1	GEN 1:1	Iko zinume ijia Godi fu aesakae igiakiro saove ije amaeriae. Ro ae sakae ado ijia ire bino fuka baki ro fune do ijare ijia nafuekoga ve ireobo fu ijia titute. Ro do ado ijia fune Godido Kavene ijiaru fu ijia oenoene.
3	GEN 1:3	Areme Godi fune maza ije kuamoga fu are ije titutema ijia sanamoga fu ijene gamo fuka oemae. Ijiege rena fune uri titutema ijene abe atasena sanaema ije fu abe gue nijaga titutema fu abe gue nijae. Ijadufuo fu uri sanaema ije fu kua, Mazareno kuae. Ro titutema ije fu kua, Mugeno kuae. Ro ire ije fu mazani amure ijia amaeria furikoga ve ijia titutei.
6	GEN 1:6	Areme Godi fune do ije kuamoga fu atana guegue rei. Do gue fu kuamoga fu kabo ijia nakoga gue fu ume ijia nafuemo fu are ririkua ije kua, Saoveno kuae. Fu ijiege amaeriama furikoga ve una ijia titutemo fune mu inokiro rei.
9	GEN 1:9	Areme Godi fu una do ume ije nafuema ije kuamoga fu una besu nafuekoga sakae gue fu iriare.
10	GEN 1:10	Godi fu are ije iriarema ije fu kua, Sakaeno kuaga are ije do nafuema ije fu kua, Davareno kuae. Bu ijiege revoga fu ije giamo fuka oemae.
11	GEN 1:11	Areme Godi fu uri uije ni binobino ije kiamoga bu sakae ado ijia tavuae. Ro ifiri gue sunine bu ijo ijiebe ijia tavuakoga gue bu ire vuiti igeki ijiebe ijia tavuae.
12	GEN 1:12	Ire boge bu sunine kiravoga Godi ije giamo fuka oemae. Fu ijiege rekoga ve fu ijia titutemo fune una mu inokubeke rei.
14	GEN 1:14	Areme Godi fu kuae, Na ire binobino ije kiaga bu kave ijia sanaga are akaegue fu ve titutekiro gue fu sanake. Ro bure irena nijasuoga no maza besubesu ro asame ro juaevasia ro maza mamekanu ije giana vierafekono kuae.
16	GEN 1:16	Ijadufuo fune uri ire sanavo inokiro ka mamekanu ije amaeriae. Mazani ije fu maza ijia sanadufuo ro asame ije fu muge sanadufuo ije amaeriae. Fune ijiege rei areme kuke ire zuvi ije amaeriae.
17	GEN 1:17	Areme fune uri sanaema ije bu sakae ige sanadufuo ije kena kave ijia nae. Fu ijiege rega are akaegue fu ve titutekiro gue fu sanake. Godi fune ire ije bu reva ije giamo fuka oemae. Ijiege rena fune ve titutemoga fune una mu inokiro kiro inokiro rei.
20	GEN 1:20	Areme Godi fu kuae, Ni ire oe ruvo binobino do ijia oenoekiro ume binobino bu kave ijia oenoeno kuae.
21	GEN 1:21	Ijadufuo Godi fune kuaemoga kijume mamekanu ijiakina ire ni binobino do ijia oenoejo ije bune do ijia oenoe. Ijiege re areme fune kuke kuaemoga ume binobino kave ijia oenoejo ije bune ijia oenoevoga fu ije giamo fuka oemae.
22	GEN 1:22	Areme fune ire boeje do ijia oenoevo ijiakiro ume kave ijia oenoevo ije daro miana kia, Ni ame nafena boeje reno kiae. Fu ijiege rema furimoga ve ijia titutemo fune una mu umui fague rei.
24	GEN 1:24	Areme Godi fune fina kuaekoga fanu ni binobino mamekanu ro isesina ni uria tarare ijia ro sidove ijia oenoedufuo ije bu sakae ado ijia oenoe. Bu ijia oenoevoga Godi fu ije giamo fuka oemae.
26	GEN 1:26	Areme Godi fu kuae, No iviama ema no vareki ije amaeriake. No amaeriaga bure aesakae boeje igia fanu taraeko ro aeko binobino ije samuagiake. Ro kuke bure umekina kijume isesina ro mamekanu ije samuagiake. Fu ijiege kuaena fune e fari ro bara fu vareki ije amaeriae.
