26993	ACT 1:1	Tiofela꞉s ge, Ya꞉suwa꞉lo꞉ tamin amilo꞉ mo꞉mo꞉da wido꞉wo꞉lo꞉, dimido꞉wo꞉lo꞉, a꞉la꞉ta꞉ga꞉ Hebenelo꞉ a꞉ma꞉la꞉do꞉ ane a꞉no꞉, Lug ne tamin amio꞉ gemo꞉ sa꞉sa꞉liga꞉fo꞉. Godeya꞉yo꞉ Ya꞉suwo꞉ Hebene halonamio꞉ semo꞉ tililia꞉ ha꞉naki, Eyo꞉ Enedo꞉ iliga꞉felema꞉no꞉ kaluwo꞉ da꞉fea꞉sa꞉ga꞉, imo꞉wo꞉ asuluma꞉no꞉ to nowo꞉ Mamaya꞉ halaido꞉ a꞉ma꞉yo꞉ sio꞉.
26995	ACT 1:3	Ya꞉suwo꞉ sowa꞉sa꞉ga꞉, mela꞉no꞉wo꞉ a꞉dia꞉sa꞉ga꞉ dasilakiyo꞉, Enedo꞉ iliga꞉felema꞉no꞉ kaluwo꞉ e hendele dasilia꞉ga꞉ mela꞉no꞉wo꞉ di a꞉la꞉ tili asuluma꞉ki, E ho꞉leno꞉ do꞉la꞉fo꞉ fa꞉la꞉da꞉ino꞉ i o꞉lia꞉ sia꞉len. A꞉la꞉ta꞉ga꞉yo꞉ Eyo꞉ Godeya꞉ ene kaluka꞉isale ko꞉lo꞉ bo꞉fo꞉lab man a꞉no꞉ wida꞉len.
26996	ACT 1:4	Ya꞉suwa꞉yo꞉ egele silikiyo꞉, imo꞉wo꞉ a꞉la꞉sio꞉, “Gio꞉ Ya꞉lusalemo꞉ semo꞉ ta꞉fo꞉ ha꞉nakiyo꞉, Dowa꞉lo꞉ boba kelego꞉ gimo꞉lo꞉ dimia꞉no꞉ dinali sio꞉ a꞉no꞉, niyo꞉ gimo꞉wo꞉ tamin amio꞉ sio꞉ ko꞉lo꞉, giliyo꞉ a꞉no꞉ dia꞉ni yasita꞉bi.
26997	ACT 1:5	Yona꞉yo꞉ ho꞉n deya to꞉lola꞉len ko꞉sega, Godeya꞉yo꞉ gio꞉ Ene Mamaleya꞉ to꞉loma꞉no꞉wo꞉, ho꞉len a꞉la꞉se ko꞉na꞉ma dowab.”
26998	ACT 1:6	A꞉la꞉fo꞉ko꞉lo꞉ iyo꞉ kegea꞉sa꞉ga꞉, Ya꞉sumo꞉wo꞉ a꞉la꞉dabuba꞉ba꞉, “Alan, Isolael kaluka꞉isaleyo꞉ halale alitakiyo꞉, inin amio꞉ misa꞉ kalu nowo꞉ fa꞉la꞉dota꞉ga꞉, wa꞉ka bo꞉fo꞉melea꞉ki, giyo꞉ o꞉go꞉ o꞉li dimidama꞉no꞉wele?”
26999	ACT 1:7	A꞉la꞉dabuba꞉dabiki, Ya꞉suwa꞉yo꞉ a꞉ma꞉la꞉yo꞉ a꞉la꞉sio꞉, “Kelego꞉ fa꞉la꞉doma꞉no꞉ ho꞉len a꞉no꞉ Dowa꞉ Ene da꞉feyo꞉ ko꞉lo꞉ gio꞉ mada mo꞉asulo꞉ ko꞉lo꞉lab.
27000	ACT 1:8	Ko꞉sega Mamaya꞉yo꞉ gio꞉ go꞉lu alitalikiyo꞉, gio꞉ halaido꞉wo꞉ dia꞉sa꞉ga꞉ ami, Ni towo꞉ Ya꞉lusalemo꞉lo꞉ Yudiayo꞉lo꞉, Samalia hen a꞉namio꞉ wida꞉sa꞉ga꞉, a꞉la꞉ta꞉ga꞉yo꞉ henfelo꞉ we tambo wida꞉li sia꞉mela꞉ib” a꞉la꞉sio꞉.
27001	ACT 1:9	To a꞉no꞉ sa꞉la꞉sa꞉ga꞉ eletakiyo꞉, Ya꞉suwo꞉ halona ha꞉nabiki, iyo꞉ alolo bo꞉fo꞉leno꞉, E kola꞉ go꞉lulabiki, iliyo꞉ wa꞉kabiyo꞉ mo꞉ba꞉ba꞉.
27002	ACT 1:10	Ya꞉suwo꞉ akina o꞉ha꞉na꞉labiki, iyo꞉ a꞉no꞉ alolo bo꞉fo꞉li elen ami, kalu a꞉la꞉ nowo꞉, helebeso꞉g ho꞉lo꞉ ka sa꞉ga꞉lela꞉ ko꞉lo꞉, wigibole a꞉naka handalota꞉ga꞉, ili aniba kagayo꞉.
27003	ACT 1:11	Kalu a꞉la꞉ma꞉yo꞉ imo꞉wo꞉ a꞉la꞉sio꞉, “Ga꞉lili kalu gio꞉, madali akin amio꞉ alolo bo꞉fo꞉leko꞉ mo꞉wo꞉ ha꞉? Ya꞉su gi o꞉lia꞉lo꞉ elen ko꞉lo꞉ Godeya꞉ Hebenelo꞉ tilia꞉gane a꞉no꞉, E a꞉ma꞉la꞉ yalikiyo꞉, E Hebenelo꞉ ha꞉nabikilo꞉ ba꞉dab o꞉leaum a꞉ma꞉la꞉yo꞉lo꞉ a꞉la꞉ka mia꞉ib.”
27004	ACT 1:12	Olif misio꞉ a꞉no꞉ Ya꞉lusalem o꞉lia꞉yo꞉ ko꞉na꞉ma ko꞉lo꞉, iyo꞉ Olif misio꞉wo꞉ ta꞉ta꞉sa꞉ga꞉, a꞉ma꞉la꞉ Ya꞉lusalem ane.
27005	ACT 1:13	Iyo꞉ Ya꞉lusalem fa꞉la꞉dowa꞉sa꞉ga꞉yo꞉, ilo꞉ sa꞉sen galale wa꞉l amio꞉ a꞉na tiane. Kalu i a꞉namilo꞉ seno꞉ we, Bida, Yon, Yemes, Andulu, Filib, Tomas, Batolomiyu, Madiyu, Yemes Alofiusa꞉ inso꞉, Saimon Sa꞉la꞉t kalu, a꞉la꞉ta꞉ga꞉ Yuda꞉s, Yemesa꞉ inso꞉.
27006	ACT 1:14	Kalu i a꞉ma꞉yo꞉ asulo꞉wo꞉ imilise dota꞉ga꞉, Godemo꞉ dulugu sa꞉la꞉len. A꞉la꞉ta꞉ga꞉ Ya꞉su ano, Malia, o꞉lia꞉ ka꞉isale nolo꞉lo꞉, a꞉la꞉ta꞉ga꞉ Ya꞉su ao i nolo꞉lo꞉ i o꞉lia꞉ siliki, dulugu sa꞉la꞉len.
27007	ACT 1:15	Ho꞉len a꞉namio꞉ Ya꞉su amilo꞉ tilidabu kaluka꞉isale agelo꞉wo꞉, do꞉la꞉lowo꞉wo꞉ do꞉la꞉fo꞉ a꞉la꞉ta꞉ga꞉ do꞉la꞉fo꞉ a꞉la꞉. Iyo꞉ kegeneliabiki, Bidayo꞉ usa dasilia꞉ga꞉ kagafo꞉liki, towo꞉ imo꞉wo꞉ a꞉la꞉sio꞉,
27008	ACT 1:16	“Nao i, Yuda꞉s e ni o꞉lia꞉ sia꞉likilo꞉, nili nanogdo꞉ dia꞉seno꞉ nowo꞉ e. Mo꞉luwo꞉ Mamaya꞉yo꞉ emo꞉ dinali sa꞉labikiyo꞉, Debidi eyo꞉ Godeya꞉ bugo꞉ amio꞉, Yuda꞉s eyo꞉ Ya꞉suwo꞉ teledoma꞉ib a꞉la꞉bo꞉, Debidi e sa꞉sa꞉li alifa꞉. A꞉la꞉fo꞉ko꞉lo꞉ o꞉g wenamio꞉, hendele fa꞉la꞉dowab.” Bida eyo꞉ imo꞉wo꞉ a꞉la꞉sio꞉.
27010	ACT 1:18	Yuda꞉s eyo꞉ mogago꞉wo꞉ dimida꞉sa꞉ga꞉, mole elo꞉ di a꞉ma꞉yo꞉, hen nowo꞉ kilili. A꞉la꞉ta꞉ga꞉ Yuda꞉s e hen a꞉na ha꞉na꞉sa꞉ga꞉, sulufo꞉ tindakiyo꞉, kufo꞉ elo꞉wo꞉ a꞉no꞉ gasedaki, gono꞉ ha꞉la꞉ya sugusulia꞉ handalowo꞉.
27011	ACT 1:19	Ya꞉lusa꞉lem kaluka꞉isaleyo꞉ tambo dabu ko꞉lo꞉ iliyo꞉ hen a꞉no꞉ ene to wikilakiyo꞉, Akedama a꞉la꞉sio꞉. To a꞉no꞉ ha꞉go꞉ we, ho꞉bo꞉lo꞉ tulo꞉ hen.
27012	ACT 1:20	Bida eyo꞉ towo꞉ wa꞉ka a꞉kudu sa꞉laki, “Gisalo꞉ bugo꞉ amio꞉ a꞉la꞉ dinali sio꞉, ‘Hen elo꞉ a꞉namio꞉ kelego꞉wo꞉ aundo꞉ma doma꞉ib ko꞉lo꞉, kalu imilig nowo꞉lo꞉ a꞉namio꞉ mada mo꞉doma꞉ib.’ A꞉la꞉ta꞉ga꞉ Gisalo꞉ bugo꞉ amio꞉ to nowo꞉ a꞉la꞉sio꞉, ‘Kalu noma꞉yo꞉ nanog elo꞉ dia꞉sen a꞉no꞉ o꞉lika dia꞉ib.’
27013	ACT 1:21	A꞉la꞉fo꞉ko꞉lo꞉ kalu imilig nowo꞉ ni o꞉lia꞉ gasayaki, Ya꞉su a꞉ma꞉la꞉do꞉ dasi a꞉no꞉ eyo꞉ walama꞉ki, niliyo꞉ da꞉fema꞉nigo꞉l. Kalu a꞉no꞉ negeledo꞉ Ya꞉su o꞉lia꞉lo꞉ sia꞉sen a꞉no꞉, Yon elo꞉ ho꞉n amio꞉ to꞉lolo꞉ a꞉la꞉ta꞉ga꞉ mio꞉wo꞉, Ya꞉su elo꞉ Hebenelo꞉ a꞉ma꞉la꞉ anelo꞉ ba꞉ba꞉ a꞉no꞉ ko꞉lo꞉ da꞉fema꞉no꞉” Bida a꞉la꞉sio꞉.
27015	ACT 1:23	A꞉la꞉fo꞉ko꞉lo꞉ iliyo꞉ kalu wiyo꞉ a꞉la꞉ ko꞉lo꞉ salifa꞉. Nowo꞉ Yosa꞉b Basabas a꞉la꞉do꞉ sa꞉la꞉sen a꞉no꞉ ko꞉lo꞉ sio꞉. Ene wiyo꞉ nowo꞉ Yustus. Kalu nowo꞉ Matias.
27016	ACT 1:24	Wi a꞉la꞉ a꞉no꞉ salitakiyo꞉, iliyo꞉ Godemo꞉wo꞉ a꞉la꞉ dulugu sio꞉, “Alan Giyo꞉, nili kufa꞉ uso꞉ ba꞉da꞉sen ko꞉lo꞉ a꞉la꞉ we nowo꞉ Giyo꞉ da꞉feyo꞉lalega, Giyo꞉ nimo꞉wo꞉ walama.
27017	ACT 1:25	Yuda꞉s e nanog enedo꞉wo꞉ ta꞉ta꞉sa꞉ga꞉, hen elo꞉ ego꞉le, enedo꞉ a꞉na doma꞉ni ane ko꞉lo꞉ kalu a꞉no꞉ e nanogo꞉ dia꞉sa꞉ga꞉, Iliga꞉felo꞉ kalu doma꞉ki, Giyo꞉ nimo꞉wo꞉ walama.”
27018	ACT 1:26	Iliyo꞉ a꞉la꞉ dulugu sa꞉la꞉sa꞉ga꞉ ami, iyo꞉ wi imilig nowo꞉ fa꞉la꞉doma꞉ki, a꞉la꞉ma꞉ wiyo꞉ ibuwa sa꞉sa꞉la꞉sa꞉ga꞉, a꞉na hea꞉sa꞉ga꞉ ba꞉ba꞉ amio꞉, Matiasa꞉ wiyo꞉ di ko꞉lo꞉ e Iliga꞉felo꞉ kalu kugu a꞉no꞉ e ko꞉lo꞉ dowo꞉.
27019	ACT 2:1	Bentekos ho꞉len a꞉no꞉ fa꞉la꞉dowabiki, tilidabu kaluka꞉isaleyo꞉ sagala꞉liki, a usa kegeo꞉.
27020	ACT 2:2	Iyo꞉ a꞉na sen amio꞉, wigibo a꞉naka fo alano꞉, fufa alano꞉ o꞉ngo꞉ ko꞉lo꞉ halona a꞉la꞉ta꞉ga꞉ a uso꞉ tambo wa꞉lifo꞉.
