21	GEN 1:21	Wakan Arumgimis ki uḵ dhan to kun ’kon e ḵumma/ yi’de/ kun caaca mo dhala ris to kun ’kon ki e kun ḵalki ya ka bor mo, uni kun ’tu’dki yi’de/ isi ki em buni kun ’ko uni kuku/ mo, dhala ris ’dii kun ’kan ma bi mo isi ki em buni kun ’ko uni kuku/ mo. Dhali Arumgimis ki p̱ar a’di e mo ki a’di ’bora’bor mo.
27	GEN 1:27	Wakan Arumgimis uḵki wathi/ en’thi/ mo ki jamas pitiŋ gana/ mo, ki jamas ma Arumgimis gana/ mo tani a’di i/uḵkina a’di a’di mo. A’di jin ta wathiŋ gwaṯẖ mo dhali a’di jin ta wathim ’bomi mo, uni i/uḵkina a’di mo.
32	GEN 2:1	Wakan momis dhali mony’cesh uni ’baarkunu mo dhali aris to kun ’koni bwaman uni mo.
34	GEN 2:3	Wakan Arumgimis ki ’bora cim ma pesu/ mii mo dhali kar a’di ki she/ ki dhelel dhelel mo, haali/ eya cim ma pesu/ yan mo tani Arumgimis ki si is mo ’pena ris tom piti kun miikina a’di ki uḵ jin uḵkina a’di to mo.
50	GEN 2:19	Wakan ’pena ’cesh mo tani Tap̱a Arumgimis ki uḵa ris tombwaasho mo dhali aris ’dii kun p̱en e momis mo, dhali a’di ki ’doyu uni wathimpa en’thi/ mmohil mo ki a’di midi yer uni gway mo, dhali ma gway gunn kun yerkina wathi/ to/e kun uḵkunu mo kun ’ko ki e mo tani a’di ita gway kun yeru uni mo.
51	GEN 2:20	Wathi/ en’thi/ ki c̱i aris to/e gway ’baar mo dhali aris ’dii kun p̱en e momis mo dhali aris tombwaasho mo. Hili gom wathi/ en’thi/ mo tani wathi/ p̱iyi’d jin gamkunu jin midi woṯẖ a’di, a’di jin midi gam gom a’di mo.
52	GEN 2:21	Wakan Tap̱a Arumgimis ki dhal mo jin ’ce’du e kagahara mmobiṯa p̱o/ wathimpa en’thi/ mo, dhali ki a’di di’di mmo/ish e mo tani a’di bu’thki’da simaŋ gwar ṯal ’de/ ’peni a’di mo dhali a’di ki ’dap̱ki buŋgwar is ki shuman ’twa/ mo.
54	GEN 2:23	Dhali yan’ko’d wathiŋ gwaṯẖ ki o gwo mo ki: Hayyiye ayaase ita’da simam pema dhali buŋgwar is ki shuman is pema. Ayim minu yuḵ gway ka A’bom mo, haali/ ayim a’di bu’thkunu ’peni Wathiŋ Gwaṯẖ mo.
62	GEN 3:6	Wakan ka ’bom ki p̱ar cwa e ki a’di ’bora’bor mmoshwa mo, dhali a’di ’kunya’kuny e jis/em piti mo, dhali cwa a’di iminu o bwa mmokar jan ṯal ’de/ mmoyuḵa yuḵ mo tani ayim ki bu’th maman cwa mo dhali shwa a’di, dhali ayim si’da/ ki c̱iki a’di ka kaṯẖim piti mo, dhali a’di shwaki’d mo.
85	GEN 4:5	hili goma Kayiin dhali tom piti kun c̱ina a’di ki me’d mo tani a’di diki c̱iya hirdhe/ mo be. Wakan a’di shwakin ma Kayiina nyor kagahara mo dhali jis/em piti bushura/ bushur mo.
87	GEN 4:7	Waḵki/ /e mini mii ki ’bore/ mo tani a/e minu diki mish bu’th mowa? Dhali waḵki/ /e diki mii ki ’bore/ mo tani miinthus a’di wup̱ki’d e ’twaŋkal gu’b mo. A’di ona bwa ki /e mo, hili /e mini mii ta tap̱a ap̱o/ a’di mo.