28	GEN 1:28	Areme Godi fune bu daro miana kia, Ni va ame uruvana tuanaekina bure are irore boeje igia karifo. Bure karina ire boeje sakae igia naovo ije samuagiake. Ro kuke nane daro miaedo jare fanu boeje bu sakae ado igia oenoevo ijiakina ume boeje kave gufia oenoevo ije samuagiake. Ro kuke jare kijume ro ire boeje do ijia oenoevo ije samuagiake.
29	GEN 1:29	Ro ifo boeje ja idufuo ro ire vuiti igeki ije nane joefuo ijifureki naejiae. Ro kuke fanu boeje binobino ro ume kave ijia oenoevo ijiebuo ire bu idufuo ije na vajomakina ia binobino nane amaeriaevano kiae.
31	GEN 1:31	Godi fu ijiege kuaekoga ire boeje bune fu kuaema ijiege rei. Godi fu ire boeje fu amaeriaema ije giamo fuka oemae. Godi fu umui fague ro dikine besu ijia fu aesakae igiakiro saove ro ire boeje amaeria furi.
32	GEN 2:1	Ijiege rena Godi fu maza ijia ire boeje ige amaeriama furi.
33	GEN 2:2	Ro maza seveni (7) ije Godi fu ire boeje fu amaeriamo ije fu ijia furi.
34	GEN 2:3	Maza seveni ije fu abe daro mana fu akae remoga fu abe irigi nijae. Ijadufuo maeje Godi fu maza ijia fu ire boeje ume igia ro saove gufia naovo ije amaeriama furinoga fune ijia arena fi.
35	GEN 2:4	Godi fu ijiege fina rekinu ire boeje ume igia ro saove gufia naovo gue no giavo ro giavo baki ije amaeriae. Maza ije Godi fu ire boeje amaeriaema ijia sakae ado ijia ifiri ro ire uije bino bu naebe ijia tavuae. Ijadufuo maeje Godi fu ve be fu naebe kuamo fu dae. Ro kuke fu erare ijia oenoekinu sakae rudufuo ije fuka baki.
37	GEN 2:6	Rove do ije fume sakae guove ijia ajiana sakae ije safikirame.
38	GEN 2:7	Areme Godi E Ireobo ije fune sakae ijia matuana abe e fari amaeri. Areme fune uri e ijadufuo udo ijia ivua ije fu oerukinu oenoedufuo ijene ufenogana e ije fune ijia uri oeru.
39	GEN 2:8	Ijiege rena Godi E Ireobo fune uri juare be are mazani ajiamo naka ijia mena ive ina Ideni kuae. Areme fune e ije fu amaerima ije mesirina juare ijia nujae.
40	GEN 2:9	Areme fune juare ijia uije binobino ije kiamo bu ijia tavuana sunine ka ni mukore ije kirae. Ro juare ukua ijia ine inokiro bu ijia irei. Ine be ije e bu nubuna ikuva bu oekuva baki. Ro ine be ije e bu nubu ikuva bu vame binobino ise ro ma bu mukore vierafedufuo ijare ijia manine.
41	GEN 2:10	Ro do be fu juare Ideni safikirakiro ijia kanana keke vae. Fu kana kekena dabe atana inokiro kiro inokiro rei.
42	GEN 2:11	Do be ije Fisoni fu kanana aesakae Avira ijia vae. (Ro do ijia ire gorodi ije fuka ma uruvana.
43	GEN 2:12	Ro kuke ire udi mukore urivo ijiakina mune ni mukore bu moni mamekanu fuaevejo ije bu ijia karivo.)
44	GEN 2:13	Ro do be ije Gaeoni fu kanana aesakae Kusi ijia ura vae.
45	GEN 2:14	Ro una do be ije Taegirisi fu kanana aesakae Asiria ijia vae. Ro do be ijeja Ufiretisi.
46	GEN 2:15	Areme Godi fune e fari ije mesiri juare Ideni ukua ijia nujae. Fu ijia nujaga fure juare ijia ire boeje amaeriakinu samuagiae.
