23236	MAT 1:23	Chitanapeꞌ: Jun chomilaj qꞌapoj ali kakanaj yewaꞌ ixoq y kalax jun ralabꞌ. Ekꞌu rubꞌiꞌ kabꞌiꞌxik: Emanuel xchaꞌ. Waꞌ keꞌelawi “Dios xoꞌljeqel qukꞌ”.
23246	MAT 2:8	Tekꞌuchiriꞌ, xebꞌutaq bꞌi Belén, jewaꞌ xubꞌiꞌij chike: —Oj alaq y lik tzukuj alaq chi utz ri ralko akꞌa. We xriq kꞌu alaq, koꞌlbꞌiꞌij alaq chwe pa kꞌo wi chaꞌ jelaꞌ kinꞌek riꞌin y kiꞌnloqꞌnimaj uqꞌij —xchaꞌ.
23270	MAT 3:9	»Y machꞌobꞌ ne alaq chi ibꞌil ibꞌ alaq waꞌ: “Riꞌoj utz qaꞌanom, ma oj ralkꞌoꞌal kan ri Abraham.” Ma riꞌin kambꞌiꞌij che alaq: We xraj ri Dios, utz kuꞌan ralkꞌoꞌal ri Abraham tobꞌ ne che taq waꞌbꞌaj.
23281	MAT 4:3	Xqibꞌ kꞌu ritzel winaq rukꞌ ri Jesús re kukꞌam upa chaꞌ katzaq pa mak, jewaꞌ xubꞌiꞌij che: —We qatzij at Ukꞌajol ri Dios, chat-taqan che chaꞌ taq waꞌbꞌaj kuꞌan wa —xchaꞌ.
23284	MAT 4:6	Xubꞌiꞌij kꞌu che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew y na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij. Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.
23291	MAT 4:13	Xel bꞌi pa ri tinamit Nazaret y xeꞌjeqela pa ri tinamit Capernaúm. Waꞌ jun tinamit kꞌo chuchiꞌ ri mar pa ri luwar re Zabulón y re Neftalí.
23299	MAT 4:21	Xbꞌin kꞌu pan jubꞌiqꞌ chik y xeril chi pan kebꞌ achijabꞌ kichaqꞌ kibꞌ, jun Jacobo rubꞌiꞌ y ri jun chik Juan rubꞌiꞌ. Wa kaꞌibꞌ e ukꞌajol ri Zebedeo. Rike e kꞌo chupa jun barco junam rukꞌ ri kiqaw y ketajin che ukꞌojoxik ri ki atarraya. Ekꞌu ri Jesús xebꞌusikꞌij bꞌi.
23302	MAT 4:24	Konoje ri e kꞌo pa taq ri tinamit re Siria xketaꞌmaj taq ri kuꞌan ri Jesús. Xekikꞌam kꞌu lo chwach Rire konoje ri tikawex rukꞌ taq ukꞌiyal kꞌaxkꞌolil. Waꞌ e ri e kꞌo pa yabꞌil, ri kꞌax kikꞌulumam, ri e kꞌo pakiqꞌabꞌ itzel uxlabꞌixel, ri kebꞌumaj tew y ri e sik. Ekꞌu ri Jesús xebꞌukunaj konoje.
23303	MAT 4:25	Lik e kꞌi kꞌu ri xeterej bꞌi chirij. Waꞌ e petinaq Jerusalem y che jujun chik luwar re Judea, kukꞌ ri e petinaq pa taq ri tinamit re Galilea, re Decápolis y che jujun chik tinamit e kꞌo chꞌaqa yaꞌ che ri nimayaꞌ Jordán.
23316	MAT 5:13	»Wara che ruwachulew riꞌix lik kixajawax chike ri tikawex jelaꞌ pachaꞌ ratzꞌam lik kajawaxik. Yey we xsach rutzayul ratzꞌam, ¿suꞌanik tanchi kaꞌan tza che? Riꞌ na jinta chi kꞌana uchak; keꞌkꞌaq kꞌu bꞌi y kaxajaxoꞌx kan uwiꞌ kuma ri tikawex.
23328	MAT 5:25	»We kꞌo junoq kukoj amak y katukꞌam bꞌi pa qꞌatbꞌal tzij, nabꞌe chaꞌana pan utzil chomal rukꞌ pa bꞌe chaꞌ jelaꞌ na katuꞌyaꞌa ta chi puqꞌabꞌ raj qꞌatal tzij. Ma we na xaꞌan ta riꞌ, raj qꞌatal tzij katuya bꞌi puqꞌabꞌ ri ausiliar chaꞌ katuꞌyaꞌa pa cárcel.
23331	MAT 5:28	»Noꞌj riꞌin kambꞌiꞌij chiwe: We kꞌo junoq karil juna ixoq y kurayij uwach re kamakun rukꞌ, riꞌ ya xmakun rukꞌ pa ranimaꞌ.
