45	GEN 2:14	Y ayan otronteꞌ xucur xeꞌ ucꞌabꞌa Tigris xeꞌ anumuy tama e lado tiaꞌ atobꞌoy watar e qꞌuin tama e Asiria. Y ayan intex xucur xeꞌ ucꞌabꞌa Éufrates.
65	GEN 3:9	Entonces Cawinquirar Dios upejca e winic y uyubꞌi tuaꞌ y che: —¿Tiaꞌ turet? che e Dios.
69	GEN 3:13	Entonces Cawinquirar Dios uyubꞌi tuaꞌ e ixic y che: —¿Tucꞌa tuaꞌ que ache cocha era? che Cawinquirar Dios. Y che e ixic: —Pues jax e chan xeꞌ umajresen, y tamar era incꞌuxi uyutir e teꞌ xeꞌ machi ani tuaꞌ incꞌuxi, che e ixic.
86	GEN 4:6	Entonces Cawinquirar Dios uyare e Caín y che: “¿Tucꞌa tuaꞌ que war iqꞌuijna meyra cocha era este que war aquetpa calapir aweroj?
89	GEN 4:9	Entonces Cawinquirar Dios uchectes ubꞌa tut e Caín y cay uyubꞌi tuaꞌ y che: —¿Tiaꞌ turu awijtzꞌin Abel? che Cawinquirar Dios. Y sutpa ojron e Caín y che: —Nen machi innata. ¿O nen ca ajcojquen tuaꞌ niwijtzꞌin? che e Caín.
90	GEN 4:10	Y Cawinquirar Dios sutpa ojron otronyajr y che: —¿Tucꞌa tuaꞌ achamse awijtzꞌin? Pues uchꞌichꞌer awijtzꞌin xeꞌ tzꞌuna umen e rum war ucꞌajti tacaren tuaꞌ inwebꞌta watar e jatzꞌuar tajor.
102	GEN 4:22	Y e Silá uchꞌijrse inteꞌ uyar xeꞌ ucꞌabꞌa Tubal-caín xeꞌ cꞌotoy quetpa e bꞌajxan ajcheyaj taqꞌuin y cay uche meyra cosa tama e bronce y tama e taqꞌuin. Y de allí e Silá chꞌijrtesian otronyajr y uchꞌijrse inteꞌ ijchꞌoc xeꞌ ucꞌabꞌa Naamá xeꞌ jax uwijtan e Tubal-caín.
237	GEN 10:2	Pues umaxtacobꞌ e Jafet jax era: Ayan e Gómer y e Magog y e Madai y e Javán y e Tubal y e Mésec y e Tirás.
238	GEN 10:3	Y uyunenobꞌ e Gómer jax era: Ayan e Asquenaz y e Rifat y e Togarmá.
239	GEN 10:4	Y umaxtacobꞌ e Javán jax era: Ayan e Elisá y e Tarsis y e Quitim y e Rodanim.
291	GEN 11:24	Y conda e Nahor war ucojco veintinueve año cuxpa inteꞌ uyunen xeꞌ ucꞌabꞌa Térah.
293	GEN 11:26	Y conda e Térah war ucojco setenta año cuxpa e yaxar unembꞌir xeꞌ jax e Abram, y de allí cuxpa uyunen Nahor, y de allí cuxpa uyunen Harán.
294	GEN 11:27	Pues jax era uchꞌajnarir e Térah: Ayan uyunenobꞌ xeꞌ jax e Abram y e Nahor y e Harán. Pues e Harán ayan uyunen xeꞌ ucꞌabꞌa Lot.
295	GEN 11:28	Pero conda turuto utata xeꞌ jax e Térah, chamay e Harán tiaꞌ cuxpa tama inteꞌ nuxi chinam xeꞌ ucꞌabꞌa Ur xeꞌ turu tama e chinam Caldea.
