23218	MAT 1:5	Ne Salmón ne Rahab gupa ca Booz, ne Booz ne Rut gupa ca Obed, ne Obed gupa Isaí.
23245	MAT 2:7	Oraque bisenda caa be ca hombre ni riene de luceru que naga'chi', ne gunaba diidxa be laaca padxí ti biiya ca luceru que.
23276	MAT 3:15	Para rabi be laa: ―Zaa, peru bi'ni ni yanna, purti jma naquiiñe guni nu irá ni gudixhe Dios gaca'. Oraque ru guná Juan guluu nisa laabe.
23278	MAT 3:17	Oraque ucuá ti ridxi de ibá': ―Ndi nga Xiiñe ni nadxiee ne ni rusieche naa.
23281	MAT 4:3	Oraque beeda binidxaba ra nuu be, na rabi laabe: ―Pa dxandí Xiiñi Dios lii la? gudxi ca guie ca gaca ca pan.
23283	MAT 4:5	Oraque yené binidxaba que laabe ndaani guidxi Jerusalén ni rabi cabe Guidxi sti Dios, ne bidxiiba laabe ique yu'du ro' ra jma nasoo
23288	MAT 4:10	Oraque na be rabi be laa: ―Biree de ra nuaa binidxaba', purti cá lu Xqui'chi Dios, Dios si nga naquiiñe usisaca cabe ne guni cabe ni na.
23289	MAT 4:11	Oraque ru bixale binidxaba que de laabe, para beeda caadxi ángel bidii ni gudó be.
23304	MAT 5:1	Biiya si Jesús ma rí binni laa, gudxi'ba lu ti dani ne gurí raqué. Oraque bidxiña irá cani jma riuu nú laabe para iziidi ca'.
23340	MAT 5:37	Ora riní' tu la? lainí' “ya” pa huandí zuni tu ni, o pa qué zuni tu ni la? lainí' “co'”, peru cadi usiguii tu ne cadi cu' ru tu jma juramentu lú ni, purti cadi de Dios zeeda irá nga.
23356	MAT 6:5	Ne ora iní' né tu Dios la? cadi guni tu casi ca binni ni na nacha'hui peru cadi dxandí ni laa. Riula'dxi ca uzuhuaa ca ndaani yu'du para ini' né ca Dios. O pacaa la? runi ca ni lu calle para gu'ya binni. Gabe ca' laatu, zaa usisaca binni laacabe peru ngue si nga laani.
23395	MAT 7:10	O pa ninaba be laa ti benda, ñee nudii laabe ti beenda la?
23408	MAT 7:23	Oraque zabe laaca': “Qué runebia'ya laatu. Laguiree de ra nuaa', purti qué ñuu dxi ñuni tu jneza.”
23422	MAT 8:8	Oraque na capitán que rabi laabe: ―Iruti nga naa para cheu' ralidxe'. Uní' si, ne zacá zianda mozo stinne'.
23424	MAT 8:10	Ora bina diaga be xi uní' xaíque que la? bidxagayaa be ne na be rabi be cani nanda laabe que: ―Laguuya', nin lade cani za de Israel qué huadxela nin tobi ni napa fe bia' napa hombre ri'.
23428	MAT 8:14	Oraque guyé Jesús ralidxi Pedru, ne biiya nexhe né suegra be xindxá'.
23440	MAT 8:26	Para rabi be laaca': ―Xiñee cadxibi tu. Aque huaxié' napa tu fe xa, hombre ca'. Oraque biasa be ne gudxi be bi yooxho que guiaana dxí, ne zaqueca gudxi be ca ola que, ne oraqueca guta dxí cani.
23446	MAT 8:32	Oraque rabi be laaca': ―Laché. Ne oraqueca biree ca yechuu ca luguiá ca bihui que, ne mala biete ti ca bihui que de ra dxi'ba ca', yeguiaba ca ndaani nisa ne raqué guti ca'.
23447	MAT 8:33	Oraque bixooñe cani cayapa laacame, de yendá ca ndaani guidxi que, ne byui' né ca irá binni xi guca', ne ni bizaaca ca hombre ni udxite binidxaba que.
