23434	MAT 8:20	Ju'u Jesus intok: ―Jume' kawisim bwia woojo'oku jo'aak. Jume' intoko wikitchim totosakamme. Taa inepo, ju'u emo benasi inim yoeme, jakun in yebijnee'uta juni'i ka jipue ―ti au jiiiak.
23460	MAT 9:12	Inika'a ju'u Jesus jikkajak intok inimmeu inen jiiak: ―Jume' alleaka intok ka ko'okoeme ka waka'a yee jijittomta jariune. Jume' ko'okoeme ala, a' jariune.
23463	MAT 9:15	Ju'u Jesus inen am yoopnak: ―Jume' jujupwa'po nunurim, kaachin siokaka ama anne, juka' au jubemta ama ketun a' aneo. Taa yuma'anee ju'u taewai, junaka'a jubemta a' kaabetuneeo, junak ala ka ji'ibwabaanaa ―ti ameu jiiak.
23491	MAT 10:5	Ju'u Jesus inime'e woj mamni ama wooim naas bittuak inen amet nesawekai: ―Jume' ka jurio yoemrata jo'aaka'u bicha eme'e ka katne. Intok kia bwiaara Samaaria' tea'po jo'arammeu juni'i ka yajine.
23560	MAT 12:2	Jume' paiseompo ta'eewame junak, inika'a bichakai, Jesujtau: ―Jume' em majtim bichaa ―ti au jiiak―. Aet yum jo'e taewapo tekilta, ka joo i'awamta jooa ―ti au jiiak.
23725	MAT 15:23	Taa ju'u Jesus inika'a kaita a' yoopnak. Junak intok jume' a' majtim au yajaka intok inen au ujbwanak: ―A' simne' betchi'bo au nooka achai. Bwe'ituk itot cha'aka weyeka, jiba chai sime ―ti au jiakai.
23795	MAT 17:26	Ju'u Peeo: ―Jume' omot bwiaraa yoemratau ―ti a' yoopnak. Ju'u Jesus junak: ―Junuentuko, jume' ama bem bwiaarapo yoemem, kaita beje'etuane ―ti au jiiak―.
23904	MAT 21:9	Jume' bat aapat kateme, intok ket jume' aet cha'aka kateme, inime'e chaai japtek: ―Juka' si'imemmeu yo'o ya'ari Labiituka'uta yoemiam betana yeu simriatau, a' yo'oriwaka a' alleetuanaa'u au lutu'uriatune. Tu'isi a' eiyaawa'u au bicha teuwaawaka mabettunee ju'u, achai Liojta betana lutu'uriaka a'abo weyeme. A' yo'oriwaka a' alleetuanaa'u tua Liojtau lutu'uriatune ―ti chaae japtek.
23989	MAT 23:2	―Jume' Moiseejta betana nesaurim yee majtame intok jume' paiseeom teame, inime'e, Moiseejta betana nesauri ji'ojteim, bem teuwaa'uta, machisia bem yee a' majtane' betchi'bo junuen iniau lutu'uriak.
24175	MAT 26:52	Junak intok ju'u Jesus iniau: ―Jume' em tebe kuchi'im bem weeka'po am kecha ―ti au jiiak―. Bwe'ituk si'ime wame'e bem tebe kuchi'immea nassuame, inime'e ket tettebe kuchi'immea su'atune.
24219	MAT 27:21	Ju'u kobanaao juchi ameu nokaka inen ameu nattemaek: ―Inime'e woim betana, jabetasa eme'e su'u toji i'a. Bempo intok: ―Juka' Barabaaj teamta ―ti jiiak.
24220	MAT 27:22	Ju'u Pilaato intok: ―Juka' Jesujta su, juka' Krijto' teamta, jaisa nee a' ya'ane ―ti ameu nattemaek. Si'ime juname'e: ―Kuuset a' popon tebone ―ti jiaka a' yoopnak.
24247	MAT 27:49	Taa jume' waate: ―A' su'u toja, bo'o bitneete. Jumak juni'i ju'u Eliaj teame a'abo a' jinne'une ―ti jiiak.
24308	MRK 1:24	Juna'a intok, chai nokpo, inen au jiiak: ―Empo Jesus ―ti jiia―, bwe'u jo'ara Nasaret tea'po jo'aakame, jitasa empo itomak lutu'uriak ―ta' temaek―. Empo jumak ka amma'ali itomak a'abo bo'o jooseka weye ja'ani ―ta' temaek―. Ette ju'unea, Liojta betana em tu'u jiapsi usiarituka'po ―ti jiia.
