23217	MAT 1:4	Ri ralkꞌoꞌal ri Aram, Aminadab rubꞌiꞌ; ri ralkꞌoꞌal ri Aminadab, Naasón rubꞌiꞌ; ri ralkꞌoꞌal ri Naasón, Salmón rubꞌiꞌ.
23218	MAT 1:5	Ri ralkꞌoꞌal ri Salmón, Booz rubꞌiꞌ yey ruchu ri Booz e Rahab. Ri ralkꞌoꞌal ri Booz, Obed rubꞌiꞌ yey rubꞌiꞌ ruchu ri Obed e Rut. Ri ralkꞌoꞌal ri Obed, Isaí rubꞌiꞌ.
23219	MAT 1:6	Ri ralkꞌoꞌal ri Isaí, e ri rey David y ri ralkꞌoꞌal ri David, Salomón rubꞌiꞌ yey ruchu ri Salomón e ri rixoqil ri Urías.
23220	MAT 1:7	Ri ralkꞌoꞌal ri Salomón, Roboam rubꞌiꞌ; ri ralkꞌoꞌal ri Roboam, Abías rubꞌiꞌ; ri ralkꞌoꞌal ri Abías, Asa rubꞌiꞌ.
23225	MAT 1:12	Echiriꞌ ekꞌamom chubꞌi Babilonia, xalax jun ralkꞌoꞌal ri Jeconías, Salatiel rubꞌiꞌ; ri ralkꞌoꞌal ri Salatiel, Zorobabel rubꞌiꞌ.
23227	MAT 1:14	Ri ralkꞌoꞌal ri Azor, Sadoc rubꞌiꞌ; ri ralkꞌoꞌal ri Sadoc, Aquim rubꞌiꞌ; ri ralkꞌoꞌal ri Aquim, Eliud rubꞌiꞌ.
23231	MAT 1:18	Jewaꞌ xuꞌan ri ralaxibꞌal ri Qanimajawal Jesucristo: Ri María, ruchu ri Jesús, unimam chik kakꞌuliꞌ rukꞌ ri José. Ekꞌuchiriꞌ kꞌamajaꞌ kakijunimaj kibꞌ, ri María xkanaj yewaꞌ ixoq ruma ruchuqꞌabꞌ ri Santowilaj Ruxlabꞌixel ri Dios.
23233	MAT 1:20	Ekꞌuchiriꞌ kuchꞌobꞌ raqan puwi waꞌ, xaqikꞌateꞌt jun ángel re ri Dios xukꞌut ribꞌ pa uwachikꞌ y xubꞌiꞌij che: «José, at ralkꞌoꞌal kan ri David, maxiꞌij awibꞌ che kakꞌam ri María re kuꞌan awixoqil, ma rumatzem rire, ukꞌulum ruma ri Santowilaj Ruxlabꞌixel ri Dios.
23272	MAT 3:11	»Riꞌin paqatzij wi kanya ri bautismo che alaq rukꞌ yaꞌ, kꞌutubꞌal re tzelem chi tzij alaq chwach ri Dios. Noꞌj kꞌu ri Jun katajin lo chwij riꞌin, kꞌo puqꞌabꞌ kuya ri bautismo che alaq rukꞌ ri Santowilaj Ruxlabꞌixel ri Dios y rukꞌ aqꞌ. Rire más kꞌo uchuqꞌabꞌ chinuwach riꞌin; na taqal tane chwe tobꞌ xa kanmolej ruxajabꞌ.
23288	MAT 4:10	Ekꞌu ri Jesús xubꞌiꞌij che: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.
23296	MAT 4:18	Echiriꞌ kabꞌin ri Jesús chuchiꞌ ri mar re Galilea, xril pan kiwach kebꞌ achijabꞌ kichaqꞌ kibꞌ, jun Simón rubꞌiꞌ (Pedro kecha che) y ri jun chik Andrés rubꞌiꞌ. Rike e aj chapal kar, yey e riꞌ ketajin che ukꞌaqik ri ki atarraya pa ri mar.
