23214	MAT 1:1	Nga be tapiti rara ke Yesu Kirisi nga, ngan Yesu tani, in sasa ke Dawiti, inbe Dawiti in sasa ke Apram.
23215	MAT 1:2	Ngan rara tani in be tapiti le ipa ye Apram a ise nga, ngan nen. Apram ikere ngan le natunu la Esaka i. Inbe Esaka in Yakop tamana. Inbe Yakop in Yuda iye di toonoo le taini tamadi.
23217	MAT 1:4	Inbe Ram in Aminadap tamana. Inbe Aminadap in Nason tamana. Inbe Nason in Salmon tamana.
23219	MAT 1:6	Inbe Yesi in Dawiti yo iyei tool kuto mai pang tana kidi Isrel le imot i, in tamana. Inbe Dawiti tani in Solomon tamana. Ngan Solomon tinana in muku ngan Uria rimana.
23224	MAT 1:11	Inbe Yosaia in Yekonia iye di taini tamadi. Ngan ye kene tani in di Babilon tikap di Yuda tina a la titar di ye tana yo kidi i.
23229	MAT 1:16	Inbe Yakop in Yosep tamana. Ngan Yosep tani in iyooloo Madia yo ipasuiu Yesu a tiweta ye Kirisi, tool tani yo Maro ipootoo be si ikap di tooltool ki a ipamulu di ye so dook tiap yo be igarung di i.
23232	MAT 1:19	Ngan nintooroo yo Yosep i, in tool noonoonoo, le lono be iwetewete Madia la mallangana a ipammoo la di tooltool le imot matadi tiap. Bong lon kaua urata be ole ipas le isukraii mos leu le ikino sollono.
23235	MAT 1:22	Ngan so le imot yo pombe nga, ngan iyeie betanga ke Tool Mai yo muku ngan iweta pang Maro koonoo a iweta in le kanono pombe moolmool.
23236	MAT 1:23	Ngan betanga tani in nen, “Garup atu yo iye tamoto sa tipa pitiao i, in ole kapono a ipasuiu natunu tamoto, lo ngan be tisua ye Imanuel.” Ngan betanga tani yo Imanuel i, in punu ben, “Maro iyepe yidi.”
23242	MAT 2:4	Ngan tina Erot ilongo betanga nen, le nga ikiu di tooltool maimai ke paroranga so pang Maro, inbe di pannoongoo ke ger ke Maro, ngan man tigaua. Motong la itor di nen, “Ai, ni yo Kirisi tinana ipasuiu ye i, in ngai?”
23243	MAT 2:5	Ngan tiraua betanga ki nen, “Ole tinana ipasuiu Betlem ye tana mai ke Yudia, yesoo muku ngan Maro koonoo iwodo betanga nen ilo ye rau ngan iwete nen,
23247	MAT 2:9	Ngan di tooltool yo lodi kaua urata ye di kanpitiki nga, ngan tilongo betanga ke Erot a imot, motong la tiyege sila iyepe, inbe tipa mulu. Ngan le tikamata kanpitiki tani yo tikamata muku i, inbe titoo titoo le la tukbe ke ete le iken ye ni tani yo kase iyepe ye i.
23250	MAT 2:12	Le nga tiyepe a nga tiken, ngan timi be Maro iwete pang di nen, be timulu a tila pang ye Erot be. Ngan la le titoo dada san a timulu a tidu pang ni kidi nga.
23251	MAT 2:13	Di tooltool tina ngan timulu a tidu, motong la bong a Yosep iken, ngan ikamata bangabangana ke Tool Mai ye mianga ki. Ngan bangabangana tani in iwete panga nen, “Yosep, kumadit a kouo kase in iye tinana a kakoo a kala pang tana mai Isip la kayepe nango le lo awete pong mulu ngan, yesoo Erot ni ngo ikapye be isere kase i le ipuske nga, ngan ole iraumate a imata.”