24346	MRK 2:17	Jesus intok, inien am jiao am jikkajaka, inen ameu jiu taitek: ―Jume' tu'ik takaaka, ka ko'okoeme, kaachin juka' yee jijittomta waatane. Taa ju'u ko'okoeme ala a' waatane, juka' yee jijittomta. Inienpo aman san, nejpone a'abo ne yebijla, jume' ka tu'isi aulammeu nok betchi'bo, bem jinne'umtune' betchi'bo. Bwe'ituk jume' jaibu tu'isi jiapsame, juname'e, lutu'uriata bo'o jooria.
24353	MRK 2:24	Waate juriom, paiseompo emo teuwaame, intok junuen aneme bichaka, Jesujtau inen jiian: ―Jume' em majta'um bicha'e ―ti au jiian―. Sabala ta'apo, kaitat mammawaka, Lioj waatiawa'a taewaituko juni'i, inime'e inien aane ―tiian.
24366	MRK 3:9	Junama'asan, juebena yoemrata ama au nau yaja' betchi'bo, intok ka ama nau a' pitta i'aka, a' majta'ummeu inen jiiak: ―Juka' kuta kanoata, junama'a ba'apo bo'okamta, mayoau jeela rukta'em ―ti ameu jiiak, ama ja'amubaekai.
24379	MRK 3:22	Waate ket ama aanen, maejtompo ta'eewame, Jerusalen tea'a betana. Juname'e ket inen jiian: ―Juka' yo'o bebeje'eri jiapsi e'eri aet ane'e ―tiian. Juna'a eeri intok, bem nokpo, Be'elsebuupo ta'eewan. Intok ket inen jiian: ―Yo'o bebeje'eritamak a' lutu'uriak ―tiian―. Kiali'ikun junae utte'awatae, jume' bem jiapsimpo jume' waate bebeje'eri e'eerim yetet ane'um, yeu am bepria ―tiian.
24401	MRK 4:9	Intok inika'a weemta ameu noksuka, aet chukula inen ameu jiiak: ―A' mammatebaeme, a' mammatene ―ti ameu jiiak.
24416	MRK 4:24	Taa ket inen ameu jiiak: ―Juka' enchim jikkajaka'uta, tu'isi em aet suuaka, a' jikkajine. Bwe'ituk Liojta, tua a' waata'po aman, junuen aet jiapseka a' bo'o jooria'ateko, ju'u Lios ket junuen, juka' emou tu'inee'uta, emou a' autuane. Intok kia jaarekisia em a' maktune, eme'e a' mammateme.
24490	MRK 6:14	Ju'u yo'o ya'ari Eroorej teame intok, juka' Jesujta a jita a' joa'apo aman, si'imekut a' ju'uneyyawa' betchi'bo, a' jikkajak. Junak intok juna'a yo'o ya'ari Eroorej teame: ―A' Joan yee babatoowame ―ti jiian―, bat naataka inien, yee babatoowasukame ―ti jiian―. Taa i'an kokkolam nasuk a' jiabijtelatuka' betchi'bo, Liojta betana utte'awae, suum watchisi machik a jooa.
24491	MRK 6:15	Waate intok: ―A' Eliaj teame ―ti jiian. Wate intok: ―Liojta betana noktuawame'e ―tiian―, oo waate, bat naataka jume' Liojta betana a'abo bittuarimpo a' weye'e ―tiian.
24541	MRK 7:9	Intok ket inen ameu jiiak: ―Juka' enchim aet joiwalaa'uta, intok yoemrata enchim aet sawee'uta, junaka'a che'a tu'ureka a' bo'o jooriabaeka, tua junaka'a Lios nesauta, kia kaita'po em a' tawaala.
24596	MRK 8:27	Junama'a intok ju'u Jesus, a' majta'ummak, jum bwe'u jo'ara Sesarea piliipo' tea'po, waate ka bwere jo'aram au jeela joka'um, junama'a wa'am yeu siika. Bo'ot intok a' majta'ummeu nattemae taitek: ―Jume' yoemem, nee jabesa ti jiia.
24618	MRK 9:11	Junak intok bempo, juka' Jesujta temaek: ―Jume' itom maejtom intok, tiian, jaisa tua jiubaeka inen jiia, a' utte'a tiia, juka' Eliaj teamta bat yebijne'po ―ti a' temaek.