23302	MAT 4:24	Konoje ri e kꞌo pa taq ri tinamit re Siria xketaꞌmaj taq ri kuꞌan ri Jesús. Xekikꞌam kꞌu lo chwach Rire konoje ri tikawex rukꞌ taq ukꞌiyal kꞌaxkꞌolil. Waꞌ e ri e kꞌo pa yabꞌil, ri kꞌax kikꞌulumam, ri e kꞌo pakiqꞌabꞌ itzel uxlabꞌixel, ri kebꞌumaj tew y ri e sik. Ekꞌu ri Jesús xebꞌukunaj konoje.
23379	MAT 6:28	¿Suꞌbꞌe kꞌu riꞌ lik kubꞌisoj ikꞌuꞌx riqꞌuꞌ kikojo? Chiwilapeꞌ suꞌanik kekꞌiy ri kotzꞌiꞌj pa taq juyubꞌ; waꞌ na kechakun taj y na kekeman ta nenareꞌ chaꞌ kakiꞌan ri kiqꞌuꞌ.
23380	MAT 6:29	Yey riꞌin kambꞌiꞌij chiwe: Ri rey Salomón, tobꞌ lik kꞌo uchomal ruqꞌuꞌ xukojo, waꞌ na xumaj ta kꞌana ruchomalil taq ri kotzꞌiꞌj.
23382	MAT 6:31	»Kambꞌiꞌij kꞌu chiwe: Mubꞌisoj ikꞌuꞌx y mibꞌiꞌij: “¿Saꞌ ri qawa, saꞌ ri qamiqꞌinaꞌ kaqatijo? ¿Saꞌ ri qaqꞌuꞌ kaqakojo?”
23388	MAT 7:3	»¿Suꞌchak e lik katzutzaꞌ rukꞌaj cheꞌ kꞌo chupa ruwach rawatz-achaqꞌ yey e na katok ta kꞌu il che resaxik ri cheꞌ qꞌebꞌel chupa rawach riꞌat?
23440	MAT 8:26	Ri Jesús xukꞌul uwach: —¿Suꞌchak lik kixiꞌij iwibꞌ? Riꞌix lik xa jubꞌiqꞌ ri kubꞌulibꞌal ikꞌuꞌx wukꞌ —xchaꞌ. Ekꞌuchiriꞌ xyaktajik, xuqꞌatej ri kaqjiqꞌ y ri yaꞌ. Xtaniꞌ kꞌu riꞌ ri kaqjiqꞌ y ri yaꞌ xyeniꞌik.
23441	MAT 8:27	Rutijoꞌn lik xkam kanimaꞌ che y xkibꞌiꞌij: «¿Saꞌ ruwach waꞌ waꞌchi? ¡Ma tobꞌ ne e ri kaqjiqꞌ y ri yaꞌ kakikoj utzij!» xechaꞌ.
23443	MAT 8:29	E taq kꞌu riꞌ waꞌ xkijeqo lik ko kesikꞌinik, jewaꞌ xkibꞌiꞌij: —¿Suꞌchak koꞌlmina ibꞌ la qukꞌ, Jesús, Lal Ukꞌajol ri Dios? ¿Petinaq kami la re kojya la pa kꞌax echiriꞌ kꞌamajaꞌ ne kopon ri qaqꞌij? —xechaꞌ.
23452	MAT 9:4	Noꞌj ri Jesús xunaꞌbꞌej saꞌ ri kakichꞌobꞌo; ruma kꞌu riꞌ, xubꞌiꞌij chike: —¿Suꞌchak kachꞌobꞌ alaq ri na utz taj?
23453	MAT 9:5	¿Saꞌ kꞌu ri na kꞌayew taj kambꞌiꞌij: “Ronoje ramak kuytajinaq chik” o “Chatyaktajoq y chatbꞌinoq”?
23459	MAT 9:11	Echiriꞌ xkil waꞌ ri fariseos, xkibꞌiꞌij chike rutijoꞌn ri Jesús: —¿Suꞌchak ri tijonel iwe riꞌix kawaꞌ junam kukꞌ raj tzꞌonol puaq re tojonik y kukꞌ raj makibꞌ? —xechaꞌ.
23462	MAT 9:14	Ekꞌuchiriꞌ, rutijoꞌn ri Juan Aj Yaꞌl Bautismo xeqibꞌ rukꞌ ri Jesús y xkitzꞌonoj che: —¿Suꞌchak riꞌoj y ri fariseos lik kaqaꞌan ayuno yey ri tijoꞌn rilal na kakiꞌan taj? —xechaꞌ.
