23233	MAT 1:20	Ne leettsa ngetsow Che xgab laa Che Mari, lee thib mandad chaan Diox cha ngwani lo Che lo mkaal, ne nzhab lo Che: ―Che, lu nak thib zha raz rey David, yat leettsooʼa kaaʼa Mari, tak lee Mari ngoo zhiinn por yalney chaan Mbi Nayon,
23236	MAT 1:23	Lee thib nzaa kuu ter gak rop thib mbyi, yo zhiinn ne gap thib mbet; ne tob le zha mbet Emanuel, (diiz ree nak: “Diox ndo kon lee”). [Is. 7:14]
23240	MAT 2:2	Ne mnaabdiz re zha, nzhab zha: ―¿Ma mbet kuu gak rey chaan re zha Israel, kuu ngola? Tak asta ta nlen wiz mwii nee mbel chaan mbet, kona ndyaad nee gol nee lo mbet.
23243	MAT 2:5	Tsa lee re zha nzhab: ―Yez Belén, kuu nzi yezlyu Judea; tak tabaa nkey lo xkeets Diox kuu mkee profet, or kuu nzhab profet:
23246	MAT 2:8	Tsa mtaal Herodes re zha yez Belén, ne nzhab rey lo re zha: ―Gwa goo, gwakwaan goo mbet, ne leettsa yetsal mbet lo goo, ko goo diize lon, tsa no na ya gol lo mbet.
23251	MAT 2:13	Leettsa lee re zha kuu nteed kwent chaan mbel mroo ndya, lee thib mandad chaan Diox ngwani lo Che lo mkaal ne nzhab lo Che: ―Gwache, ne teno mbet kon xnaa mbet, tyee goo par yezlyu Egipto, ne kwet goo tya asta or nin lo goo roo goo tya, tak lee rey Herodes nkwaan mbet par kuth mbet.
23253	MAT 2:15	ne tya ngoo zha asta nguth Herodes; tsa mrolo kuu nzhab Zha Nabee, por roo profet kuu ngoo ndala leettsa nzhab profet: “Asta yez Egipto mrezʼn xgann na”. [Os. 11:1]
23258	MAT 2:20	―Gwache, teno mbet ne xnaa mbet ne bretab yezlyu Israel tedib welt, tak ngutha re zha kuu nlaaz kuth mbet.
23261	MAT 2:23	Ne mzin Che ngoo Che yez kuu le Nazaret. Tsa mrolo kuu nzhab re profet, leettsa nzhab re zha: “Nazaren tob le re men Jesús”.
23263	MAT 3:2	Ne nzhab Juan: ―¡Btsee goo mod went kuu nak goo, tak lee wiz kuu lee Diox nabee lo goo mzin gaxa!
23264	MAT 3:3	Ne Juan ree mteth profet Isaí, leettsa nzhab profet: Lee thib zha kuu ndo yubiz, dib gan zha kwez zha: “Thib nali bloo goo leettsoo goo, par kayaa goo Zha Nabee, ne nali gok goo lo re kuu ntsow goo”. [Is. 40:3]
23268	MAT 3:7	Per or mwii Juan kwathoz re zha fariseo ne re zha saduceo ndyaad gakleyy lo Juan, tsa nzhab Juan lo re zha: ―¡Goo nak zha kuu nakap nak taxal mbeel! ¿Cho ne lo goo tak laa goo lo yalnayii chaan Diox, kuu yaad leettsa lux yezlyu?
23270	MAT 3:9	ne rubt goo gab goo: “Zhiinn Abraham nak nee”. Kona tegal ndaa nee falt tekayaa Diox nee, tak wlipaa na nin lo goo, lee Diox tak tsow lo re ke ree roo zhiinn Abraham, kona ndechet Diox goo.
23275	MAT 3:14	Ner mzhyalt Juan, tsa nzhab Juan lo Jesús: ―Lu ndoblo tsowleyyʼn. ¿Chebee leel lu ndyaad gakleyy lon?
23276	MAT 3:15	Lee Jesús mkab, ne nzhab: ―Bloo kona yeka nal, tak ropaa ndoblo tsow kuu nlaaz Diox. Tsaraa mzhyal Juan mtsowleyy Juan Jesús.
23278	MAT 3:17	Tsa mbin re men thib bos kuu mroo yibaa kuu nzhab: ―Zha ree nak xgann na kuu kwathoz nke leettsoon, ne kwathoz wen nzo leettsoon nen zha.
23281	MAT 4:3	Tsa lee Maxuuy mbig lo Jesús, tsa naa chu tetsow Jesús kuu gab Maxuuy, tsa nzhab Maxuuy lo Jesús: ―Os leeʼa wlipaa Xgann Diox naka, bloo leeʼa nak Xgann Diox, guz tsa lee re ke ree reyal pan.
23282	MAT 4:4	Per lee Jesús mkab, ne nzhab: ―Lo xkeets Diox nzhab: “Nabant men kon beeta pan, sinke lee men naban por re diiz kuu ndroo roo Diox”. [Dt. 8:3]
23284	MAT 4:6	ne nzhab Maxuuy lo Jesús: ―Os leeʼa wlipaa Xgann Diox naka, bloo leeʼa nak Xgann Diox, brethin par yath, yent kwan taka, tak lee lo libr chaan Salm nzhab: “Lee Diox taal mandad chaan Diox, tsa ten mandad lu kon yaa mandad, tsa gabta lo ke”. [Sal. 91:11-12]
23285	MAT 4:7	Tsa lee Jesús nzhab: ―Noga nzhab lo xkeets Diox: “Kithnota Diox kuu nak Zha Nabee loʼa”. [Dt. 6:16]
23287	MAT 4:9	Tsa nzhab Maxuuy lo Jesús: ―Reta koree tan loʼa, os leeʼa tobxuba lon ne gola lon.
23288	MAT 4:10	Tsa nzhab Jesús lo Maxuuy: ―Beche lon goltʼn loʼa, tak lo xkeets Diox nzhab: “Bil lo Diox kuu nak Zha Nabee loʼa, ne beeta lo Diox ndoblo gona diz”. [Dt. 6:13]
23295	MAT 4:17	Desde tsya mndelo Jesús mndaa kwent xkiiz Diox, ne nzhab Jesús: ―Btsee goo mod went kuu nak goo, tak lee wiz kuu lee Diox nabee lo goo mzin gaxa.
