13944	PSA 1:1	Amɨn kɨnda yokwi pakpak amɨn da yabet aŋakwa uŋun yolek dɨma agɨsak, ae amɨn yokwi gat kɨsi dɨma akgaŋ, ae Piŋkop do manji gen yoŋ amɨn gat kaloŋɨ dɨma yɨkgaŋ, uŋun amɨn kɨsɨk kɨsɨk tagɨ asak.
13945	PSA 1:2	Uŋun amɨn da Yawe dakon nawa gen do tagɨsi nandɨsak. Gɨldat kalba ae kalbiyo kɨsi uŋun do nandaŋ egɨsak.
13946	PSA 1:3	Uŋun amɨn kɨndap kɨnda pakbi ɨleŋon kwaokbi yombem. Bamɨ toktok bɨsapmon bamɨ uŋudon taŋtaŋ asak, ae tamɨ dɨma kɨbɨdosok. Yo morap asak uŋun aban bamɨ tagɨsi gɨn noman toŋ.
13947	PSA 1:4	Amɨn yokwi uŋun yaŋ dɨmasi. Uŋun wit dakon gɨpmɨ mɨrɨm da wɨrɨrɨk paŋgwaŋ uŋun yombem.
13948	PSA 1:5	Yaŋ do aŋek gen kokwin bɨsap madepmon Piŋkop da amɨn yokwi gen pikon yopban geni arɨpmɨ dɨma abɨŋ yɨpdaŋ. Yokwi pakpak amɨn kɨlegɨ da kabɨkon dɨma egɨpdaŋ.
13949	PSA 1:6	Nido Yawe da amɨn kɨlegɨ kɨlani asak, mani yoki pakpak uŋun tasɨk tokdaŋ.
13950	PSA 2:1	Mɨŋat amɨn kabɨ morap mɨktɨmɨ mɨktɨmɨ ekwaŋ uŋun nido kwen wɨgɨk ak do gen yaŋ paŋteban aŋ? Mɨŋat amɨnyo uŋun nido ɨsal dogɨn yokwi ak do gen yaŋ paŋteban aŋ?
13951	PSA 2:2	Mɨktɨm morap dakon kɨla amɨn madepni emat ak do tagap toŋ. Uŋun muwugek Yawe gat ae amɨn uŋun mɨŋat amɨn kabɨni kɨla asak do bɨt nelak tagal ɨbi amɨn gat pabɨŋ yop do gen yaŋ paŋteban aŋ.
13952	PSA 2:3	Gen yaŋ yoŋ, “Uŋun bamot dakon amɨn wamwam nap teban paŋdagono. Ain nap kandapninon paŋteban agɨmal uŋun wɨtdalno.”
13953	PSA 2:4	Kwen Kokup kɨla amɨn madep yɨtyɨt tamonikon yɨkdak amɨn jɨkgo yanjaŋ yomɨsak. Amɨn Tagɨ da jɨgɨlagon da pabɨŋ yopmaŋdak.
13954	PSA 2:5	Butjapsi nandaŋ yomɨŋek gen tebai yoyɨŋban pasal kɨmokgoŋ.
13955	PSA 2:6	Uŋun da yaŋ yoyɨsak, “Nak da on amɨn kɨla amɨn madepno egɨpjak do kɨlɨ yɨpgum da telagɨ ɨleŋno Saion uŋudon yɨkdak.”
13956	PSA 2:7	Kɨla amɨn madep da yaŋ yosok, “Yawe da yo madep kɨnda nayɨgɨt uŋun yaŋ teŋteŋokdɨsat. Yaŋ nayɨgɨt, ‘Gak Monjino. Abɨsok nak gak dakon Datgo dagosot.
