23233	MAT 1:20	Zhgab co no me, tibaque blulo tib xanjl Dios lo me lo mcaaḻ. ―José (xiag David) ―rëb anjl co―, peet tsienied guic luu, pcaania Marí gac me tsieel luu; sac goṉ mëdyeeṉ ne zoney me ga, Espíritu Sant bnabey pquialo win zdoo me.
23246	MAT 2:8	Blozhse ga, dzigo pxeeḻ me zho Belén, rëb me lo zho: ―Ga goḻtsie goḻtsieguib mëëd co. Zigne gdziel to win, goḻtëniegazh diidz lo naa nu, zeeṉa ye naa ga gagaṉ naa win.
23275	MAT 3:14	nëd Juan cchoobnis Juan me, rëb Juan lo me: ―Lëda i goṉ, naa none guiaḻ lo luu cchoobnis luu naa.
23276	MAT 3:15	Dzigo rëb me lo Juan: ―Nli scaw, per mazd pchoobnis naa, sac goṉ ib nonguieḻa dziuuṉ ne miṉe rnabey Dios. Dzigoraa pchoobnis Juan me.
23278	MAT 3:17	ni blu zëëb tib tsi meṉ co nëz gbaa rnee me: ―Xpëëd naa goṉ nac meṉ qui, rleynie naa me, meṉ nziuu nac me lo naa.
23281	MAT 4:3	hor co bdziṉ meṉdox zaatne no me ga, rëb ma: ―Teḻne nli Xpëëd Dios nac luu, bnabey tsaalo grë quie rii ncuaaṉe gow luu.
23282	MAT 4:4	Dzigo pquiab me rëb me lo ma: ―Znu zhobnee lo Xtiidz Dios: “Niapse por xtiidz Dios mban miech, yquiamband zho loxaque guieḻwagwse.”
23284	MAT 4:6	rëb ma lo me: ―Teḻne nli Xpëëd Dios nac luu, briṉgaa nu, beṉque led znu zhobnee lo Xtiidz Dios: “Znabey Dios grë xanjl me yquiaanap luu, zha queedz luu, zeeṉa ni tib quie ycaaṉd ni luu.”
23285	MAT 4:7	Pquiab me rëb me lo ma: ―Psoladz gaṉle, noque stib zaatne znu rnee lo Xtiidz Dios: “Bieṉ, Dios nac meṉ ne rnabey luu, nodne quitnie luu me gnab luu lo me ncuaaṉe nod guṉ me.”
23287	MAT 4:9	rëb ma lo me: ―Bui gaṉle, grëse ncuaaṉ qui goṉ gnedz naa lo luu teḻne squiitsgzhib luu lo naa niina, guṉnon luu naa.
23416	MAT 8:2	tibaque brieequia tib mgui ne rlan guiedzdox ne lë lepr, wbig me pquiitsgzhib me lo Jesús, rëb me: ―Tebaa siguieeḻ luu guṉguiac luu naa.
23417	MAT 8:3	Dzigo pxobnia Jesús guic mgui, rëb Jesús: ―Zuṉguiac naa luu. ¡Niinagazh laa luu guiaaṉmbe! Horcogazha laa grë guiedz co bnitlo.
23418	MAT 8:4	Dzigo rëbchaa Jesús lo me: ―Bina gaṉle, choot lo gzodiidzd luu goṉ zha biac luu; sinque güey lo pxoz güeysaṉ gon ne rieguiaḻ gdeed luu zigne rnabey ley ne psaṉ Moisés, zeeṉa gaṉ zho gaṉle laa luu biacle.
23420	MAT 8:6	―Beeṉ tib guieḻnzaac beeṉguiac tib zha ne rquia xtsiṉ naa, laa zho nix lidz naa ib gacd griaḻ zho, mban rac zho yoobdox ne rquia zho.
23421	MAT 8:7	Dzigo rëbchaa Jesús: ―Peet nacda, na së naa guio ne guṉguiac naa zho.
23422	MAT 8:8	―Coo ―rëb meṉguiib co―, rieguiaḻd csodziin naa luu sëë luu haxta lidz naa. Naṉpaa naa zrieelo luu nugazh gnabey luu guiac zho.
