23214	MAT 1:1	Jesucrist ngol lo dii cheen rey David nu lo dii cheen Abraham. Lo yech ne mkee na re dii cheen re xey Jesús:
23215	MAT 1:2	Abraham ngok xuz Chak, Chak ngok xuz Kob, Kob ngok xuz Judá, kwaan re wech xaa.
23216	MAT 1:3	Judá ngok xuz Fares nu Zara, nu xnaa xaa ngok Tamar. Fares ngok xuz Esrom, Esrom ngok xuz Aram.
23217	MAT 1:4	Aram ngok xuz Aminadab, Aminadab ngok xuz Naasón, Naasón ngok xuz Salmón.
23218	MAT 1:5	Salmón ngok xuz Booz, nu xnaa xaa ngok Rahab. Booz ngok xuz Obed, nu xnaa xaa ngok Rut. Obed ngok xuz Isaí.
23219	MAT 1:6	Isaí ngok xuz rey David, rey David ngok xuz Salomón, nu xnaa xaa ngok sa Urías.
23220	MAT 1:7	Salomón ngok xuz Roboam, Roboam ngok xuz Abías, Abías ngok xuz Asa.
23221	MAT 1:8	Asa ngok xuz Josafat, Josafat ngok xuz Joram, Joram ngok xuz Uzías.
23222	MAT 1:9	Uzías ngok xuz Jotam, Jotam ngok xuz Acaz, Acaz ngok xuz Ezequías.
23223	MAT 1:10	Ezequías ngok xuz Manasés, Manasés ngok xuz Amón, Amón ngok xuz Josías.
23224	MAT 1:11	Josías ngok xuz Jeconías kwaan re wech xaa, mbanaka Josías leezha mloo xaa Babilonia re xey be, xaa Israel, xkyizhyo xaa nu mbe xaa xaa axta yizhyo Babilonia.
23225	MAT 1:12	Leezha ngulo mloo re xaa Babilonia re xey be xkyizhyo xaa: Jeconías ngok xuz Salatiel, Salatiel ngok xuz Zorobabel.
23226	MAT 1:13	Zorobabel ngok xuz Abiud, Abiud ngok xuz Eliaquim, Eliaquim ngok xuz Azor.
23227	MAT 1:14	Azor ngok xuz Sadoc, Sadoc ngok xuz Aquim, Aquim ngok xuz Eliud.
23228	MAT 1:15	Eliud ngok xuz Eleazar, Eleazar ngok xuz Matán, Matán ngok xuz Kob.
23229	MAT 1:16	Kob ngok xuz Che sa Mari, nu lee me nak xnaa Jesús, Xaa Mxaal Dios Nabeyy.
23230	MAT 1:17	Snee tub chida dii ngu axta Abraham nu axta rey David, nu rey David axta leezha mnabeyy Babilonia re xey be stub chida dii, nu leezha mnabeyy Babilonia axta mzhin Xaa Mxaal Dios Nabeyy, stub chida dii.
23231	MAT 1:18	Snee ngol Jesús: nakladiizh ka Che Mari; per gorna zeraka chelya rop xaa me, nu zeraka zhaal rop xaa, lee Mari mbeyyxiin kwent cheen Mbi Naban cheen Dios.
23232	MAT 1:19	Zee Che mle xgab laa xaa me xlaan, nel nak xaa tub xaa nali, nu nel nanzheklat xaa laa xaa me delant lo re myet.
23233	MAT 1:20	Ngulo mle xaa xgab le xaa sbaa, zee ngunii tub mandad cheen Xaa Nabeyy lo xaa lo tub mkaal, nu nzhé lo xaa: —Che, lu nak xaa dii cheen rey David, nazhebt lu chelya lu Mari, nel mbeyyxiin me kwent cheen Mbi Naban.
23234	MAT 1:21	Mari kano tub xgann nu kole lu mad Jesús, sbaa role mad nel lee mad koo re xaa xaa lo yalgut cheen jwalt cheen xaa.