27021	ACT 2:3	Iliyo꞉ kelego꞉ nowo꞉, de wa꞉sowayo꞉ eano꞉ o꞉ngo꞉ ko꞉lo꞉ ba꞉da꞉sa꞉ga꞉, de ean o꞉ngo꞉ma꞉yo꞉ kaluka꞉isale tambo gogo alifela꞉i ane.
27022	ACT 2:4	I a꞉no꞉ tambo amio꞉ Mamayo꞉ ililitabiki, imo꞉wo꞉ asulo꞉wo꞉ dimiaki, halaido꞉wo꞉ dia꞉sa꞉ga꞉, to ko꞉li ko꞉lilo꞉wo꞉ a꞉na mo꞉mo꞉da sio꞉.
27023	ACT 2:5	Ho꞉len a꞉namio꞉ Yuwa꞉ mando꞉ kudu ha꞉nan kalu nolo꞉ hen ko꞉li ko꞉lilo꞉wa a꞉la꞉ta꞉ga꞉ ya꞉sa꞉ga꞉, Ya꞉lusalem a꞉na sen.
27024	ACT 2:6	Iyo꞉ fo alan a꞉no꞉ da꞉da꞉ga꞉yo꞉ tambo kegea꞉sa꞉ga꞉ ami, Iliga꞉felo꞉ kalu iliyo꞉ to sa꞉lakiyo꞉, kalu kegeo꞉ i a꞉ma꞉ towo꞉ sa꞉labiki, iyo꞉ iligaki kele asulu tandeo꞉.
27025	ACT 2:7	Iyo꞉ molo asulaki a꞉la꞉sio꞉, “Kalu i we Ga꞉lili kalule ko꞉sega o꞉go꞉ ililo꞉ to sa꞉labo꞉, niliyo꞉ nini to a꞉da꞉dab we, mo꞉wo꞉ o꞉bele?
27027	ACT 2:9	Nio꞉ heno꞉ ko꞉li ko꞉lilo꞉wa a꞉la꞉ga꞉ga꞉ mio꞉. Nolo꞉ Patia, Midia, Elam. Nowo꞉ Yudia, Kabadosia, Pontus, Esia, Filigia, Bafilia, Isib, a꞉la꞉ta꞉ga꞉ Libia hen anibamilo꞉ Salini amisa꞉n a꞉namilo꞉ sa꞉seno꞉ a꞉no꞉ ko꞉lo꞉ mio꞉, a꞉la꞉ta꞉ga꞉ nolo꞉ Lom a꞉na a꞉la꞉ta꞉ga꞉ ya꞉sio꞉.
27029	ACT 2:11	Ni us amio꞉, nolo꞉ Yu kalu, nolo꞉ Yu kaluma ko꞉sega, Yu kalu ililo꞉ tilidabu o꞉leaum, iyo꞉lo꞉ a꞉la꞉tilidabu. Nolo꞉ Kilit kalu, nolo꞉ Alebia kalu, ko꞉sega ililo꞉ Godeya꞉lo꞉ molo ha꞉na꞉no꞉ to widab a꞉no꞉, niliyo꞉ ninin towa꞉ do꞉do꞉l” a꞉la꞉sio꞉.
27030	ACT 2:12	Iyo꞉ moda꞉sa꞉ga꞉, kele asulaki egelebo꞉ a꞉la꞉dabu ba꞉ba꞉, “We o꞉bo꞉ngo꞉ fa꞉la꞉dowabele?”
27031	ACT 2:13	Ko꞉sega kalu nolba꞉ya꞉ dio꞉ge sa꞉laki, “Kalu we wain ho꞉n na꞉sa꞉ga꞉ dafolakigab” a꞉la꞉sio꞉.
27032	ACT 2:14	Bida e, iliga꞉felan kalu kelena꞉la꞉fo꞉ nol o꞉lia꞉ dasila꞉sa꞉ga꞉ kagafo꞉liki, Bida eyo꞉ kaluka꞉isale kegeo꞉ imo꞉wo꞉ towo꞉ halale widakiyo꞉ a꞉la꞉sio꞉, “Yu kalu o꞉lia꞉ Ya꞉lusalemdo꞉ sa꞉sen kalu gio꞉, niyo꞉ mo꞉wo꞉ dinafa fanda sa꞉ma꞉nigo꞉l ko꞉lo꞉ gio꞉ dabuma.
27033	ACT 2:15	Gili asulakiyo꞉ kalu i we dafolab a꞉la꞉asulab ko꞉sega, o꞉go꞉ ofa꞉si agato꞉wa dowab ko꞉lo꞉ kalu i we mada mo꞉dafolab.
27034	ACT 2:16	O꞉ngo꞉ma! Kalu i we, dinali sa꞉lan kalu Yoel, elo꞉ dinali sio꞉ o꞉leaum dimidab. Yoel eyo꞉ a꞉la꞉sio꞉,
27035	ACT 2:17	“‘Godeya꞉yo꞉ sa꞉lakiyo꞉, “Elema꞉no꞉ ho꞉leno꞉ ko꞉na꞉ma dowalikiyo꞉, Ni Mamayo꞉ kaluka꞉isale tambomo꞉ ko꞉go꞉lu alifelema꞉no꞉ ko꞉lo꞉, Gi so꞉wa iyo꞉lo꞉, ga꞉la꞉la꞉yo꞉lo꞉, dinali sa꞉lan kaluwa꞉lo꞉ widan o꞉ngo꞉ doma꞉ib. So꞉wa iliyo꞉ ho꞉le ba꞉ba꞉ib, a꞉la꞉ta꞉ga꞉, kalu anaso꞉ imo꞉wo꞉ ofowo꞉ walalifelema꞉ib.
27036	ACT 2:18	Ho꞉len a꞉namio꞉, madali nanogdo꞉ dian kaluka꞉isale i a꞉namio꞉lo꞉ Ni Mamayo꞉ ko꞉go꞉lu alifelema꞉no꞉ ko꞉lo꞉ iyo꞉lo꞉ dinali sa꞉lan kaluwa꞉lo꞉ widan o꞉ngo꞉ doma꞉ib.
27037	ACT 2:19	Niyo꞉ akin halonamio꞉ molo ha꞉na꞉no꞉wo꞉ dimidama꞉no꞉. A꞉la꞉ta꞉ga꞉ henfelo꞉ wiyo꞉lo꞉ a꞉la꞉dimidama꞉no꞉. Ho꞉bo꞉ o꞉lia꞉ de o꞉lia꞉ a꞉la꞉ta꞉ga꞉ de ho꞉mo꞉n alan fa꞉la꞉doma꞉ki dimidama꞉no꞉.
27038	ACT 2:20	Alana꞉ ho꞉len nafaleyo꞉ o꞉semo꞉fa꞉la꞉dowalikiyo꞉, ofo꞉ sololiaki, eleyo꞉ ho꞉bo꞉ o꞉ngo꞉ doma꞉ib.
27039	ACT 2:21	Ho꞉len a꞉namio꞉ kaluka꞉isale abeyo꞉ Godeya꞉lo꞉ asuwa꞉foma꞉kilo꞉ tolo꞉ dulugu sa꞉la꞉lab a꞉no꞉, iyo꞉ wa꞉lo꞉ mo꞉diaki, ga꞉li mesea꞉ki ta꞉fa꞉no꞉.”’
27040	ACT 2:22	“Isolael kalu gio꞉, ni towa꞉ dabuma. Nasa꞉la꞉d kalu Ya꞉su, elo꞉ molo ha꞉na꞉no꞉ gilo꞉ amio꞉ dimido꞉ a꞉no꞉, giliyo꞉ ba꞉ba꞉ ko꞉lo꞉ E hendele Godeya꞉ da꞉fea꞉sa꞉ga꞉ iliga꞉fo꞉lo꞉b a꞉la꞉asuluma꞉ki go꞉.
27041	ACT 2:23	Godeya꞉yo꞉ Ya꞉suwo꞉ gili dagiya꞉ difa꞉ ko꞉lo꞉ giliyo꞉ E mogago꞉ kalu nolbo꞉ i malana aluma꞉kilo꞉ ta꞉fo꞉ a꞉no꞉, gili sa꞉ndan o꞉ngo꞉ ko꞉lo꞉ giliyo꞉ a꞉la꞉dimidama꞉ib a꞉la꞉liki, Godeya꞉yo꞉ mo꞉lu da꞉fefa꞉.
27042	ACT 2:24	Ko꞉sega Godeya꞉yo꞉ Ya꞉suwo꞉ soma꞉no꞉ nagalo꞉loba꞉da꞉yo꞉ ga꞉li sili alitaki, Eyo꞉ mela꞉no꞉wo꞉ a꞉dimiabiki, Ya꞉su e a꞉ma꞉la꞉yo꞉ a꞉na dasi. Mo꞉wo꞉ sowana꞉ halaido꞉ a꞉ma꞉yo꞉ Ya꞉suwo꞉ mada mo꞉ta꞉li.
27043	ACT 2:25	Taminde amio꞉ Debidiya꞉yo꞉ Ya꞉su amilo꞉ fa꞉la꞉doma꞉ibo꞉ ko꞉lo꞉ asulaki, towo꞉ a꞉la꞉sio꞉, “‘Ho꞉leno꞉ tambowo꞉ Alan E ne o꞉lia꞉ elena ba꞉ba꞉. E ni dagi ililiba iliki, ni asuwa꞉fa꞉ib ko꞉lo꞉ ne mada mo꞉tagima꞉no꞉.
27044	ACT 2:26	A꞉la꞉go꞉ko꞉lo꞉ ne sagalo꞉ siliki, niyo꞉ towo꞉ mada sagalo꞉le sa꞉la꞉lo꞉l. Ne sowalikiyo꞉, Giyo꞉ ne dane ane hen a꞉namio꞉ mo꞉ta꞉fa꞉ib. A꞉la꞉ta꞉ga꞉ gilo꞉ da꞉feyo꞉ kalu a꞉no꞉ hesema꞉kiyo꞉ mo꞉ta꞉fa꞉ib. A꞉la꞉fo꞉ko꞉lo꞉ ne to a꞉no꞉ fanda asulaki, mada mo꞉keleasuluma꞉no꞉.
27046	ACT 2:28	Giyo꞉ ne mela꞉no꞉lo꞉ dia꞉no꞉ tog a꞉no꞉ wido꞉ ko꞉lo꞉ ne Ge o꞉lia꞉ silikiyo꞉, mada sagalo꞉wo꞉ alan doma꞉no꞉.’
27047	ACT 2:29	“Ni nao i, to a꞉no꞉ Debidi eyo꞉ a꞉la꞉sio꞉ ko꞉lo꞉ niyo꞉ o꞉go꞉ gimo꞉wo꞉ fanda so꞉lo꞉l. Mo꞉luwo꞉ nili ma꞉mu Debidi e sowabiki daido꞉ ko꞉lo꞉ elo꞉ daido꞉ hen a꞉no꞉ nilo꞉ sab anib wena a꞉lab.
27048	ACT 2:30	E dinali sa꞉lan kalu ko꞉lo꞉ Debidiya꞉ e ma꞉mu amilo꞉ kalu so꞉wa fa꞉la꞉dowab a꞉ma꞉yo꞉, tif amio꞉ e misa꞉ kalu dowaki, hen elo꞉ a꞉no꞉ bo꞉fo꞉mela꞉ib a꞉la꞉liki, Godeya꞉lo꞉ dinali sio꞉ a꞉no꞉, eyo꞉ asulo꞉.
27049	ACT 2:31	A꞉la꞉fo꞉ko꞉lo꞉ Debidi eyo꞉ Godeya꞉lo꞉ dimidama꞉ib a꞉no꞉ e tamin amio꞉ asulakiyo꞉ a꞉la꞉sio꞉, ‘E sowalikiyo꞉, dane ane hen a꞉namio꞉ mo꞉ta꞉fa꞉ib a꞉la꞉ta꞉ga꞉ ene do꞉mo꞉wo꞉ mo꞉hesema꞉ib.’ Debidi eyo꞉ to a꞉no꞉ sa꞉lakiyo꞉, Gode elo꞉ da꞉feyo꞉ kalu a꞉ma꞉la꞉do꞉ dasima꞉ib a꞉no꞉ ko꞉lo꞉ sio꞉.
27050	ACT 2:32	Gode Eyo꞉ Ya꞉su E mela꞉no꞉wo꞉ a꞉ma꞉la꞉ dimia꞉sa꞉ga꞉lo꞉ dasi alifa꞉ a꞉no꞉, nio꞉ tambo ninin siya꞉ ba꞉ba꞉ ko꞉lo꞉ so꞉lo꞉l.
27051	ACT 2:33	Godeya꞉yo꞉ Ya꞉suwo꞉ wabudakiyo꞉, ene wiyo꞉ dulugu sa꞉laki, Ya꞉su e Godeya꞉ dagi ililiba mesea꞉ki ta꞉fo꞉. Do Godeya꞉lo꞉ dinali sio꞉ aumbo꞉ dimidakiyo꞉, Ya꞉sumo꞉wo꞉ Mamayo꞉ dimi ko꞉lo꞉ gilido꞉ o꞉go꞉do꞉ ba꞉dab o꞉lia꞉ da꞉dab o꞉lia꞉ a꞉no꞉, Eyo꞉ ni amio꞉ ko꞉go꞉lu alifelab.
