1	GEN 1:1	Bwaꞌibwaꞌina yai, Yaubada galewa yo tanoꞌubu ya fatubudi.
2	GEN 1:2	Tanoꞌubu mate afaꞌafana yo hige i poiꞌumai. Na kamumu mate hoꞌowa hewana ya fakou, yo Yaubada Yaluwana mate hoꞌowa hewana ya famohafu.
5	GEN 1:5	Mala hesana ya tole lahai, na kamumu hesana ya tole iꞌipa. Maihala ya bulu, mate itete lahai bwaꞌibwaꞌina.
6	GEN 1:6	Yaubada iyen, “Hoꞌowa aba dailina i taumahata, be hoꞌowa i daili luwagai.”
7	GEN 1:7	Yo fede, hoꞌowa hewa yai yo ubu yai Yaubada ya ginaulidi be sa lau hudoꞌi.
9	GEN 1:9	Habahim Yaubada iyen, “Hoꞌowa galewa ubuna yai i falau esega ai tefa esega, na tanohi i taumahata.” Yo fede ya taumahata.
10	GEN 1:10	Yaubada tanohi hesana ya tole Tanohi. Na hoꞌowa sa falau esega hesana ya tole Gabogabo. Yaubada ya itadi mate sa loholoho.
11	GEN 1:11	Habahim Yaubada iyen, “Ai tanohi oyagi nene hudoꞌi - hudoꞌi yo hawahawa ti tala inꞌin, ti fuwa be ti lau liꞌe.” Yo fede, ginaulidi sa in.
12	GEN 1:12	Oyagi nene hesa - hesa yo somo anꞌan sa in tanohi yai, ginaulidi Yaubada ya itadi mate sa loholoho.
13	GEN 1:13	Iꞌipa ya ofi, na hwalahwalala hesa mate itete lahai fafaihonana.
14	GEN 1:14	Yaubada iyen, “Mala ti sina ai galewa be lahai yo iꞌipa ti dailidi. Maladi ni, adi paisowa mate lahai, bolima, haiꞌin yo haibeꞌu fafaꞌilaladi.
16	GEN 1:16	Yaubada mala laꞌilaꞌidi luwaga ya ginaulidi. Maihala lahai ya ita watan na nawalahi mate iꞌipa ya ita watan. Yo kipwala hinaga ya ginaulidi.
17	GEN 1:17	Maladi galewa yai ya toledi be tanoꞌubu sa sinai.
18	GEN 1:18	Lahai yo iꞌipa sa tanuwagaidi, be kamumu yo lahai sa dailidi. Yaubada ya itadi mate sa loholoho.
20	GEN 1:20	Yaubada iyebom, “Suisui hudoꞌi - hudoꞌi, hoꞌowa ti gogo famohafu. Yo ataiꞌa ti failofolofoidi be galewa ti famohafu.”
21	GEN 1:21	Yo fede Yaubada, gabogabo ginaulidi laꞌilaꞌidi, yo somo hoꞌowa yai mwahumwahulidi ya fatubudi. Ataiꞌa nene hesa - hesa sa lofolofo galewa yai hinaga ya fatubudi. Ya itadi mate sa loholoho.
24	GEN 1:24	Yaubada iyen, “Tanohi ginaulidi mwahumwahulidi nene hudoꞌi - hudoꞌi ti tubu: suisui manamanasadi, yekoyekodi, kanekanenedi yo kamokomodaladi.” Yo fede, somo Yaubada ya libaedi sa tubu.
26	GEN 1:26	Habahim, Yaubada iyen, “Taumoho ta ginauli doha ita. Haba tanoꞌubu mahudoꞌina: gabogabo hamadi, yada ataiꞌadi, yosiyosi, suisui kanekanenedi yo kamokamodaladi ya tanuwagaidi.”
28	GEN 1:28	Habahim ya faloholohodi, na iyen, “Au talu fanafanatu, be nanatumiu tanohi mahudoꞌina ti miyai yo ti tanuwagai. Gabogabo hamadi, yada ataiꞌadi yo ginauli mwahumwahulidi tanohi yai tigatigadi yo kanekanekanedi haba ami ita watanidi hinaga.”
29	GEN 1:29	Habahim iyen, “Ginauli iniꞌinidi fafaliꞌedi mahudoꞌidi tanohi mahudoꞌina yai yo oyagi fuwafuwadi tumatumadi mahudoꞌidi hinaga E felemiu, ami anꞌan.
30	GEN 1:30	Suisui, ataiꞌa yo ginauli tanohi yai kanekanenedi yo kamokomodaladi ginauli inꞌindi E feledi, adi anꞌan.” Yo fede, sa tubu.
31	GEN 1:31	Ginauli mahudoꞌidi Yaubada ya fatubudi ya itadi, mate sa loholoho wananaha! Maihala ya bulu, mate itete lahai fafaligigi esegana.