23424	MAT 8:10	Zeeṉe goṉ Jesús sca rnee meṉ co, rley me, rëb me lo grë zha ne zienaḻ zhits me ga: ―Lo grë zha Israel, gard goṉ gaṉ naa tib zha ne squitaa dib zdoo rnalo Dios.
23427	MAT 8:13	Blozh ga rëbchaa me lo meṉguiib co: ―Bzë nasca, gocnaṉ gaṉle zigne bliladzse luu guiac xmoz luu, sca gaca. Horcogazha laa moz co biac.
23433	MAT 8:19	Dzigo wbig tib meṉ ne nac maistr ley lo me, rëb maistr co: ―Zaatne tsietaa luu goṉ, sënaḻ naa zhits luu.
23434	MAT 8:20	Dzigo rëbchaa me: ―Gocnaṉa gaṉle, naa ne nac naa Mgui ne pxeeḻ Dios, peet rapd naa nu, mazd zig nac grë mëz, grë mguiṉ, rap ma zhibliee ma, rap ma zhiptsieez ma; per naa per ni zaatne gaguies naa quianied naa.
23435	MAT 8:21	Wbigaque stib zha ne rzënaḻle zhits me, rëb zho: ―Ye naa goṉ sënaḻ naa zhits luu, per bzhiguieḻ bneedz diidzbey cuëz naa gaṉgazh naa tsoliu pxoz naa.
23436	MAT 8:22	Pquiab me rëb me: ―Dënaḻ zhits naa. Psaan, nzian grë zha gut no, tsow tsiequeets zho sameṉgut zho.
23438	MAT 8:24	Laa zho zie lo nis co, tibaque zeeṉe psilo briee tib medox, masaque rlis me lo nis co, laaw psilo rzëëb leṉ barcw. Dzigo lëëlëd güey zho güeycuaan zho me, sac lëëtaque nixguies me. ―Ligier gaṉle ―rëb zho―, blee mcaaḻ lo luu. ¡Bui gaṉle laa ne nitlo lo nis rii, csaand luu guet ne nu!
23441	MAT 8:27	Zeeṉe goṉ zhow, bzee zdoo zho. ―Bay chozhe waa nac meṉ rii ―rnee zho―. ¿Zha nac ne haxta me, haxta nis ron xtiidz me?
23444	MAT 8:30	Zitlaaque ga ndxie tib dzoon nguts notop lag, dzigo bnab grë meṉdox co lo Jesús rëb ma: ―Teḻne cuee luu no nu, bzhiguieḻ bneedz diidz lose grë nguts qui gdziiṉ no.
23446	MAT 8:32	―Niinaga sca goḻtsie ―rëb me. Zigne psaan meṉdox co grop mgui co, güey ma bdziṉ ma lo grë nguts co. Horco psilo grë nguts co, rquiaa ma corr güeypix ma tib ro yeedox ne quia ro nisdoo co, bliaaḻ ma lo nis, grëse ma gut.
23452	MAT 9:4	Bieṉga Jesús sca rza zdoo zho, dzigo rëbchaa me: ―Lëda i goṉ squi rza zdoo to.
23460	MAT 9:12	Bin Jesús sca quianee zho, dzigo rëbchaa me lo zho: ―Naṉle to gaṉle, zha ne ruṉ rmed, zaatne no zha rzacnë ga rquiin zho, ¿niacxe squiin zho zaatne no zha ne ndip ndaan?
23463	MAT 9:15	Pquiab me rëb me lo zho: ―Zaatne nadieṉ noyac tib guieḻtsieel, ¿pe niacxe lega csilo grë zha ne ndxie lo lni tso zho guieḻnë, ycuan zho, ni raṉ zho laa mgui ne notsieelnia zo lo zho? Per zdziṉ dze zeeṉe laa mgui co gbiche, ni zeeṉe laa dze co gdziṉ, dzigosi nagoṉ rieguiaḻ tso zho guieḻnë, rieguiaḻ ycuan zho.
23466	MAT 9:18	Lëëtaaque sca quianee Jesús lo xpëëdscuel Juan Bautist, zeeṉe bdziṉ tib mgui ne nac zha non yadoo. Zigne bdziṉ me pquiitsgzhib me lo Jesús, rëb me: ―Beeṉ tib guieḻnzaac së luu guio ne lidz naa. Laa tib xpëdwnaa naa blozh niina, per naṉpaa naa teḻne cxobnia luu guic win, zbeeban luu win.