23333	MAT 5:30	We e raqꞌabꞌ uwikiqꞌabꞌ ri katzaqisan awe pa ri mak, chaqꞌataꞌ y chakꞌaqa bꞌi; ma xa ne kuya riꞌ e kajam jun che raqꞌabꞌ, chwa ri katkꞌaq bꞌi rukꞌ ronoje racuerpo chi xibꞌalbꞌaꞌ re tijbꞌal kꞌax.
23334	MAT 5:31	»Jenewaꞌ xbꞌiꞌx lo ojertan: “We juna achi karaj kujach bꞌi ri rixoqil, xew chuyaꞌa bꞌi ruwujil re jachbꞌal ibꞌ che.”
23335	MAT 5:32	»Noꞌj riꞌin kambꞌiꞌij: We rachi kuya bꞌi ruwujil re jachbꞌal ibꞌ che ri rixoqil tobꞌ rixoq na makuninaq ta chirij ri kꞌulanikil, riꞌ e kumin ri rixoqil pa ri mak. Ma we rixoq jachom bꞌi kukꞌam jun chik achi, kamakun kꞌu riꞌ chirij ri kꞌulanikil. Yey e rachi kakꞌuliꞌ rukꞌ rixoq jachom bꞌi, riꞌ jenelaꞌ kamakun chirij ri kꞌulanikil.
23340	MAT 5:37	E chibꞌiꞌij ri jusukꞌ. We lik qatzij, xew chibꞌiꞌij: “Qatzij.” We na qatzij taj, xew chibꞌiꞌij: “Na qatzij taj.” Ma ri kakojiꞌ uwiꞌ ri kabꞌiꞌxik, waꞌ rukꞌ ritzel winaq petinaq wi.
23341	MAT 5:38	»Riꞌix itom ri xbꞌiꞌx lo ojertan: We kꞌo junoq kupuchꞌ rawach, riꞌ taqal che kapuchꞌ ri riꞌre. We kꞌo junoq kutor bꞌi juna aweꞌ, riꞌ taqal che kator bꞌi ri riꞌre.
23342	MAT 5:39	»Noꞌj riꞌin kambꞌiꞌij chiwe: Miꞌan ukꞌaxel che ri kuꞌan ri na utz taj chiwe. We kꞌo kꞌu junoq kupachꞌ qꞌabꞌ xeꞌ aweꞌ pawikiqꞌabꞌ, chayaꞌa luwar che kupachꞌ ri pa mox.
23343	MAT 5:40	We kꞌo junoq katuchap pa chꞌaꞌoj pa qꞌatbꞌal tzij re kumaj rakoton, asu chayaꞌa ne kan raqꞌuꞌ re pisbꞌal awij che.
23344	MAT 5:41	We kꞌo junoq katumin bꞌi chuxeꞌ eqaꞌn chaꞌ kaweqaj bꞌi jun kilómetro che, asu kebꞌ kilómetro chaweqaj bꞌi che.
23345	MAT 5:42	Chatsipan che ri nibꞌaꞌ we kutzꞌonoj toꞌbꞌal chawe. We kꞌo junoq kachiqꞌiman chawe, maꞌan xuꞌyal che.
23350	MAT 5:47	We xew kiya rutzil kiwach ri iwatz-ichaqꞌ riꞌix, ¿saꞌ kꞌu riꞌ ri utz kixtajin che uꞌanik? Ma jenelaꞌ kakiꞌan ri na ketaꞌam ta uwach ri Dios.
23371	MAT 6:20	We kiwaj kiriq ri saqil bꞌeyomalil, e chiꞌana wara che ruwachulew janipa ri lik kꞌo uchak chwach ri Dios chaꞌ jelaꞌ kꞌo kutiqoj chiwe riꞌix chilaꞌ chikaj. Ma ri ikꞌolom chilaꞌ na kapokꞌir taj y na kuꞌan ta mojos, yey na jinta ne eleqꞌomabꞌ kebꞌok che releqꞌaxik bꞌi.
23407	MAT 7:22	Kopon kꞌu ruqꞌijol echiriꞌ ri Dios kuqꞌat tzij pakiwi ri tikawex, yey chupa laꞌ la qꞌij lik e kꞌi ri kakibꞌiꞌij chwe: “Wajawal, Wajawal, riꞌoj xqaꞌan qꞌalajisanik chupa ri bꞌiꞌ la chike ri tikawex. Yey chupa ri bꞌiꞌ la xeqesaj bꞌi ri itzel uxlabꞌixel y pa ri bꞌiꞌ la xqaꞌan ukꞌiyal milagros” kechaꞌ.
