3	GEN 1:3	Mewö maliga Anutunöŋ kewö jim kutuyök: “Asakŋan mönö asuhum tiŋgitma.” Mewö jim kutuiga miri mönö asariyök.
6	GEN 1:6	Giaŋiiga Anutunöŋ kewö jim kutuyök: “Mönö o sutŋine suepkö jabö köhöikŋi asuhuba o mendeŋniga euke aka emuke ahömahot.”
9	GEN 1:9	Giaŋiiga Anutunöŋ kewö jim kutuyök: “O suep bapŋe ahözei, mi mönö qezakögetka kambu mohot aiga gölme örönŋi asuhuma.” Mewö jim kutuiga mönö mewö asuhuyök.
11	GEN 1:11	Ölöwahiga kewö jim kutuyök: “Gölme qakŋe mönö yuai görökŋi (töŋgönŋi) pakpak kewö asuhuba wahötme: Gwözözak yuai kötŋinambuk mi mönö asuhuba wahöta kötŋini kuŋguba söhömakŋe. Ip kösö tandökŋini könaŋi könaŋi mönö gölmenöŋ asuhuba ölŋini kötŋinambuk kuŋguba söhömakŋe.” Mewö jim kutuiga mönö kewö asuhuyök:
14	GEN 1:14	Giaŋiiga Anutunöŋ kewö jim kutuyök: “Suepkö jabö köhöikŋe mönö asakŋi asakŋi asuhuba wehön aka suŋgem mi mendeŋ etkiba kinda (yara) yambu, kömunjaŋ kie nalö aka wehön nalö, gwani nalö aka silim mohot mohotkö aiwesökŋina ahöme.
15	GEN 1:15	Mieŋön mönö suepkö jabö köhöikŋi miaŋgöreŋ asakŋi asakŋi aka gölme mem asarime.” Mewö jim kutuiga mönö kewö asuhuget:
20	GEN 1:20	Giaŋiiga Anutunöŋ kewö jim kutuyök: “O köwet mieŋgö uruŋine mönö yuai isikusukŋinambuk asuhuba dop köla o qeba ölölaŋgöba laŋ anda kaba malme. Mewöŋanök neiŋi neiŋi gölme qakŋe könakemba bölbölgöba kutuba anda kaba malme.”
22	GEN 1:22	Ölöwahiga kötuetköm eŋgiba keu kewö jiyök: “Iŋini mönö köt moröŋinambuk jul sehiba o köwet dop köla malme aiga nei iŋini mönö mewöŋanök gölme qakŋe ahum sehime.”
24	GEN 1:24	Giaŋiiga Anutunöŋ kewö jim kutuyök: “Gölme qakŋe mönö yuai pakpak malmalŋinambuk tandökŋini könaŋi könaŋi asuhume. Mirigö sömbupŋi, yuai bapŋinan köla ölölöŋgömakzei aka arökŋaŋgö sömbupŋi tandökŋini könaŋi könaŋi, mi mönö asuhume.” Mewö jim kutuiga mönö kewö asuhuget:
26	GEN 1:26	Miaŋgö andöŋe Anutunöŋ kewö jiyök: “Ayop, nini mönö azi nanine tandökö dop meinga kaisoŋgolomnini ewö aka yuai pakpak galöm köl eŋgiba malma. Yuai pakpak mi köwetkö söraŋi, suepkö neiŋi aka mirigö sömbupŋi, gölme körek aka yuai pakpak bapŋini gölmenöŋ köla ölölöŋgömakzei, mönö mieŋgö galömŋina aka malma.”
28	GEN 1:28	Miwikŋaim etkiba i kötuetköba kewö jim kutum etkiyök: “Iŋiri mönö ahum sehiba gwölönarökpuk malohotka gölme dop köla malme. Mewö mala gölme toŋi akŋe. Mewö aka köwetkö söraŋi, könakembagö neiŋi aka sömbup mokoleŋ laigisip gölmenöŋ anda kamakzei, mönö mi pakpak galöm köl eŋgiba malme.”
29	GEN 1:29	Mewö jiba keu kewö jiyök: “Mötket, nöŋön yöha könaŋi könaŋi gölme pakpak dop köla asuhuba wahöta kötŋini kuŋgum söhömakzei aka ip kösö pakpak öl kötŋinambuk kuŋgum söhömakzei, mi numbu neneŋini akŋapköra al eŋgizal.
30	GEN 1:30	Arökŋaŋgö sömbupŋi pakpak, könakembagö neiŋi pakpak aka yuai pakpak gölmenöŋ anda kamakzei aka tosatŋi pakpak söŋgörö ösumŋini örömakzei, yeŋgöra gwözözak görökŋi (töŋgönŋi) könaŋi könaŋi mi neneŋamŋini akŋapköra al eŋgizal. “Keu mewö jiiga mönö mewö asuhuyök.
47	GEN 2:16	Al waŋgiba kewö jiba jim kutum waŋgiyök: “Oyaeŋkoyaeŋ nup uruŋe ip pakpak kin anjei, mieŋgö ölŋini mi ölöp amqeba mem nemba malman.
48	GEN 2:17	Mimö, mötkutukutugö ipkö ölŋi mi mönö kude neman. Mi nemba ölöpŋaŋgö könaŋi aka bölöŋaŋgö könaŋi möt kutuman ewö, gi mönö wehön miaŋgöreŋök kömum köhöiman. Miaŋgöra mi mönö kude neman.”
49	GEN 2:18	Mewö jiba Kembu Anutunöŋ jiyök: “Azinöŋ nanŋök maliga ölöp qahö akza. Miaŋgöra nöŋön mönö nanŋi tandökŋaŋgö dop alabaukŋi miwikŋaimam.”
54	GEN 2:23	Waŋgita kaiga azinöŋ i eka kewö jiyök: “Yei! Ki nani tandöha. Yaŋgö sihit busuŋi mi nani sihit busunöhök asuhuza. Anutunöŋ i azigö sile kitipŋeyök mei letota azi tandök ewö maljawaŋgöra qetŋi mönö ambi (azigö alaŋi) qetme.”
55	GEN 2:24	Mewö jiiga Anutunöŋ kewö jim kutum etkiyök: “Mewö aiga azinöŋ mönö iwinamŋi etkömosöta anömŋaŋgöreŋ qekötahöba silemohot aka malmahot.”
57	GEN 3:1	Kembu Anutunöŋ gölmegö sömbup malmalŋinambuk pakpak miwikŋaim eŋgiyöhi, mieŋgö sutŋine mokoleŋnöŋ isimkakalek mötmötnöŋ sömbup pakpak mi eŋgoŋgita öŋgöyök. Mewö öŋgöba ambigöra kewö jiyök: “Oyaeŋkoyaeŋ mire ip pakpak kin anjei, mieŋgö ölŋini kun kude nemahotköra Anutunöŋ ölŋa jim kutum etkiyök me qahö?”
58	GEN 3:2	Mewö jiiga ambinöŋ meleŋda mokoleŋgöra kewö jiyök: “Oyaeŋkoyaeŋ mire ip tosatŋi kin anjei, mieŋgö ölŋini mi ölöp nembitköra jiyök.
59	GEN 3:3	Mimö, miri bibiŋe ip kun kinjawi, miaŋgö ölŋi mi nemba kömumbitpuköra mönö kewö jiyök: ‘Mi mönö kude nemahot. Mia kude misirimahot.’ Mewö jim kutum netkii maljit.”
60	GEN 3:4	Mewö meleŋda jiiga mokoleŋnöŋ ambigöra kewö jiyök: “Mi saumbaŋ! Iŋiri kude kömumahot.
61	GEN 3:5	Mimö, ip miaŋgö ölŋi mi neyohotka wehön miaŋgöreŋök mönö jeŋiran tohoiga Anutu ewö aka ölöpŋaŋgö könaŋi aka bölöŋaŋgö könaŋi möt tekömahot. Anutunöŋ keu mi möta mewö asuhubapuköra keuŋi mewö jiyök.”
62	GEN 3:6	Mewö jiiga ambinöŋ ip mi uba ehiiga ölŋi ölöpŋi neneŋaŋgö dop ahök. “Mi eksihimŋambuk kiniga mötkutukutu ketaŋi awamŋanök niŋgima,” mewö mötmöriba ölŋi kun meköba neyök. Nemba apŋi yambuk malöhi, i tok waŋgiiga neyök.
65	GEN 3:9	Asambörohotmö, Kembu Anutunöŋ azigö qeta kewö jiyök, “Gi mönö denike maljane?”
66	GEN 3:10	Mewö qeta jiiga kewö meleŋnök: “Gi oyaeŋkoyaeŋ miri uruŋe tiba kanöŋga köna ötöŋgi möta sileni aukŋe maljalaŋgöra keŋgötni mötzal. Miaŋgöra mömölaköba asamböta maljal.”