27052	ACT 2:34	Debidi e Hebeneyo꞉ halona mo꞉ane ko꞉sega eyo꞉ a꞉la꞉sio꞉, “‘Godeya꞉yo꞉ ni Alanbo꞉wo꞉ a꞉la꞉sio꞉, Niyo꞉ gis kalu gilo꞉wo꞉ gi ha꞉g amio꞉ semo꞉ dia꞉talikiyo꞉, ge ni dagi ililiba siliki, ne o꞉lia꞉ bo꞉fo꞉lubi.’
27054	ACT 2:36	“A꞉la꞉fo꞉ko꞉lo꞉ Isolael kaluka꞉isale gio꞉ tambo dinafa asuluma. Gilido꞉ Ya꞉su ko꞉lo꞉ i malana amilo꞉ sana so꞉no꞉ a꞉no꞉, Yesuwo꞉ Godeya꞉ Enedo꞉ Da꞉feyo꞉ Kalu doma꞉ki ta꞉fo꞉. A꞉la꞉ta꞉ga꞉ Kalu Alan doma꞉ki da꞉feyo꞉wo꞉ e” Bida eyo꞉ towo꞉ a꞉la꞉wido꞉.
27055	ACT 2:37	Kaluka꞉isaleyo꞉ to Bida elo꞉ widab a꞉no꞉ da꞉dakiyo꞉, iyo꞉ to a꞉ma꞉yo꞉ himuwa olabiki, iliyo꞉ Bidayo꞉ a꞉la꞉ta꞉ga꞉ Iliga꞉felo꞉ kalu nol o꞉lia꞉mo꞉wo꞉ a꞉la꞉dabuba꞉ba꞉, “Ni nao i, niliyo꞉ waga dimidama꞉no꞉wele?”
27056	ACT 2:38	A꞉la꞉dabuba꞉dabiki, Bida eyo꞉ a꞉la꞉sio꞉, “Man mogago꞉ gilido꞉ ena꞉li ena꞉li a꞉la꞉do꞉ dimida꞉leno꞉ ta꞉taki, asugo꞉ nodola꞉sa꞉ga꞉yo꞉, Ya꞉su Kelisowa꞉ wiya ho꞉na to꞉loma. A꞉la꞉dimidalikiyo꞉ Godeya꞉yo꞉ gilo꞉ mogago꞉ dimida꞉leno꞉ hala꞉sa꞉ga꞉, Eyo꞉ Ene Mamayo꞉ boba dimia꞉ib.
27057	ACT 2:39	Godeya꞉lo꞉ tamin dinali sio꞉ a꞉no꞉ gimo꞉wo꞉lo꞉, gi so꞉wa i o꞉mo꞉wo꞉lo꞉, kaluka꞉isale ko꞉na꞉lo꞉ a꞉lab o꞉mo꞉wo꞉lo꞉ a꞉la꞉ta꞉ga꞉ kaluka꞉isale abeyo꞉ Gode Alan Elo꞉ amilo꞉ mena꞉kilo꞉ ho꞉idab o꞉mo꞉ tambo sio꞉.” Bida eyo꞉ a꞉la꞉sio꞉.
27058	ACT 2:40	Bida eyo꞉ imo꞉wo꞉ towo꞉ ko꞉li ko꞉lilo꞉ wida꞉sa꞉ga꞉, hagugo꞉ towo꞉lo꞉ imo꞉wo꞉ a꞉la꞉sio꞉, “Kaluka꞉isale o꞉gdo꞉ mogago꞉lo꞉ dimida꞉likilo꞉ sab we wa꞉dema꞉ib ko꞉lo꞉ gio꞉lo꞉ Godeya꞉yo꞉ wa꞉deabena꞉ki, dinafa dowa꞉bi” a꞉la꞉sio꞉.
27059	ACT 2:41	A꞉la꞉fo꞉ko꞉lo꞉ kaluka꞉isale Bidaya꞉ to sa꞉labdo꞉ tilidabu a꞉no꞉, iyo꞉ ho꞉na to꞉lofelo꞉ ko꞉lo꞉ ho꞉len a꞉namilo꞉ ho꞉gi tilidabu kaluka꞉isale agelo꞉wo꞉, dausa꞉no꞉ otalen ko꞉lo꞉ fa꞉la꞉dowo꞉. (3,000)
27060	ACT 2:42	Ho꞉gi tilidabu kaluka꞉isale iliyo꞉ Iliga꞉felo꞉ kaluwa꞉lo꞉ widab a꞉no꞉ tilida꞉dakiyo꞉, egele dowa꞉sen. A꞉la꞉ta꞉ga꞉ ma꞉no꞉wo꞉ ua sagana꞉likiyo꞉, Yesuwa꞉ asulo꞉ ma꞉no꞉wo꞉lo꞉ ua nakiyo꞉, Godemo꞉ dulugu sa꞉la꞉sen. Iyo꞉ a꞉no꞉ ko꞉lo꞉ dimidakiyo꞉, halaido꞉ dimida꞉len.
27061	ACT 2:43	Iliga꞉felo꞉ kaluwa꞉yo꞉ molo ha꞉na꞉no꞉wo꞉ dimidabiki, kaluka꞉isaleyo꞉ tambo a꞉no꞉ ba꞉dakiyo꞉ molo tandeakiyo꞉, Gode wiyo꞉ ko꞉lo꞉ wabudo꞉.
27062	ACT 2:44	Tilidabu kaluka꞉isale iyo꞉ asulo꞉ imilise dowaki, kelego꞉ da꞉lab ilido꞉ a꞉no꞉ tambo ua dia꞉mela꞉no꞉ a꞉la꞉liki ta꞉fo꞉.
27063	ACT 2:45	A꞉la꞉go꞉ko꞉lo꞉ kalu nolba꞉yo꞉ ene hen o꞉lia꞉ kelego꞉ o꞉lia꞉yo꞉ nowo꞉mbo꞉ kililia꞉sa꞉ga꞉, mole diab a꞉no꞉ kalu hebe da꞉lab o꞉mo꞉ sa꞉ga꞉liki ane.
27064	ACT 2:46	Ho꞉leno꞉ tambowo꞉ iyo꞉ asulo꞉wo꞉ imilig dia꞉taki, Godeya꞉ malilo꞉ aya kegea꞉sen. Iyo꞉ Yesu asulo꞉ ma꞉no꞉ naki o꞉lia꞉ ma꞉no꞉le nakiyo꞉lo꞉, noma꞉ aya kegea꞉liki a꞉lakiyo꞉, iyo꞉ mo꞉kanulu naki, ma꞉no꞉wo꞉ tambowo꞉ sagala꞉liki na꞉sen.
27065	ACT 2:47	Iliyo꞉ Godeyo꞉ wabuda꞉len a꞉la꞉ta꞉ga꞉ kaluka꞉isale tambowa꞉yo꞉ iyo꞉ nafa dowab a꞉la꞉asulo꞉. Ho꞉leno꞉ tambowo꞉ Godeya꞉yo꞉ tilidabu kalu ho꞉gi nolo꞉ i a꞉na gasalita꞉sen.
27066	ACT 3:1	Ho꞉len no amio꞉, dulugu sa꞉la꞉seno꞉ ofa꞉siyo꞉ asola dowabiki, Bida o꞉lia꞉ Yon o꞉lia꞉yo꞉ Godeya꞉ malilo꞉ aya ha꞉na꞉ni ane.
27067	ACT 3:2	Godeya꞉ malilo꞉ a amilo꞉ tog nowo꞉ “Gesego꞉” a꞉la꞉sa꞉la꞉sen ko꞉lo꞉ a꞉la꞉yo꞉ tog a꞉na ha꞉nakiyo꞉, giligo꞉ sen kalu nowo꞉ tog aniba sena ba꞉ba꞉. Kalu a꞉no꞉ anowa꞉ e sa꞉la꞉liakiyo꞉, e giligo꞉ o꞉ngo꞉ sa꞉la꞉li ko꞉lo꞉, kaluka꞉isaleyo꞉ aya ha꞉na꞉lab o꞉mo꞉wo꞉ moleyo꞉ ha꞉iya꞉melea꞉ki, ho꞉leno꞉ tambo kalu nolba꞉yo꞉ e ga꞉lilia꞉ga꞉, Tog Gesego꞉ a꞉na tagai ta꞉lila꞉sen.
27068	ACT 3:3	Giliga꞉sen kalu a꞉no꞉ Bida o꞉lia꞉ Yon o꞉lia꞉yo꞉ fa꞉la꞉dowabiki ba꞉da꞉sa꞉ga꞉yo꞉, a꞉la꞉mo꞉wo꞉ moleyo꞉ ha꞉iyo꞉.
27069	ACT 3:4	A꞉la꞉ma꞉yo꞉ e ko꞉lo꞉ sikudu ba꞉daki, Bida eyo꞉ emo꞉wo꞉ a꞉la꞉sio꞉, “Na꞉no꞉ bo꞉ba!”
27070	ACT 3:5	Eyo꞉ mole dia꞉no꞉ a꞉la꞉asulaki, a꞉la꞉yo꞉ a꞉na sikudu ba꞉ba꞉.
27071	ACT 3:6	Ko꞉sega Bida eyo꞉ emo꞉wo꞉ a꞉la꞉sio꞉, “Ne mole imilig nowo꞉ mada aundo꞉ma ko꞉sega, nilo꞉ da꞉labo꞉ we gemo꞉ dimia꞉nigo꞉l. Nasa꞉la꞉d kalu, Ya꞉su Kelisowa꞉ wi halaido꞉ a꞉ma꞉yo꞉, ge dasilia꞉ga꞉ hamana!”
27072	ACT 3:7	Bida eyo꞉ a꞉la꞉sa꞉la꞉sa꞉ga꞉, e dasilima꞉ki, dagi ililiba꞉ gasiliabiki, wigibo a꞉naka kalu a꞉ma꞉ gib o꞉lia꞉ gibo꞉ kagoman o꞉lia꞉ halaido꞉ dowabiki, ho꞉lu ya꞉ba꞉sa꞉ga꞉, e a꞉na ane. A꞉la꞉ta꞉ga꞉ egele Godeya꞉ malilo꞉ a usa tiha꞉nakiyo꞉, e sagala꞉liki, ho꞉lu yabala꞉liki a꞉la꞉i siaki, Godeyo꞉ ko꞉lo꞉ wabulu sa꞉la꞉li ane.
27074	ACT 3:9	Kaluka꞉isale tambowa꞉yo꞉ e ha꞉na꞉ga꞉ ha꞉nakiyo꞉, Godeya꞉ wiyo꞉ wabuda꞉i ha꞉nabiki ba꞉ba꞉ ko꞉lo꞉, iliyo꞉ e giliga꞉sen kalu Tog Gesego꞉wa silikilo꞉ molelo꞉ ha꞉iya꞉sen o꞉mo꞉lo꞉b a꞉la꞉asulaki, iliyo꞉ e falele alifa꞉lo꞉b a꞉la꞉asula꞉sa꞉ga꞉, iyo꞉ iligakiyo꞉ molo asulo꞉.
27076	ACT 3:11	Iyo꞉ Godeya꞉ Malilo꞉ aya, “Solomona꞉ Isagen” a꞉la꞉do꞉ sa꞉la꞉sen a꞉na siliki, kalu a꞉no꞉ Bida o꞉lia꞉ Yon o꞉lia꞉ya ta꞉li dofo꞉labiki, kaluka꞉isaleyo꞉ molo tanda꞉sa꞉ga꞉, ilo꞉wa nai da꞉laido꞉.
27077	ACT 3:12	Bida e kaluka꞉isale kegeab a꞉no꞉ ba꞉da꞉sa꞉ga꞉yo꞉, imo꞉wo꞉ a꞉la꞉sio꞉, “Isolael kalu gio꞉, dimidab we ba꞉dakiyo꞉, waga molo tandeaya? Nanin halaido꞉wa꞉yo꞉ kalu we mo꞉falelo꞉ a꞉la꞉ta꞉ga꞉ na꞉no꞉ Godeya꞉ siwa꞉l amio꞉lo꞉ digalo꞉ kalu ko꞉lo꞉ we a꞉na dimido꞉lba. A꞉la꞉fo꞉ko꞉lo꞉ giliyo꞉ na꞉n ba꞉da꞉sa꞉ga꞉yo꞉ moda꞉so꞉bo.
27078	ACT 3:13	Nili ma꞉mu A꞉bla꞉hamo꞉, Aisego꞉, Yekobo꞉ i a꞉ma꞉ Godeya꞉yo꞉ wi alano꞉ Ene Nanogdo꞉ dian kalu, Ya꞉sumo꞉ dimi. Ko꞉sega kalu a꞉no꞉ giliyo꞉ gamani kalumo꞉ sanama꞉ki dimia꞉sa꞉ga꞉, Bailata eyo꞉ e ga꞉li hamana꞉ki ta꞉fa꞉no꞉ asulab, ko꞉sega gio꞉ Bailatdo꞉wa silikiyo꞉, e gola ba꞉ba꞉.
27079	ACT 3:14	Ya꞉su e mada malilo꞉ digalo꞉ kalu ko꞉sega giliyo꞉ e gola ba꞉da꞉sa꞉ga꞉, kalu noldo꞉ yasala꞉sen a꞉no꞉ Bailatbo꞉wo꞉ ga꞉li fagegefoma a꞉la꞉sa꞉laki, giliyo꞉ kaluka꞉isalemo꞉lo꞉ mela꞉no꞉lo꞉ dimia꞉sen kalu a꞉no꞉ sana sowo꞉. Ko꞉sega Godeya꞉yo꞉ e a꞉ma꞉la꞉ dasi alitabiki, nio꞉ tambo ba꞉ba꞉.