23253	MAT 2:15	a la tiyepe tiyepe le lo Erot tani in imata. Ngan nen le betanga yo Maro koonoo iwete nga, ngan kanono pombe moolmool. Muku ngan Maro koonoo tani in iwete nen, “Natuk tamoto iyepe Isip, le akiuu ngan la le iyege Isip a iman nga.”
23255	MAT 2:17	Ngan nen le betanga yo Maro koonoo Yedimia iweta i, in kanono pombe moolmool.
23261	MAT 2:23	Ngan tina ila nga, ngan le la iyepe ye malala atu yo ene Nasaret i. Ngan le iyeie betanga kidi Maro koonoo yo tiweta in le kanono pombe moolmool. Ngan betanga tani in iwete nen, “Ole tiweta be ya in tool ke Nasaret.”
23263	MAT 3:2	Ngan iwete pang di nen, “Kaportak lomim, yesoo ole mooloo tiap, inbe dada yo Maro be matan kala di tooltool ki ye i, in ole si pombe mallangana.”
23271	MAT 3:10	Ngan matau nain la iken kai punu in. Ngan la kai le imot yo tipu ngan titar kanodi dook mata ngan tiap nga, ngan ole Maro itarakat di a ikatte di lo ei lono.
23272	MAT 3:11	“Ang di tooltool yo kaportak lomim nga, ngan au i arriu ang ye ran leu. Bong tool yo be itoo au a isi i, in gurana ki mai san le illosau. Ngan nen le akamatau ben au i tool dook mata ke be aloni ben poranga ki a akap loningi ke kene a ade in tiap. Ngan tool tani in ole irriu ang ye Maro Amunu Silene ipa ye ei.
23276	MAT 3:15	Bong ngan Yesu iraua betanga ki nen, “Lom leu, inbe kuyei urata i nookoot nga, yesoo nga dook mata be aru tayei nen, a be nen ngan tatoo dada dook mata noonoonoo le imot yo Maro lono panga nga.” Ngan nen le Yowan ipas le itoo leu.
23280	MAT 4:2	Ngan la Yesu ya taleu iyepe ye ni tani nga, ngan isapariuu le ikan so tiap ye ke le bong sangaul pai le pitolo welewele.
23291	MAT 4:13	Ilo, ngan le iyege malala Nasaret, inbe la iyepe ye malala mai yo ene Kapenam i. Ngan malala mai Kapenam tani in iken potai pang ye ran Galili gigini, ye tana ke di rara kidi Sebulen le Naptali.
23292	MAT 4:14	Ngan ye dada tani yo Yesu iyeii nen i, in le iyeie betanga ke Maro koonoo Esai yo iweta in le kanono pombe. Ngan Esai tani in iyei ne,
23293	MAT 4:15	“Ang di rara ke Sebulen le Naptali nga kalongo. Ang ngan di tooltool yo kayepe pang ke tiek du nga, inbe ang ngan di tooltool yo kayepe potai pang ye ran Yodan koonoo kapala nga, inbe ang ngan di tooltool yo kayepe ye tana mai Galili ye ni yo di tooltool yo tipa ye di rara kidi Yuda tiap ngan tiyepe ye i.
23295	MAT 4:17	Ye kene tani in Yesu ipamaditi urata ki ke be iwetewete bingi dook mata ke Maro pang di tooltool. Ngan le iwete pang di nen, “Kaportak lomim, yesoo mooloo tiap, inbe dada yo Maro be matan kala di tooltool ki ye i, in ole si pombe mallangana.”
23296	MAT 4:18	Motong la Yesu ipelele ran koonoo Galili a ila, ngan ikamata di tooltool ru, yaru ngan taidi le toodi. Ngan atu, in ene la Simon i, inbe tiwete ene san ye Pita, in iye taini yo Antares i. Yaru ngan tikatte pu kidi du ran lono a be tikap i ye, yesoo di ngan tiyei urata ye kaungu i be tiyawar a tikap pat ye.
