27000	ACT 1:8	Ko꞉sega Mamaya꞉yo꞉ gio꞉ go꞉lu alitalikiyo꞉, gio꞉ halaido꞉wo꞉ dia꞉sa꞉ga꞉ ami, Ni towo꞉ Ya꞉lusalemo꞉lo꞉ Yudiayo꞉lo꞉, Samalia hen a꞉namio꞉ wida꞉sa꞉ga꞉, a꞉la꞉ta꞉ga꞉yo꞉ henfelo꞉ we tambo wida꞉li sia꞉mela꞉ib” a꞉la꞉sio꞉.
27008	ACT 1:16	“Nao i, Yuda꞉s e ni o꞉lia꞉ sia꞉likilo꞉, nili nanogdo꞉ dia꞉seno꞉ nowo꞉ e. Mo꞉luwo꞉ Mamaya꞉yo꞉ emo꞉ dinali sa꞉labikiyo꞉, Debidi eyo꞉ Godeya꞉ bugo꞉ amio꞉, Yuda꞉s eyo꞉ Ya꞉suwo꞉ teledoma꞉ib a꞉la꞉bo꞉, Debidi e sa꞉sa꞉li alifa꞉. A꞉la꞉fo꞉ko꞉lo꞉ o꞉g wenamio꞉, hendele fa꞉la꞉dowab.” Bida eyo꞉ imo꞉wo꞉ a꞉la꞉sio꞉.
27015	ACT 1:23	A꞉la꞉fo꞉ko꞉lo꞉ iliyo꞉ kalu wiyo꞉ a꞉la꞉ ko꞉lo꞉ salifa꞉. Nowo꞉ Yosa꞉b Basabas a꞉la꞉do꞉ sa꞉la꞉sen a꞉no꞉ ko꞉lo꞉ sio꞉. Ene wiyo꞉ nowo꞉ Yustus. Kalu nowo꞉ Matias.
27027	ACT 2:9	Nio꞉ heno꞉ ko꞉li ko꞉lilo꞉wa a꞉la꞉ga꞉ga꞉ mio꞉. Nolo꞉ Patia, Midia, Elam. Nowo꞉ Yudia, Kabadosia, Pontus, Esia, Filigia, Bafilia, Isib, a꞉la꞉ta꞉ga꞉ Libia hen anibamilo꞉ Salini amisa꞉n a꞉namilo꞉ sa꞉seno꞉ a꞉no꞉ ko꞉lo꞉ mio꞉, a꞉la꞉ta꞉ga꞉ nolo꞉ Lom a꞉na a꞉la꞉ta꞉ga꞉ ya꞉sio꞉.
27029	ACT 2:11	Ni us amio꞉, nolo꞉ Yu kalu, nolo꞉ Yu kaluma ko꞉sega, Yu kalu ililo꞉ tilidabu o꞉leaum, iyo꞉lo꞉ a꞉la꞉tilidabu. Nolo꞉ Kilit kalu, nolo꞉ Alebia kalu, ko꞉sega ililo꞉ Godeya꞉lo꞉ molo ha꞉na꞉no꞉ to widab a꞉no꞉, niliyo꞉ ninin towa꞉ do꞉do꞉l” a꞉la꞉sio꞉.
27035	ACT 2:17	“‘Godeya꞉yo꞉ sa꞉lakiyo꞉, “Elema꞉no꞉ ho꞉leno꞉ ko꞉na꞉ma dowalikiyo꞉, Ni Mamayo꞉ kaluka꞉isale tambomo꞉ ko꞉go꞉lu alifelema꞉no꞉ ko꞉lo꞉, Gi so꞉wa iyo꞉lo꞉, ga꞉la꞉la꞉yo꞉lo꞉, dinali sa꞉lan kaluwa꞉lo꞉ widan o꞉ngo꞉ doma꞉ib. So꞉wa iliyo꞉ ho꞉le ba꞉ba꞉ib, a꞉la꞉ta꞉ga꞉, kalu anaso꞉ imo꞉wo꞉ ofowo꞉ walalifelema꞉ib.
27036	ACT 2:18	Ho꞉len a꞉namio꞉, madali nanogdo꞉ dian kaluka꞉isale i a꞉namio꞉lo꞉ Ni Mamayo꞉ ko꞉go꞉lu alifelema꞉no꞉ ko꞉lo꞉ iyo꞉lo꞉ dinali sa꞉lan kaluwa꞉lo꞉ widan o꞉ngo꞉ doma꞉ib.
27037	ACT 2:19	Niyo꞉ akin halonamio꞉ molo ha꞉na꞉no꞉wo꞉ dimidama꞉no꞉. A꞉la꞉ta꞉ga꞉ henfelo꞉ wiyo꞉lo꞉ a꞉la꞉dimidama꞉no꞉. Ho꞉bo꞉ o꞉lia꞉ de o꞉lia꞉ a꞉la꞉ta꞉ga꞉ de ho꞉mo꞉n alan fa꞉la꞉doma꞉ki dimidama꞉no꞉.
27040	ACT 2:22	“Isolael kalu gio꞉, ni towa꞉ dabuma. Nasa꞉la꞉d kalu Ya꞉su, elo꞉ molo ha꞉na꞉no꞉ gilo꞉ amio꞉ dimido꞉ a꞉no꞉, giliyo꞉ ba꞉ba꞉ ko꞉lo꞉ E hendele Godeya꞉ da꞉fea꞉sa꞉ga꞉ iliga꞉fo꞉lo꞉b a꞉la꞉asuluma꞉ki go꞉.
27044	ACT 2:26	A꞉la꞉go꞉ko꞉lo꞉ ne sagalo꞉ siliki, niyo꞉ towo꞉ mada sagalo꞉le sa꞉la꞉lo꞉l. Ne sowalikiyo꞉, Giyo꞉ ne dane ane hen a꞉namio꞉ mo꞉ta꞉fa꞉ib. A꞉la꞉ta꞉ga꞉ gilo꞉ da꞉feyo꞉ kalu a꞉no꞉ hesema꞉kiyo꞉ mo꞉ta꞉fa꞉ib. A꞉la꞉fo꞉ko꞉lo꞉ ne to a꞉no꞉ fanda asulaki, mada mo꞉keleasuluma꞉no꞉.
27047	ACT 2:29	“Ni nao i, to a꞉no꞉ Debidi eyo꞉ a꞉la꞉sio꞉ ko꞉lo꞉ niyo꞉ o꞉go꞉ gimo꞉wo꞉ fanda so꞉lo꞉l. Mo꞉luwo꞉ nili ma꞉mu Debidi e sowabiki daido꞉ ko꞉lo꞉ elo꞉ daido꞉ hen a꞉no꞉ nilo꞉ sab anib wena a꞉lab.