67	GEN 3:11	Mewö meleŋniga kewö jiyök: “Gi sile aukŋe maljani, mi mönö daŋön jii mötzan? Nöŋön ip kungö kötŋi nembanbukö soŋgo al gihiali, göŋön miaŋgöreŋök kun nezan me?”
68	GEN 3:12	Mewö jiiga azinöŋ kewö jiyök: “Ambi nömbuk malmapköra niŋginöŋi, yanöŋ mönö ip miaŋgö kötŋi niŋgiiga nezal.”
69	GEN 3:13	Mewö jiiga Kembu Anutunöŋ ambi kewö qesim waŋgiyök: “Göŋön wuanöŋgöra mewö akzane?” Qesim waŋgiiga kewö meleŋnök: “Mokoleŋnöŋ mönö tilipköm niŋgiiga nezal.”
70	GEN 3:14	Mewö meleŋniga Kembu Anutunöŋ mokoleŋgöra kewö jim waŋgiyök: “Mewö akzanaŋgöra aka gi mönö mirigö sömbupŋi pakpak aka arökŋaŋgö sömbupŋi pakpak yeŋgö sutŋiŋe kewö jim qesuahöm gihibiga malman: Göŋön mönö gölmenöŋ malmanaŋgö dop bapkan köla anda kaba sömsöm uruŋe mala nesak yuai nemakŋan.
71	GEN 3:15	Mewö nemba ambibuk sutŋire kerök al etkibiga mi möta malman. Kerök mi göhö gwölönarökurupki aka yaŋgö gwölönarökurupŋi yeŋgö sutŋine toroqeba ahöm öŋgöi kewö asuhuma: Yeŋgöreŋök azi kunöŋ mönö göhö nöröpki tölölahöiga göŋön yaŋgö köna gwakötŋi yöhösulmakŋan.”
72	GEN 3:16	Toroqeba ambi kewö jim waŋgiyök: “Göŋön gölömgabuk aka malnöŋga sihimbölöŋi ketaŋi al gihibiga masö ahum gihiiga möta morö mem eŋgimakŋan. Mi töndup sihimgan mönö apkahöra ahöm gihiiga yaŋön galömgi aka malma.”
73	GEN 3:17	Toroqeba azi kewö jim waŋgiyök: “Nöŋön ip kungö ölŋi nembanbuköra ‘Mia kude neman,’ jiba soŋgo al gihialmö, göŋön mi töndup anömgahö keuŋi wuataŋgöba nezan. Miaŋgöra nöŋön gölme mi göhöra aka saitköbiga ahöma. Mewö ahöiga göŋön gölmenöŋ malmanaŋgö dop mönö sileqeqe aka nup gwötpuk memba sihimbölö möta nenegi miwikŋaiba malman.
75	GEN 3:19	Mewö mala mesoholge nöŋgöp ariba nup memba tup yakagi mewö nemba mala gölmenöŋ mem gihiali, gölme miaŋgöreŋ mönö kunbuk liliŋgöba geman. Silegi gwakömnöŋ mem gihibiga mala öŋgöbagun mönö kunbuk gwaköm akŋan. “Mewö jim waŋgiyök.
78	GEN 3:22	Mewö malohotka Kembu Anutunöŋ kewö jiyök: “Yei! Ambazip mi neŋgöreŋök kungö dop aka ölöpŋi bölöŋi mietkö könaŋiri lök mendeŋ etkibitkö mötzahot. Mewö aiga malmal köhöikŋaŋgö ip kötŋi kude nemahotköra soŋgo alalmö, yetkön nalö kewöŋe toroqeba böröŋiri böraŋda mi mewöyök mem nemba mewö miaŋön qahö kömumba teteköŋi qahö köhöikŋanök mal öŋgöbahotpuk.”
81	GEN 4:1	Azi Adamnöŋ anömŋambuk mala amiyohotka Iwnöŋ (Ewa) gölöm ala Kein (Kain) meyök. Memba Kein qetköra kewö jiyök: “Anutunöŋ bauköm niŋgiiga nahöni mezal.”
86	GEN 4:6	Bosoliiga Kembunöŋ Keingöra kewö jii mörök: “Irimgi mönö wuanöŋgöra seholiiga jemesoholgan bosoliza?
87	GEN 4:7	Gi yuai ölöpŋi aknöŋga möt aŋgön köl gihibiga ölöp jemesoholgi öhal (hak) akŋan me qahö? Yuai ölöpŋi qahö aknöŋga siŋgisöndokö Toŋan mönö urugahö naŋguŋe kinda göhöra ak gihiba mönömakza. Mewö mönömakzapmö, göŋön mönö miaŋgö soŋgo ala galöm memba luhut alman.”
88	GEN 4:8	Kembunöŋ Keingöra mewö jii mörökmö, Keinöŋ töndup munŋi Abelgöra kewö jiyök: “Mönö nanirök nupnöŋ anbit. “Mewö jiiga nupnöŋ anda mala Keinöŋ luhuba munŋi Abel qelanjiba memba qeba qei kömuyök.
89	GEN 4:9	Kömuiga Kembunöŋ Kein kewö qesim waŋgiyök: “Mungi Abel mi denike malja?” Qesim waŋgiiga kewö meleŋnök: “Ni qahö mötzal. Ni munangö jegalöma qahö akzal.”
90	GEN 4:10	Mewö meleŋniga Kembunöŋ jiyök: “Gi wani yuaia akzan? Mötnöŋ, mungahö sepŋan mönö gölmenöhök qeriga mötzal.
92	GEN 4:12	Közöl gihibiga kölkömöt nup menöŋga gölmenöŋ möriamŋaŋgö ölŋi aŋgön köl gihiiga gölme dop mömölaköba kekelolo aka ölöŋ köla laŋ anda kaba malman.”
93	GEN 4:13	Mewö jiiga Keinöŋ Kembugöra kewö jiyök, “Keunaŋgö likepŋi meleŋnöŋga qakne öŋgözawi, miaŋön mönö ösumni oŋgiri lömböriiga bisimamgö osimam.
94	GEN 4:14	Mötnöŋ, gi merak ni nupqeqe gölmenöhök nuataŋgönöŋga jemesoholgeyök mömölaköba gölme dop kekelolo aka ölöŋ köla laŋ anda kaba malmam. Miaŋgöra kunŋan ni neka ölöp nuŋgui kömumbileŋbuk.”
95	GEN 4:15	Mewö jiyökmö, Kembunöŋ kewö jii mörök: “Mewö qahö. Kunŋan Kein qei kömuma ewö, miaŋgö likepŋi mönö yaŋgö qakŋe öŋgöiga ambemŋi 7 akŋa. “Mewö jiba kunŋan Kein miwikŋaiba i qei kömumbapuköra sileŋe aiwesök kulem kun alök.
103	GEN 4:23	Lameknöŋ nalö kunöŋ anömyahötŋi mi kewö jii mörohot, “Ada aka Zila anömyahötni, iŋiri mönö kezap ala keuni ki mötmahot: Kunŋan nuŋgum kuziriga uzinaŋgö kitipŋaŋgöra mönö azi kun qebi kömuma. Kunŋan nuŋgum miziriga gurusep (gulibambam) löpötnaŋgö kitipŋaŋgöra mönö azi gwabö kun qebi kömuma.
104	GEN 4:24	Kunŋan Kein qeiga likepŋi yaŋgö qakŋe öŋgöiga ambemŋi 7 akŋapmö, kunŋan Lamek ni nuŋguiga miaŋgö likepŋi mönö yaŋgö qakŋe öŋgöiga ambemŋi 77 akŋa. “Mewö.
105	GEN 4:25	Azi mutukŋi Adam yaŋön kunbuk anömŋambuk mala amiyohotka nahönŋiri kun memba kewö jiyök: “Keinöŋ Abel qei kömuyöhaŋgöra Anutunöŋ Abelgö salupŋe nahöni kun niŋgiza. “Miaŋgöra qetŋi Set (Niŋgiza) qerök.
135	GEN 5:29	Asuhuiga qetŋi Noa (kölalep) qeta kewö jiyök: “Anutunöŋ gölme saitköiga nini böröninan nup köl kömöta sileqeqe aka sihimbölö möta malinga morö kiaŋön mönö ölöp urukölalep neŋgimakŋa.”
141	GEN 6:3	Mewö aketka nalö miaŋgöreŋ Kembunöŋ keu kewö jiyök: “Gölme ambazipnöŋ silebuk nalö teteköŋi qahö mal öŋgömemö, yeŋön mönö kömume. Areŋini mewö al eŋgizal. Nalö kewöŋeyök könahiba malmalŋini mönö yambu 120 jaŋgö mi qahö oŋgita mal öŋgöme.”