23302	MAT 4:24	Ngan ye urata tina yo Yesu iyei nen nga, ngan bingi ki idada a iwakaia tana mai Siria in le imot a tilonga, le nga tikap di tooltool yo matamatenge matana matana ikap di ngan pang ye Yesu a be man iyei di le tinidi dook mata mulu. Le nga di tooltool yo tinidi massingi mai mata nga, inbe di tooltool yo so sadi idiwidiwi di nga, inbe di tooltool yo matadi taltalai ngan timol du tana a titangarur nga, inbe di tooltool yo tikap rama nga, ngan timan pang ye Yesu, inbe iyei di le tinidi dook mata mulu.
23303	MAT 4:25	Ngan tina tilongo bingi ke Yesu yo iyei urata nen nga, le nga di tooltool alunu le alunu san tipa ke Galili, inbe ke Dekapolis, inbe ke Yerusalem le tana mai Yudia, inbe di tooltool kapala tipa ke malala le imot yo iken ke ran Yodan koonoo kapala nga, ngan di le imot la tipa a titoo Yesu nga.
23315	MAT 5:12	Bong be tiyei urata nen pang nga, ngan lomim ponana a kayoro, yesoo balingi ke urata kootoonoo kiang la inamang a iken ye malala ke Maro ngo. Ngan dada dook tiap kidi yo nen nga, ngan la muku ngan tiyei pang di Maro koonoo nga.
23322	MAT 5:19	Ngan nen le kumata be tooltool sa iwala murini pang betanga mai tiap atu yo iken ye ger ke Maro nga, too ipatomonai di tooltool kapala be tiyei dada gaongo nen i, in ole ene mai tiap ye di tooltool yo Maro be matan kala di nga. Bong sei tool yo itoo ger le betanga tina ke Mose nga le imot, inbe ipatomonai di tooltool ye a be titoo i, in ole ene mai ye di tooltool yo Maro be matan kala di nga.
23324	MAT 5:21	“Ang nga kalongo betanga yo muku ngan tiweta pang di sasa kiidi, in oo. Ngan betanga tani in nen, ‘Kin karaumata di tooltool be. Kumata le tool sa be iraumata tool atu nga, ngan ole tikauu lo tipatokode ye ni ke karatanga betanga a ikap masngana ye dada ki tani yo iyeii i.’
23326	MAT 5:23	“Ngan la kumata be kop so ke paroranga pang ni ke paroranga so, inbe lom tutu urata dook tiap yo muku ngan kuyei pang em a katen malmal pong nga,
23330	MAT 5:27	“Ang nga kalongo betanga yo muku ngan tiweta, in oo. Ngan betanga tani in nen, ‘Kin kayei bauk be.’
23332	MAT 5:29	“Le kumata be matam oonoo in iyolong le be kopsap ye noonoo nga, ngan kupaii a kotte. Ngan dook mata be kuyege tinim kapala a ikino, ngan la be tinim le imot in o ke be tikatte du ye malala ke masngana tiap nga.
23333	MAT 5:30	Inbe kumata be baem oonoo iyolong le kopsap ye noonoo nga, ngan kusaputu a kotte. Ngan dook mata be kuyege tinim kapala a ikino, ngan la be tinim le imot in o ke be tikatte du ye malala ke masngana tiap nga.
23334	MAT 5:31	“Ang nga kalongo betanga yo muku ngan tiweta, in oo. Ngan betanga tani in nen, ‘Kumata le tool atu lono be isukraia rimana nga, ngan ole ikaua rau yo tiwodo betanga ke parsukraingi ilo ye i, in pang rimana.’
23336	MAT 5:33	“Ang nga kalongo betanga yo muku ngan tiweta pang di sasa kiidi, in oo. Ngan betanga tani in nen, ‘Be kapamede betanga ye so atu be kayeii nga, ngan kin kagarungu be. Bong kayeie so tani yo kapamede betanga pang Tool Mai ye be ole kayeii i.’
23340	MAT 5:37	Ngan nanga, be nen ngan kapas le kayei ne, ‘E’ ngan ‘E’ le iken leu, too be kayei ne, ‘Tiap’ ngan ‘Tiap’ le iken leu. Bong be kawete betanga san mulu le ipa ye betanga yo be kawete nga, ngan betanga yo ngan ipa ye tool dook tiap Satan.