95	GEN 4:15	Dhali yan’ko’d Tap̱a ki o a’di gwo mo ki: Midi wakan yisa. Waḵki/ jan ṯal ’deŋ kamu/ midi ’kosha Kayiin jwa mo tani mori’c midi di ap̱o/ a’di me’di pesu/ mo. Dhali Tap̱a ki c̱iya Kayiin jamas mo, isi ciki/ ki a’din ’de/ yin jin midi ya ap̱o/ a’di midi diki ’kosh a’di jwa mo.
104	GEN 4:24	Waḵka Kayiin ri’ckunu me’di pesu/ mo tani ka jiŋ gana/ si’da/ Laamak minu ri’c me’di iss ’kwanimpa ikwara i’ce’dka ’kume’d i’ce’dka pesu/ mo.
108	GEN 5:2	Wathiŋ gwaṯẖ dhali wathim ’bomi a’di ki uḵ uni mo dhali a’di ki ’bor uni mii mo dhali a’di ki yuḵ uni gway ki ’kwani en’thi/ mo me’d jin uḵkina a’di uni mo.
145	GEN 6:7	Wakan Tap̱a a’di ki o gwo mo ki: Aha/ mina dhi’th ’kwani sho’k mo uni kun uḵka/ ’peni bwam/e ga ’cesh mo, ’kwanimpa en’thi/ dhali tombwaasho dhali to kun parana ’cesh dhali ’dii kun p̱en e mis mo haali/ aha/ diṯa bwa mo ki aha/ i/uḵkina uni mo.
159	GEN 6:21	Wakan /e mini ḵala ris tonṯe/ ’baar kun ’kona e ki she/ ki she/ uni kun shwanu mo, dhali dhuyi uni themes mo, dhali a’di midi ta tonṯe/ jin minu mii ki /e mmoshwa mo dhali gom uni mo.
193	GEN 8:9	Hili gurko/ diki gam moŋkamu/ jin mina a’di kar sho’k piti icine/ mo, dhala yim doḵki’d ka nyaŋ’ko’d e a’di e bwam ma ḵur mo haali/ yi’de/ di’d naskina/ e bwam/e gi mony’ceshi ’baar mo. Wakan a’di ki kar me’d piti mo dhali budha yim mo dhali susa yim bway bwam ma ḵur nyaḵki a’di mo.
195	GEN 8:11	Dhali gurko/ p̱u’dki’d ka nyaŋ’ko’d i a’di mom’pimpili/ mo dhali hili mo mo ma, ayim ḵalki’d e ’twam piti ’cemen jip̱i/ cwa seṯuun jin ta’da go’d go’d mo jin daḵa ’ciṯẖkunu ki she/ mo. Wakana Nuuh a’di mishki mo mo ki yi’de/ a’di guki’da wuuy ’peni mony’cesh mo.
202	GEN 8:18	Wakana Nuuh yaki’d ka pije/ mo dhali iya/m piti mo dhali ash mo dhali up̱ gi iya/ nyaḵki a’di mo.
244	GEN 10:9	A’di ta wathi/ jin c̱a’bki dem dem mmopar ka yempa/ ibwambori Tap̱a mo. Gom gwo gi wakan mo tani a’di onu gwo mo ki: Wathi/ jin waga Nimruud jin c̱a’bki dem dem ibwambori Tap̱a mo.
275	GEN 11:8	Wakan Tap̱a ki c̱eker uni bwa e mo ’baar mo ’peni mun ntagi bwam/e gi mony’ceshi ’baar mo, dhali uni dhalki ’peŋkuman bampa/ ’pen ki dar gi mo jin ’kona uni ki ’ka a’di ’kup̱ mo.
276	GEN 11:9	Wakan gway piti yuḵu gway ka Baabil mo haali/ Tap̱a tuŋkurki ’twa/ gi mony’ceshi ’baar mo is mo, dhali ’peni mun mo tani Tap̱a ki c̱eker uni bwa eya ris bwam/e gi mony’ceshi ’baar mo.
303	GEN 12:4	Wakan Abraam yaki’d mo, me’d gwo jin ṯorkina Tap̱a a’di mo dhala Luuth yaki’d nyaḵki a’di mo. Dhala Abraam ’kokini yili issi kwara i’ce’dka ḵarpa’c mo me’d jin yakina a’di ’peni Pan Haraan mo.
306	GEN 12:7	Dhali yan’ko’d Tap̱a ki piya Abraam i is mo mmo/o gwo mo ki: E emen pini mo tani aha/ mina c̱i uni mony’cesh yansan mo. Wakan a’di ki nyaŋ agwaṯa/ jin miinuwa bas gom Tap̱a mo a’di jin piki a’di i is mo.