298	GEN 11:31	Entonces e Térah locꞌoy tama e nuxi chinam Ur tuaꞌ ani axin esto tama e nuxi chinam xeꞌ ucꞌabꞌa Canaán, y uqꞌueche ixin e Abram xeꞌ jax uyunen y e Lot xeꞌ sitzbꞌir tuaꞌ, y uqꞌueche ixin uyaribꞌ xeꞌ jax e Sarai ubꞌan. Pero conda cꞌotoyobꞌ esto tama inteꞌ chinam xeꞌ ucꞌabꞌa Harán, yajaꞌ taca quetpobꞌ tuaꞌ aturuanobꞌ.
299	GEN 11:32	Y jax taca tama e chinam era tiaꞌ chamay e Térah conda war ucojco 205 año.
317	GEN 12:18	Y conda e rey cꞌotoy unata que war acꞌaxi inteꞌ nuxi muaquir tujor umen que uqꞌueche ixin e Sarai tuaꞌ aquetpa ani inteꞌ uwixcar, uyare tuaꞌ apejcna e Abram y uyare cocha era y che: “¿Tucꞌa tuaꞌ ache cocha era tacaren? Y ¿tucꞌa tuaꞌ machi awaren que jax awixcar e ixic era?
338	GEN 14:1	Pues jax era inteꞌ ojroner tama inteꞌ tiempo conda cuatro reyobꞌ ubꞌijnuobꞌ tuaꞌ uchiobꞌ e tzꞌojyir upater cinco reyobꞌ. Y e cuatro reyobꞌ jax era: Ayan e Amrafel xeꞌ jax e rey tama e chinam Sinar, y ayan e Arioc xeꞌ jax e rey tama e chinam Elasar, y ayan e Quedorlaómer xeꞌ jax e rey tama e chinam Elam, y ayan e Tidal xeꞌ jax e rey tama e chinam Goím.
346	GEN 14:9	Y conda cꞌotoyobꞌ e cuatro reyobꞌ era cay uchiobꞌ e tzꞌojyir taca e Quedorlaómer xeꞌ rey tama e lugar Elam, y taca e Tidal xeꞌ rey tama e lugar Goím, y taca e Amrafel xeꞌ rey tama e lugar Sinar, y taca e Arioc xeꞌ rey tama e lugar Elasar, xeꞌ jax e cinco reyobꞌ.
361	GEN 14:24	Nen matucꞌa cꞌani inchꞌami tabꞌa. Tzꞌactix lo que ucꞌuxiobꞌ nimanobꞌ. Pero cocha e Aner y e Escol y e Mamré cay utacrenobꞌ tama e tzꞌojyir ucꞌani tuaꞌ uchꞌamiobꞌ lo que tuobꞌ, che e Abram uyare e rey tuaꞌ e chinam Sodoma.
370	GEN 15:9	Entonces ojron Cawinquirar Dios y che: —Tares incojt utuꞌ chꞌom wacax, y incojt chivo, y incojt utata oveja xeꞌ war ucojcobꞌ uxteꞌ año inteꞌ inteꞌ, y tares ubꞌan incojt mucuy y incojt sacsac mut xeꞌ chꞌomto, che Cawinquirar Dios.
388	GEN 16:6	Entonces ojron e Abram y che: —Tama acꞌabꞌ turu aman. Chen tacar bꞌan taca cocha net abꞌijnu ache, che e Abram. Entonces e Sarai cay ucꞌaye meyra e Agar este que locꞌoy ajni.
396	GEN 16:14	Y tamar era uturbꞌa ucꞌabꞌa ut e jaꞌ y che: “Ut e jaꞌ xeꞌ tuaꞌ Tin e Turu xeꞌ uwiren”. Pues ut e jaꞌ era turu tuyuxin e chinam Cadés y tuyuxin e chinam Béred.
403	GEN 17:5	y machi ixto tuaꞌ ipejcna tama acꞌabꞌa Abram, sino que desde coner era ucꞌani tuaꞌ ipejcna tama intex acꞌabꞌa xeꞌ jax e Abraham, xeꞌ war che ‘Tatabꞌir tuaꞌ meyra chinamobꞌ’ cocha bꞌan tuaꞌ inche iquetpa net.
