23233	MAT 1:20	ya lligaaba chi nuu Joseh guunn ba chin bagañiꞌ tuhbi xaanjla Dxiohs loh ba loh nin naꞌllgahsi ba rahbi aanjla chi loh Joseh: ―¡Joseh, llahga guehtu Davihd!, ayi guidxyihbi luꞌh guicaꞌha luꞌh María gaca bi cheꞌhla luꞌh laasii lliiꞌn bi nin gaalaa lliiꞌn Spíritu Saantun,
23240	MAT 2:2	ya chin badzihn raꞌ ba rahbi raꞌ ba: ―¿Cuun xchiꞌh rrehyi xteenn raꞌ bwiinn Israel, nin gueꞌdu guulaa? Laasii bidiaꞌha nu gutahn dxih xteenn ñiꞌh nez hasta rtahnn gubihdxyi, niꞌchin nin zoꞌpa gazuꞌnllihbi nu nez loh ñiꞌh, ―rahbi raꞌ ba.
23243	MAT 2:5	chiꞌchi rahbi raꞌ ba: ―Laꞌn guihdxyi Belehn xteenn Judea, laasii ziꞌchi bacaꞌh tuhbi daada nin guñiꞌ xchiꞌdxyi Dxiohs, squiiꞌ bacaꞌh ba:
23246	MAT 2:8	ya chin guyaꞌloh gunaabadxyiꞌdxyi ba lwehgu gahca guxeꞌhla ba laꞌh raꞌ ba para guihdxyi Belehn, ya rahbi Herodes loh raꞌ ba: ―Gulcheh riꞌchi, ya chin gadxeela tun, guunn tu bihsi naꞌh tin chegazulliibizahn loh ñiꞌh.
23251	MAT 2:13	Pwihsi babii si raꞌ rrehyi mahgu raꞌ chi, baluuꞌyiloh tuhbi xaanjla Dxiohs loh Joseh loh bacaꞌlda rahbi ba: ―Gwastii tin gucaꞌha badoꞌyiꞌhn cun xmaah Ñiꞌh, tin gulchechuulaꞌn para guihdxyi Egiptu, ya biaꞌhan riꞌchi hastayi chin guꞌnnahn bihsi yiꞌh, laasii Herodes nuu ba lligaaba gadxiꞌhyi ba badoꞌyiꞌhn tin gachi Ñiꞌh.
23253	MAT 2:15	ya riꞌchi guyuuꞌ raꞌ ba hastayi chin guhchi Herodes. Squiiꞌ guhca tin guzohba dxyiꞌdxyi raꞌ nin baziaꞌñih Dxiohs loh xigaaba raꞌ bwiinn nin guñiꞌ xcweenta Ñiꞌh chin rahbi Ñiꞌh: “Hasta guihdxyi Egiptuyi gudiidxyihn Lliiꞌnahn.”
23258	MAT 2:20	rahbi aanjla chi: ―Gwastii, tin gucaꞌha biñiꞌn cun xmaah Ñiꞌh tin gwah para lahdxyi raꞌ bwiinn Israel, laasii laꞌh raꞌ nin guclaaꞌdzi ñahchi biñiꞌn laꞌh raꞌ ba barah guhchi.
23261	MAT 2:23	ya chin badzihn ba riꞌchi guyuuꞌ ba loh guihdxyi nin laa Nazaret. Guhca squiiꞌ tin guzohba dxyiꞌdxyi raꞌ nin guñiꞌ raꞌ bwiinn nin guñiꞌ xcweenta xchiꞌdxyi Dxiohs: “Ziriaꞌhlah Ñiꞌh bwiinn guihdxyi Nazaret.”
23263	MAT 3:2	ya rahbi Jwahn: ―Gulgasaguuꞌdzi stoꞌ tu nez loh Dxiohs laasii laꞌh xquelrnabwaꞌ Ñiꞌh badzihn gahxu.
23264	MAT 3:3	Laꞌh Jwahn ruzeꞌta profeta Isaías chin bacaꞌh ba squiiꞌ: Ziuuꞌ tuhbi rsiaaꞌha nin guiñiꞌ jweersi rooꞌ loh dahan desiertu: “Gulguiꞌhnn zaꞌca xneziuh Dxiohs, nee gulgasanchii za xneziuh Ñiꞌh laꞌn lastoꞌ tu.”
23268	MAT 3:7	Ya chin bwaꞌha Jwahn ziahan raꞌ bwiinn fariseu cun bwiinn saduceu raꞌ cagadzihn raꞌ tin guroꞌbañihsa Jwahn laꞌh raꞌ ba, chiꞌchi rahbi Jwahn: ―¡Laꞌh tu bwiinn naxihn raꞌ nin naa ziga zi bweꞌlda ñaꞌlaaꞌdzi! ¿Chyuulla gudxixteeꞌ loh tu tin cadxiꞌhyi tu canehza taꞌh tu loh xjwisi Dxiohs nin gueꞌdu gadzihn?
23275	MAT 3:14	Galoh nin nagahdxi guroꞌbañihsa Jwahn laꞌh Ñiꞌh rahbi Jwahn loh Ñiꞌh: ―¡Yiꞌh rchiꞌhn guroꞌbañihsa luꞌh naꞌh nee laꞌlaꞌgaꞌh Yiꞌh zeꞌ luꞌh loon tin guroꞌbañiꞌsahn Yiꞌh!
23276	MAT 3:15	Chiꞌchi rahbi Jesuhs loh Jwahn: ―Nicala basaaꞌn gacan ziꞌchi nnah, laasii nahpa guidiꞌhnn nuꞌh ziga rclaaꞌdzi Dxiohs gaca.
23278	MAT 3:17	chiꞌchi bihn raꞌ ba tuhbi rsiaaꞌha nez llaaꞌndxibaaꞌ guñiꞌ Dxiohs rahbi Ñiꞌh: ―Deeꞌ naa Lliiꞌnahn nin nadziiꞌhihn nee riahxi duxaꞌhn pur xcweenta bi.
23281	MAT 4:3	chiꞌchi badzihn bwiinndxaaba hasta zuu Ñiꞌh tin guclaaꞌdzi ba ñusaguiꞌhi ba laꞌh Ñiꞌh, ya rahbi ba loh Ñiꞌh: ―Sidela guchii luꞌh naa luꞌh Lliiꞌn Dxiohs, guhdzi loh dxiah raꞌ ca dxiahcan guehta.
23282	MAT 4:4	Chiꞌchi rahbi Jesuhs: ―Caa loh Xchihtsi Dxiohs: “Ayi guehta si dxiꞌh gahw bwiinn guunn para guibahan raꞌ ba, sino que rchiꞌhn neezaa guzoꞌbadxiahga raꞌ ba xchiꞌdxyi Ñiꞌh nin rreꞌh rwaaꞌ Ñiꞌh.”
23284	MAT 4:6	chiꞌchi rahbi ba loh Ñiꞌh: ―Sidela guchii luꞌh naa luꞌh Lliiꞌn Dxiohs, balaꞌha yiꞌh desde riꞌca hasta loh yuh, laasii caa loh Xchihtsi Dxiohs: “Zixeꞌhla Ñiꞌh xaanjla Ñiꞌh tin gaapaa raꞌ ba yiꞌh, ya cun naa raꞌ aanjla raꞌ chi zinaꞌzu raꞌ ba yiꞌh tin ayi guireꞌlda luꞌh nin tuhbi dxiah.”
23285	MAT 4:7	Chiꞌchi rahbi Jesuhs loh bwiinndxaaba chi: ―Neezaa caa loh Xchihtsi Dxiohs: “Ayi guunn tu pwexta laꞌh Dxiohs nin rnabwaꞌ.”
23287	MAT 4:9	chiꞌchi rahbi bwiinndxaaba chi loh Ñiꞌh: ―Naꞌh zuniꞌhihn garaatiiꞌ raꞌ deeꞌ yiꞌh sidela guzuꞌnllihbi luꞌh nez loon nee gaann za luꞌh naꞌh.
23288	MAT 4:10	Chiꞌchi rahbi Jesuhs loh bwiinndxaaba chi: ―¡Bwaa bwiinndxaaba!, laasii caa loh Xchihtsi Dxiohs: “Xtaada Dxiohs si luꞌh gaann luꞌh, nee loh si Ñiꞌh chuu luꞌh tin guunn luꞌh xtsiꞌn Ñiꞌh.”
23295	MAT 4:17	Pwihsi desde laꞌn dxyih raꞌ chi guzaꞌloh cagaluuꞌyi Jesuhs rahbi Ñiꞌh: ―Gulgasaguuꞌdzi stoꞌ tu nez loh Dxiohs, laasii laꞌh xquelrnabwaꞌ Dxiohs badzihn gahxu.
23297	MAT 4:19	chiꞌchi guñiꞌ Jesuhs loh raꞌ ba rahbi Ñiꞌh: ―Gultanaꞌhla naꞌh, laasii nnah guꞌnnahn laꞌh tu nin guluuꞌyi xchiꞌdxyi Dxiohs laꞌh raꞌ bwiinn xlawaaꞌha nin riateꞌhe tu bwehlda.
23306	MAT 5:3	―Dichohsa raꞌ bwiinn nin naann chaꞌyi rchiꞌhn duxa raꞌ ba xquelrahcanee Dxiohs, laasii xteenn raꞌ ba naa dxibaaꞌ hasta nuu Dxiohs.
23307	MAT 5:4	’Dichohsa raꞌ bwiinn nin ruꞌn nnah laasii rahcabwaꞌ raꞌ ba nahpa raꞌ duhlda, per zadzihn dxyih nin zaguuꞌnasaa Dxiohs stoꞌ raꞌ ba.
23308	MAT 5:5	’Dichohsa raꞌ bwiinn nin nadoꞌlaaꞌdzi, bwiinn raꞌ nin ruzoꞌbadxiahga ziga xclaaꞌdzi Dxiohs gaca, laasii zahcanee Dxiohs laꞌh raꞌ ba loh guelnabahan nin guibahan raꞌ ba loh guidxyiyuh riiꞌ.
23309	MAT 5:6	’Dichohsa raꞌ bwiinn nin cachiaꞌhan cun nin cadxahga ñihsa, laasii pur nin saꞌloh guunn raꞌ ba nin xclaaꞌdzi Dxiohs guunn raꞌ ba, pwihsi laꞌh gahca Ñiꞌh zahcanee Ñiꞌh laꞌh raꞌ ba tin guzaꞌloh raꞌ ba ziga xclaaꞌdzi Ñiꞌh guunn raꞌ ba.