27081	ACT 3:16	A꞉la꞉fo꞉ko꞉lo꞉ kalu gilo꞉ ba꞉da꞉sen we, e Ya꞉suwa꞉ wiya tilida꞉dakiyo꞉, ene tilidabu a꞉ma꞉yo꞉ e falele alifa꞉. Ya꞉suwa꞉ wi o꞉lia꞉ tilidabu eya a꞉la꞉ta꞉ga꞉ mio꞉ o꞉lia꞉ma꞉yo꞉ e falele alifa꞉ ko꞉lo꞉ o꞉go꞉ e ga꞉li sabiki, gio꞉ tambo ba꞉dab.
27082	ACT 3:17	“Nao i, gi o꞉lia꞉ gili misa꞉ kalu o꞉lia꞉ma꞉lo꞉ Ya꞉sumo꞉lo꞉ dimido꞉ a꞉no꞉ gio꞉ babale dofo꞉liki dimido꞉, niyo꞉ a꞉la꞉asulo꞉.
27083	ACT 3:18	Mo꞉luwo꞉ Godeya꞉yo꞉ enedo꞉ dinali sa꞉lan kaluwa꞉ sama꞉ki, towo꞉ imo꞉wo꞉ tambo dimiakiyo꞉, Enedo꞉ da꞉feyo꞉ kalu a꞉no꞉ odo꞉ sia꞉la꞉ga꞉ soma꞉ib a꞉la꞉saefa꞉ ko꞉lo꞉, o꞉go꞉ Godeya꞉yo꞉ a꞉la꞉ka dimidama꞉ki ta꞉fo꞉.
27084	ACT 3:19	A꞉la꞉fo꞉ko꞉lo꞉ Godeya꞉yo꞉ gili mogago꞉ dimida꞉sen a꞉no꞉ hala꞉ma꞉ki, gio꞉ mogago꞉wo꞉ ta꞉ta꞉sa꞉ga꞉, Godelo꞉loba꞉da꞉ nodoma. Godeya꞉yo꞉ Enedo꞉ da꞉feyo꞉ kalu, Ya꞉su E a꞉ma꞉la꞉ iliga꞉talikiyo꞉, Alan a꞉no꞉ gi o꞉lia꞉ siliki, ha꞉salo꞉ mesa꞉no꞉ ho꞉len nafale gimo꞉wo꞉ dimina꞉ki, gio꞉ asugo꞉ nodoma.
27086	ACT 3:21	O꞉go꞉ Ya꞉su E Hebeneya ilikiyo꞉, Godeya꞉lo꞉ kelego꞉wo꞉ tambo ho꞉gi fa꞉la꞉doma꞉nigab ho꞉len a꞉no꞉ ko꞉lo꞉ yasisab. Ho꞉len a꞉no꞉ tamin amio꞉ Godeya꞉yo꞉ Enedo꞉ dinali sa꞉lan kaluwa꞉ sama꞉ki, towo꞉ imo꞉ salifa꞉.
27087	ACT 3:22	Tamin amio꞉ Moses eyo꞉ a꞉la꞉sio꞉, ‘Gode Alana꞉yo꞉ ne ko꞉lo꞉ gimo꞉lo꞉ iliga꞉fo꞉ aumbo꞉, dinali sa꞉lan kalu noma꞉yo꞉ gimo꞉wo꞉ sama꞉kiyo꞉, Isolael kalu go꞉no꞉na a꞉la꞉ta꞉ga꞉ iliga꞉fa꞉ib ko꞉lo꞉, giliyo꞉ to elo꞉ sa꞉labo꞉ tilida꞉da꞉bi.
27088	ACT 3:23	Kalu abeyo꞉ dinali sa꞉lan kaluwa꞉ to sa꞉lab a꞉no꞉ mo꞉tilida꞉dalikiyo꞉, Godeya꞉yo꞉ aloba꞉da꞉sa꞉ga꞉ yasala꞉ma꞉ib.’ Moses eyo꞉ a꞉la꞉saefa꞉.
27089	ACT 3:24	“Tamina Godeya꞉ dinali sa꞉lan kalu, Samuel eya mo꞉mo꞉data꞉ga꞉lo꞉ mio꞉wo꞉, o꞉go꞉do꞉ fa꞉la꞉dowab we iliyo꞉ a꞉no꞉ ko꞉lo꞉ tambo sio꞉.
27090	ACT 3:25	Gi ma꞉mu imo꞉lo꞉ dinali sa꞉lan kalu tamin amilo꞉ sio꞉ a꞉no꞉, giliyo꞉lo꞉ a꞉no꞉ko꞉ dia꞉ib. A꞉la꞉ta꞉ga꞉ Godeya꞉yo꞉ A꞉bla꞉ham o꞉lia꞉ e ma꞉mui o꞉lia꞉mo꞉wo꞉ towo꞉ saitakiyo꞉, ‘Gilo꞉ so꞉wa sa꞉la꞉la꞉i ha꞉nab i a꞉na a꞉la꞉ta꞉ga꞉yo꞉, henfelo꞉ amilo꞉ so꞉lo꞉ mesa꞉ib a꞉no꞉ tambo halaido꞉ mesea꞉ki ta꞉fa꞉no꞉.’ To saefa꞉ a꞉no꞉ gimo꞉wo꞉lo꞉ sio꞉.
27091	ACT 3:26	A꞉la꞉fo꞉ko꞉lo꞉ gio꞉ man mogago꞉ dimida꞉seno꞉ ta꞉ta꞉sa꞉ga꞉, halaido꞉wo꞉ dimina꞉ki, Godeya꞉ Ene nanogdo꞉ dian kaluwo꞉ da꞉fea꞉sa꞉ga꞉, gilo꞉wa tamina iliga꞉fo꞉.”
27092	ACT 4:1	Bida o꞉lia꞉ Yon o꞉lia꞉yo꞉ kaluka꞉isalemo꞉wo꞉ o꞉wida꞉lena, Godeya꞉ Malilo꞉ alo꞉ bo꞉fo꞉lowan misa꞉ kalu o꞉lia꞉ Godemo꞉lo꞉ boba so꞉mia꞉sen kalu i o꞉lia꞉, Sadusi kaluwo꞉ iyo꞉ tambo ya꞉ga꞉ a꞉la꞉lo꞉wa fa꞉la꞉dowo꞉.
27093	ACT 4:2	A꞉la꞉ma꞉yo꞉ kaluka꞉isalemo꞉wo꞉ Ya꞉su E dasi ko꞉lo꞉ kaluka꞉isale nolo꞉ o꞉li dasima꞉ib a꞉la꞉likilo꞉ wida꞉lab a꞉no꞉ kalu i a꞉no꞉ da꞉da꞉sa꞉ga꞉ mada mo꞉beo꞉.
27094	ACT 4:3	A꞉la꞉fo꞉ko꞉lo꞉ iliyo꞉ kalu a꞉la꞉ a꞉no꞉ mo꞉walilima꞉ni ta꞉li ko꞉sega, ofo꞉ tinabiki, iliyo꞉ ali mo꞉walilima꞉no꞉ a꞉la꞉ta꞉ga꞉ a꞉la꞉yo꞉ dibolo a usa disalifa꞉.
27095	ACT 4:4	Ko꞉sega a꞉la꞉ma꞉lo꞉ to wida꞉lab a꞉namio꞉, kaluka꞉isale modo꞉wo꞉ da꞉da꞉sa꞉ga꞉ tilidabu ko꞉lo꞉ kalu agelo꞉wo꞉ dausa꞉no꞉ bila꞉fo꞉ (5,000.)
27096	ACT 4:5	Kea꞉fo Yu kogodo꞉ kalu o꞉lia꞉ elelo꞉ asulo꞉ kalu o꞉lia꞉ Yu misa꞉ kalu iyo꞉ tambo Ya꞉lusalem a꞉na kegea꞉sa꞉ga꞉, bobalo꞉ so꞉mia꞉sen misa꞉ kalu, Anas o꞉lia꞉ ene eso꞉lo꞉ nolo꞉lo꞉ a꞉la꞉ta꞉ga꞉ Kaiafaso꞉lo꞉, Yono꞉lo꞉, Alegsandayo꞉lo꞉, i a꞉no꞉ tambo Ya꞉lusalem a꞉na kegeo꞉.
27098	ACT 4:7	Iliyo꞉ a꞉la꞉yo꞉ tililia꞉ga꞉ ilo꞉ a꞉lab us a꞉na ta꞉taki, a꞉la꞉mo꞉wo꞉ a꞉la꞉dabuba꞉ba꞉, “Gaindo꞉ dimido꞉ a꞉no꞉, halaido꞉wo꞉ o꞉ba dia꞉sa꞉ga꞉ dimido꞉wo꞉? Abe wi a꞉la꞉ta꞉ga꞉ dimido꞉wo꞉?”
27099	ACT 4:8	A꞉la꞉dabuba꞉dabiki, Bida e, Godeya꞉ Mamayo꞉ wa꞉lifo꞉ ko꞉lo꞉ eyo꞉ towo꞉ imo꞉wo꞉ a꞉la꞉sio꞉, “Yu misa꞉ kalu o꞉lia꞉ kogodo꞉ kalu gio꞉ dabuma.
27100	ACT 4:9	Naindo꞉ giligo꞉ sen kalu ko꞉lo꞉ asuwa꞉takilo꞉, falele alifa꞉ a꞉no꞉ da꞉da꞉sa꞉ga꞉, giliyo꞉ o꞉go꞉ na꞉no꞉ a꞉na mo꞉walilab ko꞉lo꞉ giyo꞉lo꞉ Isolael kaluwo꞉lo꞉ tambo asuluma꞉ki, niyo꞉ walama꞉no꞉. Kalu giligo꞉ sen ko꞉lo꞉ falela꞉sa꞉ga꞉lo꞉ kagayab we, Nasa꞉la꞉d kalu, Ya꞉su Kelisowa꞉ wi halaido꞉ a꞉ma꞉yo꞉ mada falele alifa꞉. Giliyo꞉ Ya꞉su E, i malana sana sowo꞉ ko꞉lo꞉ Godeya꞉yo꞉ E a꞉ma꞉la꞉ a꞉dasi alifa꞉.
27102	ACT 4:11	Godeya꞉ bugo꞉wa sa꞉lakiyo꞉, ‘U ko꞉lo꞉ alo꞉ diana꞉lo꞉ sandifo꞉ a꞉no꞉ o꞉go꞉ u a꞉no꞉ alo꞉ halaido꞉lo꞉ ta꞉li mesa꞉no꞉ dowab’ ko꞉lo꞉ u a꞉no꞉ Ya꞉su E.
27103	ACT 4:12	Kaluka꞉isale gasilima꞉kilo꞉, Godeya꞉lo꞉ henfelo꞉ wenamilo꞉ iliga꞉fo꞉ kalu nowo꞉ mada aundo꞉ma. Ya꞉su imilise Eyo꞉sa kaluka꞉isaleyo꞉ asuwa꞉taki, a꞉ma꞉la꞉ gasilia꞉ib” Bida eyo꞉ imo꞉wo꞉ a꞉la꞉sio꞉.
27104	ACT 4:13	Iliyo꞉ a꞉la꞉yo꞉ mo꞉sugululo꞉ a꞉la꞉asulo꞉ ko꞉sega towo꞉ halaido꞉ sa꞉lab a꞉no꞉ da꞉dakiyo꞉, molo asulo꞉ ko꞉lo꞉ iliyo꞉ kalu a꞉la꞉ we tamin amio꞉ Ya꞉su o꞉lia꞉lo꞉ sia꞉leno꞉ o꞉mo꞉lo꞉b a꞉la꞉bo꞉ a꞉na asulo꞉.
27105	ACT 4:14	Ko꞉sega giligo꞉ kalu ko꞉lo꞉ falelo꞉ a꞉no꞉ a꞉la꞉ o꞉lia꞉lo꞉ kagayab a꞉no꞉ iliyo꞉ ba꞉ba꞉ ko꞉lo꞉, iliyo꞉ to halaido꞉wo꞉ a꞉la꞉mo꞉wo꞉ mo꞉sio꞉.
27106	ACT 4:15	A꞉la꞉fo꞉ko꞉lo꞉ iliyo꞉ a꞉la꞉yo꞉ ha꞉la꞉ya o꞉hamana a꞉la꞉ta꞉ga꞉, egelebo꞉ towo꞉ a꞉la꞉nenelo꞉, “Niliyo꞉ kalu a꞉la꞉ o꞉mo꞉wo꞉ waga dimidama꞉no꞉wele? A꞉la꞉ma꞉lo꞉ molo ha꞉na꞉no꞉ dimido꞉ a꞉no꞉ Ya꞉lusalem kaluka꞉isaleyo꞉ tambo o꞉ma asululi ko꞉lo꞉ niliyo꞉ ‘we hendelema’ a꞉la꞉bo꞉ mo꞉sa꞉ma꞉no꞉.
27108	ACT 4:17	Ko꞉sega a꞉la꞉ma꞉lo꞉ dimido꞉ a꞉no꞉ kaluka꞉isale nolo꞉ da꞉daba꞉na꞉ki, a꞉la꞉mo꞉wo꞉ towo꞉ halaido꞉ a꞉la꞉sa꞉ma꞉no꞉, ‘Ga꞉go꞉ Ya꞉suwa꞉ wi amilo꞉ wa꞉kabiyo꞉ wida꞉so꞉bo!’ a꞉la꞉ka sa꞉ma꞉nigo꞉l.”
27109	ACT 4:18	Iliyo꞉ a꞉la꞉nenela꞉sa꞉ga꞉ dotakiyo꞉, a꞉la꞉yo꞉ a꞉ma꞉la꞉ mena꞉ki ho꞉lelia꞉ga꞉, a꞉la꞉mo꞉wo꞉ a꞉la꞉sio꞉, “Gaino꞉ Ya꞉suwa꞉ wi sa꞉lakiyo꞉ wa꞉kabiyo꞉ mada wida꞉so꞉bo,” a꞉la꞉liki iliyo꞉ halaido꞉ sio꞉.