27052	ACT 2:34	Debidi e Hebeneyo꞉ halona mo꞉ane ko꞉sega eyo꞉ a꞉la꞉sio꞉, “‘Godeya꞉yo꞉ ni Alanbo꞉wo꞉ a꞉la꞉sio꞉, Niyo꞉ gis kalu gilo꞉wo꞉ gi ha꞉g amio꞉ semo꞉ dia꞉talikiyo꞉, ge ni dagi ililiba siliki, ne o꞉lia꞉ bo꞉fo꞉lubi.’
27055	ACT 2:37	Kaluka꞉isaleyo꞉ to Bida elo꞉ widab a꞉no꞉ da꞉dakiyo꞉, iyo꞉ to a꞉ma꞉yo꞉ himuwa olabiki, iliyo꞉ Bidayo꞉ a꞉la꞉ta꞉ga꞉ Iliga꞉felo꞉ kalu nol o꞉lia꞉mo꞉wo꞉ a꞉la꞉dabuba꞉ba꞉, “Ni nao i, niliyo꞉ waga dimidama꞉no꞉wele?”
27069	ACT 3:4	A꞉la꞉ma꞉yo꞉ e ko꞉lo꞉ sikudu ba꞉daki, Bida eyo꞉ emo꞉wo꞉ a꞉la꞉sio꞉, “Na꞉no꞉ bo꞉ba!”
27071	ACT 3:6	Ko꞉sega Bida eyo꞉ emo꞉wo꞉ a꞉la꞉sio꞉, “Ne mole imilig nowo꞉ mada aundo꞉ma ko꞉sega, nilo꞉ da꞉labo꞉ we gemo꞉ dimia꞉nigo꞉l. Nasa꞉la꞉d kalu, Ya꞉su Kelisowa꞉ wi halaido꞉ a꞉ma꞉yo꞉, ge dasilia꞉ga꞉ hamana!”
27077	ACT 3:12	Bida e kaluka꞉isale kegeab a꞉no꞉ ba꞉da꞉sa꞉ga꞉yo꞉, imo꞉wo꞉ a꞉la꞉sio꞉, “Isolael kalu gio꞉, dimidab we ba꞉dakiyo꞉, waga molo tandeaya? Nanin halaido꞉wa꞉yo꞉ kalu we mo꞉falelo꞉ a꞉la꞉ta꞉ga꞉ na꞉no꞉ Godeya꞉ siwa꞉l amio꞉lo꞉ digalo꞉ kalu ko꞉lo꞉ we a꞉na dimido꞉lba. A꞉la꞉fo꞉ko꞉lo꞉ giliyo꞉ na꞉n ba꞉da꞉sa꞉ga꞉yo꞉ moda꞉so꞉bo.
27078	ACT 3:13	Nili ma꞉mu A꞉bla꞉hamo꞉, Aisego꞉, Yekobo꞉ i a꞉ma꞉ Godeya꞉yo꞉ wi alano꞉ Ene Nanogdo꞉ dian kalu, Ya꞉sumo꞉ dimi. Ko꞉sega kalu a꞉no꞉ giliyo꞉ gamani kalumo꞉ sanama꞉ki dimia꞉sa꞉ga꞉, Bailata eyo꞉ e ga꞉li hamana꞉ki ta꞉fa꞉no꞉ asulab, ko꞉sega gio꞉ Bailatdo꞉wa silikiyo꞉, e gola ba꞉ba꞉.
27082	ACT 3:17	“Nao i, gi o꞉lia꞉ gili misa꞉ kalu o꞉lia꞉ma꞉lo꞉ Ya꞉sumo꞉lo꞉ dimido꞉ a꞉no꞉ gio꞉ babale dofo꞉liki dimido꞉, niyo꞉ a꞉la꞉asulo꞉.
27100	ACT 4:9	Naindo꞉ giligo꞉ sen kalu ko꞉lo꞉ asuwa꞉takilo꞉, falele alifa꞉ a꞉no꞉ da꞉da꞉sa꞉ga꞉, giliyo꞉ o꞉go꞉ na꞉no꞉ a꞉na mo꞉walilab ko꞉lo꞉ giyo꞉lo꞉ Isolael kaluwo꞉lo꞉ tambo asuluma꞉ki, niyo꞉ walama꞉no꞉. Kalu giligo꞉ sen ko꞉lo꞉ falela꞉sa꞉ga꞉lo꞉ kagayab we, Nasa꞉la꞉d kalu, Ya꞉su Kelisowa꞉ wi halaido꞉ a꞉ma꞉yo꞉ mada falele alifa꞉. Giliyo꞉ Ya꞉su E, i malana sana sowo꞉ ko꞉lo꞉ Godeya꞉yo꞉ E a꞉ma꞉la꞉ a꞉dasi alifa꞉.
27106	ACT 4:15	A꞉la꞉fo꞉ko꞉lo꞉ iliyo꞉ a꞉la꞉yo꞉ ha꞉la꞉ya o꞉hamana a꞉la꞉ta꞉ga꞉, egelebo꞉ towo꞉ a꞉la꞉nenelo꞉, “Niliyo꞉ kalu a꞉la꞉ o꞉mo꞉wo꞉ waga dimidama꞉no꞉wele? A꞉la꞉ma꞉lo꞉ molo ha꞉na꞉no꞉ dimido꞉ a꞉no꞉ Ya꞉lusalem kaluka꞉isaleyo꞉ tambo o꞉ma asululi ko꞉lo꞉ niliyo꞉ ‘we hendelema’ a꞉la꞉bo꞉ mo꞉sa꞉ma꞉no꞉.
27110	ACT 4:19	Ko꞉sega Bida o꞉lia꞉ Yon dia꞉ma꞉yo꞉ a꞉ma꞉la꞉yo꞉ a꞉la꞉sio꞉, “Na꞉no꞉ gili towo꞉ ko꞉lo꞉ kudu ha꞉na꞉no꞉ kibo꞉bowo꞉, Godeya꞉ towo꞉ mo꞉kuduha꞉na꞉no꞉ domabe ko꞉lo꞉ ginino꞉ dinafa alobana ba꞉da꞉bi.
