2	GEN 1:2	Guu da pãmɛ à kɛkɛnaro, gusiaa bé à da ísiaala, ben Luda Ninii e yàa paa í pìla.
4	GEN 1:4	À è gupuraa pì maa, ben à gupuraa kɛ̃̀kↄ̃a kↄ̃n gusiaao.
5	GEN 1:5	À tↄ́ kpà gupuraanɛ fãantɛ̃, gusiaa sↄ̃ gwãavĩ. Guu sì guu dↄ̀, à gurↄ káakun gwe.
7	GEN 1:7	Ben à bàtuma kɛ̀ lɛ, à í kɛ̀ kú bàtuma gĩzĩ kɛ̃̀kↄ̃a kↄ̃n í kɛ̀ kú à musuo.
8	GEN 1:8	Ben à tↄ́ kpà bàtuma pìnɛ ludambɛ. Guu sì guu dↄ̀, à gurↄ plaadeen gwe.
9	GEN 1:9	Ben Luda bè: Í kɛ̀ kú gĩzĩ kakↄ̃a gu dↄ̃nkↄ̃n, gukori bↄ. Ben à kɛ̀ lɛ.
10	GEN 1:10	À tↄ́ kpà gukori pìnɛ tↄↄtɛ, ben à tↄ́ kpà í kɛ̀ kàkↄ̃aanɛ ísiaa. Ben à è à kɛ̀ maa.
11	GEN 1:11	Ben Luda bè: Lánↄ bↄɛ tↄↄtɛ kↄ̃n sɛ̃̀ wɛ́ɛdeenↄ kↄ̃n lí nɛ́deenↄ, baade kↄ̃n a boriio. Ben à kɛ̀ lɛ,
12	GEN 1:12	lánↄ bↄ̀ɛ tↄↄtɛ kↄ̃n sɛ̃̀ wɛ́ɛdeenↄ kↄ̃n lí nɛ́deenↄ, baade kↄ̃n a boriio. Ben Ludaa è à kɛ̀ maa.
13	GEN 1:13	Guu sì guu dↄ̀, à gurↄ aagↄ̃deen gwe.
14	GEN 1:14	Ben Luda bè: Pↄ́ gupurinↄ gↄ̃ kú musu aↄ̃gↄ̃ fãantɛ̃ kɛ̃ɛkↄ̃a kↄ̃n gwãavĩo, aↄ̃gↄ̃ wɛ̃̀ sèedanↄ kↄ̃n gurↄↄnↄ kↄ̃n wɛ̃̀nↄ ↄdↄańnɛ.
16	GEN 1:16	À pↄ́ gupuri ìsinↄ kɛ̀ mɛ̀n plaa, à kɛ̀ gbãaa ègↄ̃ kí blee fãantɛ̃, à kɛ̀ busɛ ègↄ̃ kí blee gwãavĩ. À sↄsↄnɛnↄ kɛ̀ dↄ.
18	GEN 1:18	aↄ̃gↄ̃ kí blee fãantɛ̃ kↄ̃n gwãavĩo, aↄ̃gↄ̃ gupura kɛ̃ɛkↄ̃a kↄ̃n gusiaao. Ben à è à kɛ̀ maa.
19	GEN 1:19	Guu sì guu dↄ̀, à gurↄ siigↄ̃deen gwe.
20	GEN 1:20	Ben Luda bè: Pↄ́ wɛ̃̀ndideenↄ í pa yɛ́lɛlɛ, bãanↄ dagula musu aↄ̃gↄ̃ vĩaa bàtumaa.
21	GEN 1:21	Ben à pↄ́ wɛ̃̀ndidee kɛ̀ aↄ̃è lili o í guunↄ kɛ̀ kↄ̃n kpↄ̀ gbɛ̃̀ntɛ̃nↄ píngi, baade kↄ̃n a boriio. À bãanↄ kɛ̀ píngi dↄ, baade kↄ̃n a boriio. Ben à è à kɛ̀ maa.
22	GEN 1:22	À aubarika dàńgu à bè, aↄ̃gↄ̃ nɛ́ ii aↄ̃gↄ̃ kↄ̃ↄ, kpↄ̀nↄ ísiaa pa, bãanↄ kↄ̃ tↄↄtɛ.
23	GEN 1:23	Guu sì guu dↄ̀, à gurↄ sↄↄrodeen gwe.
24	GEN 1:24	Ben Luda bè: Pↄ́ wɛ̃̀ndideenↄ bↄɛ tↄↄtɛa, pↄ́kãdeenↄ kↄ̃n pↄ́taa'onkusɛanↄ kↄ̃n nↄ̀bↄsɛ̃tɛnↄ, baade kↄ̃n a boriio. Ben à kɛ̀ lɛ.
