1	GEN 1:1	Zaa káaku Luda musu kũ zĩtɛoo kɛ̀.
2	GEN 1:2	Gu da pãmɛ à kɛkɛnaro, gusira mɛ́ à da ísirala, akũ Luda Nini tɛn yàa kɛ í pìla.
3	GEN 1:3	Akũ Luda pì: Gupura kũ! Akũ gupura kũ̀.
6	GEN 1:6	Akũ Luda pì: Sarapura gↄ̃ kú ínↄ dagura de à í pìnↄ kɛ̃kↄ̃a.
9	GEN 1:9	Akũ Luda pì: Í kũ à kú zĩtɛ kakara gu dokↄ̃nↄ, gukori bo. Akũ à kɛ̀ lɛ.
11	GEN 1:11	Akũ Luda pì: Lánↄ bↄtɛ zĩtɛ kũ sɛ̃̀ wɛ́denↄ kũ lí nɛ́denↄ, baadi kũ a burio. Akũ à kɛ̀ lɛ,
12	GEN 1:12	lánↄ bↄ̀tɛ zĩtɛ kũ sɛ̃̀ wɛ́denↄ kũ lí nɛ́denↄ, baadi kũ a burio. Akũ Luda è à kɛ̀ mana.
14	GEN 1:14	Akũ Luda pì: Pↄ́ gupurakũrinↄ gↄ̃ kú musu ògↄ̃ fãnantɛ̃ kɛ̃kↄ̃a kũ gwãanio, ògↄ̃ wɛ̃̀ sèedanↄ kũ gↄrↄnↄ kũ wɛ̃̀nↄ mↄńnɛ.
20	GEN 1:20	Akũ Luda pì: Pↄ wɛ̃̀ndidenↄ í pa yɛ́rɛrɛ, bãnↄ dagula musu ògↄ̃ vura sarapuran.
24	GEN 1:24	Akũ Luda pì: Pↄ́ wɛ̃̀ndidenↄ bↄtɛ zĩtɛ, bɛ pↄ́kãdenↄ kũ pↄ́ kũ òdi táa o kũ kùaonↄ kũ nↄ̀bↄsɛ̃ntɛnↄ, baadi kũ a burio. Akũ à kɛ̀ lɛ.
25	GEN 1:25	Luda nↄ̀bↄsɛ̃ntɛnↄ kɛ̀ baadi kũ a burio. À bɛ pↄ́kãdenↄ kɛ̀ baadi kũ a burio. À pↄ́ kũ òdi táa o kũ kùaonↄ kɛ̀ baadi kũ a burio. Akũ à è à kɛ̀ mana.
26	GEN 1:26	Akũ Luda pì: Ò bisãsiri kɛ ó taka ũ, ògↄ̃ de lán ó bà, ògↄ̃ kí ble kpↄ̀nↄa kũ bãnↄ kũ bɛ pↄ́kãdenↄ kũ nↄ̀bↄsɛ̃ntɛnↄ kũ pↄ́ kũ òdi táa o kũ kùaonↄ pínki.