23416	MAT 8:2	Tekꞌuchiriꞌ, xopon jun achi kꞌo ri yabꞌil lepra che, xuxuk ribꞌ chwach ri Jesús y xubꞌiꞌij che: —Wajawal, we kaꞌaj ko la, josqꞌij la ri nucuerpo che wa yabꞌil —xchaꞌ.
23420	MAT 8:6	jewaꞌ kubꞌiꞌij: —Wajawal, ri waj chak lik yewaꞌ kꞌo chwa uwarabꞌal chiwocho. Rire xuꞌan sik y lik kꞌo pa kꞌax —kachaꞌ.
23422	MAT 8:8	Ekꞌu ri capitán xubꞌiꞌij che: —Wajawal, riꞌin lik na taqal ta chwe kok la chiwocho. Xew bꞌiꞌij la: “Chatkunutajoq”, y rukꞌ ri chꞌaꞌtem la, kakunutaj ri waj chak.
23423	MAT 8:9	Ma e pachaꞌ riꞌin, in kꞌo puqꞌabꞌ jun taqanel y rire ebꞌuyaꞌom ukꞌiyal soldados panuqꞌabꞌ. We kambꞌiꞌij kꞌu che junoq “Jat”, keꞌek; o kambꞌiꞌij che junoq chik “Chatpetoq”, kapetik. Yey we kambꞌiꞌij che juna waj chak “Chaꞌana waꞌ”, kuꞌano —xchaꞌ.
23435	MAT 8:21	Kꞌo chi jun chike rutijoꞌn xubꞌiꞌij che ri Jesús: —Wajawal, yaꞌa la luwar chwe kanwoyꞌej kakam na ri nuqaw y kanmuq kanoq; tekꞌuchiriꞌ, kinterej chiꞌij la —xchaꞌ.
23445	MAT 8:31	Ekꞌu ri itzel uxlabꞌixel lik xebꞌelaj che ri Jesús: —We kojesaj bꞌi la, yaꞌa la luwar chiqe kojok bꞌi kukꞌ ri aq —xechaꞌ.
23450	MAT 9:2	E kꞌo kꞌu jujun achijabꞌ xkikꞌam lo jun achi sik chwach ri Jesús, kitelem lo chwa jun chꞌat. Echiriꞌ ri Jesús xril ri kubꞌulibꞌal kikꞌuꞌx rukꞌ, xubꞌiꞌij che rachi sik: —Wal, chanimarisaj akꞌuꞌx, ma ronoje ramak kuytajinaq chik —xchaꞌ.
23451	MAT 9:3	E kꞌo kꞌu jujun chike raj kꞌutunel re ri tzijpixabꞌ jewaꞌ xkichꞌobꞌo: «Wa jun achi lik kamakun chirij ri Dios, ma na yaꞌtal ta puqꞌabꞌ junoq kubꞌiꞌij waꞌ.»
23466	MAT 9:18	Echiriꞌ katajin ri Jesús che ubꞌiꞌxikil taq waꞌ, xkꞌun lo jun achi aj wach re ri tinamit, xuxuk ribꞌ chwach y xubꞌiꞌij che: —Ri numiꞌal lik kꞌa e laꞌ xkamik. We ta rilal keꞌek la wukꞌ y keꞌyaꞌa ri qꞌabꞌ la puwiꞌ, rire kakꞌastaj tanchik —xchaꞌ.
23494	MAT 10:8	»Chebꞌikunaj konoje ri yewaꞌibꞌ kukꞌ taq ri kꞌo ri yabꞌil lepra chike, chebꞌikꞌastajisaj ri ekaminaq y chebꞌiwesaj bꞌi itzel uxlabꞌixel. Wa chuqꞌabꞌ kikꞌul riꞌix e rutzil nukꞌuꞌx chiwe; jekꞌulaꞌ mitzꞌonoj rajil ri chak kiꞌan rukꞌ.
23499	MAT 10:13	We kixkikꞌul kꞌu ri e kꞌo pa ri ja, kakanaj ri utzil chomal itzꞌonom kan pakiwiꞌ. Noꞌj we rike na kixkikꞌul taj, ri utzil chomal katzelej tanchi lo iwukꞌ.
23500	MAT 10:14	»We na kixkikꞌul taj y na kakaj tane kakita ri kitzijoj, chixelubꞌi chupa ri ja o pa ri tinamit yey chipupaꞌ kan rulew kꞌo che ri iwaqan.
23504	MAT 10:18	Wuma riꞌin, kixkikꞌam ne bꞌi chikiwach taq raj qꞌatal tzij y ri taqanelabꞌ. Rukꞌ kꞌu riꞌ waꞌ, utz kiqꞌalajisaj nuwach riꞌin chikiwach rike y chikiwach konoje taq ri tinamit che ruwachulew.