26	GEN 1:26	Ben Luda bè: Wà gbɛ̃ntee kɛ wa taka ũ, aↄ̃gↄ̃ dɛ wa bà, aↄ̃gↄ̃ kí blee kpↄ̀nↄa kↄ̃n bãanↄ kↄ̃n pↄ́kãdeenↄ kↄ̃n nↄ̀bↄsɛ̃tɛnↄ kↄ̃n pↄ́taa'onkusɛanↄ píngi.
30	GEN 1:30	Ma sɛ̃̀nↄ kↄ̃n lánↄ kpà pↄ́ wɛ̃̀ndideenↄa píngi ń pↄ́blee ũ, nↄ̀bↄnↄ kↄ̃n bãanↄ kↄ̃n pↄ́taa'onkusɛanↄ píngi. Ben à kɛ̀ lɛ.
31	GEN 1:31	Luda pↄ́ kɛ̀ à kɛ̀nↄ è píngi, à kɛ̀ maa wásawasa. Guu sì guu dↄ̀, à gurↄ swɛɛdodeen gwe.
33	GEN 2:2	Ai à gurↄ swɛɛplaadee zĩ gↄ̃ ká, à zĩi kɛ̀ èe kɛɛ pì yã̀a. À gurↄ swɛɛplaadee pìn à kámma bò kↄ̃n zĩi kɛ̀ à kɛ̀nↄ píngi.
34	GEN 2:3	Ben à aubarika dà gurↄ swɛɛplaadee pìn à dìɛ a pↄ́ ũ, kɛ̀ zĩ beeen à kámma bò kↄ̃n zĩi kɛ̀ à kɛ̀nↄ píngi yãnzi.
35	GEN 2:4	Musu kↄ̃n tↄↄtɛo naana yãn yɛ̀. Gurↄↄ kɛ̀ Dii Luda tↄↄtɛ kↄ̃n musuo kɛ̀,
36	GEN 2:5	bura pↄ́kee e bↄɛ tↄↄtɛa kↄ̀ro, baa sɛ̃̀, zaakɛ Dii Ludaa e tó lou màro, bensↄ̃ gbɛ̃kee kuu à tↄↄtɛ zĩi kɛro.
37	GEN 2:6	Sukaa bé è kpá andunala, ben è mↄdↄ pisi tↄↄtɛa píngi.
38	GEN 2:7	Dii Luda gↄ̃gbɛ̃ í kàsa kↄ̃n bùsutio, ben à ĩa wɛ̃̀ndidee vù à yĩn, ben gↄ̃gbɛ̃ pì gↄ̃̀ gbɛ̃ bɛ̃ɛ ũ.
39	GEN 2:8	Dii Luda swadako dìɛ ↄfãntɛ̃bↄɛ kpa kɛ̀ wè be Ɛdɛni, ben à gↄ̃gbɛ̃ kɛ̀ à kɛ̀ pì dà gwe.
40	GEN 2:9	Dii Luda tò lí bori píngi bↄ̀ɛ tↄↄtɛa. Lí pìnↄↄ maa, bensↄ̃ ń bɛ blena nna. Lí wɛ̃̀ndide kú dàko pì gura. Lí kɛ̀ è dↄ̃na maa kↄ̃n à zaaao ińnɛ kú gwe dↄ.