27	GEN 1:27	Akũ Luda bisãsiri kɛ̀ a zĩda taka ũ. A zĩda takan à ń kɛ́ a ũ. À ń kɛ́ gↄ̃gbɛ̃ kũ nↄgbɛ̃o.
29	GEN 1:29	Akũ Luda pì: Pↄ́ wɛ́de kũ ò kú zĩtɛnↄn ma kpàáwa á pↄ́ble ũ pínki kũ lí nɛ́denↄ pínki.
31	GEN 1:31	Luda pↄ́ kũ à kɛ̀nↄ è pínki, à kɛ̀ mana swáswa. Gu sì gu dↄ̀, a gↄrↄ suddoden gwe.
32	GEN 2:1	Lɛn Luda musu kũ zĩtɛo kɛ̀ lɛ kũ a pↄ́nↄ pínki.
35	GEN 2:4	Musu kũ zĩtɛo naana yãn dí. Gↄrↄ kũ Dikiri Luda zĩtɛ kũ musuoo kɛ̀,
36	GEN 2:5	pↄ́wɛ ke dí butɛ zĩtɛ kↄ̀ro, bee sɛ̃̀ɛ, zaakũ Dikiri Luda dí tó legũ màro, akũsↄ̃ gbɛ̃ke kun à bura zĩ kɛro.
38	GEN 2:7	Dikiri Luda gↄ̃gbɛ̃ í kàsa kũ bùsutitio, akũ à ĩa wɛ̃̀ndide vù a yĩn, akũ gↄ̃gbɛ̃ pìi gↄ̃̀ gbɛ̃ bɛ̃nɛ ũ.
39	GEN 2:8	Dikiri Luda swadakoo kɛ̀kɛ ifãboki kpa gu kũ òdi pi Ɛdɛni, akũ à gↄ̃gbɛ̃ kũ à kɛ̀ɛ pìi dà gwe.
40	GEN 2:9	Dikiri Luda tò lí buri sĩnda pínki bùtɛ zĩtɛ. Lí pìnↄ kɛ̀ mana, akũsↄ̃ ń nɛ́ blena nna. Lí wɛ̃̀ndide kú dàkoo pìi dagura. Lí kũ àdi dↄ̃na mana kũ a vãnio ińnɛ kú gwe dↄ.
46	GEN 2:15	Dikiri Luda gↄ̃gbɛ̃ pìi dìtɛ Ɛdɛni dàkoo pìi gũn de àgↄ̃ a zĩ kɛ àgↄ̃ gwa.
49	GEN 2:18	Dikiri Luda pì: Gↄ̃gbɛ̃ kunna ado manaro. Mani kpanyĩri kɛnɛ a gbɛ̃ndo ũ.
50	GEN 2:19	Akũ Dikiri Luda bùsuu sɛ̀ à nↄ̀bↄnↄ kɛ̀o pínki kũ bãnↄ pínki, akũ à sù kũńwo gↄ̃gbɛ̃ pì kĩnaa de à e deran ani tↄ́ kpáńnɛ nà. Tↄ́ kũ gↄ̃gbɛ̃ pìi kpà pↄ́ wɛ̃̀ndide pìnↄnɛ pínki gↄ̃̀ ń tↄ́ ũ.
52	GEN 2:21	Akũ Dikiri Luda i zↄ̃kↄ̃ↄ dà gↄ̃gbɛ̃ pìla. Kũ àtɛn i o, akũ à a gbã̀ntɛrɛwa mɛ̀n do bò, akũ à a mɛ̀baasi tàta a gbɛ̀n.
54	GEN 2:23	Akũ gↄ̃gbɛ̃ pìi pì: Adikĩna wá bò ma wá gũmmɛ, a mɛ̀ sↄ̃ à bò ma mɛ̀ɛ gũmmɛ. Oni a sísi nↄgbɛ̃, kũ Luda a bò gↄ̃gbɛ̃ gũn yãi.
57	GEN 3:1	Mlɛ̃̀ mɛ́ à manafiki vĩ de pↄ́ kũ Dikiri Luda kɛ̀nↄla pínki, akũ à nↄgbɛ̃ là à pì: Luda pì àsun dàkoo pì lí ke nɛ́ blenloo?
59	GEN 3:3	ama lí kũ à kú dàkoo pìi guragura, Luda pì òsun a nɛ́ blero òsun ↄ naa sero, de òsun garo yãi.
61	GEN 3:5	Zaakũ Luda dↄ̃ tó a blè, á wɛ́ ni kɛ̃ áni gↄ̃ lán a bà, ánigↄ̃ a mana dↄ̃ kũ a vãnio.
64	GEN 3:8	Kũ gↄ̃gbɛ̃ kũ a nanↄo Dikiri Luda kĩni mà àtɛn kure dàkoo pìi gũn ↄkↄsi, akũ ò ùtɛnɛ dàkoo pì lán.
65	GEN 3:9	Akũ Dikiri Luda lɛ́ zù gↄ̃gbɛ̃i à pì: Ń kú mámɛɛ?
67	GEN 3:11	Akũ Dikiri Luda a là à pì: Dí mɛ́ à ònnɛ ń kun pótompoo? Lí kũ ma ginnɛ ǹ a nɛ́ ble, n blèn yá?
69	GEN 3:13	Akũ Dikiri Luda nↄgbɛ̃ là à pì: Bↄ́yãi n kɛ̀ lɛɛ? À wèa à pì: Mlɛ̃̀ mɛ́ à ma kɛkɛ, akũ ma blè.
70	GEN 3:14	Akũ Dikiri Luda pì mlɛ̃̀ɛnɛ: Kũ n kɛ̀ lɛ, ĩnigↄ̃ láaribona pↄ́ ũ de bɛ pↄ́kãdenↄ kũ nↄ̀bↄsɛ̃ntɛnↄla pínki, ĩnigↄ̃ táa o n kùua, bùsutitin ĩnigↄ̃ ble ari n wɛ̃̀ndi lɛ́n.
