13947	PSA 1:4	san benne' wen da' ẕinnj ka' kege ki zej nake'. Zej nake' ka to laga' biž dan' žoa be'.
13951	PSA 2:2	Ẕži'igak benne' wnná bia' ka' chie' Ḻe', na' benne' yolawe' ka' žóngake' toze diža' nich wží'igake' che Dios, X̱ángake', na' che Bennen' wžé Dios chekze'.
13953	PSA 2:4	Gan že' X̱anžon' ya'abá chie' žẕiže'. Žon ditjle' da' žek ḻáže'gake' góngake',
13954	PSA 2:5	na' ḻo yeḻa' ẕža'a chie' ẕdiḻe' ḻégake', na' ḻo yeḻa' yichj ža'a chie' ẕchebe' ḻégake'.
13956	PSA 2:7	Ẕnna Bennen': “Wzenla' ḻe'e da' gož X̱anžon' neda'. Gože' neda': Le' nako' Ẕi'na'. Na'a ža naka' x̱o'.
13960	PSA 2:11	Le gon da' ẕnna X̱anžo Dios, ḻo yeḻa' ẕžebe chele, na' ḻo yeḻa' žeẕize chele, le yebele ḻawe' Ḻe'.
13961	PSA 2:12	Le gape ba la'ne Ẕi'ne' nich bi že'e, na' bi kwia yi'le ḻo nez chele, dan' ḻa' žá'atie' Ḻe'. Ba nez ẕen naken chegak yógo'te benne' ka' žx̱en ḻáže'gake' Ḻe'.
13963	PSA 3:2	X̱ana' Dios, ba nyanḻe'e benne' ka' ẕžá'agake' neda'. Benne' zante ẕdíḻ-ḻengake' neda'.
13965	PSA 3:4	San Le', X̱ana' Dios, žape chi'o neda'. Nako' yeḻa' baní' chia', na' ẕzo' neda' chawe'.
13966	PSA 3:5	Wžéžyi'a, na' bḻiža' X̱ana' Dios, na' Ḻe' bechebe' chia' gan zoe' ḻaw ya'a la'y chie'.
13967	PSA 3:6	Gota'a, na' wtasa', na' bebana' dan' ben choch X̱ana' Dios neda'.
13968	PSA 3:7	Bi žeba' chi mil benne' ka' ẕdíḻ-ḻengake' neda', benne' ka' zej nyechjle' neda'.
13969	PSA 3:8	Wyás, X̱ana' Dios. Beslá neda', Dios chia', na' wdáp x̱ága'gak benne' ka' ẕdíḻ-ḻengake' neda', na' bdichj láye'gak benne' wen da' ẕinnj ka'.
13970	PSA 3:9	Yeḻa' weslá za' ḻo no'o, X̱ana' Dios. Ben chawe' benne' chio' ka'.
13972	PSA 4:2	Bechebe chia' kate' žḻiža' Le', Dios. Le' ẕchi'a ḻáže'kzo' da' žona'. Kate' wzóa' ḻo da' zede, Le' ben chocho' neda'. Beyache' ḻaže'l neda', na' benle da' ẕcháḻjḻena' Le'.
13974	PSA 4:4	Žaḻa' nnézlele ba wžé X̱anžo Dios bennen' žape' Ḻe' ba la'ne. X̱anžo Dios yenle' chia' kate' wḻiža' Ḻe'.
13975	PSA 4:5	Le žebe ḻaw Dios, na' bi gonle doḻa'. Le wláb ḻaže' chie' kate' dele gan ẕtasle, na' le soa žize.
13979	PSA 4:9	Ḻo yeḻa' ẕga'n chawe' gata'a, na' tasa', dan' ẕnno' Le', X̱ana' Dios, naka' chawe' ḻawo' Le'.
13982	PSA 5:3	Le' nako' X̱ana', na' nako' Dios chia'. Benle da' žḻiža' Le', dan' ẕcháḻjḻenteza' Le'.
13983	PSA 5:4	X̱ana' Dios, chbal-le yenlo' chi'a. Zildo' ḻa'kza' ḻawo' Le', na' kweza' da' yi'o neda'.
13984	PSA 5:5	Nako' Dios bi žaz ḻažo'o da' bi nak chawe'. No benne' žone' da' ẕia bi soakze' gan zo' Le'.
13985	PSA 5:6	Bi žo'o latje ḻa'gak benne' wen da' ẕinnj ka' ḻawo'. Bi ẕḻe'elo' chawe' yógo'te benne' wen da' ẕinnj ka'.
13987	PSA 5:8	san neda' wak choa'a ližo' dan' nží'iḻe'elo' neda'. Wká'n ẕena' Le' ḻo yodo' la'y chio' ḻo yeḻa' ẕžebe.
13988	PSA 5:9	Bsedle neda' gona' da' chawe' ḻawo' Le', X̱ana' Dios, dan' ẕžá'aḻe'egak benne' ka' neda', benne' ka' bi ẕḻé'egekle' neda' chawe'. Bche' neda' nez chawe' chio'.