23511	MAT 10:25	Juna tijoꞌn kubꞌuloq we xuꞌana jelaꞌ pachaꞌ rutijonel y juna aj chak kubꞌuloq we xuꞌana pachaꞌ ri rajaw. We kabꞌiꞌx “Beelzebú” che ri kiqaw rakꞌalabꞌ, ¿makꞌuwariꞌ ri kabꞌiꞌx chike ri ralkꞌoꞌal?
23542	MAT 11:14	We kiwaj kꞌu riꞌix kikojo, ri Juan e ri Elías, ri jun bꞌiꞌtal chik kakꞌunik.
23546	MAT 11:18	»Jekꞌulaꞌ kakiꞌan taq ri winaq, ma echiriꞌ xkꞌun ri Juan Aj Yaꞌl Bautismo, rire lik kuꞌan ayuno y na kutij tane vino. Yey ri winaq kakibꞌiꞌij: “Waꞌ waꞌchi kꞌo puqꞌabꞌ jun itzel uxlabꞌixel” kechaꞌ.
23547	MAT 11:19	»Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey taq ri winaq kakibꞌiꞌij: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik y raj makibꞌ” kechaꞌ. Noꞌj kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.
23557	MAT 11:29	Chiyaꞌa iwibꞌ chuxeꞌ ri nuyuku kankoj riꞌin chiwe. Chimaja kꞌu iweꞌix chwij, ma riꞌin utz nukꞌuꞌx y na kanꞌan ta nim che wibꞌ chiwach. We kiꞌan kꞌu riꞌ waꞌ, kiriq na ri utzil chomal piwanimaꞌ.
23565	MAT 12:7	We ta riꞌix imajom usukꞌ saꞌ keꞌelawi ri kubꞌiꞌij ri Dios chupa Ruchꞌaꞌtem: Ri lik kuaj Riꞌin chiwe e ri kꞌutubꞌal re ri kꞌaxnaꞌbꞌal kꞌuꞌxaj, na e ta ri kakamisax awaj re qasaꞌn chinuwach kachaꞌ; we ta kꞌu lik kimaj usukꞌ waꞌ, riꞌ na kiqꞌat ta tzij pakiwi ri na jinta mak kiꞌanom.
23576	MAT 12:18	E waj chak waꞌ, ri Jun nuchaꞌom loq. Riꞌin lik kꞌax kannaꞌo y lik kinkiꞌkot rukꞌ. Kanya kꞌu ri Wuxlabꞌixel puwi Rire chaꞌ kutzijoj ri lik usukꞌ kanꞌan Riꞌin chikiwach konoje taq ri tinamit che ruwachulew.
23582	MAT 12:24	Ekꞌu ri fariseos echiriꞌ xkita waꞌ, xkibꞌiꞌij: «Waꞌ wa jun achi kebꞌeresaj bꞌi ri itzel uxlabꞌixel ruma ruchuqꞌabꞌ ri Beelzebú, ri kajawal ri itzel uxlabꞌixel» xechaꞌ.
23583	MAT 12:25	Ri Jesús retaꞌam saꞌ ri kakichꞌobꞌo; ruma kꞌu riꞌ, xubꞌiꞌij chike: «We ri taqanelabꞌ re juna tinamit kijachom kipa ruma kechꞌoꞌjin chikiwach, riꞌ na kanajtir ta ri kitaqanik. Yey we ri ejeqelel pa juna tinamit o pa juna ja kijachom kipa ruma kechꞌoꞌjin chikiwach, riꞌ na ketikiꞌ ta chi utz.
23585	MAT 12:27	»Ralaq kabꞌiꞌij alaq riꞌin kebꞌenuwesaj bꞌi taq ri itzel uxlabꞌixel rukꞌ ruchuqꞌabꞌ ri Beelzebú. We ta e riꞌ, ¿china kꞌu kayaꞌw kichuqꞌabꞌ riꞌ ri e tijoꞌn alaq chaꞌ kekesaj bꞌi taq ri itzel uxlabꞌixel? ¿Rukꞌ nawi ruchuqꞌabꞌ ritzel winaq kakiꞌano? Tzꞌonoj kꞌu alaq riꞌ chike ri e tijoꞌn alaq we e uꞌanom riꞌ.
23607	MAT 12:49	Ekꞌuchiriꞌ, rukꞌ ruqꞌabꞌ xebꞌukꞌut rutijoꞌn y xubꞌiꞌij: —Wa e kꞌo wara e nuchu y e taq nuchaqꞌ riꞌ.
23636	MAT 13:28	»Yey ri rajaw ri tikoꞌn xubꞌiꞌij chike: “Kꞌo junoq laꞌ tzel kinrilo xoluꞌtika chupa.” Xkibꞌiꞌij kꞌu ri raj chakibꞌ che: “We kaꞌaj la, keꞌqamichꞌa ronoje raqꞌes chupa.”