13957	PSA 2:8	Bɨsit nayɨŋbɨ mɨŋat amɨn morap mɨktɨmɨ mɨktɨmɨ ekwaŋ uŋun gak do gabo mɨktɨm kɨsisi kɨla abi.
13958	PSA 2:9	Gak da kɨla amɨn pi tapmɨmɨ toŋsi aŋek kɨla amɨn madep dakon kɨndap kɨrɨŋ ain naŋ wasaŋbi uŋun naŋ uwalgo pudaŋ monɨŋ monɨŋ akdɨsal. Amɨn da mɨktɨm kwoba pudaŋ monɨŋ monɨŋ aŋ uŋun da tɨlagon akdɨsal.’ ”
13959	PSA 2:10	Yaŋdo, kɨla amɨn madep ji nandaŋ kokwin tagɨsi aŋek egɨpni. Mɨktɨmon kɨla amɨn, mama geno nandani.
13960	PSA 2:11	Ji Yawe do pasal ɨmɨŋek omani ani. Kɨsɨk kɨsɨk aŋɨmɨŋek pasal nɨmnɨmɨk ɨmni.
13961	PSA 2:12	Ji monjɨ dakon pɨŋbini egek gawak ɨmni. Butjap tepmɨ nandɨsak, do japmɨ nandaŋ daban dɨ kɨmakbam. Amɨn morap paŋkutnosak do Piŋkopmon kwaŋ uŋun kɨsɨk kɨsɨk tagɨ ani.
13963	PSA 3:2	Yawe, uwalno morapmɨsi! Amɨn morapmɨ da yokwisi aŋ namaŋ.
13964	PSA 3:3	Uŋun da yaŋ yoŋ, “Piŋkop da arɨpmɨ dɨma aŋpulugokdɨsak.”
13965	PSA 3:4	Mani Yawe gak pasɨk da yaŋ nak aŋkɨsɨbɨsal. Aŋpulugaŋbɨ emaron teban tosot. Gak kaloŋ dagɨn but yokwino wɨrɨrɨkbɨ pasɨlakwa aŋteban abɨ tebai akdat.
13966	PSA 3:5	Yawe da aŋpulugosak do yaŋ tɨdosot. Uŋun telagɨ kabapnikon egek yaŋ ɨlɨtno dakon kobogɨ namɨsak.
13967	PSA 3:6	Dɨpmɨn potpot tamokon pagek obɨsi pak ɨŋtosot. Ae don pɨdaŋek tagɨsi egɨsat, nido Yawe da kɨlano tagɨsi asak.
13968	PSA 3:7	Uwalno 10 tausen da terɨ terɨ da abɨŋ aŋdagat ayɨŋ, mani uŋun do dɨma pasolgeŋ.
13969	PSA 3:8	Yawe gak apbi! Piŋkopno abɨŋ aŋpulugoki! Uwalno mogɨm kulbak dapbi. Amɨn yokwi uŋun dakon geni dapmaŋ bɨrɨpmɨkgi.
13970	PSA 3:9	Yawe gak dagɨn nin paŋpulugaŋbɨ teban tomaŋ. Mɨŋat amɨn kabɨgo nin yo tagɨsi aŋ nibi dosi nandɨsat.
13972	PSA 4:2	Piŋkopno kɨlegɨsi, gak do yaŋ tɨdokeŋ bɨsapmon nandaŋ nabi. But yokwino wɨrɨrɨkbɨ pasɨlgɨt. Bupmɨ nandaŋ namɨŋek bɨsitno nandaki.
13973	PSA 4:3	Amɨn ji, bɨsap niaŋ da man madepno abɨŋ yɨp do pi ani? Bɨsap niaŋ da yo ɨsalɨ mibɨlɨ mibɨlɨ do but dasi galak taŋ yomɨŋ kɨmotni? Bɨsap niaŋ da top aŋpak yolni?
13974	PSA 4:4	Ji gen on do pakyaŋsi nandani. Amɨn morap Yawe dakon pɨŋbinisi ekwaŋ, uŋun iyɨ do manjɨgɨt. Nak uŋun do yaŋ tɨdoko bɨsitno nandɨsak.
13975	PSA 4:5	Ji Piŋkop do si pasalek aŋpak yokwi morap yopmaŋ mudoni. Si potni bɨsapmon gen on do pakyaŋsi nandaŋek gen kagasi sopni.
13976	PSA 4:6	Paret Yawe da galak tosok uŋun baŋ aŋek egɨp egɨpji Yawekon tosok yaŋsi nandani.
13977	PSA 4:7	Amɨn morapmɨ da yaŋ yoŋ, “Namɨn da nin paŋpulugaŋban tagɨsi egɨpneŋ?” Yawe, butgo ninon yɨpmaŋek yo tagɨsi aŋ nibi.