13991	PSA 5:12	San yebéḻe'egekle benne' ka' žx̱en ḻáže'gake' Le'. Kwežeyá'gake' ḻo yeḻa' žebele dan' žákḻeno' ḻégake'. Benne' ka' zej nži'ile' Le' yebéḻe'egekle' ḻawo' Le'.
13992	PSA 5:13	Gon cháwe'kzo' benne' chawe', X̱ana' Dios. Dan' žaz ḻažo'o bennen', gape chi'o ḻe'.
13994	PSA 6:2	X̱ana' Dios, bi tiḻo' neda' ḻo yeḻa' ẕža'a chio', na' bi gono' neda' zi' ḻo yeḻa' yichj ža'a chio'.
13995	PSA 6:3	Beyache' ḻaže'l neda', X̱ana' Dios, dan' bi zoa' chawe'. Beyón neda', X̱ana' Dios, dan' ẕzáka'ḻi'a.
13997	PSA 6:5	Da, X̱ana' Dios, beslá be' da' nakkza'. Ḻo yeḻa' ži'i ḻaže' chio' beslá neda'.
13998	PSA 6:6	Gan zej nnita' benne' gat ka', bi žejsá' ḻaže' no benne' Le'. Ḻo latje chegak benne' gat ka', ¿noẕ benne' wká'n ẕene' Le'?
13999	PSA 6:7	Ba žedó ḻaža'a dan' ẕbeže ḻaža'a. Yógo'te yel ẕbise gan dia' ḻen nis ẕbeža'. Žesbisan' ḻen nis ẕbeža'.
14000	PSA 6:8	Ba nyejw yej ḻawa' dan' ẕbéžeḻi'a. Ba bebižkze nis dan' yožen yej ḻawa' dan' ẕžá'aḻe'egak benne' ka' žsáka'gake' neda'.
14002	PSA 6:10	X̱ana' Dios ba ženle' da' žáta'yoela' Ḻe'. Ẕzi' X̱ana' Dios da' ẕcháḻjḻena' Ḻe'.
14003	PSA 6:11	Žedoé'egekle, na' zej že' zedḻe'e yógo'te benne' ka' bi ẕḻé'egekle' neda' chawe'. De chgi' kwásgake' gan zoa', na' yedoé'egekle'.
14005	PSA 7:2	X̱ana' Dios, žx̱en ḻaža'a Le'. Beslá neda' ḻo na'gak benne' ka' žsáka'gake' neda', na' gokḻen neda',
14006	PSA 7:3	nich bi séngake' neda' ka žon bež yix̱e', na' bi wchéza'gake' neda' gan bi zoa no benne' gákḻene' neda'.
14009	PSA 7:6	cha' ki bena', be' latje bennen' bi ẕḻe'ele' neda' chawe' kwia ḻaže'e neda', na' sene' neda'. Be' latje bennen' wleje' neda' ḻo yo, na' wca'ne' ca'ze yeḻa' ẕen chia'.
14010	PSA 7:7	X̱ana' Dios, ḻo yeḻa' ẕža'a chio', wzó ža'. Bdiḻ-ḻen benne' ka' žsáka'gake' neda' ḻo yeḻa' ẕža'a chégake'. Bseḻa' da' gakḻen neda' kate' žin ža wchi'a ḻažo'o da' žak cheto'.
14011	PSA 7:8	Benne' yógo'te yež ka' ḻá'gake' ḻawo' Le'. Wnná bia' benne' ka' ḻo yeḻa' ẕen chio'.
14012	PSA 7:9	Le', X̱ana' Dios, wchi'a ḻažo'o benne' yógo'te yež. Bchi'a ḻaže' neda' ka nak da' chawe' dan' bena', dan' bena' ḻo da' nak ḻi ḻaže' chia'.
14013	PSA 7:10	Bchinnj da' žongak benne' wen da' ẕinnj ka', san ben chawe' benne' chawe' ka', dan' nako' chawe', Dios, na' ẕwio' da' yo'o ḻo yichj ḻáẕdo'gak yógo'te benne' ka'.