23694	MAT 14:28	Ekꞌuchiriꞌ, xchꞌaw pan ri Pedro che, jewaꞌ xubꞌiꞌij: —Wajawal, we qatzij e rilal, bꞌiꞌij la chwe kinꞌek ukꞌ la, e laꞌ kimbꞌin chwi ri mar kꞌa pa kꞌo wi la —xchaꞌ.
23696	MAT 14:30	Pero echiriꞌ xril ruchuqꞌabꞌ ri kaqjiqꞌ, xok xiꞌin ibꞌ rukꞌ y xujeq e riꞌ kamuqutajik. Xsikꞌin kꞌu pan riꞌ che ri Jesús, jewaꞌ xubꞌiꞌij: —¡Chinkolobꞌej la, Wajawal! —xchaꞌ.
23706	MAT 15:4	Ma ri Dios jewaꞌ xtaqan che: Chaloqꞌoj kiqꞌij rachu-aqaw yey We kꞌo junoq kebꞌuyaj ruchu-uqaw rukꞌ itzel chꞌaꞌtem, riꞌ lik taqal che kakamisaxik xcha ri Dios.
23710	MAT 15:8	Waꞌ wa tinamit xa rukꞌ ruwakeꞌ kakiyak nuqꞌij, noꞌj ri kanimaꞌ lik naj kꞌo wi chwe.
23715	MAT 15:13	Ri Jesús xukꞌul uwach: —Waꞌ waꞌchijabꞌ na jinta runaꞌoj ri Dios kukꞌ, pachaꞌ e tikoꞌn na e ta tikom ruma ri Nuqaw kꞌo chilaꞌ chikaj; ruma kꞌu riꞌ, kamichꞌ bꞌi kꞌa pa ratzꞌayaq.
23724	MAT 15:22	Kꞌo kꞌu jun ixoq aj Canaán jeqel chiriꞌ, rire kasikꞌinik xkꞌun chwach ri Jesús, jewaꞌ kubꞌiꞌij: —¡Wajawal, lal ri Ralkꞌoꞌal kan ri rey David, chinjuchꞌ kaꞌn ko cheꞌla! Ma kꞌo jun walit lik kꞌax ukꞌulumam ruma kꞌo puqꞌabꞌ jun itzel uxlabꞌixel —xchaꞌ.
23727	MAT 15:25	Noꞌj rixoq xqibꞌ rukꞌ ri Jesús, xuxuk ribꞌ chwach y xubꞌiꞌij che: —¡Wajawal, chintoꞌo ko la! —xchaꞌ.
23729	MAT 15:27	Xubꞌiꞌij kꞌu rixoq: —Qatzij, Wajawal, pero ri tzꞌiꞌ kakitij ne rukꞌaj ri wa katzaq chuxeꞌ rumexa ri kajaw —xchaꞌ.
23736	MAT 15:34	Ri Jesús xutzꞌonoj chike: —¿Janipa chi pam kꞌo iwukꞌ? —xchaꞌ. Rike xkibꞌiꞌij: —Wuqubꞌ pam kꞌo qukꞌ y jujun raltaq ko kar —xechaꞌ.
23744	MAT 16:3	Echiriꞌ anim tan, kabꞌiꞌij alaq: “Waqꞌij lik na utz ta ri qatiempo. ma kaq ruwa kaj y qꞌeqmuj.” ¡Ralaq xa kebꞌ palaj alaq! Ma kariq alaq uchꞌobꞌik chi utz saꞌ ruꞌanom ruwa kaj, yey na kamaj tane alaq usukꞌ saꞌ taq ri katajin ri Dios che ukꞌutik chiwach alaq waqꞌij ora.
23763	MAT 16:22	Ekꞌu ri Pedro xresaj bꞌi ri Jesús chikixoꞌl y xuchꞌaꞌbꞌej upa, jewaꞌ xubꞌiꞌij che: —¡Wajawal, lik ne muya luwar riꞌ ri Dios e kakꞌulumaj la waꞌ! —xchaꞌ.
23765	MAT 16:24	Ekꞌuchiriꞌ, xubꞌiꞌij ri Jesús chike rutijoꞌn: —We kꞌo junoq karaj katerej lo chwij, lik chirajawaxik che muꞌan xew ri karaj rire, e chukuyu ri kꞌax kape puwiꞌ ruma ukojom ri nubꞌiꞌ, y tereja lo chwij.
23770	MAT 17:1	Waqibꞌ qꞌij kꞌu ubꞌiꞌxikil riꞌ waꞌ echiriꞌ ri Jesús xebꞌuchaꞌ ri Pedro, ri Jacobo y ri Juan ruchaqꞌ ri Jacobo; y xebꞌukꞌam bꞌi chwa jun nimalaj juyubꞌ.