145	GEN 6:7	Mewö möta mala keu kewö jiyök: “Ambazip miwikŋaim eŋgiali, nöŋön mönö mi gölmenöhök qeteköm eŋgimam. Ambazip, mirigö sömbupŋi, yuai bapŋinan köla ölölöŋgömakzei aka könakembagö neiŋi mi miwikŋaim eŋgialaŋgöra möt bölim aŋguba mi mönö qeköm eŋgimam.”
151	GEN 6:13	Mewö eka Anutunöŋ Noagöra keu kewö jii mörök: “Ambazip yeŋgöra aka ayuhum eŋgieŋgi mi gölme körek dop köla ahöza. Miaŋgöra nöŋön ambazip pakpak mem kömum teköm eŋgimamgöra mönö keuni jöhöyal. Mötnöŋ, nöŋön mönö onöŋ gölme meleŋbi geiga yuai pakpak isikusukŋinambuk mi kömum teköme.
159	GEN 6:21	Mewöyök nanŋini aka nei, sömbup yuai pakpak yeŋön nemeaŋgö dop mönö numbu nene könaŋi könaŋi miwikŋaiba otoŋ qezaköba waŋgenöŋ alnöŋga kahaimök ahöma.”
161	GEN 7:1	Noanöŋ waŋge mem teköiga Kembunöŋ keu kewö jii mörök: “Gi ambazip kambu kieŋgö sutŋine solanŋi aka maljan. Nöŋön göhö könaŋamgi mewö miwikŋaizal. Miaŋgöra gi aka saiwaurupki pakpak iŋini mönö waŋgenöŋ öŋgöme.
164	GEN 7:4	Öŋgögetka wehön 7 teköiga jim kutubiga kie römbum ketaŋan mönö gölmenöŋ eta yöhöiga suŋgem silim 40:gö dop toroqeba yöhöm teköma. Mewö yöhöiga yuai isikusukŋinambuk pakpak miwikŋaim eŋgiali, mi mönö mohotŋe jim teköbiga gölmenöhök qahöwakŋe.”
200	GEN 8:16	“Gi, anömgi aka nahöniranurupki iŋini mönö waŋge mosöta etket.
201	GEN 8:17	Eta sömbup yuai malmalŋinambuk pakpak göbuk waŋgenöŋ maljei, mi neiŋi neiŋi, mirigö sömbupŋi aka mokoleŋ yuai pakpak bapŋini gölmenöŋ köla ölölöŋgömakzei, mi mönö körek eŋguaŋgita etket. Mewö aknöŋga ölöp gölmenöŋ ahum sehiba gwölönarökpuk aka deŋda gölme dop köla malme.”
205	GEN 8:21	Ohoiga Kembunöŋ wörön umköhöwakŋi nahömŋambuk mi möri dop köliga uruŋan keu kewö jiyök: “Ambazip yeŋgö uruŋinaŋgö mötmöt areŋinan mönö moröŋineyök könahiba bölöŋi akzemö, töndup gölme mi nalö kunöŋ ambazipköra aka kunbuk kude qesuahömam. Yuai pakpak malmalŋinambuk maljei, nöŋön mi lök qahöwak teköm eŋgialmö, miaŋgö dop nalö kunöŋ kunbuk qahö jim teköba ak eŋgimam.
206	GEN 8:22	Gölmenöŋ ahöm öŋgömawaŋgö dop mönö gölmenöŋ köl kömötketka ölŋi asuhui megetka miaŋön mönö kude qahöwak teköma. Miri amöriiga saŋgenŋi mörakŋe aka könöpŋambuk aiga könöwiba mörakŋe. Kömunjaŋ kie nalö aka wehön nalö, suŋgem aka asakŋi mi nalöŋi nalöŋi lilikqilik aka awataŋ ahöba anmahot. Mi pakpak teteköŋi qahö ahöm öŋgöiga malme. Mewöŋan mönö mewö toroqeba ahöma. “Mewö”.
207	GEN 9:1	Mewö jiba Anutunöŋ Noa aka nahönurupŋi kewö jiba kötuetköm eŋgiyök: “Iŋini mönö ahum sehiba gwölönarökpuk mala gölme dop köla malme.
213	GEN 9:7	Iŋini mönö ahum sehiba gwölönarökpuk aka malme. Mewö gölme qakŋe ahum sehigetka qötöŋinan qarim öŋgöma.”
215	GEN 9:9	“Nöŋön merak iŋini aka eŋgö gwölönarökurupŋini könaŋgep asuhumei, embuk jöhöjöhö areŋ akzal.
217	GEN 9:11	Nöŋön jöhöjöhö areŋni mi embuk kewö al köhöizal: Nöŋön o göulunöŋ öröyuai isikusukŋinambuk pakpak mi kunbuk kude eŋgubi qahöwakŋe. O göulu mi gölme ayuhumapköra kunbuk qahö albi kama.”
218	GEN 9:12	Anutunöŋ toroqeba keu kewö jiyök: “Nöŋön mönö jöhöjöhö areŋ ki mi nani aka iŋini aka öröyuai malmalŋinambuk pakpak embuk maljei, neŋgö sutnine albiga teteköŋi qahö köhöiba ahöm öŋgöma. Jöhöjöhö areŋ miaŋgö aiwesökŋi mi kewö:
222	GEN 9:16	Nalö kunöŋ mariloŋloŋan kousunöŋ asuhumawi, nöŋön mi eka miaŋgöreŋök jöhöjöhö areŋni mi mötmörimam. Mi teteköŋi qahö nani aka öröyuai malmalŋinambuk pakpak tandökŋini könaŋi könaŋi gölme qakŋe maljei, neŋgö sutnine al köhöibi ahöza.”
223	GEN 9:17	Anutunöŋ Noagöra mewö jiba toroqeba kewö jiyök: “Nöŋön jöhöjöhö areŋ ki mi nani aka gölmegö öröyuai malmalŋinambuk pakpak neŋgö sutnine al köhöizal. Jöhöjöhö areŋ miaŋgö aiwesökŋi mi mewö.”
231	GEN 9:25	Mi möta uruŋi öngöiga Hamgöra kewö jiyök: “Keinan mi jim suehöm waŋgizal. Yaŋön mönö darumunyahötŋi yetkö welenqeqeurupŋiri yeŋgö welenqeqeŋini omaŋi aka malma.”
232	GEN 9:26	Toroqeba kewö jiyök: “Anutu, Semgö Kembuŋi, ia mönö möpöseizal. Keinanöŋ mönö Semgö welenqeqeŋi omaŋi aka malma.
233	GEN 9:27	Anutunöŋ mönö Jafetkö gölmeŋi mem qariiga Semgö opo seri koumŋine malme. Keinan yeŋön mönö Sem yeŋgö welenqeqeurupŋini omaŋi aka malme.”
244	GEN 10:9	Yaŋön Kembugö jemesoholŋe böröjaŋ azi köhöikŋi malöhaŋgöra aka keu saiŋi kewö jimakze: “Kunöŋ Nimrod ewö Kembugö jemesoholŋe böröjaŋ azi köhöikŋi akza.”
270	GEN 11:3	Miaŋgöreŋ tata nanŋinök kewö eraum-mötket: “Mönö kaget. Nini mönö birik mem mözözömgöba könöpnöŋ ohoinga köhöikŋi akŋe. “Mewö jiba miri selŋi membingöra köt jamönjiŋ qahöpmö, birik ala sutŋine gölme sapösapö qandöŋ ewö algetka miaŋön birik mi mekötahöm eŋgiyök.
271	GEN 11:4	Nup mewö memba kunbuk kewö jiget: “Mönö kaget. Nini mönö naninaŋgöra siti kun memba miaŋgöreŋ miri köröpŋi kötökŋi (taua) meinga boŋan suep oseima. Mewö oseiiga qahö deŋqeŋda gölme pakpak dop köla laŋ anda malbinbuköra mönö nanini qetbuŋaninambuk akin.”
273	GEN 11:6	Eta mi eka kewö jiyök: “Yeŋön simbisembel qahöpmö, urumohot könagesö aka keuŋini mohot jiba kinda yuai ki könahiba meze ewö, könaŋgep i me wai membingö areŋini albeak, mi mönö miaŋgöra qahö osiba qaköme.
274	GEN 11:7	Ayop, nini mönö gölmenöŋ geba keuŋini mem sohoinga kambu kun yeŋön kambu tosatŋi yeŋgö keuŋini qahö möt asariba malme.”
300	GEN 12:1	Kembunöŋ Abramgöra kewö jiyök: “Gi gölmegi, könagesögi aka iwigahö miri yuaiŋi mosöta gölme kondel gihimami, mönö miaŋgöreŋ anman.
302	GEN 12:3	Denike yeŋön gi kötuetköm gihimei, nöŋön mönö i kötuetköm eŋgiba malmam. Denike yeŋön gi jim suehöm gihimei, nöŋön mönö i mewöyök jim suehöm eŋgiba malmam. Göhöra aka nöŋgö kötumötuetnan mönö gölmegö könagesö kambuŋi pakpak yeŋgö qakŋine öŋgöiga oyaeŋkoyaeŋ akŋe.”