24780	MRK 12:38	Intok jiba am majtasimeka: ―Jume' maejtom betana emo'em suua'em ―tiia―. Bwe'ituk juname'e, emo Lioj waatituamcha aneme benasi, emo tebe a'aabi'itotua. Intok jum kaayepo, juka' tu'isi yo'orisi maisi ameu tebotewamta eeyamme.
24843	MRK 14:20	Junak intok aapo am yoopnaka: ―Jume' woj mamni ama wooim betana ―tiia―, wepu'ulaka juna'atune ―tiia―. Pu'atopo in ji'ibwa'po, paanim komoniaka, am bwa'akame ―tiia―.
25076	LUK 2:34	Junak ju'u Simeeon teame, Liojtau bicha, tu'ik am a'auriak. Intok ju'u Maria, Jesujta aebeu inen jiiak: ―A' ju'uneiyaane, ini'i ili uusi, Ijra'el yoemrata nasuk juebenam, Liojta bichapo tu'isi oo ka tu'isi bem tawanee'uta, am bittua betchi'bo au na'ikiari. Aapo'ikut Liojta betana weyeme yeu machine, iniat juebenam ka a' mabetnee'ut,
25207	LUK 5:31	Inime'e inen yoopnak ju'u Jesus: ―Jume' kaita inne'aaka, ka ko'okoeme, juka' jittoata am makneemta ka a' jariune. Ala jume' ko'okoeme.
25428	LUK 9:58	Junak ju'u Jesus iniau: ―Jume' kawisim bem bwia wojo'oriam jipue, intok jume' wikitchim totosak. Taa ju'u inim yoeme, jakun a' yebijnee'uta juni'i, ka jipue ―ti au jiiak.
25808	LUK 19:8	Junak ju'u Sakeeo, kikteka intok ju'u yo'owe Jesukrijtotau: ―A' bitnee achai. Si'imeta juka' tu'ik in jipue'uta, nasuk'aman nee jume' jiokot jiapsammet nee a' na'ikimtene. Intok inepo jabeta bai ta'aaka, jita a' etbwarialatuko, junae betana, naikisi che'a bepa nee a' nottane ―ti au jiiak.
25834	LUK 19:34	Bempo intok: ―Juka' yo'owe Jesukrijtota inika'a a' sawabae' betchi'bo ―ti jiiak.
25838	LUK 19:38	Inime'e inen jiakai: ―A' alleetuawaka a' yo'orinaa'u au lutu'uriatune, ju'u che'a yo'o ya'ari, achai Liojta betana lutu'uriaka a'abo weyemtawi. Teekau jiapsammeu yuma'isi ka jain eewame aune. Intok che'a bepa Liojta a' yo'orinaa'u jiba au aune ―ti jiakai.
25894	LUK 20:46	―Jume' Moiseej tuka'uta nesaurim yee majtame betana, eme'e emo suuane. Bwe'ituk inime'e tettebem bem supenee'uta tu'ure. Intok jum bwere jo'arampo jita nenkiwa'po che'a anwa'po, yo'orisi emo tetebotua i'a. Intok jum bem te'opompo, che'a bichau wajiwa, yo'oraata jojoye'po bem joonee'uta juni'i tu'ure. Intok ket inime'e, pajkompo bichau, che'a bat bem jojoonee'uta waata.
25958	LUK 22:25	Taa ju'u Jesus inen ameu jiiak: ―Jume' inim bwere yoemratau che'a yo'o ya'arim, junaka'a yoemrata am tekoka'a benasia a am kuakta. Intok ketchia inime nasuk jume' che'a yo'owe, inime'e, tu'ik si'imem jooriame ti ta'eewa.
26154	JHN 1:41	Ini'i Antej teame, tua bat, kee jita intok yaakai, juka' aamak werik, Simoo' teamta jaiwak, intok: ―Juka' Mesiaj ti teamta te a' ju'uneiyaa ―ti au jiiak. Ini'i, Krijto ti jiubae.
26161	JHN 1:48	Junak intok ju'u Natana'el teame: ―Jaisa empo nee ta'aa ―ti au nattemaek. Jesus intok: ―Juka' Jeriipe' teamta kee enchi tejwaao, empo aman chuna'ouwota betuk enchi kateko, nee enchi bichak ―ti au jiiak.
26259	JHN 4:34	Taa ju'u Jesus inimmeu: ―Juka' a'abo nee bittuakamta ea'po aman in aunee'u, intok juka' aapo'ik betana tekilta in a' chupa'anee'u, ini'i juna'a, wa'a bwa'amta benasi in bicha'u ―ti ameu jiiak―.
