23229	MAT 1:16	Y ri ralkꞌoꞌal ri Jacob e ri José, ri rachijil ri María, ruchu ri Jesús. Yey ri Jesús e ri kabꞌiꞌx “Cristo” che.
23230	MAT 1:17	Jekꞌulaꞌ chi konoje ri tikawex ujeqebꞌem lo chwi ri Abraham kꞌa chwach ri David, xebꞌikꞌow kajlajuj lemaꞌj; chwi lo ri David kꞌa chwach echiriꞌ xekꞌam bꞌi raj Israel pa ri tinamit Babilonia, xebꞌikꞌow kajlajuj lemaꞌj; yey chwi lo echiriꞌ xekꞌam bꞌi raj Israel pa ri tinamit Babilonia kꞌa chwach ri ralaxibꞌal ri Cristo, xebꞌikꞌow kajlajuj lemaꞌj.
23236	MAT 1:23	Chitanapeꞌ: Jun chomilaj qꞌapoj ali kakanaj yewaꞌ ixoq y kalax jun ralabꞌ. Ekꞌu rubꞌiꞌ kabꞌiꞌxik: Emanuel xchaꞌ. Waꞌ keꞌelawi “Dios xoꞌljeqel qukꞌ”.
23242	MAT 2:4	Xumol kꞌu kichiꞌ konoje ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ y xutzꞌonoj kꞌu chike pa kalax wi ri Cristo, Ruchaꞌoꞌn lo ri Dios.
23243	MAT 2:5	Rike xkibꞌiꞌij che: —Ri Cristo kalax pa raldea Belén re Judea, ma jewaꞌ utzꞌibꞌam kan ri qꞌalajisanel chupa Ruchꞌaꞌtem ri Dios:
23250	MAT 2:12	Chaqꞌabꞌ kꞌu riꞌ, xqꞌalajisax chike pa wachikꞌ na ketzelej ta chi pa kꞌo wi ri Herodes. Ruma kꞌu riꞌ, xetzelej pa kitinamit pa jun chik bꞌe.
23251	MAT 2:13	Echiriꞌ rachijabꞌ e aj naꞌoj ebꞌelinaq chubꞌi rukꞌ ri Jesús, xukꞌut ribꞌ jun ángel re ri Dios pa uwachikꞌ ri José y xubꞌiꞌij che: «Chatyaktajoq, chebꞌakꞌama bꞌi rakꞌa y ruchu. Chixanimaj bꞌi kꞌa Egipto y chixkanaja chilaꞌ kꞌate kambꞌiꞌij chiwe jampa kixpetik, ma ri Herodes kutaq utzukuxik rakꞌa chaꞌ kakamisaxik» xchaꞌ.
23253	MAT 2:15	Chilaꞌ kꞌut xekꞌojiꞌ wi kꞌa che rukamik ri Herodes. Xuꞌan kꞌu waꞌ chaꞌ e kuꞌana rubꞌiꞌim lo ri Dios ruma ri qꞌalajisanel echiriꞌ jewaꞌ xubꞌiꞌij: «Kꞌa chilaꞌ Egipto xinsikꞌij wi lo ri Nukꞌajol» xchaꞌ.
23258	MAT 2:20	«Chatyaktajoq, chebꞌakꞌama bꞌi rakꞌa junam rukꞌ ruchu y chixtzelej tanchi Israel, ma ya xekam konoje ri kakaj kakikamisaj rakꞌa» xchaꞌ.
23268	MAT 3:7	Ekꞌu ri Juan echiriꞌ xrilo lik e kꞌi chike ri fariseos y ri saduceos xekꞌun ruma ri bautismo kuyaꞌo, xubꞌiꞌij chike: «¡Ralaq pachaꞌ alaq jupuq chi kumatz! ¿China xbꞌiꞌn re we utz kesaj ibꞌ alaq chwach ri unimal kꞌaxkꞌobꞌik kutaq lo ri Dios pawiꞌ alaq?
23288	MAT 4:10	Ekꞌu ri Jesús xubꞌiꞌij che: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.
23291	MAT 4:13	Xel bꞌi pa ri tinamit Nazaret y xeꞌjeqela pa ri tinamit Capernaúm. Waꞌ jun tinamit kꞌo chuchiꞌ ri mar pa ri luwar re Zabulón y re Neftalí.