306	GEN 12:7	Mewö malgetka Kembunöŋ Abramgöreŋ asuhuba kewö jiyök: “Gölme ki mi mönö göhö gwölönarökurupki yeŋgö buŋaya qem eŋgimam. “Mewö jiiga Abramnöŋ Kembu yaŋgöreŋ asuhuyöhi, yaŋgöra jöwöwöl ohohogö altaŋi kun miaŋgöreŋ meyök.
310	GEN 12:11	Könanöŋ anda Ijipt dopdowigetka Abramnöŋ miaŋgöreŋ anömŋi Saraigöra keu kewö jiyök: “Mötnöŋ, göŋön ambi eksihimgabuk akzani, mi mötzal.
311	GEN 12:12	Mewögöra Ijipt azi yeŋön gi geka kewö jime: ‘Ki yaŋgö anömŋa.’ Mewö jiba ni nuŋguget kömumam-mö, gi gehorigetka malman.
312	GEN 12:13	Miaŋgöra göŋön mönö kewö jiman: ‘Ni yaŋgö nenŋa.’ Mewö jinöŋga göhöra aka ölöpŋanök ak niŋgiba nöŋgö malmalni gou kölgetka malmam.”
317	GEN 12:18	Mi öŋgöiga Farao kiŋnöŋ Abram köl öröi kaiga kewö qesim waŋgiyök: “Göŋön mönö wani kimbia ak niŋginöŋ? Wuanöŋgöra ‘Mi anömna,’ mewö qahö jinöŋga möral?
318	GEN 12:19	Wuanöŋgöra ‘I mi nena,’ jinöŋ? Mewö jinöŋga nöŋön i anömna akŋapköra waŋgiral? Anömgi ki. Mönö i waŋgita anohot.”
327	GEN 13:8	Mewö mala Abramnöŋ Lotköra kewö jii mörök: “Niri mönö iwi moröya maljit. Miaŋgöra ni aka gi sutnire me sömbup galömurupniri yeŋgö sutŋine aŋgururuk kude ahöma.
328	GEN 13:9	Miaŋgöra ölöp deŋbit. Gölme pakpak mönö göhö jemesoholge aukŋe ahöm anjawi, mi ölöp ekzan. Mewö aiga göŋön qaninire göröken anmam jiman ewö, nöŋön ölöp ölnire göröken anmam. Me göŋön ölnire göröken anmam jiman ewö, nöŋön ölöp qaninire göröken anmam.”
333	GEN 13:14	Lotnöŋ Abram umbula aniga nalö miaŋgöreŋ Kembunöŋ Abramgöra keu kewö jiyök: “Mönö jegi ötök ala mesoholge uba wahöta eleŋda andöge uba mewöyök wehön kotkotŋe aka wehön gegeŋe göröken unöŋ.
336	GEN 13:17	Nöŋön gölme ki mönö göhö buŋaya qem gihizal. Miaŋgöra ölöp wahöta anda kaba gölme pakpak ki bahöbahö euke emuke ek kutuba malman.”
356	GEN 14:19	Mewö aka Abram kötuetköm waŋgiba keu kewö jiyök: “Anutu öŋgöŋgöŋan suep gölme miwikŋaim etkiyöhi, yaŋön mönö Abram gi kötuetköm gihii malman.
357	GEN 14:20	Anutu öŋgöŋgöŋan kerökurupki göhö böröge al eŋgiyöhi, mönö i möpöseizin. “Mewö jiiga Abramnöŋ öröyuaiŋi pakpak mendeŋniga kambu ten asuhuiga mieŋgöreŋök mohot mohot (10%) memba naluha waŋgiyök.
358	GEN 14:21	Mi waŋgiiga Sodomgö kiŋan Abramgöra kewö jiyök: “Ambazipurupni mia niŋgimanmö, sukinap mia mönö nangi buŋaya akŋa.”
359	GEN 14:22	Mewö jiyökmö, Abramnöŋ Sodomgö kiŋaŋgöra kewö jiyök: “Keuni köhöimapköra nöŋön böröni Kembu Anutu öŋgöŋgöŋi Suep gölme miwikŋaim etkiyöhi, yaŋgöreŋ göröken memba wahöta jöjöpaŋ keu kewö jizal:
360	GEN 14:23	Nöŋön göhöreŋ yuai kun mi qahö kötökŋi memam. Möt kösögahö kitipŋi me köna esugahö kösöŋi mi mewöŋanök qahö memam. Mewö akiga göŋön könaŋgep kewö jibanbuk: ‘Nöŋön Abram yuai waŋgibiga yaŋön azi pomŋi qetbuŋaŋambuk aka malja.’ Göŋön mönö mewö jimamgö osiba malman.
361	GEN 14:24	Nöŋön yuai kun qahö toroqeba memam-mö, aziurupnan wani yuaia negeri, mi lök neŋgigetka dop köl teköza. Mewöyök azi alaurupni Aner, Eskol aka Mamre nömbuk kageri, yeŋön mönö töwa jijiŋinaŋgö dop meme. “Mewö.
362	GEN 15:1	Mewö asuhuiga Abramgö jeŋi meleŋniga imut ehiga Kembunöŋ keu kewö jii kaiga mörök, “Abram, gi keŋgötki kude mötman. Nöŋön göhö sumanga akzal. Göhö töwagi mönö keta bölökŋi aka ahöma.”
363	GEN 15:2	Keu mewö kayökmö, Abramnöŋ kewö jiyök, “O Kembu ketaŋamni, ni nahönböratni qahö malbiga töwa niŋginöŋga miaŋön mönö denöwö bauköm niŋgibawak? Nöŋön kömumbiga Damaskus azi Eliezer yaŋön nöŋgö sukinapnaŋgö toŋi akŋa.”
364	GEN 15:3	Mewö jiba toroqeba kewö jiyök, “Göŋön gwölönarökni kun qahö niŋginöŋaŋgöra nup azini bohonŋan nöŋgö mire maljawi, yaŋön mönö nöŋgö öröyuaini pakpak buŋa qem aŋguma.”
365	GEN 15:4	Mewö jiiga Kembugöreŋ keu jit kun mi yaŋgöreŋ kewö kaiga mörök, “Azi miaŋön sukinapkahö toŋi qahö akŋapmö, nangi silegeyök morö nahön kun asuhumawi, yaŋön mönö göhö öröyuaigi pakpak buŋa qem aŋguma.”
366	GEN 15:5	Keu mewö kaiga Anutunöŋ Abram waŋgita gumnöŋ geba keu kewö jii mörök, “Mönö suepnöŋ unöŋ öŋgöiga seŋgelau oyoŋ engimanaŋgö dop akŋa ewö, mi mönö ölöp oyoŋ eŋgiman. “Mewö jiba kewö toroqeba jiyök, “Göhö gwölönarökurupki yeŋgö qötöŋinan mönö miaŋgö dop akŋa.”
368	GEN 15:7	Kembunöŋ toroqeba keu kewö jii mörök, “Nöŋön Kembu akzal. Gi Kaldia gölmegö miri qetŋi Ur miaŋgöreŋ malnöŋga goaŋgita ki kait. Gölme ki gihibi buŋa qem aŋgumangöra aka gi goaŋgita ki kait.”
369	GEN 15:8	Mewö jiyökmö, Abramnöŋ kewö jiyök, “O Kembu ketaŋamni, gölme kiaŋön nöŋgö buŋaya akŋawi, mi mönö wani aiwesöha eka möt kutumam?”
370	GEN 15:9	Mewö jiiga Kembunöŋ yaŋgöra kewö jiyök, “Gi mönö anda bulmakau ambi seramŋi yambuŋi karöbut, meme (noniŋ) ambiŋi yambuŋi karöbut aka lama aziŋi yambuŋi karöbut aka kembö kun aka kembö supsup dölökunŋi kun mi memba nöŋgöreŋ kaman.”
374	GEN 15:13	Turum waŋgiiga Kembunöŋ kewö jii mörök, “Keu ki mönö ölŋa mötman: Göhö gwölönarökurupkan mönö nanŋini gölmeŋini mosöta kantri kunöŋ anda kiana mala mal öŋgöme. Mewö mala yeŋgö welenqeqeurupŋini omaŋi aketka i yambu 400:gö dop tulumgöm eŋgiba malme.
376	GEN 15:15	Nöŋön Amor könagesö mi gölme kiaŋgöreŋ zilaŋ qahö eŋguataŋgömam. Mutuk siŋgisöndokŋi siŋgisöndokŋi aka bölimqölim tekögetka likepŋi törörök meleŋ eŋgimamaŋgö nalöŋan akŋawi, nalö miaŋgöreŋ mönö i eŋguataŋgömam. Miaŋgöra göhö isiurupki yeŋgö isiurupŋinan asuhuba malmei, nalö miaŋgöreŋ göhö gwölönarökurupkan mönö liliŋgöba ki kame. (15) Yeŋön mewö kamemö, nangak mutuk yambugahö nalöŋi ölöm kömuiga luainöŋ iwiasaurupki yeŋgöreŋ anöŋga löm köl gihime.”
