1	GEN 1:1	Au karena, God, mara ma dobu i vitupui.
2	GEN 1:2	Dobu kwakwavina ma eḡa aiwai ita mamae. Gimtona, gabinou i purui. Ma God Aruana, gabinou au tepana i genagenara ḡaira.
16	GEN 1:16	Ma aniravilala ḡaeḡaei ruaḡa i kauei, voḡaeḡaena marai i vibadei ma voaburuna waguvara i vibadei ma ubona maiteni i kauei.
20	GEN 1:20	Ma God i riwa i pa, “Sia ma lawalawai anatapui waira ona vioai ma kiu ona tupua ma ona lave au aidamo.”
21	GEN 1:21	Ma sia ḡaeḡae ma sia tapuna ma tapuna, boga au orana maemaei ma kiu tapuna ma tapuna maiteni i vitupui. Ma God, i ʼnanai da i ai.
22	GEN 1:22	I viaiaini ma i riwa i pa, “Ona vinatuna ma ona vimaḡaimi da boga ona vioai ma kiu ona vinatuna da ona maḡa au dobu.”
26	GEN 1:26	Anina ma God i riwa i pa, “Marina, rava tana kauei me tauta ma ai kaua tauta nanare. Ma taui sia ma kiu ma ḡamoḡamo anatapui au dobu ina vibadei, ḡamoḡamo maramaraḡamai ma ḡamoḡamo moduei, ḡaeḡaei ma muomuoi.”
27	GEN 1:27	Ma God, rava i kauei Anina ma oroto ma wavine i kauei, me tauna nanare.
28	GEN 1:28	Rava i viaiaini ma i riwei i pa, “Ona vinatuna ma ona vimaḡaimi da dobu ona vioai ma dobu ona vibadei. Taumi, sia, kiu ma aiwai anatapui au doa tetetei ona vibadei.
30	GEN 1:30	Ma ḡamoḡamo moduei ma kiu ma ḡamoḡamo nununai anatapui aubai; ai rugurugu a vereverei ai lam.” Ma nanare i mae.
31	GEN 1:31	Aiwai anatapui i kaukaueia i ʼnanai da i ai kaua ma i vinuaiai. Ma au bigai i nae ma ubaubanai i nei, aupom vi-six-na.
34	GEN 2:3	Ana nola i vikwai ma lamna aubaina God wei marana vi-seven-na i viaiaini ma i vovivirei.
38	GEN 2:7	Ma Bada God doa pokauna i vaia ma oroto i voai ma lavutu lawalawaina au giaganana i uveni ma oroto i lawana.
39	GEN 2:8	Ma Bada God peipei Eden i paewi au maramatanei ma kampa orotona i vivitupuia i terei da i mae.
49	GEN 2:18	Bada God i riwa i pa, “Oroto ainelana e mamae ma lamna eḡa ita ai. Ana tauagu ana kauei da ina voagui.”
50	GEN 2:19	Ma Bada God doa pokauna i vaia ma ḡamoḡamo anatapui ma kiu anatapui i kauei. Ma taui i neiai oroto awarina da ita viwavai. Ma oroto aiwai i viwavai, nanare ai wava i mae.
51	GEN 2:20	Ma oroto kiu ma ḡamoḡamo maramaraḡamai ma moduei, wava i verei. Wate Adam eḡa ana tauagu ita nelaḡai da ita voagui.
52	GEN 2:21	Ma Bada God oroto i kauei da i matave ma maranaina i raunuavuru kaua, torotorona tagogi i votawanei ma vioa i pota-melei ana au gabu.
53	GEN 2:22	Ma Bada God oroto torotoronei wavine i kauei ma wavinena i neiai oroto awarina.
56	GEN 2:25	Oroto awana maiteni, ana kovakovai, wate eḡa ita vinimala.
57	GEN 3:1	Anina ma mota lamna terevaideḡa kaukauana eḡa me ḡamoḡamo ḡelaui i kaukaueia nanare. Ma mota wavine i paridadanei i pa, “Riwa kaua bo eḡa da God i riwem da eḡa ai uana au peipei ma ani.”
61	GEN 3:5	Nai maranai u ani, matam ina vikalai me God nanare ma aiaina ma apoapoena ona aramanei. Ma God i aramanei, lamna aubaina i viḡaem da avena ma ani.”
62	GEN 3:6	Ma wavine i ʼnana da ai uana aniam aiaina ma inanana i ai kaua, ma i ḡoei da ita ani da nuaulaula ita vaini, lamna aubaina tauna ai uana i vaia da i ani. Ma ḡelauna awana au ririvana i mamae i verei da i ani.
63	GEN 3:7	Ma matai i kala ma i aramanei da taui ana kovakovai, lamna aubaina ai bawara rugurugui i vaia da i vaturi da tupuai i tere-ḡaḡari.