23295	MAT 4:17	Chwi kꞌu lo riꞌ xujeq ri Jesús katzijonik, jewaꞌ kubꞌiꞌij: «Tzelej tzij alaq chwach ri Dios, ma rutaqanik ri Dios petinaq chilaꞌ chikaj lik xa naqaj chi kꞌo wuloq» kachaꞌ.
23297	MAT 4:19	Ekꞌu ri Jesús xubꞌiꞌij chike: —Chixpetoq, chixterej lo chwij, y riꞌin kanꞌan chiwe ix aj molol tikawex, jelaꞌ pachaꞌ iꞌanom lo chike ri kar —xcha chike.
23315	MAT 5:12	Chixkiꞌkotoq y chixbꞌixonoq, ma lik nim ri rajil ukꞌaxel kikꞌul chilaꞌ chikaj. Makam kꞌu iwanimaꞌ che echiriꞌ kixyaꞌ pa kꞌax, ma jelaꞌ xꞌan chike ri qꞌalajisanelabꞌ ojertan, ri xenabꞌej lo chiwach riꞌix.
23322	MAT 5:19	»Ruma kꞌu waꞌ, china ri kupalajij juna taqanik tobꞌ ne lik chꞌutiꞌn chwach rire yey e tanchi ukꞌutik kuꞌan chikiwach ri tikawex, riꞌ na jinta uwach chupa rutaqanik ri Dios petinaq chilaꞌ chikaj. China kꞌu ri kukoj Rutzij Upixabꞌ ri Dios yey jelaꞌ kukꞌut chikiwach jujun chik chaꞌ e kakiꞌano, riꞌ lik kꞌo uwach chupa rutaqanik ri Dios.
23325	MAT 5:22	»Noꞌj riꞌin kambꞌiꞌij chiwe: China ri kape royowal chirij juna ratz-uchaqꞌ, riꞌ kaqꞌat tzij puwiꞌ. China kꞌu ri kukꞌaq bꞌi uqꞌij ri ratz-uchaqꞌ, riꞌ kakꞌam bꞌi chwach ri qꞌatbꞌal tzij re ri tinamit. Yey china ri kubꞌiꞌij che juna ratz-uchaqꞌ: “¡Na jinta kꞌana achak!”, riꞌ katewun puwiꞌ keꞌek pa aqꞌ chi xibꞌalbꞌaꞌ re tijbꞌal kꞌax.
23345	MAT 5:42	Chatsipan che ri nibꞌaꞌ we kutzꞌonoj toꞌbꞌal chawe. We kꞌo junoq kachiqꞌiman chawe, maꞌan xuꞌyal che.
23347	MAT 5:44	»Noꞌj riꞌin kambꞌiꞌij chiwe: Kꞌax chebꞌinaꞌa ri e aj retzelal kꞌuꞌx chiwij. Chitzꞌonoj ri rutzil ukꞌuꞌx ri Dios pakiwi ri kakitzꞌonoj ri na utz taj piwi riꞌix. Chiꞌana ri utz chike ri tzel kebꞌilow iwe. Chiꞌana kꞌu orar pakiwi janipa ri kakikꞌaq bꞌi iqꞌij y ri kixkiternabꞌej rukꞌ kꞌaxkꞌobꞌik
23351	MAT 5:48	Chiꞌana kꞌu jusukꞌ che ri ibꞌinik isilabꞌik jelaꞌ pachaꞌ ri usukꞌlikil ri Qaqaw Dios kꞌo chilaꞌ chikaj.
23377	MAT 6:26	»Chebꞌiwilape ri tzꞌikin kexikꞌikꞌ che ruwa kaj. Rike na ketikoꞌnaj taj, na kakiꞌan tane kimolonik y na jinta ne pa kakikꞌol wi ri kimolonik. Na rukꞌ ta kꞌu riꞌ, Riqaw Dios kꞌo chilaꞌ chikaj kebꞌutzuqu. ¡Makꞌuwariꞌ riꞌix, ri Dios kixuchajij, ma e más kꞌo iwach riꞌix chikiwa ri tzꞌikin!
23379	MAT 6:28	¿Suꞌbꞌe kꞌu riꞌ lik kubꞌisoj ikꞌuꞌx riqꞌuꞌ kikojo? Chiwilapeꞌ suꞌanik kekꞌiy ri kotzꞌiꞌj pa taq juyubꞌ; waꞌ na kechakun taj y na kekeman ta nenareꞌ chaꞌ kakiꞌan ri kiqꞌuꞌ.