32	GEN 2:1	Yo fede, galewa yo tanohi yo ginauli mahudoꞌidi, mate Yaubada ya ginauli faꞌofidi.
33	GEN 2:2	Lahai fafaligigi luwagana yai Yaubada ana paisowa ya faꞌofi, be lahaina ya kawa loholohoꞌen yo ya fatabu. Habahim ya anyawasi.
35	GEN 2:4	Itete sidohana tanoꞌubu ena ginaginaulina. Fuyana Guyau Yaubada tanoꞌubu yo galewa ya ginaulidi mate,
36	GEN 2:5	hige somo laꞌi i in tanohi yai, paꞌana hola hige i faꞌusa, yo hige sai laꞌi gabu i paisowai.
37	GEN 2:6	Na yomayoman yai hoꞌowa ya kalamahano be tanohi ya faꞌwau.
40	GEN 2:9	Oyagi nene hudoꞌi - hudoꞌi ya ginaulidi be sa in. Itaꞌitadi sa loholoho na anꞌandi olidi. Mwahuli oyagina mate gabu atiꞌatipuna yai yo oyagi hesa hesana loholoho yo heyaya aba ita lobahidi hinaga amainiya.
41	GEN 2:10	Yomayoman ya didi lidi Iden, be gabuna ya fahoꞌowa. Hoꞌowa gwaluna yai ya saꞌa, be saꞌana oulina fati.
42	GEN 2:11	Saꞌa bwaꞌibwaꞌina mate hesana Pison mate Hawila nuꞌuna ya didi fataꞌiꞌili, na gole amainiya.
43	GEN 2:12	(Gole wananaha, maꞌi panepanena fisafisadi yo umeꞌehu namanamalidi amainiya sa lobahidi).
44	GEN 2:13	Saꞌa fafaluwagana mate hesana Gihon ya didi lau Kusi Nuꞌuna yai.
45	GEN 2:14	Saꞌa fafaihonana hesana Tigilesi mate Asiliya tefa saisaina yai ya didi lau. Na fafatina mate hesana Ifeleti.
47	GEN 2:16	Na ya falaugagayo, iyen, Oyagi mahudoꞌidi gabu yai te, uludi gonowana wa andi.
48	GEN 2:17	Loholoho yo heyaya aba ita lobahidi oyagina uluna, tabu u an, Ibe uluna wa an, haba wa peꞌi.
50	GEN 2:19	Be ataiꞌa, yosiyosi yo suisui yekoyekodi tanohi yai ya falasadi. Habahim ya lawedi Adam lisina, na hesa somo ya tole, mate, logena. In moho hige laꞌi, gonowana i saguhi.
52	GEN 2:21	Yo fede, taumoho ni ya lau faꞌeno. Habahim, oitalina esega ya abifahi, na omatana ya fasusu buluhi.
54	GEN 2:23	Adam iyen, Yee–, matabahim doga nenena doha yau, itete yau siyadagu, taugu yai sa kamfahi yo fisihogu tefana. Haba hesana E tole waihin, paꞌana taumoho oitalina yo fisihona yai Guyau ya ginauli.
56	GEN 2:25	Taumoho yo waihin ma tau afaꞌafadi, in moho, hige ti taumayamaya.
58	GEN 3:2	Waihin ya libalau weso lisina iyen, Gonowana gabu yai oyagi uludi ꞌe anidi.
59	GEN 3:3	In moho, Yaubada iyen, Oyagi gabu atipuna yai, tabu au an yo tabu au eliꞌina, doꞌata haba ami peꞌi.
60	GEN 3:4	Weso ya libalau waihin lebena iyen, Ya bwala! Ibege au peꞌi.
63	GEN 3:7	Oyagi uluna tefana sa an, mate nuwadi sa tasoꞌe be sa nuwatuhu lobahi iti ma tau afaꞌafadi, yo fede oyagi doha kuhou mate lugudi sa hinoꞌidi, be sa liꞌodi.
66	GEN 3:10	Alinana ya fafuyo iyen, Gabu yai ahem daguguna E atahi, na E ꞌwasabu, paꞌana yau ma tau afaꞌafagu yo fede E alasimo.
67	GEN 3:11	Yaubada ya fatiꞌo, iyen, Sai ya falibam ma tau afaꞌafam? Oyagi uluna E laugagayoꞌen, haꞌa wa an?
68	GEN 3:12	Taumoho iyen, Waihin wa tole maꞌegu, in, oyagina uluna ya felegu be E an.
70	GEN 3:14	Habahim, Guyau Yaubada ya libalau weso lisina iyen, Paꞌana laulau ni wa ginauli, kaumanana ya laowa hewam yai. Suisui manamanasadi yo yekoyekodi ganahewadi yai um haba heyaya laꞌilaꞌi wa fahoina. Haba ai bogam wa felifeli. Am kalahe, haba ma afusana wa an esegahi, fuya ouꞌouli.