47	GEN 2:16	Godi fu e ije mesiri ijia nuja areme kuae, Ine boeje juaru igia ireva ijiebuo fo ije ni nubu ine.
48	GEN 2:17	Ro ine besu juare ukua ijia manino ije e bu nubu ina vame ise ro ma ije vierafevo ijiaru sunine fuone ije ade nubu ino. Ro a faememare nubu ikuma aka maza besu ijia baronekono kuae.
49	GEN 2:18	Areme E Ireobo Godi fu kuae, E gure na amaeriva ije fu fuosukua oenoekuma na vierafe fuka naebe mareke. Ijadufuo na vierafe naka kai fuone ma be fu ifejadufuo ije amaerikono kuae.
50	GEN 2:19	Ijadufuo fune uri sakae ijia matuana fanu ro ume boeje binobino amaeriae. Areme Godi fune kaenamiana e ije fino ije nijaekoga fu giakinu ive buone ije imiae. Ijadufuo fanu ro ume boeje bu vame ijiege rena ive buone ije kei.
52	GEN 2:21	Areme E Ireobo Godi fune e ije kuamo fu una ni ireobo nae. Fu ni naekoga Godi fu uri ikene ane fuone be damukoga surive fuone ije fu una ifekurae.
53	GEN 2:22	Godi fune ikene ije abe bara amaeri areme mesirina e ije fino ijia ruae.
54	GEN 2:23	Areme e ije fune uri bara ije gama areme kuae, Iviama ijare ire gure na gaga fuka na vareki. Ane fuone ije fu ane none igia abei. Ro kuke birage fu ije fune none igia atae. Ijadufuo fuje na barano kuake ijadufuo maeje fu e fari ijadufuo guove ijia abe amaerimano kuae.
55	GEN 2:24	Ijiege reva ijadufuo iviama e fari ije fu asoe ijiakiro asie fuone uniakona va bara fuone ijieki mazievo ijia bune buosiki vajae besu reke.
56	GEN 2:25	Ro e fari ijiakiro bara ije buka detaba rove bu naebe vierafe ro kuke bu jaediamo baki.
57	GEN 3:1	Areme E Ireobo Godi fune fanu boeje fu amaeriaema ije uve ijia fu ire tabare ije fuka e biesiriamo ije amaeri. Ijadufuo ire tabare ije fune ro bara ije fino ijia kekei. Fu kekena bara ije biesirina kuae, A Godi fube ma kua ine juare ukua gare manino ije ade fo fuone nubu ino kuae?
58	GEN 3:2	Fu ijiege kuamoga bara ije fu una kuae, No Godi fu kuo, Ja ine fo boeje ni nubu ikiro ine besu gare manino ijiaru fo fuone jade nubu iro niriaevono kue. Ro ja niriaekuva jaka maza besu ijia oekono kue.
60	GEN 3:4	Bara ije fu ijiege kuaramoga tabare fu una kuae, Godi fuka kufuimedo ja oekuva baki. Fu vierafero ja nubu ikuva ja fu vareki rekiro fu ijadufuo kuriaere. Ja ikuva ja vame ise ro ma boeje jaka vierafekiro fu ijadufuo ja biesiriaemano kiae.
62	GEN 3:6	Bara ije fu vua ije fiemo fuka oeseremo fu una dakude ine ije gae. Fu gake ine ije fuka ma mukore ro kuke fu nubu ikuma fuka maekiro fu ije vierafe. Ro kuke fu vame ise ro ma ije mukore vierafekiro fu ije vierafe. Ijadufuo fune uri ine fo bino nubuna igana gue fu kena baru fuone ije vajamo fudua kena i.
63	GEN 3:7	Bu ine sunine ije nubu inama furiko bu ijia Godi fu irerefuo kuriaere bu vua vierafei. Areme bu ijia uri bue ganamigake bune detaba irei. Ijadufuo buka jaedia bu uri suviene turana vajae buone ije okuriae.
64	GEN 3:8	Ijiege rena bune kari fieke Godi E Ireobo ije fune ve jiaema ijia juare uvo ijia urana romo bu fiena uri ine ijia ufuaena saui.
65	GEN 3:9	Rove E Ireobo Godi fu uri e fari ije kumei, A izieburekino kumei?