13978	PSA 4:8	Wit gat ae wain gat dakon bamɨ morapmɨ paŋ bɨsapmon amɨn kɨsɨk kɨsɨk aŋ. Mani Yawe gak da kɨsɨk kɨsɨk butnokon yɨpgul uŋun da uŋun dakon kɨsɨk kɨsɨk yapmaŋdak.
13979	PSA 4:9	Yawe gak dagɨn kɨlano aŋaki tagɨsi egɨsat, do yo kɨnda do dɨma pasalek tamokon pokdot bɨsapmon tepmɨsi pak ɨŋtosot.
13981	PSA 5:2	Yawe bɨsit aŋek iyoŋ iyoŋ yaŋapbo geno do mɨrak yopbi.
13982	PSA 5:3	Kɨla Amɨn Madepno ae Piŋkopno, aŋpulugoki do bɨsit asat, do yaŋ ɨlɨtno nandaŋ nabi.
13983	PSA 5:4	Yawe, wɨsa dagokdo morap gak do bɨsit asat. Wɨsa dagokdo gak do bɨsit tebaisi asat. Bɨsitno dakon kobogɨ nabi do jomjom asat.
13984	PSA 5:5	Piŋkop, gak aŋpak yokwi do kɨsɨk kɨsɨk dɨma asal. Yokwi aŋ amɨn gak da kapmatjok tagɨ dɨma egɨpmɨ.
13985	PSA 5:6	Iyɨ do nandaba wɨkwaŋ amɨn gak da dabɨlon tagɨ dɨma atni. Aŋpak yokwi aŋ amɨn morap dɨmasi galak taŋ yomɨsal.
13986	PSA 5:7	Yawe, gak da top gen yogok amɨn morap paŋupbal asal. Amɨn dapba kɨmokgoŋ amɨn gat, ae amɨn paŋkewalgaŋ amɨn gat dɨmasi galak taŋ yomɨsal.
13987	PSA 5:8	Mani gak da nak but dasi galak taŋ namɨsal, do gak da yutnon tagɨ wɨgɨkeŋ. Telagɨ yutgokon uŋudon ŋwakbeŋ aŋek gawak gabeŋ.
13988	PSA 5:9	Yawe, uwal da nak aŋupbal akdaŋ, do kosit yɨpmaŋ namɨŋaki aŋpakgo kɨlegɨ uŋun yolbeŋ. Kosit agɨpbeŋ do nandɨsal uŋun nolɨki.
13989	PSA 5:10	Uwalno gen bamɨsok kɨnda dɨmasi yoŋ. Amɨn dɨwarɨ paŋupbal ak dogɨn nandaŋ. Gen kagani uŋun kɨmakbi tamo da yaŋ pɨsoŋ. Amɨn paŋgalak ak do gen morapmɨ yoŋ.
13990	PSA 5:11	Piŋkop, gen yaŋ yomɨŋek yo yokwisi aŋ yobi. Nandak nandak yokwini paŋupbal abi. Yo akdo nandaŋ kokwin aŋ iyɨ uŋudon yokwalni. Uŋun kwen wɨgɨk aŋ gamɨŋek yokwi morapmɨ aŋ, do yolbɨ gak da ɨŋam da dubagɨkon kɨŋ mudoni.
13991	PSA 5:12	Mani amɨn morap paŋkutnoki do gagon kwaŋ uŋun kɨsɨk kɨsɨk tagɨ ani. Uŋun but galak nandaŋek kɨsɨk kɨsɨk dakon kap dagok dagogɨ mɨni tagɨ yoni. Paŋkutnaŋaki but dasi galak taŋ gamaŋ amɨn kɨsɨk kɨsɨk sigɨn aŋek mango awɨgɨni.
13992	PSA 5:13	Gak da amɨn kɨlegɨ do yo tagɨsi aŋ yomɨsal. Emat dakon pasɨk da yaŋ taŋek paŋyoŋgam asal, ae kɨlani tagɨsi aŋaki tagɨsi ekwaŋ.
13994	PSA 6:2	Yawe, butjap nandaŋek gen tebai dɨma nayɨki. Butjap madepsi nandaŋek nak aŋmɨlɨp ak do tepmɨ pi dɨma nabi.
13995	PSA 6:3	Yawe, tapmɨmno mɨni, do bupmɨ nandaŋ nabi. Yawe, gɨptɨmno tep namaŋ, do aŋmɨlɨp abi.
13996	PSA 6:4	Butno wagɨlsi jɨk tosok. Yawe, bɨsap niaŋ da jɨgɨ paŋegɨpbeŋ?
13997	PSA 6:5	Yawe, tobɨl obɨŋek yokwikon baŋ abɨdoki. Bɨsapmɨ bɨsapmɨ amɨn do but dasi galak taŋ yomɨsal, do aŋpulugaŋbɨ dɨma kɨmokgeŋ.