14014	PSA 7:11	Dios na'kze žape chi'e neda'. Žeslé' benne' ka' zej nake' ḻi ḻaže'.
14015	PSA 7:12	Nak chawe' ka ẕchi'a ḻaže' Dios da' žongak benne' ka'. Yógo'te ža ẕža'a Dios che da' žongak benne' wen da' ẕinnj ka'.
14016	PSA 7:13	Cha' bi yeyát ḻáže'gake' Dios kweje' ya ntoche' chie' ka'. Za' wsíe' yag ntóche'do' chie' ka'.
14018	PSA 7:15	Benne' wen da' ẕinnj ẕkweze' da' ẕia da' gone'. Yo'o yichj ḻáẕda'we' da' ẕinnj da' gone', na' gone' da' wen ḻaže'.
14019	PSA 7:16	Ba bche'ne' to yežw gže' nich yéx̱jwgak benne' ka' ga na', san bex̱jwe' ḻekze' ḻo yežwn'.
14020	PSA 7:17	Da' ẕinnj da' bene' žesbaga'n ḻekze' ẕia, na' da' bsake'e benne' ka' yebí'i Dios chekze' ḻe'.
14024	PSA 8:3	Žoḻgak x̱kwide' ka', na' bi'do' že'n ka', ka naken. Yo'o chawo'o gan bi gak ḻa'gak benne' ka' bi ẕḻé'egekle' Le' chawe'. Ẕzoa žio' benne' ka' bi ẕḻé'egekle' Le' chawe', na' benne' ka' ẕzóagake' Le' cheḻa'ale.
14028	PSA 8:7	Wnnakzo' nna biá'gake' yógo'te da' ka' beno'. Yógo'ten bdio' ḻo ná'gake':
14030	PSA 8:9	bia zej nnita' x̱ílgakba', na' bel ka', na' yógo'te bia ka' zej nníta'ba' ḻo nisdo'.
14033	PSA 9:2	X̱ana' Dios, dot ḻaža'a wká'n ẕena' Le'. Wzenla' benne' ka' ka nak da' ẕente da' beno'.
14034	PSA 9:3	Yebekzla', na' goḻkza' ka nak chio'. Goḻa' che La la'y chio' Le', nako' Dios ẕente.
14035	PSA 9:4	Bẕonnjgak benne' ka' bi ẕḻé'egekle' neda' chawe'. Bejchégwgake', na' wnítgekle' ḻawo' Le',
14036	PSA 9:5	dan' ẕzoa chawo'o da' chawe' da' žona'. Ži'o latje blo chio', na' cháwe'do' ẕchi'a ḻažo'o.
14037	PSA 9:6	Bdiḻo' benne' yež ka', na' bchinnjo' yo'o chegak benne' wen da' ẕinnj ka'. Bsoḻo' lagak benne' ka' to chi'ize.
14038	PSA 9:7	Wžía yi'gak benne' ka' bi ẕḻé'egekle' neda' chawe'. To chi'ize zej nbia yi' latje chegak benne' ka', na' yež chégake' ka', da' ka' bchinnjo' Le'. Nitó benne' chejsá' ḻaže'e benne' ka'.
14039	PSA 9:8	X̱anžo Dios zoakze' to chi'ize. Bkweze' latje blo chie' gan wchi'a ḻaže'e benne' ka'.
14040	PSA 9:9	Ḻo da' chawe' wchi'a ḻaže'e benne' ka' dot yežlyó, na' benne' yógo'te yež ka' ḻo da' nak ḻi ḻaže'.
14041	PSA 9:10	X̱anžo Dios nake' ka to gan chejnníta'gak chawe' benne' yache' ka', kate' žin ža che da' wžía yin' benne' wen da' ẕinnj ka'.
14044	PSA 9:13	dan' žejsá' ḻaže'e chegak benne' ka' ẕzáka'gake', na' yezi'e wzón che benne' wetw benách ka'. Bi gaḻ ḻaže'e da' žḻižgak benne' yache' ka' Le'.
