23214	MAT 1:1	Nga be tapiti rara ke Yesu Kirisi nga, ngan Yesu tani, in sasa ke Dawiti, inbe Dawiti in sasa ke Apram.
23215	MAT 1:2	Ngan rara tani in be tapiti le ipa ye Apram a ise nga, ngan nen. Apram ikere ngan le natunu la Esaka i. Inbe Esaka in Yakop tamana. Inbe Yakop in Yuda iye di toonoo le taini tamadi.
23216	MAT 1:3	Inbe Yuda tani in Peres iye Sarra yo tinadi Tamar nga, ngan tamadi. Inbe Peres in Esron tamana. Inbe Esron in Ram tamana.
23217	MAT 1:4	Inbe Ram in Aminadap tamana. Inbe Aminadap in Nason tamana. Inbe Nason in Salmon tamana.
23218	MAT 1:5	Inbe Salmon tani, in Boas yo tinana Reap i, in tamana. Inbe Boas in Obet yo tinana Rutu i, in tamana. Inbe Obet in Yesi tamana.
23219	MAT 1:6	Inbe Yesi in Dawiti yo iyei tool kuto mai pang tana kidi Isrel le imot i, in tamana. Inbe Dawiti tani in Solomon tamana. Ngan Solomon tinana in muku ngan Uria rimana.
23220	MAT 1:7	Inbe Solomon in Reoboam tamana. Inbe Reoboam in Abia tamana. Inbe Abia in Asa tamana.
23221	MAT 1:8	Inbe Asa in Yeosapet tamana. Inbe Yeosapet in Yeoram tamana. Inbe Yeoram in Usia tamana.
23222	MAT 1:9	Inbe Usia in Yotam tamana. Inbe Yotam in As tamana. Inbe As in Isikia tamana.
23223	MAT 1:10	Inbe Isikia in Manase tamana. Inbe Manase in Amon tamana. Inbe Amon in Yosaia tamana.
23224	MAT 1:11	Inbe Yosaia in Yekonia iye di taini tamadi. Ngan ye kene tani in di Babilon tikap di Yuda tina a la titar di ye tana yo kidi i.
23225	MAT 1:12	Inbe ye kene yo di Babilon tikap di Yuda tina a la titar di ye tana kidi nga, motong la Yekonia tani in iyei Seltiel tamana nga. Inbe Seltiel in Serubabel tamana.
23226	MAT 1:13	Inbe Serubabel in Abiut tamana. Inbe Abiut in Eliakim tamana. Inbe Eliakim in Asor tamana.
23227	MAT 1:14	Inbe Asor in Sadok tamana. Inbe Sadok in Akim tamana. Inbe Akim in Iliut tamana.
23228	MAT 1:15	Inbe Iliut in Iliesa tamana. Inbe Iliesa in Matan tamana. Inbe Matan in Yakop tamana.
23229	MAT 1:16	Inbe Yakop in Yosep tamana. Ngan Yosep tani in iyooloo Madia yo ipasuiu Yesu a tiweta ye Kirisi, tool tani yo Maro ipootoo be si ikap di tooltool ki a ipamulu di ye so dook tiap yo be igarung di i.
23230	MAT 1:17	Le rara tani in be tapiti a ipa ye Apram le ise ye Dawiti nga, ngan pudi sangaul be balana pai. Lo ngan be imadit ye Dawiti le ise ye kene yo di Babilon tikap di Yuda la titar di ye tana kidi nga, ngan di rara tina ngan pudi sangaul be balana pai. Lo ngan be imadit mulu ye kene yo tiyepe Babilon ye in le ise ye lal yo Kirisi pombe in nga, ngan di rara tina ngan pudi sangaul be balana pai lapau.
23231	MAT 1:18	Gasanga ke Yesu Kirisi yo tinana ipasuiu i, in ipa nen. Tinana yo Madia in titarkala pang Yosep be iyooloo, bong yaru tigaua tiao, inbe tikamata Madia tani in kapono ye kase yo Maro Amunu Silene ikauu panga i.