26293	JHN 5:14	Chukula ju'u Jesus, inika'a jum bwe'u te'opopo teaka: ―A' mammatene, i'an ala empo tu'ikai, ka intok bat naataka benasi ka tu'ik joone, junuen kaita naa buusti intok, che'a ka tu'ik em bitne' betchi'bo ―ti au jiiak.
26338	JHN 6:12	Junako bempo'im junammea am yanti elao, ju'u Jesus, jume' a' majtimmeu: ―Jume' reebeim ama yeu be'ekame nau tojine, junuen kaita kia wo'otine' betchi'bo ―ti ameu jiiak.
26355	JHN 6:29	Junak intok ju'u Jesus inimmeu: ―Juka' aapo'ik Liojta emo tana a' waataka enchim a' joo i'a'u, ini'i, ju'u aapo'ik Liojta a'abo a' bittualata enchim a' sualnee'u juna'a ―ti ameu jiiak.
26448	JHN 7:51	―Juka' inim ae itom nesawee'uta, a' jia'a benasia, itepo kaabeta ka tu'isi a' tawaane, inika'a ka bat a' jikkajakai, junuen ju'u a' yaaka'ut ju'unee betchi'bo ―ti ameu jiiak.
26631	JHN 11:39	Junak ju'u Jesus: ―Juka' tetata em omola kechaa ―ti jiiak. Ju'u Maata, ju'u mukukamta mak weri: ―In yo'owa, ini'i jiba tua jumak, jaibu tua juuba, bwe'ituk jaibu naiki taewaim jipue mukiatakai ―ti jiiak.
26726	JHN 13:27	Inika'a Juuraj teamta intok kia inime'e paanim a' nu'uka a' bwa'aka jiba, ju'u bebeje'eri a' jiapsiu yepsak. Junak ju'u Jesus: ―Juka' em ya'anee'uta, i'an lauti a' ya'ane ―ti au jiiak.
26859	JHN 18:5	Bempo: ―Juka' Jesujta, Nasaret tea'po jometa ―ti a' yoopnak. Ju'u Jesus intok: ―Ineponee juna'a ―ti ameu jiiak. Ju'u Juuraj teame, ju'u aapo'ik yeu bwisekame ket inime'emak ama weaman.
26861	JHN 18:7	Junak intok ju'u Jesus juchi: ―Jabetasa eme'e jaiwa ―ti ameu nattemaek. Bempo intoko: ―Juka' Jesujta, Nasaret tea'po jometa ―ti jiiak.
26865	JHN 18:11	Taa Jesus, ju'u Peotau: ―Jume' kuchi'im, em yeu am wikeka'po am ketcha. Inien, juka' in yo'owata, jiokot nee ino a' bit i'ao utte'atune, inien tua jiokot in ino bitnee'u ―ti au jiiak.
26949	JHN 20:13	Inime'e ankelesim intok aapo'iku: ―Jamut, jaisaaka empo bwaana ―ti au nattemaek. Aapo inimmeu: ―Juka' in yo'owata a' nuk saka'awaka' betchi'bo. Nee intok ka ju'unea jakun a' tojiwaka'ut ―ti ameu jiiak.
26961	JHN 20:25	Chukula wate aapo'ik majtim iniau: ―Juka' yo'ota, itepo a' bitlaa ―ti au jiiak. Taa ju'u Toomas junammeu: ―A' mampo a' wojoktipo ka bichakai, intok jum sisi'iwookim japsuka'po nee ka mam pusiateko, intok kia jum a' sana'ita betuk a' so'aripo ka aet mamteko, kannee a' sualne ―ti ameu jiiak.
26977	JHN 21:10	Ju'u Jesus inimmeu: ―Jume' kuchum ju'ubwa enchim yeu wikeka'um watem a'abo tojine ―ti ameu jiiak.
27433	ACT 13:2	Inime'e junak junama'a, Liojta yo'ori betchi'bo ka ji'ibwalamtakai, nau am anekai, Liojta am yo'oreeo, ju'u Liojta tu'u jiapsi: ―Juka' Bernabee' teamta intok juka' Saulo' teamta, tekil in ameu yeu a' pu'ariu am ja'abwane ―ti am ju'uneetuak.
27494	ACT 14:11	Junama'a junuen, juka' Paplota ya'ari a' bichakai, ju'u bu'uuraa junama'a Likaonika nokpo chaae japtek: ―Jume' liosim, inim yoemem bebenaka a'abo itou ko'om yajilam ―ti jiakai.