379	GEN 15:18	Kembunöŋ mewö sömbup likepŋi likepŋi mieŋgö sutŋire anda kaba sömaŋ miaŋgöreŋ Abrambuk jöjöhö areŋ aka (kaisöpsöpŋan mi mem köhöiba) keu kewö jii mörök, “Nöŋön gölme ki mi göhö gwölönarökurupki yeŋgö buŋaya qem engimam. Miaŋgö jaböŋi mi Ijiptkö o töwatŋi (Nail) miaŋgöreŋök könahiba kaba ki oŋgita anda o töwatŋi ketaŋi qetŋi Yufreitis miaŋgöreŋ teköma.
382	GEN 15:21	Amor könagesö, Keinan könagesö, Girgas könagesö aka Jebus könagesö. Yeŋgöreŋ gölme pakpak mi mönö körekŋanök memba dop köla anme. “Mewö.
384	GEN 16:2	Yaŋön malöhaŋgöra Sarainöŋ Abramgöra kewö jiyök: “Kembunöŋ soŋgo jöhöm niŋgiiga morö qahö mealaŋgöra gi mönö welen ambini menöŋga gölöm ala morö kun meiga nöŋgö buŋaya asuhubawak. “Mewö jiiga Abramnöŋ Saraigöreŋ keugöra urumohot ahök.
387	GEN 16:5	Mewö ak waŋgiiga Sarainöŋ Abramgöra kewö jiyök: “Urunan böliiga sihimbölö mörakzali, miaŋgö keuŋan mönö göhö qake öŋgöba ahöma. Nöŋön welen ambini göhö böröge albiga gölöm ala mi möta miaŋgöreŋök könahiba jijiwilit ak niŋgiba malja. Miaŋgöra Kembunöŋ mönö ni aka gi netkö sutnire keu kewöta jim teköma.”
388	GEN 16:6	Mewö jiiga Abramnöŋ kewö jiyök: “Welen ambigi miaŋön nange böröge maljawaŋgöra wania mötnöŋga dop köljawi, mönö miaŋgö dop i ak waŋgiman. “Mewö jiiga Sarainöŋ Hagar laŋ örömureim ak waŋgiiga mosöta tököba ölöŋ köla anök.
390	GEN 16:8	Miaŋgöreŋ miwikŋaim waŋgiba kewö jiyök: “Hagar, Saraigö welen ambiŋi, gi mönö denikeyök kazana denike anman?” Mewö jiiga kewö meleŋnök: “Ni galöm ambini Saraigöreŋök asamböta ölöŋ köla kazal.”
391	GEN 16:9	Mewö jiiga Kembugöreŋ garatanöŋ Hagar kewö jim kutum waŋgiyök: “Gi mönö kunbuk Saraigöreŋ anda welenŋi qeba yaŋgö keu bapŋe malman.”
392	GEN 16:10	Keu mi toroqeba kewö jii mörök: “Hagar, nöŋön mönö göhö gwölönarökurupki ahum sehim eŋgibiga qötöŋini oyoŋoyoŋgö dop qahö aiga malme.”
393	GEN 16:11	Kembugöreŋ garatanöŋ kunbuk toroqeba Hagargöra kewö jiyök: “Gi moröbuk akzana nahöngi meman. Dölki tapötkokorok möta sahötnöŋga mi mönö Kembugö kezapŋe geiga mötza. Miaŋgöra morögö qetŋi Ismael qetman. (Ismael Anutunöŋ kezapŋan mötza.)
394	GEN 16:12	Yaŋön azi doŋki bau kömböt ewö aka (nanŋi imbi-imbi qakŋe laŋ anda kaba) malma. Yaŋön böröŋan ambazip pakpak qetal eŋgiiga ambazip pakpak yeŋön i qetal waŋgiba malme. Yaŋön munurupŋi pakpak yembuk kerök-kerök aka nanŋök kekelolo malma.”
395	GEN 16:13	Mewö jiiga Hagarnöŋ kewö jiyök: “Nöŋön mönö dölki kunöŋ ni nehakzawi, i ekzal. “Miaŋgöra Kembu yaŋgöra keu jiyöhi, yaŋgö qetŋi kewö qet waŋgiyök: “Gi Kembu ni nehakzanaŋön akzan. “Qetŋi mewö qerök.
399	GEN 17:1	Abramnöŋ yambuŋi 99 aiga Kembunöŋ asuhum waŋgiba keu kewö jiyök: “Nöŋön Anutu kukösum pakpakö Toŋi akzal. Miaŋgöra gi mönö nöŋgö keuni tem köla pöndaŋ ahakmeme diŋdiŋi wuataŋgöba malman.
400	GEN 17:2	Nöŋön jöhöjöhö areŋ mi gi aka ni netkö sutnire ahali, mi mem köhöiba ahumsehip gihibi gwölönarökurupki yeŋgö jaŋgöŋinan mönö keta bölökŋi akŋa.”
402	GEN 17:4	“Mötman, nöŋön jöhöjöhö areŋni göbuk kewö akzal: Göŋön könagesö gwötpuk yeŋgö iwi bömönŋina akŋan. Keu mewö jim jöhöbi ahöma.
406	GEN 17:8	Gi Keinan gölmenöŋ kiana maljani, nöŋön gölme mi jömukŋanök gi aka göhö gwölönarökurupki eŋgö buŋaya qem eŋgibiga buŋaŋini teteköŋi qahö ahöm öŋgöba ahöma. Mewö ahöiga nöŋön mönö yeŋgö Anutuŋina aka malmam.”
407	GEN 17:9	Anutunöŋ Abrahamgöra mewö jiba toroqeba keu kewö jiyök: “Mewö malmam-mö, göŋön mönö nöŋgö jöhöjöhö areŋnaŋgö keuŋi mi tem köla wuataŋgöba malman. Göhö gwölönarökurupki göhö andöge toroqeba asuhum öŋgömei, yeŋön mönö mewöŋanök mi tem köla wuataŋgöba mala mal öŋgöme.
412	GEN 17:14	Azi kun daŋön nöŋgö aiwesökni sileŋe qahö yandigetka öne malmawi, yaŋön mönö nöŋgö jöhöjöhö areŋni oŋgita qetalakza. Miaŋgöra azi mewöŋi mi mönö nanŋi ambazip kambu eŋgö sutŋineyök yakörim waŋgigetka yaigep eta malma.”
413	GEN 17:15	Anutunöŋ toroqeba Abrahamgöra kewö jiyök: “Gi anömgahö qetŋi Sarai mi kude toroqeba qeta malmanmö, yaŋgö qetŋi mönö Sara (jembon ambi) qeta malman.
414	GEN 17:16	Nöŋön Sara kötuetköm waŋgibiga yaŋön göhöra morö nahön kun mema. Nöŋön kötuetköm waŋgibiga yaŋön ambazip kambuŋi kambuŋi gwötpuk yeŋgö nam bömönŋina akŋa. Yaŋgö gwölönarökurupŋi yeŋgöreŋök tosatŋan könagesö kambu yeŋgöreŋ azi kembuŋi kembuŋi akŋe.”
415	GEN 17:17	Kembunöŋ mewö jiiga Abrahamnöŋ mi möta simin köla bamgöba uruŋan kewö mötmöriba miaŋgöra gön kölök, “Azi yambuni 100 akiga morö nahönan mönö denöwö asuhubawak? Mewöyök Saranöŋ yambuŋi 90 aiga mönö denöwö morö membawak?”
416	GEN 17:18	Abrahamnöŋ mewö mötmöriba welipköba Anutu kewö qesim waŋgiyök: “Göŋön ölöp Ismael kuŋgum waŋginöŋga qetki bisiiga nöŋgö gwölönarökurupni mi yaŋgöreŋök asuhume.”
417	GEN 17:19	Mewö qesiiga Anutunöŋ kewö meleŋnök, “Anömgi Saranöŋ mönö göhö morö nahöngi mema. Mi meiga qetŋi Aisak (gön kölja) qetman. Nöŋön Aisakpuk aka yaŋgö gwölönarökurupŋi yembuk jöhöjöhö areŋni mi al köhöibiga teteköŋi qahö ahöm öŋgöma.
419	GEN 17:21	Mewö akŋemö, Saranöŋ nahöngi Aisak mi yambu euneaŋgö nalö kewöŋe memawi, nöŋön mönö nani jöhöjöhö areŋni mi yambuk al köhöimam.”
428	GEN 18:3	Geba kewö jiyök: “O Kembu-urupni, nöŋön eŋgö welenqeqeŋini aka eŋgö jeŋine kalem möriam miwikŋaiba maljal ewö, iŋini mönö ni kude noŋgita anme.