23341	MAT 5:38	“Ang nga kalongo betanga yo muku ngan tiweta, in oo. Ngan betanga tani in nen, ‘Kumata be tool atu igarungu ene matana nga, ngan ole kakaua tool tani in kootoonoo a kagarungu ene tani in matana lapau. Inbe kumata be tool atu iraukata ene dongana nga, ngan kakaua tool tani in kootoonoo a karaukata ene tani in dongana lapau.’
23346	MAT 5:43	“Ang nga kalongo betanga yo muku ngan tiweta, in oo. Ngan betanga tani in nen, ‘Lomim pang di diemim mai san, inbe lomim dook tiap pang di koi kiang.’
23348	MAT 5:45	Kumata be kayei dada nen nga, ngan ole tikamatang ben ang ngan Maro di natunu. Ngan ya in iyeie ke ki le isini ye di tooltool yo dook mata nga, inbe ye di tooltool yo dook tiap nga lapau. Inbe iyeie ki a imol pang di tooltool yo titoo dada dook mata noonoonoo ke Maro nga, inbe pang di tooltool yo titoo dada dook mata noonoonoo ki tiap, ngan lapau.
23351	MAT 5:48	Ngan nanga, ole katoo dada dook mata noonoonoo le imot, dawa ben Tamamim yo iyepe ye malala ki ete ni, in itoo dada dook mata noonoonoo le imot nga.”
23355	MAT 6:4	be nen ngan katarkoo dada dook mata kiang le iken sollono. Ngan la be Tamamim yo ikamata so yo iken sollono i, in ole ikap balingi pang ye urata kootoonoo kiang nga.
23357	MAT 6:6	Bong ang nga ye kene yo be kapatarau ye in nga, ngan kalo rumu lono kiang a katiukala dada, inbe kapatarau pang Tamamim yo ke be takamata tiap i. Ngan la be Tamamim yo ikamata so yo iken sollono i, in ole ikap balingi pang ye urata kootoonoo kiang nga.
23365	MAT 6:14	“Nen le kumata be di tooltool tiyei dada dook tiap ke noonoo pang nga, ngan kagiri noonoo kidi tina yo tiyei nga. Ngan la be Tamamim yo iyepe ye malala ki ete ni, in ole igiri noonoo kiang lapau nga.
23369	MAT 6:18	Ngan kayei nen a be nen ngan di tooltool lodi galanga yang ye yo kasapa ye kaningi so, ngan be. Bong Tamamim yo ke be takamata tiap i, in ya taleu la be lon galanga yang i. Tamamim tani yo lon galanga ye so yo iken sollono i, in ole ikap balingi pang ye urata kootoonoo kiang.
23372	MAT 6:21	Ngan la malala tani yo so dook mata kiang iken ye i, in ole kagaua lomim le imot pang ye lapau.
23373	MAT 6:22	“Ngan matamim ngan dawa ben sul. Le kumata be matamim igalanga dook mata nga, ngan ole sul nunngana ilangaraia tinimim mai i le imot inbe kakamata ni.
23374	MAT 6:23	Bong kumata be matamim igalanga tiap nga, ngan ole todo iduku tinimim mai i le imot inbe kakamata ni tiap. Ngan nanga, kumata le sul nunngana yo be iken lomim in todo iduku nga, ngan ole todo tani yo iken lomim i, in todo maiyoko.
23376	MAT 6:25	“Le nga be awete pang nen, kin lomim modoko ye yepongo kiang ke tana i, ye so yo be kakap a kakan le kayin, nga be. Inbe kin lomim modoko ye tinimim ye so yo be kapital a itarkoo tinimim, nga be. Ngan ye Maro matana nga, ngan yepongo kiang, in so maiyoko, bong so yo be kakap a kakan, in so mai tiap. Inbe tinimim nga lapau, ngan illoso so yo be kapital a katarkoo ye nga.