23310	MAT 5:7	’Dichohsa raꞌ bwiinn nin ralahsastoꞌ lasaaꞌ raꞌ ñiꞌh, pwihsi laꞌh Dxiohs zalahsastoꞌ Ñiꞌh laꞌh raꞌ ba.
23311	MAT 5:8	’Dichohsa raꞌ bwiinn nin xclaaꞌdzi gaca nayaa stoꞌ raꞌ ñiꞌh nez loh Dxiohs laasii zahcanee Ñiꞌh laꞌh raꞌ ba gaca nayaa stoꞌ raꞌ ba tin ziꞌchi gwaꞌha raꞌ ba laꞌh Ñiꞌh.
23312	MAT 5:9	’Dichohsa raꞌ bwiinn nin rusacwachidxyiistoꞌ laꞌh bwiinn nin rdxindxinee lasaaꞌ ñiꞌh, laasii laꞌh raꞌ ba ziriaꞌhlah raꞌ ba lliiꞌn Dxiohs.
23313	MAT 5:10	’Dichohsa raꞌ bwiinn nin cagatiiꞌdxiloh guelrzaꞌcazii pur nin ruzoꞌbadxiahga raꞌ ba xcweenta xchiꞌdxyi Dxiohs, laasii xteenn raꞌ ba naa nin gudiꞌhi Dxiohs laꞌh raꞌ ba nez dxibaaꞌ.
23314	MAT 5:11	’Dichohsa tu chin guiñiꞌyah bwiinn laꞌh tu nee gusaꞌcazii raꞌ ba laꞌh tu pur xcweenta nin riachiistoꞌ tu xchiꞌdxyiꞌhn nee chin guguꞌchi dxixiꞌhw raꞌ ba laꞌh tu cun ziahan raꞌ dxyiꞌdxyi xihn raꞌ,
23316	MAT 5:13	’Laꞌh tu naa tu ziga zihdxi loh guidxyiyuh riiꞌ, per sidela laꞌh zihdxi chi guñihchin xquelnallihin, ayi ru xi galluꞌyitiiꞌhin, ya ziꞌchi ziuuꞌbwihin loh neziuh ya garaa raꞌ bwiinn zuzuꞌnñaaꞌ raꞌ ba yihcan.
23317	MAT 5:14	’Laꞌh tu naa tu ziga tuhbi biaꞌñih loh guidxyiyuh riiꞌ; laasii tuhbi guihdxyi nin riiꞌ yihca tuhbi dahan ayi nuu chuulaꞌnan,
23320	MAT 5:17	Rahbi za Jesuhs: ―Ayi guunn tu lligaaba naꞌh zeꞌldahn tin guñihchiloon xlehyi guehtu Moisehs o xcweenta ziga bacaꞌh guehtu daada raꞌ nin guñiꞌ xchiꞌdxyi Dxiohs; aaca ayi par niꞌchi dxiꞌh zeꞌldahn, sino que zeꞌldahn tin guꞌnnahn soobaa garaa dxyiꞌdxyi nin bacaꞌh raꞌ ba.
23324	MAT 5:21	Rahbi za Ñiꞌh: ―Laꞌh tu bihn xa gucahpwehn raꞌ xtaada guldooꞌ raꞌ tu chin bihn raꞌ ba dxyiꞌdxyi raꞌ squiiꞌ: “Ayi chiinn luꞌh bwiinn, laasii nin chiinn bwiinn zahca za guelguxchisi xcweenta ba.”
23325	MAT 5:22	Per naꞌh rñiꞌn cuun chiꞌh zi bwiinn nin guidxyiꞌchinee bwihtsi ñiꞌh zahca ba bwiinn duhlda loh raꞌ guxchisi, ya cuun chiꞌh zi bwiinn nin gahbi loh bwihtsi ñiꞌh: “Bwiinn nahda”, o gusioꞌba ba laꞌh bwihtsi ba zahca ba tuhbi bwiinn duhlda nez loh raꞌ guxchisi nin dziꞌbaloh; ya cuun chiꞌh zi bwiinn nin guiñiꞌ tohnta duxa loh bwihtsi ñiꞌh ziga bwiinn tohnta o bwiinn loh mbah tiiꞌ, bwiinn chi guzee para gabihldxyi.
23328	MAT 5:25	’Sidela chyuulla xclaaꞌdzi guinaaba guxchisi yiꞌh, mas chaꞌyi lwehgu basiaꞌlda dxyiꞌdxyi cun laꞌh ba gaduhbi nin nagahdxi chedxiaaba luꞌh laꞌn naa raꞌ guxchisi, laasii sidela ayi chiꞌhyi luꞌh xa guunn luꞌh galoh, guxchisi dziꞌbaloh raꞌ chi zutiꞌdxi raꞌ ba yiꞌh loh raꞌ guixaꞌga ya guixaꞌga raꞌ chi zulaꞌha raꞌ ba yiꞌh laꞌn lahtsidxiꞌba,
23330	MAT 5:27	Rahbi za Ñiꞌh: ―Laꞌh tu bihndxiahga desde galohyi zaꞌbi dxyiꞌdxyi: “Ayi gaca luꞌh bwiinn gubwihlli.”
23334	MAT 5:31	Rahbi za Ñiꞌh: ―Neezaa biinloh dxyiꞌdxyi raꞌ riiꞌ desde galohyi: “Cuun chiꞌh zi bwiinn nin taaꞌha cheꞌhla ñiꞌh, nahpa rcaꞌh ba loh dxihtsi pur nin rlaaꞌha ba cheꞌhla ba.”
23336	MAT 5:33	Rahbi za Ñiꞌh: ―Neezaa bihnn tu zaꞌbi dxyiꞌdxyi bihn raꞌ xtaada guldooꞌ tu des galohyi: “Ayi gucweꞌza luꞌh guzaꞌloh luꞌh dxyiꞌdxyi nin guiñiꞌ luꞌh loh Dxiohs.”
23340	MAT 5:37	Sidela gahbi tu “Uuhn”, nahpa gaca uuhn, per sidela gahbi tu “Coh”, nahpa za gacan coh, laasii nin gudziiꞌbaru dxyiꞌdxyi yihca dxyiꞌdxyi raꞌ nin naa xnehza riiꞌ, nadxaaba niꞌchi.
23341	MAT 5:38	Rahbi za Ñiꞌh: ―Laꞌh tu bihn dez galohyi guzaꞌbi dxyiꞌdxyi: “Bizloh cun bizloh, nee lahyi cun lahyi.”
23346	MAT 5:43	Rahbi za Ñiꞌh: ―Bihn za tu nuu dxyiꞌdxyi dez galohyi rñiꞌn: “Gaantsiiꞌhi luꞌh xmihgu luꞌh, ya bidxyiꞌchinee laꞌh nin rdxyiꞌchinee yiꞌh.”
23349	MAT 5:46	Ya sidela yiꞌh gantsiiꞌhi luꞌh nin nadziiꞌhi yiꞌh, ¿cuun xchiꞌh guelnazaꞌca nin guicaꞌha tu? Hasta nin rusadxihlli impwestu para Roma ruhnn raꞌ ziꞌchi.
23350	MAT 5:47	Ya sidela gugahpaDxiohs tu laꞌh si nin naa raꞌ bwihtsi tu, ¿cuun xchiꞌh nin naa bwen nin cayuhnn tu? ¿Tayi ziꞌchi gahca dxiꞌh ruhnn raꞌ nin ayi naa raꞌ bwiinn Israel?
23352	MAT 6:1	Rahbi za Jesuhs: ―Ayi gutiꞌchi tu dxyiꞌdxyi pur dziꞌn zaꞌca si nin ruhnn tu tin sola gwaꞌha raꞌ bwiinn xi ruhnn tu, laasii sidela sola gutiꞌchi tu dxyiꞌdxyi pur xtsiꞌn zaꞌca tu ayi xi guicaꞌha tu loh Xtaada tu nin nuu dxibaaꞌ,
23356	MAT 6:5	Rahbi za Ñiꞌh: ―Chin cwidxyi-guinaaba tu loh Dxiohs, ayi guunn tu ziga ruhnn raꞌ bwiinn rusaguiꞌhi raꞌ nin riuuꞌstoꞌ raꞌ ñiꞌh gaca lasahca raꞌ nez loh raꞌ bwiinn nee laꞌn guidoꞌ o loh neziuh raꞌ ya rzuꞌnchiigah raꞌ ba rbwihdxyi-rnaaba raꞌ ba loh Dxiohs nicala loh dxiaaꞌ raꞌ laasii riuuꞌstoꞌ raꞌ ba guluuꞌyi raꞌ ba ziga ruhnn raꞌ ba tin guiñiꞌ zaꞌca bwiinn pur laꞌh raꞌ ba, ya guchiin nin rñiꞌn, cun sola ziga ruhnn raꞌ ba riiꞌ laꞌh raꞌ ba bwiꞌhnn gahn nin guicaꞌha raꞌ ba,
23365	MAT 6:14	’Laasii sidela laꞌh tu gusaguuꞌdzi stoꞌ tu cun bwiinn nin ruñihchi xilla ziꞌchi za Xtaada tu nin nuu dxibaaꞌ ziaꞌlda za stoꞌ Ñiꞌh xtuhlda tu,
23367	MAT 6:16	Rahbi za Ñiꞌh: ―Chin gucwaaꞌhan tu, ayi guunn nalaasa loh tu ziga ruhnn raꞌ bwiinn nin rusaguiꞌhi bwiinn raꞌ nin ruluuꞌyi nez loh raꞌ bwiinn chin rucwaaꞌhan raꞌ ba ruhnn nalaasa loh raꞌ ba tin gwaꞌha paꞌhcaa bwiinn riigacwaaꞌhan raꞌ ba. Guchiin nin rñiꞌn loh tu cun sola ziga ruhnn raꞌ ba zicaꞌha raꞌ ba nin ruhnn tucahri guicaꞌha raꞌ ba.
23370	MAT 6:19	Rahbi za Ñiꞌh: ―Ayi cwachicwaꞌh tu guelnazaꞌca xteenn tu loh guidxyiyuh riiꞌ, nez rii raꞌ maan nin ruñihchiloh lahdxi cun gubaꞌn,
23373	MAT 6:22	Rahbi za Ñiꞌh: ―Bizloh bwiinn naa ziga biaꞌñih xteenn tihxi ba; pwihsi sidela laꞌh bizloh luꞌh nazaꞌcan, gaduhbi za tihxi luꞌh gahpa biaꞌñih;
23374	MAT 6:23	per sidela laꞌh bizloh luꞌh rahcan, gaduhbi za tihxi luꞌh nuu loh nacahyi, ¡pwihsi nacahyi duxa guiñah gaduhbi tihxi luꞌh!