13998	PSA 6:6	Amɨn kɨmakbi dɨma nandaŋ gamaŋ. Kɨmakbi tamogwan da gak dɨma aŋkɨsaŋ.
13999	PSA 6:7	Iyoŋ iyoŋ yaŋ egapbo tapmɨmno wagɨlsi maŋ mudoŋ. Kalbi morap kunam pakbino da tamono wagɨlsi aŋgɨk asak. Kunam tagapbo busuŋ kɨdɨŋno madepsi gɨk tosok.
14000	PSA 6:8	Uwalno morapmɨsi, do kunam gɨn tak egapbo dabɨlno pɨrɨropmaŋ. Aŋakwa yo kɨnda dɨma kosot.
14001	PSA 6:9	Kunam tak egapbo Yawe da kɨlɨ nandaŋ namgut, do aŋpak yokwi aŋ amɨn ji kɨsisi nepmaŋdek kɨt.
14002	PSA 6:10	Yawe da aŋpulugosak do aŋek yaŋ tɨdaŋapbo nandaŋ namgut. Yawe da bɨsitno nandagɨt.
14003	PSA 6:11	Uwalno kɨsisi mayaktok ae but yokwiyo pakdaŋ. Tepmɨsi tobɨl kɨŋek mayaktok pakdaŋ.
14005	PSA 7:2	Yawe Piŋkopno, gak da nak aŋkutnoki do obɨsat. Aŋpulugaŋaki nak aŋsopmaŋgaŋ amɨn da dɨma nɨkba kɨmokgeŋ. Yokwikon naŋ abɨdaŋaki dɨma tasɨk tokeŋ.
14006	PSA 7:3	Laion da amɨn dakon gɨpni paŋdagoŋ, uŋun da tɨlak dɨ aŋupbal abam. Ɨlɨk aŋaŋ tɨmɨ kɨndakon aŋkɨŋakwa amɨn da nak yokwikon naŋ arɨpmɨ dɨma dɨ abɨdaŋbam.
14007	PSA 7:4	Yawe Piŋkopno, yokwi agɨm dakon gulusuŋno taŋ namɨsak, bo amɨn dɨwarɨ do yokwi aŋ yomgum,
14008	PSA 7:5	bo notno ɨsal dogɨn yokwi aŋ ɨmgum, bo uwalno dakon yo ɨsal dogɨn kabo tɨmɨkgɨm kaŋ,
14009	PSA 7:6	yum pɨndagaki uwalno da nak aŋsopmaŋek abɨdoni. Nak tagɨ bamaŋek obɨsi aŋupbal aŋek gɨptɨmno yɨpba kɨmbabaŋon ɨsal tosak.
14010	PSA 7:7	Yawe, pɨdoki! Uwalno da nagon emat tebaisi aŋ. Uŋun butjap nandaŋ yomɨŋek yo yokwisi aŋ yobi. Piŋkopno, aŋpak kɨlegɨ dogɨn galak tosol, do abɨŋek aŋpulugoki.
14011	PSA 7:8	Gak kwensi kɨla amɨn madep yɨtyɨt tamogokon yɨgek mɨŋat amɨn kabɨ morap gak da kapmatjok abɨŋ muwutni do yoyɨki.
14012	PSA 7:9	Yawe, mɨŋat amɨn morap dakon aŋpakni kokwin asal, do aŋpulugaŋaki gen pikon teban tokeŋ. Nido, aŋpak kɨlegɨ gat ae aŋpak tagɨsi gat baŋgɨn asat.
14013	PSA 7:10	Piŋkop gak wagɨl kɨlegɨsi. Amɨn morap dakon nandak nandak butyo pakyaŋsi pɨndak nandaŋyo asal. Amɨn yokwi aŋpak yokwi saŋbeŋek dɨma ani do kɨrɨŋɨk yobi. Mani amɨn kɨlegɨ paŋpulugaŋaki tebai atni.