23470	MAT 9:22	Dzigo wbire lo Jesús, dze bui Jesús lo me. ―Xin ―rëb Jesús―, peet tsienied guic luu. Laa luu biac sacne bliladz luu naa. Gataa laa wnaa co biac lo guieḻguidz co.
23472	MAT 9:24	Dzigo rëbchaa me lo zho: ―Goḻriee nëz ley, sac goṉ gute mëëd qui, nixguiesse win. Zha ne rlëë, zha ne rzhidzniegaa me, laa zho briee ley.
23476	MAT 9:28	Bdziṉ Jesús yu ne rbëz me, laa zho wbig lo me. Dzigo rëbchaa me lo zho: ―¿Dib zdoo to dzigo lëë rliladz to zrieelo guṉguiac naa to? ―Dib zdoo now ―rëb zho.
23477	MAT 9:29	Dzigo pquiaania me zhits bziaalo zho, ni rëb me: ―Miṉe bliladz to i nasca, laaw gac niina zigne bliladz tow.
23482	MAT 9:34	Laa grë zha farisé rnee: ―Ma ne rnabey lo meṉdox nacnie meṉ qui, gane rrieelo ruṉcxooṉ me meṉdox.
23485	MAT 9:37	Tib vuelt haxta rëb me lo xpëëdscuel me: ―Goḻnab lo Dios cxeeḻraa me zha ne guṉ xtsiiṉ me. Goḻwi gaṉle pe zhidaa grë miech qui, quiambëz zho dieṉ cho gnee Xtiidz Dios lo zho. Masaque nac zho niina, zig tib guieḻgon ne goḻle gliaap.
23491	MAT 10:5	Blozhse ga, pso me diidz lo zho zha tsie zho, rëb me lo zho: ―Naṉle to nagoṉ, tsiede to zaatne no grë zha ne nacd zha Israel, niicle sëëbde to grë guiedz ne ndxie xtan zha Samar.
23532	MAT 11:4	Dzigo rëbchaa me lo zho: ―Grë ncuaaṉe bin to rne naa, grëgaa ncuaaṉe goṉ to ruṉ naa, goḻtsie goḻzodiidza lo Juan.
23535	MAT 11:7	Zeeṉe laa xpëëdscuel Juan zey, dzigo psilo me bzeet me Juan lo miech guizhiu ne ndxie lo me ga, rëb me: ―Zeeṉe güey to dan ngan co, güey to lo Juan, ¿zha dieṉ güeynie guic to niaṉ to me? ¿Pe rëb to rlu me zig tib goobgui ne nëzrii nëzrec rey me, te rëb to ye masaque grë lar niazh ne racw zha non nacw me? Per naṉle to gaṉle zha ne scataa racwxab riod zho dan.
23553	MAT 11:25	Dzigo bzodiidznie Jesús Dios, rëb me: ―Dios luu ne nac luu Pxoz naa, luu rnabey gbaa luu rnabey guidzliu, rnedz naa xquizh lo luu sac grë miṉe noyuṉ luu nu niina bdeete luu diidz niacnaṉ grë zha raca, sinque laaw blu luu lo grë zha ne nac zig grë mëëdlas.
23555	MAT 11:27	Blozh ga rëb me lo grë miech ne ndxie ga: ―Grëse ncuaaṉe raṉ to quiayuṉ naa, Dios meṉ ne nac Pxoz naa, me bneedz poder rii lo naa; sac ib laa me bzo naa, naa guṉa. Xpëëd me nac naa, wen wen ruṉbey me naa, scagaa naa wen wen ruṉbey naa me. Choot ruṉbeyd me zigne ruṉbey naa me, per zha ne gacladz naa guṉbey me, zuṉbey zho me.
23569	MAT 12:11	Dzigo pquiab me rëb me lo zho: ―Togase dieṉ, zha ruṉ to zeeṉe lëëtse dze rii rietsobe tib xpëcwxiil to tib leṉ blë nroob, ¿led zëëb lëë rie to riebee to ma?