23375	MAT 6:24	’Ayi nin tuhbi bwiinn nin guunn dziꞌn loh chiohpa ballwaaꞌn, laasii zidxyiꞌchinee ba tuhbi ballwaaꞌn chi ya stuhbi ba zahca nadziiꞌhi ba, o gucaꞌstoꞌ ba tuhbi ba ya stuhbi ba zibweꞌhestoꞌ ba. Ya niꞌchin ayi nuu gucaꞌstoꞌ ba laꞌh Dxiohs sidela xquelnazaꞌca si ba cadxiꞌhyi ba loh guidxyiyuh riiꞌ.
23376	MAT 6:25	’Niꞌchin nin naꞌh guiñiꞌn loh tu, ayi guunn tu ziahan lligaaba pur nin gahw tu o pur nin guee tu para guibahan tu, nee ayi za chuu tu ziahan lligaaba ca nehza sah xahba tu nin gacu tu. ¿Tayi zirooꞌ ru dxiꞌh lasahca xquelnabahan bwiinn loh ziga nin rahw raꞌ ba, ya neezaa tihxi bwiinn zirooꞌ ru lasahcan loh ziga lahdxi nin rahcu ba?
23377	MAT 6:26	Gulguiꞌhnn lligaaba maaniꞌhn raꞌ nin rzuh loh bwih xaloh nabahan raꞌ ma ayi raaꞌn raꞌ ma, ayi za rataaꞌha raꞌ ma guiñaꞌh, nee ayi za rguꞌchaꞌyi raꞌ ma ñihza laꞌn yuuꞌ ziga ruhnn tu, per nicala ayi xi nahpa raꞌ ma, Xtaada Dxiohs tu nin nuu dxibaaꞌ rudiꞌhi xi rahw raꞌ ma. Pwihsi laꞌh tu, ¿tayi ruhn tu lligaaba mahzi ru lasahca tu loh maaniꞌhn raꞌ?
23378	MAT 6:27	Pwihsi nicala riuuꞌ ru tu ziahan lligaaba, ¿xa guunn luꞌh guchiooꞌ ru luꞌh xquelnabahan luꞌh mas tuhbi hohra?
23379	MAT 6:28	¿Xixnaa chiꞌh riuuꞌ tu lligaaba canehza sah xahba tu? Gulguiꞌhnn lligaaba dxiaꞌ billiiga raꞌ xa rrooꞌ raꞌn loh dahan: ayi xi dziꞌn ruhnn raꞌn, ayi za rdxihba raꞌn lahdxi.
23381	MAT 6:30	Sidela ziꞌchi rzuhchaꞌyi Dxiohs laꞌh raꞌ cwaꞌn nagaa raꞌ nin rñiah joosca raꞌ nin rii loh dahan nee guillii guicaꞌdxihin loh dxih, niꞌchin ¿xilaꞌh xchiꞌh laꞌhtu ayi dxiaꞌn guniꞌhi Ñiꞌh nin rchiꞌhn tu bwiinn nahda raꞌ nin ayi riuuꞌ ayi riaꞌzi dxyiꞌdxyi xcweenta Dxiohs?
23382	MAT 6:31	Pwihsi ayi chuu tu lligaaba guiñiꞌ tu: “¿Xi guidaꞌw chiꞌh nuꞌh?”, o “¿Canehza sah lahdxi guidxiaacu nu?”,
23386	MAT 7:1	Rahbi za Ñiꞌh: ―Ayi guluuꞌyi xcwihin tu lasaaꞌ tu tin ayi za guluuꞌyi xcwihin za Dxiohs laꞌh tu,
23388	MAT 7:3	¿Xixnaa rzuu luꞌh rutaꞌtsi luꞌh dxihlli nin nuu laꞌn bizloh bwihtsi luꞌh, nee ayi rwaꞌha xgah luꞌh baltaadxiu nin nuu laꞌn bizloh luꞌh?
23389	MAT 7:4	Nee sidela yiꞌh nuu tuhbi taaꞌha baltaadxiu laꞌn bizloh luꞌh, ¿xalla guunn chiꞌh luꞌh gahbi luꞌh loh bwihtsi luꞌh: “Daꞌnee loh luꞌh gabweꞌhehn dxihlli nin nuuꞌhun”?
23390	MAT 7:5	¡Bwiinn nin nihin riaꞌzi dxyiꞌdxyi yihca ñiꞌh! Babweꞌhexgah baltaadxiu nin nuu loh luꞌh, ya tin ziꞌchi dxiin loh luꞌh gabweꞌhe luꞌh dxihlli nin nuu laꞌn bizloh bwihtsi luꞌh.
23391	MAT 7:6	’Ayi gudiꞌhi tu xcohsa zaꞌca Dxiohs laꞌh chyuu chiꞌh zi bwiinn raꞌ nin naa raꞌ zigazi bwehcu raꞌ, tin ayi gabiaꞌgariinee raꞌ ba laꞌh tu chindxinee raꞌ ba laꞌh tu hasta dxyigah guzuꞌhyi raꞌ ba laꞌh tu. Ziꞌchi gahca za cohsa raꞌ nin lasahca ru ayi gudiꞌhi tun loh chyuu chiꞌh zi bwiinn laasii nuu raꞌ ba naa raꞌ ba zigazi cuuchi, rbweꞌhestoꞌ raꞌ ba cohsa zaꞌca raꞌ chi ya naa raꞌ ba ziga cuuchi nin guzuꞌñaaꞌ raꞌ ba yihcan.
23392	MAT 7:7	Rahbi za Ñiꞌh: ―Gulchezah gulguinaaba nin rchiꞌhn tu, pwihsi Dxiohs zuniꞌhi Ñiꞌh nin guinaaba tu; sidela xiilla chezah chiꞌhyi tu zidxeela tun, ziga nin guiclaaꞌdzi tu; sidela chezah gusihdzi tu rwaaꞌ yuuꞌ pwihsi zillaalan,
23394	MAT 7:9	Niꞌchin laꞌh tu sidela chyuulla tuhbi tu guinaaba lliiꞌn tu nin gahw bi, ¿ta ziaalla tu gudiꞌhi tu dxiah gahw bi xlaawaaꞌha guehta?
23395	MAT 7:10	o ¿gu gudiꞌhi tu tuhbi bweꞌlda gahw bi chin guinaaba bi bwehlda?
23396	MAT 7:11	Pwihsi laꞌh tu nicala naa tu bwiinn nadxaaba raꞌ per naann tu xa gudiꞌhi tu cohsa zaꞌca laꞌh raꞌ lliiꞌn tu; ¡xi laꞌhxchiꞌh Xtaada tu nin nuu dxibaaꞌ ayi dxiaꞌhan gudiꞌhi Ñiꞌh cohsa zaꞌca laꞌh raꞌ bwiinn nin guinaaban loh Ñiꞌh!
23398	MAT 7:13	Rahbi za Ñiꞌh: ―Gulguiꞌhnn jweersi chuꞌtii tu nez rwaaꞌ leeꞌ biꞌtuꞌhn, laasii rwaaꞌ leeꞌ cun loh neziuh nin zee para gabihldxyi nabiꞌhyin, ya ziahan raꞌ bwiinn rnaꞌzu nehz chi,
23400	MAT 7:15	’Gulgahca nasiin pur bwiinn raꞌ nin rclaaꞌdzi gusaguiꞌhi laꞌh raꞌ bwiinn; rñiꞌ si raꞌ ba ruluuꞌyi raꞌ ba xchiꞌdxyi Dxiohs, nee rluuꞌyi si nadoꞌlaaꞌdzi raꞌ ba ziga tuhbi lliꞌhyi, per nez laꞌn lastoꞌ raꞌ ba naa ziga zi tuhbi maan nin laa lohbo nin ñaꞌlaaꞌdzi duxa,
23406	MAT 7:21	’Ayi garaa raꞌ dxiꞌh nin rñiꞌ loon: “¡Ballwaaꞌn, ballwaaꞌn!”, chuꞌtii loh guelrnabwaꞌ xteenn Dxiohs nin nuu dxibaaꞌ, sino que laꞌh si nin guzoꞌbadxiahga guunn ziga rclaaꞌdzi Xtaaꞌdahn nin nuu dxibaaꞌ gaca.
23407	MAT 7:22	Ziuuꞌ ziahan raꞌ nin guiñiꞌ loon: “¡Ballwaaꞌn, ballwaaꞌn! ¿Tayi laꞌh dxiꞌh nu bachidiꞌyidxyiꞌdxyi nu xchiꞌdxyi luꞌh pur lah Yuꞌbiluꞌh, nee pur lah za Yuꞌbiluꞌh babweꞌhe nu bwiinndxaaba stoꞌ raꞌ bwiinn, nee cun lah za Yuꞌbiluꞌh bachidiꞌhnn nu ziahan dziꞌn rooꞌ raꞌ?”
23408	MAT 7:23	Per chiꞌchi guiñiꞌn loh raꞌ ba: “Ayi nuꞌnbwaꞌtiiꞌhihn laꞌh tu; ¡mas chaꞌyi gulchesuu nez loon laasii laꞌh tu nin ruhnn ganaalla dziꞌn dxaaba raꞌ!”
23409	MAT 7:24	Rahbi za Ñiꞌh: ―Niꞌchin bwiinn nin riuuꞌ-riaꞌzi xchiꞌdxyiꞌhn, bwiinn chi naa ziga tuhbi bwiinn nasiin nin bwiꞌhnn yihdzi ñiꞌh yihca tuhbi dxiahnguihdzi,
23416	MAT 8:2	ya loh zeezah Ñiꞌh gwabiiga tuhbi bwiinn nin rahchyi guiiꞌdxiu tihxi ñiꞌh nez loh Jesuhs, lwehgu bazuꞌnllihbi ba loh Ñiꞌh chiꞌchi rahbi ba loh Jesuhs: ―Daada, sidela ziziꞌguehlda luꞌh zuhnn luꞌh gahn gusiaca luꞌh naꞌh.
23417	MAT 8:3	Ya chiꞌchi basagaꞌh Jesuhs naa Ñiꞌh tin cun naa Ñiꞌh bidxiꞌ Ñiꞌh tihxi ba, chiꞌchi rahbi Ñiꞌh: ―Xclaaꞌdzihn dxiaa tihxi luꞌh. Ya hohra chi gahca guñihchiloh raꞌ guiiꞌdxiu chi tihxi bwiinn chi ya biaca ba gueldxyihdxyi chi,
23418	MAT 8:4	ya chiꞌchi rahbi Jesuhs loh ba: ―Ayi chyuloo guuyitiiꞌ luꞌh xa biaca luꞌh, sola gwagaluuꞌyi tihxi luꞌh laꞌh si bixohza tin gwaꞌha ba laꞌluꞌh biaca, nee chenee za luꞌh tuhbi guelguhn xcweenta nin biaca luꞌh ziga rnabwaꞌ xlehyi Moisehs tin garaa raꞌ bwiinn gacabwaꞌ raꞌ ba laꞌluꞌh biaca gueldxyihdxyi nin guhca luꞌh.