309	GEN 12:10	Dhali ṯe/ ’koshki’d kagahara mo e bampa/ mo. Wakan Abraam yaki’d ka luŋgu’b e Pam Masir mo ki ya yilkina/ mo e mun mo, haali/ ṯe/ shina ’kosh ki shi/ e bampa/ mo.
317	GEN 12:18	Wakana P̱irawn yuḵki’da Abraam mo dhali o a’di gwo mo ki: Atinta tan jin miina /e aha/ kan mo? Atinta dina /e ki ṯor aha/ gwo ka yim ta ashin mo?
318	GEN 12:19	Dhali /e ki ’cur gwo o ka yim ta ’bwahan mo. Wakan aha/ de budha yim mo mmo’taki ta ashim pem mo. Shwane/, ashim pini a’dan mo. Susi a’di mo, dhali iiyi mo.
320	GEN 13:1	Wakan Abraam yaki’d ka gagamis ’peni Pam Masir mo a’di uni ki ashim piti nyaḵki a’di mo dhali aris to kun tana a’di mo dhala Luuth si’da/ nyaḵki uni mo eya Januub mo.
325	GEN 13:6	Ki a’di wakan mo tani bampa/ mol uni thip̱ mo uni su/ mmonyaḵ uni ’ko mo mmonṯal ’de/ mo, haali/ tom buni kun takina uni mo tani uni tana ris ka ris kagahara mo. Wakan uni moli nyaḵ ’ko mo mmonṯal ’de/ mo.
328	GEN 13:9	Dina bampa/ isi ’baar mo ki di ibwambori /e mo ’taa? Ḵwa/ki is pini bwa mo ’peni aha/ mo ma. Waḵki/ /e mini bu’th ’ban ma biny cam mo tani wakan aha/ mina ya ki ’ban ma bim poros mo, walla waḵki/ /e mini bu’th ’ban ma bim poros mo tani wakan aha/ mina ya ki ’ban ma biny cam moyi.
330	GEN 13:11	Wakan mo Luuth kwanyki’d gom is piti aris mo ’baar mo jin ta embul ma Uurdun mo, dhala Luuth yaki’d mo ’kup̱ ki mom’pesho’k mo. Wakan uni ḵwa/ki is buni bwa mo ka rem ’kup̱ mo.
335	GEN 13:16	Aha/ mina dhu emen pini kun mini pi ’peni /e mo mmota aris me’d emen gi bu’da’cesh gi mony’cesh mo. Wakan mo tani waḵki/ wathiŋ kamu/ mishi emen gi bu’da’cesh gi mony’cesh deŋ e mo tani emen pini kun mini pi ’peni /e mo si’da/ minu mish deŋ e mo be.
337	GEN 13:18	Wakan Abraam ijoc̱ki gu’b burrinyem piti mo dhali a’di p̱u’dki’d mo dhali c̱a’bki’d mo e ’ko’d gwar gi dhan cwa jin wana e ka ’kwaṯṯan ma Mamra kun ’kon e Pa Habruun mo. Dhali e mun mo tani a’di ki nyaŋa gwaṯa/ jin miinuwa bas gom Tap̱a mo be.
343	GEN 14:6	dhali ’Kwani Hur e Wosh Si/iir buni mo ntagi Pam P̱aran mo e mo jin di’d e gwayu/ gi mombwaasho mo.
348	GEN 14:11	Wakan mo tani uni kun ta ’kup̱ gi uni mo tani uni ki budha ris to kun tana ’Kwani gi Pan Saduum mo dhali ’Kwani gi Paŋ Gamuura mo dhali aris tonṯem buni gom bway mo, dhali uni iikini bway buni mo.
365	GEN 15:4	Dhali hili mo mo ma, gwo gi Tap̱a p̱u’dki’d mo e a’di mo mmo/o gwo mo ki: Wathi/ yan midi ta amanḵal mal pini mo yisa. Ya/m piniŋ gana/ a’di imidi ta amanḵal mal pini mo be.
366	GEN 15:5	Dhali a’di suski a’di mo ka pije/ mo dhali oki gwo mo ki: Hilki /e mo ’kup̱ki momis mo, dhali deŋi arisa cul e mo waḵki/ /e mini mish uni deŋ e mo. Dhali yan’ko’d a’di oki a’di gwo mo ki: Wakan be, emen pini kun mini pi ’peni /e mo tani uni imini ’ko mo be.