23297	MAT 4:19	Tsa nzhab Jesús lo rop zha: ―Bteke goo ditsʼn, tsa tsowʼn gak goo zha kuu niit men par Diox.
23306	MAT 5:3	―Wen nzo leettsoo Diox ne Diox re goo kuu nyeen leettsoo ndeche Diox, tak Diox taa diiz tab goo ta nabee Diox.
23307	MAT 5:4	’Wen nzo leettsoo Diox ne Diox re goo kuu nzhonn, tak mndaa goo falt, tak lee goo tetsey leettsoo goo.
23308	MAT 5:5	’Wen nzo leettsoo Diox ne Diox re goo kuu nadoo nak, tak lee goo kayaa yezlyu kuu taa Diox.
23309	MAT 5:6	’Wen nzo leettsoo Diox ne Diox re goo kuu nlaaz tsow re kuu nali, tak goo nak taxal zha kuu nlann ne nzheek leettsoo, ne lee goo tse leettsoo.
23310	MAT 5:7	’Wen nzo leettsoo Diox ne Diox re goo kuu nlat leettsoo ne taben, tak talat leettsoo Diox ne Diox goo.
23311	MAT 5:8	’Wen nzo leettsoo Diox ne Diox re goo kuu nambi leettsoo, tak lee goo wii lo Diox.
23312	MAT 5:9	’Wen nzo leettsoo Diox ne Diox re goo kuu ntsow wen kwin re men, tak lee goo role zhiinn Diox.
23313	MAT 5:10	’Wen nzo leettsoo Diox ne Diox re goo kuu ndreke re men dits, tak ntsow goo kuu wen, tak chaan goo nak ta nabee Diox.
23314	MAT 5:11	’Wen nzo leettsoo Diox ne Diox re goo, leettsa ntsalzhoo zha goo ne ndreke zha dits goo, ne nkedi zha ni zha ndota kuu went lo goo, tak tataka mreke zha dits re profet kuu ngoo ndala.
23316	MAT 5:13	’Goo nak taxal ted lo yezlyu ree, per os lee ted natsigt ted, ¿xomod gak natsig ted tedib welt? Lortsint raay, sinke kobi zhay, tsa lo re men ditse.
23317	MAT 5:14	’Goo nak taxal xni lo yezlyu. Leeka tata, gagt gaats thib yez kuu nzi yek yii.
23320	MAT 5:17	’Tsowt goo xgab leen ndyal luux ley kuu mkee Moisés, ne re kuu nzhab ne re kuu mkee re profet kuu ngoo ndala, sinke leen ndyal tsow kuu nzhab ley ne kuu nzhab re profet.
23324	MAT 5:21	’Ne mbin goo kwan nzhab Moisés lo re teyaa zha ndala, leettsa nzhab Moisés: “Kuthta tabena, ne loka cho kuth taben, lee Diox naab kwent lo zhaʼa ne laat zha”.
23325	MAT 5:22	Per lee na ni lo goo, loka cho kuu gak nayii lo taben, tenaab Diox kwent lo zhaʼa, ne loka cho gab lo taben “zha nad”, tenaab jwez kwent lo zhaʼa ne laat zhaʼa, ne loka cho gab “bxen” lo taben, zhaʼa nak thib zha kuu ndoʼa net ndya gabil.
23326	MAT 5:23	’Kona os leeʼa ndyaadnoʼa gona lo bkoog chaan Diox, ne ora telaaza mndaaʼa thib falt lo wetsa,
23328	MAT 5:25	’Os lee thib zha kuu nayii neʼa, teno zha lu lo zha kuu nak tsiin par keki zha lu, kwaan mod tsa wen yaana kon lee zha, or bee ter kwez zha lu lo zha kuu nak tsiin, tak os leeʼa yaanta wen kon zha kuu nayii neʼa, cha yataa zha lu lo zha kuu naab kwent loʼa, ne lee zha kuu naab kwent lo lu taa zha lu lo zha kuu nkenap roo tsib, tsa ko zha lu tsib.
23330	MAT 5:27	’Ne mbina goo nzhab Moisés: “Gagt rop goo kon thib zha kuu nagt tsaal goo”.
23334	MAT 5:31	’Ne noga nzhab Moisés: “Loka cho mbyi kuu laa tsaal, ndoblo taa zha thib yeets kuu mroo yuulow, kuu nzhab lee zha mtso rop tsaal”.
23336	MAT 5:33	’Noga mbin goo nzhab Moisés lo re teyaa zha ndala: “Lortsinta le Diox par tseloʼa, sinke btsow kuu nzhaba tsowa lo Zha Nabee”.
23340	MAT 5:37	Sinke nali ndoblo tediz goo gab goo “wliy” o “wlite”. Tak os lee goo tsowt goo tabaa, went kuu ntsow goo.
23341	MAT 5:38	’Noga mbin goo nzhab Moisés: “Os lee thib zha koo ngutlo tedib zha, tataka ndoblo tsow zha lo zhaʼa, ne os lee thib zha koo keley tedib zha, tataka ndoblo tsow zha lo zhaʼa”.
23346	MAT 5:43	’Tak noga mbin goo nzhab Moisés: “Bke leettsooʼa tabena, ne byii ne zha kuu nayii neʼa”.
23349	MAT 5:46	Os lee goo nke leettsoo goo beeta re zha kuu nkelaaz goo, ¿kwan tsow goo gan? Tak tataga ntsow re zha kuu ndab falt, kuu ntsow kobral temi chaan yezlyu kuu nzhax lo zha Roma.
23350	MAT 5:47	Ne os lee goo ni goo “diox”, beeta lo re zha kuu nak raz chaan goo. ¿Kwan kuu wen ntsow goo tsa? Noga re zha kuu nagt zha Israel tata ntsow, ne yent kwan kayaa zha lo Diox.
23352	MAT 6:1	’Kenap goo goo, tsowt goo kuu wen beeta par wii re men lo goo; os lee goo tata ntsow goo, neeka thib kwaa kayaat goo lo Xutaa Diox kuu ndob yibaa.
23353	MAT 6:2	’Kona leettsa taa goo karida lo thib zha kuu ndechey, tetht gooy lo re men ne gab goo: “Nlazʼn ne goo leen mtsow ayud zha kuu ndechey”, taxal ntsow re zha kuu nkedi, re zha kuu zhaa kuu mbez ne zhaa kuu ntsow. Tak tabaa ntsow re zhaʼa, ta nkaltaa reʼaa nteedaa xkiiz Diox, noga ntsow zhay net, tsa wen ni re men zha. Wlipaa na nin, beeta kona nak kuu tsow zha gan.