23420	MAT 8:6	rahbi ba: ―Daada, tuhbi xmooꞌzahn cayahcalluꞌhu rwaaꞌ yiidzihn, ayi nuu guiñiꞌbi bi nee nugasaꞌcazii guelnayaan duxa laꞌh bi.
23421	MAT 8:7	Chiꞌchi rahbi Jesuhs: ―Zizaꞌhn tin gusiaꞌcahn laꞌh bi.
23422	MAT 8:8	Ya chiꞌchi rahbi capitahn chi: ―Xtaaꞌdahn naꞌh, ayi xi lasahcaꞌhn tin bweꞌzi guzee Yuꞌbiluꞌh rwaaꞌ yiidzihn; cun sola guñiꞌ luꞌh tuhbi xchiꞌdxyi Yuꞌbiluꞌh pur gueldxyihdxyi riiꞌ ya zariaꞌhan tihxi xmooꞌzahn,
23423	MAT 8:9	laasii neezaa naꞌh naan xmooza raꞌ bwiinn nin rnabwaꞌ naꞌh, ya ziꞌchi gahca za naꞌh rnabwaꞌn suldahdu, ya chin raꞌpihn loh tuhbi raꞌ ba: “Gwah”, riah ba; ya chin raꞌpihn loh stuhbi ba: “Gudaaꞌ”, riꞌ ba; ya chin raꞌpihn loh xmooꞌzahn: “Bwiꞌhnn deeꞌ”, ruhnn ban.
23424	MAT 8:10	Ya chin bihn Jesuhs dxyiꞌdxyi raꞌ riiꞌ, badxyigaaꞌ duxa loh Ñiꞌh, chiꞌchi rahbi Ñiꞌh loh raꞌ bwiinn nin naꞌhla laꞌh Ñiꞌh: ―Guchiin nin rñiꞌn loh tu, nin loh raꞌ bwiinn Israel nagahdxi guidxeelaꞌhn nin tuhbi bwiinn nin mahzi riachii ru stoꞌ ñiꞌh xchiꞌdxyiꞌhn ziga riachiistoꞌ ndxiꞌhw riiꞌhin,
23427	MAT 8:13	Ya chiꞌchi rahbi Jesuhs loh capitahn chi: ―Gubiaꞌgarii yihdzi luꞌh, laasii nnah gaca ziga gwachiistoꞌ luꞌh naꞌh. Ya hohra chi gahca biaca xmooza capitahn chi.
23431	MAT 8:17	Squiiꞌ guhca tin guzohba dxyiꞌdxyi xcweenta ziga guñiꞌ guehtu Isaías chin guñiꞌ ba: “Laꞌh ba gucaꞌha xqueldxyihdxyi raꞌ nuꞌh, ya zenee za ba xquelnayaan raꞌ nuꞌh.”
23433	MAT 8:19	ya riꞌchi gwabiiga tuhbi mwehsu nin ruluuꞌyi xlehyi Moisehs loh Jesuhs ya rahbi ba: ―Mwehsu, xclaaꞌdzihn dxieꞌlda naꞌhlaꞌhn Yuꞌbi luꞌh nez hasta chiꞌh zi guzee luꞌh.
23434	MAT 8:20	Chiꞌchi rahbi Jesuhs: ―Bweeꞌzu nahpa raꞌ ma guiiꞌdxiu hasta riuuꞌ raꞌ ma, ya maaniꞌhn raꞌ nuu xpichiehza raꞌ ma, per naꞌh ziga naan Lliiꞌn Dxiohs nin naa ndxiꞌhw, nin hasta gucuꞌgaꞌhn ayi naꞌpahn.
23435	MAT 8:21	Ya chiꞌchi rahbi tuhbi nin naa xpwiinn Ñiꞌh loh Ñiꞌh: ―Daada, mas chaꞌyi basaaꞌn naꞌh guziaaꞌhahn tin chegacaꞌtsixgaaꞌn xtaaꞌdahn.
23436	MAT 8:22	Ya chiꞌchi rahbi Jesuhs: ―Gudaꞌnaꞌhla si naꞌh, ya basaaꞌn gucaꞌtsi raꞌ bwiinn guuchi laꞌh raꞌ lasaaꞌ bwiinn guuchi raꞌ ba.
23439	MAT 8:25	ya chiꞌchi gwagacwaꞌn raꞌ xpwiinn Ñiꞌh laꞌh Ñiꞌh tin rahbi raꞌ ba loh Ñiꞌh: ―¡Daada, bataꞌh xquelnabahan raꞌ nuꞌh laasii laꞌh nuꞌh cazaꞌbi ñihsa!
23440	MAT 8:26	Ya chiꞌchi rahbi Jesuhs loh raꞌ ba: ―¿Xixnaa rdxyihbi duxa tu? ¡Lliꞌballa gulliaaꞌha naa ziga riachiistoꞌ tu xchiꞌdxyi Dxiohs! Guyaꞌloh si guñiꞌ Ñiꞌh dxyiꞌdxyi raꞌ riiꞌ, chiꞌchi gwasuꞌnchii Ñiꞌh tin gunabwaꞌ Ñiꞌh laꞌh bwih cun ñihsadoꞌ chi tin guridxyii raꞌn, ya dxyii si babwih raꞌn,
23441	MAT 8:27	ya garaa raꞌ xpwiinn raꞌ Ñiꞌh badxyigaaꞌ duxa loh raꞌ ba, chiꞌchi tuhbigah raꞌ ba gunaabadxyiꞌdxyi loh lasaaꞌ raꞌ ba rahbi raꞌ ba: ―¿Chyuulla naa bwiinn rii? ¡Bwaꞌha hasta bwih cun ñihsadoꞌ ruzoꞌbadxiahga raꞌ xchiꞌdxyi ba!
23443	MAT 8:29	ya lwehgu guzoꞌbaloh rbwihdxyidxiah raꞌ ba rahbi raꞌ ba: ―¿Cuun nin rclaaꞌdzi luꞌh guunnee luꞌh laꞌh nu, Jesuhs Lliiꞌn Dxiohs nin nuu nabahan dziꞌtsi dxibaaꞌ? ¿Ta zeꞌ luꞌh riiꞌ tin gusaꞌcazii luꞌh laꞌh nu galoh nin riaꞌdxi ru guigaꞌha chieempa?
23445	MAT 8:31	ya gudxiꞌhn raꞌ bwiinndxaaba raꞌ nin nuu stoꞌ raꞌ bwiinn chi loh Jesuhs rahbi raꞌ ba: ―Sidela yiꞌh gabweꞌhe luꞌh laꞌh nu stoꞌ bwiinn raꞌ riiꞌ, basaaꞌn chuꞌtii nu stoꞌ raꞌ cuuchi riꞌchi.
23446	MAT 8:32	Chiꞌchi rahbi Jesuhs loh raꞌ bwiinndxaaba raꞌ chi: ―¡Gulcheh! Ya chiꞌchi bariaꞌh raꞌ bwiinndxaaba raꞌ chi stoꞌ raꞌ ndxiꞌhw raꞌ chi ya chiꞌchi guyuuꞌtii raꞌ ba stoꞌ raꞌ cuuchi, ya hohra gahca chi, garaatiiꞌ raꞌ cuuchi raꞌ chi gwatsiꞌbichii raꞌ ma rwaaꞌ tuhbi gueeꞌla, ya riꞌchi gwaaꞌñihsa raꞌ ma,
23450	MAT 9:2	ya riꞌchi gwanee raꞌ bwiinn tuhbi bwiinn nin ayi guhca ñiñiꞌbi, naꞌ ba loh tuhbi luꞌhn, ya chin bwaꞌha Jesuhs ziga riachiistoꞌ raꞌ bwiinn chi laꞌh Ñiꞌh, chiꞌchi rahbi Ñiꞌh loh bwiinn nin rahcalluꞌhu chi: ―Biahxi xiiꞌhihn; laꞌh xtuhlda luꞌh basiaꞌpitiin.
23451	MAT 9:3	Ya chiꞌchi laꞌh paaldaa raꞌ mwehsu nin ruluuꞌyi lehyi Moisehs nin rii riꞌchi bwiꞌhnn raꞌ ba lligaaba: ―¡Dxyiꞌdxyi raꞌ nin guñiꞌ deeꞌ naan dxyiꞌdxyi raꞌ nin rñiꞌyah laꞌh Dxiohs!
23452	MAT 9:4	Per laꞌh Jesuhs laꞌh Ñiꞌh guhcabwaꞌ cuun lligaaba nin riiyuhnn raꞌ ba niꞌchin gunaabadxyiꞌdxyi Ñiꞌh loh raꞌ ba rahbi Ñiꞌh: ―¿Xixnaa nuu tu lligaaba dxaaba raꞌ?
23453	MAT 9:5	¿Cuun nin mahzi ayi guinagahn guiñiꞌn? ¿Ta gaꞌpihn: “Laꞌh xtuhlda luꞌh basiaꞌpitiin”, o gaꞌpihn: “Gwastii tin guzah”?
23454	MAT 9:6	Pwihsi riiꞌ guluꞌyiꞌhn nez loh tu tin gwaꞌha tu naꞌh naan Lliiꞌn Dxiohs nin naa ndxiꞌhw nee naꞌpahn guelrnabwaꞌ para gusiaꞌpitiin xtuhlda raꞌ bwiinn guidxyiyuh. Ya chiꞌchi rahbi Ñiꞌh loh bwiinn nin ayi guhca ñiñiꞌbi chi: ―Gwastii, tin gucaꞌha xluꞌhn luꞌh batiaaꞌhan tin bwaa yihdzi luꞌh.
23457	MAT 9:9	Ya chin guyaꞌloh niꞌchi, chiꞌchi bariaꞌh Jesuhs riꞌchi, ya delaanta ru bwaꞌha Ñiꞌh laꞌh tuhbi bwiinn nin laa Mateu, zohba ba tuhbi lahta hasta rusadxihlli ba xcweenta impweestu para Roma, ya chiꞌchi rahbi Jesuhs loh ba: ―Gudaꞌnaꞌhla naꞌh. Chiꞌchi gwasuꞌnchii Mateu tin zeenaꞌhla ba laꞌh Jesuhs,
23459	MAT 9:11	ya chin bwaꞌha raꞌ bwiinn guidoꞌ nin laa fariseu raꞌ zohbanee Jesuhs laꞌh raꞌ bwiinn duhlda raꞌ chi loh mweella, chiꞌchi gunaabadxyiꞌdxyi raꞌ ba loh raꞌ xpwiinn Ñiꞌh rahbi raꞌ ba: ―¿Xixnaa rahwnee xmwehsu tu laꞌh raꞌ nin rusadxihlli xcweenta impwestu cun bwiinn duhlda raꞌ?