23488	MAT 10:2	E kibꞌiꞌ taq waꞌ wa kabꞌlajuj e taqoꞌn: Nabꞌe e Simón ri kabꞌiꞌx Pedro che y ruchaqꞌ Andrés, Jacobo y ruchaqꞌ Juan (wa kaꞌibꞌ e ukꞌajol ri Zebedeo),
23490	MAT 10:4	Simón ri kabꞌiꞌx che “ri Cananista”, kꞌisbꞌal re, e Judas aj Iscariot, ri xkꞌayin re ri Jesús.
23491	MAT 10:5	Ri Jesús xebꞌutaq bꞌi ri kabꞌlajuj y e pixabꞌanik waꞌ xuya bꞌi chike: «Mixꞌek pa taq ri luwar ke ri na e ta aj judiꞌabꞌ, mixok ne pa taq ri tinamit re Samaria.
23501	MAT 10:15	Ma paqatzij wi kambꞌiꞌij chiwe: Chupa ruqꞌijol ri qꞌatbꞌal tzij, más lik kꞌax ri kape pakiwi ri tinamit na xkikꞌul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.
23535	MAT 11:7	Ekꞌuchiriꞌ xebꞌek rike, ri Jesús xujeq kachꞌaꞌt puwi ri Juan chike ri winaq, jewaꞌ xubꞌiꞌij: «¿Saꞌ ri xeꞌila alaq pa ri luwar katzꞌintzꞌotik? ¿Xeꞌila nebꞌa alaq jun achi na jinta ukowil xa pachaꞌ tani kajabajoꞌx ruma ri tew?
23536	MAT 11:8	¿Saꞌ ri xeꞌila alaq? ¿Xeꞌila nebꞌa alaq jun achi uwiqom ribꞌ rukꞌ chomilaj kꞌul? Na e ta riꞌ, ma etaꞌam alaq ri lik kewiqiqik, riꞌ pa kocho e aj wach ejeqel wi.
23537	MAT 11:9	Kantzꞌonoj kꞌu riꞌ: ¿Saꞌ ri xeꞌila alaq? ¿Xeꞌila alaq jun qꞌalajisanel? Areꞌ, yey paqatzij wi kambꞌiꞌij che alaq: Rire e más kꞌo uwach chikiwa ri jujun chik qꞌalajisanelabꞌ.
23549	MAT 11:21	«¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom chi kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis.
23550	MAT 11:22	E uwariꞌche kambꞌiꞌij chiwe: Echiriꞌ kopon ri qꞌij re ri qꞌatbꞌal tzij, más nim ri kꞌaxkꞌobꞌik kape piwi riꞌix chwa ri kꞌaxkꞌobꞌik kape pakiwi ri winaq re ri tinamit Tiro y ri tinamit Sidón.
23551	MAT 11:23	»Yey ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax. Ma we ta pa ri tinamit Sodoma xilitaj wi wa milagros xinꞌan chiwach riꞌix ix aj Capernaúm, riꞌ laꞌ la tinamit kꞌa kꞌo tane woꞌora.
23552	MAT 11:24	Ekꞌu kambꞌiꞌij waꞌ chiwe: Pa ri qꞌij re ri qꞌatbꞌal tzij, lik nim ri kꞌaxkꞌobꞌik kape piwi riꞌix chwa ri xpe pakiwi ri winaq re ri tinamit Sodoma» xchaꞌ.
23584	MAT 12:26	Jekꞌulaꞌ, we ta ri Satanás karesaj bꞌi ri Satanás chike ri winaq, riꞌ e pachaꞌ kachꞌoꞌjin chiribꞌil ribꞌ y utukel kujach upa rutaqanik. ¿Saꞌ kꞌu uꞌanik riꞌ kanajtir rutaqanik?
23587	MAT 12:29	»Tape alaq: ¿Suꞌanik kok juna eleqꞌom pa rocho junoq lik kꞌo uchuqꞌabꞌ yey kareleqꞌaj kꞌu lo rubꞌitaq re pa ja, we na kuyut ta nabꞌe ri rajaw ja? Ma we releqꞌom uyutum chi ri rajaw ja, kꞌa ekꞌuchiriꞌ utz kareleqꞌaj bꞌi ronoje la kꞌo pa ri ja.