23232	MAT 1:19	Ngan nintooroo yo Yosep i, in tool noonoonoo, le lono be iwetewete Madia la mallangana a ipammoo la di tooltool le imot matadi tiap. Bong lon kaua urata be ole ipas le isukraii mos leu le ikino sollono.
23233	MAT 1:20	Bong tina yo lon kaua urata nen nga, le mooloo tiap inbe bangabangana ke Tool Mai atu isi pombe pang ye, ye mianga ki a iwete panga. Iyei ne, “Yosep, ong in Dawiti natunu. Kin kutattadai a lom kap gogo dada belebele leu ye yo be kouo Madia a kuyooloo, ngan be, yesoo kase yo kapono ye i, in Maro Amunu Silene la ikauu panga i.
23234	MAT 1:21	Le ole ipasuiu natunu tamoto, lo ngan be kusu ene ye Yesu, yesoo ya la be ole ipamulu di tooltool ki ye noonoo kidi yo be igarung di i.”
23235	MAT 1:22	Ngan so le imot yo pombe nga, ngan iyeie betanga ke Tool Mai yo muku ngan iweta pang Maro koonoo a iweta in le kanono pombe moolmool.
23236	MAT 1:23	Ngan betanga tani in nen, “Garup atu yo iye tamoto sa tipa pitiao i, in ole kapono a ipasuiu natunu tamoto, lo ngan be tisua ye Imanuel.” Ngan betanga tani yo Imanuel i, in punu ben, “Maro iyepe yidi.”
23237	MAT 1:24	Yosep imi nen, le kene yo imadit ye in nga, ngan le iyei ben tina yo bangabangana ke Tool Mai iwete panga nga. Le ila la ikaua Madia tani a iyooloo, a iyei rimana.
23238	MAT 1:25	Bong kene yo iyooloo ye in nga, ngan le yaru tipa le tiken touo pitiap le lo Madia ipasuiu natunu tamoto tani. Motong la Yosep isua ye Yesu nga.
23239	MAT 2:1	Ye kene yo Madia ipasuiu Yesu ye malala mai tiap Betlem ye tana mai ke Yudia ye in nga, ngan Erot iyei tool kuto mai pang tana mai yo Yudia i. Inbe ye kene tani in di tooltool ke be tikatmata kanpitiki ngan lodi kaua urata ye nga, ngan pattu ke ni yo ke ipa ye a ise i, ngan tilo pang Yerusalem
23240	MAT 2:2	lo tipa a titortor di tooltool nen. Tiyei ne, “Ai, kase mai tiap yo tinana ipasuiu a be iyei tool kuto mai pang di Yuda i, in iyepe ngai? Am nga amkamata kanpitiki iyei ben tarkilanga ki ye ni yo ke ipa ye a ise i, ngan nanga la amse be se amsung panga nga.”
23241	MAT 2:3	Tiwete betanga nen, le di tooltool pattu la tillaikoo pang Erot yo tool kuto mai i, in a ilongo, ngan le lon gurrungu le dook tiap yege. Inbe di tooltool ke Yerusalem yo tilongo betanga tani nga, ngan di le imot lodi gurrungu ye lapau.
23242	MAT 2:4	Ngan tina Erot ilongo betanga nen, le nga ikiu di tooltool maimai ke paroranga so pang Maro, inbe di pannoongoo ke ger ke Maro, ngan man tigaua. Motong la itor di nen, “Ai, ni yo Kirisi tinana ipasuiu ye i, in ngai?”
23243	MAT 2:5	Ngan tiraua betanga ki nen, “Ole tinana ipasuiu Betlem ye tana mai ke Yudia, yesoo muku ngan Maro koonoo iwodo betanga nen ilo ye rau ngan iwete nen,
23244	MAT 2:6	‘Ang di tooltool ke Betlem yo kayepe ye tana mai kidi Yuda nga, ngan malala kiang o ke be ipa mur mata ye di malala kapala yo edi maimai pang tana mai kidi Yuda, ngan tiap, yesoo tool yo be matan kala di tooltool kiau ke Isrel i, in ole pombe ye malala kiang.’”