27110	ACT 4:19	Ko꞉sega Bida o꞉lia꞉ Yon dia꞉ma꞉yo꞉ a꞉ma꞉la꞉yo꞉ a꞉la꞉sio꞉, “Na꞉no꞉ gili towo꞉ ko꞉lo꞉ kudu ha꞉na꞉no꞉ kibo꞉bowo꞉, Godeya꞉ towo꞉ mo꞉kuduha꞉na꞉no꞉ domabe ko꞉lo꞉ ginino꞉ dinafa alobana ba꞉da꞉bi.
27111	ACT 4:20	Mo꞉wo꞉ naindo꞉ ba꞉ba꞉yo꞉ a꞉la꞉ta꞉ga꞉ dabu a꞉no꞉ mada tambo wida꞉mela꞉no꞉ ko꞉lo꞉ mo꞉ka꞉ma꞉no꞉.”
27112	ACT 4:21	A꞉la꞉ma꞉yo꞉ a꞉la꞉sa꞉labiki, iliyo꞉ a꞉la꞉mo꞉wo꞉ towo꞉ wa꞉ka halaido꞉ sa꞉la꞉sa꞉ga꞉, a꞉la꞉yo꞉ ga꞉li iliga꞉fo꞉. Mo꞉wo꞉ Ya꞉lusalem kaluka꞉isale ililo꞉ ba꞉ba꞉ a꞉no꞉ Godeyo꞉ wabudabiki, Yu misa꞉ kaluwa꞉yo꞉ a꞉la꞉ falasila꞉ma꞉no꞉wo꞉ mo꞉dowo꞉.
27113	ACT 4:22	Mo꞉wo꞉ giligo꞉ sen kalu e, donayo꞉ do꞉la꞉fo꞉ fa꞉la꞉da꞉in dota꞉sa꞉ga꞉, a꞉na falelo꞉.
27114	ACT 4:23	A꞉la꞉yo꞉ ga꞉li iliga꞉tab amio꞉, tilidabu kaluka꞉isalelo꞉ saba ha꞉na꞉sa꞉ga꞉, bobalo꞉ so꞉mia꞉sen misa꞉ kalu o꞉lia꞉ Yu ko꞉go꞉do꞉ kalu o꞉lia꞉ma꞉lo꞉ sio꞉ a꞉no꞉ a꞉la꞉ma꞉yo꞉ imo꞉wo꞉ tambo malolo꞉ me.
27115	ACT 4:24	Iliyo꞉ a꞉no꞉ da꞉da꞉sa꞉ga꞉yo꞉, tambo kegea꞉sa꞉ga꞉ Godemo꞉wo꞉ a꞉la꞉dulugu sio꞉, “Wiso꞉ Alan, Ge akino꞉lo꞉, henfelo꞉wo꞉lo꞉, ho꞉no꞉lo꞉ a꞉la꞉ta꞉ga꞉ kelego꞉ tambo usamilo꞉ a꞉lab a꞉no꞉, tambo Gi dimido꞉.
27116	ACT 4:25	Nili ma꞉mu Debidi e Gi nanogdo꞉ dian kalu ko꞉lo꞉ Godeya꞉ Mamaya꞉ ene halaido꞉ emo꞉ dimiabiki, Gi to we a꞉na sa꞉sa꞉lo꞉, “‘Henfelo꞉ kaluka꞉isaleyo꞉ waga mada kulufa꞉yabele? Iliyo꞉ Gode o꞉lia꞉ madalilo꞉ babuma꞉no꞉ saitab we, waga nenelabele?
27117	ACT 4:26	Henfelo꞉ amilo꞉ misa꞉ kaluwo꞉ kegea꞉sa꞉ga꞉, Gode o꞉lia꞉ Enedo꞉ Da꞉feyo꞉ Kalu o꞉lia꞉yo꞉ babuma꞉ni dimidaliab.’
27118	ACT 4:27	Go꞉no꞉n towo꞉ bugo꞉ amio꞉ a꞉la꞉sa꞉sa꞉lo꞉ ko꞉lo꞉ o꞉g a꞉namio꞉ Helot o꞉lia꞉ Bontius Bailat o꞉lia꞉ Yuma kalu o꞉lia꞉ Isolael kalu o꞉lia꞉yo꞉ Ya꞉lusalem wena kegea꞉sa꞉ga꞉, Ya꞉su, Gili nanogdo꞉ digalelo꞉ dian kalu e sana soma꞉no꞉wo꞉ togo꞉ kedo꞉. Ya꞉su E Go꞉no꞉n Da꞉feyo꞉ Kalu ko꞉lo꞉ ililo꞉ kegeasa꞉ga꞉lo꞉ dimido꞉ a꞉no꞉ tambo, mo꞉luwo꞉ Go꞉no꞉n asulo꞉ o꞉lia꞉ Go꞉no꞉n halaido꞉ o꞉lia꞉ma꞉ saefa꞉ ko꞉lo꞉ fa꞉la꞉dowo꞉.
27120	ACT 4:29	A꞉la꞉fo꞉ko꞉lo꞉ Alan Ge, Yu misa꞉ kalu ililo꞉ nimo꞉lo꞉ to halaido꞉ sio꞉ a꞉no꞉ asulaki, go꞉no꞉n nanog dian kalu nio꞉ Gi towo꞉ halaido꞉ walama꞉ki, asuwa꞉ta꞉biyo꞉.
27121	ACT 4:30	Gode go꞉no꞉n halaido꞉wa꞉ widakiyo꞉, gi nanog dian kalu, Ya꞉suwa꞉ wiya ilikiyo꞉, kaluka꞉isaleyo꞉ falele alifelaki, molo ha꞉na꞉no꞉ nolo꞉ dimida꞉lubi.”
27122	ACT 4:31	Iliyo꞉ dulugu sa꞉la꞉sa꞉ga꞉ dotabiki, a ilo꞉ sen a꞉no꞉ ida꞉la꞉sa꞉ga꞉, Mamayo꞉ i amio꞉ wa꞉litabiki, iyo꞉ mo꞉tagilaki, Godeya꞉ towo꞉ halaido꞉ mo꞉mo꞉da wido꞉.
27123	ACT 4:32	Tilidabu kaluka꞉isaleyo꞉ asulo꞉ imilise dota꞉ga꞉, iyo꞉ “kelego꞉ we na꞉no꞉” a꞉la꞉bo꞉ mo꞉asulaki, tambowo꞉ ua a꞉no꞉ dowo꞉.
27124	ACT 4:33	Iliga꞉felo꞉ kalu iliyo꞉ a꞉la꞉widaki, “Alan Ya꞉su E hendele a꞉ma꞉la꞉ dasilia꞉ga꞉, mela꞉no꞉ a꞉labka꞉!” a꞉la꞉likilo꞉ towo꞉ halaido꞉ wida꞉len ko꞉lo꞉ Godeya꞉yo꞉ Ene kelego꞉ nafaleyo꞉ iya kogolu alifa꞉.
27125	ACT 4:34	I usamio꞉ kalu imilig nowo꞉ ma꞉no꞉wo꞉, kelego꞉wo꞉ aundo꞉malo꞉ mo꞉dowo꞉. Mo꞉wo꞉ kalu imilig nowo꞉ kelego꞉lo꞉ma dowalikiyo꞉, kalu noma꞉yo꞉ ba꞉da꞉ga꞉, ene hen o꞉lia꞉ a o꞉lia꞉ kililia꞉sa꞉ga꞉, mole a꞉no꞉ Iliga꞉felo꞉ kalu o꞉mo꞉ dimi ko꞉lo꞉ iliyo꞉ aloba꞉da꞉sa꞉ga꞉, kelego꞉wo꞉ hebe da꞉lab kalu i o꞉mo꞉ dimia꞉i ane.
27127	ACT 4:36	A꞉la꞉gabiki kalu imilig nowo꞉ ene wiyo꞉ Yosa꞉b eyo꞉ a꞉la꞉dimido꞉. Ene mo꞉mio꞉wo꞉ Libai ko꞉lo꞉ hen elo꞉wo꞉ Saibulus. Iliga꞉felo꞉ kalu i a꞉ma꞉yo꞉ ene wi ho꞉gi nowo꞉, Banabas wikilo꞉. Ene wi a꞉ma꞉ ha꞉go꞉ we, nowo꞉ sagala꞉ma꞉kilo꞉ asuwa꞉ta꞉sen kalu.
27128	ACT 4:37	Banabas eyo꞉ hen heb enedo꞉wo꞉ kililia꞉sa꞉ga꞉, moleyo꞉ dia꞉ya꞉sa꞉ga꞉, Iliga꞉felo꞉ kalu i o꞉mo꞉ dimi.
27129	ACT 5:1	Ko꞉sega, kalu a꞉namilo꞉ seno꞉ nowo꞉ ene wiyo꞉ Ananaias, a꞉la꞉ta꞉ga꞉ ene inga, Safaila ko꞉lo꞉ sen. A꞉la꞉ma꞉yo꞉lo꞉ hen heb inido꞉wo꞉ kililia꞉sa꞉ga꞉yo꞉, Ananaias eyo꞉ mole hebo꞉ ene kanulu difa꞉. A꞉la꞉do꞉ gab a꞉no꞉ ingaya꞉yo꞉lo꞉ o꞉li gabolo꞉b a꞉la꞉asulo꞉. Ananaias eyo꞉ mole heb nolo꞉ Iliga꞉felo꞉ kalulo꞉wa dia꞉ha꞉na꞉ga꞉ dimi.
27131	ACT 5:3	Emo꞉ dimiabiki, Bida eyo꞉ emo꞉wo꞉ a꞉la꞉sio꞉, “Ananaias, asulo꞉ gilo꞉wo꞉ Setene bo꞉fo꞉melea꞉ki, fogo꞉ dimi ko꞉lo꞉, giyo꞉ Godeya꞉ Mamayo꞉ a꞉na dikili sa꞉lakiyo꞉, moleyo꞉ hebo꞉ go꞉no꞉ndo꞉ kanulu difa꞉ a꞉no꞉, waga asulaki dimido꞉wo꞉?
27132	ACT 5:4	Giyo꞉ heno꞉ semo꞉kilili amio꞉, hen a꞉no꞉ hendele ga꞉no꞉ ko꞉lo꞉ kililia꞉sa꞉ga꞉ mole di a꞉no꞉ ga꞉lo꞉ asulab aumbo꞉ o꞉li dimidama꞉no꞉ dowo꞉. A꞉la꞉fo꞉ko꞉lo꞉, giyo꞉ dikilima꞉no꞉ a꞉la꞉likiyo꞉ waga asulaki sa꞉laya? Madalilo꞉ sa꞉lako꞉, giyo꞉ kaluwo꞉ ko꞉lo꞉ dikidaba. Godeyo꞉ ko꞉lo꞉ dikili sa꞉lab.”
27133	ACT 5:5	Ananaias e to a꞉no꞉ da꞉da꞉sa꞉ga꞉, elo꞉ elen a꞉naka, sulufo꞉ tina꞉sa꞉ga꞉ sowo꞉ ko꞉lo꞉, kalu nolo꞉ to a꞉no꞉ da꞉da꞉sa꞉ga꞉yo꞉, tagio꞉ alan dowo꞉.
27134	ACT 5:6	Ananaias e sowabiki, kalu so꞉wa nolo꞉ ya꞉ga꞉, so꞉ga꞉ mela꞉sa꞉ga꞉, dia꞉ha꞉na꞉ga꞉ a꞉na daido꞉.
27135	ACT 5:7	A꞉la꞉ta꞉ga꞉ ofa꞉si otalen ta꞉ta꞉sa꞉ga꞉yo꞉, ingayo꞉ Ananaias sowo꞉wo꞉ mo꞉da꞉daki, elo꞉ Bidalo꞉wa mio꞉.
27136	ACT 5:8	A꞉na fa꞉la꞉dowabiki, Bidaya꞉ emo꞉wo꞉ a꞉la꞉dabuba꞉ba꞉, “Mole gaindo di a꞉no꞉, tambo yomo꞉?” A꞉la꞉sa꞉labiki, Safaila eyo꞉ a꞉la꞉sio꞉, “A꞉, moleyo꞉ tambo dia꞉mio꞉ yom.”
27137	ACT 5:9	A꞉la꞉fo꞉ko꞉lo꞉ Bida eyo꞉ emo꞉ a꞉la꞉sio꞉, “Ga꞉go꞉ towo꞉ imilise saeta꞉ga꞉yo꞉, Godeya꞉ Mamayo꞉ da꞉fe ba꞉ba꞉nikiyo꞉, Emo꞉wo꞉ waga dikili sa꞉laya? Ge kalulo꞉ daida꞉len kalu i a꞉no꞉ tog amilo꞉ o꞉yayom ko꞉lo꞉ gelo꞉ a꞉na dia꞉ha꞉na꞉sa꞉ga꞉ dalima꞉nigab.”
27138	ACT 5:10	Safaila e to a꞉no꞉ko꞉ da꞉dabiki, e sulufo꞉ tina꞉sa꞉ga꞉ sowo꞉ ko꞉lo꞉ kalu so꞉wa i a꞉no꞉ ya꞉ga꞉yo꞉, e sowo꞉lo꞉bi ba꞉da꞉ga꞉, iliyo꞉ e dia꞉ha꞉na꞉ga꞉ indo daido꞉ anib a꞉na dalialifa꞉.
27139	ACT 5:11	Tilidabu kaluka꞉isale tambo olia꞉ kalu nol a꞉namio꞉ sen a꞉no꞉lia꞉yo꞉, malolo꞉ a꞉no꞉ da꞉da꞉sa꞉ga꞉, iyo꞉ tambo tagi alan dowo꞉.