23590	MAT 12:32	China ri tzel kachꞌaꞌt chirij Ralaxel Chikixoꞌl Tikawex, riꞌ kakuytaj umak we kutzelej utzij. Noꞌj ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak che waꞌ wa qꞌij oj kꞌo wi y na kakuytaj tane kꞌana umak tobꞌ ne che ruqꞌijol ri kꞌaslemal katajin loq.
23592	MAT 12:34	¡Ralaq pachaꞌ alaq jupuq chi kumatz! ¿Suꞌanik kꞌu riꞌ kachꞌaꞌtibꞌej alaq ri utz we itzel kꞌuꞌx alaq? Ma rukꞌ ruchꞌaꞌtem ri tikawex kaqꞌalajin ronoje ri ukꞌolom chupa ri ranimaꞌ.
23600	MAT 12:42	»Jekꞌulaꞌ echiriꞌ kopon ri qꞌij re ri qꞌatbꞌal tzij, kayaktaj lo ri reina re pa sur y kukoj kimak ri tikawex re waqꞌij ora. Ma rojertan lik naj petinaq wi rire chaꞌ koluꞌxikinaj runaꞌoj ri rey Salomón. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Salomón, yey na kebꞌok tane il che.
23618	MAT 13:10	Ekꞌu rutijoꞌn xeqibꞌ rukꞌ ri Jesús y xkitzꞌonoj che: —¿Suꞌbꞌe kakꞌutun la chikiwach ri winaq rukꞌ taq kꞌambꞌal naꞌoj? —xechaꞌ.
23662	MAT 13:54	Echiriꞌ xopon pa rutinamit, xujeq kakꞌutun chiriꞌ pa ri sinagoga. Ekꞌu ri winaq lik xkam kanimaꞌ che y xkibꞌiꞌij: —¿Pa xuꞌmaja wi waꞌchi luꞌnaꞌoj? ¿Suꞌanik kuꞌan taq wa milagros?
23663	MAT 13:55	¿Na e ta nebꞌa ukꞌajol waꞌ ri jun carpintero yey ralabꞌ ri María? ¿Na e ta nebꞌa katzixel ri Jacobo, ri José, ri Simón y ri Judas?
23697	MAT 14:31	Na jampatana ri Jesús xuchapalaꞌ pan che ruqꞌabꞌ y xubꞌiꞌij che: —Pedro, ¡na nim ta kꞌana ri kubꞌulibꞌal akꞌuꞌx wukꞌ! ¿Suꞌbꞌe xuxiꞌij ribꞌ akꞌuꞌx? —xchaꞌ.
23704	MAT 15:2	—¿Suꞌchak ri tijoꞌn la kakipalajij ri kikꞌutuꞌn kan ri qatiꞌ-qamam? Ma rike na kakichꞌaj ta ri kiqꞌabꞌ nabꞌe na echiriꞌ kewaꞌik —xechaꞌ.
23705	MAT 15:3	Ekꞌu ri Jesús xutzꞌonoj chike: —¿Suꞌchak ralaq kapalajij alaq Rutzij Upixabꞌ ri Dios ruma e kaꞌan alaq taq ri kikꞌutuꞌn kan ri mam alaq?
23723	MAT 15:21	Ri Jesús xel bꞌi chiriꞌ y xopon pa taq ri luwar re Tiro y re Sidón.
23749	MAT 16:8	Ri Jesús xretaꞌmaj saꞌ ri kakichꞌaꞌtibꞌej chikiwach, xubꞌiꞌij kꞌu chike: —¡E riꞌix na nim ta kꞌana ri kubꞌulibꞌal ikꞌuꞌx wukꞌ! ¿Suꞌchak e kubꞌisoj ikꞌuꞌx ri na jinta pam iwukꞌaꞌam loq?
23757	MAT 16:16	Ekꞌu ri Simón Pedro xubꞌiꞌij che: —Rilal lal ri Cristo, lal Rukꞌajol ri Dios kꞌaslik —xchaꞌ.
23758	MAT 16:17	Ri Jesús xukꞌul uwach: —Lik nim aqꞌij awalaxik riꞌat Simón at ukꞌajol ri Jonás; ma na e ta juna tikawex xqꞌalajisan waꞌ chawe, e ri Nuqaw kꞌo chilaꞌ chikaj.