23389	MAT 7:4	Y we qꞌebꞌel la jun cheꞌ chupa rawach riꞌat, ¿utz nawi kabꞌiꞌij che rawatz-achaqꞌ: “Chayaꞌa luwar chwe kanwesaj la jun ukꞌaj cheꞌ kꞌo chupa rawach”? ¡Na utz taj!
23398	MAT 7:13	»Chixok bꞌi che ri okibꞌal chꞌutiꞌn uwach. Ma ri okibꞌal y ri bꞌe keꞌek chi xibꞌalbꞌaꞌ lik nim uwach, yey lik e kꞌi ri kebꞌok bꞌi chiriꞌ.
23409	MAT 7:24	»China kꞌu ri kataw re ri nutzij yey kuꞌan janipa ri kambꞌiꞌij, kanjunimaj rukꞌ jun achi lik kꞌo unaꞌoj ma xutzꞌaq lo ri rocho paꞌbꞌaj.
23418	MAT 8:4	Ekꞌu ri Jesús xubꞌiꞌij che: —Chatapeꞌ, lik matzijoj che junoq riꞌin xatinkunaj. Jat chwach raj chakunel pa Rocho Dios chaꞌ rire karilo na jinta chi lepra chawe, y chayaꞌa chwach ri Dios ri qasaꞌn xtaqan kan ri Moisés che chaꞌ kaqꞌalajin chikiwach ri tikawex at kunutajinaq chik —xchaꞌ.
23419	MAT 8:5	Echiriꞌ xopon ri Jesús pa ri tinamit Capernaúm, xopon jun capitán ke ri soldados aj Roma rukꞌ y xujeq lik kelaj che,
23422	MAT 8:8	Ekꞌu ri capitán xubꞌiꞌij che: —Wajawal, riꞌin lik na taqal ta chwe kok la chiwocho. Xew bꞌiꞌij la: “Chatkunutajoq”, y rukꞌ ri chꞌaꞌtem la, kakunutaj ri waj chak.
23423	MAT 8:9	Ma e pachaꞌ riꞌin, in kꞌo puqꞌabꞌ jun taqanel y rire ebꞌuyaꞌom ukꞌiyal soldados panuqꞌabꞌ. We kambꞌiꞌij kꞌu che junoq “Jat”, keꞌek; o kambꞌiꞌij che junoq chik “Chatpetoq”, kapetik. Yey we kambꞌiꞌij che juna waj chak “Chaꞌana waꞌ”, kuꞌano —xchaꞌ.
23427	MAT 8:13	Ekꞌuchiriꞌ, xubꞌiꞌij ri Jesús che ri capitán: —Oj chi ocho la, ma jelaꞌ kuꞌanaꞌ pachaꞌ ri xkubꞌiꞌ kꞌuꞌx la che —xchaꞌ. Chupa kꞌu laꞌ la joqꞌotaj xkunutaj ri raj chak.
23428	MAT 8:14	Ri Jesús xopon chirocho ri Pedro. Chiriꞌ kꞌu riꞌ xril ruchu-ujiꞌ ri Pedro kꞌo chwa uwarabꞌal y lik kꞌo aqꞌ chirij.
23434	MAT 8:20	Ri Jesús xukꞌul uwach: —Ri yak kꞌo kijul y ri tzꞌikin kexikꞌikꞌ che ruwa kaj kꞌo kisok; noꞌj Ralaxel Chikixoꞌl Tikawex na jinta ne uluwar tobꞌ xa pa kuxlan wi —xchaꞌ.
23439	MAT 8:25	Ekꞌu rutijoꞌn xeꞌkikꞌosoj y xkibꞌiꞌij che: —¡Qajawal! ¡Chojkolobꞌej la, ma kojkamik! —xechaꞌ.
23453	MAT 9:5	¿Saꞌ kꞌu ri na kꞌayew taj kambꞌiꞌij: “Ronoje ramak kuytajinaq chik” o “Chatyaktajoq y chatbꞌinoq”?
23454	MAT 9:6	E kuaj kꞌut ketaꞌmaj alaq waꞌ: Ralaxel Chikixoꞌl Tikawex yaꞌtal puqꞌabꞌ kukuy taq ri mak ke ri winaq che ruwachulew —xchaꞌ. Xubꞌiꞌij kꞌu riꞌ che ri sik: —Chatyaktajoq, chakꞌama bꞌi rachꞌat y jat chaꞌwocho —xchaꞌ.