23356	MAT 6:5	’Kona nin lo goo, leettsa tediz goo lo Diox, tsowt goo taxal ntsow re zha kuu nkedi, re zha kuu zhaa kuu mbez ne zhaa kuu ntsow zha. Re zhaʼa nyow leettsoo zha tediz zha lo Diox, ta nkaltaa reʼaa nteedaa xkiiz Diox ne re net, tsa wii re men lo zha lee zha ngetediz lo Diox. Wlipaa na nin, beeta kuu tsow zha gan nak, wen ni re men lo zha, per lo Diox yent kwan tsow zha gan.
23358	MAT 6:7	’Ne leettsa tediz goo lo Diox, gabt goo thibka lan diiz tyen welt, taxal ntsow re zha kuu nagt zha Israel. Tak lee re zhaʼa ntsow zha xgab ton Diox xkiiz zha, ne taa Diox re kuu naab zha, tak nol ndediz zha lo Diox.
23365	MAT 6:14	’Ne os lee goo, koo goo yek goo reta falt kuu mtsow re taben goo lo goo, noga Xutaa kuu ndob yibaa tetuyy re falt chaan goo.
23367	MAT 6:16	’Kona nin lo goo, leettsa tsow goo ayun, tak ntsow goo xgab tata mas wen nzo leettsoo Diox ne Diox goo, leettsa nzhowt goo neeka thib kwaa, tsowt goo taxal thib zha nalatt, taxal ntsow re zha kuu nkedi, re zha kuu zhaa kuu mbez ne zhaa kuu ntsow. Kwathoz nabil ntsow zha, tsa reta men ne lee zha ngetsow ayun. Per wlipaa na nin lo goo, napa zha kuu tsow zha gan.
23370	MAT 6:19	’Kaltaat goo kwathoz kwaa lo yezlyu ree, tak lo yezlyu ree nke mbete ne nke yitoy, ne ndaab wann nlowann wann.
23373	MAT 6:22	’Os leeʼa ndablaazta re kuu yezlyu ree kuu ngwiiʼa, kona nak nagwe ngutloʼa ne wen nyeni ngutloʼa, tak wiiʼa re kwaa ne tablaazt luy.
23375	MAT 6:24	’Neeka thib zha gagt ke tsiin lo chop zha, tak teyii zha ne thib zha, ne lee tedib zha kelaaz zha, lo thib zha gon zha diiz, lee lo tedib zha gont zha diiz. Gagt lortsin goo lo Diox ne lo re kwaa yezlyu ree.
23376	MAT 6:25	’Kona nin lo goo: Yat leettsoo goo por re kuu wu goo ne kuu gu goo, tsa ban goo, neeka tsowt goo xgab re lar kuu gok goo. ¿Chu nagt masraa nataak yalnaban goo, nake kuu nzhow goo, kuu nzhuu goo ne kuu nzhok goo?
23377	MAT 6:26	Wii goo lo re min kuu nlazbi, nzhannt maa, neeka nthopt maa yalgonn, neeka ngotsowt maa yalgonn leen loo, per lee Xutaa kuu ndob yibaa ndaa loww maa. ¡Chu nagt masraa nataak goo nake re min!
23378	MAT 6:27	Tsowt goo xgab re kona, tak ¿cho thib goo kuu kwathoz nlaaz ban telut, per tegal nlaaz gooy, gagt tsow goo ban goo neeka telut?
23379	MAT 6:28	’¿Ne chebee kwathoz ntsow goo xgab, naa xomod tsanaa goo lar kuu gok goo? Mas wen wii goo lo re yee kuu ndab wan; nket yee tsiin ne neeka ndexkwaat yee lar.
23381	MAT 6:30	Ne os lee Diox ntsow chul nyaal re yizh kuu ndab wan naltseree, ne lee tedib wiz nzheeke, ¿chu nagt tataga taa Diox reta kuu ndeche goo lo goo, men kuu lutta nyelaaz Diox?
23382	MAT 6:31	Ne yat leettsoo goo gab goo: “¿Kwan dowaa o kwan guʼaa ne kwan gokaa?”
23386	MAT 7:1	’Naabt goo kwent lo tedib zha, tsa naabt Diox kwent lo goo.
23388	MAT 7:3	¿Chebee nye leettsooʼa ngwiiʼa lo paj kuu nzo ngutlo tedib zha, ne ngwiita lo ya kuu nzo ngutloʼa?
23389	MAT 7:4	Ne os leeʼa nyeenta nzo ya ngutloʼa, ¿xomod nye leettsooʼa mbeza lo tedib zha: “Laa gon paj kuu nzo ngutloʼa”?
23390	MAT 7:5	¡Zha nkedi, zhaa kuu mbeza ne zhaa kuu ntsowa! Ner bloo ya kuu nzo ngutloʼa, tsa tak wiiʼa wen, tsa tak kooʼa paj kuu nzo ngutlo tedib zha.
23391	MAT 7:6	’Taat goo re kuu nayon lo re mbak, tak cha yii maa lo goo ne wuley maa goo. Ne neeka taat goo re ke kuu nzhol kuu kwathoz nataak lo re nguch, tak nataagte lo maa, cha lo maa ditse ne luux maay.
23392	MAT 7:7	’Kona nin lo goo, kon dib ndroo leettsoo goo bnaab gooy lo Zha Nabee, ne lee Zha Nabee taay; ne nake taxal nkwaan goo thib kuu ne tatsale lo goo; noga nake taxal nteez goo roo yuu, tsa xaal zha roo yuu lo goo.
23394	MAT 7:9	’Os lee zhiinn goo naab tsa pan lo goo, ¿chu tataa goo thib ke lo zhiinn goo? Wlipaa taat gooy.
23395	MAT 7:10	Ne os lee zhiinn goo naab thib mbel lo goo, ¿chu tataa goo thib mbeel lo zhiinn goo? Wlipaa tsowt goo tata.
23396	MAT 7:11	Ne leeka tata tegal zha kuu kwathoz went nak goo, per nzhaak goo ndaa goo kuu wen lo zhiinn goo, ¡xomod lee Xutaa kuu ndob yibaa, taat kuu wen lo reta zha kuu naabe lo Xutaa!
23397	MAT 7:12	’Kona, leeka taxal nlaaz goo tsow tedib net re men lo goo, tataga btsow goo lo zha; tak tata nzhab lo ley kuu mkee Moisés, ne tataka nzhab re kuu mkee re profet kuu ngoo ndala.
23398	MAT 7:13	’Btaab goo roo pwert kuu naya. Tak lee net naxen ne roo pwert kuu naxen, ndano zha ta lux zha thitanax. Ne kwathoz zha nden neta.