23449	MAT 9:1	Oraque biuu Jesús ndaani ti canuá ne udi'di sti ladu nisa que, para biuu xquidxi.
23450	MAT 9:2	Raqué nuu be bedané cabe ti hombre nexhe lu ti luuna', ma guti galaa. Ora bi'ya be pabiá' napa cani bedané binni huará que fe la? na be rabi be laa: ―Bieche, xiiñe', purti ma bine perdonar xpecadu lu'.
23454	MAT 9:6	Naa nga Hombre Biseenda Dios ne para ganna tu zanda gune perdonar pecadu ndaani guidxilayú ri la? laguuya ni chi gune ri'. Oraque na be rabi be ni huará que: ―Biasa, undisa jluuna lu' ne uyé rali'dxu'.
23455	MAT 9:7	Oraqueca biasa hombre que, zibí'.
23456	MAT 9:8	Ora bi'ya ca binni rí raqué ni bi'ni be que la? bidxibi ca ne bisisaca ca Dios pur enda nandxó' ni gudixhe lu ná binni guni.
23462	MAT 9:14	Oraque beeda ca discípulu sti Juan Bautista ra nuu be, ne na ca rabi ca laabe: ―Xiñee laadu ne ca fariseu, stale tiru riaana du sin idó' do, peru ca discípulu stiu' qué runi ca zacá.
23471	MAT 9:23	Ora bedandá be ralidxi xaíque que, biiya be ma nuu músicu cuxhidxi son gue'tu ne rí jma binni raqué cayuni ruidu.
23476	MAT 9:28	Oraque biuu be ndaani ti yoo ne beeda cani nacheepa lú que ra nuu be. Para rabi be laaca': ―Ñee runi cre tu zanda gusianda laatu la? ―Runi cre du, Señor, na ca'.
23477	MAT 9:29	Oraque guda'na be lú ca ne na be: ―Pa dxandí runi cre tu zanda gune ni la? zusianda laatu.
23484	MAT 9:36	Ora bi'ya be irá ca binni que la? biá be laaca', purti qué ganna ca xi guni ca ne iruti cayaca né laaca'. Nuu ca casi dendxu ni qué gapa pastor.
23487	MAT 10:1	Oraque guridxi be doce discípulu stibe que ne gudixhe be irá ndi ladxi ná ca': cuee ca binidxaba ni riguite ique binni, ne gusianda ca intiica enda huará ne yuuba'.
23548	MAT 11:20	Oraque bizulú Jesús gudinde né ca binni de ca guidxi ra jma uzá, purti qué niná ca ninaba ca perdón Dios neca biiya ca irá milagru ni bi'ni be.
23553	MAT 11:25	Oraque uní' né Jesús Dios, na: ―Bixhoze', lii nga runi mandar lu ibá' ne guidxilayú. Rudiee diuxquixe lii purti cucaachi lu ni cayuni lu ri' para cadi guiene cani nuu xpiaani ne cani na riene, peru culuí' lu ni cani zeda gaca casi ba'du'.
23555	MAT 11:27	Oraque rabi be ca binni que: ―Ma gudixhe Bixhoze irá xixé cosa ladxi naya'. Naa nga Xiiñi be ne iruti runibiá' naa jma que laabe, ne zaqueca iruti runibiá' laabe jma que naa ne cani racaladxe gunibiá' laabe.
23560	MAT 12:2	Ora bi'ya caadxi fariseu ni cayuni ca discípulu que la? na ca rabi ca Jesús: ―Biaa ca xpinni lu', cayuni ca ni cadi jneza guni binni dxi enda riziila'dxi'.
23563	MAT 12:5	O laca qué huayuunda tu ra cá lu ley sti Moisés xi runi ca sacerdote ni nuu ndaani yu'du ro' la? laca qué rapa ca dxi enda riziila'dxi peru qué rigui'ba donda ique ca'.
23580	MAT 12:22	Oraque bedané cabe ti hombre ra nuu be udxite binidxaba ique ne ma nacheepa lú ne qué randa riní'. Para bisianda be laa, ne óraque ma gunda biiya ne uní'.
23596	MAT 12:38	Oraque na caadxi maistru de ley ne caadxi fariseu, rabi laabe: ―Maistru, xiñee qué uluí' lu laadu ti seña xaibá' para ganna du dxandí nandxó' lo'.