434	GEN 18:9	Entonces conda cꞌapa wiobꞌ e ajwarobꞌ, uyubꞌiobꞌ tuaꞌ e Abraham cocha era y chenobꞌ: —¿Turu ca e Sara xeꞌ jax awixcar? chenobꞌ. Y ojron e Abraham y che: —Yajaꞌ taca turu macuir niotot, che e Abraham.
438	GEN 18:13	Pero Cawinquirar Dios sutpa uyare e Abraham cocha era y che: —¿Tucꞌa tuaꞌ war atzene e Sara? O ¿war ca ubꞌijnu que: ‘Machi ixto tuaꞌ uyubꞌien inchꞌijrtesian cocha onian ixiquen?’
439	GEN 18:14	Pues nen Awinquiraren Dios. Taniut matucꞌa intran tuaꞌ inche. Y cꞌani inwaret era que tama e tiempo conda war achena e pacmar tama e año xeꞌ watar cꞌani insutpa inyopa tuaꞌ inwarajset otronyajr, y que tama e día yajaꞌ e Sara cuxpix incojt uyar, che Cawinquirar Dios uyare e Abraham.
463	GEN 19:5	Y cay upejcobꞌ e Lot taca inteꞌ nuxi nuc y chenobꞌ: —¿Tiaꞌ turobꞌ e winicobꞌ xeꞌ yopobꞌ tama oꞌtot sajmi era? Locsenobꞌ patir. Non cꞌani cachꞌan tacarobꞌ, chenobꞌ e sian winicobꞌ era.
467	GEN 19:9	Entonces qꞌuijnobꞌ e winicobꞌ y chenobꞌ: —Loqꞌuen tara net. ¿Tuqꞌuet cora net tuaꞌ awareon tucꞌa tuaꞌ cache? Pues net majax ajlugaret tara. Y tamar era cꞌani cachiet anumse abꞌa más meyra que e winicobꞌ yax, chenobꞌ. Y de allí cay uwatzꞌiobꞌ e Lot y cay uquerejbꞌobꞌ locꞌoy tut e puerta, y cay uyobꞌiobꞌ e puerta tuaꞌ ani uche acꞌaxi tut e rum.
505	GEN 20:9	Entonces e Abimelec upejca e Abraham y che: —¿Tucꞌa tuaꞌ que war ache tunor era tacaron? O ¿ayan ca inteꞌ mabꞌambꞌanir lo que war inche apater? Porque net war ache acꞌaxi meyra jatzꞌuar tama nijor nen y tama ujorobꞌ tunor tin e turobꞌ tama niotot. Pues majax imbꞌutz tunor lo que ixiet ache tacaren.
506	GEN 20:10	¿Tucꞌa tar war abꞌijnu que ixiet ache tunor era nipater? Pues bꞌan che e Abimelec uyare e Abraham.
543	GEN 21:29	Y e Abimelec uyubꞌi tuaꞌ y che: —¿Tucꞌa tuaꞌ war alocse e siete chꞌom utuꞌ oveja era? che e Abimelec.
549	GEN 22:1	Pues entonces conda numuy cora año Cawinquirar Dios cay ubꞌijnu que cꞌani uwira cobꞌa cꞌubꞌesiaj ayan tuaꞌ e Abraham, y jay axin oꞌbꞌian tut. Y tamar era upejca y che: —Abraham, che e Dios. Y e Abraham che: —Tara turen, che e Abraham.
555	GEN 22:7	Y conda war axanobꞌ tor e bꞌir ojron e Isaac taca utata y che: —Tata, che e chꞌom sitz. Y e Abraham ojron y che: —¿Tucꞌa acꞌani, sitz? che e Abraham. Y che e Isaac: —Non war caqꞌueche axin e siꞌ y ayan ut e cꞌajc ubꞌan, pero ¿tiaꞌ aquetpa e arac lo que aquetpa tuaꞌ cachamse? che e Isaac.