23764	MAT 16:23	Ekꞌu ri Jesús xutzuꞌ lo uwach ri Pedro y xubꞌiꞌij che: —¡Chatel chinuwach, Satanás! Riꞌat at latzꞌanel chwe, ma na e ta kachꞌobꞌ puwi ri uchꞌobꞌom lo ri Dios, xew e kachꞌobꞌ jelaꞌ pachaꞌ ri kakichꞌobꞌ ri winaq —xchaꞌ.
23779	MAT 17:10	Ekꞌuchiriꞌ, rutijoꞌn xkitzꞌonoj che: —¿Suꞌbꞌe kꞌut kakibꞌiꞌij raj kꞌutunel re ri tzijpixabꞌ: “Lik chirajawaxik wi kakꞌun na ri Elías nabꞌe”? —xechaꞌ.
23788	MAT 17:19	Tekꞌuchiriꞌ, rutijoꞌn ri Jesús xeqibꞌ rukꞌ re kechꞌaꞌt rukꞌ kitukel y xkitzꞌonoj kꞌu che: —¿Suꞌbꞌe riꞌoj na xqachꞌij ta resaxik bꞌi waꞌ wa itzel uxlabꞌixel? —xechaꞌ.
23808	MAT 18:12	¿Saꞌ kichꞌobꞌ riꞌix kuꞌan juna achi we kꞌo jun ciento ubꞌexex yey kasach kꞌu junoq chike? ¿Na kebꞌukꞌol ta nebꞌa kan riꞌ ri noventa y nueve y keꞌek chwa ri juyubꞌ che utzukuxik ri jun xsach kanoq?
23838	MAT 19:7	Ekꞌuchiriꞌ, xkitzꞌonoj che: —¿Suꞌchak kꞌu riꞌ ri Moisés xubꞌiꞌij we juna achi karaj kujach bꞌi ri rixoqil, xew chuyaꞌa bꞌi ruwujil re jachbꞌal ibꞌ che y jekꞌulaꞌ na rixoqil ta chik? —xechaꞌ.
23848	MAT 19:17	Ri Jesús xukꞌul uwach: —¿Suꞌbꞌe kabꞌiꞌij la “utz” chwe? Ma xa jun ri lik utz kꞌolik, waꞌ e ri Dios. Yey we kaꞌaj la kok la pa ri kꞌaslemal na jinta utaqexik rukꞌ Rire, e taqej la Rutzij Upixabꞌ —xchaꞌ.
23851	MAT 19:20	Rachi xubꞌiꞌij che ri Jesús: —Ronoje waꞌ nuꞌanom lo chwi nuchꞌutiꞌnal. ¿Saꞌ kꞌu riꞌ ri kꞌa chirajawaxik chwe kanꞌano? —xchaꞌ.
23858	MAT 19:27	Ekꞌuchiriꞌ, xubꞌiꞌij ri Pedro che: —Qajawal, riꞌoj qayaꞌom kan ronoje y oj teran chiꞌij la. ¿Saꞌ kꞌu riꞌ ri kaqakꞌul riꞌoj? —xchaꞌ.
23867	MAT 20:6	»Laj che kꞌu ri uroꞌ ora bꞌenaq qꞌij, xel tanchi ubꞌi y xebꞌuꞌriqa lo jujun chik na jinta kakiꞌano. Xubꞌiꞌij kꞌu chike: “¿Suꞌchak riꞌix ix kꞌo wara y na jinta kꞌo xiꞌan wa jun qꞌij?”
23882	MAT 20:21	Ri Jesús xutzꞌonoj che: —¿Saꞌ ri kaꞌaj la? —xchaꞌ. Rixoq xukꞌul uwach: —Wajawal, yaꞌa la chike wa kebꞌ walabꞌ ketzꞌuyiꞌ ukꞌ la pa ri taqanik la, jun pawikiqꞌabꞌ la y ri jun chik, pa mox la —xchaꞌ.