23457	MAT 9:9	Xel kꞌu bꞌi ri Jesús chiriꞌ y xril jun achi aj tzꞌonol puaq re tojonik, Mateo rubꞌiꞌ, tzꞌul pa ri luwar pa kaꞌan wi ri tojonik che ri gobierno, y xubꞌiꞌij che: —Chat-terej lo chwij —xchaꞌ. Y ri Mateo xyaktajik y xterej bꞌi chirij.
23470	MAT 9:22	Pero ri Jesús xtzuꞌn lo chirij, xutzuꞌ uwach rixoq y jewaꞌ xubꞌiꞌij che: —Ixoq, nimarisaj kꞌuꞌx la, ma xkunutaj la ruma xkubꞌiꞌ kꞌuꞌx la wukꞌ —xchaꞌ. Chupa kꞌu riꞌ la joqꞌotaj rixoq asu xkunutajik.
23472	MAT 9:24	Xubꞌiꞌij kꞌu ri Jesús chike: —Chixelubꞌi, ma wa ralko ali na kaminaq taj, xa kawarik —xchaꞌ. Yey xa xkitzeꞌej kꞌu ri xubꞌiꞌij.
23475	MAT 9:27	Echiriꞌ xel bꞌi ri Jesús chiriꞌ, xeterej bꞌi kaꞌibꞌ potzꞌ chirij, lik ko kesikꞌin che, jewaꞌ kakibꞌiꞌij: —¡Choj-juchꞌ kaꞌn ko cheꞌla, lal Ralkꞌoꞌal kan ri rey David! —xechaꞌ.
23477	MAT 9:29	Ekꞌu ri Jesús xuya ruqꞌabꞌ puwi ri kiwach y xubꞌiꞌij chike: —Chuꞌana waꞌ iwukꞌ e chirij ri kubꞌulibꞌal ikꞌuꞌx —xchaꞌ.
23490	MAT 10:4	Simón ri kabꞌiꞌx che “ri Cananista”, kꞌisbꞌal re, e Judas aj Iscariot, ri xkꞌayin re ri Jesús.
23494	MAT 10:8	»Chebꞌikunaj konoje ri yewaꞌibꞌ kukꞌ taq ri kꞌo ri yabꞌil lepra chike, chebꞌikꞌastajisaj ri ekaminaq y chebꞌiwesaj bꞌi itzel uxlabꞌixel. Wa chuqꞌabꞌ kikꞌul riꞌix e rutzil nukꞌuꞌx chiwe; jekꞌulaꞌ mitzꞌonoj rajil ri chak kiꞌan rukꞌ.
23501	MAT 10:15	Ma paqatzij wi kambꞌiꞌij chiwe: Chupa ruqꞌijol ri qꞌatbꞌal tzij, más lik kꞌax ri kape pakiwi ri tinamit na xkikꞌul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.
23502	MAT 10:16	»Chitapeꞌ: Riꞌin kixintaq bꞌi pachaꞌ ix bꞌexex chikixoꞌl utiw. Lik chichajij kꞌu iwibꞌ chi utz jelaꞌ pachaꞌ ruꞌanik kuchajij ribꞌ ri kumatz, yey chiꞌana pachaꞌ ri palomax na jinta kꞌo kuꞌan che junoq.
23509	MAT 10:23	Echiriꞌ lik kixternabꞌex rukꞌ kꞌaxkꞌobꞌik pa juna tinamit, jix che jun chik. Ma paqatzij wi kambꞌiꞌij chiwe, kꞌamajaꞌ ne kikꞌiso kixikꞌow chupa ronoje taq ri tinamit re Israel, echiriꞌ kakꞌun tanchi Ralaxel Chikixoꞌl Tikawex.
23523	MAT 10:37	»China ri más lik e kꞌax kebꞌunaꞌ ruchu-uqaw chinuwach riꞌin, na taqal ta che katerej chwij; jekꞌulaꞌ china ri más lik e kꞌax kebꞌunaꞌ ri ralkꞌoꞌal chinuwach riꞌin, riꞌ na taqal ta che katerej chwij.
23524	MAT 10:38	»China ri na karaj taj kutij kꞌax ruma e nutijoꞌn, riꞌ na taqal ta che katerej chwij.
23525	MAT 10:39	China ri kutij uqꞌij lik kel chi utz rukꞌaslem wara che ruwachulew, riꞌ e kujam ri kꞌaslemal chilaꞌ chikaj; noꞌj ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios.