430	GEN 18:5	Nöŋön ölöp nene moröŋi kun memba kaba eŋgibiga neme. Miaŋön mem köhöim eŋgiiga ölöp köna kunbuk toroqeba anme. Nöŋön kewöröpni malbiga iŋini ni göda qem niŋgiba kazeaŋgöra ölöp welen qem eŋgimam. “Mewö jiiga meleŋda kewö jiget: “Saiwap, jizanaŋgö dop mewö ölöp akin.”
431	GEN 18:6	Mewö jigetka Abrahamnöŋ ösumŋan kiŋkiŋgöba seri koum uruŋe anda öŋgöba Saragöra kewö jiyök: “Mönö ösumok plaua ölöp kötökŋi amae (dis) karöbutkö dop memba meleŋda yeŋgöra bered ohoman.”
434	GEN 18:9	Kiniga kewö qesim waŋgiget: “Anömgi Sara mi denike?” Qesim waŋgigetka jiyök: “I opo seri koum uruŋe endu tatza.”
435	GEN 18:10	Mewö jiiga azi yeŋgöreŋök kunŋan kewö jiyök: “Yambu mohotkö dop teköiga nöŋön ölŋa liliŋgöba ki kabiga anömgi Saranöŋ mönö morö nahönŋambuk aka malma. “Mewö jiyökmö, Saranöŋ opo seri koumgö numbuŋe apŋaŋgö andöŋe kinda keu mi kezapŋe geiga mörök.
437	GEN 18:12	Miaŋgöra Saranöŋ mi möta uruŋan kewö mötmöriba gön kölök: “Nöŋön lök ambi namŋi sohosoholiŋi akiga apni azi kembunan mewöŋanök azi namŋi aiga yambuk ahöahögö sihimnan kunbuk asuhubawak me qahöpto?”
438	GEN 18:13	Mewö mötmöriiga Kembunöŋ Abraham qesim waŋgiba kewö jiyök: “Saranöŋ wanigöra gön köla kewö mötmöriza: ‘Nöŋön ambi namŋi kötökŋi aka ölŋa morö membileŋak me?’
439	GEN 18:14	Kembunöŋ mönö yuai kungöra qahö kötökŋi qakömakza. Miaŋgöra jizali, ‘Yambu mohotkö dop teköiga nöŋön ölŋa liliŋgöba ki kabiga Saranöŋ mönö morö nahönŋambuk aka malma.’”
440	GEN 18:15	Saranöŋ keŋgötŋi möta mi köyatiba kewö jiyök: “Ni gön qahö köljal. “Mewö jiyökmö, Kembunöŋ kewö jiyök: “Qahö, gi gön ölŋa köljan. “Mewö.
442	GEN 18:17	Kembunöŋ nanŋaŋgöra kewö jiyök: “Ni yuai akŋamgö mötzali, mi alani Abrahamgöra ölöp qahö asambötmam.
444	GEN 18:19	Nöŋön i kewögöra möwölöhöm waŋgial: Yaŋön nahönböraturupŋi aka gwölönarökurupŋi yaŋgö andöŋe asuhuba mal öŋgömei, yeŋgöra Kembugöreŋ köna kondela ahakmeme diŋdiŋi dop kölakzawi, mi wuataŋgömegöra jim kutum eŋgiba malma. Mewö maliga tem köla wuataŋgöba malme ewö, Kembu nöŋön Abrahamgöra yuai asuhumapkö jim jöhöyali, miaŋön mönö ölŋambuk pakpak ahakŋa.”
445	GEN 18:20	Kembunöŋ nanŋök mewö jiba toroqeba Abrahamgöra kewö jiyök: “Sodom aka Gomora yeŋön siŋgisöndok lömbötŋi lömbötŋi aka malgetka kahasililiŋ öŋgöŋgöŋi ketaŋi asuhuiga gwötpukŋan miaŋgöra qeta sahörakze. Miaŋgöra yeŋgö siŋgisöndokŋinaŋgö keuŋan mönö qariba qariba keta bölökŋi akza.
446	GEN 18:21	Miaŋgöra nöŋön mönö yeŋgöreŋ geba könaŋamŋini ekŋam. Kahasililiŋ akeraŋgöra aka gwötpukŋan nöŋgö jene qeta sahöta malgeri, mi pakpak ölŋa aket me qahö, mi nöŋön kewöta mötmamgö mötzal.”
448	GEN 18:23	Kinda Kembugö kösutŋe anda kewö qesim waŋgiyök: “Gi ambazip solanŋi aka ambazip aŋgöjörakŋinambuk mi mohotŋe ayuhum eŋgimamgöra jizan me?
450	GEN 18:25	Göŋön mewö akŋangö osibanak. Mi yapmakek! (qahöpmahöp!) Göŋön ambazip solanŋi mi ambazip aŋgöjörakŋinambuk yembuk mohotŋe mindiriba eŋgunöŋga qahö dop kölbapuk. Mewö öröröŋ kömumbepuk. Göŋön gölme ambazip pakpak yeŋgö keuŋini jim tekömakzani, miaŋgöra mönö nanŋi könagi diŋdiŋi wuataŋgönöŋga dop kölma.”
451	GEN 18:26	Abrahamnöŋ mewö jiiga Kembunöŋ meleŋda kewö jiyök: “Nöŋön Sodom taonöŋ ambazip solanŋi 50 miwikŋaim eŋgimam ewö, yeŋgöra aka taon pakpak mi ölöp eŋgehorimam.”
452	GEN 18:27	Mewö jiiga Abrahamnöŋ kunbuk kewö jiyök: “Kembu, ni nesak sömsöm omaŋi ewö akzalmö, töndup keu köhöikŋi Kembunaŋgöra kuŋguba jizal. Mi kude dop köljapmö, mi töndup ölöp ni möt niŋgiman.
453	GEN 18:28	Taon miaŋgöreŋ ambazip solanŋi 50 qahöpmö, 45 miyök malbeak ewö, göŋön ambazip 5 yeŋgöra aka taon pakpak mi töndup ayuhum eŋgiman me qahö?” Mewö jiiga Kembunöŋ kewö jiyök: “Nöŋön ambazip solanŋi 45 miaŋgöreŋ miwikŋaim eŋgimam ewö, taon mi mönö qahö ayuhumam.”
454	GEN 18:29	Abrahamnöŋ dumŋe kunbuk keu kewö jiyök: “Ambazip solanŋi 40 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök: “Ambazip 40 yeŋgöra aka taon mi qahö ayuhumam.”
455	GEN 18:30	Mewö jiiga jiyök: “O Kembu, urugi öngöbapukmö, ni kunbuk keu jimamgö mötzal. Ambazip solanŋi 30 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök: “Ambazip solanŋi 30 miaŋgöreŋ miwikŋaim eŋgimam ewö, nöŋön mönö taon mi qahö ayuhumam.”
456	GEN 18:31	Abrahamnöŋ toroqeba kewö jiyök: “Kembu, ni keu köhöikŋi Kembunaŋgöra kuŋguba jizal. Mi kude dop köljapmö, mi töndup ölöp möt niŋgiman. Ambazip solanŋi 20 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök, “Ambazip 20 yeŋgöra aka taon mi qahö ayuhumam.”
457	GEN 18:32	Mewö jiiga Abrahamnöŋ kunbuk kewö qesiyök: “O Kembu urugi öngöbapukmö, ni kunbuk sömaŋi mohot-töp ki keu jimamgö mötzal. Ambazip solanŋi 10 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök, “Ambazip 10 yeŋgöra aka taon mi qahö ayuhumam.”
460	GEN 19:2	Geba kewö jiyök: “O kembuyahötni, iŋiri ölöp welenqeqeŋiri nöŋgö mire kaba könaŋiri saŋgoŋda mohotŋe suŋgem ahöbin. Ahöba wahöta ölöp söŋanök köna toroqeba anmahot. “Mewö jiyökmö, yetkön kewö jiyohot: “Qahö, niri ölöp qenjarök sombem kunöŋ anda ahöbit.”
463	GEN 19:5	Kaŋgota Lotköra kewö qetket: “Azi yahöt mare göhöreŋ kazahori, mi denike? Azi nini yetpuk sero akingöra mötzin. Miaŋgöra mönö i etkuaŋgita neŋgöreŋ etme.”
465	GEN 19:7	Naŋgu köla kewö jiyök: “Alaurupni, mewö qahö. Silik bölöŋi mi kude akŋe.
466	GEN 19:8	Mötket. Nöŋgö böratni yahöt seram mala nalö kunöŋ azibuk qahö ahöyohot. I ölöp eŋgöra etkuaŋgita etpiga wanat yuaia akingö mötzei, mi ölöp sihimŋini meköme. Mewömö, nöŋgö miri boŋan azi yahöt etkualöŋda sel jöhöm etkizawi, ia mönö yuai bölöŋi kun qahöpmahöp ak etkime.”