14045	PSA 9:14	Beyache' ḻaže'l neda', X̱ana' Dios. Bwia da' ẕzaka'a ḻo na'gak benne' ka' bi ẕḻé'egekle' neda' chawe'. Le' bekó'o neda' ḻo na' yeḻa' got
14046	PSA 9:15	nich wzenla' benne' ka' da' ẕka'n ẕena' Le' gan ẕdóbgake' ḻo yež Sión, na' yebéḻe'ela' dan' besló' neda'.
14047	PSA 9:16	Chejchazgak benne' yež ka' ḻo yežw da' bché'ngake'. Chejcházgake' ḻo do yeḻj da' bdíx̱jgake'.
14048	PSA 9:17	X̱anžo Dios bḻoe'ele' kan ẕchi'a ḻaže'e, dan' wbága'gak ẕia benne' ka' bi zej nake' chawe' ni'a che da' béngakkze'.
14051	PSA 9:20	Wzó ža', X̱ana' Dios. Bi go'o latje benne' ka' wká'n ẕen kwíngake'. Ḻa'gak benne' yež ka' ḻawo' Le' nich wchi'a ḻažo'o ḻégake'.
14052	PSA 9:21	X̱ana' Dios, ben ga žébegak benne' ka' Le'. Yeyónbia'gak benne' yež ka' zej nake' benachze.
14054	PSA 10:2	Ḻo yeḻa' ẕka'n ẕen kwin benne' bi nake' chawe' ẕbia ḻaže'e benne' yache', san chejchaze' ḻo da' bdix̱jwe' nich wžía yi'e bennen'.
14057	PSA 10:5	Žónteze' da' ẕinnj, na' ẕnne' bi wchi'a ḻaže' Dios ḻe' ni'a che da' žone'. Ẕzoe' cheḻa'ale benne' ka' ẕží'igake' chie' ḻe'.
14058	PSA 10:6	Ḻo yichj ḻáẕda'we' ẕnne': “Bi be gak wsejw x̱neza'. Batkle bi gak chia' da' bi naken chawe'.”
14060	PSA 10:8	Ẕkache' kwine' žoa'a yež nich sene' benne' ka'. Bagáche'ze žote' benne' ka' ẕdégakze' ga na'. Ẕwíalanze' nich gak bi gone' chegak benne' yache' ka'.
14061	PSA 10:9	Bagáche'ze ẕbeze' ka žon bež yix̱e'. Ẕbeze' nich gak sene' benne' yache' ka'. Kate' ẕzene' benne' yache' ḻo do yeḻj chie', na' ẕchi'e ḻe' chekze'.
14064	PSA 10:12	Wzó ža', X̱ana' Dios, na' bze no'o. Bi gaḻ ḻažo'o benne' yache' ka'.
14066	PSA 10:14	San Le' bḻe'ekzlo' da' ni, dan' ẕwio' no benne' žone' da' ẕinnj, na' da' bi nak chawe', nich yezi'kzo' wzón benne' ka'. Benne' yache' ka' ẕde kwíngake' ḻo no'o. Le' žákḻenkzo' bi' wzebe ka'.
14068	PSA 10:16	To chi'ize nak X̱anžon' Benne' ẕnna bi'e žo'o. Ḻo yežlyó chie' ba wžía yi'gak benne' ka' bi ẕḻé'egekle' Ḻe' chawe'.
14072	PSA 11:2	Bwia nga, ẕkwezgak benne' ka' bi zej nake' chawe' yag ntóche'do' ka' chégake'. Ba bx̱óagake' yag ntóche'do' ka' chégake' ḻo do chen, nich gótgake' bagáche'ze benne' chawe' ka'.
14074	PSA 11:4	X̱anžo Dios zoakze' latje la'y chie'. Ya'abá na'kze zoa latje blo gan že' Dios. Ẕwíagak yej ḻawe', na' ẕḻe'ele' da' žongak benne' ka'.
14076	PSA 11:6	Wdíe' benne' ka' bi zej nake' chawe' ḻo da' ka' wžía yí'gaken ḻégake', da' ka' zej naken yi', na' sufr da' žeyen ka yeže, na' to be' da' ḻaḻe'e, da' ka' seḻe'e ḻawgak benne' ka'.
14077	PSA 11:7	Ki gone' dan' nak chawe' X̱anžo Dios, na' nži'ile' da' naken chawe'. Ḻé'egekle benne' ḻi ḻaže' ka' ḻawe' Ḻe'.
14079	PSA 12:2	X̱ana' Dios, beslá benne' chio' ka' dan' biž zoa no benne' žape' Le' ba la'ne, na' bi zoa no benne' ḻi ḻaže' ládjwgak benne' ka'.
14080	PSA 12:3	Yógo'te benne' ka' žon ḻáže'gekle' ljéžgake' ka'. Ḻo da' wen ḻaže' ẕnnágake' diža' chawe' da' ẕnnágake' nich gon ḻáže'gekle' benách ka'.