23245	MAT 2:7	Tiwete pang Erot nen, motong la ikiu di tooltool yo ke be tikamata kanpitiki ngan lodi kaua urata ye nga, ngan sollono be man iye di leu tigaua, inbe itor panin di ye soo lal moolmool yo kanpitiki pombe ye i.
23246	MAT 2:8	Itor panin di a imot, motong la iwanga di be tila pang Betlem nga. Inbe iwete pang di nen, “Kala ngan kasere kase in dook le le kapuske. Le be kapuske nga, ngan palbe leu be man kawete pau a nen ngan au lapau la akamata, a asung panga.”
23247	MAT 2:9	Ngan di tooltool yo lodi kaua urata ye di kanpitiki nga, ngan tilongo betanga ke Erot a imot, motong la tiyege sila iyepe, inbe tipa mulu. Ngan le tikamata kanpitiki tani yo tikamata muku i, inbe titoo titoo le la tukbe ke ete le iken ye ni tani yo kase iyepe ye i.
23248	MAT 2:10	Ye kene tani, in di tooltool tina ngan tikamata kanpitiki tani yo la tukbe nga, le lodi ponana mai san.
23249	MAT 2:11	Motong la tilo rumu lono a lo tikamata kase tani iye tinana Madia, motong tigun turudi le du damodi toko tana, inbe tisung panga. Motong la tipolo lulu kidi a tikap so dook mata panga; so ben pat dook mata yo ene gol i, inbe so dook mata san yo tarungu lo ye ei ngan kutana ikini dook mata i, inbe so ke saliningi kini ki dook mata san yo tiwete ene ye mir i.
23250	MAT 2:12	Le nga tiyepe a nga tiken, ngan timi be Maro iwete pang di nen, be timulu a tila pang ye Erot be. Ngan la le titoo dada san a timulu a tidu pang ni kidi nga.
23251	MAT 2:13	Di tooltool tina ngan timulu a tidu, motong la bong a Yosep iken, ngan ikamata bangabangana ke Tool Mai ye mianga ki. Ngan bangabangana tani in iwete panga nen, “Yosep, kumadit a kouo kase in iye tinana a kakoo a kala pang tana mai Isip la kayepe nango le lo awete pong mulu ngan, yesoo Erot ni ngo ikapye be isere kase i le ipuske nga, ngan ole iraumate a imata.”
23252	MAT 2:14	Yosep tani in imi nen, le nga imadit tina le ikaua Madia iye natunu bong a tikoo pang Isip,
23253	MAT 2:15	a la tiyepe tiyepe le lo Erot tani in imata. Ngan nen le betanga yo Maro koonoo iwete nga, ngan kanono pombe moolmool. Muku ngan Maro koonoo tani in iwete nen, “Natuk tamoto iyepe Isip, le akiuu ngan la le iyege Isip a iman nga.”
23254	MAT 2:16	Erot itar tinini ngan tool sa mala be pombe pang ye a iwete panga tiap. Le nga lon tar nen, be di tooltool tina yo ke be lodi kaua urata ye kanpitiki nga, ngan o tillungu, le katen malmal dook tiap. Motong la iman tina le iwanga di tooltool ki ke patokongo be la tiraumatamata di kakase tamoto ke Betlem inbe di kakase tamoto kapala yo tiyepe potai pang Betlem yo rai kidi ru inbe isi pang lopo nga, ngan le imot. Yesoo, lal yo Yesu tinana ipasuiu ye i, in ikauu ye di tooltool yo lodi kaua urata ye kanpitiki, ngan oo.
23255	MAT 2:17	Ngan nen le betanga yo Maro koonoo Yedimia iweta i, in kanono pombe moolmool.
23256	MAT 2:18	Yedimia tani in iwete nen, “Tilongo tool atu itang meneng malala Rama ni, ngan itang le itang katkat dook tiap yege. Rakele la itang ye di natunu i, bong be tilele, ngan ilongo kidi tiap, yesoo di natunu tina ngan timmata a imot oo.”