23893	MAT 20:32	Ekꞌuchiriꞌ, xtakꞌiꞌ ri Jesús, xebꞌusikꞌij y xutzꞌonoj chike: —¿Saꞌ ri kiwaj kanꞌan chiwe? —xchaꞌ.
23900	MAT 21:5	Chibꞌiꞌij chike ri e aj Sion: “Chiwilapeꞌ, ri Rey iweꞌix kakꞌun iwukꞌ, uꞌanom lo chꞌutiꞌn che ribꞌ; ukojom lo jun buru, waꞌ jun qꞌapoj buru, ral jun awaj aj eqaꞌn” xchaꞌ.
23920	MAT 21:25	¿China kꞌu xtaqaw re ri Juan kuya ri bautismo? ¿E ri Dios o e rachijabꞌ? —xchaꞌ. Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios xtaqaw re”, riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe.
23959	MAT 22:18	Ri Jesús, ruma retaꞌam ri retzelal kikꞌuꞌx, jewaꞌ xubꞌiꞌij chike: —¡Xa kebꞌ palaj alaq! ¿Suꞌchak kakꞌam alaq nupa?
23983	MAT 22:42	—¿Saꞌ ri kachꞌobꞌ alaq chwi ri Cristo, Ruchaꞌoꞌn lo ri Dios? ¿China che upetebꞌem wi lo rire? —xchaꞌ. Xkikꞌul kꞌu uwach: —E ralkꞌoꞌal kan ri rey David —xechaꞌ.
23986	MAT 22:45	Ekꞌu ri David kubꞌiꞌij “Wajawal” che Ruchaꞌoꞌn lo ri Dios. ¿Suꞌbꞌe kꞌu riꞌ kabꞌiꞌxik e Ralkꞌoꞌal kan ri rey David? —xchaꞌ.
24006	MAT 23:19	»¡Sachinaq ri naꞌoj alaq y alaq potzꞌ! ¿Pachike ri más kꞌo uwach? ¿E ri qasaꞌn o e raltar ri kuꞌan santo che ri qasaꞌn?
24020	MAT 23:33	»¡Ralaq pachaꞌ alaq jupuq chi kumatz! ¿Suꞌanik kesaj ibꞌ alaq chuxeꞌ ri qꞌatbꞌal tzij re ri Dios echiriꞌ kutaq bꞌi alaq chi xibꞌalbꞌaꞌ?
24041	MAT 24:15	»E uwariꞌche echiriꞌ kiwil riꞌix ri lik chꞌul y lik kꞌixbꞌal uwach kayaꞌ chupa ri Luwar Santo, jelaꞌ pachaꞌ ri xutzꞌibꞌaj kan ri qꞌalajisanel Daniel; (china kꞌu ri kajilan re waꞌ, chumaja usukꞌ),
24129	MAT 26:6	Ri Jesús kꞌo pa ri tinamit Betania chirocho ri Simón, ri jun xkꞌojiꞌ ri yabꞌil lepra che.
24131	MAT 26:8	Echiriꞌ xkil waꞌ rutijoꞌn, lik xpe koyowal che y jewaꞌ xkibꞌiꞌij chikiwach: —¿Suꞌchak wa kunabꞌal xtzꞌiloꞌxik?
24133	MAT 26:10	Ekꞌu ri Jesús retaꞌam saꞌ ri kakibꞌiꞌij chikiwach; ruma kꞌu riꞌ, jewaꞌ xubꞌiꞌij chike: —¿Suꞌchak kixchꞌaꞌt chirij ri xuꞌan wiꞌxoq? Ma ri xuꞌan chwe e jun utzilaj chak.
24138	MAT 26:15	y jewaꞌ xubꞌiꞌij chike: —¿Saꞌ ri kaya alaq chwe we kanya ri Jesús paqꞌabꞌ alaq? —xchaꞌ. Ekꞌu rike xkibꞌiꞌij kakitoj treinta saqil puaq re plata che.
24178	MAT 26:55	Ekꞌuchiriꞌ, xubꞌiꞌij chike ri soldados: —¿Suꞌchak petinaq alaq rukꞌ espada y cheꞌ? ¿Petinaq kami alaq che ukꞌamik bꞌi juna eleqꞌom? Wa petinaq loq ronoje qꞌij waꞌ kꞌut in tzꞌuyiꞌnaq chiwach alaq, e laꞌ kinkꞌutun pa ri Rocho Dios. ¿Suꞌchak kꞌu riꞌ kꞌa e laꞌ kinoꞌlchapa alaq?