559	GEN 22:11	wacchetaca pejcna umen inteꞌ ángel tuaꞌ Cawinquirar Dios tut e qꞌuin y che: —Abraham, Abraham, che e ángel. Y ojron e Abraham y che: —Tara turen, che e Abraham.
572	GEN 22:24	Pues e Nahor ayan umaxtac taca inteꞌ uman ubꞌan xeꞌ ucꞌabꞌa Reumá xeꞌ cꞌotoy quetpa inteꞌ uwixcar. Pues uyunenobꞌ xeꞌ ajcꞌuna umen e Reumá jax e Teba y e Gáham y e Tahas y e Maacá.
594	GEN 24:2	Y tama inteꞌ día e Abraham upejca uman xeꞌ más ayan ucꞌampibꞌir xeꞌ jax xeꞌ aquetpa tuaꞌ acꞌotori tujor tunor lo que ayan tuaꞌ e Abraham. Entonces e Abraham uyare uman cocha era y che: —Turbꞌan acꞌabꞌ yebꞌar ut niwaꞌ tuaꞌ achecsu que san tuaꞌ acꞌapa ache lo que war inwaret era:
615	GEN 24:23	Entonces uyubꞌi tuaꞌ e ijchꞌoc y che: —¿Tucꞌa ucꞌabꞌa atata? Y ¿ayan ca e lugar tama uyotot atata tuaꞌ uyubꞌion caquetpa tama e acbꞌar era? che uman e Abraham uyare e Rebeca.
619	GEN 24:27	y che: “Tattzbꞌir ucꞌabꞌa Cawinquirar Dios xeꞌ Udiosir niwinquir Abraham, porque erach jaxir y incꞌun uwirnar taca niwinquir, y jax xeꞌ uwirsen e bꞌir xeꞌ acꞌotoy esto tama uyotot ufamilia niwinquir”, che uman e Abraham.
639	GEN 24:47	Y de allí umbꞌi tuaꞌ jaxir y inware: ‘¿Tucꞌa ucꞌabꞌa atata?’ inware. Y jaxir uyaren y che: ‘Pues nen uwijchꞌoquen e Betuel xeꞌ jax uyar e Milcá taca e Nahor,’ uyaren. Y de allí cay inturbꞌa inteꞌ anillo tama uniꞌ y chateꞌ brazalete tamar unuc ucꞌabꞌ.
643	GEN 24:51	Pero lo que erer cawaret jax era: Tara turu e Rebeca toit, qꞌueche chic tuaꞌ aquetpa uwixcar uyunen awinquir bꞌan cocha ucꞌani Cawinquirar Dios, chenobꞌ e Labán taca e Betuel.
654	GEN 24:62	Pues tama e tiempo era e Isaac war aturuan tama e lugar Négueb, cocha sutpa tari tama ut e jaꞌ xeꞌ ucꞌabꞌa “Ut e jaꞌ xeꞌ tuaꞌ Tin e Turu xeꞌ Uwiren” tiaꞌ ixin xana.
670	GEN 25:11	Pues nacpat que chamay e Abraham, e Isaac chojbꞌesna ut meyra umen e Dios, y ixin turuan tuyejtzꞌer ut e jaꞌ xeꞌ ucꞌabꞌa “Ut e jaꞌ xeꞌ tuaꞌ Tin e Turu xeꞌ Uwiren”.
674	GEN 25:15	y e Hadar y e Temá y e Jetur y e Nafís y e Quedmá.
684	GEN 25:25	Y xeꞌ cuxpa bꞌajxan chacchac ut y ayan meyra tzutz tama tunor ucuerpo, y tamar era turbꞌana ucꞌabꞌa Esaú xeꞌ war che “Tzutz”.
703	GEN 26:10	Entonces ojron e Abimelec y che: —¿Tucꞌa tuaꞌ que ache cocha era tacaron? Porque bꞌajcꞌat inteꞌ winic ticajam ixin ani tuaꞌ awayan taca awixcar, y tamar era war ani ache acꞌaxi inteꞌ nuxi mabꞌambꞌanir ticajor, che e Abimelec.