27116	ACT 4:25	Nili ma꞉mu Debidi e Gi nanogdo꞉ dian kalu ko꞉lo꞉ Godeya꞉ Mamaya꞉ ene halaido꞉ emo꞉ dimiabiki, Gi to we a꞉na sa꞉sa꞉lo꞉, “‘Henfelo꞉ kaluka꞉isaleyo꞉ waga mada kulufa꞉yabele? Iliyo꞉ Gode o꞉lia꞉ madalilo꞉ babuma꞉no꞉ saitab we, waga nenelabele?
27150	ACT 5:22	Ko꞉sega dibolo alo꞉ bo꞉fo꞉lowan kaluwo꞉ aya ha꞉na꞉sa꞉ga꞉ ba꞉ba꞉ amio꞉, Iliga꞉felo꞉ kalu i a꞉no꞉ a꞉namilo꞉ mo꞉sena ba꞉ba꞉ ko꞉lo꞉ iyo꞉ a꞉ma꞉la꞉ ha꞉na꞉sa꞉ga꞉ misa꞉ kalumo꞉wo꞉ a꞉la꞉sio꞉, “Nio꞉ dibolo aya fa꞉la꞉dowaki ba꞉ba꞉ amio꞉, togo꞉ tambo uludo꞉ ko꞉lo꞉, dibolo alo꞉ bo꞉fo꞉lowan kaluwo꞉ toga꞉me amio꞉ o꞉li yasila꞉len ko꞉sega, nio꞉ dibolo a usamio꞉, kalu i a꞉no꞉ mada aundo꞉ma elena ba꞉ba꞉.”
27155	ACT 5:27	Dibolo alo꞉ bo꞉fo꞉lowan kaluwa꞉yo꞉ Iliga꞉felo꞉ kalu iyo꞉ tilili ya꞉sa꞉ga꞉, Yuwa꞉ kanisolo kalulo꞉wa ta꞉fo꞉liki, bobalo꞉ so꞉mia꞉sen misa꞉ kalu eyo꞉ imo꞉wo꞉ a꞉la꞉sio꞉, “Niliyo꞉ tamin amio꞉ gimo꞉wo꞉ ‘kalu wa꞉ma꞉ wi amio꞉ kaluka꞉isalemo꞉wo꞉ wida꞉so꞉boka꞉’ a꞉la꞉bo꞉ towo꞉ halaido꞉ saefa꞉ ko꞉sega giliyo꞉ Ya꞉lusalem kaluka꞉isalemo꞉wo꞉ tambo towo꞉ wida꞉li ha꞉nab ko꞉lo꞉ giliyo꞉ kaluka꞉isalemo꞉wo꞉ ‘kalu we nili sanasowo꞉ka꞉’ a꞉la꞉li diga꞉li sa꞉la꞉lab” a꞉la꞉sio꞉.
27157	ACT 5:29	To a꞉no꞉ da꞉da꞉sa꞉ga꞉, Bida o꞉lia꞉ Iliga꞉felo꞉ kalu i nol a꞉ma꞉yo꞉ towo꞉ a꞉la꞉sio꞉, “Niliyo꞉ kaluwa꞉ towo꞉ mo꞉kudu ha꞉na꞉no꞉ ko꞉sega, Godeya꞉ Ene toleyo꞉ ko꞉lo꞉ mada kudu ha꞉na꞉no꞉.
27172	ACT 6:2	A꞉la꞉fo꞉ko꞉lo꞉ Iliga꞉felo꞉ kalu kugula꞉fo꞉ a꞉ma꞉yo꞉, tilidabu kaluwo꞉ tambo ho꞉le kegea꞉sa꞉ga꞉, imo꞉wo꞉ a꞉la꞉sio꞉, “Nio꞉ nanog diakiyo꞉, Godeya꞉ to walama꞉no꞉wo꞉ kadetaki, ma꞉no꞉ sagama꞉no꞉ dowalega mogago꞉ doma꞉ib.
27175	ACT 6:5	Iliyo꞉ a꞉la꞉sa꞉labiki, tilidabu kaluka꞉isale iliyo꞉ to sa꞉lab a꞉no꞉ da꞉da꞉sa꞉ga꞉ tambo sagalaki, iliyo꞉ kalu nolo꞉ da꞉feyo꞉. Da꞉feyo꞉ kaluwo꞉ nowo꞉ Sitifen. E tilidabu alan a꞉la꞉ta꞉ga꞉ Godeya꞉ Mamayo꞉ e amio꞉ wa꞉lifo꞉. Da꞉feyo꞉ kalu nowo꞉ we, Filib, Bolokolus, Nikanol, Timon, Balmenas, a꞉la꞉ta꞉ga꞉ nowo꞉ Nikolas, e Antio꞉g amisa꞉n kalu ko꞉lo꞉ e tamin amio꞉ Yu kaluwa꞉lo꞉ tilidabu a꞉no꞉ elo꞉ kudu ane.
27184	ACT 6:14	Kalu wema꞉yo꞉ ‘Ya꞉su, Nasa꞉la꞉d kalu a꞉ma꞉yo꞉ Godeya꞉ Malilo꞉ a we bidilaki, Mosesa꞉ ele man ko꞉lo꞉ nimo꞉lo꞉ dimi a꞉no꞉ togonolema꞉ib’ a꞉la꞉wida꞉labiki dabu” a꞉la꞉sio꞉.
27187	ACT 7:2	To elo꞉ dabu ba꞉dab a꞉na, a꞉ma꞉la꞉ sa꞉lakiyo꞉ a꞉la꞉sio꞉, “Nao i, do i, gio꞉ dabuma! Nili ma꞉mu A꞉bla꞉ham eyo꞉ Halan amisa꞉n semo꞉ ane amio꞉, Mesobotemia hena sen amio꞉, halaido꞉ Gode a꞉no꞉ elo꞉wa fa꞉la꞉dowakiyo꞉, emo꞉wo꞉ a꞉la꞉sio꞉, ‘Ge go꞉no꞉n mo꞉mio꞉ o꞉lia꞉, go꞉no꞉n hen o꞉lia꞉ ta꞉taki, hen ko꞉li nilo꞉ gemo꞉lo꞉ walama꞉no꞉ a꞉no꞉, ge a꞉na mesa꞉no꞉ hamana.’
27190	ACT 7:5	Ho꞉len a꞉namio꞉, emo꞉wo꞉ ene hendeyo꞉ mo꞉dimiaki, ha꞉lugo꞉wo꞉lo꞉ emo꞉wo꞉ bo꞉fo꞉melea꞉kiyo꞉ mo꞉dimi. Ko꞉sega Godeya꞉ emo꞉ dinali sa꞉laki a꞉la꞉sio꞉, ‘Niyo꞉ hen we tambo ge o꞉lia꞉ gilo꞉ so꞉wa sa꞉la꞉la꞉i ha꞉nab o꞉lia꞉mo꞉wo꞉ dimia꞉no꞉.’ A꞉bla꞉ham e so꞉walo꞉ma dowo꞉ ko꞉sega Godeya꞉yo꞉ emo꞉wo꞉ a꞉la꞉dinali salifa꞉.