27140	ACT 5:12	Iliga꞉felo꞉ kalu iliyo꞉ molo ha꞉na꞉no꞉ ko꞉li ko꞉lilo꞉wo꞉ amisa꞉n us a꞉na dimida꞉len. Tilidabu kaluka꞉isale iyo꞉ ua, Solomona꞉ Isagen a꞉na kegea꞉sen.
27141	ACT 5:13	Ha꞉la꞉ kaluka꞉isale nol a꞉ma꞉yo꞉ iyo꞉ mada nafale a꞉la꞉asulo꞉ ko꞉sega ha꞉la꞉ kaluka꞉isale i a꞉no꞉ tagilaki, i o꞉lia꞉ mo꞉ gasa kegea꞉sen.
27142	ACT 5:14	Ko꞉sega ho꞉leno꞉ tambowo꞉, kaluka꞉isale modo꞉ nolo꞉ Alano꞉ tilida꞉da꞉sa꞉ga꞉, tamin tilidabu kaluka꞉isale i o꞉lia꞉yo꞉ ua gasaya꞉len.
27143	ACT 5:15	Amisa꞉n kaluka꞉isaleyo꞉ Iliga꞉felo꞉ kalu ililo꞉ molo ha꞉na꞉no꞉ dimida꞉lab a꞉no꞉ ba꞉ba꞉ ko꞉lo꞉ ili asulakiyo꞉ Bidayo꞉ ha꞉nab amio꞉ mama elo꞉ma꞉yo꞉ walaf kalu ka꞉isale iyo꞉ galalalikiyo꞉ falelema꞉ib a꞉la꞉asula꞉sa꞉ga꞉, iliyo꞉ i a꞉no꞉ ga꞉lilia꞉ ya꞉ga꞉, nolo꞉ wo꞉ba, nolo꞉ geondo꞉ wa꞉la alima꞉ki, tog anib a꞉na ta꞉felo꞉.
27144	ACT 5:16	A꞉la꞉ta꞉ga꞉ kaluka꞉isale modo꞉, Ya꞉lusalem anib amilo꞉ kandayo꞉ i a꞉no꞉ kegeo꞉. A꞉la꞉ta꞉ga꞉ iyo꞉ walafdo꞉ kaluka꞉isale o꞉lia꞉ kalu mama mogago꞉lo꞉ dosdo꞉ o꞉lia꞉yo꞉ tililia꞉ga꞉, Iliga꞉felo꞉ kalulowa yabiki, i a꞉no꞉ tambo falele alifelo꞉.
27145	ACT 5:17	Bobalo꞉ so꞉mia꞉sen misa꞉ kalu o꞉lia꞉ ene mili, Sadusi kalu o꞉lia꞉ma꞉yo꞉ iliga꞉felo꞉ kalu ilo꞉lo꞉ dimidab a꞉no꞉ ba꞉da꞉sa꞉ga꞉, iliyo꞉ iliga꞉felo꞉ kalumo꞉wo꞉ mo꞉beaki eteyo꞉wo꞉ alan fa꞉la꞉dowo꞉ ko꞉lo꞉ iliyo꞉ iliga꞉felo꞉ kalu i a꞉no꞉ ta꞉lia꞉sa꞉ga꞉, mogago꞉ kalu o꞉lia꞉ dibolo a usa disa꞉.
27147	ACT 5:19	Ko꞉sega o꞉g nulu a꞉namio꞉, Godeya꞉ ma꞉mul kaluwa꞉yo꞉ dibolo a a꞉no꞉, togo꞉ koda꞉sa꞉ga꞉, iyo꞉ ha꞉la꞉ya tilili ya꞉ga꞉ handalowakiyo꞉ a꞉la꞉sio꞉, “Gio꞉ ha꞉na꞉sa꞉ga꞉ Godeya꞉ malilo꞉ a usa kagafo꞉liki, gililo꞉ mela꞉no꞉ ho꞉gi di a꞉no꞉ kaluka꞉isalemo꞉wo꞉ tambo wida꞉lubi” eyo꞉ a꞉la꞉sio꞉.
27149	ACT 5:21	Elo꞉ sio꞉ o꞉leaum iliyo꞉ a꞉la꞉dimidaki, kea꞉fo nulu ofo꞉ yabikiyo꞉, iyo꞉ Godeya꞉ malilo꞉ aya tina꞉sa꞉ga꞉, a꞉na mo꞉mo꞉da wido꞉. O꞉g kea꞉fo nulu a꞉nami, bobalo꞉ so꞉mia꞉sen misa꞉ kalu o꞉lia꞉ e o꞉lia꞉lo꞉ elen kalu o꞉lia꞉ma꞉yo꞉, Yu amilo꞉ Kanisolo dosdo꞉wo꞉ a꞉na kegeo꞉. Isolael misa꞉ kalu tambo a꞉na kegea꞉sa꞉ga꞉, iliyo꞉ iliga꞉felo꞉ kaluwo꞉ tililia꞉ mena꞉ki dibololo꞉ sab a꞉na to saga꞉fo꞉.
27150	ACT 5:22	Ko꞉sega dibolo alo꞉ bo꞉fo꞉lowan kaluwo꞉ aya ha꞉na꞉sa꞉ga꞉ ba꞉ba꞉ amio꞉, Iliga꞉felo꞉ kalu i a꞉no꞉ a꞉namilo꞉ mo꞉sena ba꞉ba꞉ ko꞉lo꞉ iyo꞉ a꞉ma꞉la꞉ ha꞉na꞉sa꞉ga꞉ misa꞉ kalumo꞉wo꞉ a꞉la꞉sio꞉, “Nio꞉ dibolo aya fa꞉la꞉dowaki ba꞉ba꞉ amio꞉, togo꞉ tambo uludo꞉ ko꞉lo꞉, dibolo alo꞉ bo꞉fo꞉lowan kaluwo꞉ toga꞉me amio꞉ o꞉li yasila꞉len ko꞉sega, nio꞉ dibolo a usamio꞉, kalu i a꞉no꞉ mada aundo꞉ma elena ba꞉ba꞉.”
27152	ACT 5:24	Bobalo꞉ so꞉mia꞉sen misa꞉ kalu i o꞉lia꞉ Godeya꞉ malilo꞉ alo꞉ bo꞉fo꞉lowan misa꞉ kalu o꞉lia꞉ma꞉yo꞉ to a꞉no꞉ da꞉da꞉sa꞉ga꞉, iyo꞉ molo asulakiyo꞉, o꞉b ko꞉lo꞉ fa꞉la꞉doma꞉nigabele a꞉la꞉liki modo꞉.
27153	ACT 5:25	Iyo꞉ a꞉la꞉asula꞉li elen ami, kalu imilise nowo꞉ ya꞉ga꞉, imo꞉wo꞉ a꞉la꞉sio꞉, “Dabuma. Kalu gililo꞉ dibolo ayamilo꞉ disa꞉ a꞉no꞉, Godeya꞉ malilo꞉ aya kagafo꞉liki, kaluka꞉isalemo꞉wo꞉ towo꞉ a꞉na wida꞉lab” a꞉la꞉sio꞉.
27154	ACT 5:26	A꞉la꞉sa꞉labiki, Godeya꞉ malilo꞉ alo꞉ bo꞉fo꞉lowan misa꞉ kalu o꞉lia꞉ dibolo alo꞉ bo꞉fo꞉lowan i o꞉lia꞉yo꞉ ha꞉na꞉sa꞉ga꞉, Iliga꞉felo꞉ kalu i a꞉no꞉ a꞉ma꞉la꞉ tililia꞉ mio꞉. Kaluka꞉isale i a꞉namilo꞉ sab a꞉ma꞉yo꞉ bo꞉fo꞉lowan kalu iyo꞉ uwa꞉yo꞉ agodoma꞉ib a꞉la꞉asula꞉sa꞉ga꞉, iyo꞉ tagilaki, iliga꞉felo꞉ kalu a꞉no꞉ mo꞉yami tandeaki, ha꞉sa tilia꞉mio꞉.
27155	ACT 5:27	Dibolo alo꞉ bo꞉fo꞉lowan kaluwa꞉yo꞉ Iliga꞉felo꞉ kalu iyo꞉ tilili ya꞉sa꞉ga꞉, Yuwa꞉ kanisolo kalulo꞉wa ta꞉fo꞉liki, bobalo꞉ so꞉mia꞉sen misa꞉ kalu eyo꞉ imo꞉wo꞉ a꞉la꞉sio꞉, “Niliyo꞉ tamin amio꞉ gimo꞉wo꞉ ‘kalu wa꞉ma꞉ wi amio꞉ kaluka꞉isalemo꞉wo꞉ wida꞉so꞉boka꞉’ a꞉la꞉bo꞉ towo꞉ halaido꞉ saefa꞉ ko꞉sega giliyo꞉ Ya꞉lusalem kaluka꞉isalemo꞉wo꞉ tambo towo꞉ wida꞉li ha꞉nab ko꞉lo꞉ giliyo꞉ kaluka꞉isalemo꞉wo꞉ ‘kalu we nili sanasowo꞉ka꞉’ a꞉la꞉li diga꞉li sa꞉la꞉lab” a꞉la꞉sio꞉.
27157	ACT 5:29	To a꞉no꞉ da꞉da꞉sa꞉ga꞉, Bida o꞉lia꞉ Iliga꞉felo꞉ kalu i nol a꞉ma꞉yo꞉ towo꞉ a꞉la꞉sio꞉, “Niliyo꞉ kaluwa꞉ towo꞉ mo꞉kudu ha꞉na꞉no꞉ ko꞉sega, Godeya꞉ Ene toleyo꞉ ko꞉lo꞉ mada kudu ha꞉na꞉no꞉.
27158	ACT 5:30	Giliyo꞉ Ya꞉suwo꞉ i malana alula꞉sa꞉ga꞉ sana sowo꞉ ko꞉sega, nili ma꞉muwa꞉ Godeya꞉yo꞉ E a꞉ma꞉la꞉ dasi alifa꞉ ko꞉lo꞉lab.
27159	ACT 5:31	Isolael kaluka꞉isaleya꞉yo꞉ asugo꞉ nodola꞉sa꞉ga꞉, ililo꞉ mogago꞉ dimida꞉seno꞉ hama꞉ki, Godeya꞉yo꞉ Ya꞉suwo꞉ iwalu dia꞉takiyo꞉, ene dagi ililiba ta꞉fo꞉ ko꞉lo꞉ Ya꞉su E misa꞉ kalu dowaki, Eyo꞉ kaluka꞉isaleyo꞉ a꞉ma꞉la꞉ gasilia꞉no꞉ dowo꞉.
27160	ACT 5:32	A꞉la꞉fo꞉ko꞉lo꞉ Godeya꞉yo꞉ kaluka꞉isaleyo꞉ E tolo꞉ kuduha꞉na꞉sen imo꞉wo꞉ Ene Mamayo꞉ dimi ko꞉lo꞉, Godeya꞉lo꞉ dimido꞉ a꞉no꞉ tambo ni o꞉lia꞉ Godeya꞉ Mama o꞉lia꞉ma꞉yo꞉ ba꞉ba꞉ ko꞉lo꞉ a꞉no꞉ wido꞉l”
27161	ACT 5:33	Iliyo꞉ Bida elo꞉ to sa꞉lab a꞉no꞉ da꞉dakiyo꞉, kulufa꞉yo꞉wo꞉ alan dowa꞉sa꞉ga꞉, iyo꞉ yasalema꞉no꞉ asulo꞉.
27162	ACT 5:34	Ko꞉sega Fa꞉lisi kalu nowo꞉, ene wiyo꞉ Gamaliel, e elelo꞉ asulo꞉ kalu ko꞉lo꞉ Yu kaluka꞉isale iyo꞉ man elo꞉wo꞉ nafale ba꞉da꞉sen. O꞉g a꞉namio꞉ Gamaliel e, misa꞉ kalu o꞉lia꞉ sen ko꞉lo꞉, e dasila꞉sa꞉ga꞉, kalu nolbo꞉wo꞉ “Iliga꞉felo꞉ kaluwo꞉ ha꞉la꞉ya o꞉tililia꞉ hamana” a꞉la꞉sa꞉la꞉sa꞉ga꞉, Yu misa꞉ kalu imo꞉wo꞉ a꞉la꞉sio꞉, “Isolael kalu giliyo꞉, kelego꞉ nowo꞉ kalu i wemo꞉wo꞉ dimidama꞉no꞉lalega, giliyo꞉ dinafa asula꞉bi.
27164	ACT 5:36	Mo꞉wo꞉ o꞉semo꞉amalela꞉ amio꞉, kalu nowo꞉ Teudas e babuma꞉niki, kalu alan o꞉ngo꞉ dasilabiyo꞉, kalu do꞉la꞉lowo꞉wo꞉ do꞉la꞉fo꞉ fa꞉la꞉da꞉in e kudu ane. Ko꞉sega e sana sowabikiyo꞉, kalu elo꞉ kudu ane a꞉no꞉ tambo dalale ane ko꞉lo꞉ elo꞉ dimidama꞉no꞉ asulo꞉ a꞉no꞉ madali wala꞉.
27165	ACT 5:37	A꞉ma꞉ fa꞉s amio꞉, wilo꞉ sa꞉sa꞉lan ho꞉leno꞉ dowabikiyo꞉, Yuda꞉s, Ga꞉lili kalu eyo꞉lo꞉ dasila꞉sa꞉ga꞉, eyo꞉ kalu nolo꞉ hala tilia꞉gane ko꞉sega e sana sowabiki, kalu elo꞉ kudu ane a꞉no꞉ tambo dalale ane.