14081	PSA 12:4	X̱anžo Dios wžía yi'e benne' ka' ẕcháḻjgake' ki, na' benne' ka' ẕcháḻjgake' da' ẕka'n ẕen kwíngake'.
14084	PSA 12:7	X̱tiža' X̱anžo Dios naken dot da' li. Naken ka ya plat da' wdén ḻo yi', da' ba wdén ḻo yi' gaže chi'i ka'.
14085	PSA 12:8	Le', X̱ana' Dios, ẕwíakzo' benne' chio' ka'. To chi'ize gape chi'o ḻégake' ḻo na'gak benne' ka' zej nnita' ḻo ža na'a ža.
14090	PSA 13:4	Bwia neda', X̱ana' Dios, na' bechebe chia'. Ben choch neda' nich bi gata',
14092	PSA 13:6	san neda' žx̱en ḻaža'a Le' yeyache' ḻáže'lo' neda'. Dot ḻáẕda'wa' žebela' dan' žákḻeno' neda'. Goḻkza' che X̱ana' Dios dan' žon chawe'e neda'.
14093	PSA 14:1	Benne' ḻaẕdo' zide ka' ẕza' ḻáže'gake', na' ẕnnágake': “Bi zoa Dios.” Benne' ki zej nchix̱le yichj ḻáẕdo'gake', na' žóngake' da' bi naken chawe'. Bi zoa no benne' žone' da' naken chawe'.
14095	PSA 14:3	Yógo'tie' bejchíx̱gekle'. Yógo'tie' zej nchix̱le yichj ḻáẕdo'gake'. Bi zoa no benne' žone' da' naken chawe', nitóe'.
14097	PSA 14:5	Ḻo yeḻa' ẕžebe chégake' žẕízegak benne' ka', dan' žakḻen Dios benne' chawe' ka'.
14099	PSA 14:7	Ḻa'kze Bennen' yeslé' benne' Israel ka'. Kate' gon X̱anžon' ga yežingak benne' chie' ka', benne' ka' zej ndo'e zíto'le, na' yebégekle ẕa'só Jakob, na' yebéḻe'egekle benne' Israel ka'.
14102	PSA 15:3	bennen' bi ẕnnie' che lježe' ka', na' bi be da' ẕia žone' chegak lježe' ka', na' bi žwe'e latje no benne' kwej bi'e lježe' ka'.
14103	PSA 15:4	Wak soa bennen' ga na', bennen' bi žape' ba la'ne no benne' žone' da' ẕinnj, san žape' ba la'ne benne' ka' žápegake' X̱anžo Dios ba la'ne bennen' bi ẕche'e x̱tiže'e ḻa'kze gonen ga bi wnite'.
14105	PSA 16:1	Bwia neda', Dios, dan' žx̱en ḻaža'a Le'.
14106	PSA 16:2	Ḻo yichj ḻáẕda'wa' žapa' Le', X̱ana' Dios: “Le' nako' X̱ana'. Bi be da' chawe' žata' chia' da' bi zan' ḻo no'o.”
14107	PSA 16:3	Žaz ḻáže'za' benne' ka' zej nake' che Dios ḻo yežlyó nga, na' ḻezka' benne' ka' zej nake' ḻi ḻaže'.
14108	PSA 16:4	Zan da' sáka'gak benne' ka' ẕka'n ẕéngake' lo'a ka'. Bi gona' ḻégake' tẕen kate' ẕḻáljgake' žen ḻáwgaken, na' bi wkonla' žin lágaken.
14109	PSA 16:5	X̱anžo Dios ẕwawe' neda' na' nake' da' chawe' chia'. Le', Dios, žape chi'o yeḻa' nban chia'.
14110	PSA 16:6	Da' žonno' chia' naken da' ba nez ẕen da' ẕzi'a, na' x̱tanḻe'e nak latje gan bzo' neda'.
14111	PSA 16:7	Wká'n ẕénteza' X̱anžo Dios, Bennen' žsedle' neda'. Kate' ne ẕtasa' ẕzejni'ile' neda' ḻo yichj ḻáẕda'wa'.
14112	PSA 16:8	Žx̱en ḻaža'a X̱anžo Dios yezi'e neda'. Dan' zoe' kwita', bi be gak wcheben neda'.
14114	PSA 16:10	dan' bi wka'no' be' da' nakkza' ḻo latje choḻ chegak benne' gat ka', na' bi go'o latje nitla' dan' nakkza' chio' Le'.