23460	MAT 9:12	Ya chin bihn Jesuhs riiñiꞌ raꞌ ba ziꞌchi chiꞌchi rahbi Ñiꞌh: ―Bwiinn raꞌ nin ayi xi rahca ayi rchiꞌhn chee raꞌ ba loh dutohra, niꞌchin mas chaꞌyi radxiꞌhyi dutohra hasta rahcalluꞌhu raꞌ bwiinn,
23461	MAT 9:13	niꞌchin nnah guldxiaa tin gulgasiꞌdxi xcweenta nin zeꞌ loh Xchiꞌdxyi Dxiohs tin gacabwaꞌ tu nin rñiꞌin: “Naꞌh rclaaꞌdzihn galahsa stoꞌ tu lasaaꞌ tu, ayi rclaaꞌdzihn guniꞌhi tu guhn naꞌh.” Pwihsi naꞌh ayi zeꞌldatiidxi dxiꞌhn laꞌh raꞌ bwiinn nin nazaꞌca sino que zeꞌldahn tin cwiidxihn laꞌh raꞌ bwiinn nin nuu raꞌ xtuhlda ñiꞌh.
23462	MAT 9:14	Xpwiinn raꞌ Jwahn nin ruroꞌbañihsa gwabiiga raꞌ ba loh Jesuhs tin gunaabadxyiꞌdxyi raꞌ ba loh Ñiꞌh rahbi raꞌ ba: ―Laꞌh nu cun bwiinn fariseu raꞌ ziahan racwaaꞌhan nu; ¿xixnaa chiꞌh laꞌh raꞌ xpwiinn raꞌ luꞌh ayi rucwaaꞌhan raꞌ ba?
23463	MAT 9:15	Chiꞌchi rahbi Jesuhs: ―¿Ta zahca cwih nalaasa bwiinn raꞌ nin biduꞌhun zee raꞌ saaꞌ gaduhbi nin zuunee nuꞌbinbahyi laꞌh raꞌ bwiinn saaꞌ chi? Per ziuuꞌ dxyih chin guiriaꞌcaa nin bachinaa loh raꞌ ba chiꞌchisihn ayi ru cheezah saaꞌ ya zucwaaꞌhan raꞌ bwiinn saaꞌ raꞌ chi,
23466	MAT 9:18	Ya gaduhbi nin cañiꞌ Jesuhs dxyiꞌdxyi raꞌ riiꞌ, badzihn tuhbi ndxiꞌhw nin lasahca loh raꞌ bwiinn Israel, ya lwehgu bazuꞌnllihbi ba loh Jesuhs, chiꞌchi rahbi ba: ―Laꞌh lliiꞌndxaꞌpaꞌhn guyaꞌloh guhchi nnahpaꞌh, per sidela yiꞌh sah luꞌh ya gudziiꞌba naa luꞌh yihca bi, zibiaꞌgarii xquelnabahan bi.
23469	MAT 9:21	laasii bwiꞌhnn bi lligaaba: ―Sidela naꞌh guidxiꞌn loh xahba Jesuhs ziaacaꞌhn.
23470	MAT 9:22	Per laꞌh Jesuhs lwehgu gubiaꞌgarii Ñiꞌh bwaꞌha-bwaꞌha Ñiꞌh loh gunnaꞌh chi, chiꞌchi rahbi Ñiꞌh: ―Gulahchidxyii stoꞌ luꞌh xiiꞌhihn; pur nin gwachiistoꞌ luꞌh naꞌh niꞌchin nnah laꞌh luꞌh biaca. Ya sequihdu desde hohra chi gahca biaca gunnaꞌh chi,
23472	MAT 9:24	chiꞌchi rahbi Jesuhs: ―Gulgariaꞌh laꞌn ca, laasii dxaꞌpwiꞌhn riiꞌ ayi guhchi dxiꞌh bi, sino que naꞌllgahsi si bi. Ya bwiinn raꞌ chi chin bihn raꞌ ba guñiꞌ Jesuhs ziꞌchi, sola ballihdzinee raꞌ ba laꞌh Ñiꞌh,
23475	MAT 9:27	Ya loh nin bariaꞌh Jesuhs nez bacwaꞌhn Ñiꞌh laꞌh dxaꞌpwiꞌhn nin guhchi, gwanaꞌhla chiohpa bwiinn nin ayi riin loh ñiꞌh laꞌh Jesuhs zeebwihdxyidxiah raꞌ ba rahbi raꞌ ba: ―¡Balahsa stoꞌ luꞌh laꞌh nu, lliiꞌn guehtu Davihd!
23476	MAT 9:28	Ya chin guyuuꞌtii Jesuhs laꞌn tuhbi yuuꞌ, chiꞌchi gwabiiga raꞌ garoopa bwiinn raꞌ nin rahca loh ñiꞌh chi nez zuu Jesuhs, ya chiꞌchi gunaabadxyiꞌdxyi Ñiꞌh loh raꞌ bwiinn raꞌ chi rahbi Ñiꞌh: ―¿Ta ruhnn tu lligaaba zahca gusiaꞌcahn loh tu? Chiꞌchi rahbi raꞌ ba: ―Zuhnn luꞌh gahn daada.
23477	MAT 9:29	Ya chiꞌchi cun naa Ñiꞌh bidxiꞌ Ñiꞌh loh raꞌ ba, cun rahbi za Ñiꞌh: ―Nahpa zohba gahca ziga riachiistoꞌ tu zahca gusiaꞌcahn loh tu.
23478	MAT 9:30	Ya ziꞌchi zi gubiaꞌgarii bwaꞌha raꞌ bwiinn chi, ya guñiꞌ Jesuhs loh raꞌ ba rahbi Ñiꞌh: ―Nee ayi guuyi tu dxyiꞌdxyi tin ayi gariaꞌcaa dxyiꞌdxyi xcweenta ziga gubiaꞌgarii gwaꞌha bizloh tu.
23481	MAT 9:33	ya loh nin babweꞌhedxiaꞌhla Jesuhs bwiinndxaaba chi stoꞌ bwiinn goopa chi, lwehgu guzoꞌbaloh cañiꞌ ba, ya bwiinn raꞌ badxyigaaꞌ duxa loh raꞌ ba rahbi raꞌ ba: ―¡Nagahdxi chyu gwaꞌha loh guihdxyi Israel dziꞌn rooꞌ raꞌ ziga nin dxyudiaꞌha nuꞌh nnah!
23482	MAT 9:34	Per laꞌh raꞌ bwiinn fariseu raꞌ guñiꞌ raꞌ ba rahbi raꞌ ba: ―Yuꞌpi nin naa ballwaaꞌn loh raꞌ bwiinndxaaba badiꞌhi guelrnabwaꞌ laꞌh niꞌca, niꞌchin rahca rabweꞌhe ba bwiinndxaaba stoꞌ raꞌ bwiinn.
23485	MAT 9:37	ya chiꞌchi rahbi Ñiꞌh loh raꞌ xpwiinn Ñiꞌh: ―Guchii paꞌhcaan nuu ziahan duxa raꞌ bwiinn guidxyiyuh nin ayi nuꞌnbwaꞌ xchiꞌdxyiꞌhn, nee gulliaaꞌyiꞌhn naa raꞌ bwiinn nin guluuꞌyin laꞌh raꞌ ba, nee naa raꞌ ba ziga tuhbi liꞌhn ziahan per sola paaldaa dxiiꞌ mooza, ayi ziahan raꞌ ba;
23491	MAT 10:5	Ya chiꞌchi guluꞌnehza Jesuhs laꞌh gadziꞌh bichiohpa xpwiinn Ñiꞌh tin gwagaluuꞌyi raꞌ ba dxyiꞌdxyi cuubi zaꞌca xteenn xquelrnabwaꞌ Dxiohs ya rahbi Ñiꞌh loh raꞌ ba: ―Ayi chee tu loh guihdxyi raꞌ nin rii raꞌ bwiinn ziitu nin ayi naa raꞌ bwiinn Israel, nee ayi za chee tu loh guihdxyi raꞌ nin rnabwaꞌ Samaria.
23497	MAT 10:11	’Ya chin gadzihn tu tuhbi guihdxyi o tuhbi rraandxu, riꞌchi gulchiꞌhyi tuhbi bwiinn nin nazaꞌca naa xmohda ñiꞌh ya guldxiaꞌhan yihdzi ba hasta dxyihyi nin gariaꞌh tu riꞌchi,
23502	MAT 10:16	Rahbi za Ñiꞌh: ―¡Gulguiaꞌhaloh! Naꞌh guixeꞌhlaꞌhn laꞌh tu ziga zi lliꞌhyi raꞌ loh raꞌ bwiinn raꞌ nin naa raꞌ ziga zi bweew; pwihsi gulgahca nasiin ziga zi bweꞌlda per nee gulgahca za nadoꞌlaaꞌdzi ziga palohmwiꞌhn raꞌ,
23507	MAT 10:21	’Bwiinn raꞌ nin nuu raꞌ bwihtsi raꞌ ñiꞌh ziuꞌn raꞌ ba ntriehgu bwihtsi raꞌ ba tin gachi raꞌ bi, ya ziꞌchi za guunn raꞌ paah raꞌ cun lliiꞌn raꞌba ya lliiꞌn raꞌ ba ziahsa raꞌ bi tin ziuꞌn raꞌ bi ntriehgu laꞌh raꞌ xcuzahn raꞌ bi tin gachi raꞌ ba.
23508	MAT 10:22	’Ya garaatiiꞌ raꞌ bwiinn guidxyiyuh guidxyiꞌchinee laꞌh tu pur nin riachiistoꞌ tu xchiꞌdxyiꞌhn. Per bwiinn nin chezahnee dziꞌtsi xchiꞌdxyiꞌhn hasta laꞌn dxyih nin guibiaꞌgariin loh guidxyiyuh stuhbi, bwiinn chi gaca xpwiiꞌnnahn.
23510	MAT 10:24	’Nin tuhbi bwiinn nin rusiꞌdxi ayi lasahca ru ba loh xmwehsu ba, ya ziꞌchi gahca za tuhbi mooza ayi xi guilasahca ba loh daada nin naa xballwaaꞌn ba.
23511	MAT 10:25	Niꞌchin cun dxiaꞌhan bwiinn nin rusiꞌdxi, gaca ba ziga naa xmwehsu ba, ya mooza gaca ba ziga naa xballwaaꞌn ba, ya sidela guiñiꞌ raꞌ bwiinn laꞌh nin naa ballwaaꞌn xteenn tuhbi yuuꞌ Belzebuu, lliaaꞌ lla bwiinn raꞌ nin nuu rwaaꞌ yihdzi ba, ¿cuunlla nin guiñiꞌ raꞌ ba loh raꞌ bwiinn chi?