27516	ACT 15:5	Taa junak, jume' paiseeom betana, waate Krijtota nok lutu'uriata sualeme, inime'e japteka intok: ―A' utte'a'a ―ti jiian―, jume' ka juriomtaka, Krijtota sualeme, am sirkunsiraaroanee'uta, intok jume' Moiseejtuka'uta nesauri ji'ojteim bem a' bo'o jooriaka bem jiapsinee'uta am tejwaanee'u ―ti jiakai.
27583	ACT 16:31	Bempo inika'a: ―Juka' yo'owe Jesukrijtota empo a' sualeka aet eene, intok junak empo jinne'uitunee intok kia si'ime jume' emak jo'aakame juni'i jinne'uimtune ―ti a' yoopnak.
27598	ACT 17:6	Taa junama'a jume' bem jaiwa'um ka am teakai, bempo, juka' Jason teamta, utte'apo ama yeu a' wikeka, inika'a, intok waate junama'a Krijtota sualeme, inime'e, junama bwe'u jo'arapo ya'uraatau yeu am tojak. Intok kusisi nokaka: ―Jume' o'owim, Paplotaim, inim si'imekut kateka, yee amemak ee i'aka, si'ime yoemrata, bem tu'i eerim am nanasonteme, bempo i'an ket im yajilam ―ti chaaen―.
27669	ACT 19:15	Taa chukula, inime'e inien am aubaao, ju'u ka tu'i jiapsi, inime'e: ―Juka' Jesujta, a' jabetuka'ut nee ju'unea. Intok juka' Paplota nee ta'aa. Taa nee enchim tua ka ta'aa ―ti am yoopnak.
27806	ACT 23:4	Jume' junama'a aneme, Paplotau: ―Juka' Liojta betana te'opopo che'a si'imeku yo'o ya'aritau empo junuen nokbae ja'ani ―ti au nattemaek.
27822	ACT 23:20	Junako ju'u ju'ubwa yo'otume inia betana: ―Jume' juriom nau etejolam, yoko ta'apo Paplota inim jo'arapo ju'u yo'oorata ane'u em yeu a' toji tebonee'u betana eu nokbaekai. Bempo kia beja nokaka, aapo'ik betana weyemta che'a witti bempo aet emo a' ju'uneiyaabae'eti jiakai.
27837	ACT 23:35	ju'u Paplotau: ―Jume' enchi na'atejobaeme a'abo am yajako nee enchi jikkajibae ―ti au jiiak. Junako aapo, jum Eroorej tuka'uta, a' ujyooi karipo, wate a' suuana' betchi'bo nesawek.
31013	REV 14:18	Intok mesaa, Liojta ama yo'oriwa'po betana, juchi senu ankeles ama yeu siika, tajita ya'a betchi'bo, lutu'uriakai. Intok ju'u bwawim osakamtau kusisi chaaek: ―Jume' em bwawi osam nu'uka, bwiau, jume' pa'asi takam am toboktane. Bwe'ituk jaibu tu'i ―ti au jiiak.
31059	REV 17:15	Ju'u ankeles ket inen neu jiiak: ―Jume' baawem, juka' ka tu'i jamutta ame bepa kateka em bichaka'um, juka' yoemrata, si'ime ka nanau maisi machika nokamta teuwaa.
31095	REV 19:9	Junak intok ju'u ankeles inen neu jiiak: ―A' ji'ojtenee: “Tua alleenee wame'e, juka' Bwalata a' jupne' betchi'bo a' pajkoriawa'u nunuwakame.” Intok ket inen neu jiiak: ―Ini'i teuwaawame, tua lutu'uriapo, achai Liojta betana teuwaawaka weye.
31125	REV 21:3	Teeka betana intok jiawaita utte'akamta ne jikkajak, inen jiamta: ―A' ju'uneiyaane, ju'u Lios, jume' bwiapo jomemmak jiapsa. Juname'e intok aapo'ik betana yoemratune. Intok jiba Lios, aapo amemak anne. Junuen junammeu Liojtu betchi'bo.
31127	REV 21:5	Junak intok ju'u, jum yo'o ya'arita yeyesa'po katekame inen jiiak: ―A' ju'uneiyaa'e, inepo ne si'imeta bemelasi a' jooa. Intok ket inen jiiak: ―A' ji'ojtene, bwe'ituk ini'i teuwaawame, tua lutu'uria, intok a aet eetuwa ―ti jiiak.