Naa ʋolu é poopogi ɓalaa ʋilɛ, ga é pɛtɛ, ni ziɛi maayeiɗa zooi ɠa.
193	GEN 8:9	Kɛlɛ poopogi la ɠɛni zeizu zɔlɔɔni, é ɠaleni ma pɔ bɛ keingi zu, mazɔlɔɔ ziɛi ɠɛni zooi ma ná pɛ. Nowe yeeɠulani, é so, é tɛ ɓɔɠɔ ma keingi zu.
194	GEN 8:10	É folo lɔfela ɠiligaa maaɓɔunni mɔnɔ, naa ʋolu é yeeɓeni poopogi ʋa, é ɠula keingi zu.
205	GEN 8:21	Ɠɔoɠɔ GALAGI zalaɠai naama maku nɛɛnɛgi mɛnigai ma, é boni yiimaʋɛ, é ɠɛ ma: «Gè la mɔ eteai ɠotoa nui maaʋele ma, anɛɛ ɓalaa nui yiimaʋɛ ma ɠisiɛiti togɛ faa ɲɔi ʋa, é lɔɔzei ma loungo ziɛgi zu ma. Gè la mɔ fuluanii kpein koloɠologa, eɠɛʋelei gè kɛai la.
207	GEN 9:1	GALA ge tuya looni Nowe ʋɛ ta ná-doun zunuiti, é ɠɛni ti ma: «À ɓuɠu, wo mɔin, wo eteai laave.
208	GEN 9:2	Fuluaniiti kpein ta lua wo ʋa, ti zasu ɗa ɓali, é zo suaiti ma ti eteai zu, é li wɔniiti pɔ, ta kpokpo ganiiti, ta kaleiti: ti pɛ feeʋɛ wo ya.
210	GEN 9:4	Anɛɛ naa ʋe, à mina suai mi, ma ɲamai ʋa yɛ su, naa ɠa é ga zɛnvui.
211	GEN 9:5	À suɠwɛɛ ɓalaa ga wo-ma ɲamai ɠa é ga wo-yɛnvui, nà maaɠaazaɠabo. Nà maaɠaazaɠabo naa ma, nii nɔpɛ a nu ɲamai ʋu, é ɠɛni ga suai, ɓaa é ɠɛni ga nui. Nà nui ɠilagilagi ɠaazaɠa kɛɛɠɛloin ma ɲamai ma.
216	GEN 9:10	naa ʋɛɛ nii kpein ba é vulua wo ɠoba, wɔniiti, toganiiti, ta dɔɓɔ zuaiti, wa niiti kpein wo ɠulaai keingi zu ʋɔɔma, ti ʋaazu yɛnvuzu eteai zu.
218	GEN 9:12	GALA ge ɠɛni ma mɔnɔ: «Nii ɠa é ga minazeɠegi ma ʋoogi eyɛsu ɠɔ, gè kɛɛzu ade yɔɠɔzu, nà-o, wa-o, ta anii kpein ti yɛnvuzu wo ɠoba.
219	GEN 9:13	Gè nà-kpazamanamanagi zeiɗa tonaɓiingi zu, toɠa ɠɛ ga minazeɠegi ma ʋoogi gi yɔɠɔzu gá eteai.