27192	ACT 7:7	Ko꞉sega Niyo꞉ ilo꞉ da꞉ibo꞉ so꞉wa mesea꞉kilo꞉ ta꞉fo꞉ kalu a꞉no꞉ Isib ego꞉ ko꞉lo꞉ iyo꞉ falasila꞉ma꞉no꞉ a꞉la꞉ta꞉ga꞉ tif amio꞉ Niyo꞉ gi so꞉wa sa꞉la꞉la꞉i ha꞉nab i a꞉no꞉ a꞉ma꞉la꞉ tililia꞉ga꞉, hen wena siliki, Nemo꞉wo꞉ gulugulula꞉ma꞉ib.’ Godeya꞉yo꞉ a꞉la꞉sio꞉
27194	ACT 7:9	“Nili ma꞉mu, Yekoba꞉ insisa꞉i nolba꞉yo꞉ Yosa꞉bo꞉wo꞉ keleasula꞉sa꞉ga꞉, e Isib kaluwa꞉ da꞉ibo꞉ kalu doma꞉ki, moleya꞉ kilili. Ko꞉sega Godeya꞉yo꞉ Yosa꞉b e hida꞉yo꞉ ba꞉dab a꞉namio꞉, e o꞉lia꞉ dofo꞉liki asufa꞉ ko꞉loemo꞉wo꞉ asulo꞉ alan dimiabiki, Isib misa꞉ kalu, Felo꞉wa꞉ siwa꞉l amio꞉ Yosa꞉b ene mano꞉ nafa ba꞉da꞉sa꞉ga꞉, Felo꞉ e sagalaki, Isib hen o꞉lia꞉ ene a o꞉lia꞉yo꞉ Yosa꞉b emo꞉ bo꞉fo꞉melea꞉ki ta꞉fo꞉.
27212	ACT 7:27	Ko꞉sega kalu nolo꞉ sa꞉nda꞉likilo꞉ ha꞉nab a꞉ma꞉yo꞉, Moses e kanilaki, Mosesbo꞉wo꞉ a꞉la꞉sio꞉, ‘Nio gi bo꞉fo꞉liki mo꞉walila꞉lubika꞉ a꞉la꞉bo꞉, abe saefa꞉yo꞉?
27217	ACT 7:32	Godeya꞉yo꞉ Moses emo꞉wo꞉ a꞉la꞉sio꞉, ‘Ne gi ma꞉mu A꞉bla꞉hamo꞉, Aisego꞉, Yekobo꞉ i a꞉ma꞉ Godeyo꞉ Ne.’ A꞉la꞉sa꞉labiki, Moses e tagilaki bibi sado꞉geta꞉ga꞉, e mo꞉sikudu ba꞉ba꞉.
27219	ACT 7:34	Kaluka꞉isale nilo꞉ ko꞉lo꞉ Isib hen ami silikilo꞉ hida꞉yo꞉ ililo꞉ diab a꞉no꞉ Ne ba꞉ba꞉. Ne ililo꞉ ya꞉la꞉lab a꞉no꞉ da꞉da꞉sa꞉ga꞉, Ne iyo꞉ ko꞉lo꞉ sili alifa꞉ni mio꞉. A꞉la꞉fo꞉ko꞉lo꞉ ge mena. Niyo꞉ ge a꞉ma꞉la꞉ Isib iliga꞉fa꞉nigo꞉l.’ Godeya꞉ a꞉la꞉sio꞉.”
27220	ACT 7:35	A꞉la꞉fo꞉ko꞉lo꞉ Sitifen eyo꞉ to nolo꞉ a꞉kudu sio꞉, “Moses ko꞉lo꞉ o꞉gdo꞉ Godelo꞉ Isibdo꞉ iliga꞉fa꞉nigab a꞉no꞉, tamin amilo꞉ Isolael kaluka꞉isaleya꞉lo꞉ e gola ba꞉dakiyo꞉, emo꞉wo꞉ a꞉la꞉sio꞉, ‘Nio꞉ gi bo꞉fo꞉liki mo꞉walila꞉bika꞉ a꞉la꞉bo꞉, abe saefa꞉yo꞉?’ a꞉la꞉do꞉ sa꞉labikilo꞉ aneyo꞉ o꞉m. A꞉la꞉fo꞉ko꞉lo꞉ Godeya꞉yo꞉ ma꞉mul kalu ilo꞉wa a꞉la꞉ta꞉ga꞉ Mosesdo꞉ amilo꞉ fa꞉la꞉dowo꞉ a꞉ma꞉liki, Moses eyo꞉ Isolael kaluka꞉isaleyo꞉ sili dofo꞉liki bo꞉fo꞉melea꞉ki, iliga꞉fo꞉.
27228	ACT 7:43	Gio꞉ gulugululan helebeso꞉g a dia꞉likilo꞉ sia꞉len a꞉no꞉ madali gode Molog eno꞉ a꞉la꞉ta꞉ga꞉ madali gode tamin ko꞉lo꞉ wabudab a꞉no꞉ Lafan eno꞉. Gini dagiya꞉ madali gode a꞉no꞉ dimida꞉sa꞉, o꞉mo꞉wo꞉ wabulu sio꞉. A꞉la꞉fo꞉ko꞉lo꞉ Niyo꞉ gini hende amio꞉ a꞉ma꞉la꞉yo꞉ mo꞉mena꞉ki, Babalon heno꞉ tiginita꞉ga꞉ ko꞉na꞉ ta꞉foma꞉ki ta꞉fa꞉no꞉.’ Dinali sa꞉lan kaluwa꞉yo꞉ a꞉la꞉sa꞉sa꞉lo꞉.
27229	ACT 7:44	“Nili ma꞉muwa꞉yo꞉ helebeso꞉g a a꞉no꞉ Godeyo꞉ a꞉labka꞉ a꞉la꞉widakiyo꞉, kalalili hen a꞉namio꞉ dia꞉liki sia꞉len. Helebeso꞉g a a꞉no꞉ dia꞉no꞉wo꞉, Godeya꞉yo꞉ Mosesbo꞉ wido꞉ ko꞉lo꞉ iyo꞉ a꞉la꞉dimido꞉.