23400	MAT 7:15	’Bkenap goo goo, yelaazt goo kuu ne re zha kuu nkedi lo goo nal tyemp ree: “Tak ne zha na nak profet”. Ne nadoo nzhak zha taxal mbak zhiil, ne lee leettsoo zha nayii nzo taxal mbeez kuu nayii.
23406	MAT 7:21	’Ret men kuu ni lon: “Zha Nabee, Zha Nabee”, tab ta nabee Diox, sinke beeta re zha kuu ntsow kuu nlaaz Xutʼn kuu ndob yibaa, tab ta nabee Diox.
23407	MAT 7:22	Ne lee wiza kwathoz zha tablaaz, taa Diox diiz to zha kon Diox, tsa ne zha lon: “Zha Nabee, re nee ngok profet kuu mndaa kwent xkiiza, ne kon yalnabee chaana mloo nee mbi fyer, ne kon yalnabee chaana mtsow nee naroob kwaa”.
23408	MAT 7:23	Per tsa kabʼn ne nin: “¡Thitanax mlebeetʼn goo, beche goo lon, men kuu ntsow kuu went!”
23409	MAT 7:24	’Kona, loka zha kuu ngeyon kuu ngenin lo goo, ne ntsow zha kuu nin, zhaʼa nak taxal thib mbyi list kuu mta liz dits ke.
23416	MAT 8:2	Ne xid re mena mroo thib mbyi kuu ndeye kwerp, mbig lo Jesús ne mtobxub, ne nzhab zha: ―Zha Nabee, os leeʼa nlaaza, tak tegweʼa na lo yiz ree.
23417	MAT 8:3	Tsa mxoob Jesús yaa Jesús dits zha, ne nzhab Jesús lo zha: ―Nlazʼn, weʼa. Ne oraaka mgwe zha.
23418	MAT 8:4	Tsa nzhab Jesús lo zha: ―Wii, yent cho lo gaba koree. Sinke gwa lo ngwleyy ne btaa gona taxal nabee ley chaan Moisés, gon kuu ndaa re zha kuu mgwe lo yiz kuu mzhaaka, tsa ne ngwleyy leeʼa mgweʼa ne gab ngwleyye lo re men.
23420	MAT 8:6	ne nzhab: ―Zha Nabee, lee mos da kwathoz ne ndak, gagt gwin zha ne kwathoz ndakti zha.
23421	MAT 8:7	Tsa nzhab Jesús lo soldad: ―Nal yan tsa tegwen zha.
23422	MAT 8:8	Tsa lee soldad kuu nabee lo thib gayoo soldad nzhab: ―Zha Nabee, ndoblotʼn taba leen lizʼn, anta nabee ne lee mos da gwe.
23423	MAT 8:9	Tak noga na napʼn zha kuu nabee lon, ne noga na napʼn soldad kuu nabeen lo. Os leen gapʼn lo thib zha: “Gwa”, ne nya zha; ne or gapʼn lo tedib zha “De”, ne nyaad zha; ne leettsa mbezʼn lo mos da “Tsow koree”, ntsow zhay.
23424	MAT 8:10	Kwathoz mzegey leettsoo Jesús mbin Jesús kona, tsa nzhab Jesús lo re zha kuu ndeke dits Jesús: ―Wlipaa na nin lo goo, ¡neeka thib re tawlazaa zha Israel nyelaazt Diox taxal mbyi ree!
23427	MAT 8:13	Tsa nzhab Jesús lo mbyi kuu nabee lo thib gayoo soldad: ―Tyee liza, tak ngwalaaza lee Diox tak tegwe, kona mgwe mosa. Leeka ora lee mos soldad mgwe.
23431	MAT 8:17	Koree ngok, tsa mrolo kuu mkee profet Isaí zha ndala, leettsa nzhab profet: “Lee zha mbe reta yiz chaanaa ne re yalne chaanaa”. [Is. 53:4]
23433	MAT 8:19	Ne ora lee thib maestr kuu nloo xkiiz Diox mbig lo Jesús, ne nzhab: ―Maestr, nlazʼn teken ditsa loka pa ta yaʼa.
23434	MAT 8:20	Ora mkab Jesús lo maestr, ne nzhab Jesús: ―Lee re mbeet nap maa kelyoo ta nyoo maa, ne lee re min nap maa lyaat maa; per lee na Kuu Mzin Ngok Men, neeka ta xoobʼn yekʼn roxkwan na naptʼn.
23435	MAT 8:21	Tsa lee tedib zha kuu ngeteed lo Jesús nzhab lo Jesús: ―Zha Nabee, nlazʼn teken ditsa, per laa anta yelo kaatsʼn xutʼn.
23436	MAT 8:22	Tsa nzhab Jesús lo zha: ―Bteke ditsʼn, laa kaats re zha kuu nyelaazt Diox re zha nguth.
23439	MAT 8:25	Tsa lee re zha kuu ngeteed lo Jesús, mloo zha mkaal lo Jesús, ne nzhab re zha lo Jesús: ―Zha Nabee, laata luzhaa, tak ngelowgwaa leen nitdoo.
23440	MAT 8:26	Jesús mkab ne nzhab: ―¿Chebee kwathoz nzeb goo? ¿Chebee lutta nyelaaz goo Diox? Tsa ngwateli Jesús ne mkox mbi ne nitdoo lo Jesús, ne zheta ngok mbi ne nitdoo.
23441	MAT 8:27	Reta zha kuu ngeteed lo Jesús kwathoz mzegey leettsoo zha, ne mbez zha lo altaa zha: ―¿Cho nak mbyi ree? ¿Chebee asta mbi ne nitdoo nzhon diiz lo zha?
23443	MAT 8:29	Ne mretsyath zha ne nzhab zha: ―¿Chaka ndyaad lo nee, Jesús Xgann Diox? ¿Chu ndyaada tetiʼa nee, leettsa terka tsin wiz kuu tetiʼa nee?
23445	MAT 8:31	Tsa lee re mbi fyer mnaab lo Jesús, ne nzhab: ―Os leeʼa kooʼa nee, taa diiz tab nee leettsoo re nguch baa.
23446	MAT 8:32	Tsa nzhab Jesús: ―¡Gwa goo! Ne lee re mbi fyer mroo leettsoo rop zhaʼa ne mndaab leettsoo re nguch. Ne oraaka mrozhonn re nguch ne mbix maa yek kedoo ngob maa leen nitdoo, ngwaap re maa nit ne thitanax nguth maa.