746	GEN 27:18	Entonces e Jacob uchꞌami e wiar y ixin tiaꞌ turu utata, y uyare cocha era y che: —Tata, che e Jacob. Y ojron e Isaac y che: —Tara turen. Y ¿chiet net tama e chateꞌ unembꞌir tanibꞌa? che e Isaac.
759	GEN 27:31	Y uqꞌueche e caldo lo que ustabꞌir umener lo que quetpa ani tuaꞌ ucꞌuxi utata. Entonces upejca utata cocha era y che: —Tata, achpen tuaꞌ acꞌuxi e caldo lo que unstes tama e animal lo que inchuqui sajmi, tuaꞌ uyubꞌi awajqꞌuen e chojbꞌesiaj, che e Esaú uyare utata.
762	GEN 27:34	Pero conda e Esaú uyubꞌi tunor era, cay aru taca inteꞌ nuxi nuc y uyare utata cocha era y che: —Tata, chojbꞌesen nen ubꞌan, che e Esaú uyare utata.
766	GEN 27:38	Entonces e Esaú sutpa uyubꞌi tuaꞌ utata otronyajr y che: —Tata ¿machi ca uyubꞌi awajqꞌuen nien inteꞌ chojbꞌesiaj? Chojbꞌesen nen ubꞌan, che e Esaú. Y sutpa aru taca inteꞌ nuxi nuc otronyajr.
800	GEN 29:4	Entonces tama e día era e Jacob uyubꞌi tuaꞌ e ajcojcobꞌ oveja y che: —¿Tiaꞌ ajlugarox nox? che e Jacob. Entonces ojronobꞌ e ajcojcobꞌ oveja y chenobꞌ: —Pues non ajlugaron tama e chinam Harán, chenobꞌ.
803	GEN 29:7	Entonces ojron e Jacob y che: —Pero era mato jax e hora tuaꞌ camaqui e sian oveja tama umactiobꞌ. ¿Tucꞌa tuaꞌ que machi intaca iwajcꞌu e jaꞌ tuaꞌ uyuchꞌiobꞌ rajxa era, y de allí erer iqꞌueche axin e aracꞌobꞌ esto tiaꞌ ayan e cꞌopot tuaꞌ upojrobꞌ tucꞌa tuaꞌ ucꞌuxiobꞌ? che e Jacob.
821	GEN 29:25	Entonces conda sacojpa e Jacob sutpa uwira ut uwixcar y uwira que jax e Lea xeꞌ wayan tacar y majax e Raquel. Entonces qꞌuijna y achpa wacchetaca tuaꞌ axin oꞌjron taca upixam y che: —¿Tucꞌa tuaꞌ ache cocha era tacaren? Patnen meyra tiempo tacaret tuaꞌ innujbꞌi taca e Raquel. Y sacojpa sajmi inwira que jax e Lea xeꞌ turu taniwejtzꞌer y majax e Raquel. ¿Tucꞌa tuaꞌ que ixiet amajresen? che e Jacob uyare upixam war aqꞌuijna.
831	GEN 29:35	Entonces e Lea qꞌuechuan otronteꞌ uyar, y uturbꞌa ucꞌabꞌa Judá xeꞌ war che “Tattzꞌarsiaj”. Y ojron y che: “Pues coner cꞌani intattzꞌi ucꞌabꞌa Niwinquirar Dios”, che e Lea. Y nacpat era machix chꞌijrtesian más.
844	GEN 30:13	Entonces ojron e Lea y che: “War intzay meyra, y bꞌan tuaꞌ axin uyarenobꞌ e ixictac ubꞌan que ayan meyra nitzayer. Y tamar era axin caturbꞌa ucꞌabꞌa Aser”, che e Lea. Pues uyubꞌnar e ojroner Aser lar tacar e ojroner hebreo xeꞌ war che “Tzayer”.
849	GEN 30:18	Entonces ojron e Lea y che: “Pues e Dios uyajqꞌuenix nituanibꞌir umen que inwajcꞌu niman tuaꞌ aquetpa uwixcar niviejo, y tamar era cꞌani caturbꞌa ucꞌabꞌa e sitz Isacar”, che e Lea. Pues uyubꞌnar e ojroner Isacar lar tacar e ojroner hebreo xeꞌ war che “Tuanibꞌir”.