73	GEN 3:17	Akũ à pì gↄ̃gbɛ̃nɛ: Lákũ n n nanↄ yã mà nà, lí kũ ma ginnɛ ǹ a nɛ́ ble n blè, ma láari bò zĩtɛa n yãi, ↄsi kũ ↄsioon ĩnigↄ̃ pↄ́ble en ari n wɛ̃̀ndi lɛ́n.
77	GEN 3:21	Dikiri Luda bára uta kɛ̀ Adamunɛ kũ a nanↄo, akũ à dàńnɛ.
79	GEN 3:23	Akũ Dikiri Luda pɛ̀a à a bò Ɛdɛni dàkoo pìi gũn. Akũ Adamu gɛ̀ɛ à zĩtɛ kũ Luda a bòn zĩ kɛ.
80	GEN 3:24	Kũ Dikiri Luda pɛ̀a, akũ à kɛrubunↄ kàtɛ Ɛdɛni dàko ifãboki kpa, de ògↄ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.
95	GEN 4:15	Akũ Dikiri pìnɛ: Lɛnlo! Tó gbɛ̃ n dɛ, oni mↄra káa gɛ̃̀n supplamɛ. Akũ Dikiri wãnzãn ke kɛ̃̀ Kainua, de gbɛ̃ kũ à kpàkũn kãao sún a dɛro yãi.
98	GEN 4:18	Ɛnↄku Irada ì, Irada Mɛuyaɛli ì, Mɛuyaɛli Mɛtusaɛli ì, Mɛtusaɛli Lamɛki ì.
99	GEN 4:19	Lamɛki nↄ sɛ̀ mɛ̀n pla, a do tↄ́n Ada, a do Zila.
103	GEN 4:23	Akũ Lamɛki pì a nↄnↄnɛ: Ada kũ Zilao, à ma yã ma, ma nↄnↄ, à sã kpá ma yãi. Gbɛ̃ke ma kĩnna, akũ ma a dɛ̀, kɛfɛnna pì ma lɛmɛ, akũ ma a wɛ̃̀ndii bò.
104	GEN 4:24	Tó oni Kainu fĩna bonɛ gɛ̃̀n suppla, makũ Lamɛki ma pↄ́ sↄ̃, gɛ̃̀n baaakↄ̃ akuri awɛɛsupplamɛ.
105	GEN 4:25	Adamu wùtɛ kũ a nanↄo dↄ, akũ à nɛ́gↄ̃gbɛ̃ ì. À tↄ́ kpànɛ Sɛti à pì, Luda a gba nɛ́ pãnde Habila kũ Kainu a dɛ̀ gɛ̃nɛ ũmɛ.
107	GEN 5:1	Adamu burinↄ yãn dí. Gↄrↄ kũ Luda bisãsirinↄ kɛ̀, à ń kɛ́ lán a bàmɛ.
128	GEN 5:22	A gbɛra à táa ò kũ Ludao ari wɛ̃̀ wàa do kpɛ́ basↄↄro à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
130	GEN 5:24	À táa ò kũ Ludao, akũ ò kùrai, kũ Luda a sɛ̀ à bò kãao andunia gũn yãi.
131	GEN 5:25	Mɛtusela wɛ̃̀ bakɛ̃ndo awɛɛsupplade gũn à Lamɛki ì.
134	GEN 5:28	Lamɛki kɛ̀ wɛ̃̀ bakɛ̃ndo awɛɛpla, akũ à nɛ́gↄ̃gbɛ̃ ì.
136	GEN 5:30	Nuhu inaa gbɛra Lamɛki kɛ̀ wɛ̃̀ wàa aakↄ̃ sↄↄrosari à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
140	GEN 6:2	akũ Luda nɛ́nↄ è bisãsiri nɛ́nↄgbɛ̃ pìnↄ mana, akũ òtɛni ń sɛ́ ń pↄyeinaaa.
142	GEN 6:4	Gbɛ̃ gbã̀nanↄn kú andunia gũn gↄrↄ birea kũ gↄrↄ bire gbɛrao dↄ, gↄrↄ kũ Luda nɛ́ pìnↄ bisãsiri nɛ́nↄgbɛ̃nↄ dↄ̃̀ nↄgbɛ̃nↄ ũ ò nɛ́nↄ ì kũńwo. Ń nɛ́ pìnↄmɛ gↄ̃sa gbãna kũ ń tↄ́ bò zaa káakunↄ ũ.