23235	MAT 1:22	Rese kwaane ngok zee mbarlo re kwaan nzhé Xaa Nabeyy lo xaa mzaa kwent kwaan nzhé Dios lo lee xaa yilo:
23236	MAT 1:23	Lee tub ngwnaa, me zer chaal kwaan tub xaabyi, weyyxiin me nu zan me tub xgann me, xaa role Emanuel, (wdizh ne nii: “Dios nzo kwaan be”). [Is. 7:14]
23237	MAT 1:24	Gorna mroo mkaal lo Che, mle xaa kwaan nzhé mandad cheen Xaa Nabeyy lo xaa, nu mchelya xaa Mari.
23238	MAT 1:25	Per namchaalt xaa me axta gorna ngol xinn me. Nu mlole Che mad Jesús.
23239	MAT 2:1	Gorna ngol Jesús yezh Belén pa nabeyy Judea, re mbizh leezha mnabeyy rey Herod, zee lee re xaa mseed cheen mbal yiba mzhin Jerusalén. Xaa ba nze naz pa nlen mbizh.
23240	MAT 2:2	Nu mnabdizh xaa: —¿Pa nzho Rey cheen re xaa Israel, mad ngol nal? Nel ngune nu lo mbal cheen mad leezha mzo nu xkyizhyo nu, naz pa nlen mbizh, zee nze nu gool nu lo mad.
23241	MAT 2:3	Nu gorna mbin rey Herod kwaane nawent ngok lextoo xaa, nu noka re xaa Jerusalén mle doo xaa xgab.
23242	MAT 2:4	Mrezh Herod re ngwleyy non nu re maestr xaa nlu xtizh Dios, zee mnabdizh xaa nen paro gal Xaa Xaal Dios Nabeyy.
23243	MAT 2:5	Re xaa nzhé: —Gal xaa Belén pa nabeyy Judea; nel sbaa mkee xaa mzaa kwent kwaan nzhé Dios lo lee xaa yilo:
23244	MAT 2:6	Belén pa nabeyy Judea nak tub yezh non doo; nixa naka tub yezh chut, loya roo tub xaa nabeyy lo re yezh Israel, tub xaa kanap re xaa na, mod tub xaa wen nkanap mbakxiil. [Mi. 5:2]
23245	MAT 2:7	Zee xlaan mrezh Herod re xaa mseed cheen mbal yiba, nu mnabdizh xaa lo xaa nen cho gor mlu mbal lo xaa.
23246	MAT 2:8	Zee mxaal xaa re xaa Belén, nu nzhé xaa lo re xaa: —Gwa gu, gwakwaan gu madoo, nu gorna yizhal mad lo gu, zee yaad gu nu né guya lo na zee noka na yiyoll lo mad.
23247	MAT 2:9	Gorna ngulo mbin re xaa mseed cheen mbal yiba kwaan nzhé rey lo xaa zee nzha re xaa. Gorna ngune xaa lo mbal nyakdoola xaa. Nu lee mbal kwaan mlu lo xaa nzha delant lo re xaa axta ngulo mzhin re xaa pa nzho mad, nu naz baa mlaz mbal.
23249	MAT 2:11	Zee mzeeb xaa leen yoo, nu ngune xaa lo madoo kwaan Mari, xnaa mad. Nu mkichxub xaa nu mbill xaa lo mad, zee mxal xaa roo re kwaan nzhano xaa, nu mselazh xaa or, nu yaal, nu anseyt kwaan nak cheen yag mirra kwaan chul nzebech lo mad.
23250	MAT 2:12	Gwluzh Dios ngunii lo re xaa mseed cheen mbal yiba lo mkaal zee nabaret xaa naz pa nzho Herod, nu mbare xaa lazh xaa stub naz.
23251	MAT 2:13	Gorna lee re xaa mseed lo mbal yiba nya, lee tub mandad cheen Xaa Nabeyy, ngunii lo Che lo tub mkaal stub welt, nzhé lo xaa: —Guxche, nu be rop xnaa mad, nu broo zyaa naz yizhyo Egipto. Nu baa yoka lu zee, axta gorna nii naya, nel lee rey Herod kwaan mad gut xaa mad.
23252	MAT 2:14	Che nguxche, leeka gor yaal zee, nu mbe xaa rop xnaa mad nya xaa naz Egipto,
23253	MAT 2:15	pa ngu xaa axta ngut Herod. Kwaane mded zee mbarlo kwaan nzhé Xaa Nabeyy lo xaa mzaa kwent kwaan nzhé Dios lo lee xaa yilo: “Axta yizhyo Egipto mrezh na xgaan na”. [Os. 11:1]
23254	MAT 2:16	Gorna lee Herod ngune lee re xaa mseed cheen mbal yiba mkade, nu nambaret xaa naz lo Herod, zee mrixyan doo Herod. Kwaanzee mxaal xaa soldad yezh Belén nu re rench, zee gut xaa rese madoo, madbyi, mad neta chop liin, modxa nzhé re xaa nseed cheen mbal yiba.