42	GEN 2:11	À káaku tↄ́n Pisↄ̃, àmbe à liga Avila bùsuzi píngi. Vura kú bùsu pì guu,
44	GEN 2:13	Swaa pì ↄnɛ plaade tↄ́n Giↄ̃, à liga Kusu bùsuzi píngi.
45	GEN 2:14	À ↄnɛ aagↄ̃de tↄ́n Tigiri, à dↄ̀rↄ tà Asiria bùsu ↄfãntɛ̃bↄɛ kpa. Swaa pì ↄnɛ siigↄ̃de tↄ́n Yuflati.
47	GEN 2:16	Ben à yã dìɛnɛ à bè: Nɛ́ fↄ̃ ǹ dàko pì lí píngi bɛɛ ble,
48	GEN 2:17	mↄde ǹton lí kɛ̀ è dↄ̃na maa kↄ̃n à zaaao ińnɛ bɛɛ blero. Tó ń blè, n gamɛ.
50	GEN 2:19	Ben Dii Luda bùsu kↄ̀ à nↄ̀bↄnↄ kɛ̀o píngi kↄ̃n bãanↄ píngi, ben à mↄ̀ńyo gↄ̃gbɛ̃ pì kiia lɛ à e dian eé tↄ́ kpáńnɛ nà. Tↄ́ kɛ̀ gↄ̃gbɛ̃ pì kpà pↄ́ wɛ̃̀ndidee pìnↄnɛ píngi gↄ̃̀ ń tↄ́ ũ.
51	GEN 2:20	Gↄ̃gbɛ̃ pì tↄ́ kpà pↄ́kãdeenↄnɛ píngi kↄ̃n bãanↄ kↄ̃n nↄ̀bↄsɛ̃tɛnↄ píngi, mↄde èe dↄnlɛri e ń tɛ́ a gbɛ̃ndoo ũro.
52	GEN 2:21	Ben Dii Luda i ìsi dà gↄ̃gbɛ̃ pìla. Kɛ̀ èe ii oo, ben à à gbã̀ntɛ̃wa mɛ̀n doo bↄ̀, ben à à mɛ̀baasi tàta a gbɛ̀n.
53	GEN 2:22	Ben à gↄ̃gbɛ̃ gbã̀ntɛ̃wa kɛ̀ à bↄ̀ pì lìɛ nↄgbɛ̃ ũ, ben à gàao à kiia.
54	GEN 2:23	Ben gↄ̃gbɛ̃ pì bè: Kɛ̀ki wá bↄ̀ ma wá guumɛ, à mɛ̀ sↄ̃ bↄ̀ ma mɛ̀ guumɛ. Weé à sísi nↄgbɛ̃, kɛ̀ Luda à bↄ̀ gↄ̃gbɛ̃ guu yãnzi.
55	GEN 2:24	Beee yãnzin gↄ̃gbɛ̃ è a de kↄ̃n a dao tó, aↄ̃è nakↄ̃a kↄ̃n a naↄ̃o wà gↄ̃ mɛ̀ doo ũ.
56	GEN 2:25	Gↄ̃gbɛ̃ kↄ̃n a naↄ̃o kú bũu ń plaa ń píngi, wí sↄ̃ è ń kũro.
57	GEN 3:1	Mlɛ̃̀ bé à mↄnafiki vĩ dɛ pↄ́ kɛ̀ Dii Ludaa kɛ̀nↄla píngi, ben à nↄgbɛ̃ là à bè: Luda bè àton dàko pì lí ke bɛɛ blenloo?
58	GEN 3:2	Ben nↄgbɛ̃ wè mlɛ̃̀ pìla à bè: Wé fↄ̃ wà dàko pì líbɛɛ ble,
59	GEN 3:3	mↄde lí kɛ̀ kú dàko pì gura súusu, Luda bè wàton à bɛɛ blero wàton ↄ kɛa sero, lɛ wàton garo yãnzi.
61	GEN 3:5	Zaakɛ Ludaa dↄ̃ kɛ̀ tó á blè, a wɛ́ɛ é kɛ̃ é gↄ̃ lán a bà, égↄ̃ à maaa dↄ̃ kↄ̃n à zaaao.
62	GEN 3:6	Kɛ̀ nↄgbɛ̃ è lí pì bɛɛ maa, bensↄ̃ à blena égↄ̃ nna eé tó gbɛ̃ wɛ́ɛ kɛ̃, ben à à bɛɛ wò à blè. À kpà a zãa sↄ̃, ben à blè.