14014	PSA 7:11	Piŋkop uŋun pasɨkno. Butni kɨlegɨsi amɨn yokwikon baŋ tɨmɨkdak.
14015	PSA 7:12	Piŋkop uŋun gen kokwin kɨla amɨn kɨlegɨsi. Gɨldarɨ gɨldarɨ yokwi pakpak do japmɨ nandaŋek pabɨŋ yopmaŋdak.
14016	PSA 7:13	Yokwi aŋ amɨn but tobɨl dɨma ani kaŋ, Piŋkop da emat agak sɨbani geni toŋsi asak do ɨlɨtdɨsak, ae obipni paŋɨlɨtdɨsak.
14017	PSA 7:14	Amɨn uŋun dapban kɨmotni do dɨkdɨkni kɨlɨ paŋnoman agɨt. Dɨkdɨk mɨleŋ asɨpmɨ toŋ paŋnoman asak.
14018	PSA 7:15	Amɨn yokwi uŋun yokwi ak do nandaban teban toŋ. Yokwi mibɨlɨ mibɨlɨ ak do tagap tok asak, ae bɨsapmɨ bɨsapmɨ top yosok.
14019	PSA 7:16	Amɨn kɨnda abɨdok do gapma dubagɨ kɨnda wayɨkdak, mani iyɨ uŋun gapma wayɨkdakgwan mosok.
14020	PSA 7:17	Gulusuŋ iyɨ asak uŋun da iyɨnaŋ wɨtjɨŋ ɨmɨsak. Ae butjap ematyo amɨn dɨwarɨ do aŋ yom do nandak nandak asak, uŋun da tobɨlek iyɨ naŋ aŋupbal asak.
14021	PSA 7:18	Yawe uŋun amɨn kɨlegɨsi, do ya yaŋ iyɨsat. Piŋkop Wukwisi do mani aŋkɨsik do kap yokeŋ.
14023	PSA 8:2	Yawe, Amɨn Tagɨnin, mɨktɨmɨ mɨktɨmɨ gak dakon man pɨdaŋbisi. Tɨlɨmgo wukwisi, kundu si yapmaŋdak.
14024	PSA 8:3	Gak da man madep gamni do mɨŋat monjɨyo gat ae monjɨ ŋakŋak gat yoyɨŋ dekdal. Man madep gamɨŋakwa uwalgo da gak abɨŋ gep do aŋtɨdok aŋek gen mapmɨt aŋ.
14025	PSA 8:4	Kundukon gɨk kanekyo kɨsitgo da wasaŋ kwen yopgul da toŋ uŋun pɨndagek yaŋ nandɨsat.
14026	PSA 8:5	Mɨŋat amɨnyo nin niaŋen amɨn dɨ baŋ nin do nandak nandak madep asal? Nin yo ɨsalɨsi. Nin dakon kɨla nido kakgɨmansi asal?
14027	PSA 8:6	Piŋkop gak da nin gaga da mibɨlgwanjok nipgul. Gak da nin wasaŋek tɨlɨm gat ae man madep gat nimgul.
14028	PSA 8:7	Yo morap wasagɨl uŋun nin da kɨlani aneŋ do yaŋ mudagɨl. Uŋun yo morap nin dakon pɨŋbi ekwaŋ.
14029	PSA 8:8	Sipsip bulmakau, ae joŋ bɨt kɨlapyo gat,
14030	PSA 8:9	mɨnam kwen akwaŋ gat, ae tap kɨlap ae yo morap tap kagagwan akwaŋ uŋun kɨsi nin dakon pɨŋbi ekwaŋ.
14031	PSA 8:10	Yawe, Amɨn Tagɨnin, mɨktɨmɨ mɨktɨmɨ gak dakon man pɨdaŋbisi.
14033	PSA 9:2	Yawe, butnokon da ya yaŋsi gayɨkeŋ. Pi tagɨsi morap agɨl uŋun do mɨŋat amɨnyo yoyɨkeŋ.
14034	PSA 9:3	Gak do nandaŋek kɨsɨk kɨsɨk abeŋ. Piŋkop Wukwisi, mango awɨgɨk do kap yokeŋ.
14035	PSA 9:4	Uwalno da gandaŋek pasal kwaŋ. Maŋ pagek kɨmak mudoŋ.
14036	PSA 9:5	Kɨla amɨn madep yɨtyɨt tamogokon yɨgek gen kokwin kɨlegɨsi asal. Aŋpakno kokwin aŋaki gen pikon teban tosot.