23255	MAT 2:17	Sbaa mbarlo re kwaan mkee Jeremías, xaa mzaa kwent kwaan nzhé Dios lo lee xaa yilo:
23256	MAT 2:18	Mbin xaa tub bi yezh Ramá tub bi cheen yalne nu cheen xgab gro doo, nel Raquel nzho bel kwent cheen re xinn me, nu nanzheklat me seleyy xaa me, nel ngulola ngut re xinn me. [Jer. 31:15]
23257	MAT 2:19	Per gwluzh ngulo ngut Herod, lee tub mandad cheen Xaa Nabeyy ngwa lo Che naz Egipto, nu ngunii xaa lo xaa lo mkaal, nu nzhé xaa:
23258	MAT 2:20	—Guxche, nu be rop xnaa mad, nu bare naz yizhyo Israel, nel ngulola ngut re xaa nzhekla gut mad.
23259	MAT 2:21	Zee lee Che nguxche mbe rop xnaa mad, nya naz xkyizhyo be.
23260	MAT 2:22	Per gorna mbin Che lee Arquelao nabeyy Judea nu lee xaa nak xinn Herod, zee mzheb xaa nya xaa baa. Nu Dios ngunii lo xaa lo mkaal, zee nya xaa yizhyo Galilea.
23261	MAT 2:23	Gorna mzhin xaa zee, nya xaa ngu xaa tub yezh kwaan le Nazaret. Nu kwaane ngok zee mbarlo kwaan nzhé xaa mzaa kwent kwaan nzhé Dios lo lee xaa yilo: “Lee Jesús role Xaa Nazaret”.
23262	MAT 3:1	Re mbizh zee lee Juan Xaa Nchubnis re myet, mbid mzaa kwent cheen Dios naz wen cheen Judea.
23263	MAT 3:2	Nu nzhé xaa: —¡Blaa gu naletra gu kwaan nawent nu wii gu lo Dios nel mbizh kwaan nabeyy Dios mzhin gaxla!
23264	MAT 3:3	Juan nak xaa mzaa Chay kwent leezha nzhé xaa: Tub xaa nzho naz wen nii dublegan: “Bdexkwaa gu xnaz Xaa Nabeyy; bxal gu tub naz nali ze xaa”. [Is. 40:3]
23265	MAT 3:4	Nu xab Juan nak yichled kamey, nu nzii tub yed lextoo Juan. Nu lee kwaan nzhaw Juan nak mbeso nu kwaan nzho Juan nak mzhin wen.
23266	MAT 3:5	Re myet xaa Jerusalén, nu re myet xaa re yezh cheen Judea, nu re myet xaa nzho dub welt roo yuu Jordán, ngwa nguyon kwaan mzaa Juan kwent.
23267	MAT 3:6	Ngunii xaa lo Juan re jwalt cheen xaa kwaan mle xaa, zee mchubnis Juan xaa leen yuu Jordán.
23268	MAT 3:7	Per gorna ngune Juan zyen doo xaa fariseo nu xaa saduceo nzha rubnis, zee nzhé Juan lo re xaa ba: —¡Gu nak mod dii cheen mball wiz! ¿Cho né lo re gu xonn gu lo yalnayii kwaan né Dios yaad?
23269	MAT 3:8	Blu gu mod xaa mlaa naz nawent kwaan nzha gu nu wlipa wii gu lo Dios, kwaan gak mod xle cheen tub yag.
23270	MAT 3:9	Nu natot gu yalxwa nu yé gu: “Lee be nak dii cheen Abraham”; nel wlipa na nii na lo gu, Dios nzho mod le axta noka re ke ne gaka dii cheen Abraham.
23271	MAT 3:10	Lee yibyag nzobla cho lox re yag kwaan nanzaat xle wen, zee choog xaaya nu koo xaaya lo ki.
23272	MAT 3:11	Wlipa na nii na, na nchubnis re gu kwaan nis zee laa gu kwaan nawent kwaan kale gu nu wii gu lo Dios, per lee tich na nze stub xaa chubnis re gu kwaan Mbi Naban nu kwaan ki. Lee xaa nonra lo na, kwaanzee nanzhaalt xek na tich xkyelyed xaa, nel nanont na.