23601	MAT 12:43	Ora iree ti binidxaba de ndaani ladxidó' binni la? riree, ma canazá ndaani gui'xhi', canayubi ra iziila'dxi'. Gu'ya si qué idxela, óraque na': “Zabigueta ralidxe ra biree'.”
23607	MAT 12:49	Oraque biluí' ná be ca discípulu stibe, ne na be: ―Ca ndi nga jñaa ne biche'.
23635	MAT 13:27	Oraque beeda ca mozo que ra nuu xpixuaana ni, ne na ca': “Señor, cadi ladxa semiá si bidxiiba lu la? Xi guca xa yanna, nucha ni baladxi'.”
23636	MAT 13:28	Para na xpixuaana ni: “Laca tu laa nanala'dxi naa, beda guni ni.” Oraque na ca mozo que: “Racala'dxu chi gaxha du cani la?”
23654	MAT 13:46	Ora bi'ya jma risaca ni que irá xixé perla la? yeutoo irá ni napa para uzí' ni.
23659	MAT 13:51	Oraque unaba diidxa be ca discípulu stibe pa biene ca ni gudxi be laaca que. Para na ca': ―Biene du, Señor.
23674	MAT 14:8	Oraque gudxi jñaa badu dxaapa que laa xi inaba'. Para uyé ra nuu be ne rabi laabe: Racaladxe udiiu naa ique Juan Bautista ndaani ti bladu'.
23678	MAT 14:12	Oraque uyé ca discípulu sti Juan, yecaa ca cuerpu que ne yeucaachi ca ni, para yetidxi ca Jesús xi guca'.
23683	MAT 14:17	Oraque na ca': ―Qué gapa di du gasti rarí jma que gaayu pan ne chupa benda.
23685	MAT 14:19	Oraque bicuí be ca binni que lú ca guixi huiini nuu raqué ne ucuaa be gaayu pan ne chupa benda que ne undisa lú be ibá' bidii be diuxquixe Dios. Para gundaa be cani ne bidii be cani ca discípulu que para gudiizi cani lú ca binni que.
23688	MAT 14:22	Oraque ru gudxi be ca discípulu stibe chu' ca ndaani canuá que, che gá ca sti ladu nisa que, laga gabi si be ca binni que ma che be.
23695	MAT 14:29	Para na be rabi be laa: ―Gudá'. Oraque biete Pedru de ndaani canuá que zizá lu nisa, ze ra nuu be.
23697	MAT 14:31	Oraqueca bisigaa ná Jesús gundisa laabe ne na rabi laabe: ―Aque huaxié' fe napu xa. Xiñee bidxibi lu, hombre.
23699	MAT 14:33	Oraque bizuxibi ca xcaadxi ni nuu ndaani canuá que xañee be ne na ca': ―Dxandí pe Xiiñi Dios lii.
23712	MAT 15:10	Oraque guridxi Jesús irá binni nuu raqué ne na rabi laaca': ―Laucaa diaga ne laguiene chaahui ndi':
23718	MAT 15:16	Oraque na be: ―Ñee nin laatu ca'ru guiene tu la?
23729	MAT 15:27	Oraque na: ―Nanna, Señor, peru laca ro bi'cu bigú ni riaba xa mexa sti xpixuaana'.
23734	MAT 15:32	Oraque guridxi be ca discípulu stibe ne rabi be laaca': Caya'ya ca binni ri purti ma chonna gubidxa nuu né cabe naa ne qué gapa cabe ni go cabe. Qué na'ya guseenda laacabe sin go cabe, paxa ora gueda guiaba cabe neza.
23736	MAT 15:34	Oraque rabi be laaca': Panda ga pan napa tu ya'. Para na ca': Gadxe, ne chupa chonna benda huiini'.
23737	MAT 15:35	Oraque gudxi be ca binni que cui ca layú.
23743	MAT 16:2	Peru laabe laga rabi be laaca': ―Ora ma chi guiaazi gubidxa ne gu'ya tu naxiñá ibá', óraque na tu: “Qué ziaba nisa guie ixí' purti naxiñá ibá'.”