24185	MAT 26:62	Ewi ri kajawal raj chakunel pa Rocho Dios xyaktajik y xubꞌiꞌij che ri Jesús: —¿E kami laꞌ na jinta kꞌana kabꞌiꞌij riꞌat? ¿Saꞌ kꞌu ri kakꞌulubꞌej uwach puwi wa ketajin che ukojik chawij? —xchaꞌ.
24189	MAT 26:66	¿Saꞌ kꞌu riꞌ kabꞌiꞌij ralaq che? —xchaꞌ. Rike xkibꞌiꞌij: —Lik chirij umak y taqal kꞌu che kakamisaxik —xechaꞌ.
24221	MAT 27:23	Ekꞌu riꞌ ri Pilato xubꞌiꞌij chike: —¿Saꞌ kꞌu rumak uꞌanom? —xchaꞌ. Pero ri winaq más ko xesikꞌinik: —¡Kamisax chwa cruz! —xechaꞌ.
24230	MAT 27:32	Echiriꞌ katajin kelik bꞌi, xkikꞌul jun achi aj Cirene, Simón rubꞌiꞌ, y xkitaq che kutelej bꞌi ri cruz re ri Jesús.
24235	MAT 27:37	Chwi kꞌu lo rucruz ri Jesús tzꞌibꞌitalik suꞌbꞌe xqꞌat tzij puwiꞌ, jewaꞌ kubꞌiꞌij: «E JESÚS WAꞌ, RI REY KE RAJ JUDIꞌABꞌ.»
24283	MAT 28:19	Ruma kꞌu waꞌ, jix kukꞌ konoje rukꞌiyal kiwach taq ri tinamit che ruwachulew, chiꞌana kꞌu e nutijoꞌn chike y chiyaꞌa ri bautismo chike pa rubꞌiꞌ ri Qaqaw Dios, Rukꞌajol y ri Santowilaj Ruxlabꞌixel.
24292	MRK 1:8	Paqatzij wi, riꞌin xinya ri bautismo che alaq rukꞌ yaꞌ; noꞌj ri bautismo kuya Rire che alaq, e rukꞌ ri Santowilaj Ruxlabꞌixel ri Dios» kachaꞌ.
24297	MRK 1:13	Ri Jesús xkꞌojiꞌ chilaꞌ cuarenta qꞌij chikixoꞌl itzel taq awaj. Yey chupa taq laꞌ la qꞌij, lik xkꞌam upa ruma ri Satanás. Ikꞌowinaq chi kꞌu waꞌ, ri ángeles xkijeq kakinimaj ri Jesús.
24300	MRK 1:16	Echiriꞌ kabꞌin ri Jesús chuchiꞌ ri mar re Galilea, xeril pan ri Simón rukꞌ ruchaqꞌ Andrés, e riꞌ kakikꞌaq ri ki atarraya chupa ri yaꞌ, ma rike e aj chapal kar.
24308	MRK 1:24	—Lal Jesús, aj Nazaret, ¿suꞌchak koꞌlmina ibꞌ la qukꞌ? ¿E laꞌ lal petinaq re koꞌlsacha la qawach? Riꞌin wetaꞌam lal chinoq, lal ri Santo Kꞌajolaxel re ri Dios —xchaꞌ.
24311	MRK 1:27	Konoje kꞌu ri tikawex lik xkam kanimaꞌ che y kakitzꞌonobꞌej taq chikiwach: «¿Saꞌ waꞌ? ¿Saꞌ chi kꞌakꞌ kꞌutunik waꞌ? Ma kꞌo ne puqꞌabꞌ kataqan pakiwi itzelilaj uxlabꞌixel y waꞌ kakikoj utzij» kechaꞌ.
24313	MRK 1:29	Echiriꞌ ri Jesús kukꞌ ri Jacobo y ri Juan xebꞌel bꞌi chupa ri sinagoga, xebꞌek chirocho ri Simón y ri Andrés.