23273	MAT 3:12	Nzho garot yaa xaa koo paj lo nzhobxtil, nu kozhaw xaa nzhobxtil pa ngozhaw xaa re xob xaa, nu lee paj cheen nzhobxtil zek xaa lo ki kwaan tira nanyuyyt.
23274	MAT 3:13	Jesús ngwa roo yuu Jordán yizhyo cheen Galilea pa nzo Juan kachubnis re myet.
23275	MAT 3:14	Per Juan nanzheklat chubnis Jesús zee nzhé Juan lo xaa: —Na nzhaal rubnis lo lu, ¿chozhiin leel lu nze lo na?
23276	MAT 3:15	Jesús mkeb nzhé: —Nkin chubnis lu na, nel be nkin le kwaan né Dios. Juan mbin wdizh ne nu mchubnis xaa Jesús.
23277	MAT 3:16	Nu leeka gorna ngulo mrubnis Jesús, lee yiba mxal nu myun Mbi Naban cheen Dios lo Jesús nyaadla naz leen yiba mod tub palom.
23278	MAT 3:17	Zee mbin xaa tub bos kwaan nze naz yiba kwaan nzhé: —Xaa ne nak xgaan na, xaa nkedoola na, xaa nyakdoo lextoo na wii na lo.
23279	MAT 4:1	Zee lee Mbi Naban mbe Jesús naz wen pa kiil Maxuu xaa.
23280	MAT 4:2	Nu mkwan xaa tub choo mbizh nu tub choo yaal, gorna nandawt xaa nik tik kwaan, zeera ngok nlaan xaa.
23281	MAT 4:3	Nu lee Maxuu mbii gax lo Jesús zee kiil Maxuu Jesús, nu nzhé Maxuu: —Chelee lu wlipa lu nak lu Xgann Dios guzh lu lo re ke ne zee gaka pan.
23282	MAT 4:4	Per Jesús mkeb nzhé: —Lo Xkyech Dios nkee: “Nanebt pan nle zee mban re myet, nel noka re wdizh kwaan nroo roo Dios nle zee mban re myet”. [Dt. 8:3]
23283	MAT 4:5	Zee lee Maxuu mbe Jesús naz leen yezh Jerusalén, yezh kwaan nambey nak, nu mtexoob Maxuu Jesús yek yidoo pa mas ya nzeb,
23284	MAT 4:6	nu nzhé Maxuu lo xaa: —Chelee lu wlipa lu nak lu Xgann Dios, brenzeb naz xan naz lo yo; nel nkeela lo Xkyech Dios nzhé: “Dios xaal mandad cheen xaa zee zenyaa xaa lu, zee nalat nii lu lo ke”. [Sal. 91:11]
23285	MAT 4:7	Jesús mkeb nzhé: —Noka nkee lo Xkyech Dios nzhé: “Nanzhaalt kiil lu Xdios lu, Xaa Nabeyy lo lu”. [Dt. 6:16]
23286	MAT 4:8	Zee lee Maxuu mbe Jesús yek tub yi kwaan ya doo nzeb, nu mlu Maxuu rese yezh kwaan nzhi lo yizhyo lo Jesús, nu xomod chul doo nzhaka.
23287	MAT 4:9	Nu nzhé Maxuu: —Na za rese kwaane ka lu chelee lu kichxub lu lo na nu gool lu lo na.
23288	MAT 4:10	Jesús mkeb nzhé: —Bachii lo na Maxuu, nel lo Xkyech Dios nkee: “Nzhaal gool lu nebse lo Xdios lu Xaa Nabeyy lo lu, nu nebse lo lee xaa nzhaal kee lu zhiin”. [Dt. 6:13]
23289	MAT 4:11	Zee lee Maxuu mlaa Jesús, zee lee lak mandad cheen Dios mzhin lo xaa kanap xaa.
23290	MAT 4:12	Gorna lee Jesús mbin lee Juan nzho lozhyib, nya xaa naz yizhyo Galilea.
23291	MAT 4:13	Nu mded xaa yezh Nazaret, zee nya xaa ngu xaa naz yezh Capernaum, roo nistoo kwaan nak yizhyo cheen re dii cheen Zabulón nu Neftalí.