23257	MAT 2:19	Yosep iye Madia tiyepe Isip le lo Erot imata, motong la bong atu ngan Yosep iken ngan imi be bangabangana ke Tool Mai atu iwete panga nen.
23258	MAT 2:20	Iyei ne, “Yosep, kumadit a kouo Madia iye natunu a kamulu pang ye tana kidi Isrel, yesoo di tooltool yo lodi be tiraumata kase i nga, ngan timmata oo.”
23259	MAT 2:21	Motong la Yosep imadit tina ngan le ikaua Madia iye natunu a timulu a tila pang ye tana kidi Isrel.
23260	MAT 2:22	Bong ngan Yosep ilongo be Erot natunu Akilus in iloni a iyei tool kuto mai pang tana mai Yudia. Le nga Yosep itattadai be imulu pang ni nga. Le ye mianga ki san mulu, ngan bangabangana ke Tool Mai iwete panga be ila pang ni be, bong be idik a ila pang ye tana mai san yo Galili i.
23261	MAT 2:23	Ngan tina ila nga, ngan le la iyepe ye malala atu yo ene Nasaret i. Ngan le iyeie betanga kidi Maro koonoo yo tiweta in le kanono pombe moolmool. Ngan betanga tani in iwete nen, “Ole tiweta be ya in tool ke Nasaret.”
23262	MAT 3:1	Ke kapala iman a ila, motong la ye ke atu in ngan Yowan yo irriu di tooltool i, in ipa le la pombe ye ni sorrakene atu ke tana mai Yudia, inbe iwetewete betanga ke Maro pang di tooltool.
23263	MAT 3:2	Ngan iwete pang di nen, “Kaportak lomim, yesoo ole mooloo tiap, inbe dada yo Maro be matan kala di tooltool ki ye i, in ole si pombe mallangana.”
23264	MAT 3:3	Yowan tani, in mukot ngan Maro koonoo yo Esai i, in iwetewete ye nen, “Ole kalongo tool atu kalngana ye ni sorrakene, in iwete le koonoo maimai nen, ‘Kakarata dada pang Tool Mai, inbe kayeii le tarantatu panga be ipa ye.’”
23265	MAT 3:4	Yowan tani in sousoungu ki ngan tikarata ye asara ke solanga burum yo ene kamel in bulbulini. Inbe iwittoo galini ye bittoongoo ki yo tikarata ye asara kulini i. E kaningi ki yo ikan nga, ngan ikan sis inbe iyin bagil surunu.
23266	MAT 3:5	Ye kene tani in di tooltool yo tipa pang ye nga, ngan kapala tipa ke Yerusalem, inbe ke malala maimai tiap ke Yudia nga le imot. Inbe di tooltool ke malala kapala le imot yo iken potai pang ye ran Yodan, ngan di lapau la timan pang ye nga.
23267	MAT 3:6	Di tooltool tina timan, motong la titulu lodi panga ye noonoo kidi, inbe irriu di ye ran Yodan.
23268	MAT 3:7	Bong yeisa be Yowan ikamata di tooltool ke budanga ru yo tiwete edi ye di Paresi le di Sedusi, ngan alunu timan pang ye a be man irriu di, motong la iwete pang di nen, “Ai, ang ngan ben moto dook tiap di natunu! Sei iwete be kayei nen ngan ole kasuru kate malmal ke Maro yo be pang dama ni ngan pombe i?
23269	MAT 3:8	Kumata le be kaportak lomim moolmool nga, ngan ole tikamatang ye dada kiang yo kayei nga ben ang ngan kaportak lomim moolmool.
23270	MAT 3:9	Inbe kin lomim tar be ang ngan tamamim la Apram i, a be nen ngan Maro igarungang tiap, ngan be. Awete pang nen, Maro ke be iportak di pat nga le tiyei ben Apram di natunu.