23512	MAT 10:26	Rahbi za Jesuhs: ―Pwihsi rñiꞌn loh tu ayi guidxyihbi tu laꞌh raꞌ ba laasii ayi nuu xi tiidxi ralaꞌn, nahpa zadxeelan; nee ziꞌchi za xilla nin chuulaꞌn nahpa zariaꞌcaaꞌhan.
23515	MAT 10:29	’Ya laꞌh tu naann la rdooꞌ chiohpa maaniꞌhn pur tuhbi gaꞌyu, per nin tuhbi raꞌ maaniꞌhn chi ayi riaaba loh yuh sidela laꞌh xtaada tu ayi gusaaꞌn Ñiꞌhn.
23518	MAT 10:32	Rahbi za Ñiꞌh: ―Ya cuun chiꞌh zi raꞌ bwiinn nin guzeꞌta xcweeꞌntahn loh raꞌ bwiinn, ziꞌchi za naꞌh ziñiꞌn xcweenta bwiinn chi loh Xtaaꞌdahn nin nuu dxibaaꞌ,
23520	MAT 10:34	Rahbi za Ñiꞌh: ―Ayi guunn tu lligaaba guelrbahchidxyiistoꞌ zeꞌldaneꞌhn loh guidxyiyuh riiꞌ, sino que pur naꞌh zilaaꞌha lasaaꞌ raꞌ ba.
23523	MAT 10:37	’Bwiinn nin rucaꞌh ru stoꞌ ñiꞌh laꞌh xtaada ñiꞌh cun xmaah ñiꞌh, mahziru que ziga naꞌh, bwiinn raꞌ chi ayi galluꞌyi gaca xpwiiꞌnahn; ziꞌchi gahca za bwiinn nin nadziiꞌhi ru lliiꞌngaꞌn raꞌ ñiꞌh o lliiꞌndxaꞌpa raꞌ ñiꞌh que ziga naꞌh bwiinn raꞌ ziꞌchi ayi galluꞌyi gaca raꞌ xpwiiꞌnnahn,
23526	MAT 10:40	Rahbi za Ñiꞌh: ―Bwiinn raꞌ nin guniꞌhi rwaaꞌ yihdzi ñiꞌh dxiaꞌhan tu cun gaduhbi stoꞌ raꞌ ba pwihsi zuniꞌhi za raꞌ ba rwaaꞌ yihdzi ba dxiaꞌhanahn cun gaduhbi stoꞌ raꞌ za ba; ziꞌchi gahca za sidela guunn raꞌ ba ziꞌchi naꞌh cun gaduhbi stoꞌ raꞌ ba zuhnn za raꞌ ba ziꞌchi cun laꞌh Xtaaꞌdahn nin nuu dxibaaꞌ nin guluꞌnehza naꞌh loh guidxyiyuh riiꞌ.
23532	MAT 11:4	ya chiꞌchi rahbi Jesuhs loh raꞌ ba: ―Guldxiaa tin gulgahbi loh Jwahn garaa raꞌ nin caywaꞌha tu cun nin cayihn tu;
23534	MAT 11:6	¡Dichohsa naa raꞌ bwiinn nin ayi gusaaꞌn xcweenta ziga riachiistoꞌ raꞌ ba naꞌh!
23535	MAT 11:7	Ya chin babii raꞌ xpwiinn Jwahn loh Jesuhs chiꞌchi guzoꞌbaloh guñiꞌ Ñiꞌh xcweenta Jwahn loh raꞌ bwiinn, rahbi Ñiꞌh: ―¿Chyu niꞌca gwaguiaꞌha tu loh dahan? ¿Ta tuhbi ñihta nin biehla gudzihbi bwih?
23536	MAT 11:8	Ya sidela ayi niꞌchi dxiꞌh, ¿xiilla gwaguiaꞌha si chiꞌh tu? ¿Ta gwaguiaꞌha tu tuhbi ndxiꞌhw nin nahcu lahdxi zaꞌca? Laꞌh tu naann tu sola yihdzi tuhbi bwiinn nin rnabwaꞌ duxa nuu bwiinn raꞌ nin nahcu lahdxi zaꞌca.
23537	MAT 11:9	Ya nnaha xchiꞌh, ¿xi pur biriaꞌh chiꞌh tu? ¿Ta tin gwaguiaꞌha tu tuhbi bwiinn nin rñiꞌ xchiꞌdxyi Dxiohs? Ziꞌchi pwihsi, tuhbi bwiinn nin naa bwiinn nin mahziru lasahca que ziga daada raꞌ nin guñiꞌ xchiꞌchi Dxiohs.
23539	MAT 11:11	’Guchiin nin rñiꞌn loh tu, garaa raꞌ ziga bwiinn raꞌ nin raalaa raꞌ loh guidxyiyuh riiꞌ pur gunnaꞌh, nagahdxi dxiinloh nin tuhbi bwiinn nin nagahdxi gaca lasahcatiiꞌ ziga Jwahn nin ruroꞌbañihsa, per nin naa biꞌtuꞌhntiiꞌ loh xquelrnabwaꞌ Dxiohs niꞌchi mahzi lasahca loh Jwahn.
23540	MAT 11:12	’Dez laꞌn dxyih raꞌ nin guzoꞌbaloh ruluuꞌyi Jwahn, cun para hasta nnahyi nuu ziahan duxa raꞌ bwiinn nin xclaaꞌdzi chuu raꞌ loh xquelrnabwaꞌ Dxiohs lajweersi, ya snuhn raꞌ ba lajweersi xclaaꞌdzi raꞌ ba cweꞌhelluꞌhu raꞌ ba loh guelrnabwaꞌ xteenn Dxiohs.
23544	MAT 11:16	¿Cuun nin xñah ziga xñah raꞌ bwiinn nin rii nabahan laꞌn dxyih raꞌ riiꞌ? Rluuꞌyi raꞌ ba ziga zi xñah raꞌ nuhn biñiꞌn nin riidzihta loh dxiaaꞌ hasta rdooꞌ xica, ya cañiꞌ raꞌ bi loh raꞌ lasaaꞌ raꞌ bi jweersi roo:
23545	MAT 11:17	“Bachidxiꞌlda nu bichiiwuu tin ñudxiaꞌha tu per ayi badxiaꞌha tu; bachidxiꞌlda nalaasa za nu tin ñuꞌn tu, per ayi za biꞌn tu.”
23549	MAT 11:21	―¡Prohbi za laꞌh tu bwiinn guihdxyi Corazihn, cun neezaa laꞌh za tu bwiinn guihdxyi Betsaida prohbi za laꞌh tu!, laasii sidela laꞌh raꞌ bwiinn guihdxyi Tiru cun bwiinn guihdxyi Sidohn ñwaꞌha raꞌ ba dziꞌn rooꞌ raꞌ nin bwiꞌhnnaꞌhn nez loh tu, nahpa ñazah raꞌ ba xneziuh Dxiohs nee ñahcu raꞌ za ba lahdxi lluhn cun ñuroꞌba raꞌ ba cobadeh yihca raꞌ ba.
23551	MAT 11:23	Ya laꞌh tu bwiinn guihdxyi Capernaum, ¿ta ruhnn chiꞌh tu lligaaba par dxibaaꞌ gacah tu? ¡Sidela nnah mas laꞌn gueeta gabihldxyi dxiehta tu!, laasii sidela loh guihdxyi Sodoma ñuꞌnnahn dziꞌn rooꞌ raꞌ nin bwiꞌhnnaꞌhn loh tu, guihdxyi chi nahpa ñazah zaꞌca hasta laꞌn dxyih raꞌ riiꞌ.
23553	MAT 11:25	Ya laꞌn dxyih raꞌ chi rahbi Jesuhs: ―Zuxchiilli luꞌh Xtaaꞌdahn nin rnabwaꞌ dxibaaꞌ cun loh guidxyiyuh, laasii cagaluuꞌyi luꞌh laꞌh raꞌ bwiinn nadoꞌlaadzi nin naa ziga bweezu raꞌ cohsa raꞌ nin guluuꞌlaꞌn luꞌh loh raꞌ bwiinn naann raꞌ, cun loh nin rahcabwaꞌ, ya baluuꞌyi luꞌhn nez loh raꞌ bwiinn raꞌ nin ayi xi dxiuu.
23555	MAT 11:27	’Laasii laꞌh Xtaaꞌdahn biuꞌn ntriehgu garaatiiꞌ loon, ya ayi chyu nuꞌnbwaꞌ laꞌh Lliiꞌn Ñiꞌh; sola laꞌh Daada Dxiohs nuꞌnbwaꞌ Ñiꞌh laꞌh Lliiꞌn Ñiꞌh. Ya ayi za chyu nuꞌnbwaꞌ laꞌh Daada Dxiohs, sola Lliiꞌn Ñiꞌh nuꞌnbwaꞌ laꞌh Ñiꞌh, cun neezaa bwiinn raꞌ nin gudihdxyi Lliiꞌn Ñiꞌh dxiuꞌnbwaꞌ laꞌh Xtaada Ñiꞌh.
23560	MAT 12:2	ya chin bwaꞌha raꞌ nuhn bwiinn guidoꞌ nin laa fariseu niꞌchi chiꞌchi rahbi raꞌ ba loh Jesuhs: ―Bwaꞌha cayuhnn raꞌ xpwiinn luꞌh ziga nin ayi rusaaꞌn lehyi gaca dxyih nin ruziꞌlaaꞌdzi raꞌ bwiinn Israel.
23561	MAT 12:3	Ya chiꞌchi rahbi Jesuhs loh raꞌ ba: ―¿Ta nagahdxi guꞌlda tu loh Xchihtsi Dxiohs hasta rñiꞌ cuun nin bwiꞌhnn guehtu Davihd tuhbi dxyih nin bichiaꞌhn ba cun garaa raꞌ xpwiinn ba?
23563	MAT 12:5	O ¿nagahdxi guꞌlda tu loh xchihtsi lehyi Moisehs xa ruhnn raꞌ bixohza laꞌn guidoꞌ dxyih nin ruziꞌlaaꞌdzi raꞌ bwiinn Israel, ruhnn raꞌ ba xtsiꞌn raꞌ ba, per ayi xi xtuhlda raꞌ ba?
23565	MAT 12:7	Pwihsi laꞌh tu ayi guhcabwaꞌ tu xi zee loh Xchiꞌdxyi Dxiohs riiꞌ: “Pwihsi nin xclaaꞌdzihn guunn tu galahsastoꞌ tu laꞌh raꞌ bwiinn lasaaꞌ tu xlawaaꞌha guniꞌhi tu guhn naꞌh.” Sidela ñahcabwaꞌ tun ayi ñudziiꞌba tu duhlda yihca bwiinn nin ayi xi xtuhlda ñiꞌh,
23568	MAT 12:10	ya laꞌn guidoꞌ chi zohba tuhbi ndxiꞌhw nin gubihdzi naa ñiꞌh, ya laasii riidxiꞌhyi bwiinn Israel raꞌ chi xa gucaꞌchiah dxixiꞌhw raꞌ ba laꞌh Ñiꞌh, niꞌchin nin rahbi raꞌ ba loh Ñiꞌh: ―¿Ta rusaaꞌn lehyi gusiaca luꞌh tuhbi bwiinn dxyih nin ruziꞌlaaꞌdzi raꞌ bwiinn Israel?