63	GEN 3:7	Aↄ̃ plaa ń píngi wɛ́ɛ kɛ̃̀, ben aↄ̃ↄ dↄ̃̀ sa kɛ̀ aↄ̃ↄ kú bũu. Ben aↄ̃ gooda lá nàbi wà nàńzi.
64	GEN 3:8	Kɛ̀ gↄ̃gbɛ̃ kↄ̃n a naↄ̃o Dii Luda kĩi mà èe táa oo dàko pì guu uusiɛ, ben aↄ̃ ùtɛnɛ dàko pì lán.
66	GEN 3:10	À wèàla à bè: Kɛ̀ ma n kĩi mà, ben vĩa ma kũ kɛ̀ má kú bũu yãnzi, ben ma utɛ.
67	GEN 3:11	Ben Dii Luda à là à bè: Dé bé à ònnɛ ń kú bũuu? Lí kɛ̀ ma ginnɛ ǹ à bɛɛ ble, ń blèn yↄ́?
69	GEN 3:13	Ben Dii Luda nↄgbɛ̃ là à bè: Bↄ́yãnzi ń kɛ̀ lɛzi? À wèàla à bè: Mlɛ̃̀ bé à ma kɛkɛ, ben má blè.
70	GEN 3:14	Ben Dii Luda bè mlɛ̃̀nɛ: Kɛ̀ ń kɛ̀ lɛ, nɛ́gↄ̃ dɛ láari pↄ́ ũ pↄ́kãdeenↄ kↄ̃n nↄ̀bↄsɛ̃tɛnↄ tɛ́ píngi, n gbɛɛɛn nɛ́gↄ̃ gáɛɛ, bùsutin nɛ́gↄ̃ blee ai n wɛ̃̀ndi lɛ́n.
71	GEN 3:15	Mɛ́ íbɛtɛ da mpi kↄ̃n nↄgbɛ̃o dagura, n bori kↄ̃n à boriio dagura. À borii é n mì wí, nɛ́ à gbátoge kɛ̃nna.
72	GEN 3:16	Ben à bè nↄgbɛ̃nɛ: Mɛ́ n nↄ̀sina wãwãa kaarannɛ, nɛ́gↄ̃ nɛ́ ii wãwãao. N zã nii égↄ̃ kúmmamɛ, eégↄ̃ gbãa vĩ n musu.
73	GEN 3:17	Ben à bè gↄ̃gbɛ̃nɛ: Lán n n naↄ̃ yã mà nà, lí kɛ̀ ma ginnɛ ǹ à bɛɛ blee ń blè, tↄↄtɛ gↄ̃̀ láari pↄ́ ũ n yãnzi, ↄsi kↄ̃n ↄsiion nɛ́gↄ̃ pↄ́blee en ai n wɛ̃̀ndi lɛ́n.
74	GEN 3:18	Eé lɛ̀nↄ kↄ̃n lá ũkãdeenↄ bↄɛnnɛ, gbasa ǹ bura pↄ́nↄ ble.
75	GEN 3:19	Ísimmagaakpana guun nɛ́ pↄ́blee en ai ǹ liara ǹ gɛ̃ bùsu guu, zaakɛ gwen ma n bↄn. Bùsutin n ũ, nɛ́ liara ǹ gↄ̃ bùsuti pì ũmɛ.
76	GEN 3:20	Adamu tↄ́ kpà a naↄ̃nɛ Awau, zaakɛ gbɛ̃ píngi dazimɛ.
77	GEN 3:21	Dii Luda báa uta kɛ̀ Adamunɛ kↄ̃n à naↄ̃o, ben à dàńnɛ.
78	GEN 3:22	Ben à bè: Gbɛ̃ntee à maa kↄ̃n à zaaao dↄ̃̀ sa, à gↄ̃̀ lán wa bà. Wé gínɛ à lí wɛ̃̀ndide bɛɛ wo à ble, lɛ àtongↄ̃ kuu gurↄ píngiro yãnzi.
80	GEN 3:24	Kɛ̀ Dii Luda pɛ̀a, ben à kɛrubunↄ kàɛ Ɛdɛni dàko ↄfãntɛ̃bↄɛ kpa, lɛ aↄ̃gↄ̃ lí wɛ̃̀ndide zɛ́ dãkpaa kↄ̃n fɛ̃ɛdaa kɛ̀ èe tɛ́ kɛɛ èe liɛliɛɛo.
81	GEN 4:1	Adamu a naↄ̃ Awau dↄ̃̀ nↄgbɛ̃ ũ, ben à nↄ̀ sì à Kaini ì. Ben à bè: Ma gↄ̃gbɛ̃ ì kↄ̃n Dii gbãaao.
82	GEN 4:2	Ben à à dãaro Abila ì dↄ. Abila kɛ̀ sãdãri ũ, Kaini sↄ̃ kɛ̀ búbari ũ.
84	GEN 4:4	Abila sↄ̃ mↄ̀ kↄ̃n a sãnɛ káaku mɛ̀kpanao. Abila yã kà Diinɛ, ben à à gbaa sì.
85	GEN 4:5	Kaini sↄ̃ yã e ká Diinɛro, ben èe à gba síro. Ben Kaini pↄ fɛ̃̀ maamaa à uu yàkↄ̃tɛ.
87	GEN 4:7	Tó n yã maaa kɛ̀, mɛ́ n síroo? Tó nɛ́ɛ yã maaa kɛ sↄ̃ro, durun naɛnnɛ n kpɛɛlɛ. N nii e à dɛɛ, séde ǹ zĩ̀ blea.