147	GEN 6:9	Nuhu burinↄ yãn dí. Nuhu bi gbɛ̃ manamɛ. Kũ à kun, a mɛ̀n do mɛ́ à taari vĩro à táa ò kũ Ludao.
149	GEN 6:11	Luda è andunia gbɛ̃nↄ yàka ń pínki, taarikɛna andunia pà.
150	GEN 6:12	Kũ Luda andunia gwà, à è à yàka, zaakũ gbɛ̃ sĩnda pínki zã̀ zɛ́a.
151	GEN 6:13	Akũ Luda pì Nuhunɛ: Mani gbɛ̃ sĩnda pínki kakatɛ, kũ ń yãin taarikɛna dà anduniala. Mani ń kakatɛ lɛɛlɛ kũ anduniaomɛ.
160	GEN 6:22	Akũ Nuhu kɛ̀ lɛ à yã kũ Luda ònɛɛ kɛ̀ pínki.
169	GEN 7:9	sù Nuhu kĩnaa gó gũn mɛ̀n plapla da kũ a sàao lákũ Luda ònɛɛ nà.
172	GEN 7:12	Legũ mà ari gↄrↄ bupla fãnantɛ̃ kũ gwãanio.
176	GEN 7:16	Pↄ wɛ̃̀ndidenↄ buri pínki gɛ̃̀ da kũ a sàao lákũ Luda dìtɛnɛ nà. Akũ Dikiri gbà tàtańlɛ.
177	GEN 7:17	Legũ mà ari gↄrↄ bupla. Kũ í tɛn kara, akũ à gó pìi sɛ̀ zĩtɛla.
183	GEN 7:23	Luda pↄ́ wɛ̃̀ndide kũ ò kú sĩ̀sĩanↄ kàkatɛ pínki. À bisãsirinↄ kũ nↄ̀bↄnↄ kũ pↄ́ kũ òdi táa o kũ kùaonↄ kũ bãnↄ kàkatɛ andunia gũn. Nuhu mɛ́ à bò ado kũ pↄ́ kũ ò kú kãao gó gũnnↄ.
185	GEN 8:1	Nuhu kũ nↄ̀bↄsɛ̃ntɛnↄ kũ bɛ pↄ́kãde kũ ò kú kãao gó gũnnↄ pínki yã dↄ̀ Ludan. Kũ à ĩa gbàrɛ zĩtɛa, akũ í nà babanaaa.
199	GEN 8:15	Akũ Luda yã ò Nuhunɛ à pì:
207	GEN 9:1	Akũ Luda arubarikaa dà Nuhugu kũ a nɛ́nↄ à pìńnɛ: Àgↄ̃ nɛ́ i àgↄ̃ kara à andunia pa.
214	GEN 9:8	Luda pì Nuhunɛ kũ a nɛ́nↄ dↄ:
218	GEN 9:12	Akũ Luda ɛ̀ra à pì: Ma bàka nigↄ̃ kú kãáo kũ pↄ́ wɛ̃̀ndide kũ ò kú kãáonↄ ari gↄrↄ sĩnda pínkimɛ. A sèedaan dí.
223	GEN 9:17	Akũ Luda pì Nuhunɛ: Ma bàka kunna kũ pↄ́ wɛ̃̀ndide kũ ò kú andunia gũnnↄ pínki sèedaan gwe.
232	GEN 9:26	Akũ à pì: Arubarikademɛ Dikiri, Sɛmu Luda ũ, Kanaa nigↄ̃ de Sɛmu zↄ̀ ũ.
233	GEN 9:27	Luda karana kɛ Yafɛtinɛ, a burinↄ ń baka le Sɛmu burinↄ arubarikaa gũn, Kanaa nigↄ̃ de Yafɛti zↄ̀ ũ.
241	GEN 10:6	Hamu nɛ́gↄ̃gbɛ̃nↄ tↄ́n dí: Etiopia, Misila, Libia kũ Kanaao.
244	GEN 10:9	Tofe sàamɛ Dikiri kĩnaa. A yã mɛ́ à tò òdi pi: Lákũ Nimlↄdu de tofe sà ũ Dikiri kĩnaa nà.
248	GEN 10:13	Misila burinↄn dí: Ludunↄ, Anamunↄ, Lɛabanↄ, Nafatunↄ,
254	GEN 10:19	Ń bùsu lɛ́zɛkin dí. Bona zaa Sidↄ̃ gɛna Gera kũ à kú Gaza sarɛ ari Sↄdↄmu kũ Gↄmↄrao kũ Adamao kũ Zeboimu kũ à kú Lasa sarɛo.