23526	MAT 10:40	»China ri kakꞌuluw iwe riꞌix, in ri kinukꞌulu; yey china ri kakꞌuluw we riꞌin, e kukꞌul ri Jun taqayom lo we.
23527	MAT 10:41	China ri kakꞌuluw re juna qꞌalajisanel ruma e qꞌalajisay re rutzij ri Dios, ri rajil ukꞌaxel kukꞌulu e jelaꞌ pachaꞌ ri kukꞌul juna qꞌalajisanel. China ri kakꞌuluw re juna tikawex ruma jusukꞌ rubꞌinik chwach ri Dios, ri rajil ukꞌaxel kukꞌulu e jelaꞌ pachaꞌ ri kukꞌul ri jusukꞌ ubꞌinik usilabꞌik chwach ri Dios.
23528	MAT 10:42	China kꞌu ri kusipaj tobꞌ xa juna tzima yaꞌ joron che junoq chike waꞌ wa chꞌutiꞌq ruma e nutijoꞌn, paqatzij wi kambꞌiꞌij chiwe, riꞌ na kujam ta kꞌana ri rajil ukꞌaxel» xcha ri Jesús.
23530	MAT 11:2	Ri Juan kꞌo pa cárcel echiriꞌ xuta ri kuꞌan ri Cristo. Xebꞌutaq kꞌu lo kaꞌibꞌ chike rutijoꞌn rukꞌ Rire,
23543	MAT 11:15	China kꞌu ri kꞌo utanibꞌal che utayik, ¡chuta kꞌu riꞌ!
23544	MAT 11:16	»¿China kꞌu rukꞌ kanjunimaj wi kiwach wa winaq re waqꞌij ora? E kanjunimaj kukꞌ ri kꞌoꞌmabꞌ kebꞌeꞌtzꞌula pa kꞌayibꞌal y lik kesikꞌin chikiwach,
23547	MAT 11:19	»Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey taq ri winaq kakibꞌiꞌij: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik y raj makibꞌ” kechaꞌ. Noꞌj kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.
23549	MAT 11:21	«¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom chi kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis.
23551	MAT 11:23	»Yey ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax. Ma we ta pa ri tinamit Sodoma xilitaj wi wa milagros xinꞌan chiwach riꞌix ix aj Capernaúm, riꞌ laꞌ la tinamit kꞌa kꞌo tane woꞌora.
23556	MAT 11:28	»Chixpeta wukꞌ, iwonoje ri ix kosinaq y kꞌo iweqaꞌn, ma riꞌin kanya uxlanem chiwe.
23557	MAT 11:29	Chiyaꞌa iwibꞌ chuxeꞌ ri nuyuku kankoj riꞌin chiwe. Chimaja kꞌu iweꞌix chwij, ma riꞌin utz nukꞌuꞌx y na kanꞌan ta nim che wibꞌ chiwach. We kiꞌan kꞌu riꞌ waꞌ, kiriq na ri utzil chomal piwanimaꞌ.
23559	MAT 12:1	Chupa taq kꞌu riꞌ laꞌ la qꞌij pa jun qꞌij re uxlanibꞌal, ri Jesús kukꞌ rutijoꞌn e riꞌ kebꞌikꞌow pa taq tikoꞌn re trigo. Ekꞌu rutijoꞌn, ruma lik kenumik, xkijeq kakichꞌupilaꞌ bꞌi ri trigo; tekꞌuchiriꞌ, kakiqil rukꞌ ri kiqꞌabꞌ y kakitijo.
23560	MAT 12:2	Echiriꞌ ri fariseos xkil waꞌ, xkibꞌiꞌij che ri Jesús: —Chilape la, ri e tijoꞌn la kakiꞌan ri na taqal taj kaꞌaniꞌ chupa ri qꞌij re uxlanibꞌal —xechaꞌ.
23566	MAT 12:8	Ma Ralaxel Chikixoꞌl Tikawex e rajaw ri qꞌij re uxlanibꞌal —xchaꞌ.
23570	MAT 12:12	¿China kꞌu ri más kꞌo uwach, e rachi o e ri bꞌexex? Ruma kꞌu riꞌ, taqalik kaꞌan ri utz chupa ri qꞌij re uxlanibꞌal —xchaꞌ.