24314	MRK 1:30	Ekꞌu ruchu-ujiꞌ ri Simón kꞌo chwa uwarabꞌal, kꞌo aqꞌ chirij. Xkitzijoj kꞌu riꞌ waꞌ che ri Jesús.
24320	MRK 1:36	Ekꞌu ri Simón kukꞌ ri rachbꞌiꞌil xebꞌek che utzukuxik.
24336	MRK 2:7	«¿Suꞌchak jewaꞌ kachꞌaꞌt waꞌchi? Rukꞌ wa kubꞌiꞌij kamakun chirij ri Dios. Ma ¿na xew ta nebꞌa ri Dios aj kuyul mak?»
24337	MRK 2:8	Chupa kꞌu laꞌ la joqꞌotaj, ri Jesús xunaꞌbꞌej saꞌ la kakichꞌobꞌo; ruma kꞌu riꞌ, xubꞌiꞌij chike: —¿Suꞌchak jelaꞌ katajin chikꞌuꞌx alaq?
24338	MRK 2:9	¿Saꞌ kꞌu ri na kꞌayew taj kambꞌiꞌij che rachi sik: “Ronoje ramak kuytajinaq chik” o “Chatyaktajoq, chakꞌama bꞌi rachꞌat y chatbꞌinoq”?
24345	MRK 2:16	Ekꞌu raj kꞌutunel re ri tzijpixabꞌ kukꞌ ri fariseos, echiriꞌ xkilo kawaꞌ ri Jesús kukꞌ raj makibꞌ y raj tzꞌonol puaq re tojonik, xkibꞌiꞌij chike rutijoꞌn ri Jesús: —¿Suꞌchak ri tijonel iwe riꞌix kawaꞌ junam kukꞌ raj tzꞌonol puaq re tojonik yey kukꞌ raj makibꞌ? —xechaꞌ.
24347	MRK 2:18	Rutijoꞌn ri Juan Aj Yaꞌl Bautismo y ri kitijoꞌn ri fariseos echiriꞌ e kꞌo pa ayuno, xebꞌopon rukꞌ ri Jesús y xkitzꞌonoj che: —¿Suꞌbꞌe rutijoꞌn ri Juan y ri kitijoꞌn ri fariseos lik kakiꞌan ayuno, yey ri tijoꞌn rilal na kakiꞌan ta waꞌ? —xechaꞌ.
24361	MRK 3:4	Ekꞌuchiriꞌ, xutzꞌonoj chike ri kakitzutzaꞌ: —¿Saꞌ ri lik usukꞌ kaꞌaniꞌ pa ri qꞌij re uxlanibꞌal: E kaꞌaniꞌ ri utz o e ri na utz taj? ¿Utz kakolobꞌex rukꞌaslem junoq o kayaꞌ luwar che kakamik? —xchaꞌ. Yey na jinta kꞌu junoq chike xkꞌuluw uwach.
24365	MRK 3:8	y pa ri tinamit Jerusalem; e petinaq pa taq ri tinamit re Idumea, pa taq ri tinamit e kꞌo chꞌaqa yaꞌ che ri nimayaꞌ Jordán, yey pa taq ri tinamit e kꞌo chunaqaj ri tinamit Tiro y ri tinamit Sidón. Konoje waꞌ e petinaq ruma xkito janipa ri katajin ri Jesús che uꞌanik.
24373	MRK 3:16	Ekꞌu kibꞌiꞌ waꞌ wa kabꞌlajuj xebꞌuchaꞌo: Simón ri xkoj Pedro che,
24375	MRK 3:18	Andrés, Felipe, Bartolomé, Mateo, Tomás, Jacobo rukꞌajol ri Alfeo, Tadeo, Simón, ri kabꞌiꞌx che “ri Cananista”,
24380	MRK 3:23	Ekꞌu ri Jesús xebꞌusikꞌij y rukꞌ kꞌambꞌal naꞌoj xubꞌiꞌij chike: «¿Saꞌ nawi we ta ri Satanás karesaj bꞌi ri Satanás chike ri winaq?
24383	MRK 3:26	Jekꞌulaꞌ, we ta ri Satanás kayaktaj chiribꞌil ribꞌ y utukel kujach upa rutaqanik, riꞌ na kanajtir ta rutaqanik, xa kasach uwach.