23450	MAT 9:2	Tya mbe zha thib zha mthans kuu nzoob lo luun lo Jesús. Ne myeen Jesús lee re zha kuu ndyaadno mthansa, nyelaaz lee Jesús tak tegwe mthans, tsa nzhab Jesús lo mthans: ―Wen bloo leettsooʼa; tak reta falta myuyya.
23451	MAT 9:3	Tsa lee chop tson maestr kuu nloo xkiiz Diox mtsow xgab: “Went ni zha ree Diox, tak mbez zha lee zha tak tuyy re falt men”.
23452	MAT 9:4	Per lee Jesús neʼa naa kwan ntsow re zha xgab, tsa mnaabdiz Jesús lo re zha: ―¿Chebee kwathoz went ntsow goo xgab?
23453	MAT 9:5	¿Kwan ntsow goo xgab? ¿Kwan mas nagant gap na lo mbyiz ree: “Lee re falta myuyya”, per nagan tegwe men zha ne gab men lo zha, “Gwache ne bte”?
23454	MAT 9:6	Tsowʼn koree lo goo, tsa ne goo lee na, Kuu Mzin Ngok Men, napʼn yalnabee tuyʼn re falt goo. Tsa nzhab Jesús lo mthans: ―Gwache bzhen luuna, ne tyee liza.
23457	MAT 9:9	Leettsa mroo Jesús tya mwii Jesús na kuu le Mateo, ndobʼn ngetsowʼn kobral temi chaan yezlyu kuu nzhax lo zha Roma, tsa ne Jesús lon: ―Bteke ditsʼn. Tsa ngwatelin ne mndekeen dits Jesús.
23459	MAT 9:11	Ne or mwii re fariseo koree, tsa nzhab zha lo re zha kuu ngeteed lo Jesús: ―¿Chebee nzhow maestr goo, kon re zha kuu ntsow kobral temi chaan yezlyu kuu nzhax lo zha Roma, ne kon re zha kuu ntsow kuu went?
23460	MAT 9:12	Jesús mbin kona, tsa nzhab Jesús lo re zha: ―Lee re zha kuu net ndak, ndechet zha doctor, per lee re mbyiz, zhaʼa ndeche doctor.
23461	MAT 9:13	Tyaa goo, ne bteed goo naa kwan nak re diiz ree: “Kuu nlazʼn nak, blat leettsoo goo ne goo taben goo, nlaztʼn beeta kuth goo maa taa goo lon”. [Os. 6:6] Tak ndyaltʼn ndyaadchezʼn re zha wen, sinke lee na ndyal ndyaadchez re zha kuu ndab falt, tsa tsee zha mod went kuu nak zha.
23462	MAT 9:14	Tsa mbig re zha kuu mndeke dits Juan kuu mtsowleyy, ne mnaabdiz zha lo Jesús, nzhab zha: ―¿Chebee re nee, ne re fariseo kwaro ntsow nee ayun, ne lee re zha kuu ngeteed loʼa ntsowt zhay?
23463	MAT 9:15	Jesús mkab, ne nzhab: ―¿Chu tak tsow re zha kuu nzi lo fandan ayun, leettsa lee mbyi kuu mtseyaʼa ndoka lo re zha? Per tetsin wiz kib re zha mal mbyi kuu mtseyaʼa lo re zha; tsasi lee re zha tsow ayun.
23464	MAT 9:16	Noga nzhab Jesús: ―Neeka thib zha ngibt thib le lar kub cho lar gox, tak lee lar kub mbich, leettsa nteech zhay ne masraa nchatte lar gox ne gagt raa lortsin zhay.
23466	MAT 9:18	Leettsa bee ngenika Jesús lee thib mbyi mzin lo Jesús, mbyiʼa nak thib zha kuu nabee ta nkaltaa re zha Israel nteed xkiiz Diox, ne mtobxub zha lo Jesús ne nzhab zha: ―Ngulota nguth rtsaapʼn; per os leeʼa yaada ne xooba yaaʼa yek nzaa teroban nzaa.
23469	MAT 9:21	Tak mtsow ngot xgab: “Os anta diinn na xab Jesús tegwen”.
23470	MAT 9:22	Per lee Jesús mre ne mwii lo ngot, ne nzhab: ―Rtsaapʼn. Wen bloo leettsooʼa, tak ngwalaaza lee Diox tak tegweʼa, kona mgweʼa. Ne leeka ora lee ngot mgwe.
23472	MAT 9:24	Tsa nzhab Jesús lo re zha: ―Broo goo nzhee, tak ngutht nzaa, beeta naxat nzaa. Tsa lee re men mzhizno Jesús, tak tata nzhab Jesús.
23475	MAT 9:27	Leettsa mroo Jesús tya, lee chop zha syeg mndeke dits Jesús, dib gan zha mrez zha ne nzhab zha lo Jesús: ―¡Lu kuu nak thib zha raz rey David, blat leettsooʼa neʼa nee!
23476	MAT 9:28	Per or mndaab Jesús leen yuu, lee rop syeg mbig gax lo Jesús, tsa mnaabdiz Jesús lo rop zha: ―¿Chu nyelaaz goo tak tegwen goo? ―Zha Nabee, tak tsow luy ― mkab rop zha.
23477	MAT 9:29	Tsa lee Jesús mdiinn ngutlo zha, ne nzhab lo rop zha: ―Tak ngwalaaz goo tak tegwen goo, kona mgwe goo.
23478	MAT 9:30	Ne oraaka mzaal lo rop zha, tsa nzhab Jesús lo rop zha: ―Yent cho lo gab gooy.
23481	MAT 9:33	Ne or mloo Jesús mbi fyer leettsoo mbyiʼa, mndelo mbyiʼa mndediz. Tsa mzegey leettsoo re men, ne nzhab re men: ―¡Neeka mas ter wiiʼaa thib kuu tenzhee lazaa!
23482	MAT 9:34	Per lee re fariseo nzhab: ―Maxuuy kuu nabee lo reta mbi fyer, mndaa diiz lo zha par ngoo zha re mbi fyer.
23485	MAT 9:37	Tsa nzhab Jesús lo re zha kuu ngeteed lo Jesús: ―Wlipaa na nin lo goo, kwathoz naroob rtsin Zha Nabee nzo, per lutta zha kuu ntsow rtsin zha nzo.
23491	MAT 10:5	Tsa mtaal Jesús re tsiibchop nee ne tenzhee ne Jesús lo re nee: ―Yat goo laz re zha kuu nagt tawlazaa, neeka re yez chaan re zha Samaria.