27234	ACT 7:49	“‘Hebenelo꞉ halo nelo꞉ mesa꞉no꞉ i fofodo꞉wo꞉ o꞉m, a꞉la꞉ta꞉ga꞉ henfelo꞉ we Ni gido꞉fo꞉lo꞉ wa꞉lo꞉fo꞉mela꞉no꞉wo꞉ o꞉m. A꞉la꞉fo꞉ko꞉lo꞉ a Nilo꞉ mesa꞉no꞉ o꞉li o꞉ngo꞉wo꞉ gio꞉ waga dia꞉no꞉wo꞉? Nelo꞉ mesa꞉no꞉wo꞉ ayo꞉ mada mo꞉dialifa꞉ib.
27235	ACT 7:50	Mo꞉wo꞉ kelego꞉ we No꞉no꞉n tambo dimido꞉.’ Godeya꞉ a꞉la꞉sio꞉.”
27241	ACT 7:56	A꞉la꞉ta꞉ga꞉ eyo꞉ a꞉la꞉sio꞉, “Gio꞉ bo꞉ba! Ne Hebeneyo꞉ kolaitabiki ba꞉ba꞉ amio꞉, Kalule Dowo꞉ E Godeya꞉ ene dagi ililiba kagayabiki bo꞉do꞉l.”
27289	ACT 9:4	A꞉la꞉gabiki So꞉l e a꞉na hena sulufo꞉ tina꞉sa꞉ga꞉, to nowo꞉ emo꞉ sa꞉labiki dabu. “So꞉l, So꞉l, Giyo꞉ Ne waga mogagila꞉ya?”
27290	ACT 9:5	A꞉la꞉sa꞉labiki, So꞉l eyo꞉, “Alan, Ge o꞉ba?” a꞉la꞉sio꞉. “Ne Ya꞉su ko꞉lo꞉ gilo꞉ mogagila꞉yo꞉ Ne.
27300	ACT 9:15	Ko꞉sega Alana꞉yo꞉ emo꞉wo꞉ a꞉la꞉sio꞉, “Ha꞉la꞉ kaluwo꞉ a꞉la꞉ta꞉ga꞉ ene misa꞉ kaluwo꞉, a꞉la꞉ta꞉ga꞉ Isolael kalu o꞉lia꞉yo꞉ tambo No꞉no꞉n wiyo꞉ walama꞉ki, kalu we No꞉no꞉n da꞉fe alifa꞉ ko꞉lo꞉ ge elo꞉wa hamana.
27301	ACT 9:16	E Ni wiyo꞉ wida꞉likilo꞉, hida꞉yo꞉ ko꞉li ko꞉lilo꞉wo꞉ ba꞉da꞉i ha꞉na꞉no꞉wo꞉, No꞉no꞉no꞉ walama꞉no꞉” a꞉la꞉sio꞉.
27302	ACT 9:17	A꞉la꞉fo꞉ko꞉lo꞉ Ananaias e aya ha꞉na꞉sa꞉ga꞉ tina꞉ga꞉yo꞉, e dagiyo꞉ Solo꞉ go꞉lakiyo꞉ a꞉la꞉sio꞉, “Nao So꞉l, Ne Alana꞉ gelo꞉wa iliga꞉tabi mio꞉. Ge toga ya꞉len amilo꞉, Ya꞉su gelo꞉ amilo꞉ handalowo꞉ a꞉ma꞉ iliga꞉tabi mio꞉. Ge wa꞉ka o꞉li ba꞉da꞉sa꞉ga꞉, Godeya꞉ Mamayo꞉ ge amio꞉ wa꞉lifoma꞉ki, ne gelo꞉wa iliga꞉fo꞉.”
27341	ACT 10:13	A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, “Bida, ge dasima! No꞉ we yasala꞉sa꞉ga꞉ maiya!”
27342	ACT 10:14	A꞉la꞉sa꞉labiki, Bida eyo꞉ a꞉ma꞉la꞉bo꞉ a꞉la꞉sio꞉, “Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ ‘Na꞉so꞉bo’ a꞉la꞉do꞉ saefo꞉ a꞉no꞉ ne mada mo꞉nan.”
27347	ACT 10:19	Bida eyo꞉ ho꞉le ba꞉ba꞉ a꞉ma꞉ ha꞉go꞉ o꞉kedelen amio꞉, Godeya꞉ Mamaya꞉yo꞉ emo꞉wo꞉ a꞉la꞉sio꞉, “Saimon, kalu otalena꞉yo꞉ ge kedab ko꞉lo꞉ ge dasila꞉sa꞉ga꞉, ha꞉g holona timana. I a꞉no꞉ No꞉no꞉n gelo꞉wa iliga꞉fo꞉ ko꞉lo꞉ ge i o꞉lia꞉ ha꞉nakiyo꞉ kele asulakiyo꞉ ha꞉na꞉so꞉bo.”
27362	ACT 10:34	A꞉la꞉sa꞉labiki, Bida eyo꞉ a꞉la꞉sio꞉, “Niyo꞉ o꞉go꞉ fanda asulakiyo꞉, Godeya꞉yo꞉ henfelo꞉ kaluka꞉isale ko꞉li ko꞉lilo꞉ sab o꞉mo꞉wo꞉, mano꞉ imilig dimida꞉sen.
27366	ACT 10:38	Niyo꞉ a꞉no꞉ ko꞉lo꞉ sio꞉. Ya꞉su, Nasa꞉la꞉d kalu e, Godeya꞉yo꞉ da꞉fea꞉sa꞉ga꞉, halaido꞉ o꞉lia꞉ Ene Mama o꞉lia꞉yo꞉ dimi ko꞉lo꞉ Ya꞉su e, Gode o꞉lia꞉ ilikiyo꞉, man nafa dimida꞉liki sia꞉len. A꞉la꞉ta꞉ga꞉ eyo꞉ kaluka꞉isaleyo꞉ Seteneya꞉ bo꞉fo꞉likilo꞉ dikidia꞉sen a꞉no꞉ sili alifelo꞉.
27380	ACT 11:4	A꞉la꞉sa꞉labiki, Bida eyo꞉ dimido꞉ fa꞉la꞉dowo꞉ o꞉leaumbo꞉ kalu imo꞉wo꞉ tambo fanda sa꞉laki a꞉la꞉sio꞉, “Ne Yoba amisa꞉na siliki, dulugu sa꞉la꞉len amio꞉, ne ho꞉le ba꞉dakiyo꞉, Hebene kolaita꞉sa꞉ga꞉, kelego꞉ nowo꞉ helebeso꞉g alano꞉ o꞉ngo꞉ ko꞉lo꞉ migif fa꞉la꞉da꞉in ami ta꞉lidota꞉ga꞉, ololo to꞉lola꞉i tindabi ba꞉ba꞉.