27166	ACT 5:38	A꞉la꞉fo꞉ko꞉lo꞉ o꞉gdo꞉ fa꞉la꞉dowab we gio꞉ asula꞉bi. Ililo꞉ dimidab we, inin asulo꞉wa fa꞉la꞉dowa꞉sa꞉ga꞉ dimidabo꞉lalega, ililo꞉ dimidama꞉no꞉ asulab a꞉no꞉ madali walema꞉ib. Ko꞉sega nanog a꞉no꞉ Godelo꞉wa a꞉la꞉ta꞉ga꞉ mio꞉lalega, giliyo꞉ ililo꞉ nanog diab a꞉no꞉ mada mo꞉ka꞉ma꞉ib. Giliyo꞉ ko꞉lo꞉ ka꞉ma꞉no꞉ susialega, gio꞉ Gode o꞉lia꞉ bubaki auma꞉ib. A꞉la꞉fo꞉ko꞉lo꞉ giliyo꞉ mogago꞉ imili nowo꞉ i o꞉lia꞉yo꞉ mo꞉dimidaki, iyo꞉ ga꞉li melea꞉ki ta꞉ta꞉bi.”
27168	ACT 5:40	Gamaliel eyo꞉ a꞉la꞉sa꞉labiki, Yu misa꞉ kalu iliyo꞉ elo꞉ to sa꞉lab a꞉no꞉ ko꞉lo꞉ kudu ane. Iliyo꞉ Iliga꞉felo꞉ kaluwo꞉ a꞉ma꞉la꞉ tilia꞉a꞉sa꞉ga꞉ dotabiki, dibolo alo꞉ bo꞉fo꞉lowan kaluwa꞉yo꞉ iyo꞉ sanama꞉ki a꞉na sio꞉ ko꞉lo꞉, sa꞉nda꞉sa꞉ga꞉yo꞉ Iliga꞉felo꞉ kalu imo꞉wo꞉ a꞉la꞉sio꞉, “Giliyo꞉ Ya꞉suwa꞉ wi sa꞉lakiyo꞉, wa꞉kabiyo꞉ mada wida꞉so꞉bo.” Imo꞉wo꞉ towo꞉ a꞉la꞉ halale sa꞉la꞉sa꞉ga꞉, iliga꞉fo꞉.
27169	ACT 5:41	A꞉la꞉fo꞉ko꞉lo꞉ iyo꞉ Yu misa꞉ kalu kegeo꞉ a꞉no꞉ ta꞉ta꞉sa꞉ga꞉ ha꞉nakiyo꞉, Godeya꞉yo꞉ iyo꞉ Ya꞉suwa꞉ wiya a꞉la꞉ta꞉ga꞉lo꞉ sendelowo꞉wo꞉ o꞉li diab a꞉la꞉do꞉ asulab a꞉no꞉, iyo꞉ sagala꞉liki ane.
27170	ACT 5:42	A꞉la꞉ta꞉ga꞉ Godeya꞉ malilo꞉ ayamio꞉lo꞉, kaluka꞉isaleya꞉ ayamio꞉lo꞉ Godeya꞉ Ene to nafa widakiyo꞉, Ya꞉su E, Godeya꞉ Enedo꞉ Da꞉feyo꞉ kaluwo꞉ E a꞉la꞉liki iliyo꞉ ho꞉leno꞉ tambo wida꞉li sia꞉liki mo꞉edo꞉.
27171	ACT 6:1	Ho꞉len a꞉namio꞉ Gode amilo꞉ tilidabu kaluwo꞉ modo꞉ fa꞉la꞉dosdo꞉ ko꞉lo꞉ i us a꞉namio꞉ Gilik tolo꞉ sa꞉lan kaluwa꞉yo꞉, Alam tolo꞉ sa꞉lan kalumo꞉wo꞉ a꞉la꞉sio꞉, “Giliyo꞉ ma꞉no꞉ sagakiyo꞉, ka꞉isale sa꞉ba꞉lo꞉ nilido꞉ a꞉lab a꞉no꞉ mo꞉mia꞉sen” a꞉la꞉sa꞉laki, iyo꞉ towa꞉yo꞉ kego꞉.
27172	ACT 6:2	A꞉la꞉fo꞉ko꞉lo꞉ Iliga꞉felo꞉ kalu kugula꞉fo꞉ a꞉ma꞉yo꞉, tilidabu kaluwo꞉ tambo ho꞉le kegea꞉sa꞉ga꞉, imo꞉wo꞉ a꞉la꞉sio꞉, “Nio꞉ nanog diakiyo꞉, Godeya꞉ to walama꞉no꞉wo꞉ kadetaki, ma꞉no꞉ sagama꞉no꞉ dowalega mogago꞉ doma꞉ib.
27173	ACT 6:3	A꞉la꞉fo꞉ko꞉lo꞉ giliyo꞉ kalu dom a꞉la꞉fo꞉wo꞉ da꞉fea꞉sa꞉ga꞉, niliyo꞉ nanog we imo꞉ dima꞉ki dimia꞉no꞉. Kalu gililo꞉ da꞉feab a꞉no꞉, iyo꞉ asulo꞉wo꞉ alan, Godeya꞉ Mamalo꞉ wa꞉lifo꞉ a꞉lab a꞉no꞉ ko꞉lo꞉ da꞉fea꞉bi.
27174	ACT 6:4	Giliyo꞉ ko꞉lo꞉ a꞉la꞉dimidalikiyo꞉, ho꞉leno꞉ tambowo꞉ niliyo꞉ Godemo꞉ dulugu sa꞉la꞉liki, Ene towo꞉ ko꞉lo꞉ walasa꞉la꞉li mesa꞉no꞉.”
27175	ACT 6:5	Iliyo꞉ a꞉la꞉sa꞉labiki, tilidabu kaluka꞉isale iliyo꞉ to sa꞉lab a꞉no꞉ da꞉da꞉sa꞉ga꞉ tambo sagalaki, iliyo꞉ kalu nolo꞉ da꞉feyo꞉. Da꞉feyo꞉ kaluwo꞉ nowo꞉ Sitifen. E tilidabu alan a꞉la꞉ta꞉ga꞉ Godeya꞉ Mamayo꞉ e amio꞉ wa꞉lifo꞉. Da꞉feyo꞉ kalu nowo꞉ we, Filib, Bolokolus, Nikanol, Timon, Balmenas, a꞉la꞉ta꞉ga꞉ nowo꞉ Nikolas, e Antio꞉g amisa꞉n kalu ko꞉lo꞉ e tamin amio꞉ Yu kaluwa꞉lo꞉ tilidabu a꞉no꞉ elo꞉ kudu ane.
27176	ACT 6:6	Tilidabu kalu iyo꞉ doma꞉la꞉fo꞉ a꞉no꞉ da꞉fea꞉sa꞉ga꞉, Iliga꞉felo꞉ kalulo꞉wa tililia꞉ga꞉, Iliga꞉felo꞉ kaluwa꞉yo꞉ iyo꞉ Godemo꞉ dulugu sa꞉la꞉sa꞉ga꞉, dagiyo꞉ ili misa꞉ wa꞉la difa꞉.
27177	ACT 6:7	A꞉la꞉fo꞉ko꞉lo꞉ Godeya꞉ towo꞉ da꞉da꞉i ha꞉nakiyo꞉, Ya꞉lusalem amisa꞉n amio꞉, tilidabu kaluka꞉isaleyo꞉ modo꞉ ko꞉lo꞉ fa꞉la꞉dowo꞉. A꞉la꞉ta꞉ga꞉ Godemo꞉lo꞉ bobalo꞉ so꞉mia꞉sen kalu nolo꞉lo꞉ modo꞉ tilidabu.
27178	ACT 6:8	Godeya꞉yo꞉ Sitifen e asuwa꞉taki, halaido꞉ emo꞉wo꞉ dimi ko꞉lo꞉ Sitifen eyo꞉ kaluka꞉isale siwa꞉l amio꞉ molo ha꞉na꞉no꞉wo꞉ ko꞉li ko꞉lilo꞉ dimido꞉.
27179	ACT 6:9	Ko꞉sega Yu kalu nolba꞉yo꞉ e o꞉lia꞉yo꞉ towa꞉yo꞉ kego꞉. Kalu i a꞉ma꞉ tolo꞉ wida꞉sen a wiyo꞉ we “Kalu ga꞉li ha꞉na꞉sen A” a꞉la꞉sa꞉la꞉sen. Kalu i a꞉no꞉ nolo꞉ Sailini amisa꞉n o꞉lia꞉ Alegsandia amisa꞉na a꞉la꞉ta꞉ga꞉ mio꞉. A꞉la꞉ta꞉ga꞉ nolo꞉, Silisia hen o꞉lia꞉ Esia hen a꞉la꞉ta꞉ga꞉ mio꞉ ko꞉lo꞉ iyo꞉ Sitifen o꞉lia꞉yo꞉ towa꞉yo꞉ kego꞉.
27180	ACT 6:10	Ko꞉sega Godeya꞉ Mamaya꞉yo꞉ Sitifen emo꞉wo꞉ asulo꞉ nafa dimia꞉len ko꞉lo꞉ kalu i e o꞉lia꞉lo꞉ towa꞉lo꞉ kegab a꞉no꞉ mo꞉tiniaki, iyo꞉ wana dowo꞉.
27181	ACT 6:11	A꞉la꞉gabiki, iliyo꞉ towo꞉ wo꞉no꞉le sa꞉la꞉li siya꞉likiyo꞉, “Sitifen eyo꞉ Gode o꞉lia꞉ Moses o꞉lia꞉mo꞉wo꞉ dio꞉ge sa꞉lab a꞉la꞉bo꞉ niliyo꞉ dabulo꞉bo꞉ka꞉” a꞉la꞉bo꞉ kalu nolbo꞉wo꞉ towo꞉ sama꞉ki, salifa꞉la꞉li ane.
27182	ACT 6:12	Iliyo꞉ kaluka꞉isale o꞉lia꞉ ko꞉go꞉do꞉ kaluwo꞉ o꞉lia꞉ elelo꞉ asulo꞉ kalu o꞉lia꞉ma꞉ asulo꞉wo꞉ digidalifa꞉la꞉liki ane ko꞉lo꞉ iliyo꞉ Sitifen e ta꞉lia꞉sa꞉ga꞉ mo꞉walilima꞉ni, Yu amilo꞉ Kanisolo kalulo꞉wa tililigane.
27183	ACT 6:13	A꞉la꞉fo꞉ko꞉lo꞉ e mo꞉walilakiyo꞉, Sitifen elo꞉ mo꞉dimido꞉lo꞉ sa꞉ma꞉no꞉ kaluwo꞉ tililia꞉ga꞉ ta꞉taki, iliyo꞉ madali towo꞉ a꞉na sa꞉laki, “Sitifen eyo꞉ Moses ele saefa꞉yo꞉ a꞉la꞉ta꞉ga꞉ gulugulula꞉sen a malilo꞉wo꞉ dio꞉ge sa꞉la꞉lab.
27184	ACT 6:14	Kalu wema꞉yo꞉ ‘Ya꞉su, Nasa꞉la꞉d kalu a꞉ma꞉yo꞉ Godeya꞉ Malilo꞉ a we bidilaki, Mosesa꞉ ele man ko꞉lo꞉ nimo꞉lo꞉ dimi a꞉no꞉ togonolema꞉ib’ a꞉la꞉wida꞉labiki dabu” a꞉la꞉sio꞉.
27185	ACT 6:15	Kalu elo꞉ mo꞉walila꞉likilo꞉ sen i tambo a꞉ma꞉yo꞉, Sitifena꞉ wo꞉lokan sikudu ba꞉ba꞉ amio꞉, wo꞉lokan elo꞉ a꞉no꞉ ma꞉mul kaluwa꞉lo꞉wo꞉ o꞉ngo꞉lo꞉biki ba꞉ba꞉.
27186	ACT 7:1	Sitifen e mo꞉walila꞉la꞉ga꞉ dotabikiyo꞉, bobalo꞉ so꞉mia꞉sen misa꞉ kalu a꞉ma꞉yo꞉ emo꞉wo꞉ a꞉la꞉dabuba꞉ba꞉, “To gemo꞉lo꞉ mo꞉walilakilo꞉ sa꞉lab we hendeleyo꞉?”
27187	ACT 7:2	To elo꞉ dabu ba꞉dab a꞉na, a꞉ma꞉la꞉ sa꞉lakiyo꞉ a꞉la꞉sio꞉, “Nao i, do i, gio꞉ dabuma! Nili ma꞉mu A꞉bla꞉ham eyo꞉ Halan amisa꞉n semo꞉ ane amio꞉, Mesobotemia hena sen amio꞉, halaido꞉ Gode a꞉no꞉ elo꞉wa fa꞉la꞉dowakiyo꞉, emo꞉wo꞉ a꞉la꞉sio꞉, ‘Ge go꞉no꞉n mo꞉mio꞉ o꞉lia꞉, go꞉no꞉n hen o꞉lia꞉ ta꞉taki, hen ko꞉li nilo꞉ gemo꞉lo꞉ walama꞉no꞉ a꞉no꞉, ge a꞉na mesa꞉no꞉ hamana.’
27189	ACT 7:4	A꞉la꞉sa꞉labikiyo꞉, A꞉bla꞉ham e Kaldean hen a꞉no꞉ kata꞉ta꞉sa꞉ga꞉, Halan amisa꞉n a꞉na ha꞉na꞉sa꞉ga꞉ sen. A꞉na sen ami, iyayo꞉ sowabikiyo꞉, Godeya꞉yo꞉ e a꞉na a꞉la꞉ta꞉ga꞉ tililia꞉ga꞉, o꞉go꞉do꞉ gilo꞉ sab hen wena tililia꞉mio꞉.