23292	MAT 4:14	Kwaane ngok zee mbarlo kwaan nzhé Chay, xaa mzaa kwent kwaan nzhé Dios lo lee xaa yilo:
23293	MAT 4:15	Yizhyo cheen Zabulón nu cheen Neftalí, kwaan nzhi stub lad roo yuu Jordán, roo wri nistoo, kwaan nak yizhyo Galilea pa nzho re xaa nanakt xaa Israel,
23294	MAT 4:16	re xaa nzho naz ba nzo xaa lo yalnakaw, per ngune xaa lo tub xni gro doo, nu noka nzho re xaa xan xkal cheen yalgut, per mlu tub xni lo xaa. [Is. 9:1-2]
23295	MAT 4:17	Gorzee lee Jesús mzelo mzaa kwent cheen wdizh chul nu nzhé xaa: —Blaa gu naletra gu re kwaan nawent nu wii gu lo Dios, nel mzhin gaxla mbizh gorna nabeyy Dios lo rese myet.
23296	MAT 4:18	Gorna nzhaze Jesús roo nistoo cheen Galilea, zee ngune xaa lo rop wech Simón (nu stub le xaa nak Pér) nu Ndres. Rop xaa ne nak xaa nzen mbal, nu kagobi xaa xkyeez xaa leen nis.
23297	MAT 4:19	Jesús nzhé lo rop xaa: —Breke rop gu tich na, zee le na gu xaa zere myet lo Dios, kwentaxa nzen gu mbal.
23298	MAT 4:20	Gorzee mlaa rop xaa xkyeez xaa nu nzhake xaa tich Jesús.
23299	MAT 4:21	Xepse mze Jesús naz delant, zee ngune xaa lo Chag nu Juan xgann Zebedeo, nzho yon xuz xaa leen kano kagobde xaa xkyeez xaa. Nu Jesús mrezh xaa.
23300	MAT 4:22	Nu leeka gorzee mlaa xaa xuz xaa leen kano nu mreke xaa tich Jesús.
23301	MAT 4:23	Jesús mded rese yezh Galilea nu mseed xaa rese xaa, re pa nkasa be nseed be xtizh Dios, nu mzaa xaa kwent wdizh chul cheen pa nabeyy Dios, nu msekwen xaa re xaa nzak reta klas yalyizh nu reta klas yalne.
23302	MAT 4:24	Nu dubse yizhyo cheen Siria mbin xaa re kwaan mle Jesús, zee nyiidno xaa re xaa nzak yalyizh nu re xaa nzak yalne, xaa nzho mbi mal lextoo, xaa nzhak naxen, xaa mdeen, zee sekwen Jesús re xaa.
23303	MAT 4:25	Zyen doo myet mreke tich Jesús, re xaa nze naz Galilea, re xaa nze naz chii yezh kwaan le Decápolis, re xaa nze naz Jerusalén, nu re xaa nze naz yizhyo cheen Judea, nu re xaa yezh kwaan nzhi stub lad roo yuu Jordán.
23304	MAT 5:1	Nu gorna ngune Jesús lee re myet nzhake tich xaa, zee nguxoob yi nu mzob xaa, zee lee re xaa mseed lo Jesús mbii gax lo xaa.
23305	MAT 5:2	Zee lee Jesús mzelo mseed re xaa nu nzhé xaa:
23306	MAT 5:3	—Wen re gu, xaa nzeen nkin Dios, nel lee pa nabeyy Dios gak xcheen re gu.
23307	MAT 5:4	’Wen re gu, xaa nzhonn nal, nel Dios seleyy re gu.
23308	MAT 5:5	’Wen re gu, xaa nadoo nak lextoo, nel lee re gu kayaa yizhyo kwaan zaa Dios.
23309	MAT 5:6	’Wen re gu, xaa nak mod tub xaa nlaan nu nzhek lextoo nle kwaan nali, nel Dios zle yudar gu.
23310	MAT 5:7	’Wen re gu, xaa nlesla ne wechxinn, nel Dios lesla ne re gu.
23311	MAT 5:8	’Wen re gu, xaa ngok nzhul lextoo, nel re gu ne lo Dios.
23312	MAT 5:9	’Wen re gu, xaa nkwaan ne xomod kwi wen re wechxinn, nel lee Dios né: “Re gu nak xiin na”.
23313	MAT 5:10	’Wen re gu, xaa mded bid nel nle gu kwaan nali kwaan né Dios, nel lee pa nabeyy Dios gak xcheen re gu.
23314	MAT 5:11	’Wen re gu, leezha nii nawent re myet lo gu, leezha nrenal xaa gu, leezha ngaazh xaa re kwaan namlet gu tich gu, nel ngwii gu lo na.