65	GEN 3:9	Wate Bada God oroto i kwatuei i pa, “Tam mepa?”
66	GEN 3:10	Tauna i paribelei i pa, “A nonorim au peipei ma tau ana kovakovau aubaina a rovo da a raugovaḡem.”
67	GEN 3:11	Ma Bada God i riwa i pa, “Aiai i riwem da tam ana kovakovam? Ai uana a viḡaem da avena uta ani, ma u ani bo?”
69	GEN 3:13	Bada God wavine i riwei i pa, “Aiwai u kauei?” Ma wavine i paribelei i pa, “Mota i moruiu da a ani.”
70	GEN 3:14	Bada God mota i riwei i pa, “Wei u kauei aubaina, kovoḡa ḡaeḡaena tam awarim, eḡa me ḡamoḡamo ḡelaui nanare, maramaraḡamai ma moduei. Manawamei ma matave-taitaina-nae ma am lam doa ma ani am mara au anatapuna.
71	GEN 3:15	Ana kauei da tam ma wavine ona viḡavia nonoa, ma am epaia ma wavine ana epaia ona viḡavia. Tauna kolam ina gwadai ma tam ae karena ma ani.”
73	GEN 3:17	Adam i riwei i pa, “Ma tam awam ponana u rautaniḡanei ma ai uana a viviḡaeia u ani, Tam am kauelei doa u viapoapoeni. Tam ma nola guratana ma inim ina viara da lam ma nelaḡai, am mara au anatapuna.
75	GEN 3:19	Tam polapolam ina toi da lam ma nelaḡai ma nanare ma mae da ma nae me au doa. Doa pokauna a vaia da tam a kauem ma tam ma nae me doa au pokauna.”
77	GEN 3:21	Bada God ḡamoḡamo opina i vaia da iniḡaḡara i kauei Adam awana maiteni aubai ma ini i tere-ḡaḡari.
87	GEN 4:7	Mepa da kaua aiaina uta kauei, lamna ata vinuaiai awarim. Wate am nota da apoapoena ma kauei, lamna ma aramanei da apoapoe am au metaeta e daradaraim da ina vovaiubaim. Wate tam ma virewapana da ma vovaiubai.”
90	GEN 4:10	Ma Bada i riwa, i pa, “Aiwai u kauei? Am tevera tarana doei e kwatukwatu raubiwa aubaina.
93	GEN 4:13	Cain Bada i riwei, i pa, “Au kovoḡa i rata kaua ma eḡa tagotagogina da ana avarai!
95	GEN 4:15	Ma Bada i paribelei, i pa, “Eḡa! Aiai da i viraḡenim, ana kovoḡa ina rata guratana.” Ma ana mataira Cain awarina i terei da rava ita viḡaei da tauna avena ita vunui, maranai i nelaḡai.
106	GEN 4:26	Seth natuna orotona i tupua ma i ḡorei Enosh. Ma nai marana, rava, Bada wavana vivivireina viborumana i vikarei.
143	GEN 6:5	Ma Bada i ʼnanai da rava anatapui au dobu ai ḡoʼapoapoe i rata kaua ma aiwai i viogatarei ma i vinua-notenotei anatapui apoapoei.
144	GEN 6:6	Bada i ʼnanai ma orana i viara kaua ma i vinuabola da aiwai aubaina rava i kauei.
145	GEN 6:7	Ma Bada i riwa, “Tau rava a kaukaueia ana vipupui dobu au anatapuna ma nanare ḡamoḡamo ḡaeḡaei ma ḡamoḡamo au doa tetetei ma kiu au aidamo. Nuanuau i bola-kauei da taui a kauei.”
150	GEN 6:12	Ma God i ʼnanai da rava ai ḡoʼapoapoe i rata kaua ma lawana apoapoena i maemaelei.
152	GEN 6:14	Lamna aubaina a ḡoei da wei ma kauei. Waga ḡaeḡaena ai bagibaginei ma voai tam aubaim. Ma babalaraḡi ma koltei au orana ma au doa ma pasi.
156	GEN 6:18	Wate marina tau parivainuaḡana bagibagina ana kauei tam maiteni. Tam, awam, ma natunatum awawai maiteni au waga ona rui.
157	GEN 6:19	Ma ḡamoḡamo anatapui, wavinena ma orotona ma vigerui, kiu, ma ḡamoḡamo au doa tetetei ruaruaḡei ava ina rui da ina lawana.
160	GEN 6:22	Ma God aiwai anatapuna i ririweia; Noah i kauei.
163	GEN 7:3	Ma nanare kiu ma vaia, ororotoi 7 ma waivinei 7. Wei ma kauei da ḡamoḡamo da kiu anatapui lawalawaii ina mae ma ina vinatuna.
164	GEN 7:4	Ma au pom 7 au murina ma garewa ana paritawaneiai da mara 40 ma au pom 40 ina atuna. Ma aiwai au dobu a kaukaueia, e mamae ma e lavulavutu anatapui ina pupu.”