23748	MAT 16:7	Oraque na ca': ―Cayabi be ndi laanu tisi qué ñedané nu pan.
23757	MAT 16:16	Oraque na Simón Pedru rabi laabe: ―Lii nga Cristu, Xiiñi Dios ni nabani.
23763	MAT 16:22	Oraque guridxi Pedru laabe ti ladu ne bizulú cayabi laabe: ―Dios gu'ya qué izaaca lu ni nou' ca.
23767	MAT 16:26	Paraa iquiiñe ni binni pa guni ganar idubi guidxilayú peru guniti xhialma. O pagala zanda quixe binni saca ulá xhialma.
23773	MAT 17:4	Oraque na Pedru rabi laabe: Aque galán nuu nu rarí nja'. Pa racala'dxu la? zucui du chonna ranchu huiini', tobi para lii, ne stobi para Moisés ne stobi para Elías.
23776	MAT 17:7	Oraque bidxiña Jesús ne uda'na laacabe, na: ―Laguiasa, cadi idxibi tu.
23779	MAT 17:10	Oraque unaba diidxa ca discípulu stibe laabe, na ca': ―Xiñee na ca maistru de ley zeeda Elías ante gueeda ni nexhe guseenda Dios que ya'.
23782	MAT 17:13	Oraque ru biene ca discípulu cuzeete be Juan Bautista nga Elías.
23783	MAT 17:14	Ora yendá cabe ra nuu binni la? bidxiña ti hombre ra nuu be, bizuxibi xañee be, na rabi laabe:
23786	MAT 17:17	Oraque na Jesús: ―Aque qué runi cre tu xa, binni ca', ne naguidxi ladxidó' to. Dede padxí naquiiñe guiaana nia laatu ne gune huantar laatu ya'. Latané laabe rarí yanna.
23793	MAT 17:24	Ora yendá cabe ndaani guidxi Capernaum, beeda caadxi hombre ni ruquixe impuestu sti yu'du ro' ra nuu Pedru, ne unaba diidxa ca laabe pa riguixe xpixuaana cabe impuestu.
23817	MAT 18:21	Oraque bidxiña Pedru ra nuu be ne na rabi laabe: ―Señor, panda tiru gune perdonar ti hermanu ni uchee ne naa. Ñee bia' gadxe la?
23822	MAT 18:26	Oraque bizuxibi be xa ñee rey que, ne na be rabi be laa: “Señor, biá naa, uleza naa caadxi, ti quixe ni.”
23825	MAT 18:29	Oraque bizuxibi ngue xañee be ne na: “Biá naa, uleza naa caadxi, ti quixe ni.”
23834	MAT 19:3	Oraque beeda caadxi fariseu ra nuu be, cuyubi ca modo usaba ca laabe pur ni iní' be. Para na ca rabi ca laabe: ―Ñee nou' jneza ilaa né cabe xheela cabe pur intiica cosa la?
23835	MAT 19:4	Oraque rabi be laaca': ―Qué xa huayuunda tu ra cá xi bi'ni Dios dxi bizulú bizá' binni. Bizá' be hombre ne gunaa,
23842	MAT 19:11	Oraque na be rabi be laaca': ―Cadi irá zanda guiaana sin ichaganá', sínuque cani ma nexhe ni para laa.
23844	MAT 19:13	Oraque bedané cabe caadxi ba'du ra nuu Jesús para quixhe ná luguiá ca' ne iní' né Dios pur laaca'. Ne ora bi'ya ca discípulu que zeeda cabe la? udinde né ca laacabe.
23849	MAT 19:18	Oraque na be: ―Uná mandamientu. Para na Jesús rabi laabe: ―Cadi guuti lu binni, cadi chu' neu ni cadi xheelu', cadi cuana lu', cadi cueeu falsu luguiá stobi.
23852	MAT 19:21	Para na Jesús rabi laabe: ―Pa qué racala'dxu usiaadxa lu nin caadxi la? yeutoo ni napu', ne bidii ni ca pobre ne zapu stale ni risaca ibá'. Oraque dananda naa.
23854	MAT 19:23	Oraque na Jesús rabi ca discípulu: ―Gabe ca' laatu, nabé nagana zaca para ricu chu' lade ca xpinni Dios.
23858	MAT 19:27	Oraque na Pedru rabi laabe: ―Laadu ya', xi zacaa du, ma bisaana du irá xixé ne ma beda nanda du lii.
23881	MAT 20:20	Oraque bidxiña né xheela Zebedeu iropa xiiñi ra nuu Jesús, ne bizuxibi xañee Jesús ne na rabi laabe pa zuni be xiixa para laa.