23773	MAT 17:4	Ekꞌu ri Pedro xubꞌiꞌij che ri Jesús: —Qajawal, lik utz xyaꞌtaj chiqe riꞌoj oj kꞌo wara. We kaꞌaj la, kaqaꞌan oxibꞌ rancho: jun e la, jun re ri Moisés y jun re ri Elías —xchaꞌ.
23784	MAT 17:15	—Wajawal, kꞌutu ko ri kꞌaxnaꞌbꞌal kꞌuꞌx la che ri nukꞌajol, ma rire xa kumaj tew y lik kutij kꞌax ruma waꞌ; ukꞌiyal laj tzaqinaq pa aqꞌ y pa yaꞌ.
23789	MAT 17:20	Ri Jesús xubꞌiꞌij chike: —E ruma na nim ta ri kubꞌulibꞌal ikꞌuꞌx rukꞌ ri Dios. We ta ri kubꞌulibꞌal ikꞌuꞌx kakꞌiyik jelaꞌ pachaꞌ ri kakꞌiy rijaꞌ re moxtasa, utz ne riꞌ kibꞌiꞌij che wa juyubꞌ: “Chatela bꞌi wara y chatqꞌax pan jelaꞌ”, y e kuꞌanaꞌ. Riꞌ na jinta kꞌayew chiwach riꞌix we ta lik kꞌo kubꞌulibꞌal ikꞌuꞌx.
23799	MAT 18:3	Xubꞌiꞌij kꞌu chike: —Paqatzij wi kambꞌiꞌij chiwe: We na kijalkꞌatij ta ribꞌinik isilabꞌik chaꞌ kixuꞌan pachaꞌ raltaq ko akꞌalabꞌ, na kixok ta riꞌ chupa rutaqanik ri Dios petinaq chilaꞌ chikaj.
23809	MAT 18:13	We xuriq kꞌut, paqatzij wi kambꞌiꞌij chiwe: E más kakiꞌkot ruma ri jun bꞌexex chikiwa ri noventa y nueve na e ta sachinaq.
23811	MAT 18:15	»E uwariꞌche, we rawatz-achaqꞌ kuꞌan ri na utz taj chawe, chatchꞌaꞌt rukꞌ e laꞌ itukel; chabꞌiꞌij che saꞌ ri na utz taj uꞌanom chawe. We xatuta kꞌut, riꞌ xakoj chi utzil chomal rawatz-achaqꞌ.
23813	MAT 18:17	We na xebꞌuta ta kꞌu wa kebꞌ oxibꞌ, ekꞌuchiriꞌ chatzijoj chikiwach rutinamit ri Dios. Yey we na xok ta kꞌu il chike waꞌ, chiꞌana kꞌu riꞌ che pachaꞌ e kukꞌil ri na ketaꞌam ta uwach ri Dios y e kukꞌil raj tzꞌonol puaq re tojonik.
23815	MAT 18:19	Kambꞌiꞌij kꞌu chiwe: We e kꞌo kaꞌibꞌoq chiwe wara che ruwachulew kuꞌan junam kikꞌuꞌx chwi ri kakitzꞌonoj pa oración, ri Nuqaw kꞌo chilaꞌ chikaj kuya na chike.
23817	MAT 18:21	Ekꞌuchiriꞌ, ri Pedro xqibꞌ rukꞌ ri Jesús y xutzꞌonoj che: —Wajawal, ¿janipa laj kankuy umak juna watz-nuchaqꞌ we xuꞌan ri na utz taj chwe? ¿Kꞌa pa wuqubꞌ laj nawi? —xchaꞌ.
23839	MAT 19:8	Ri Jesús xubꞌiꞌij chike: —Waꞌ e ruma lik ko ri animaꞌ alaq. Ruma laꞌ ri Moisés xuya luwar kayaꞌiꞌ ruwujil re jachbꞌal ibꞌ; noꞌj che lo ri jeqebꞌal ruwachulew na je ta laꞌ ri xraj ri Dios.
23841	MAT 19:10	Ekꞌu rutijoꞌn xkibꞌiꞌij che: —We jelaꞌ kukꞌulumaj rachi rukꞌ ri kꞌulanikil, más ne utz riꞌ we junoq na kakꞌuliꞌ taj —xechaꞌ.
23852	MAT 19:21	Ri Jesús xubꞌiꞌij che: —We kaꞌaj la e kaꞌan la janipa ri karaj ri Dios che ri bꞌinik silabꞌik la, kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ, peta la, terej lo la chwij y kuyu la ri kꞌax kape pawiꞌ la ruma lal nutijoꞌn —xcha che.
23856	MAT 19:25	Echiriꞌ xkita waꞌ rutijoꞌn, lik xkam kanimaꞌ che y xkitzꞌonoj chikiwach: —We e riꞌ, ¿china kꞌu riꞌ ri kakolobꞌetajik? —xechaꞌ.