23597	MAT 12:39	Pquiab me rëb me lo zho: ―Nazdpaa ntseeb to, squitaa gocndip zdoo to nëz lo Dios, ¿zha nacraa milagr ne racladz to gaṉ to?
23605	MAT 12:47	Dzigo rëb tib zho lo me: ―Laa xniaa luu goṉ ni zha bets luu quiambëz luu nëz ley, racladz zho gzodiidznie zho luu.
23607	MAT 12:49	Blis nia me, blu me grë xpëëdscuel me, dzigo rëbchaa me: ―Zha ne goṉ nac zig zha rii, lëë xnia naa ga, lëë bets naa ga.
23611	MAT 13:3	Ndal grë ncuaaṉe pseed me zho, per niapse con cuent rnee mew lo zho. Lëë tib cuent ne bzodiidz me ga nu, rëb me: ―Tib zha name güey gon zhobxtil. Zeeṉe laa zho quialaaḻ zhob co, now bliaaḻ gax ro nëz, now bliaaḻ lad quie, now bliaaḻ leṉ yag guiets. Miṉe bliaaḻ gax ro nëz ga, güey grë mguiṉ znuse dow maw.
23617	MAT 13:9	Blozh ga, rëbchaa me: ―Zha ne racladz guieṉ miṉe rne naa nu, yquiaadiag zhow.
23619	MAT 13:11	Pquiab me rëb me: ―Teḻ to, Dioszhal rlu lo to zha rnabey me, niicle ncuaaṉe mazdraa ngueetsa; laa grëraa miech ne gard gbig lo me, grieelod guieṉ zhow.
23624	MAT 13:16	’Saṉgue to ―rëb Jesús lo zho―. ¡Dichos to porne rieṉ to pe raṉ to, ni rieṉgaa to miṉe ron to!
23632	MAT 13:24	Biire pcaalsa miech lo me stib, dzigo psiloque me pseed me zho con stib cuent, rëb me: ―Ziaad gac xquieḻrnabey Dios lo guidzliu rii zig bzhaac tib meṉ ne gon zhobxtil. Niapse zhob wen, zhob nal gon me,
23639	MAT 13:31	Blozh ga bzeet me midz moxtaz, rëb me: ―Nac xquieḻrnabey Dios zig nac tib midz moxtaz ne ran miech dan rii. Naṉ to gaṉle midz moxtaz nac midz ne mazdraa win,
23641	MAT 13:33	Rëbaque me: ―Nac xquieḻrnabey Dios zig nac ncobi ne rquiaa meṉ wnaa lad ncob ne riaa guietxtil. Niipaque ncobi riots tsoṉ lmud rin, ni dib nacse ncob co rzibe.
23645	MAT 13:37	Dzigo rëbchaa me lo zho: ―Goḻgona sca, znu goṉ nac cuent co. Rrieequia goṉ naa ga nac meṉ ne gon zhob co.
23659	MAT 13:51	Blozhse ga, rëb me lo zho: ―¿Pe bieṉ to na zha nac grë miṉe blozh bne naa lo to nu? Grëse zho pquiab rëb zho: ―Bieṉ now.
23660	MAT 13:52	Dzigo rëbchaa me: ―Tib zha ne rieṉle zha nac grë ley ne psaṉ Moisés, ni squi guieṉ zho zha nac zhiwseed Dios miṉe ziaḻnie naa niina, masaque nac zho zig tib zha gol ne quianie chop lo ncuaaṉ non lidz zho, quianie zho grë miṉ gol-le ni quianiequegaa zho miṉ cub.
23665	MAT 13:57	Ib beeṉcasd zho me, haxta rlëë zho lo me. Zeeṉe goṉ me sca rac zho, rëbchaa me lo zho: ―Zha ne rteed xtiidz Dios, mazd wen rnee miech lo zho stib dan, stib guiedz, lëdle ladz zho ni meṉlidz zho ni meṉladz zho nëd guṉbey zho.
23668	MAT 14:2	dzigo rëb Herod lo grë zha ne ruṉ dziin lo me: ―Rieṉ naa lëë Juan Bautist ga quiayuṉ grë miṉ co, segur brieeban me.