385	GEN 16:3	Wakan ’ko’di Abraam c̱a’bki’d mo e Paŋ Kanaan mo ki yili ’kume’d mo tani Saray jin ta asha Abraam mo tani bu’thki’da Haagar jin ta ji gi Pam Masir mo dhali jin ta nyarany c̱iŋkina/ ma yim mo dhali c̱iki a’di ka Abraam jin ta’da kaṯẖim piti mo mmota ash mo.
411	GEN 17:13	A’di jin dho’thkunu mo e gu’b pini mo dhali a’di jin yolkunu mo ka guurush pini mo tani a’di iminu mii i’ciṯẖa/ munyjal yis mo be. Wakan gwom pem jin gamka/ me’d mo tani a’di midi di e shuman is pini mo gwo jin gamu me’d mo jin midi di ki sule/ sule/ mo be.
430	GEN 18:5	ki aha/ ki ya guwa gabul maaŋḵuthu’d mo ki um mini ye is bum ’ba/ mo dhali ŋ’ko’d mo tani um mini mish iim pe mo – haali/ um p̱u’dkin mo e c̱iŋkinam bum mo. Wakan uni oki gwo mo ki: Miiyi me’d jin okina /e mo mo ma.
447	GEN 18:22	Wakan mo tani ’kwaniŋ gwas gwansan ṯu’kkin mo ’peni maṯṯaan mo dhali iikin mo ’kup̱ ki Pan Saduum mo. Hili Ibrahiim doshki’d mo naskina/ ibwambori Tap̱a mo.
449	GEN 18:24	Waḵki/ uni gun mii miiŋḵar/e mo mini ’taki ’ko iss ’kwanimpa su/ i’ce’dka ’kume’d mo ibwaman ’peŋkuman bampa/ mo tani wakan mina /e ’taki ’ce’d mo sho’k mo dhali diki ’taki ’tash a’di ’twa/ mo gom uni gun mii miiŋḵar/e mo kun ’koni iss ’kwanimpa su/ i’ce’dka ’kume’d mo ibwaman a’di mo ’taa?
451	GEN 18:26	Dhali Tap̱a oki gwo mo ki: Waḵki/ aha/ mina ’taki gam e Pan Saduum mo uni gun mii miiŋḵar/e mo kun ’koni iss ’kwanimpa su/ i’ce’dka ’kume’d mo ibwaman ’peŋkuman bampa/ mo tani aha/ mina ’tash aris mo yani ’baar mo ’twa/ mo gom gway buni mo be.
453	GEN 18:28	Waḵki/ uni imudhe’d ’peni uni kun ’koni iss ’kwanimpa isu/ i’ce’dka ’kume’d mo kun mii miiŋḵar/e mo tani mini ’taki aṯẖ mo, a/mina /e ’ce’d ’peŋkuman bampa/ sho’k mo ka ’bimbil mo mmo/aṯẖa ’kwani imudhe’d mowa? Dhali a’di oki gwo mo ki: Aha/ mina diki ’ce’d a’di sho’k mo waḵki/ aha/ mina ’taki gam uni kun ’koni iss ’kwanimpa su/ i’ce’dka mudhe’d mo mmun mo be.
454	GEN 18:29	Dhali doḵ/e a’di ki ṯor a’di gwo mo dhali o gwo mo ki: Waḵki/ uni ’koni iss ’kwanimpa isu/ kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni iss ’kwanimpa isu/ mo tani aha/ mina diki mii a’di mo.
455	GEN 18:30	Yan’ko’d a’di oki gwo mo ki: Ayy Tap̱a dhalku/ anyor ki shwa mo ma, dhali aha/ mina ṯor gwo mo. Waḵki/ uni ’koni iss ’kwanimpa ’de/ i’ce’dka ’kume’d mo kun minu ’taki gam mmun mowa? Dhali a’di thoḵki gwo mo ki: Aha/ mina diki mii a’di mo tani waḵki/ aha/ mina ’taki gam uni kun ’koni iss ’kwanimpa ’de/ i’ce’dka ’kume’d mmun mo.
456	GEN 18:31	A’di oki gwo mo ki: Hili mo mo ma, aha/ bu’thkina a’di ap̱o/ is pem mo mmoṯor gwo e Tap̱a mo. Waḵki/ uni ’koni iss ’kwanimpa ’de/ mo kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni iss ’kwanimpa ’de/ mo tani aha/ mina diki ’ce’d a’di sho’k mo.