23569	MAT 12:11	Chiꞌchi rahbi Jesuhs loh raꞌ ba: ―Chyu tuhbi ndxiꞌhw nin dxaꞌga loh tu nahpa tuhbi lliꞌhyi ya sidela laꞌh ma dxiaaba ma laꞌn tuhbi bizee dxyih nin ruziꞌlaaꞌdzi tu, ¿tayi chiꞌh gabweꞌhe tu ma laꞌn bizee dxyih chi gahca nicala naa dxyih nin ruziꞌlaaꞌdzi tu?
23571	MAT 12:13	Ya chiꞌchi rahbi Ñiꞌh loh ndxiꞌhw nin gubihdzi naa ñiꞌh chi: ―Batsiꞌyi naa luꞌh. Ya batsiꞌyi naa ba ya lwehgu gahca biacan,
23581	MAT 12:23	ya garaa raꞌ bwiinn nin rii riꞌchi guzoꞌbaloh canaabadxyiꞌdxyi loh lasaaꞌ gahca raꞌ ba rahbi raꞌ ba: ―¿Tayiga llahga dxiꞌh guehtu Davihd deeꞌ?
23582	MAT 12:24	Ya chin bihn raꞌ bwiinn fariseu dxyiꞌdxyi raꞌ riiꞌ, rahbi raꞌ ba: ―Ndxiꞌhw riiꞌ rabweꞌhe bwiinndxaaba stoꞌ raꞌ bwiinn laasii Belzebuu nin rnabwaꞌ laꞌh raꞌ bwiinndxaaba cayahcanee laꞌh ba.
23583	MAT 12:25	Ya chin guhcabwaꞌ Jesuhs xa naa lligaaba nin riiyuhnn raꞌ ba, chiꞌchi rahbi Ñiꞌh loh raꞌ ba: ―Garaa raꞌ bwiinn nin nuu loh tuhbi guelrnabwaꞌ nin rbahchi xchih tuhbi cwaꞌh bwiinn tin chindxinee lasaaꞌ raꞌ ba pwihsi nahpa ñichiloh guelrnabwaꞌ chi; ya tuhbi guihdxyi hasta rii raꞌ tuhbi jwamihyi bwiinn sidela rlaaꞌha lasaaꞌ raꞌ ba ziahan cwaꞌh tin chindxinee lasaaꞌ raꞌ ba nahpa ziñihchiloh raꞌ ba.
23584	MAT 12:26	Ya ziꞌchi gahca za sidela laꞌh bwiinndxaaba rabweꞌhe gahca ba laꞌh nin naa za bwiinndxaaba stoꞌ raꞌ bwiinn pwihsi zilaaꞌha lasaaꞌ raꞌ ba, ya pwihsi ¿xaalla cheezah chuu xquelrnabwaꞌ raꞌ ba?
23585	MAT 12:27	Ya laꞌh tu rahbi tu rabweꞌhehn bwiinndxaaba stoꞌ raꞌ bwiinn cun xquelrnabwaꞌ bwiinndxaaba, per sidela ziꞌchi ñahca, ¿cuun xchiꞌh nin rudiꞌhi guelrnabwaꞌ laꞌh raꞌ xpwiinn tu tin rabweꞌhe raꞌ ba bwiinndxaaba? Niꞌchin laꞌh gahca raꞌ ba zuluuꞌyi raꞌ ba billiꞌn loh xigaaba tu.
23587	MAT 12:29	’¿Xa guunn tuhbi bwiinn nin ruhnn gubaꞌn chuꞌtii yihdzi tuhbi ndxiꞌhw nin nahpa tuhbi bwiinn nin rulaloh yihdzi ba tin para ayi cweꞌhelluꞌhu ba nin nahpa ndxiꞌhw chi? Sola nin guunn gubaꞌn chi galoh guchiꞌbiduꞌh ba laꞌh bwiinn chi, ziꞌchi sihn zuhnn ba gahn cweꞌhelluꞌhu ba nin nahpa bwiinn chi.
23588	MAT 12:30	’Bwiinn raꞌ nin ayi xclaaꞌdzi naꞌh rdxyiꞌchinee ba naꞌh, ya bwiinn raꞌ nin ayi rahcanee naꞌh guidiaaꞌha raꞌ bwiinn laꞌlaꞌgaꞌh cabweꞌhecaa raꞌ ba bwiinn loon.
23589	MAT 12:31	’Pwihsi niꞌchin nin rñiꞌn loh tu gusiaꞌpitii Dxiohs xtuhlda raꞌ bwiinn cun garaa dxyiꞌdxyi dxaaba nin guiñiꞌ raꞌ ba loh Ñiꞌh, per sidela laꞌhraꞌ ba guiñiꞌyah raꞌ ba laꞌh Spíritu Saantu Dxiohs, ayi gusiaꞌpitii Ñiꞌh xtuhlda raꞌ ba.
23591	MAT 12:33	Rahbi za Ñiꞌh: ―Gulgahpaabiñih zaꞌca tuhbi yahga ñinahxi, ya ziꞌchi zicah ñinahxi zaꞌca lohon; per sidela laꞌh tu ayi gaapaabiñih zaꞌca tu tuhbi yahga ñinahxi, pwihsi ziꞌchi za ñinahxi dxaaba guicah lohon. Ya ziꞌchi riuꞌnbwaꞌ bwiinn yahga pur nin rcah lohon.
23592	MAT 12:34	¡Laꞌh tu bwiinn nin naa raꞌ ziga zi bweꞌlda ñaꞌlaaꞌdzi! ¿Xa xclaaꞌdzi tu guiñiꞌ tu dxyiꞌdxyi zaꞌca sidela laꞌh gahca tu nadxaaba naa tu? Ya stoꞌ tu rdahla dxyiꞌdxyi dxaaba nin rñiꞌ rwaaꞌ tu.
23596	MAT 12:38	Ya chiꞌchi rahbi nuhn bwiinn fariseu raꞌ nee cun nuhn raꞌ mwehsu nin ruluuꞌyi xlehyi Moisehs loh Jesuhs: ―Mwehsu, xclaaꞌdzi nu guidiaꞌha nu guunn luꞌh tuhbi dziꞌn rooꞌ ziga tuhbi sehn.
23597	MAT 12:39	Chiꞌchi rahbi Jesuhs loh raꞌ ba: ―Laꞌh tu ayi nnaa tu guunn tu nin xclaaꞌdzi Dxiohs sino que sola nin xclaaꞌdzi tu, yannah rnaaba tu guꞌnnahn tuhbi dziꞌn rooꞌ tin gwaꞌha tun, per sola sehn xteenn guehtu Jonahs daada nin guñiꞌ xchiꞌdxyi Dxiohs ca chieempa rooꞌ guniꞌhihn laꞌh tu.
23601	MAT 12:43	Rahbi za Ñiꞌh: ―Ya chin rariaꞌh tuhbi bwiinndxaaba stoꞌ tuhbi bwiinn, chiꞌchi rcaꞌnzaa ba loh dahan desierto tin rdxiꞌhyi ba canehza guziꞌlaaꞌdzi ba, per ayi rdxeelan,
23602	MAT 12:44	ya chiꞌchi ruhnn ba lligaaba: “Mas chaꞌyi gabiaꞌgariin rwaaꞌ yihdzihn hasta biriaꞌhn.” Ya chin radzihn ba riꞌchi, bwaꞌha ba stoꞌ bwiinn nin bariaꞌh ba galoh chuhla biahcan ziga zi tuhbi yuuꞌ nin biyoꞌba laꞌn ñiꞌh.
23605	MAT 12:47	ya guyuuꞌ tuhbi bwiinn nin gwaguihtsi loh Jesuhs rahbi ba loh Ñiꞌh: ―Xmaah luꞌh cun bwihtsi raꞌ luꞌh rii raꞌ dihtsi jwehra riꞌchi, ya xclaaꞌdzi raꞌ ba guiñiꞌ raꞌ ba loh luꞌh.
23606	MAT 12:48	Ya sola squiiꞌ rahbi Jesuhs loh bwiinn nin gwagañiꞌ loh Ñiꞌh: ―¿Cuun nin naa xmaaꞌhn, nee cuun raꞌ za nin naa raꞌ bwihtsi raꞌn?
23607	MAT 12:49	Chin guyaꞌloh guñiꞌ Ñiꞌh squiiꞌ, chiꞌchi baluuꞌyi Ñiꞌh cun naa Ñiꞌh nez hasta rii raꞌ bwiinn nin naa raꞌ xpwiinn Ñiꞌh, ya chiꞌchi rahbi laꞌgaꞌh Ñiꞌh: ―Bwiinn raꞌ riiꞌ naa xmaaꞌn cun bwihtsi raꞌn,
23611	MAT 13:3	bwiiꞌyidxyiꞌdxyinee Ñiꞌh ziahan cweenta si laꞌh raꞌ ba, rahbi Ñiꞌh: ―Gulgacaꞌdxiahga; biriaꞌh tuhbi bwiinn zeetachi ba biñih loh dahan,
23618	MAT 13:10	Ya chiꞌchi gwabiiga raꞌ xpwiinn Jesuhs loh Ñiꞌh tin rahbi raꞌ ba: ―¿Xixnaa ruuꞌyidxyiꞌdxyi luꞌh puura cwenta si loh raꞌ bwiinn?
23619	MAT 13:11	Ya chiꞌchi rahbi Jesuhs loh raꞌ xpwiinn Ñiꞌh: ―Laꞌh tu sihn zuluuꞌyi Dxiohs xcweenta cosa ralaꞌn raꞌ xteenn xquelrnabwaꞌ Ñiꞌh tin gacabwaꞌ tun, per laꞌh raꞌ bwiinn puura cweenta si guluꞌyiꞌhn.
23624	MAT 13:16	’Per laꞌh tu, dichohsa tu laasii rwaꞌha zaꞌca bizloh tu nee rihnn zaꞌca za dxiahga tu,
23626	MAT 13:18	Rahbi za Ñiꞌh: ―Pwihsi gulgacaꞌdxiahga xa naa xcweenta bwiinn nin gulahchi biñih, nee xa naa raꞌ za stoꞌ cada tuhbigah bwiinn ziga cada tuhbigah lahta hasta biaaba llooba chi.