23681	MAT 14:15	Laa dze ziedzelew, wbig xpëëdscuel me rëb zho lo me: ―Mazd gudz lo grë miech qui guey zho na, zeeṉa guiob tsie zho grë guiedz win ne ndxie gax i tsiesi zho ncuaaṉe gow zho; sac goṉ laa dze bdzele.
23694	MAT 14:28	Pquiab Pedr rëb Pedr: ―Teḻne luu i ziaad i, bneedz diidz së naa lo nis glanso naa lo luu i. ―¡Dë sca! ―rëb me. Lëëlëd biet Pedr leṉ barcw, laa Pedr ziezële lo nis co
23697	MAT 14:31	Dzigo wbig me bzheṉ me nia Pedr, bzoli me Pedr lo nis co. ―¡Aque luu goṉ Pedr! ―rëb me―. ¿Pe nacne gocchop guic luu? ¿Gard goṉ gliladz wen luu cho nac naa?
23712	MAT 15:10	Dzigo bnee me lo grë miech ne ndxie lo me ga, rëb me: ―Goḻquiaadiag miṉe gni naa lo to nu, ni goḻtsoxco guieṉ to zha naca.
23715	MAT 15:13	Pquiab me rëb me: ―Grëse yag ne squi beeṉbnid Pxoz naa meṉ ne zob gbaa, ib none laaw gliaadz zolo zolow.
23717	MAT 15:15	Bdedse ga, wbig Pedr lo me rëb Pedr: ―Bzhiguieḻ bnë lo no dieṉ zha nac diidz ne në luu ga, ne rnee luu led ncuaaṉe rowd miech ruṉctal xtoḻ zho.
23725	MAT 15:23	Per ib pquiabd Jesús lo xtiidz wnaa co, dzigo wbig xpëëdscuel me, rëb zho: ―Mazd bzhiguieḻ pquiaadiag miṉe rnee wnaa qui, bui gaṉle zha ncuëtaa zëëb tsi me naḻ me zhits ne.
23726	MAT 15:24	Pquiab Jesús rëb me: ―Ziaḻd naa par guṉ naa xyudar zha zit, sinque laa Pxoz naa pxeeḻ naa par guṉ naa xyudar grë zha Israel ne rzac zig grë mëcwxiil ne zonziaab lo xbaxtor.
23727	MAT 15:25	Scaque nonee me laa wnaa co wbig pquiitsgzhib lo me. ―Bzhiguieḻ ―rëb me―, beeṉ tib guieḻnzaac beeṉ xyudar naa.
23728	MAT 15:26	Rëbchaa Jesús lo me: ―Nonguieḻda goṉ, cob ne guiet ne no nia mëëd gdeed new lo mëcw.
23729	MAT 15:27	―Nliw, scaw ―pquiab wnaa co―, per niicle mëcwa name rsaanaque bizhuan ma rbig ma row ma miṉe rrieengaa nia mëëd.
23734	MAT 15:32	Dzigo bredz me xpëëdscuel me rëb me lo zho: ―Rquia zdoo naa grë miech rii. Nadzele rac tsoṉ ngbidz blanso zho lo ne nu, ni na quianiedraa zho pe gow zho. Teḻne squise gzonëz naa zho, nend pa lo zie zho nëz ycow zho.
23736	MAT 15:34	Dzigo bnabdiidz me lo zho, rëb me: ―¿Bla guietxtil ziaadnie to i? ―Gadzaquew no ―rëb zho―, ni chop tsoṉ meḻ win.
23747	MAT 16:6	Lega nacle psilo me nonee me lo zho, rëb me: ―Goḻguieṉ goṉ, napaa noyab to lo zhincobi zha farisé, lo zhincobigaa zha saducé.
23748	MAT 16:7	Zeeṉe goṉ zho sca rëb me, rneechaa zho: ―Porne nagoṉ ziaadnied ne guietxtil, gane squi rnee me lo ne.
23755	MAT 16:14	Pquiab zho rëb zho: ―No zho rnee Juan Bautista, no zho rnee Líw, no zho rnee Jeremíw, meṉ ne biadteed xtiidz Dios padzeela; nogaa zho rnee no cho stib meṉ ne ziadteed xtiidz Diosa zig biaad zha ne biaad padzeela.