23495	MAT 10:9	’Gwet goo temi.
23497	MAT 10:11	’Leettsa tsin goo thib yez o thib ranch, kwaan goo liz thib zha kuu ndoblo zha kwet goo liz zha, ne tya kwet goo asta or kuu roo goo yeza.
23498	MAT 10:12	Or kuu tsin goo thib yuu bni goo “diox” lo zha ne guz goo lo zha, lee Diox tsow wen kwin goo liz goo ne bzhen goo yaa re zha kuu nzo yuuʼa.
23502	MAT 10:16	’¡Wii goo! Na taal goo yataa goo kwent chaan Diiz Chul, taxal mbak zhiil xid re mbeez kuu nayii, kona list gok goo taxal mbeel ne nadoo gok goo taxal palom.
23507	MAT 10:21	’Ne leeka wets zha kuu nyelaazt Diox, taa zha lo re zha nak tsiin tsa kuth zha zha, ne tataka tsow xut zha kon xgann zha. Lee re zhiinn zha yii ne xut ne xnaa, ne taa zhiinn zha zha lo re zha kuu nlaaz kuth zha.
23510	MAT 10:24	’Neeka thib zha kuu ngeteed nataagt zha masraa nake maestr zha, ne tataka neeka thib zha kuu nke tsiin, nataagt zha masraa nake patron zha.
23511	MAT 10:25	Kona lee zha kuu ngeteed, ndoblo wen yo leettsoo zha, tsow re men lo zha taxal ntsow re men lo maestr zha, ne leeka tata lee mos, ndoblo wen yo leettsoo mos, tsow re men lo mos taxal ntsow re men lo patron mos. Ne os lo na kuu nak taxal mndan thib yuu ni zha lo Beelzebú kuu nabee lo re mbi fyer. ¡Kwanpaa gabt zha lo re goo kuu nak goo taxal zhiinn mndan yuu!
23512	MAT 10:26	’Ne tsebt goo ne goo re men kuu ndreke dits goo, tak ndaa goo kwent xkizʼn. “Tak neeka thib kuu ntsow zha xlaanta gagt loote, ne tataka neeka thib kuu ntsow zha xgaatsta gagt loote”.
23515	MAT 10:29	’Wii goo, ¿chu nthot zha chop min bzhizh por thap rehal? Per leen ni lo goo, neeka thib min lat lo yezlyu ree os lee Xutaa Diox kuu ndob yibaa taat diize.
23518	MAT 10:32	’Os lee thib zha gab zha lo re men lee zha nak zha da, noga na gapʼn lo Xutʼn kuu ndob yibaa lee zha nak zha da.
23520	MAT 10:34	’Tsowt goo xgab leen ndyal, tsa wen kwin re men lo yezlyu ree. Ndyaltʼn tsa wen kwin re men lo yezlyu ree; sinke chakʼn ndyal kona lee re zha kuu nyelaazt na kuth re zha kuu nyelaaz na.
23523	MAT 10:37	’Ne loka zha kuu mas nke leettsoo xut ne xnaa nake na, ndoblot zhaʼa gak zha zha da, ne loka zha kuu mas nke leettsoo xgann o rtsaap nake na, ndoblot zhaʼa gak zha zha da,
23526	MAT 10:40	’Zha kuu nkayaa goo noga na nkayaa zha. Ne lee zha kuu nkayaa na, noga nkayaa zha, zha kuu mtaalʼn.
23532	MAT 11:4	Jesús mkab ne nzhab: ―Tyee goo, ne guz goo lo Juan re kuu mwii goo ne re kuu mbin goo ntsowʼn.
23533	MAT 11:5	Guz goo lo Juan: “Lee ngutlo re zha syeg nyeni, lee re zha mthans ndiy, lee re zha kuu ndeye kwerp ngwe, lee re zha kuu nakwee mzhaal nza; lee re zha nguth ndroban; ne lee re zha kuu nyeen ndeche zha Diox nzhon zha Diiz Chul chaan Diox.
23534	MAT 11:6	¡Wen nzo leettsoo Diox ne Diox re zha kuu nzhagt chop xgab, tak nyelaaz zha na!”
23535	MAT 11:7	Leettsa ndya re zha kuu mtaal Juan, lee Jesús mndelo mndaa kwent chaan Juan lo re men, ne nzhab Jesús: ―¿Kwan ngwatwii goo ngwa goo yubiz? ¿Chu lo thib nith kuu nkwin mbi ngwatwii goo?
23536	MAT 11:8	Ne os leey nagte tata, ¿kwan ngwa goo ngwatwii goo tsa? ¿Chu lo thib zha kuu nok lar wen ngwa goo ngwatwii goo? Tak reta goo ne lee re zha kuu nzhok lar wen, nak re zha kuu nzo liz rey.
23537	MAT 11:9	Per ne goo lon: ¿Cho lo ngwatwii goo tsa? Wlipaa na nin lo goo, lee goo ngwatwii lo thib profet. Ne Juan nak thib profet kuu mas nataak nake re profet kuu ngoo ndala.
23540	MAT 11:12	’Desde leettsa mndaa Juan kwent xkiiz Diox ne asta nal, lee re zha kuu nabee Diox leettsoo ndriid yalti lo re zha kuu nakap nak, re zha kuu nlaaz nabee lo re zha kuu nabee Diox leettsoo.
23543	MAT 11:15	¡Os lee goo ndob nza goo ndoblo yen goo koree!
23544	MAT 11:16	’Ne nal nin lo goo naa xa nzhak re men tyemp ree. Lee re men nzhak taxal re ndyeen bzhizh, kuu nzi nke byith lo xbi, kuu mbez lo altaa:
23545	MAT 11:17	“Naley mbil nee flaut per mkanit goo ne mbilga nee nabil per mbinnt goo”.
23547	MAT 11:19	Per lee nal ndyal na, Kuu Mzin Ngok Men, nzhowʼn ne nzhuun, tsa mbez goo leen nak thib zha kuu nzhowcho ne nzhuucho xit ub, ne nakʼn amig re zha kuu ntsow kobral temi chaan yezlyu kuu nzhax lo zha Roma, ne amig re zha kuu ntsow re kuu went. “Per lee zha kuu nap yalnzhaak chaan Diox, por re kuu ntsow zha nabee lee zha nap yalnzhaak”.