27383	ACT 11:7	A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, ‘Bida, ge dasima! No꞉ we yasala꞉sa꞉ga꞉ maiya!’
27384	ACT 11:8	A꞉la꞉sa꞉labiki, niyo꞉ a꞉ma꞉la꞉bo꞉ a꞉la꞉sio꞉, ‘Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ “Na꞉so꞉boka꞉” a꞉la꞉do꞉ saefo꞉ a꞉no꞉ ne mada mo꞉nan.’
27432	ACT 13:1	Antio꞉g sa꞉s a꞉namio꞉, dinali sa꞉lan kalu nol o꞉lia꞉ a꞉la꞉ta꞉ga꞉ widan kalu nol o꞉lia꞉yo꞉ a꞉na elen. Kalu i a꞉no꞉ nowo꞉ wiyo꞉ Banabas, nowo꞉ Simeon ene wiyo꞉ nowo꞉ Nigel, nowo꞉ Lusius e Salini kalu, nowo꞉ So꞉l, nowo꞉ Manain e so꞉wa silikiyo꞉, gamani misa꞉ Helo꞉d o꞉lia꞉ anayo꞉.
27446	ACT 13:15	Kalu noma꞉yo꞉ Mosesa꞉ ele sa꞉sa꞉lo꞉ o꞉lia꞉ dinali sa꞉lana꞉ to sa꞉sa꞉lo꞉ a꞉no꞉lia꞉yo꞉ agela꞉ mea꞉la꞉ga꞉yo꞉, alo꞉ bo꞉fo꞉lowan kalu i a꞉ma꞉yo꞉ a꞉la꞉mo꞉wo꞉ to sagetaki, “Nai, gego꞉ to mano꞉ kaluka꞉isaleya꞉ asulo꞉ halale alitakilo꞉ sa꞉ma꞉no꞉wo꞉ da꞉labolalega, gego꞉ sa꞉ma꞉ni mena” a꞉la꞉liki saga꞉fo꞉.
27453	ACT 13:22	Godeya꞉yo꞉ So꞉l e dugula꞉sa꞉ga꞉, Debidi e Isolael misa꞉ kalu ta꞉fo꞉. Godeya꞉yo꞉ Debidi dia꞉no꞉ sa꞉lakiyo꞉ a꞉la꞉sio꞉, ‘Ya꞉siya꞉ so꞉wa Debidi we, ne ba꞉da꞉sa꞉ga꞉ da꞉feyo꞉. No꞉no꞉ ha꞉fo꞉lo꞉ disa꞉yo꞉ e dowab ko꞉lo꞉, nilo꞉ emo꞉lo꞉ dimidama꞉kilo꞉ asulab a꞉no꞉ e tambowo꞉ dimidama꞉ib’ a꞉la꞉sio꞉.
27456	ACT 13:25	Yona꞉lo꞉ nanog dia꞉leno꞉ elema꞉nikiyo꞉, eyo꞉ a꞉la꞉sio꞉, ‘Giliyo꞉ ne o꞉b a꞉la꞉asulaya? Ne gililo꞉ yasila꞉len o꞉ma. E ni fa꞉sa mia꞉ib. Niyo꞉ e budi sa꞉ga꞉lo꞉ amilo꞉ me ko꞉lo꞉ melealifa꞉ a꞉no꞉ ne fagela꞉ma꞉no꞉wo꞉ mo꞉lido꞉’ a꞉la꞉sio꞉.
27457	ACT 13:26	“Nao i, A꞉bla꞉hama꞉ ema꞉mu i o꞉lia꞉ Yu kaluma Godelo꞉ wabuda꞉len o꞉lia꞉yo꞉, gio꞉ tambo dabuma. Nilo꞉ a꞉ma꞉la꞉lo꞉ gasili to nafa a꞉no꞉ Godeya꞉yo꞉ nimo꞉wo꞉ sama꞉ki, nilo꞉wa iliga꞉fo꞉.
27465	ACT 13:34	Ya꞉suwo꞉ sowa꞉sa꞉ga꞉ a꞉labiki, Godeya꞉yo꞉ e a꞉ma꞉la꞉ dasi alifa꞉ ko꞉lo꞉ tif amio꞉ e do꞉mo꞉wo꞉ mada mo꞉hesema꞉ib. A꞉la꞉fo꞉ko꞉lo꞉ Godeya꞉yo꞉ a꞉la꞉sio꞉, ‘Niyo꞉ Debidimo꞉lo꞉ dinali sio꞉ a꞉no꞉ gimo꞉ dimiakiyo꞉, gio꞉ nafa halaido꞉ mesea꞉ki sa꞉ma꞉nigo꞉l.’
27472	ACT 13:41	Dinali sa꞉lan kaluwa꞉yo꞉ Godeya꞉ towo꞉ dia꞉sa꞉ga꞉yo꞉ a꞉la꞉sa꞉sa꞉lo꞉, “‘Dabuma! Gio꞉ Ni man sa꞉labo꞉ mogagi dio꞉ge sa꞉labdo꞉ a꞉no꞉ gio꞉ molo asula꞉sa꞉ga꞉yo꞉ soma꞉ib. Mo꞉wo꞉ o꞉g ho꞉len gilo꞉ sab wenamio꞉, niyo꞉ nanog ko꞉li dimida꞉ma꞉no꞉ ko꞉lo꞉ kalu nolba꞉yo꞉ gemo꞉wo꞉ malolo꞉ mealega, giyo꞉ to a꞉no꞉ mo꞉ tilida꞉babe.’” Fol eyo꞉ a꞉la꞉sio꞉.
27477	ACT 13:46	Ko꞉sega Fol dia꞉ Banabas dia꞉yo꞉ a꞉ma꞉la꞉bo꞉ halale a꞉la꞉sio꞉, “Na꞉no꞉ Yu kalu gimo꞉wo꞉ Godeya꞉ to mano꞉ gi ko꞉le wido꞉ a꞉la꞉bo꞉ Godeya꞉ sio꞉, ko꞉sega gio꞉ to a꞉no꞉ gola ba꞉dakiyo꞉, mela꞉no꞉ mela꞉no꞉ a꞉no꞉ giliyo꞉ dio꞉l a꞉la꞉bo꞉ mo꞉egab a꞉la꞉sulo꞉ ko꞉lo꞉ na꞉no꞉ o꞉go꞉ Yu kaluka꞉isalema o꞉lo꞉wa ha꞉na꞉sa꞉ga꞉ walama꞉no꞉.