23271	MAT 3:10	Ngan matau nain la iken kai punu in. Ngan la kai le imot yo tipu ngan titar kanodi dook mata ngan tiap nga, ngan ole Maro itarakat di a ikatte di lo ei lono.
23272	MAT 3:11	“Ang di tooltool yo kaportak lomim nga, ngan au i arriu ang ye ran leu. Bong tool yo be itoo au a isi i, in gurana ki mai san le illosau. Ngan nen le akamatau ben au i tool dook mata ke be aloni ben poranga ki a akap loningi ke kene a ade in tiap. Ngan tool tani in ole irriu ang ye Maro Amunu Silene ipa ye ei.
23273	MAT 3:12	Ya in yoo ke pitiningi in iken ye baene, le ole itaurai dingding patunu ke kaningi le igaun yo kanono ngan ilo ye para ki, inbe kulini ngan idaun di ye ei yo ikan nen le taukan motingi i.”
23274	MAT 3:13	Ye kene tani yo Yowan irriu di tooltool ye in nga, ngan Yesu ipa ke Galili a iman pang ran Yodan be man Yowan irriuu lapau.
23275	MAT 3:14	Bong Yowan ikapye be ilele Yesu a iyei nen be. Le nga iwete panga nen, “Ai, au i la ke be kurriu au i. E nga yelei be kuman pang yau be man arriu ong nga?”
23276	MAT 3:15	Bong ngan Yesu iraua betanga ki nen, “Lom leu, inbe kuyei urata i nookoot nga, yesoo nga dook mata be aru tayei nen, a be nen ngan tatoo dada dook mata noonoonoo le imot yo Maro lono panga nga.” Ngan nen le Yowan ipas le itoo leu.
23277	MAT 3:16	Yowan irriuu a imot, motong Yesu imulu ke ran lono a ise pang ete, ngan pattu leu be lang katene koon panganga, inbe ikamata Maro Amunu Silene iro a isi pang ye ben bal utu be si iwot ye.
23278	MAT 3:17	Inbe iye di tooltool tina tilongo tool atu kalngana iwetewete ke malala ke Maro a isi nen. Iyei ne, “Tool in au natuk. Au i lok panga mai san, inbe lok ponana ye.”
23279	MAT 4:1	Motong la Maro Amunu Silene ipasongosongo Yesu be ila pang ye ni sorrakene atu, a be nen ngan la tool kuto mai kidi so sadi itoua.
23280	MAT 4:2	Ngan la Yesu ya taleu iyepe ye ni tani nga, ngan isapariuu le ikan so tiap ye ke le bong sangaul pai le pitolo welewele.
23281	MAT 4:3	Motong la tool dook tiap ke touanga i, in man pombe pang ye a iwete panga nen, “Ai, be ong i Maro natunu moolmool nga, ngan kuwete a pat nga tiportak le tiyei porong a kon.”
23282	MAT 4:4	Bong ngan Yesu iraua betanga ki nen, “Rau ke Maro iwete nen, ‘Porong leu la be itoko di tooltool ye yepongo kidi, in tiap, bong betanga le imot yo ipa ye Maro koonoo nga, ngan la itoko di tooltool ye yepongo kidi nga.’ ”
23283	MAT 4:5	Motong la tool kuto mai kidi so sadi tani in ikaua Yesu a yaru tilo ye malala mison ke Maro yo Yerusalem i, a lo ipatokode le ikodo bareme mai ke sungunu pono meneng ete ni, inbe iwete panga nen. Iyei ne,
23284	MAT 4:6	“Be ong i Maro natunu moolmool nga, ngan kupas le kudu tana ni, yesoo Rau ke Maro iwete nen, ‘Ole iwanga di bangabangana ki pong a tisipong ye baedi, a be nen ngan pat isolo kem katene be.’”