23549	MAT 11:21	―¡Aka nati rid re goo zha yez Corazín! ¡Aka nati rid re goo zha yez Betsaida! Os lo re men rop yez kuu nak Tiro ne Sidón gagak re kuu thoz kuu ngok lo re goo, chu nal galaa zha re kuu went kuu mtsow zha ne gayelaaz zha Diox, gagok zha lar kuu nambaat ne gatob zha lo di, tsa galoo zha kwathoz nalatt nzo leettsoo zha por re falt zha.
23551	MAT 11:23	Ne lee re goo zha yez Capernaúm, ¿chu ntsow goo xgab lee Diox teno goo yibaa? Nagte tata, lee goo ya asta ta mas naats. Tak os lo re zha yez Sodoma gagak re kuu thoz kuu ngok lo re goo, bee nzika yeza asta nal.
23553	MAT 11:25	Ne lee tsya nzhab Jesús: ―Nzhoolʼn loʼa Xutʼn, Zha Nabee yibaa ne yezlyu, tak mkaatsa re koree lo re zha nzhaak ne lo re zha kuu nyen re kwaa, ne mloo luy lo re zha kuu nlaaz teed.
23555	MAT 11:27	Tsa nzhab Jesús lo re men: ―Reta kwaa mndaa Xutʼn lon. Ne yent cho ne cho nakʼn, sinke beeta Xutʼn ne cho nakʼn. Ne yent cho ne cho nak Xutʼn, sinke beeta na ne cho nak Xutʼn, ne beeta lo re zha kuu nlazʼn gapʼn naa cho nak Xutʼn.
23560	MAT 12:2	Ne lee re fariseo mwii kona, tsa nzhab zha lo Jesús: ―Wii lee re zha kuu ngeteed loʼa, ngetsow thib kuu ndoblotaa tsowaa wiz kuu ndroxkwanaa.
23561	MAT 12:3	Tsa lee Jesús mkab ne nzhab: ―¿Chu ter lab goo xkeets Diox naa kwan mtsow rey David, leettsa mlann David kon re zha kuu nda kon David?
23563	MAT 12:5	Ne, ¿chu ter lab goo ley chaan Moisés ta nzhab, lee re ngwleyy mbint ngwleyy diiz kuu nabee ley, tak mke ngwleyy tsiin leen gwodoo chaan Diox wiz sabd, ne mndaat ngwleyy falt?
23565	MAT 12:7	Nyent goo kuu nzhab lo xkeets Diox ta nzhab: “Kuu nlazʼn nak, lat leettsoo goo ne goo taben goo, ne nlaztʼn kuth goo beeta maa par taa goo gon lon”. [Os. 6:6] Ne os gayen gooy, gakekit goo zha kuu ntsow kuu wen.
23568	MAT 12:10	Ne tya ndo thib mbyi kuu mbiz yaa. Ne kom nkwaan re zha mod keki zha Jesús, tsa nzhab zha lo Jesús: ―¿Chu ndoblo tegwe men thib zha wiz kuu ndroxkwanaa?
23569	MAT 12:11	Ne lee Jesús nzhab: ―Os lee thib goo nap thib mbak zhiil ne la maa leen pos wiz sabd, ¿chu koot goo maa?
23571	MAT 12:13	Tsa nzhab Jesús lo mbyi kuu mbiz yaa: ―Bteli yaaʼa. Tsa mteli mbyi yaa mbyi, ne mgwe yaa mbyi taxal tedibe.
23581	MAT 12:23	Reta men mzegey leettsoo, ne nzhab: ―¿Chu nagt zha ree, zha raz chaan rey David?
23582	MAT 12:24	Per leettsa mbin re fariseo kona, tsa nzhab re zha: ―Beelzebú kuu nak Maxuuy kuu nabee lo re mbi fyer, mndaa yalnabee lo zha, tsa nabee zha lo re mbi fyer.
23583	MAT 12:25	Per lee Jesús neʼa naa kwan ntsow re zha xgab, tsa nzhab Jesús: ―Reta yez naro ne re yez bzhizh, ne asta thib yuu kuu nzhak rol zha, gaxta ndo luzhe.
23587	MAT 12:29	’Gagt tab thib zha liz tedib zha kuu kwathoz ney par kib zha chaan zhaʼa, os ter liib zha zha. Tak os lee zha tsowt zhay gagt kib zha chaan zhaʼa.
23589	MAT 12:31	’Tak nyelaazt goo lee Mbi Nayon chaan Diox ntsow ngon re mbi fyer, kona nin lo goo tetuyy Diox reta falt kuu ntsow men, leettsa ngode men re zha, per tuyyt Diox falt kuu ngode men lo Mbi Nayon.
23591	MAT 12:33	’Ne ndoblo ne goo, lee ya wen ndaa xle wen, ne lee ya went ndaa xle went, tak reta ya nabee ya por xle kuu ndaa ya.
23592	MAT 12:34	¡Goo nak zha raz mbeel! Went nak goo, kona gagt ni goo kuu wen; tak kuu nzo leettsoo men ndroo roo men.
23596	MAT 12:38	Tsa lee chop tson fariseo ne chop tson maestr kuu nloo xkiiz Diox, nzhab lo Jesús: ―Nlaaz nee wii nee tsowa thib seny thoz kuu gagt tsow re men yezlyu ree.
23597	MAT 12:39	Jesús mkab ne nzhab: ―Lee re men tyemp ree kuu thitanax went nak ne mlaa Diox, nlaaz zha thib seny thoz, per neeka thib seny loot lo re zha, beeta seny chaan profet Jonás zha ndala loo lo re zha.
23601	MAT 12:43	’Leettsa lee thib mbi fyer ndroo leettsoo thib zha, tsa nda mbi ndiy mbi thib ta yubiz, nkwaan mbi thib ta roxkwan mbi, ne mzalt ta roxkwan mbi, tsa ntsow mbi xgab:
23602	MAT 12:44	“Bretabʼn leeka ta mroon”. Ne leettsa mzin mbi ta mroo mbi, ne mzal mbi mbyiʼa, taxal thib yuu kuu nalath kuu wen nalob ne nambi na.
23605	MAT 12:47	Tsa lee thib zha nzhab lo Jesús: ―Lee xnaaʼa kon re wetsa nzi lee, ne nlaaz zha tediz zha loʼa.
23606	MAT 12:48	Per lee Jesús nzhab lo zhaʼa: ―¿Cho nak xnaan ne re wetsʼn?
23607	MAT 12:49	Tsa mwii Jesús lo re zha kuu ngeteed lo Jesús, ne nzhab Jesús: ―Re zha ree nak taxal xnaan ne re wetsʼn ne re btan na.