88	GEN 4:8	Ben Kaini bè a dãaro Abilanɛ: Wà gá sɛ̃̀n. Kɛ̀ aↄ̃ kà gwe, ben à fɛ̀ɛ a dãarozi à à dɛ̀.
91	GEN 4:11	Tia sa nɛ́gↄ̃ láari pↄ́ ũmɛ, nɛ́gↄ̃ zã̀ kↄ̃n tↄↄtɛ kɛ̀ n dãaro aru mì n ↄzĩo.
92	GEN 4:12	Tó n bú bà, tↄↄtɛ é àre kɛnnɛro. Nɛ́gↄ̃ sↄ̃ki kpákpaa ǹgↄ̃ likↄ̃aa zↄ̃ↄ anduna guu.
93	GEN 4:13	Ben Kaini bè Diinɛ: Ĩadamma beee gbãa dɛmala, mɛ́ fↄ̃ro.
94	GEN 4:14	Nɛ́ɛ pɛɛma tↄↄtɛ kɛ̀a gbã̀amɛ sa. Mɛ́ kɛ̃kↄ̃anyo sa. Mɛ́gↄ̃ sↄ̃ki kpákpaa màgↄ̃ likↄ̃aa zↄ̃ↄ anduna guu, gbɛ̃ kɛ̀ kpàkũmao é ma dɛ.
95	GEN 4:15	Ben Dii bènɛ: Lɛnlo! Tó gbɛ̃ n dɛ, weé gɛ̃ɛ bonnɛ gɛ̃̀n swɛɛplaamɛ. Ben Dii wɛ̃zã ke kɛ̀ Kainia, lɛ gbɛ̃ kɛ̀ kpàkũo tón à dɛro yãnzi.
97	GEN 4:17	Kaini dàɛ kↄ̃n a naↄ̃o, ben à nↄ̀ sì à Ɛnↄku ì. À gbɛra Kaini wɛ́tɛ kàɛ, ben à a nɛ́ pì tↄ́ kpà wɛ́tɛ pìnɛ.
98	GEN 4:18	Ɛnↄku Irada ì, Irada Mɛuyaɛli ì, Mɛuyaɛli Mɛtusaɛli ì, Mɛtusaɛli Lamɛki ì.
99	GEN 4:19	Lamɛki nↄↄ sɛ̀ mɛ̀n plaa, à doo tↄ́n Ada, à doo sↄ̃ Zila.
103	GEN 4:23	Ben Lamɛki bè a naↄ̃ↄnↄnɛ: Ada kↄ̃n Zilao, à ma yã ma, ma naↄ̃nↄ, à swã kpá ma yãzi. Gbɛ̃ke ma kɛ̃nna, ben ma à dɛ̀, gↄ̃kparɛ pì ma lɛmɛ, ben ma à kàatɛ.
104	GEN 4:24	Tó weé Kaini gɛ̃ɛ bonɛ gɛ̃̀n swɛɛplaa, mamↄma Lamɛki ma pↄ́ sↄ̃, gɛ̃̀n baaagↄ̃ akuri awɛɛswɛɛplaamɛ.
105	GEN 4:25	Adamu dàɛ kↄ̃n a naↄ̃o dↄ, ben à nɛ́gↄ̃gbɛ̃ ì. À tↄ́ kpànɛ Sɛti à bè, Luda a gba nɛ́ pãnde Abila kɛ̀ Kaini dɛ̀ gɛ̃ɛ ũmɛ.