457	GEN 18:32	Yan’ko’d a’di oki gwo mo ki: Ayy Tap̱a dhalku/ anyor ki shwa mo ma, dhali aha/ mina gwo ṯor doḵ/e mo jasi me’d ’deŋ gana/ mo. Waḵki/ uni ’koni ’kume’d mo kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni ’kume’d mo tani aha/ mina diki ’ce’d a’di sho’k mo.
461	GEN 19:3	Hili a’di ṯirrishki uni ki gwom ’bi’thga/ mo. Wakan uni ṯu’kki mo ’peni bway buni e a’di mo dhali cic̱ki gu’b piti mo. Dhali a’di miiki uni dhan mo jin shwanu to mo dhali shunki maaŋḵuthu’d jin miinu ki dar ka cumaṯ mo dhali uni ishwakin mo be.
470	GEN 19:12	Yan’ko’d ’kwaniŋ gwas okina Luuth gwo mo ki: Ṯal ’deŋ kamu/ takina /e imahana? Iya/ kun ta imar mo ’taa? Iya/ mo ’taa? I’bwa/ mo ’taa? Walla ma a’diŋ kamu/ jin takina /e mo e ’peŋkuman bampa/ yan mo tani susi uni ka pije/ mo ’peni mo yan mo
494	GEN 19:36	Wakan be uni su/ kun ta i’bwa/ ma Luuth mo uni ’kokin mo ki uc̱i ibwa mo ki com buni mo be.
504	GEN 20:8	Wakan be Abimaalik la cuki mis mo mon’thamo/ mo dhali a’di yuḵki imanmiiya ṯu’c piti i’baar mo dhala ris to gwansani ’baar mo iṯorkina a’di mo e ’cem buni mo. Dhali ’kwaniŋ gwas gwansan uni ḵo/kina ḵo/ is kagahara mo.
578	GEN 23:6	Ciḵi aman gwo mo ma. Tap̱am pem /e ta wathi/ jin c̱a’bki dem dem ibwaman aman mo. Kani jwam pini e mo jin mina /e ikwany mo e mo gi jis jwam bam mo. Wathiŋ kamu/ yisa midi non /e ’peni mo gi jis jwam piti yisa, walla midi non /e ’peni mmokan jwam pini yisa.
580	GEN 23:8	Dhali a’di ki o uni gwo mo ki: Waḵki/ um ona bwa ki aha/ mina kan jwam pem ’peni jis/em pem mo tani ciḵi aha/ gwo mo dhali ’thoyi Ip̱ruun jin ta ya/ ma Suuhar mo
597	GEN 24:5	Dhali c̱iŋkina/ ki o a’di gwo mo ki: Wariba/ a’bom midi diki hayaa/ gwo e mmobaṯẖaa/ e bampa/ yan mo. Waḵki/ wakan mo tani ya/m pini miga/ mii sus mo ka nyaŋ’ko’d e bampam pini jin yayina /e ’peni nycine/ mo?
613	GEN 24:21	Wathi/ ki guwa yim ki e ki e ma ’thime/ ki shwamm mo mmoda/ar gwo waḵki/ Tap̱a thoson moyam piti mo walla yisa.
618	GEN 24:26	Wathi/ ki goŋ ’kup̱ piti ka luŋgu’b mo dhali luŋ Tap̱a mo be.
622	GEN 24:30	Dhali a’di ki p̱ar tome’d e mo dhali gurany ’per eya bi gi ’bwaham mo dhali me’d jin ciḵkina a’di gwo gi ’bwaham ga Rip̱ka mo ki: Wathi/ ṯorki’da ṯor ki aha/ mo tani a’di yaki’d mo e wathi/ mo. Dhali hili mo mo ma, a’di doshki’d nyaḵka kalman e jis yi’de/ jin kasha e mo be.
631	GEN 24:39	Dhali aha/ ki o tap̱am pem gwo mo ki: Wariba/ a’bom midi ushu mmoyayu/ nyaḵki aha/ mo.
657	GEN 24:65	dhali o c̱iŋkina/ gwo mo ki: Wathi/ jana idi’di maṯṯaan mo a’di jin yayi’d mmogam ana ’kup̱ mo? C̱iŋkina/ ki thoḵ a’di gwo mo ki: A’di ta tap̱am pem mo. Wakan ayim ki bu’th burrinyeŋ ’kup̱ piti dhali kum is piti mo be.