23873	MAT 20:12	jewaꞌ xkibꞌiꞌij che: “Waꞌ wa xebꞌok bꞌenaq qꞌij chik, xa jun ora xechakunik yey xetoj la junam qukꞌ riꞌoj, tobꞌ kꞌu riꞌ riꞌoj xqakuy lo rukꞌatanil ri qꞌij” xechaꞌ.
23874	MAT 20:13	»Noꞌj ri rajaw chak xukꞌul uwach, jewaꞌ xubꞌiꞌij che jun chike: “Wamigo, mabꞌiꞌij we na usukꞌ ta ri xinꞌan chawe. ¿Na xojkanaj ta nebꞌa laꞌ katintoj jun denario?
23882	MAT 20:21	Ri Jesús xutzꞌonoj che: —¿Saꞌ ri kaꞌaj la? —xchaꞌ. Rixoq xukꞌul uwach: —Wajawal, yaꞌa la chike wa kebꞌ walabꞌ ketzꞌuyiꞌ ukꞌ la pa ri taqanik la, jun pawikiqꞌabꞌ la y ri jun chik, pa mox la —xchaꞌ.
23898	MAT 21:3	We kꞌo kꞌu junoq kutzꞌonoj chiwe saꞌ ri kiꞌano, jewaꞌ chibꞌiꞌij che: “Rawaj kebꞌajawax che ri Qajawal, yey kꞌate kutaq tanchi uloq” kixchaꞌ.»
23908	MAT 21:13	Xubꞌiꞌij kꞌu chike: «Ri Dios jewaꞌ kubꞌiꞌij chupa Ruchꞌaꞌtem: Che ri Wocho kabꞌiꞌxik: “E luwar re oración” kachaꞌ. Noꞌj ralaq ꞌanom alaq che ri Wocho e jun luwar ke eleqꞌomabꞌ» xchaꞌ.
23916	MAT 21:21	Ri Jesús xukꞌul uwach: —Paqatzij wi kambꞌiꞌij chiwe: We ta lik kꞌo kubꞌulibꞌal ikꞌuꞌx rukꞌ ri Dios y na kebꞌ ta kꞌana ipa rukꞌ, riꞌ na xew ta jewaꞌ kiꞌan riꞌix pachaꞌ wa xinꞌan riꞌin che ri higo. Ma utz ne riꞌ kibꞌiꞌij che wa juyubꞌ: “Chatela wara y jateꞌkꞌola chupa ri mar” kixchaꞌ y e kuꞌano.
23919	MAT 21:24	Ri Jesús xukꞌul uwach: —Riꞌin kanꞌan jun tzꞌonobꞌal che alaq. We xkꞌul alaq uwach chwe, kambꞌiꞌij kꞌu riꞌ che alaq china yaꞌyom panuqꞌabꞌ kanꞌan waꞌ.
23920	MAT 21:25	¿China kꞌu xtaqaw re ri Juan kuya ri bautismo? ¿E ri Dios o e rachijabꞌ? —xchaꞌ. Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios xtaqaw re”, riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe.
23933	MAT 21:38	»Noꞌj raj tunulel echiriꞌ xkil uwach rukꞌajol, jewaꞌ xkibꞌiꞌij chikiwach: “Waꞌ e ukꞌajol ri rajaw rulew, ri kuꞌana na rajaw we xkam ruqaw. Joꞌ jeꞌqakamisaj chaꞌ rulew kuꞌan kan qeꞌoj” xechaꞌ.
23937	MAT 21:42	Tekꞌuchiriꞌ, xubꞌiꞌij ri Jesús chike: —¿Na ajilam ta nebꞌa ralaq ri tzꞌibꞌital kan chupa Ruchꞌaꞌtem ri Dios? Ma jewaꞌ kubꞌiꞌij: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja. Waꞌ e ri Dios Qajawxel xꞌanaw re y riꞌoj lik kakam qanimaꞌ che kachaꞌ.
23953	MAT 22:12	»Xubꞌiꞌij kꞌu che: “Wamigo, ¿chaꞌtaj xatok lo wara we na akojom ta raqꞌuꞌ re kꞌulanikil?” xchaꞌ. Noꞌj rachi na xchꞌaw ta kꞌenoq.
23954	MAT 22:13	»Ekꞌuchiriꞌ, xubꞌiꞌij ri rey chike ri keniman chwa ri mexa: “Wa jun achi na uwiqom ta ribꞌ, chiyutu taq ri raqan y ruqꞌabꞌ y chikꞌaqa bꞌi pa ri qꞌequꞌm. Chiriꞌ kꞌu riꞌ koqꞌ wi y kaqichꞌichꞌ wi ruwi reꞌ” xchaꞌ.