14037	PSA 9:6	Mɨktɨmɨ mɨktɨmɨ dɨma nandaŋ gamaŋ amɨn gen tebai yoyɨgɨl. Amɨn yokwi kɨlɨ paŋupbal agɨl, ae dagok dagogɨ mɨni amɨn da ɨŋtaŋ yomdaŋ.
14038	PSA 9:7	Uwal wagɨlsi tasɨk tawit. Piŋkop gak da kokup papni kɨlɨ paŋupbal agɨl, ae amɨn da ɨŋtaŋ yomdaŋ.
14039	PSA 9:8	Mani Yawe uŋun kɨla amɨn madep dagok dagogɨ mɨni egɨ wɨgɨsak. Uŋun kɨla amɨn madep yɨtyɨt tamonikon yɨgek gen kokwin pi ak do kɨlɨ tagap tagɨt.
14040	PSA 9:9	Uŋun aŋpak kɨlegɨkon da mɨŋat amɨn kabɨ morap dakon aŋpakni kokwin akdɨsak. Ae aŋpak tagɨsikon da mɨŋat amɨn kabɨ morap kɨsi kɨla akdɨsak.
14041	PSA 9:10	Uwalon jɨgɨ paŋ amɨn Yawe da tagɨsi paŋkutnosok. Jɨgɨ bɨsapmon uŋudon kɨŋek pasɨlgaŋ.
14042	PSA 9:11	Yawe, mɨŋat amɨnyo gak wɨsɨŋ gandak do pi aŋ amɨn manji dɨma yomɨsal. Yaŋ asal, do mango nandaŋ amɨn egɨp egɨpni gagon tosok yaŋsi nandaŋ.
14043	PSA 9:12	Yawe Saion kokup papmon uŋudon kɨla amɨn madep egɨsak. Kap yaŋek mani aŋkɨsini. Amɨn morap kɨsikon pi morap agɨt uŋun do yaŋ teŋteŋok ani.
14044	PSA 9:13	Yawe da jɨgɨ paŋ amɨn nandaŋ yomɨsak, ae kunam takba mɨrakni dɨma sopmaŋdak. Yokwi aŋ yomaŋ amɨn do kobogɨ yokwisi yomɨsak.
14045	PSA 9:14	Yawe, bupmɨ nandaŋ nabi. Uwal da jɨgɨ tepmɨyo namaŋ pɨndakgi. Palɨ kɨmot do asat, do yokwikon naŋ abɨdaŋaki tagɨsi egɨpbeŋ.
14046	PSA 9:15	Aŋpulugaŋbɨ yo morap agɨl dakon geni tagɨ yaŋek mango awɨgɨkeŋ. Saion kokup pap da wigaron agek yaŋ teŋteŋok aŋek yokwikon naŋ abɨdagɨl uŋun do kɨsɨk kɨsɨk abeŋ.
14047	PSA 9:16	Mɨktɨmɨ mɨktɨmɨ dɨma nandaŋ gamaŋ amɨn da nin tɨmɨt do gapma wayaŋ, mani iyɨ uŋungwan moŋ. Nin tɨmɨt do pat yopmaŋ, mani iyɨ uŋun paron yokwalaŋ.
14048	PSA 9:17	Yawe dakon gen kokwin pi agakni uŋun kɨlegɨsi yaŋ uŋun amɨn da nandaŋ ɨmaŋ. Amɨn yokwi amɨn dɨwarɨ paŋupbal ak do yo awit, mani uŋun yo yokwi da tobɨlek iyɨ baŋ paŋupbal awit.
14049	PSA 9:18	Piŋkop manji ɨmɨŋek yokwi aŋ amɨn morap uŋun kɨmakbi kokupmon paŋkɨ egɨpdaŋ.
14050	PSA 9:19	Bɨsapmɨ bɨsapmɨ Piŋkop da yoni mɨni amɨn dɨma ɨŋtaŋ yomɨsak. Jɨgɨni madepsi toŋ amɨn, uŋun Piŋkop da paŋpulugosak do nandaŋ gadat aŋek jomjom aŋ. Uŋun yum pɨndagakwan ɨsal dogɨn jomjom dɨma aŋ.