679	GEN 25:20	Is/hak a’di i’kokina yili issu/ mo ka dhan piti me’d jin bu’thkina a’di aRip̱ka ki ash mo a’di yim jin ta ’bwa/ ma Baṯu/iil mo jin ta Wathi/ Araam gi Pam P̱addaan/araam jin ta ’bwah ma Laabaan Wathi/ Araam mo be.
681	GEN 25:22	Dhali uc̱i su/ gwansan uni gurunyki is e bwa ma yim mo, dhali ayim ki o gwo mo ki: Waḵki/ a’di wakan mo tani, ata si’da/ idika/ ki e mo? Gom gwo gi wakan mo tani ayim yaki’d mo dhali ’theḵ gwo yan e Tap̱a Arumgimis mo.
727	GEN 26:34	Me’d jin ’kona yili Iisu i issu/ mo tani a’di bu’thki ash mo jin yuḵu gway ka Yahudiit jin ta ’bwa/ ma Biiri jin ta Wathi/ Hiṯẖṯẖa mo dhala Basmah jin ta ’bwa/ ma Iiluun jin ta Wathi/ Hiṯẖṯẖa mo.
738	GEN 27:10	Dhali /e mini ḵalki a’di ki cim mo mmoshwa mo. Wakan ki a’di midi ’bor /e mii mo nṯwa/a/ ki a’di diki wu mo.
740	GEN 27:12	Wariba/ ababa midi tayaa/ is is ki me’d mo, dhali aha/ mina e waki aha/ miina a’di ka maḵ mo dhali aha/ mina ḵal monyjee ap̱o/ is pem mo, yisa mom’bor mii mo.
746	GEN 27:18	Wakan a’di yaki’d bway gu’b gi com mo, dhali o a’di gwo mo ki: Ababam pema, dhali a’di ki thoḵ a’di gwo mo ki: Aha/ dina imahan mo. Ki /e aja a’dun mo? ya/m pem.
750	GEN 27:22	Wakan aYakuub a’di yaki’d mo mmo’disha Is/hak is mo a’di jin ta com mo, a’di taki a’di is is ki me’d mo dhali o gwo mo ki: ’Twa/ a’di ita jim ma Yakuub mo, hili me’d uni ita me’d ma Iisu mo be.
753	GEN 27:25	Dhali yan’ko’d a’di ki o gwo mo ki: Ḵali a’di ki aha/ mo ki aha/ mina ’ka shum tombwaasho gi ya/m pem mo dhali ’bor /e mii mo. Wakan a’di ḵalki a’di a’di mo dhali a’di ’kaki a’di mo dhali a’di ḵalki a’di yimana mura’th jin ḵa/u ki ŋahŋah mo dhali a’di p̱iki a’di mo be.
755	GEN 27:27	Wakan a’di p̱u’dki’d ki ’dishe/ mo dhali p̱i a’di ’twa/ mo dhali a’di jiḵki’da shim burrinyem piti mo dhali ’bor a’di mii mo dhali o gwo mo ki: Hili yisawa/, ashim gi ya/m pem mo ma isi me’da shim gi wathi/ jin yayi’d ’pena pije/ mo, a’di jin ’borkina Tap̱a mii be.
774	GEN 27:46	Yan’ko’d aRip̱ka ki owa Is/hak gwo mo ki: Aha/ ’baka/ mondiki/em pem e mo haali/ aris up̱ gi ’Kwani gi Pan Hiṯẖṯẖa mo. Waḵka Yakuub midi mash jan ’de/ ’peni up̱ gi Pan Hiṯẖṯẖa me’d uni up̱ gwansan kun ’kon e bampa/ yansan mo, dhali shim miim ’boro’da ta midi di gom mondiki/em pem mo?
779	GEN 28:5	Wakan Is/hak hashki’da Yakuub ’peni a’di mo dhali a’di yaki’d mo e Pam P̱addaan/araam mo eya Laabaan jin ta ya/ ma Baṯu/iil mo jin ta Wathi/ Araam a’di jin ta’da kam ma Rip̱ka mo a’di jin ta KoYakuub dhala Iisu mo.