23758	MAT 16:17	Dzigo rëbchaa me: ―Dichos luu Simón (xingan Jonás) briee diidz qui ro luu, sac goṉ Pxoz naa meṉ ne no gbaa, meṉ co bneedz guieḻbiini qui lo luu, nacda ncuaaṉe cho miech nëw lo luu.
23765	MAT 16:24	Dzigo bnee me lo zho, rëb me: ―Zha ne racladz sëëb xnëz naa, none cueeladz zho zho, none lëb zho guiaadnaḻ zho miṉe rnabey naa, niicle teḻ miṉ co yquiaaqui csacsi miech zho. Nodne yquia zdoo zho xquieḻmban zho,
23774	MAT 17:5	Scaque nonee Pedr, zeeṉe znuse pquia tib xcow ngali zaatne zo zho ga, masaque biini ne rroṉ xcow co, lo xcow co bin zho zëëb tsi tib meṉ co, rnee me: ―Lëë xpëëd naa i goṉ, rleynie naa me, rzac zdoo naa miṉe quiayuṉ me. Miṉe rnee me, goḻgona.
23784	MAT 17:15	―Laa naa rnab lo luu, bzhiguieḻ beeṉguiac xpëëd naa, nrooble nosacsi guidz gutye win. Blactaa ziyobe win lo gui, ziyobe win lo nis ne.
23789	MAT 17:20	Dzigo rëbchaa me: ―Brieelode to niuṉcxooṉ to ma, sacne rnalode to Dios. Teḻ niaca miṉe rnalole to Dios siquier palal yeeṉ, gzoob ne siquier lal tib midz moxtaz, niicxe ncuaaṉe mazdraa ngaṉ gnab to lo me, zuṉ mew; tsod ncuaaṉe grieelod guṉ to.
23791	MAT 17:22	Xtan zha Galilé no zho, tib dzew rëb me lo zho: ―Naa ne nac Mgui ne pxeeḻ Dios, ib znaaz miech naa,
23794	MAT 17:25	―Rguizh mew, ¿pe nacne quizhd mew? Zeeṉe bdziṉ zho leṉ yu ne rbëz me, gardle guiab Pedra lo me, glole me bnabdiidz rëb me lo Pedr: ―Zig nac dimi ne razh lo meṉ ne nac rey dieṉ, ¿pe ye xpëëd me rguizha, te loxaque zha zit rguizha ye?
23795	MAT 17:26	Pquiab Pedr rëb Pedr: ―Zha zitse rguizha. ―Nligaa sca naca ―rëb Jesús―. Zha ne nac mëëd nodne quizh zho,
23799	MAT 18:3	rëb me: ―Gneli naa lo to gaṉle, teḻne csaande to xquieḻntseeb to, teḻne gacnguudzladzde to, gac to zig mëëdwin rii, per ni xnëz Dios grieelod sëëb to.
23817	MAT 18:21	Dzigo wbig Pedr rëb Pedr lo me: ―Zha ne sca dzigo guṉ falt lo naa, ¿blataa vuelt no guṉ naa zho perdon? ¿Gadztaaw lëë?
23818	MAT 18:22	Pquiab me rëb me: ―Lëda goṉ Pedr, led loxaque gadzdse vuelta. Teḻ blataa vuelt guṉ zho falt lo luu, none guṉ luu zho perdon.
23834	MAT 19:3	Ga no me, bdziṉ bla zha farisé gocladz zho niuṉgüet zho me, par dieṉ pe nxiṉd me tib diidz; bnabdiidz zho lo me rëb zho: ―Pe gnë luu dieṉ, ¿pe wena csëbtsieel zha bgui ne gacladztaa csëbtsieel?
23839	MAT 19:8	Pquiabchaa me rëb me: ―Ne squitaaxe waa miech nad, miech ndip zdoo goc xmeṉgol to, gane bdeed Moisés diidz csëbtsieel zho; saṉgue Dios psaṉd me diidz csëbtsieel miech.
23841	MAT 19:10	Dzigo rëbchaa xpëëdscuel me: ―Teḻ scataa nac xcuent guieḻtsieel, mazd lëëquew dzigo ctsieelniad ne.
23842	MAT 19:11	Pquiab me rëb me: ―Nligaa no mgui ne rtsieelniad, per zhis zho, ni no pe nacne sca riaaṉ zho.
23845	MAT 19:14	Zeeṉe goṉ me sca quiayuṉ zho, rëbchaa me lo zho: ―Ctsirede to grë mëëdlas yeeṉ qui, goḻsaan guiaad win lo naa. Sac goṉ grë mëëdlas yeeṉ, ni zha ne nac zig nac win, zha co nac zha ne sëëb ygab lo Dios.