23378	MAT 6:27	Ngan nanga, be ang tina ngan atu lon modoko ye so yo be iloni ye yepongo ki ke tana i nga, ngan ole yelei, urata tani yo iyeii nen i, in ole iloni ye yepongo ki a iseke kasin pang dama a ila, too? O tiap!
23382	MAT 6:31	Le kin lomim modoko a kayei ne, ‘Nga ole takana soo so?’ too ‘Nga ole tayini soo so?’ too ‘Nga ole talonlon ye soo so?’ ngan be.
23384	MAT 6:33	Bong dada dook mata yo be kayeii le imuku pang i, in nen. Kakau ang pang Maro a matan kalang ben ang ngan di tooltool ki, inbe kakapye be katoo dada dook mata noonoonoo yo Maro lono be katoo nga. Ngan kumata le be kayei nen nga, ngan ole ikap so tina nga le imot pang.
23388	MAT 7:3	“Nga yelei be kumata tidi mitiap yo iken ye taim matana i, e lom tutu kai palunu maiyoko yo iken ye matam, in tiap nga?
23393	MAT 7:8	Ngan nen, yesoo di tooltool le imot yo tipatarau a titoro Maro be ikap so pang di nga, ngan ole tikap so tina. Inbe di tooltool le imot yo tisere so nga, ngan ole ilon di le tipuske. Inbe di tooltool le imot yo tipitpiti dada nga, ngan ole Maro iso dada pang di.
23394	MAT 7:9	“Ngan ang tina ngan atu be natunu itoru be ikap porong panga nga, ngan ole ikaua pat panga, too? Tiap!
23396	MAT 7:11	Ang nga dada kiang yo kayei ngan dook tiap, bong lomim galanga ye dada yo be kakap so dook mata leu pang di natumim a kalon di ye i. Ngan nanga, Tamamim yo iyepe ye malala ki ete ni, in illosang ye dada dook mata ki yo iyei nga, le ole ikap so dook mata pang di tooltool yo be titoru ye so nga.
23397	MAT 7:12	Ngan nanga, dada dook mata yo lomim be di tooltool tiyei pang nga, ngan ang ole kayei dada gaongo leu pang di nen lapau. Le betanga i, i ger ke Maro yo ikauu pang Mose, inbe betanga yo di Maro koonoo tiwete nga, ngan pudi igaua ye.
23402	MAT 7:17	Ngan gaongo leu, kai dook mata in be ipu nga, ngan ole kanono dook mata. E kai dook tiap in be ipu nga, ngan ole kanono dook tiap.
23403	MAT 7:18	Ngan nanga, ye kene yo kai dook mata be ipu ye in nga, ngan o ke be itar kanono dook tiap, ngan tiap. Inbe kene yo kai dook tiap be ipu ye in nga, ngan o ke be itar kanono dook mata, ngan tiap lapau.
23405	MAT 7:20	Ngan nanga, di tooltool ke kaplungunu yo tiwete di ye Maro koonoo nga, ngan ang nga ole lomim galanga ye di ye dada kidi yo tiyei nga.”
23407	MAT 7:22	Le pang dama ni, ye lal yo Maro itaru be ikarata betanga kidi tooltool ye in nga, ngan ole di tooltool alunu la be tikiu au a tiyei ne, ‘Tool Mai, Tool Mai! Nga yelei, ye ong em, ngan am nga amkaua koom a amwete betanga kiong pang di tooltool a tilonga. Inbe ye ong em, ngan amgiri di so sadi ye di tooltool a tikoo. Inbe ye ong em, ngan amyei mos matana matana ye lapau.’
23408	MAT 7:23	Ngan tiwete nen, lo ngan be ole awete pobe pang di nen, ‘Atoo, au i lok galanga yang pitiap yege. Ang nga di tooltool ke yeingi dada dook tiap, le kakoo yau a kala!’
23416	MAT 8:2	Ngan tool atu yo botoboto medana ikana tinini i, in iman le man igun turunu du Yesu kene punu ke dama, inbe iwete panga nen, “Tool Mai, kumata be lom nen nga, ngan kuyei au le tinik igalanga mulu.”