27190	ACT 7:5	Ho꞉len a꞉namio꞉, emo꞉wo꞉ ene hendeyo꞉ mo꞉dimiaki, ha꞉lugo꞉wo꞉lo꞉ emo꞉wo꞉ bo꞉fo꞉melea꞉kiyo꞉ mo꞉dimi. Ko꞉sega Godeya꞉ emo꞉ dinali sa꞉laki a꞉la꞉sio꞉, ‘Niyo꞉ hen we tambo ge o꞉lia꞉ gilo꞉ so꞉wa sa꞉la꞉la꞉i ha꞉nab o꞉lia꞉mo꞉wo꞉ dimia꞉no꞉.’ A꞉bla꞉ham e so꞉walo꞉ma dowo꞉ ko꞉sega Godeya꞉yo꞉ emo꞉wo꞉ a꞉la꞉dinali salifa꞉.
27191	ACT 7:6	Godeya꞉ emo꞉ a꞉la꞉sio꞉, ‘Gi so꞉wa sa꞉la꞉la꞉i ha꞉nab a꞉no꞉ ini heno꞉ ta꞉ta꞉sa꞉ga꞉, Isib hena mageso꞉ sia꞉lalikiyo꞉, da꞉ibo꞉ so꞉wa dowaki dikidima꞉ib ko꞉lo꞉ iyo꞉ hen a꞉namio꞉ donayo꞉ 400 a꞉la꞉fo꞉ ko꞉lo꞉ mesa꞉ib.
27192	ACT 7:7	Ko꞉sega Niyo꞉ ilo꞉ da꞉ibo꞉ so꞉wa mesea꞉kilo꞉ ta꞉fo꞉ kalu a꞉no꞉ Isib ego꞉ ko꞉lo꞉ iyo꞉ falasila꞉ma꞉no꞉ a꞉la꞉ta꞉ga꞉ tif amio꞉ Niyo꞉ gi so꞉wa sa꞉la꞉la꞉i ha꞉nab i a꞉no꞉ a꞉ma꞉la꞉ tililia꞉ga꞉, hen wena siliki, Nemo꞉wo꞉ gulugulula꞉ma꞉ib.’ Godeya꞉yo꞉ a꞉la꞉sio꞉
27193	ACT 7:8	A꞉la꞉ dinali sio꞉ ko꞉lo꞉ dinali sio꞉ a꞉no꞉ hendele widakiyo꞉, e do꞉go꞉fo꞉ hege gedema꞉ib a꞉la꞉sio꞉ ko꞉lo꞉ A꞉bla꞉ham eyo꞉ Aisego꞉ sa꞉la꞉liakiyo꞉, ho꞉len ola꞉fo꞉wo꞉ ta꞉ta꞉ga꞉yo꞉, do꞉go꞉fo꞉ hege gede alifa꞉. A꞉la꞉go꞉ko꞉lo꞉ tif amio꞉ Aisego꞉ Yekobo꞉ sa꞉la꞉li a꞉la꞉ta꞉ga꞉ Yekobo꞉ so꞉wa kugula꞉fo꞉ sa꞉la꞉li ko꞉lo꞉ so꞉wa a꞉ma꞉yo꞉ Isolael kaluka꞉isale so꞉lo꞉wo꞉ kugula꞉fo꞉ fa꞉la꞉do alifa꞉.
27194	ACT 7:9	“Nili ma꞉mu, Yekoba꞉ insisa꞉i nolba꞉yo꞉ Yosa꞉bo꞉wo꞉ keleasula꞉sa꞉ga꞉, e Isib kaluwa꞉ da꞉ibo꞉ kalu doma꞉ki, moleya꞉ kilili. Ko꞉sega Godeya꞉yo꞉ Yosa꞉b e hida꞉yo꞉ ba꞉dab a꞉namio꞉, e o꞉lia꞉ dofo꞉liki asufa꞉ ko꞉loemo꞉wo꞉ asulo꞉ alan dimiabiki, Isib misa꞉ kalu, Felo꞉wa꞉ siwa꞉l amio꞉ Yosa꞉b ene mano꞉ nafa ba꞉da꞉sa꞉ga꞉, Felo꞉ e sagalaki, Isib hen o꞉lia꞉ ene a o꞉lia꞉yo꞉ Yosa꞉b emo꞉ bo꞉fo꞉melea꞉ki ta꞉fo꞉.
27196	ACT 7:11	“A꞉la꞉ta꞉ga꞉ Isib hen o꞉lia꞉ Kenan hen a꞉namio꞉, maiyo꞉wo꞉ alan fa꞉la꞉dowaki, hida꞉yo꞉ alan dowo꞉ ko꞉lo꞉, ni ma꞉muwa꞉yo꞉ ma꞉no꞉ ma꞉no꞉wo꞉ aundo꞉ma dowo꞉.
27197	ACT 7:12	A꞉la꞉fo꞉ko꞉lo꞉ Yekob eyo꞉ Isib hen amio꞉ ma꞉no꞉wo꞉ da꞉laka꞉ a꞉la꞉sa꞉labi da꞉da꞉sa꞉ga꞉, eyo꞉ nili ma꞉mu iyo꞉ tamin ami a꞉na iliga꞉fo꞉.
27198	ACT 7:13	Iyo꞉ andeb ane amio꞉, Yosa꞉b e ao imo꞉wo꞉ eneno꞉ a꞉na wida꞉sa꞉ga꞉ dowabiki, Felo e Yosa꞉ba꞉ so꞉lo꞉wo꞉ welo꞉b a꞉la꞉bo꞉ a꞉na asulo꞉.
27199	ACT 7:14	A꞉ma꞉ fa꞉s amio꞉, Yosa꞉b eyo꞉ ene iya Yekob o꞉lia꞉ so꞉lo꞉ o꞉lia꞉yo꞉ elo꞉wa tambo mena꞉ki saga꞉fo꞉. To saga꞉fo꞉ a꞉no꞉ da꞉da꞉sa꞉ga꞉, Yekobo꞉ Isib ane ko꞉lo꞉ Yekoba꞉ so꞉lo꞉ Isib a꞉lab a꞉no꞉lia꞉ agelo꞉wo꞉ do꞉la꞉fo꞉ dom a꞉la꞉ta꞉ga꞉ bila꞉fo꞉ ko꞉lo꞉ fa꞉la꞉dowo꞉. Yekob o꞉lia꞉ ene sowayo꞉lo꞉ a꞉naka sowo꞉.
27201	ACT 7:16	Tif amio꞉ ini ki a꞉no꞉ a꞉ma꞉la꞉ dia꞉ya꞉sa꞉ga꞉, Sekem hen a꞉namio꞉, Hamol insisa꞉ma꞉ heno꞉ A꞉bla꞉hama꞉ tamina moleya꞉ kilili ko꞉lo꞉ ini kiyo꞉ a꞉na daido꞉.
27202	ACT 7:17	“Godeya꞉yo꞉ A꞉bla꞉hambo꞉lo꞉ dinali sio꞉ ho꞉leno꞉ ko꞉na꞉ma fa꞉la꞉dowabiki, Isib a꞉namio꞉ Isolael kaluwo꞉ mada modo꞉ ko꞉lo꞉ fa꞉la꞉dowo꞉.
27203	ACT 7:18	A꞉la꞉ta꞉ga꞉ Isib amio꞉ misa꞉ kalu ho꞉gi fa꞉la꞉dowakiyo꞉, eyo꞉ Yosa꞉bo꞉ mo꞉fanda asulo꞉ ko꞉lo꞉ eyo꞉ ni ma꞉mu imo꞉wo꞉ dikida꞉sa꞉ga꞉ hida꞉yo꞉wo꞉ alan dimi. A꞉la꞉gabiki, eyo꞉ inin so꞉wa ho꞉gi sa꞉la꞉la꞉iyo꞉ ka soma꞉ki, ha꞉la꞉ya sandifelema꞉no꞉ a꞉la꞉saefa꞉.
27205	ACT 7:20	“Ho꞉len a꞉namio꞉, Moseso꞉ a꞉na sa꞉la꞉li. E mada gesego꞉ ko꞉lo꞉ ele otalen dowabiki, iyaya꞉ aya siliki bo꞉fo꞉len.
27206	ACT 7:21	A꞉la꞉ta꞉ga꞉ e ha꞉la꞉ya ta꞉fo꞉lena, Isib misa꞉ kaluwa꞉ ida꞉ya꞉ ta꞉ulia꞉ga꞉, ene so꞉wayo꞉ aumta꞉ga꞉ fofo꞉.
27207	ACT 7:22	A꞉la꞉fo꞉ko꞉lo꞉ Isib kalu ili mano꞉ Moses emo꞉wo꞉ tambo walali ko꞉lo꞉ Moses e to sa꞉lan o꞉lia꞉ man dimidan o꞉lia꞉yo꞉ halaido꞉ di kalu ko꞉lo꞉ kagayo꞉.
27208	ACT 7:23	“Moses e donayo꞉ do꞉la꞉fo꞉ fa꞉la꞉da꞉in ta꞉ga꞉ga꞉ dowabiki, Isolael kaluka꞉isale, ene ao i a꞉no꞉ ba꞉ba꞉ ha꞉na꞉no꞉ asulo꞉.
27209	ACT 7:24	E a꞉na elen amio꞉, Isib kaluwa꞉yo꞉ Isolael kaluwo꞉ mogagi dikidi sa꞉ndabiki ba꞉ba꞉ ko꞉lo꞉ eyo꞉ asuwa꞉takiyo꞉, Isib kalu a꞉no꞉ wediakiyo꞉, e sanaifa꞉.
27210	ACT 7:25	Moses eyo꞉ wediabikiyo꞉, ene ao i a꞉ma꞉ asulakiyo꞉ e Godelo꞉ asuwa꞉foma꞉ki iliga꞉fo꞉lo꞉ kalu a꞉la꞉bo꞉ asuluma꞉ki dimido꞉ ko꞉sega iliyo꞉ a꞉la꞉gabolo꞉b a꞉la꞉do꞉ mo꞉asulo꞉.
27211	ACT 7:26	Ho꞉len no amio꞉, Moses e Isolael kalu a꞉la꞉ nowo꞉ buba꞉lena ba꞉ba꞉. E ba꞉da꞉ga꞉, a꞉la꞉yo꞉ ha꞉fo꞉ disa꞉ma꞉ki sagale alitakiyo꞉, towo꞉ a꞉la꞉sio꞉, ‘Gao gaino꞉, waga bubadi?’
27212	ACT 7:27	Ko꞉sega kalu nolo꞉ sa꞉nda꞉likilo꞉ ha꞉nab a꞉ma꞉yo꞉, Moses e kanilaki, Mosesbo꞉wo꞉ a꞉la꞉sio꞉, ‘Nio gi bo꞉fo꞉liki mo꞉walila꞉lubika꞉ a꞉la꞉bo꞉, abe saefa꞉yo꞉?
27213	ACT 7:28	Alilo꞉ Isib kalu nowo꞉ gilo꞉ so꞉no꞉ aumbo꞉, o꞉go꞉lo꞉ nelo꞉ gi sanaifa꞉nigaya?’
27214	ACT 7:29	To sa꞉lab a꞉no꞉ da꞉da꞉sa꞉ga꞉, Moses e nai ha꞉na꞉ga꞉, Isib heno꞉ ta꞉ta꞉ga꞉, Midian hen a꞉na ha꞉na꞉sa꞉ga꞉yo꞉, e mio꞉ kalu silikiyo꞉, so꞉wayo꞉ a꞉la꞉ sa꞉la꞉li.
27215	ACT 7:30	“Moses e donayo꞉ do꞉la꞉fo꞉ fa꞉la꞉da꞉ino꞉ gulula꞉sa꞉ga꞉ ilikiyo꞉, e kalalili hen, Sainai misio꞉ anib doba꞉da꞉ sia꞉lena, i abol ko꞉lo꞉ nudula꞉ a꞉nami, delo꞉ wa꞉sowala꞉lab us a꞉na ma꞉mul kaluwo꞉ a꞉na elena, Moses e ba꞉ba꞉.
27216	ACT 7:31	Moses eyo꞉ ba꞉da꞉ga꞉yo꞉, e moda꞉sa꞉ga꞉, e ma꞉uwa꞉ya ba꞉ba꞉ni ha꞉nabiki, Gode Alan e towo꞉ a꞉na dabu.
27217	ACT 7:32	Godeya꞉yo꞉ Moses emo꞉wo꞉ a꞉la꞉sio꞉, ‘Ne gi ma꞉mu A꞉bla꞉hamo꞉, Aisego꞉, Yekobo꞉ i a꞉ma꞉ Godeyo꞉ Ne.’ A꞉la꞉sa꞉labiki, Moses e tagilaki bibi sado꞉geta꞉ga꞉, e mo꞉sikudu ba꞉ba꞉.
27218	ACT 7:33	“A꞉la꞉ta꞉ga꞉ Godeya꞉yo꞉ emo꞉wo꞉ a꞉la꞉sio꞉, ‘Hen gelo꞉ kagafo꞉lab we mada malilo꞉ hen ko꞉lo꞉ gi gido꞉fo꞉ amilo꞉ budi sa꞉ga꞉lo꞉ko꞉, dugulema!
27219	ACT 7:34	Kaluka꞉isale nilo꞉ ko꞉lo꞉ Isib hen ami silikilo꞉ hida꞉yo꞉ ililo꞉ diab a꞉no꞉ Ne ba꞉ba꞉. Ne ililo꞉ ya꞉la꞉lab a꞉no꞉ da꞉da꞉sa꞉ga꞉, Ne iyo꞉ ko꞉lo꞉ sili alifa꞉ni mio꞉. A꞉la꞉fo꞉ko꞉lo꞉ ge mena. Niyo꞉ ge a꞉ma꞉la꞉ Isib iliga꞉fa꞉nigo꞉l.’ Godeya꞉ a꞉la꞉sio꞉.”