27478	ACT 13:47	Mo꞉wo꞉ we, Alana꞉yo꞉ nenbo꞉wo꞉ saitakiyo꞉ a꞉la꞉sio꞉, ‘Niyo꞉ gego꞉ Yu kaluka꞉isalema usa ilikiyo꞉, ho꞉len o꞉ngo꞉ ko꞉lo꞉ dimio꞉l. Niyo꞉ henfelo꞉ kaluka꞉isaleyo꞉ tambo a꞉ma꞉la꞉ gasilima꞉kiyo꞉, gi henfelo꞉ amio꞉ towo꞉ dia꞉ha꞉na꞉ga꞉ sa꞉la꞉mela꞉ib.’”
27498	ACT 14:15	“Kaluka꞉isale gililo꞉ dimidab we, waga asulabiki dimidaya? Na꞉no꞉lo꞉ henfelo꞉ kalule, ge o꞉ngo꞉ mio꞉ ko꞉lo꞉ gililo꞉ madali godemo꞉lo꞉ duluda꞉lab a꞉no꞉ kata꞉ta꞉sa꞉ga꞉, Gode mela꞉no꞉lo꞉ a꞉lab a꞉no꞉, Hebeneyo꞉lo꞉, henfelo꞉wo꞉lo꞉, so꞉lu ho꞉no꞉ o꞉lia꞉ kelego꞉ a꞉namio꞉lo꞉ da꞉labdo꞉ dimido꞉ a꞉no꞉ ko꞉lo꞉ duluguma꞉ki, walama꞉ni mio꞉.
27505	ACT 14:22	A꞉la꞉yo꞉ a꞉na ha꞉na꞉sa꞉ga꞉yo꞉, tilidabu kaluka꞉isale a꞉no꞉ man hendele usa tiha꞉na꞉sa꞉ga꞉, tilidabu halaido꞉wo꞉ dima꞉ki, widaki a꞉la꞉sio꞉, “Nio꞉ hida꞉yo꞉ ko꞉li ko꞉lilo꞉ ko꞉le ba꞉da꞉i ha꞉na꞉la꞉ga꞉, Godeya꞉ enedo꞉ bo꞉fo꞉likilo꞉ ha꞉g amilo꞉ doma꞉no꞉wo꞉ niliyo꞉ a꞉na dia꞉no꞉” a꞉la꞉wida꞉i ane.
27518	ACT 15:7	Iyo꞉ nenela꞉len amio꞉, Bida e us a꞉na dasilia꞉ga꞉yo꞉ towo꞉ a꞉la꞉sio꞉, “Ni nao i, tamin amio꞉ Yu kaluka꞉isalema a꞉no꞉ Godeya꞉ to man nafa ko꞉lo꞉ nilo꞉ widab a꞉no꞉ da꞉da꞉sa꞉ga꞉ tilidabuma꞉kiyo꞉, Godeya꞉yo꞉ ni us wenamio꞉ keda꞉sa꞉ga꞉ ne a꞉na da꞉fe alifa꞉, a꞉la꞉bo꞉ gio꞉ asulo꞉.
27522	ACT 15:11	Giliyo꞉ a꞉la꞉bo꞉ ga꞉so꞉bo! Nio꞉ Ya꞉su Alana tilida꞉dabikiyo꞉, Eyo꞉ nio꞉ kanulaki, a꞉ma꞉la꞉ gasili aumbo꞉, Yu kaluka꞉isalema iyo꞉lo꞉ a꞉ma꞉la꞉ gasilia꞉ga꞉ ta꞉fo꞉.” Bida eyo꞉ a꞉la꞉sio꞉.
27524	ACT 15:13	A꞉la꞉ma꞉yo꞉ malola꞉la꞉ga꞉ eletabikiyo꞉, Yemes eyo꞉ a꞉ma꞉la꞉ a꞉la꞉sio꞉, “Nao i, to nilo꞉ sa꞉ma꞉nigo꞉l we, gio꞉ dabuma.
27527	ACT 15:16	“‘no꞉ dinafayaki, a ho꞉gi nafaleyo꞉ wa꞉ka a꞉dialifa꞉no꞉. Alan Niyo꞉ tamin amilo꞉ dinali sio꞉ aumbo꞉, o꞉go꞉ dimido꞉l.’”
27530	ACT 15:19	A꞉la꞉fo꞉ko꞉lo꞉ Yemes eyo꞉ wa꞉kabiyo꞉ a꞉la꞉sio꞉, “Ni asulo꞉ amio꞉, Yu kaluka꞉isalemalo꞉ Godemo꞉lo꞉ nodolo꞉ i o꞉mo꞉wo꞉, niliyo꞉ hida꞉yo꞉wo꞉ mo꞉dia꞉fa꞉niki.
27534	ACT 15:23	Antio꞉g ha꞉nakiyo꞉, ililo꞉ mo꞉fo꞉s sa꞉sa꞉lo꞉ dia꞉ganeyo꞉ we. Ni iliga꞉felo꞉ kalu o꞉lia꞉ sa꞉sdo꞉ bo꞉fo꞉lowan kalu o꞉lia꞉ gi gao niliyo꞉ mada o꞉m a꞉lo꞉ to sa꞉laki, Yu kaluka꞉isalema ko꞉lo꞉ tilidabu, Antio꞉g amisa꞉ndo꞉ sabo꞉, Silia hen amilo꞉ sabo꞉, a꞉la꞉ta꞉ga꞉ Silisia hen amilo꞉ sab gimo꞉wo꞉ sagalaki, mo꞉fo꞉so꞉ a꞉na iliga꞉to꞉l.
27547	ACT 15:36	Ho꞉len nolo꞉ ta꞉ta꞉sa꞉ga꞉yo꞉, Fol eyo꞉ Banabasbo꞉wo꞉ a꞉la꞉sio꞉, “Na꞉no꞉ a꞉ma꞉la꞉ amisa꞉n ko꞉li ko꞉lilo꞉ Alana꞉ to mando꞉ wida꞉i anelo꞉ a꞉namio꞉ ha꞉na꞉ga꞉, iyo꞉ waga dimida꞉li sabele a꞉la꞉liki ba꞉da꞉i ha꞉na꞉nigo꞉l” a꞉la꞉sio꞉.