467	GEN 19:9	Mewö jiyökmö, yeŋön kewö meleŋda teriŋda qetket: “Mönö kesalnöŋ. Göŋön ki kaba kiana mala nangahöra niŋia jiba mötnöŋ öŋgöiga ninia pöndaŋ jim kutum neŋgimamgö mötzan? Yetkön qahö kamahot ewö, mönö nangak neŋgöreŋ kanöŋga mönö kahasililiŋ keta bölökŋi nangi ak gihibin. “Mewö jiba Lot utalgetka kököndöt aniga öŋgöba miri naŋguŋi qesiŋbingö aka kinget.
470	GEN 19:12	Azi yahöt yetkön Lotköra kewö jiyohot: “Gi nahönurupki, qiŋgiböraturupki aka tinilosomurupki tosatŋi pakpak taon kiaŋgöreŋ maljei, i mönö eŋguaŋgitnöŋga taon ki mosöta anme.
471	GEN 19:13	Nini taon ki ayuhuba köndeŋmöndeŋbin. Könagesö kieŋgö kahasililiŋgöra gwötpukŋan Kembugö jeŋe önöŋi qahö qeta sahöta malget. Miaŋgöra yaŋön melaim netkiiga gölme ki ayuhuba köndeŋmöndeŋbitköra ki kazit.”
472	GEN 19:14	Mewö jiyohotka möta Lotnöŋ anda qiŋgi buŋa yahöt böratyahötŋi etkömembitkö jiiga malohori, yetköra kewö jiyök: “Iŋiri mönö ösumok wahörohotka miri ki mosöta anbin. Kembunöŋ taon ki ayuhuba köndeŋmöndeŋmamgö akza. “Mewö jiiga yetkön keu mi mörohotka göngönahit tandök ahök.
473	GEN 19:15	Miri waŋgaraŋ suruiga Suep garata yahöt yetkön Lot öröm kuŋgum waŋgiba kewö jiyohot: “Anutunöŋ Sodom yeŋgö siŋgisöndokŋinaŋgö likepŋi meleŋda taonŋini köndeŋmöndeŋma. Göŋön yembuk mohotŋe ayuhubanbuköra mönö zilaŋ wahöta anömgi aka böratyahötki göbuk tatzahori, mi eŋguaŋgita taon ki mosötket.”
475	GEN 19:17	Taon sileŋe angetka azi yahöt yetköreŋök kunöŋ keu kewö jiyök: “Malmalŋini aŋgön kölmegöra mönö ösumok misiŋgöba angaitme. Andöŋine kude liliŋgöba uba anda gölme köröŋe endu aŋgota miaŋgöreŋ mewöyök dörök kude alme. Ayuhubepuköra mönö kunduŋe eu öŋgöba misiŋgöba angaitme.”
476	GEN 19:18	Mewö jiyökmö, Lotnöŋ kewö jii mörohot: “O Kembuni, göŋön mewö akingöra kude jiman.
478	GEN 19:20	Mötnöŋ, taon moröni kun endu ahöi ekzani, miaŋön köröpŋi qahöpmö, ölöp anbinaŋgö dop akza. Miaŋgöra ölöp jinöŋga miaŋgöreŋ misiŋgöba angaita ölöwaka malbin. Miri morörökŋi mi eknöŋga dowe ahöiga miaŋgöreŋ ölöp anda malmalninaŋgö bohonŋi jöhöbin.”
479	GEN 19:21	Mewö jii mörohotka kunöŋ kewö meleŋnök: “Mi ölöp! Keu jizani, miaŋgöra mewöyök ölöp imbi köl gihimam. Taon moröŋaŋgöra jizani, mi qahö ayuhumam.
480	GEN 19:22	Mi qahö ayuhumam-mö, iŋini mönö ösumok miaŋgöreŋ misiŋgöba angaitme. Miaŋgöreŋ qahö aŋgotketka nalö sutŋi kewöŋe nöŋön yuai kun akŋamgö osimam. Iŋini mutuk miaŋgöreŋ aŋgotketka miaŋgö andöŋe ölöp jim kutubiga köndeŋmöndeŋ asuhuma. “Lotnöŋ taongöra ‘morodökŋi’ jiyöhaŋgöra aka taon miaŋgö qetŋi mi Zoar (morodökŋi) qetketka ahöza.
489	GEN 19:31	Miaŋgöreŋ mala böratŋi ketaŋan nalö kunöŋ munŋaŋgöra kewö jiyök: “Naniri iwiniran lök azi namŋi akza. Ambazipnöŋ gölme dop miaŋgöreŋ amimba nahönbörat miwikŋaim eŋgimakzemö, gölme kiaŋgöreŋ azi kun netkömemapköra qahö malja.
490	GEN 19:32	Miaŋgöra ölöp kaba iwiniri wain o waŋgizi nemba uruŋi eŋololoŋ aiga yambuk ahöba gölöm ala gwölönarök miwikŋaiziga könagesöninan toroqeba malme.”
492	GEN 19:34	Ahöba wahöta böratŋi ketaŋan munŋaŋgöra kewö jiyök: “Nöŋön uran suŋgem iwinambuk ahöyal. Ölöp merak suŋgem mewöyök wain o kunbuk waŋgizi nemba uruŋi eŋololoŋ aiga göŋön mönö anda yambuk ahömahot. Mewö ahöba iwiniraŋgöreŋök gölöm ala gwölönarök miwikŋaiziga könagesöninan toroqeba malme.”
498	GEN 20:2	Miaŋgöreŋ mala ambazip mieŋgöra kewö jii mötket: “Sara mi nena. “Mewö jiiga Gerargö kiŋi Abimelek yaŋön keu ali aniga Sara waŋgita jakömbuak miriŋe kaget.
499	GEN 20:3	Mewö aketmö, Anutunöŋ suŋgem kunöŋ Abimeleköreŋ kaba gaunöŋ kewö jiyök: “Ambi buŋa qem aŋguzani, mi azi kungö anömŋa. Miaŋgöra gi mönö yaŋgöra aka kömupkö buŋaya akŋan.”
500	GEN 20:4	Mewö jiyökmö, kiŋ Abimeleknöŋ Sara qahö meyöhaŋgöra aka kewö jiyök: “Kembu, ni siŋgisöndokö keuni qahö. Miaŋgöra göŋön ni aka könagesöurupni nini öne töhön ayuhum neŋgibanbuk.
501	GEN 20:5	Abrahamnöŋ mönö nanŋak nöŋgöra kewö jiyök: ‘Ambi mi nena.’ Ambinöŋ mewöyök kewö jiyök: ‘Abraham mi nena.’ Miaŋgöra urune geŋmoŋ qahö ahöiga ambi mi jibi kaiga börönan yuai tölokŋi kun qahö ahal.”
502	GEN 20:6	Mewö jiiga Anutunöŋ gaunöŋ likepŋi kewö jii mörök: “Keu jizani, mi ölŋa. Göhö uruge geŋmoŋ kun qahö ahöiga göhöreŋ kayöhi, mi mötzal. Miaŋgöra göŋön ambi mi misiriba nöŋgö jene siŋgisöndok akanbuköra sel jöhöm gihiba malal.
503	GEN 20:7	Mewögöra ambi mi mönö kunbuk meleŋda apŋaŋgöreŋ waŋgiman. Azi mi kezapqetok azia aka ölöp göhöra köuluköiga qahö kömuman. I kunbuk qahö waŋgiman ewö, keu ki mönö ölŋa mötman: Gi aka tinitosolomurupki iŋini mönö körek kömume.”
505	GEN 20:9	Mewö mötketka kiŋ Abimeleknöŋ Abrahamgöra keu ali öŋgöiga kewö jiba qesim waŋgiyök: “Gi mönö wani kimbia ak neŋginöŋ? Nöŋön wani bölöŋi kun ak gihibiga göŋön kondotnöŋga siŋgisöndokö keu lömbötŋan mönö ni aka könagesöni nöŋgö sel tohoŋ uruŋe maljei, neŋgö qaknine öŋgömamgö akza? Göŋön yuai qahö ahakŋaŋgö dop mia soŋgo walöŋda ak niŋginöŋ.
506	GEN 20:10	Göŋön mönö könaŋi wuanöŋgöra silik mi aknöŋe?” Kiŋ Abimeleknöŋ Abraham mewö qesim waŋgiiga
507	GEN 20:11	kewö meleŋnök: “Nöŋön keu mi kewö mötmöriba jial: ‘Gölme kiaŋgö könagesö eŋön Anutugö jitŋi oŋgitpinbuköra keŋgötŋini qahö mötpeak. Miaŋgöra ni anömnaŋgöra aka nuŋguget kömumbileŋbuk.’