106	GEN 4:26	Sɛti sↄ̃ nɛ́gↄ̃gbɛ̃ ì, ben à tↄ́ kpànɛ Ɛnↄsu. Zaa zĩ beeean wà nà Dii sísinaa.
107	GEN 5:1	Adamu boriinↄ yãn yɛ̀. Gurↄↄ kɛ̀ Luda gbɛ̃nteenↄ kɛ̀, à ń kɛ́ lán a bàmɛ.
108	GEN 5:2	À ń kɛ́ gↄ̃gbɛ̃ kↄ̃n nↄgbɛ̃o, ben à aubarika dàńgu. À tↄ́ kpàńnɛ gbɛ̃ntee.
109	GEN 5:3	Adamu wɛ̃̀ baswɛɛdo akuridee guun à nɛ́ ì a taka ũ à bↄ̀kↄ̃bao, ben à tↄ́ kpànɛ Sɛti.
111	GEN 5:5	Kɛ̀ à kà wɛ̃̀ wàa siigↄ̃ kpɛ́ baswɛɛdo akuri, ben à gà.
114	GEN 5:8	Kɛ̀ à kà wɛ̃̀ wàa siigↄ̃ kpɛ́ basↄↄro akuri awɛɛplaa, ben à gà.
117	GEN 5:11	Kɛ̀ à kà wɛ̃̀ wàa siigↄ̃ kpɛ́ basↄↄro asↄↄro, ben à gà.
120	GEN 5:14	Kɛ̀ à kà wɛ̃̀ wàa siigↄ̃ kpɛ́ basↄↄro akuri, ben à gà.
123	GEN 5:17	Kɛ̀ à kà wɛ̃̀ wàa siigↄ̃ kpɛ́ basↄↄro sↄↄrosai, ben à gà.
126	GEN 5:20	Kɛ̀ à kà wɛ̃̀ wàa siigↄ̃ kpɛ́ basↄraagↄ̃ awɛɛplaa, ben à gà.
130	GEN 5:24	À táa ò kↄ̃n Ludao, ben wà kòrazi, kɛ̀ Luda à sɛ̀ bↄna anduna guu yãnzi.
133	GEN 5:27	Kɛ̀ à kà wɛ̃̀ wàa siigↄ̃ kpɛ́ basↄraagↄ̃ akuri dosai, ben à gà.
134	GEN 5:28	Lamɛki kɛ̀ wɛ̃̀ bakɛ̃ndo awɛɛplaa, ben à nɛ́gↄ̃gbɛ̃ ì.
137	GEN 5:31	Kɛ̀ à kà wɛ̃̀ wàa aagↄ̃ kpɛ́ basↄraagↄ̃ akuri awɛɛswɛɛplaa, ben à gà.
138	GEN 5:32	Kɛ̀ Nuu kà wɛ̃̀ wàa plaa kpɛ́ basↄↄro, à Sɛmu kↄ̃n Hamuo kↄ̃n Yafɛtio ì.
139	GEN 6:1	Kɛ gbɛ̃nteenↄ nà parikũnaa aↄ̃ↄe daagula aↄ̃ↄe nɛ́nↄgbɛ̃nↄ ii,
140	GEN 6:2	ben Luda nɛ́nↄↄ è gbɛ̃ntee nɛ́nↄgbɛ̃ pìnↄↄ maa, ben aↄ̃ↄe ń sɛɛ ń pↄyezia.
141	GEN 6:3	Ben Dii bè: Ma Ninii égↄ̃ kú gbɛ̃nteenↄ guu gurↄ píngiro, zaakɛ mɛ̀baadeemɛ. À gurↄↄnↄ égↄ̃ wɛ̃̀ baswɛɛdo.
142	GEN 6:4	Gbɛ̃ gbã̀anↄↄ kú anduna guu gurↄ beeea kↄ̃n gurↄ beee gbɛraao dↄ, gurↄↄ kɛ̀ Luda nɛ́ pìnↄ gbɛ̃ntee nɛ́nↄgbɛ̃nↄ dↄ̃̀ nↄgbɛ̃nↄ ũ, ben aↄ̃ nɛ́nↄ ìńyo. Aↄ̃ nɛ́ pìnↄn gↄ̃sagbãaa kɛ̀ aↄ̃ tↄ́ bↄ̀ zaa káakunↄ ũ.
143	GEN 6:5	Dii è kɛ̀ gbɛ̃nteenↄ yã zaa kɛna bíta anduna guu. Gurↄ píngi yã zaa laasuun aↄ̃ègↄ̃ lɛɛ ado,
144	GEN 6:6	ben à nↄ̀sɛ yàka gbɛ̃ntee kɛ̀ à kɛ̀ tↄↄtɛa yã musu. À laasuu pãnde lɛ̀,