23611	MAT 13:3	Tsa mloo Jesús kwaro kwaa lo re men por kwent nanzee. Ne nzhab Jesús: ―Nal tan thib kwent lo goo, lee thib zha kuu nzhann mroo ndalo bin lo yu.
23617	MAT 13:9	¡Os lee goo ndob nza goo ndoblo yen goo koree!
23618	MAT 13:10	Tsa lee re zha kuu ngeteed lo Jesús mbig lo Jesús, ne nzhab zha: ―¿Chebee pur kon kwent nanzee niʼa lo re men?
23619	MAT 13:11	Jesús mkab ne nzhab: ―Diox mndaa yalnzhaak lo goo, tsa yen goo re kuu nagaats chaan ta nabee Diox; per lo tedib net zha mndaat Diox diiz yen zhay.
23624	MAT 13:16	’Per wen nda re goo zha kuu nyen kuu ngwii ne nyen kuu nzhon.
23626	MAT 13:18	’Kenza goo tsa yen goo naa xomod nak kwent nanzee chaan zha kuu ndalo bin lo yu.
23632	MAT 13:24	Jesús mndaa tedib kwent nanzee lo re zha, ne nzhab Jesús: ―Lee nal tan tedib kwent nanzee lo goo. Tsa ne goo xomod nak leettsa nabee Diox leettsoo re men. Leey nak taxal thib zha kuu nzhann nzob xtil wen lo yu.
23635	MAT 13:27	Tsa lee re zha kuu nke tsiin lo zha kuu nak chaan yu, nzhab lo zha: “Zha Nabee, ¡at nzob xtil wen mloʼaa lo yu! ¿Xomod mlen yizh goob xide?”
23636	MAT 13:28	Tsa lee zha kuu nak chaan nzob xtil nzhab: “Thib zha kuu nayii nen mtsow kona”. Tsa lee re zha kuu nke tsiin lo zha mnaabdiz ne nzhab: “¿Chu nlaaza ya nee ne kib nee yizh goob?”
23637	MAT 13:29	Per lee zha nzhab: “Aha, kibt gooy. Tak os lee goo kib goo yizh goob, cha noga nzob xtil kib goo.
23638	MAT 13:30	Mas wen blaa goo thibka zhene, asta leettsa dop yalgonn. Leettsa taalʼn re zha kuu thop yalgonn, tsa ner re yizh goob thop zha ne liib zhay par yeeke thitanax. Ne lee nzob xtil thop zha ne kotsow zha leen loo ta nzotsow xoobʼn.”
23639	MAT 13:31	Jesús mndaa tedib kwent nanzee lo re zha, ne nzhab Jesús: ―Leettsa lee Diox nabee leettsoo re men, leey nak taxal thib mbiz mostaz kuu mloo thib mbyi lo yu.
23641	MAT 13:33	Noga nzhab Jesús: ―Leettsa lee Diox nabee leettsoo thib men, leey nak taxal lebadur kuu mloo thib ngot xid tson medid arin tsa yezhoobe.
23644	MAT 13:36	Leettsa ngwalo mchaats Jesús re men, tsa mndaab Jesús leen yuu, ne lee re zha kuu ngeteed lo Jesús mbig ne nzhab lo Jesús: ―¿Xomod nak kwent nanzee chaan nzob xtil kon yizh goob?
23645	MAT 13:37	Jesús mkab ne nzhab: ―Lee zha kuu nzhann nzob xtil wen, nak na Kuu Mzin Ngok Men.
23651	MAT 13:43	Tsa lee re zha kuu nali nak lo Diox la xni zha ta nabee Xutʼn, taxal nla xni wiz la xni zha. ¡Os lee goo ndob nza goo ndoblo yen goo koree!
23652	MAT 13:44	’Leettsa nabee Diox leettsoo men, leey nak taxal kwathoz or kuu nzogaats lo thib lo yu. Ne lee thib zha mzal ora, tsa mkaatska zhay tya. Ne kwathoz laz zha ndya zha ne mtho zha reta kuu nap zha, ne mzhii zha yuʼa, par gak ora chaan zha.
23653	MAT 13:45	’Leettsa nabee Diox leettsoo re men, leey nak taxal thib zha kuu ndiy nkwaan tyen ke kuu le perla kuu kwathoz nap.
23655	MAT 13:47	’Leeka tata, leettsa nabee Diox lo re men, leey nak taxal yex kuu ngobi zha leen nitdoo, tsa niit zha relota mbel.
23659	MAT 13:51	Tsa mnaabdiz Jesús lo re zha, ne nzhab Jesús: ―¿Chu myen goo re kwent nanzee ree? Lee re zha mkab ne nzhab: ―Myen neey.
23660	MAT 13:52	Tsa nzhab Jesús kwent nanzee ree lo re zha ne nzhab Jesús: ―Leettsa lee thib maestr, kuu nloo xkiiz Diox, wlipaa nyen xomod nak leettsa nabee Diox leettsoo men, nzhak zha taxal thib mndan yuu, kuu nzhaak ngoo re kuu kub ne re kuu gox xid re kuu nap zha.
23662	MAT 13:54	ne mzin re zha laz Jesús. Ne wiz sabd mndelo Jesús mloo lo re men ta nkaltaa re zha Israel nteed xkiiz Diox. Tsa mzegey leettsoo re men mbin kuu mloo Jesús, ne mbez zha lo re altaa zha: ―¿Xomod mteed zha ree yalnzhaak ree? ¿Chebee nzhaak ntsow zha re milagr thoz?
23663	MAT 13:55	¡Lee zha ree nak thib zha tbaata, ne nak zha xgann Che kuu nak karpinter ne xnaa zha nak Mari, ne re wets zha nak: Santiag, Che, Simún ne Judas!
23664	MAT 13:56	Ne leeka loʼaa nzhee nzi re btan zha. ¿Xomod mteed zha re kuu nzhaak zha?
23665	MAT 13:57	Kona ngwalaazt re men Jesús. Per lee Jesús nzhab: ―Neeka thib profet nkayaat re tawlaz zha zha wen ne neeka re zha liz zha.
23668	MAT 14:2	Tsa nzhab rey Herodes lo re zha kuu nke tsiin lo rey: ―Juan kuu mtsowleyy re men nak zhaʼa; mroban zha xid re zha nguth; kona nap zha yalnabee ntsow zha re kuu thoz.
23670	MAT 14:4	Tak lee Juan nzhab lo rey Herodes: ―Went kenoʼa tsaal wetsa.
23673	MAT 14:7	tsa mtselo rey kruz lo nzaa ne nzhab rey: ―Naab loka kuu nlaaza lon, na taay.