782	GEN 28:8	Wakan Iisu p̱arki mo e mo ki up̱ gi ’Kwani gi Paŋ Kanaan ’koki ’bora Is/hak bwa mo a’di jin ta com mo.
792	GEN 28:18	Wakan aYakuub cuki mis mo mon’thamo/ ka ’tum mo dhali bu’th wosh jin isha a’di ’ba/ mo dhali thum a’di ki mis mo mmota tiŋkiliŋ mo dhali wol a’di ayini ’kup̱ mo.
794	GEN 28:20	Yan’ko’d aYakuub thulki gwo me’da ap̱o/ mo mmo/o ki: Waḵki/ Arumgimis midi di e aha/ mo dhali kar aha/ e bway pem yan jin yaka/ iya mo dhali c̱iyaa/ tonṯe/ mmoshwa mo dhali burrinye/ mmohithi is mo,
816	GEN 29:20	Wakana Yakuub miiki’da ṯu’c ki yili pesu/ goma Rahiil mo dhali uni wana mo i e ka cim midi diki ta rash rash gom mo/en jin enkina a’di ayim mo be.
818	GEN 29:22	Wakan aLaabaan tulki’da aris ’kwani gi mo c̱aan isi monṯal ’de/ mo dhali shwa to jin yuḵuwa yuḵ ka tul ’kup̱ mo.
826	GEN 29:30	Wakan aYakuub yaki’d mo eya Rahiil mo si’da/ dhali a’di enki’da Rahiil mmobola Le/ah e mo, dhali a’di miiki’da Laabaan aṯu’c mo gom yili pesuŋ kamu/ mo be.
835	GEN 30:4	Wakan ayim c̱iki a’di aBilhah jin ta nyara/ c̱iŋkinam piti mo mmota ash mo dhali aYakuub a’di yaki’da yim mo.
847	GEN 30:16	Ka Yakuub p̱u’dki’d mo ’peni bunto mom’pimpili/ mo tani aLe/ah yaki’d ka pije/ mo mmogam a’di ’kup̱ mo, dhali o a’di gwo mo ki: /E mini mii yayu/ aha/ shwane/ mo haali/ aha/ yolkina /e mo ki maman cwa ma lup̱p̱aah jin ta jim ma ya/m pem mo. Wakan a’di ishki’d nyaḵka yim mon’thiny c̱aan mo.
849	GEN 30:18	Le/ah ki o gwo mo ki: Arumgimis c̱iki aha/ tom pem jin karka/ ka bara ṯu’c mo haali/ aha/ c̱ikina c̱iŋkina/ nyaram pem ka kaṯẖim pem mo. Wakana yim ki yuḵ a’di gway ka Yassaakar mo.
851	GEN 30:20	Dhali yan’ko’da Le/ah ki o gwo mo ki: Arumgimis a’di tashaa/ ki tom ’boro’d jin ḵamu/ aḵam mo. Shwane/ akaṯẖim pem midi taḵ aha/ mo haali/ aha/ dho’thkina a’di iya/ kun ’kon ma p̱o/ ipe’de/ mo. Wakan ayim ki yuḵ a’di gway mo ka Sabuluun mo be.
858	GEN 30:27	Hila Laabaan o a’di gwo mo ki: Waḵki/ /e mini dhalaa/ bway mmo/o gwo gi wakan mo si’da/ tani aha/ da/arkina gwo mo ki to jin mishu ki jamas mii mo tani Tap̱a a’di ’borki aha/ mii gom /e mo be.
862	GEN 30:31	A’di ki o gwo mo ki: Atinta a’di imiga/ c̱i /e mo? AYakuub o gwo mo ki: /E mini c̱i aha/ toŋ kamu/ yisa. Waḵki/ /e mini mii to yan gom aha/ mo aha/ mina doḵ/e c̱i ama’diny ḵa’bal pini ashon dhii/i’d mo dhali ta amandhu uni mo.
882	GEN 31:8	A’di oki gwo mo ki: Waḵki/ min dhudhunya/ mini dho’th mo tani uni a’di imini ta kum pini mo kun mina /e igam ki ji gi miina /e to mo, dhali arisa ma’diny uni ka jiŋ gana/ uni idho’thkina dhudhunya/ mi mo. Dhali yan’ko’d doḵ/e a’di ki o gwo mo ki: Waḵki/ mi kun ’beresa is ki ’beres mini ’ko mo tani uni a’di imini ta kum pini kun mina /e igam mo ki ji gi miina /e to mo, dhali arisa ma’diny uni ka jiŋ gana/ uni idho’thkina ’beres is mi mo.