23571	MAT 12:13	Ekꞌuchiriꞌ, xubꞌiꞌij ri Jesús che rachi chaqijinaq uqꞌabꞌ: —Chasukꞌupij raqꞌabꞌ —xchaꞌ. Ekꞌu rachi xuyuq ruqꞌabꞌ y waꞌ xutzirik, ruqꞌabꞌ xuꞌan tanchi jelaꞌ pachaꞌ ri jun chik.
23588	MAT 12:30	»China kꞌu ri na uꞌanom ta re wukꞌ riꞌin, riꞌ aj chꞌaꞌoj chwij. Yey china ri na katoꞌbꞌ ta wukꞌ riꞌin che kikꞌamik lo jujun chik, riꞌ e kuwulij wa chak kanꞌano.
23590	MAT 12:32	China ri tzel kachꞌaꞌt chirij Ralaxel Chikixoꞌl Tikawex, riꞌ kakuytaj umak we kutzelej utzij. Noꞌj ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak che waꞌ wa qꞌij oj kꞌo wi y na kakuytaj tane kꞌana umak tobꞌ ne che ruqꞌijol ri kꞌaslemal katajin loq.
23594	MAT 12:36	»Riꞌin kambꞌiꞌij kꞌu che alaq: Chupa ri qꞌij re ri qꞌatbꞌal tzij, chikijujunal ri tikawex kataꞌ kichiꞌ ruma ronoje ri chꞌulilaj chꞌaꞌtem kel lo chwa keꞌ.
23598	MAT 12:40	Ma jelaꞌ pachaꞌ ri Jonás xkꞌojiꞌ oxibꞌ qꞌij y oxibꞌ aqꞌabꞌ chupa ri nimalaj kar, jekꞌulaꞌ Ralaxel Chikixoꞌl Tikawex oxibꞌ qꞌij y oxibꞌ aqꞌabꞌ kamuqiꞌ pulew.
23606	MAT 12:48	Ekꞌu ri Jesús xubꞌiꞌij che ri xbꞌiꞌn pan che: —Chawach riꞌat, ¿china kꞌu ri nuchu y china taq ri nuchaqꞌ? —xchaꞌ.
23609	MAT 13:1	Chupa laꞌ la qꞌij, ri Jesús xel bꞌi pa ri ja y xeꞌtzꞌula chuchiꞌ ri mar.
23617	MAT 13:9	China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.
23619	MAT 13:11	Ri Jesús xukꞌul uwach: —Chiwe riꞌix yaꞌtalik kaqꞌalajisax runaꞌoj ri Dios chwi rutaqanik petinaq chilaꞌ chikaj; noꞌj chike taq ri winaq, na yaꞌtal taj.
23626	MAT 13:18	»Chita kꞌut saꞌ keꞌelawi ri kꞌambꞌal naꞌoj puwi ri awanel.
23638	MAT 13:30	Chiyaꞌa luwar chekꞌiy na junam, kopon na ruqꞌijol ri molonik. Ma kꞌa e chiriꞌ kebꞌenutaq ri waj chak chaꞌ kakimol na raqꞌes nabꞌe, kakiꞌan chiyataꞌj y kakixim upa re kaporoxik. Tekꞌuchiriꞌ, kakimol ri trigo y keꞌkiyaꞌa pa kakꞌoliꞌ wi ri trigo weꞌin”» xchaꞌ.
23645	MAT 13:37	Ekꞌu ri Jesús xukꞌul uwach: —Rachi katikow re ri chomilaj ijaꞌ e Ralaxel Chikixoꞌl Tikawex.
23649	MAT 13:41	Ralaxel Chikixoꞌl Tikawex kebꞌutaq bꞌi ru ángeles chaꞌ kekimolo y kekesaj chupa rutaqanik konoje ri ekiminom jujun chik pa mak y ri kakiꞌan ri na utz taj.
23651	MAT 13:43	Noꞌj ri jusukꞌ kibꞌinik kisilabꞌik e jelaꞌ pachaꞌ ri qꞌij kewon chilaꞌ pa kataqan wi ri kiqaw Dios. China kꞌu ri kꞌo utanibꞌal che utayik, ¡chuta kꞌu riꞌ! —xchaꞌ.