23417	MAT 8:3	Motong la Yesu itara baene lo tool tani in pono, inbe iwete panga nen, “Dook mata, au i lok nen, le ole tinim igalanga mulu.” Ngan le pattu leu, inbe botoboto medana tina ngan imapmap, inbe tinini dook mata mulu.
23422	MAT 8:8	Ngan tool tani iraua betanga ke Yesu nen, “Atoo, Tool Mai, o nen tiap! Au i lok tarau ngan au i tool dook mata ke be kuman a kulo rumu lono kiau tiap. Bong kupas le kuwete ye koom leu, inbe kapraingi kiau tani ole tinini dook mata mulu.
23426	MAT 8:12	Bong di tooltool yo Maro ipootoo di panga muku nga, ngan ole inganga di a tidu diki a du tiyepe todo maiyoko lono. Ngan ye ni tani in ole timassingi a titangtang, inbe tikanen dongadi a iparrasa.”
23428	MAT 8:14	Motong la Yesu ipa le la pombe ye ni ke Pita, a ilo rumu lono ki. Ngan ikamata Pita roonoo garup yo matamatenge ikauu le tinin yes a ikenen mie pono nga.
23431	MAT 8:17	Ngan tina Yesu iyei nen, le iyeie betanga ke Maro koonoo yo Esai i, in le kanono pombe moolmool. Ngan Esai tani in iwete nen, “Ya in igiri matamatenge kiidi, inbe iyei idi le tiniidi dook mata mulu.”
23434	MAT 8:20	Ngan Yesu raua betanga ki nen, “Di gaunu gok ngan agoro kidi ke kenongo, inbe di man ngan giniu kidi ke kenongo lapau, bong Tool Moolmool ke Maro, in taukan ni yo be iken a imaryoo ye i.”
23438	MAT 8:24	Tikooi a tila me pono, inbe pattu leu be eng mai imadit. Ngan eng tani in isi le mai mata, le kokor ki popobe a ipases lo ookoo lono, bong Yesu iken mata a ila oo.
23439	MAT 8:25	Ngan tina eng mai nen nga, le nga di galiunu la tipoongoo a tiyei ne, “Tool Mai, kulonam! Nga be tamere a tallede!”
23440	MAT 8:26	Tipoongoo, motong la iwete pang di nen, “Ai, ang nga katara lomim medana pau mai tiap sa. Nga yelei a katattadai mata nga?” Motong la imadit tina le iwete katkat pang eng le kokor tina, le imata le manini susube dook mata.
23441	MAT 8:27	Ngan iyei nen a di galiunu tina tikamata, le titakrai, inbe di tapdi tipartortor nen, “Ona tiap! I tool belei a le eng le kokor tilongo koonoo nga?”
23443	MAT 8:29	Di tooltool ru tina tikamata Yesu, motong koodi panga nen, “Atoo! Ong i Maro Natunu. Nga soo so be kuyeii pam i? Ngan lal yo Maro itaru be ikap masngana pam ye i, in pombe tiao, bong kuman ni nga be man kop masngana pam, too?”
23447	MAT 8:33	Ngan nen le di tooltool yo matadi kala di ga nga, ngan titattadai ye so yo tikamata nga. Le tina tidada a tilo pang malala kidi, a lo tikaua bingi ye so le imot yo pombe ye di ga nga, inbe ye di tooltool ru tina yo so sadi tidiwidiwi di nga, ngan lapau.
23449	MAT 9:1	Motong la Yesu iyiri lo ookoo pono, a isiut mulu pang ran koonoo san. Ngan le la pombe ye malala ki ya taunu.
23450	MAT 9:2	Ila pombe, motong di tooltool pattu titokotoko tool atu yo ikap rama le ipas le iken leu mie pono i, in a timan pang ye. Yesu ikamata di tooltool tina, ngan titara lodi medana panga moolmool nga, le tina iwete pang tool yo ikap rama in nen. Iyei ne, “Natuk, kin lom mede leu. Noonoo kiong, ngan agir oo.”