891	GEN 31:17	Wakan aYakuub cuki mis mo dhali dhu iya/ dhali i/ash e kalman mo.
907	GEN 31:33	Wakan aLaabaan cic̱ki gu’b burrinye/ ma Yakuub mo dhali gu’b burrinye/ ma Le/ah mo dhali gu’b burrinye/ gi up̱ c̱iŋkina/ su/ gi i’bwah mo, hili a’di diki gam uni mo. Dhali a’di yaki’d ka pije/ mo ’peni gu’b burrinye/ ma Le/ah mo dhali cic̱ jima Rahiil mo be.
909	GEN 31:35	Dhali ayim ki o com gwo mo ki: Tap̱am pem midi mii dhalka nyor ki mii shwa mo haali/ aha/ mola cu ibwambori /e mo haali/ bway gi up̱ mo tani a’di di’da p̱o/ aha/ mo. Wakan a’di ŋap̱ki’da ŋap̱ ki bur bur mo hili a’di diki gam tomp̱inycon gi gu’b piti mo.
916	GEN 31:42	Waḵki/ a’di midi ’taki diki ta Arumgimis ma babam pem mo a’di jin ta’da Arumgimis ma Ibrahiim mo dhali a’di jin ḵo/kin ma Is/hak mo waḵki/ a’diŋ gana/ yan midi ’taki diki di ka ’ban pem mo tani /e ka jiŋ gana/ mini ’taki hash aha/ mo me’d ’teŋ gana/ mo. Arumgimis mishki isa nyor pem jin wo’c aha/ she/ mo dhala ṯu’c gi me’d pem mo dhali ḵucur /e ka en’thiny mo.
919	GEN 31:45	Wakana Yakuub bu’thki wosh mo dhali thum a’di ka tiŋkiliŋ mo be.
922	GEN 31:48	Dhala Laabaan ki o gwo mo ki: Wosh su’k yan mo tani a’di midi ṯor gwo e bwaman /e dhali aha/ mo ’pena tee yan shwane/ mo. Gom gwo gi wakan mo tani a’di yuḵki mo yan gway ka Jal/iid mo be.
924	GEN 31:50	Waḵki/ /e mini tham i’bwa/m pem to mii ap̱o/ mo walla /e wari mini bu’th up̱a tiya mmop̱ana’d i’bwa/m pem isa p̱o/ mo tani, ba wathiŋ kamu/ p̱iyi’d mmonyaḵ di ki ana mo mmomii mo, hili, kayi gwo e mo, Arumgimis a’di ita’da amanṯor gwo e bwaman /e dhali aha/ mo be.
926	GEN 31:52	Wosh su’k yan a’di ita’da man/o gwo mo dhali atiŋkiliŋ a’di ita’da man/o gwo mo ki aha/ mina diki pe ’kuwosh su’k yan mo e /e mo, dhali /e si’da/ mini diki pe ’kuwosh su’k yan e aha/ mo gom mo jin ’koshuwa ’kosh mo be.
927	GEN 31:53	Arumgimis ma Ibrahiim dhali Arumgimis ma Nahur a’di jin ta’da Arumgimis ga babam buni mo dhalki a’di dwall gwo i bwaman ana mo. Wakana Yakuub thulki gwo me’da p̱o/ mo ki moŋḵo/ is ma babam piti ka Is/hak mo.
931	GEN 32:3	Dhali ka Yakuub mishi uni mo tani a’di oki gwo mo ki: Uni gwansan ita ’kwani ma mee ma Arumgimis mo. Wakan a’di yuḵki mo c̱aan gway mo ka Mahanaayim mo.
942	GEN 32:14	Wakan a’di ishki’d imaṯṯaan mon’thiny mo dhali a’di ki bu’th ’peni to kun tana a’di mo to jin c̱inu ki me’d mo goma kam ka Iisu mo.
950	GEN 32:22	Wakan to kun c̱inu ki me’d iikin mo mmoshu a’di bway mbwambor mo dhali a’di ki is piti ishki’d mo mon’thiny yin e gu’b burrinyem piti mo.
959	GEN 32:31	Wakan aYakuub yuḵki mo c̱aan gway mo ka P̱anu/iil mo mmo/o gwo mo ki: Haali/ Arumgimis mishkika/ jis/em piti ka ḵarambor mo dhali hili mondiki/em pem a’di ’tashkunu ’twa/ mo.