23665	MAT 13:57	Ewi lik e kꞌi tzel xkita ri xubꞌiꞌij. Noꞌj ri Jesús xubꞌiꞌij chike: —Chupa ronoje luwar kayak uqꞌij juna qꞌalajisanel; noꞌj chupa rutinamit o chikiwach ri ratz-uchaqꞌ, na kayak ta uqꞌij —xchaꞌ.
23667	MAT 14:1	Chupa kꞌu laꞌ la qꞌij, ri Herodes ri rey re Galilea xuta puwi ri chom uchꞌaꞌtibꞌexik ri Jesús.
23684	MAT 14:18	Xubꞌiꞌij kꞌu ri Jesús chike: —Chikꞌama lo laꞌ chwe —xchaꞌ.
23693	MAT 14:27	Ekꞌu ri Jesús xchꞌaw chike, jewaꞌ xubꞌiꞌij: —Chinimarisaj ikꞌuꞌx, ma riꞌin in Jesús; mixiꞌij kꞌu iwibꞌ —xchaꞌ.
23695	MAT 14:29	Ri Jesús xubꞌiꞌij che: —Chatpeta riꞌ —xchaꞌ. Ekꞌuchiriꞌ ri Pedro xel bꞌi pa ri barco, xujeqo kabꞌin chwi ri mar chaꞌ keꞌek pa kꞌo wi ri Jesús.
23696	MAT 14:30	Pero echiriꞌ xril ruchuqꞌabꞌ ri kaqjiqꞌ, xok xiꞌin ibꞌ rukꞌ y xujeq e riꞌ kamuqutajik. Xsikꞌin kꞌu pan riꞌ che ri Jesús, jewaꞌ xubꞌiꞌij: —¡Chinkolobꞌej la, Wajawal! —xchaꞌ.
23706	MAT 15:4	Ma ri Dios jewaꞌ xtaqan che: Chaloqꞌoj kiqꞌij rachu-aqaw yey We kꞌo junoq kebꞌuyaj ruchu-uqaw rukꞌ itzel chꞌaꞌtem, riꞌ lik taqal che kakamisaxik xcha ri Dios.
23724	MAT 15:22	Kꞌo kꞌu jun ixoq aj Canaán jeqel chiriꞌ, rire kasikꞌinik xkꞌun chwach ri Jesús, jewaꞌ kubꞌiꞌij: —¡Wajawal, lal ri Ralkꞌoꞌal kan ri rey David, chinjuchꞌ kaꞌn ko cheꞌla! Ma kꞌo jun walit lik kꞌax ukꞌulumam ruma kꞌo puqꞌabꞌ jun itzel uxlabꞌixel —xchaꞌ.
23725	MAT 15:23	Noꞌj ri Jesús na xukꞌul ta kꞌana uwach. Ekꞌu rutijoꞌn xeqibꞌ rukꞌ y lik xebꞌelaj che ri Jesús: —Chꞌaꞌbꞌej kan la liꞌxoq ma lik kasikꞌinik teran lo chiqij —xechaꞌ.
23730	MAT 15:28	Ekꞌuchiriꞌ, xubꞌiꞌij ri Jesús che: —¡Ixoq, lik nim ri kubꞌulibꞌal kꞌuꞌx la! E chuꞌana ukꞌ la saꞌ ri kaꞌaj la —xchaꞌ. Chupa kꞌu riꞌ la joqꞌotaj ri ralit xkunutajik.
23747	MAT 16:6	Xubꞌiꞌij kꞌu ri Jesús chike: —Chitapeꞌ: Lik chichajij iwibꞌ chwa ri levadura ke ri fariseos y ri saduceos —xchaꞌ.
23752	MAT 16:11	¿Chaꞌtaj na ximaj ta usukꞌ na e ta chwi ri pam xinchꞌaꞌt wi echiriꞌ ximbꞌiꞌij: “Chichajij iwibꞌ che ri levadura ke ri fariseos y ri saduceos”? —xchaꞌ.
23754	MAT 16:13	Kꞌo jun qꞌij xebꞌopon ri Jesús che taq ri luwar re ri tinamit Cesarea re Filipo, y xutzꞌonoj kꞌu chike rutijoꞌn: —Chikiwa ri winaq, ¿china nawi Ralaxel Chikixoꞌl Tikawex? —xchaꞌ.
23757	MAT 16:16	Ekꞌu ri Simón Pedro xubꞌiꞌij che: —Rilal lal ri Cristo, lal Rukꞌajol ri Dios kꞌaslik —xchaꞌ.