23285	MAT 4:7	Bong ngan Yesu iraua betanga ki nen, “Rau ke Maro iwete lapau nen, ‘Kin kutouo Maro yo Tool Mai kiong, in be.’ ”
23286	MAT 4:8	Motong la tool kuto mai kidi so sadi tani in ikaua Yesu mulu a yaru tilo kawal kutono meneng ete ni, a lo ipatnai malala le so matana matana ke tana mai i le imot yo dook mata nga, ngan panga.
23287	MAT 4:9	Motong la iwete panga nen, “Kumata be kugun turum le du damom toko tana, inbe kusung pau nga, ngan ole akap so nga le imot pong.”
23288	MAT 4:10	Bong ngan Yesu iraua betanga ki nen, “Satan, kukoo yau! Yesoo, Rau ke Maro iwete nen, ‘Kusung pang Maro yo Tool Mai kiong i, inbe kuraua panga ya taleu.’ ”
23289	MAT 4:11	Yesu iwete nen pang tool kuto mai kidi so sadi tani a ikoo ye, motong la di bangabangana ke Maro tisi a si tiloni.
23290	MAT 4:12	Ye kene yo Yesu ilongo bingi ke Yowan yo titaru lo rumu dook tiap kidi talnga dikidiki lono ye in nga, le nga imulu a ilo pang tana mai Galili.
23291	MAT 4:13	Ilo, ngan le iyege malala Nasaret, inbe la iyepe ye malala mai yo ene Kapenam i. Ngan malala mai Kapenam tani in iken potai pang ye ran Galili gigini, ye tana ke di rara kidi Sebulen le Naptali.
23292	MAT 4:14	Ngan ye dada tani yo Yesu iyeii nen i, in le iyeie betanga ke Maro koonoo Esai yo iweta in le kanono pombe. Ngan Esai tani in iyei ne,
23293	MAT 4:15	“Ang di rara ke Sebulen le Naptali nga kalongo. Ang ngan di tooltool yo kayepe pang ke tiek du nga, inbe ang ngan di tooltool yo kayepe potai pang ye ran Yodan koonoo kapala nga, inbe ang ngan di tooltool yo kayepe ye tana mai Galili ye ni yo di tooltool yo tipa ye di rara kidi Yuda tiap ngan tiyepe ye i.
23294	MAT 4:16	Di tooltool kiang yo tiyepe todo lono nga, ngan tikamata sul maiyoko. Inbe di tooltool kiang yo todo mai ke matenge iduk di nga, ngan sul tani in ilangarai di lapau.”
23295	MAT 4:17	Ye kene tani in Yesu ipamaditi urata ki ke be iwetewete bingi dook mata ke Maro pang di tooltool. Ngan le iwete pang di nen, “Kaportak lomim, yesoo mooloo tiap, inbe dada yo Maro be matan kala di tooltool ki ye i, in ole si pombe mallangana.”
23296	MAT 4:18	Motong la Yesu ipelele ran koonoo Galili a ila, ngan ikamata di tooltool ru, yaru ngan taidi le toodi. Ngan atu, in ene la Simon i, inbe tiwete ene san ye Pita, in iye taini yo Antares i. Yaru ngan tikatte pu kidi du ran lono a be tikap i ye, yesoo di ngan tiyei urata ye kaungu i be tiyawar a tikap pat ye.
23297	MAT 4:19	Bong ngan Yesu ipuske di nga, le nga iwete pang di nen, “Suru nga, kaman katoo au. Ang ngan di tooltool ke kaungu i, bong ole apatomonai ang ye urata ke kaungu di tooltool.”
23298	MAT 4:20	Yeisa be iwete pang di nen, ngan le pattu leu, inbe yaru tiyege pu kidi sila ikino, inbe titoo a tiye tila.
23299	MAT 4:21	Yesu iye di suru tina ngan tipa kasin a tila, inbe ikamata di tooltool ru mulu, ngan taidi le toodi lapau. Di tooltool ru tina, ngan atu ene la Yemis yo Sebedi natunu i, in iye taini Yowan. Di ngan tiye tamadi Sebedi tiyepe ookoo pono kidi a tikarata pu kidi, inbe Yesu ikamata di le nga koonoo pang di be titoo lapau.