23965	MAT 22:24	jewaꞌ xkibꞌiꞌij: —Lal tijonel, ri Moisés xubꞌiꞌij kanoq: “We kꞌo juna achi xkamik yey na e jinta kan ralkꞌoꞌal, ekꞌu riꞌ ruchaqꞌ kakꞌuliꞌ rukꞌ rixoq malkaꞌn kanoq y jekꞌulaꞌ kekꞌojiꞌ ralkꞌoꞌal rukꞌ pubꞌiꞌ ri ratz xkamik” xchaꞌ.
23979	MAT 22:38	Waꞌ e nabꞌe tzijpixabꞌ lik chirajawaxik y e ukꞌuꞌxibꞌal Rutzij Upixabꞌ ri Dios.
23984	MAT 22:43	Ekꞌuchiriꞌ, ri Jesús xutzꞌonoj chike: —¿Chaꞌtaj kabꞌiꞌx che ri Cristo e ralkꞌoꞌal kan ri David? Ma ruma ri Ruxlabꞌixel ri Dios, ri David xubꞌiꞌij “Wajawal” che ri Cristo echiriꞌ rire xubꞌiꞌij:
23985	MAT 22:44	Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.
23986	MAT 22:45	Ekꞌu ri David kubꞌiꞌij “Wajawal” che Ruchaꞌoꞌn lo ri Dios. ¿Suꞌbꞌe kꞌu riꞌ kabꞌiꞌxik e Ralkꞌoꞌal kan ri rey David? —xchaꞌ.
24003	MAT 23:16	»Lik toqꞌoꞌ wach ralaq alaq pachaꞌ potzꞌ kꞌamal kiwach jujun chik, ma kabꞌiꞌij alaq: “We kꞌo junoq kujikibꞌaꞌ uwach juna tzij pa rubꞌiꞌ ri Rocho Dios, riꞌ na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri oro re ri Rocho Dios, riꞌ chirajawaxik che kuꞌan janipa ri ubꞌiꞌim” kacha alaq.
24005	MAT 23:18	Jenewaꞌ ri kabꞌiꞌij ralaq: “We kꞌo junoq kujikibꞌaꞌ uwach juna tzij pa rubꞌiꞌ raltar, na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri qasaꞌn kꞌo chwi raltar, riꞌ chirajawaxik che kuꞌan janipa ri ubꞌiꞌim” kacha alaq.
24010	MAT 23:23	»¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kaya alaq che ri Dios ri diezmo alaq re ri arweno, re ri anix y re ri kominox. Noꞌj na kok ta alaq il che rukꞌuꞌxibꞌal ri Tzij Pixabꞌ re ri Dios: Waꞌ e ri kaꞌan alaq ri usukꞌ, ri kakꞌut alaq ri kꞌaxnaꞌbꞌal kꞌuꞌx alaq chike jujun chik y ri kakubꞌiꞌ kꞌuꞌx alaq rukꞌ ri Dios. Lik chirajawaxik kꞌu riꞌ kaꞌan alaq taq waꞌ, junam rukꞌ ri kaya ri diezmo alaq.
24017	MAT 23:30	Yey kabꞌiꞌij kꞌu alaq: “We ta oj kꞌo chi riꞌoj echiriꞌ xekꞌasiꞌ ri qatiꞌ-qamam ojertan, na kaqaꞌan ta qeꞌoj riꞌ kukꞌ ri xekamisan ri qꞌalajisanelabꞌ” kacha alaq. Pero ¡na e ta kꞌana uꞌanom!
24048	MAT 24:22	We ta ri Qaqaw Dios na kuqꞌatij ta taq laꞌ la qꞌij re runimal kꞌaxkꞌobꞌik, riꞌ na jinta junoq kakꞌasiꞌ kanoq; pero ruma kꞌu kꞌax kebꞌunaꞌ ri ebꞌuchaꞌom, kuqꞌatij ruqꞌijol waꞌ.
24049	MAT 24:23	»We kꞌo kꞌu junoq riꞌ kabꞌiꞌn chiwe: “¡Chiwilapeꞌ, wara kꞌo wi ri Cristo!” o “¡Chiwilapeꞌ, leꞌ kꞌolik!”, mixok il che.
24086	MAT 25:9	»Noꞌj ri woꞌobꞌ chik jewaꞌ xkikꞌul uwach: “We kaqaya iwe riꞌix, na kuꞌan ta riꞌ qe qonoje. Jiꞌtzukuj kꞌu iweꞌix pa kakꞌayix wi y chiloqꞌoꞌ.”
24092	MAT 25:15	Che jun xuya kan woꞌobꞌ mil, che jun chik xuya kan kaꞌibꞌ mil y che jun chik xuya kan mil. Wa xyaꞌ kan chike e chirij ri kakichꞌij uchakuxik. Ekꞌuchiriꞌ, xeꞌek naj.