23451	MAT 9:3	Ye kene tani in di pannoongoo pattu ke ger ke Maro tilongo yo Yesu iwete nen nga, le nga di tapdi tiwetewete pang di nen, “Ona, tiap! Tool i nga yelei a iwete betanga nen nga? Nga o be ikaua Maro nene, too?”
23452	MAT 9:4	Tiyei nen ngan Yesu lon galanga ye lodi mukot, le nga itor di. Iyei ne, “Nga yelei be lomim kap gogo dada dook tiap nen nga?
23453	MAT 9:5	Soo betanga imarra be aweta i? Be awete panga nen, ‘Noonoo kiong ngan agir oo,’ too be awete panga nen, ‘Kumadit a kupa’?
23458	MAT 9:10	Motong la tiyepe a kene san in Matiu ikaua Yesu iye di galiunu pang rumu ki be lo tikan so. Ngan le di tooltool alunu ke sodaningi pat, inbe alunu ke yeingi noonoo, ngan di lapau la tilo a tiye Yesu tiwur, inbe tikan so nga.
23459	MAT 9:11	Yeisa be di Paresi tikamata di yo tiyei nen nga, yo ngan le taun titor di galiunu nen, “Ai! Nga yelei be pannoongoo kiang ni iye di tooltool ke sodaningi pat inbe di tooltool ke yeingi noonoo tigaua a tikan so nga?”
23461	MAT 9:13	Au i lok be kala ngan lomim kaua urata dook ye betanga yo Maro iweta a iken ye rau ki i, in lono ki belei? Ngan betanga tani in nen, ‘Dada yo lok panga mata i, in nen, be lomim mulumulu ye di tooltool a kayei dada dook mata pang di, bong ye dada yo ke paroranga so pau, in tiap.’ Ngan nanga, asi nga be si akiu di tooltool yo noonoodi, nga tiap, bong asi be si akiu di tooltool yo ke noonoo nga.”
23463	MAT 9:15	Ngan Yesu iraua torungu kidi nen, “Kumata tamoto atu yo be ikere i, in ikiu di sokana le di tooltool ki be man tiye tiyepe ye kerenge ki nga, ngan yelei, ole lodi modoko a tisapa ye kaningi, too tiap? Tiap yege! Bong pang dama ni ngan ole di tooltool tikaua tool tani yo be ikere in le iyege di tooltool ki nga, ngan la be ole lodi modoko a tisapa ye kaningi nga.”
23465	MAT 9:17	Inbe gaongo leu, di tooltool ke be tipaling ooroo wain surunu yo paunu, ngan ilo ye dap gurunu yo tikarata ye asara kulini, in tiap. Kumata le be tiyei nen, inbe ran medana isung nga, ngan ole dap gurunu tani putumbe le dap in dook tiap, inbe ran medana tina ngan imati du tana. Ngan nanga, ooroo wain surunu yo paunu nga, ngan ole tipaling lo ye dap yo paunu nga, ngan la be yaru le ru tiken dook nga.”
23469	MAT 9:21	Ngan garup tani, in ya taunu lon wetewete nen, “Kumata le be atoko sousoungu ki leu nga, ngan ole tinik dook mata mulu.”
23470	MAT 9:22	Bong Yesu iyetaii le nga iportak ngan ikamata garup tani. Le iwete panga nen, “Natuk, kin lom mede leu. Lo medana kiong yo kutaru pau i, in la ikaratong le tinim dook mata mulu i.” Tina Yesu iwete panga nen nga, ngan le ye kene tani in tinini dook mata mulu.
23472	MAT 9:24	Le nga Yesu ipasak pang di. Iyei ne, “Ai, kakoo a kadu tana! Garup kase in imata tiap, bong iken mata leu.” Ngan nen le di tooltool tina tingeleraii ye yo iwete nen nga.
23474	MAT 9:26	Ngan nen le bingi ke garup kase tani, in ipa le ingaua tana mai i le imot.