23300	MAT 4:22	Yeisa be yaru tilongo tina yo koonoo pang di nga, ngan le pattu leu, inbe tiyege tamadi sila iyepe ye ookoo kidi tani, inbe yaru timadit a titoo Yesu a tila.
23301	MAT 4:23	Yesu ila ipa ye malala kapala ke tana mai Galili in le imot a ipatomonai di tooltool ye rumu kidi Yuda ke gaongo in lono, inbe iwetewete bingi dook mata pang di tooltool ye dada yo Maro be matan kala di tooltool ki ye i. Inbe ikarata di tooltool yo matamatenge matana matana ikap di nga, ngan le tinidi dook mata mulu.
23302	MAT 4:24	Ngan ye urata tina yo Yesu iyei nen nga, ngan bingi ki idada a iwakaia tana mai Siria in le imot a tilonga, le nga tikap di tooltool yo matamatenge matana matana ikap di ngan pang ye Yesu a be man iyei di le tinidi dook mata mulu. Le nga di tooltool yo tinidi massingi mai mata nga, inbe di tooltool yo so sadi idiwidiwi di nga, inbe di tooltool yo matadi taltalai ngan timol du tana a titangarur nga, inbe di tooltool yo tikap rama nga, ngan timan pang ye Yesu, inbe iyei di le tinidi dook mata mulu.
23303	MAT 4:25	Ngan tina tilongo bingi ke Yesu yo iyei urata nen nga, le nga di tooltool alunu le alunu san tipa ke Galili, inbe ke Dekapolis, inbe ke Yerusalem le tana mai Yudia, inbe di tooltool kapala tipa ke malala le imot yo iken ke ran Yodan koonoo kapala nga, ngan di le imot la tipa a titoo Yesu nga.
23304	MAT 5:1	Yesu ikamata di tooltool alunu tina timan pang ye nga, le nga ilo ye kawal atu madini a lo iwur, inbe di galiunu timan pang ye.
23305	MAT 5:2	Motong la imadit a be ipatomonai di, ngan le iwete nen,
23306	MAT 5:3	“Di tooltool yo lodi galanga ben di ngan ballingadi tiap ye so ke Maro nga, ngan lodi ponana, yesoo Maro ole iyei urata dook mata pang di a matan kala di.
23307	MAT 5:4	Inbe di tooltool yo lodi modoko nga, ngan lodi ponana, yesoo Maro ole iyei urata dook mata pang di a ipamede di.
23308	MAT 5:5	Inbe di tooltool yo pallongadi nga, ngan lodi ponana, yesoo Maro ole iyei urata dook mata pang di a ikaua tana mai i le imot pang di.
23309	MAT 5:6	Inbe di tooltool yo pitolo di le moorook di ye dada dook mata noonoonoo ke Maro nga, ngan lodi ponana, yesoo Maro ole iyei urata dook mata pang di a ipapon di ye.
23310	MAT 5:7	Inbe di tooltool yo lodi mulumulu ye di tooltool kapala a tiyei dada dook mata pang di nga, ngan lodi ponana, yesoo Maro ole iyei urata dook mata pang di a lon mulumulu ye di lapau.
23311	MAT 5:8	Inbe di tooltool yo lodi iken galangana nga, ngan lodi ponana, yesoo Maro ole iyei urata dook mata pang di le tikamata matana.
23312	MAT 5:9	Inbe di tooltool ke karatanga di tooltool kapala lodi a be tiyepe ye lo silene nga, ngan lodi ponana, yesoo Maro ole iyei urata dook mata pang di, inbe ole tikiu di be di ngan ya di natunu.
23313	MAT 5:10	Inbe di tooltool yo di tooltool kapala tikap malmal pang di a tigarung di ye yo titoo dada dook mata noonoonoo ke Maro nga, ngan lodi ponana, yesoo Maro ole iyei urata dook mata pang di a matan kala di.