257	GEN 10:22	Sɛmu nɛ́gↄ̃gbɛ̃nↄ tↄ́n dí: Elamu, Asiria, Apasada, Ludu kũ Aramuo.
269	GEN 11:2	Lákũ gbɛ̃nↄ tɛn sↄ̃sↄ̃ ifãboki kpa nà, kũ ò kà Babilↄnia bùsu gusaran, akũ ò vùtɛ gwe.
294	GEN 11:27	Tera burinↄ yãn dí. Tera Abramu kũ Nao kũ Aranao ì, akũ Arana Lutu ì.
298	GEN 11:31	Akũ Tera a nɛ́ Abramu kũ a daikore Lutuo kũ Abramu nanↄ Saraio sɛ̀ bona Uru, Kaladia bùsun, òtɛn gɛ́ Kanaanↄ bùsun. Kũ ò kà Arana, ò vùtɛ gwe.
303	GEN 12:4	Akũ Abramu dà zɛ́n lákũ Dikiri ònɛ nà. Lutu gɛ̀ɛ kãao. A wɛ̃̀ baaakↄ̃ akuri awɛɛsↄↄrode gũn à bò Arana
304	GEN 12:5	kũ a nanↄ Saraio kũ a vĩ̀ni nɛ́ Lutuo kũ ń aruzɛkɛ kũ ò vĩnↄ kũ gbɛ̃ kũ ò sɛ̀ gwenↄ. Lɛn ò bò Arana lɛ ò dà Kanaa zɛ́n. Kũ ò kà gwe,
312	GEN 12:13	Ǹ pińnɛ ma dãremɛ n ũ de ò ma sí ↄplapla n yãi. Lákũ ĩni ma mì sí nàn gwe.
320	GEN 13:1	Akũ Abramu bò Misila à sù Nɛgɛvi kũ a nanↄo kũ a aruzɛkɛnↄ pínki kũ Lutuo.
324	GEN 13:5	Lutu dìgↄ̃ tɛ́ kũ Abramuo lɛɛlɛ. À sãnↄ kũ zùnↄ kũ bizakutanↄ vĩ se.
326	GEN 13:7	Akũ lɛ́kpakↄ̃a gɛ̃̀ Abramu pↄ́dãrinↄ kũ Lutu pↄ́dãrinↄ dagura. Zĩ kũ̀a sↄ̃ Kanaanↄ kũ Pɛrizinↄn kú bùsuu pìn.
327	GEN 13:8	Akũ Abramu pì Lutunɛ: À mana lɛ́kpakↄ̃a gↄ̃ kú ó daguraro, ke ma pↄ́dãrinↄ kũ n pↄ́dãrinↄ dagura, zaakũ danɛnↄn ó ũ.
329	GEN 13:10	Kũ Lutu gu gwà, à è Yoda guvutɛ pínki mↄtↄ vĩ manamana. Ari Dikiri gↄ̃ gɛ́ Sↄdↄmu kũ Gↄmↄrao kakatɛ, guvutɛ pì de lán Dikiri swadakoo bà, lán Misila bùsuu bà, ari à gɛ̀ɛ pɛ́ Zoaa.
330	GEN 13:11	Akũ Lutu Yoda guvutɛ sɛ̀ pínki. Ò kɛ̃̀kↄ̃a, akũ Lutu dà zɛ́n à tà ifãboki kpa.
331	GEN 13:12	Abramu gↄ̃̀ Kanaanↄ bùsun, Lutu sↄ̃ à kú Yoda guvutɛ wɛ̃tɛnↄ dagura. À bùraa kàtɛ Sↄdↄmu sarɛ.
333	GEN 13:14	Lutu tanaa gbɛra Dikiri pì Abramunɛ: Gu kũ ń zɛ́n ǹ wɛ́ sɛ́ ǹ gugbãnduru kũ gɛ̀nↄmidↄkio kũ ifãbokio kũ ifãlɛtɛo gwa.
349	GEN 14:12	Gↄrↄ kũ̀a Abramu vĩ̀ni nɛ́ Lutu kú Sↄdↄmu, akũ ò a kũ̀ ò tà kãao kũ a aruzɛkɛnↄ.
353	GEN 14:16	À ɛ̀ra à sù kũ aruzɛkɛ pìnↄ pínki kũ a vĩ̀ni nɛ́ Lutuo kũ a aruzɛkɛnↄ. À sù kũ nↄgbɛ̃nↄo kũ gbɛ̃ pãndenↄ dↄ.
355	GEN 14:18	Akũ Salɛmu kína Mɛlɛkizɛdɛki sù kũ burodiio kũ sèwɛ̃o. Àpi bi Luda Musude gbàgbariimɛ.
356	GEN 14:19	Akũ à sa mana ò Abramunɛ à pì: Luda Musude musu kũ zĩtɛo Kɛ̀ri arubarika da Abramun.