27563	ACT 16:11	Nio꞉ dimidalia꞉sa꞉ga꞉, ho꞉n ko꞉suwo꞉ Toloas a꞉na disa꞉la꞉sa꞉ga꞉, ho꞉na꞉lo꞉ hegefa꞉ hen Samotilas a꞉na fofa꞉sa꞉ dia꞉sa꞉ga꞉ onolo ha꞉nakiyo꞉, ho꞉len imilig nowo꞉ ta꞉ta꞉ga꞉, Neabolis a꞉na fa꞉la꞉dowo꞉.
27564	ACT 16:12	Nio꞉ a꞉na fa꞉la꞉dota꞉ga꞉, hena ha꞉na꞉la꞉ga꞉, Filibai a꞉na fa꞉la꞉dowo꞉. Filibai a꞉no꞉ Masedonia hen amilo꞉ amisa꞉n alano꞉ e. Tamin amio꞉ Lom kaluwa꞉ amisa꞉n a꞉no꞉ bo꞉fo꞉len. Nio꞉ ho꞉len nowo꞉ a꞉na sen.
27570	ACT 16:18	Ga a꞉ma꞉yo꞉ ho꞉len modo꞉ amio꞉ a꞉la꞉sa꞉la꞉li ya꞉len ko꞉lo꞉, Fol e mo꞉bea꞉sa꞉ga꞉, nodolakiyo꞉ mama mogago꞉mo꞉wo꞉ towo꞉ a꞉la꞉sio꞉, “Niyo꞉ Ya꞉su Kelisowa꞉ wi halaido꞉ a꞉na ilikiyo꞉, ge ga we ta꞉fo꞉ hamana!” A꞉la꞉sa꞉labikiyo꞉, wigibo a꞉naka mama mogago꞉ e amilo꞉ elen a꞉no꞉ ta꞉fo꞉gane.
27577	ACT 16:25	Nulu us amio꞉, Fol dia꞉ Sailas dia꞉yo꞉ Godemo꞉ dulugu sa꞉la꞉liki, gisalo꞉wo꞉ mola꞉labiki, dibolo kalu nolo꞉ da꞉da꞉li sen.
27579	ACT 16:27	Bo꞉fo꞉lowan kaluwo꞉ si kagayaki ba꞉ba꞉ amio꞉, dibolo ayo꞉ togo꞉ kolalifelo꞉wa ba꞉da꞉ga꞉, eyo꞉ dibolo kalu tambo dalaido꞉wele a꞉la꞉asulakiyo꞉ e helebesiyo꞉ dia꞉sa꞉ga꞉, enena꞉ma꞉la꞉ sana soma꞉nigabiki, Fol eyo꞉ towo꞉ halale sa꞉lakiyo꞉, “Nio꞉ tambo o꞉so꞉l ko꞉lo꞉, ge go꞉no꞉n a꞉ma꞉la꞉yo꞉ mogagila꞉so꞉bo!”
27585	ACT 16:33	Nulu us a꞉naka, bo꞉fo꞉lowan kalu eyo꞉ a꞉la꞉yo꞉ tililia꞉sa꞉ga꞉, a꞉la꞉ma꞉ do꞉mo꞉ amilo꞉ gegede alifelo꞉ a꞉no꞉ ho꞉na꞉ to꞉go꞉de alifelabiki, o꞉g a꞉naka e o꞉lia꞉ e ayamilo꞉ sa꞉sen o꞉lia꞉yo꞉ ho꞉na to꞉lofelo꞉.
27589	ACT 16:37	Ko꞉sega Fola꞉yo꞉ a꞉ma꞉la꞉bo꞉ a꞉la꞉sio꞉, “Na꞉no꞉ Lom kalu ko꞉sega iliyo꞉ mo꞉mo꞉walilaki, na꞉no꞉ kaluka꞉isale siwa꞉la yame tanda꞉ya꞉sa꞉ga꞉, dibolowa to꞉lolo꞉ ko꞉lo꞉ o꞉go꞉ na꞉no꞉ iliyo꞉ wo꞉no꞉le sili alifa꞉no꞉ asulab ko꞉sega na꞉no꞉ a꞉la꞉bo꞉ mo꞉dimidama꞉no꞉. Inino꞉ ya꞉sa꞉ga꞉, na꞉no꞉ ha꞉sa tililia꞉ga꞉ ha꞉la꞉ ta꞉talega, na꞉no꞉ a꞉na ha꞉na꞉no꞉.”
27615	ACT 17:23	Ne amisa꞉n us wena sia꞉likiyo꞉, gili madali gode ko꞉li ko꞉lilo꞉ gililo꞉ gulugululan a꞉no꞉ dinafa ba꞉ba꞉. A꞉la꞉ta꞉ga꞉ u imilig dibido꞉ wa꞉l amilo꞉ wi sa꞉sa꞉lo꞉wo꞉ we ‘Gode Wilo꞉ Babalab a꞉ma꞉no꞉’ a꞉la꞉ sa꞉sa꞉lo꞉ ko꞉lo꞉ ba꞉ba꞉. A꞉la꞉fo꞉ko꞉lo꞉ giyo꞉ Gode mo꞉asulo꞉fo꞉likilo꞉, gulugulula꞉sen a꞉no꞉ o꞉go꞉ gimo꞉wo꞉ fanda sa꞉ma꞉nigo꞉l.
27620	ACT 17:28	Godeya꞉yo꞉ nimo꞉wo꞉ halaido꞉wo꞉ dimia꞉labiki, nio꞉ a꞉na iliki, nanogo꞉ a꞉na dimida꞉lo꞉l. Giasi kalu nolba꞉yo꞉ a꞉la꞉sa꞉sa꞉lo꞉, ‘Nio꞉ Ene so꞉wa ko꞉lo꞉lab.’
27632	ACT 18:6	Ko꞉sega Yu kalu iyo꞉ to elo꞉ wido꞉ a꞉no꞉ gola ba꞉daki, e dio꞉ge sa꞉labikiyo꞉, Fol eyo꞉ so꞉g sa꞉ga꞉lo꞉ enedo꞉ a꞉no꞉ duda꞉sa꞉ga꞉ hena꞉mu ko꞉lo꞉ babedo꞉ a꞉no꞉ fifilaki a꞉la꞉sio꞉, “Gio꞉ falasilalega, ginido꞉ hala dimido꞉ a꞉na auma꞉ib. Ne amio꞉ halayo꞉ aundo꞉ma ko꞉lo꞉ ne ga꞉li doma꞉no꞉. O꞉g wena a꞉la꞉ta꞉ga꞉yo꞉, ne Yu kaluka꞉isalema imo꞉wo꞉ towo꞉ walama꞉ ha꞉na꞉nigo꞉l.”