23847	MAT 19:16	Laa me zieriee ga, zeeṉe bdziṉ tib mgui nguieg, tib zha ricwa, rëb zho lo me: ―Naṉ naa luu nac tib meṉ ne noseed miech, ni tib meṉ wen nac luu. Bnë dieṉ, ¿pe nac miṉe guṉ naa parne grieelo ygaa naa guieḻmban ndzon ne gdziṉd dze lozh?
23848	MAT 19:17	Pquiab Jesús rëb me: ―Rnee luu lëë tib meṉ wen nac naa. ¡Nligaaw, Diosse nac meṉ wen! Teḻne nli racladz luu ygaa luu guieḻmban co, none tsoxco luu gban luu miṉe rnabey Dios.
23849	MAT 19:18	Pquiab zho rëb zho lo me: ―¿Pa miṉ waa? Rëbchaa me: ―Miṉe rnee: Gute luu samiech luu, teḻne nole tsieel luu, tsonied luu zha ne led tsieeld luu, cuand luu samiech luu, yquiadiidzguizhd luu samiech luu,
23851	MAT 19:20	Dzigo rëbchaa zho: ―Ni tib miṉe rnee luu i gard quits naa, grësew zanaḻ naaw zigne naca. Racladz naa gacnaṉ naa, dieṉ peraa no guṉ naa.
23852	MAT 19:21	Horco rëb me lo zho: ―Teḻ racladz luu gac luu tib zha ne gban grëse miṉe rnabey Dios, güey sca güeyto grëse ncuaaṉe rap luu, dzigo güeytiiz dimi co lo grë zha ne guieṉd pe yquiin. Lozh ga, dë dënaḻ zhits naa. Miṉ co nagoṉ guṉ luu, dzigo zgaa luu guieḻmban ndzon co; ni scagaa nroob guieḻnzaac ne ygaa luu nëz lo Dios.
23854	MAT 19:23	Dzigo rëbchaa Jesús lo xpëëdscuel me: ―Gneli naa lo to gaṉle, grë zha ne squi rapcheṉ rzacxuu zho par sëëb zho xnëz Dios gnabey me zho.
23857	MAT 19:26	Dze bui me lo zho, dzigo rëbchaa me: ―Nligaa par miech zootle tsod zha ne grieelo sëëb xnëz me; saṉgue me naṉ me no zho. Sac teḻ me, tsod ncuaaṉe grieelod guṉ me.
23858	MAT 19:27	Horco pquiab Pedr rëb Pedr lo me: ―No dzigo waa, ¿pe nac miṉe ygaa no? Naṉle luu gaṉle, teḻ no grëse ncuaaṉe rdziaap no, laa no psaṉa, ziaadnaḻ no zhits luu.
23859	MAT 19:28	Pquiab me rëb me: ―Goḻgona gaṉle, dze ne gacncub grëse ncuaaṉe no, zeeṉe laa Mgui ne pxeeḻ Dios zob lo xcan ne zo zaatne nac lo guieḻndzon ne no me, dze co lo gza to ne nac to zha ne biaadnaḻ zhits naa, sob to lo gza tsiipchop xcan ne rieguiaḻ to. To gac zha ne guṉ guieḻwxtis lo gza tsiipchop dii ne nac zha Israel.
23879	MAT 20:18	bzeet me lo zho zha guṉ miech me zeeṉe laa zho gdziṉ Jerusalén, rëb me: ―Ib ziaab naa ladznia grë pxoz ne rnabey grë zho maistr ley, zha gnab guet naa.
23882	MAT 20:21	Dzigo bnabdiidz Jesús lo me, pe nac favor ne racladz me. Pquiab me rëb me: ―Racladz naa gneedz luu diidz sob tibga xpëëd rii naa cue luu zeeṉe gdziṉ dze ne laa luu zob zobnabey luu; tib zho nëz derech, stib zho nëz revés.