23882	MAT 20:21	Para na be rabi be laa: ―Xi racala'dxu gune'. Oraque na gunaa que: ―Xiñee qué cueeu ti orde cui iropa xiiñe ri cue' lu dxi guni mandar lu', tobi ladu derechu ne stobi ladu biga'.
23884	MAT 20:23	Oraque na be: ―Dxandí zacaná tu ne zadi'di tu casi chi tide', peru para cui tu cuee ladu derechu ne ladu biga la? cadi nexhe ni lu naya para gudiee', purti maca gudixhe Bixhoze tuu nga icaa ni.
23890	MAT 20:29	Ora biree cabe de Jericó, yenanda jma binni laabe.
23892	MAT 20:31	Oraque udinde né ca binni que laaca para nigani ca', peru laga jma rusi reciu bicaa ca ridxi ne na ca': ―Señor, Xiiñi David, biá laadu.
23895	MAT 20:34	Oraque biá Jesús laaca ne uda'na lú ca'. Ne oraqueca bixele lú ca' ne yenanda ca laabe.
23896	MAT 21:1	Ma zeda dxiña cabe Jerusalén, bedandá cabe Betfagé, cue' dani lá Olivo. Ne de raqué na Jesús rabi chupa discípulu sti':
23907	MAT 21:12	Oraque biuu be ndaani yu'du ro' sti Dios, ne guladxi be irá cani cutoo ne ni cazí' ndaani yu'du que, ne bitiixhi be jmexa cani cuchaa bidxichi ne xpangu cani cutoo paloma.
23915	MAT 21:20	Ora bi'ya ca discípulu ni, nabé bidxagayaa ca ne na ca': ―Ximodo gunda bibidxi yaga ca casi ze'.
23920	MAT 21:25	Xi na tu de ni bi'ni Juan ra beda nduu nisa binni ya'. De Dios zeeda ni la? o de binni guidxilayú. Oraque ucuaa yu né ca ni ne na ca': ―Pa gabi nu laabe zeeda ni de Dios la? zabi be laanu xiñee qué ñuni cre nu ni.
23921	MAT 21:26	O pa gabi nu laabe zeeda ni de binni guidxilayú la? gapa gá si nu laanu ne idubi guidxi ri' purti napa cabe Juan de profeta sti Dios.
23922	MAT 21:27	Para na ca rabi ca laabe: ―Qué ganna di du. Oraque rabi be laaca': ―Nin naa qué zabe laatu tu gudxi naa gune ni rayune ri'.
23925	MAT 21:30	Oraque bidxiña be ra nuu stobi que, ne zaqueca gudxi be laa. Para na rabi laabe: “Nagasi ma chaa', apá.” Peru qué ñe.
23926	MAT 21:31	Yanna xi na tu. Uná de lade iropa cabe bi'ni ni na bixhoze. Para na ca': ―Primé que. Oraque na be rabi be laaca': ―Gabe ca' laatu, jma nagueenda ziuu cani ruquixe impuestu ne ca gunaa dxaba ra runi mandar Dios que laatu.
23937	MAT 21:42	Oraque na be rabi be laaca': ―Qué huayuu dxi gu'nda tu lu Xqui'chi Dios ra cá ca diidxa ri la? Guie ni bisa'bi cani cucuí yoo que, guie que pe naaze yoo que yanna. Nga nga ni bi'ni Dios, ne para laanu ma enda ridxagayaa ni.
23949	MAT 22:8	Oraque na be rabi be ca xpinni be: “Dxandí ma nuu enda xheela ri para gaca', peru qué iquiiñe cani bine invitar para laani.
23952	MAT 22:11	Oraque biuu be cayuuya be irá ca' ne biiya be nuu ti hombre cadi nacu lari para enda xheela'.
23954	MAT 22:13	Oraque rabi be cani canaguiizi': “Laundiibi ná be ne ñee be, ne laundaa laabe lu guelacahui ne raqué nga gu'na be dede go yaa be guidi ruaa be.”
23956	MAT 22:15	Oraque biree ca fariseu yení' stiidxa ca ximodo zanda usaba ca Jesús lu stiidxa'.
23961	MAT 22:20	Oraque rabi be laaca': ―Tu cá lú ni.