23632	MAT 13:24	Ya bwiiꞌyidxyiꞌdxyi Jesuhs stuhbi cweenta loh raꞌ bwiinn chi rahbi Ñiꞌh: ―Guelrnabwaꞌ xteenn Dxiohs naa ziga tuhbi ndxiꞌhw nin bwiꞌhnn biñih trihgu zaꞌca loh xtahan ñiꞌh,
23635	MAT 13:27	ya chiꞌchi gwaguihtsi raꞌ mooza loh ballwaaꞌn nin naa xteenn ñiꞌh trihgu chi rahbi ba: “Daada, trihgu nin bwiꞌhnn biñih luꞌh loh dahan agaa ganaalladxiꞌhn, nee nnah ¿calla nehza chiꞌh guzaa dxihlldahan nin nuu lohon?”
23636	MAT 13:28	Chiꞌchi rahbi daada nin naa xteenn ñiꞌh trihgu chi loh mooza: “Pwehda tuhbi bwiinn nin rdxyiꞌchinee naꞌh bwiꞌhnn niꞌca.” Ya chiꞌchi gunaabadxyiꞌdxyi raꞌ mooza loh daada chi rahbi raꞌ ba: “¿Ta xclaaꞌdzi luꞌh chogataꞌdxu nu dxihlldahan raꞌ chi loh trihgu?”
23637	MAT 13:29	Per ballwaaꞌn chi squiiꞌ rahbi ba: “Ayi chegaxu tun laasii nagah nezii trihgu chegaxu tu.
23638	MAT 13:30	Mas chaꞌyi gusaaꞌn tu chiooꞌhon hasta chin chapitii liꞌhn; ya chiꞌchi cuꞌneezahn mooza raꞌ nin cheteꞌhecaa galoh dxihlldahan chi ya guunn raꞌ ban pur manuhlla tin guicaꞌdxih raꞌn, ya chiꞌchiyi gaguꞌchaꞌyi raꞌ xmoꞌzahn trihgu laꞌn yuuꞌ.”
23639	MAT 13:31	Neezaa bwiiꞌyidxyiꞌdxyi Jesuhs cweenta riiꞌ loh raꞌ bwiinn rahbi Ñiꞌh: ―Guelrnabwaꞌ xteenn Dxiohs naa ziga zi tuhbi bwiiꞌdzi biꞌtuꞌhn xteenn mortahsa nin bwiꞌhnn biñih tuhbi bwiinn loh xtahan ba.
23641	MAT 13:33	Neezaa bwiiꞌyidxyiꞌdxyi Jesuhs stuhbi cweenta ya rahbi Ñiꞌh: ―Guelrnabwaꞌ xteenn Dxiohs naa ziga levaduhra nin guguꞌchinaa tuhbi gunnaꞌh loh chohnna madxihdu harihn, ya levaduhra chi nahpa rusadxihin laꞌh cohba harihn chi.
23645	MAT 13:37	Chiꞌchi rahbi Jesuhs: ―Bwiinn nin ruhnn biñih bwiiꞌdzi biñih zaꞌca bwiinn chi naa Lliiꞌn Dxiohs nin naa ndxiꞌhw,
23652	MAT 13:44	Rahbi za Ñiꞌh: ―Guelrnabwaꞌ xteenn Dxiohs naa ziga tuhbi cohsa zaꞌca duxa nin nuulaꞌn taayi loh yuh, ya tuhbi ndxiꞌhw rdxeela cohsa zaꞌca duxa chi, ya loh rdxeela ban rusieꞌwgahca ba yihcan ya riahxi duxa ba rbiaꞌgarii ba tin riagatooꞌ ba garaa nin nahpa ba tin rziꞌ ba loh yuh hasta bidxeela ba cohsa zaꞌca chi.
23653	MAT 13:45	Rahbi za Ñiꞌh: ―Guelrnabwaꞌ xteenn Dxiohs naa za zigazi tuhbi bwiinn nin ruhnn guriꞌxi nin rcaꞌnzaa rcaꞌndxiꞌhyi perla nin lasahca mweeyi rooꞌ,
23655	MAT 13:47	Rahbi za Ñiꞌh: ―Guelrnabwaꞌ xteenn Dxiohs naa za ziga zi tuhbi dxihxi bwehlda, ya rnaꞌzu garaaloh bwehlda laꞌnan,
23659	MAT 13:51	Chiꞌchi rahbi Jesuhs loh raꞌ ba: ―¿Gu rahcabwaꞌ tu garaa raꞌ dxyiꞌdxyi raꞌ rii? Chiꞌchi rahbi raꞌ ba: ―Uhn, Rahcabwaꞌ nun Daada.
23660	MAT 13:52	Ya chiꞌchi rahbi laꞌgaꞌh Jesuhs loh raꞌ ba: ―Chin rusiꞌdxi tuhbi bwiinn nin naann lehyi xcweenta guelrnabwaꞌ Dxiohs nin nuu dxibaaꞌ, naa ba ziga zi tuhbi ballwaaꞌn xteenn tuhbi yuuꞌ nin nahpa ziahan nin nazaꞌca raꞌ, ya rahca rbwii ba nin nacuubi cun nin guyuꞌxa loh raꞌn.
23662	MAT 13:54	chiꞌchi gwah Ñiꞌh loh guihdxyi Nazaret nez hasta bieꞌrooꞌ Ñiꞌh, tin guzoꞌbaloh baluuꞌyi Ñiꞌh xchiꞌdxyi Dxiohs laꞌn xquidoꞌ biꞌtuꞌhn raꞌ bwiinn raꞌ chi, ya bwiinn raꞌ badxyigaaꞌ duxa loh raꞌ ba laꞌh Ñiꞌh, chiꞌchi rahbi raꞌ ba: ―¿Canehza basiꞌdxi deeꞌ garaa raꞌ nin ruluuꞌyi ba? ¿Xi pur rahca ruhnn ba dziꞌn rooꞌ raꞌ?
23663	MAT 13:55	¿Tayi dee dxiꞌh nin naa lliiꞌn carpinteru nee tayi María dxiꞌh laa xmaah ba, nee tayi laꞌh dxiꞌh za ba nin naa bwihtsi Jacobo, Joseh, Simohn, cun Judas?
23664	MAT 13:56	Nee ¿tayi rii dxiꞌh nuu raꞌ bizaaꞌn niꞌca tuhsi junta cun laꞌh raꞌ nuꞌh? ¿Calla nehza basiꞌdxi chiꞌh niꞌca garaa raꞌ nin cagaluuꞌyi ba?
23665	MAT 13:57	Ya pur nin cayuhnn raꞌ ba lligaaba chi, niꞌchin ayi gwachiistoꞌ raꞌ ba xchiꞌdxyi Jesuhs, per chiꞌchi rahbi Ñiꞌh loh raꞌ bwiinn raꞌ chi: ―Garaa lahta ruzoꞌbadxiahga raꞌ bwiinn xchiꞌdxyi tuhbi profeta, per lahdxyi ba cun yihdzi ba ayi ruzoꞌbadxiahga raꞌ bwiinn xchiꞌdxyi ba.
23668	MAT 14:2	niꞌchin rahbi Herodes loh raꞌ xpwiinn ba nin rii hasta rnabwaꞌ ba: ―Dee naa Jwahn nin ruroꞌbañihsa, pwehda babahn ba loh raꞌ bwiinn guuchi, niꞌchin nin nahpa ba guelrnabwaꞌ tin ruhnn ba dziꞌn roo raꞌ ca.
23670	MAT 14:4	laasii rahbi Jwahn loh Herodes: ―Ayi naa bwen cweꞌhelluꞌhu luꞌh xcunnaꞌh bwihtsi luꞌh.
23674	MAT 14:8	Ya ziga laꞌh dxaꞌpa chi galoh guñiꞌnee xmaah bi laꞌh bi, niꞌchin rahbi bi loh Herodes: ―Xclaaꞌdzihn guniꞌhi luꞌh naꞌh yihca Jwahn nin ruroꞌbañihsa loh tuhbi plahtu.
23681	MAT 14:15	Ya chin gurih gueꞌla, chiꞌchi gwabiiga raꞌ xpwiinn Ñiꞌh cweeꞌ Ñiꞌh ya rahbi raꞌ ba loh Ñiꞌh: ―Bwaꞌha laꞌh gudxyih guhca, nee hasta dxuu nuꞌh riiꞌ ayi chyu bwiinn nuutiiꞌ. Mas chaꞌyi guñiꞌ loh raꞌ bwiinn ca guziaa raꞌ ba nez rraandxu raꞌ, tin nez chi siꞌ raꞌ ba nin gahw raꞌ ba.
23682	MAT 14:16	Chiꞌchi rahbi Jesuhs: ―Ayi xchiꞌhn guziaa raꞌ ba; ¡laꞌh tu gulgadiꞌhi nin gahw raꞌ ba!
23683	MAT 14:17	Chiꞌchi rahbi raꞌ xpwiinn Ñiꞌh: ―Ayi chyu nahpa ziahan guelwahw gayaꞌn nu laꞌh raꞌ ba ñaꞌchiꞌca gaꞌyu pahn cun chiohpa bwehlda nuuꞌ.
23684	MAT 14:18	Chiꞌchi rahbi Jesuhs: ―Gultaꞌnee pahn chi cun bwehlda chi riiꞌ.
23692	MAT 14:26	ya chin bwaꞌha raꞌ xpwiinn Ñiꞌh laꞌh Ñiꞌh zezah loh ñihsa, bidxyihbi duxa raꞌ ba, ya hasta gudihdxyidxiah raꞌ ba pur nin bidxyihbi duxa raꞌ ba ya rahbi raꞌ ba: ―¡Pweda tuhbi pantasma niꞌca!
23693	MAT 14:27	Ya chiꞌchi rahbi Jesuhs loh raꞌ ba: ―¡Gulgadiꞌhi balori stoꞌ tu; naꞌh gahcan, ayi guidxyihbi tu!
23694	MAT 14:28	Ya chiꞌchi rahbi Pehdru loh Ñiꞌh: ―Daada, sidela yiꞌhin, gunabwaꞌ dxieꞌldahn hasta zuu Yuꞌbiluꞌh nee saꞌhn loh ñihsa.
23695	MAT 14:29	―¡Gudaaꞌ! ―Rahbi Jesuhs. Ya chiꞌchi biehta Pehdru laꞌn laancha, tin guzoꞌbaloh zeezah ba loh ñihsa chi para hasta zuu Jesuhs,
23696	MAT 14:30	per chin bwaꞌha Pehdru balaaca bwih duxa nin zuu loh ñihsa chi, bidxyihbi duxa ba, chiꞌchi guzoꞌbaloh zeezaꞌbi ba loh ñihsa, ya gudihdxyidxiah ba rahbi ba: ―¡Baldaꞌh naꞌh Daada!