509	GEN 20:13	Anutunöŋ Iwinaŋgö miriŋi mosöta kungen anmangö jiyöhi, nöŋön nalö miaŋgöreŋ Saragöra kewö jial: ‘Niri denike denike anbiri, miaŋgöreŋ nöŋgöra nena jiman. Mewö aka miaŋön ni urukalem kondel niŋgiba malman.’”
511	GEN 20:15	Waŋgiba keu kewö jiyök: “Mötnöŋ. Nöŋgöreŋ gölme ki wösöge ahözawi, miaŋgöreŋ mönö nangi sihimgahö dop malman.”
512	GEN 20:16	Mewö jiba Saragöra kewö jiyök: “Mötnöŋ. Nöŋön moneŋ silwö köt 1000:gö dop nengi waŋgibiga miaŋön töwagi akza. Töwa miaŋön könaŋamgi kondeliga ambazip körek göbuk maljei, yeŋön mi eka kewö jiba möt yaköme, ‘Siŋgisöndokö keuŋi mi Saragöreŋ qahö ahöza.’” Mewö jiyök.
520	GEN 21:6	Asuhuiga Saranöŋ keu kewö jiyök: “Anutunöŋ gönkölköl miwikŋaim niŋgiyök. Miaŋgöra denike yeŋön nöŋgö kösohotni mötmei, yeŋön mönö nömbuk gön kölme.”
521	GEN 21:7	Mewö jiba toroqeba kewö jiyök: “Saranöŋ morö galömkölkölŋa akŋawi, daŋön keu mi qeljiŋe möta Abrahamgöra jibawak? Mewö qahöpmö, nalö kewöŋe yaŋön azi namŋi aiga nöŋön töndup yaŋgö nahönŋi meal. “Mewö.
524	GEN 21:10	Mewö eka Abrahamgöra kewö jiyök: “Welen ambigö nahönŋan mönö nöŋgö nahöni Aisakpuk göhöreŋ öröyuai mi qahö mendeŋda buŋa qem aŋgumahot. Welen ambi mi aka nahönŋi mi mönö közölnöŋga anmahot.”
526	GEN 21:12	Mewö ahiga Anutunöŋ yaŋgöra keu kewö jiyök: “Nahöngi aka welen ambigi Hagar yetköra mönö urugoro ketaŋi kude mötman. Aisakö gwölönarökurupŋi yeŋönök mönö göhö qetbuŋagi bisiba malme. Miaŋgöra Saranöŋ keu göhöra jizawi, mi pakpak mönö möta tem kölman.
527	GEN 21:13	Welen ambigahö nahönŋan göhö gwölönaröki akzawaŋgöra nöŋön i mewöŋanök ahumsehip waŋgibiga gwölönarökurupŋan könagesö ketaŋi akŋe.”
530	GEN 21:16	Ali ahöiga kinda kewö mötmöriyök: “Nahönan jeni qakŋe kömumawi, mi ekŋamgö osiba jemörön akzal. “Mewö mötmöriba pokom mulget anakzawaŋgö dop tikep anda tata silata sahöt gigilahöyök.
531	GEN 21:17	Morö sahöröhi, mi Anutunöŋ möriga garataŋan suepnöhök Hagargö qeta kewö jiyök: “Hagar, gi wani lömbötkö uruŋe maljan? Keŋgötki kude mötnöŋ. Morönöŋ endu ahöba sahötzawi, Anutunöŋ sahötŋi mi lök mötza.
532	GEN 21:18	Mönö wahöta morö nahöngi gölmenöhök kököbihinöŋ wahöriga böröŋe memba mökökölim waŋgiman. Nöŋön i könaŋgep ahumsehip waŋgibiga gwölönarökurupŋan sehiba könagesö ketaŋi qetbuŋaŋinambuk akŋe.”
536	GEN 21:22	Nalö miaŋgöreŋ Abimelek aka yaŋgö yarö kambuŋaŋgö suahö galömŋi qetŋi Fikol yetkön Abrahamgöra kewö jiyohot: “Göŋön öröyuai pakpak aka memakzani, Anutunöŋ mönö miaŋgöreŋ göbuk kinakza.
537	GEN 21:23	Miaŋgöra göŋön mönö merak kiaŋgöreŋ Anutugö jeŋe jöjöpaŋ keu kewö jiba jim köhöiman: ‘Nöŋön gi, moröurupki aka gwölönarökurupki embuk isimkakalek kun kude aka malmam.’ Mewö jim köhöiba nöŋön ak kömum gihiba malali, miaŋgö dop göŋön mönö mewöŋanök gölme ki aka ni ak kömum netkiba malman. Gi gölme kiaŋgöreŋ kiana aka maljan.”
538	GEN 21:24	Mewö jiyohotka Abrahamnöŋ kewö jiyök: “Nöŋön jöjöpaŋ keu mi ölöp jiba jim köhöimam.”
540	GEN 21:26	Jim waŋgiyökmö, Abimeleknöŋ kewö meleŋda jiyök: “Daŋön silik mi ahöhi, mi nöŋön qahö mötzal. Nangak miaŋgö keuŋi kun mutuk qahö jinöŋ möta mala merak-kun keu mi mötzal.”
543	GEN 21:29	Mewö kingetka Abimeleknöŋ Abraham kewö qesim waŋgiyök: “Lama ambiŋi moröŋi 7 kewöta endu al eŋginöŋga nanŋinök kinjei, mi könaŋi wuanöŋgöra?”
544	GEN 21:30	Qesim waŋgiiga kewö meleŋnök: “Nöŋön o lömŋi ki esiali, keu mi jibiga mi möt narizan ewö, lama moröŋi 7 ki mönö nöŋgö böröneyök buŋa qem aŋgunöŋga nöŋgö keunaŋgö dangunuŋi akŋa.”
549	GEN 22:1	Yuai mi asuhuiga nalö tosatŋi teköiga Anutunöŋ Abraham esapköm waŋgiyök. Qetŋi “Abraham!” qeriga yaŋön “Ni ki kinjal,” jiba meleŋnök.
550	GEN 22:2	Mewö meleŋniga kewö jiyök: “Aisak nahöngi nanŋi mohotsirik urugan jöpaköm waŋgimakzani, i mönö waŋgita Moria gölmenöŋ anda kunduŋi kun kondel gihimami, miaŋgöreŋ öŋgöba i nöŋgö jöwöwöla ohoman.”
553	GEN 22:5	Mi eka welenqeqe yahötŋi yetköra kewö jiyök: “Iŋiri doŋkibuk ki tarohotka ni aka morö nahön netkön endu anda Anutu waikŋi memba möpöseiba kunbuk liliŋgöba etköreŋ kabit.”
555	GEN 22:7	Mewö anda Aisaknöŋ aŋ ala iwiŋi Abrahamgöra kewö jiyök: “Iwini!” Mewö jiiga kewö meleŋnök: “Nahöni, wania?” Mewö meleŋniga kewö qesiyök: “Könöp jitŋi aka könöp mia ki memba kazitmö, jöwöwöl ohohogö lamaŋi mi denike?”
556	GEN 22:8	Mewö qesiiga iwiŋan kewö meleŋnök: “Nahöni, Anutu nanŋak mönö jöwöwöl ohohogö lamaŋi kun miwikŋaiba netkima. “Mewö meleŋniga toroqeba mohotŋamŋire anohot.
559	GEN 22:11	Atöŋniga miaŋgöreŋök Kembugöreŋ garatanöŋ Suepnöhök Abrahamgöra kewö qerök: “Abraham, Abraham!” Mewö qeriga “Ni ki kinjal,” jiba meleŋnök.
560	GEN 22:12	Mewö meleŋniga kewö jiyök: “Börögan mönö morögö qakŋe kude alman. Yaŋgö qakŋe yuai kun kude akŋan. Göŋön nahöngi mohotsirik mi nöŋgöra qahö aŋgön köljanaŋgöra könaŋamgi merak kewö möt yaközal: Gi Anutugö keu jitŋi oŋgitpanbuköra keŋgötki mörakzan.”
562	GEN 22:14	Miaŋgöra Abrahamnöŋ gölme miaŋgö qetŋi mi ‘Kembunöŋ miwikŋaiba netkima,’ jiba qerök. Nalö kewöŋe mewöŋanök keu kewö jimakze: “Kembunöŋ mi kunduŋe miwikŋaiba netkima.”
564	GEN 22:16	“Kembu nöŋön kewö jizal: Nanak nani qetni qeta jöjöpaŋ keu kewö jiba jim köhöizal: Göŋön silik ki aka nahöngi mohotsirik mia nöŋgöra qahö aŋgön köljani,
566	GEN 22:18	Göŋön nöŋgö keuni tem köljani, miaŋgöra göhö gwölönarökurupki yeŋgöreŋök kungöra aka nöŋgö kötumötuetnan mönö gölmegö könagesö kambuŋi pakpak yeŋgö qakŋine öŋgöiga oyaeŋkoyaeŋ akŋe.”