165	GEN 7:5	Anina ma Bada anatapuna i ririweia, Noah i kauei.
183	GEN 7:23	Anina ma Bada anatapuna lawalawaii au dobu i pupuna-pai, rava ma ḡamoḡamo ma kiu ma ḡamoḡamo tetetei, anatapui i viamoai. Noah ma taui aiavoi au waga i gerugeru, taui ava i lawana.
201	GEN 8:17	Ma ḡamoḡamo lawalawai anatapui ma taravaina-opunei, kiu anatapui, ḡamoḡamo au doa tetetei da ina vinatuna ma ina maḡa da dobu ina vioai.”
203	GEN 8:19	Ma ḡamoḡamo anatapui, kiu ma ḡamoḡamo ḡelaui au doa tetetei, ai au dam nununai nanare waga i opu-tawanei.
204	GEN 8:20	Ma Noah pulo aniapuna i voai Bada awarina ma ḡamoḡamo aiaii, kiu aiaii tagotagogi ava taputapuna i apui pulo aniapuna au tepana.
205	GEN 8:21	Ma maranai Bada pulo ḡabuna i laḡoni ma au nuanuana i pa, “A aramanei da rava melamelaiei ai nota i apoapoe. Wate dobu eḡa ana viapoapoeni ma eḡa melanai lawalawai anatapui ana pupuna-melei me a kauei nanare.
206	GEN 8:22	Ma maranai dobu e mamae paewa ma tuaruta, ubauba ma vibola, bodu ma omra, garewa ma madeḡa, maratom ma au pom, ina mae-nonoa ma eḡa ina kwa.”
208	GEN 9:2	Ana kauei da ḡamoḡamo ḡaeḡaei ma ḡamoḡamo tetetei, iana ma kiu, anatapui ina rovoemi. Ma au urami ana terei da ona vibadei.
212	GEN 9:6	Tau rava a kauei me tau inanau nanare, ma lamna aubaina Rava aiai i viraḡena, rava ḡelauna tauna ina viraḡeni.
215	GEN 9:9	“Ona rautaniḡana wei marina, Tau au parivainuaḡana bagibagina taumi ami epaepaia maiteni a kaukauei.
216	GEN 9:10	Ma ḡamoḡamo lawalawaii anatapuna, kiu ma ḡamoḡamo numei ma moduei ma anatapui wagei i opuopu, ma ḡamoḡamo anatapui muriai au dobu ina mae.
218	GEN 9:12	Ma God i riwa, “Parivainuaḡana bagibagina a kaukauei taumi ma anatapui lawalawai maiteni anatapui muriai e nenei. Wei parivainuaḡana matairana wenanare:
269	GEN 11:2	Nai maranai rava i vaḡavaḡai nae au maramatanei ma wapu au ḡaeḡaena i ḡeta au Shinar ma kampa i mae.
270	GEN 11:3	Ma i babani vivira i pa, “Ona nei, doa tana vaia ma brik tana pasi ma tana apui da ina bagibagi.” Ma nanare ai numa brikiei i voai ma koltei i ampasi.
271	GEN 11:4	Ma taui i riwa, “Ona nei melagai ḡaeḡaena tana voai tauta aubaita ma numa ḡeḡe dewadewana tana voai da ina ḡae au mara da wavata tana kauei ma eḡa tana vilamoneta dobu au anatapuna.”
273	GEN 11:6	Ma Bada i riwa i pa, “Wei taui rava tagogi ma pona tagogina e bababaniei. Wei lamna karena, aburuna ava aiwai ai au nota anatapuna ina kauana-paiei.
300	GEN 12:1	Bada Abram i riwei i pa, “Am dobu, am rava ma amam ana dam ravai ma netawanei ma ma nae dobu ana viatataiem kampa ma mae.
301	GEN 12:2	Ma am epaepaia ai dam ana viratai, ma ana viaiainim, ma ana kauei da wavam ina rata, ma tamei viaiaina ina nei rava awarii.
305	GEN 12:6	I ḡeta Canaan ana au parata ma i verautua da au gabu vinevinena, Shekem melagaina ḡaeḡaena au ririvana. Ma kampa au Moreh ai ḡaeḡaena au ḡouna i rauḡaravu. (Nai maranaina mai Canaan, nai au dobuna i mamae.)
328	GEN 13:9	Weka tana vilamoneta ma ata naei tana nae. Doa au naota e inainanai. Metauna e ḡoeḡoei ma nae ma kampa ma mae. Mepa da tam ma nae au oiena, tau ana nae au kelakela. Mepa da tam ma nae au kelakela, tau ana nae au oiena.”
332	GEN 13:13	Ma mai Sodom ai lawana i apoapoe kaua ma ḡoʼapoapoe i kaukauei Bada au matana.
335	GEN 13:16	Ma am epaepaia ana kauei me doa pokauna ma aiai da pokau e iaiavi lamna am epaepaia tagotagogina ina iavi.