855	GEN 30:24	Y uturbꞌa ucꞌabꞌa José. Entonces ojron e Raquel y che: “Incꞌajti taca e Dios tuaꞌ asutpa uyajqꞌuen otronteꞌ niwar”, che e Raquel. Pues uyubꞌnar e ojroner José lar tacar e ojroner hebreo xeꞌ war che “Tzꞌacbꞌir”.
885	GEN 31:11	Y tama niwayac ayan inteꞌ ángel tuaꞌ Cawinquirar Dios xeꞌ upejquen tama nicꞌabꞌa, y nen inware: ‘Tara turen,’ inware.
900	GEN 31:26	Entonces ixin e Labán tuaꞌ oꞌjron taca e Jacob y che: —¿Tucꞌa tuaꞌ que ache cocha era tacaren? Y ¿tucꞌa tuaꞌ que ixiet amajresen cocha era? Pues aqꞌueche locꞌoyobꞌ niwijchꞌoctac bꞌan ani cocha jay war alocsiobꞌ tama inteꞌ tzꞌojyir.
909	GEN 31:35	Entonces ojron e Raquel y che: —Tata, ira iqꞌuijna umen que machi anchpa tiaꞌ turen cocha majax imbꞌutz turen era, che e Raquel. Entonces e Labán usicbꞌa tama tunor e otot, pero matucꞌa utajwi.
910	GEN 31:36	Entonces e Jacob qꞌuijna y cay ucꞌaye e Labán cocha era y che: —¿Tucꞌa mabꞌambꞌanir cay inche? Y ¿tucꞌa tuaꞌ que tariox ticapat cocha era taca inteꞌ nuxi qꞌuijnar?
911	GEN 31:37	Pojremetix tama tunor lo que ayan ticabꞌa, y ¿tucꞌa atajwix xeꞌ tabꞌa? Turbꞌan tara tut apiarobꞌ y tut nipiarobꞌ jay ayan lo que atajwix, y jaxirobꞌ tuaꞌ ubꞌijnuobꞌ uwira chi tamar tuaꞌ acꞌaxi e jatzꞌuar.
956	GEN 32:28	Entonces ojron e winic y che: —¿Tucꞌa acꞌabꞌa? che e winic. Y che e Jacob: —Nicꞌabꞌa nen Jacob, che.
957	GEN 32:29	Entonces ojron e winic y che: —Machi ixto tuaꞌ ipejcna que Jacobet, sino que coner acꞌabꞌa tuaꞌ aquetpa Israel xeꞌ war che ‘Tin e uche ubꞌa tuaꞌ ucucru e Dios’, porque cꞌapa ache e tzꞌojyir taca e Dios y taca e winicobꞌ y jax net xeꞌ amanxujresobꞌ, che e winic uyare e Jacob.
958	GEN 32:30	Entonces ojron e Jacob y che: —Y net, ¿tucꞌa acꞌabꞌa? che e Jacob. Pero e winic sutpa ojron y che: —¿Tucꞌa tar war oybꞌi tucꞌa nicꞌabꞌa, cocha warix anata chien nen? che e winic. Entonces e winic uchojbꞌes ut e Jacob yajaꞌ taca.
969	GEN 33:8	Entonces ojron e Esaú y che: —¿Tucꞌa war abꞌijnu ache taca tunor e sian aracꞌobꞌ era xeꞌ inwira conda yopen? che e Esaú uyare e Jacob. Entonces ojron e Jacob y che: —Pues cꞌani inwajqꞌuet tunor era tuaꞌ icꞌotoy itzay awiren, che e Jacob uyare e Esaú.
1004	GEN 34:23	Pero bꞌijnunic cobꞌa axin aquetpa ticabꞌa jay caxin cache bꞌan cocha ucꞌaniobꞌ: Tunor lo que ayan tuobꞌ axin aquetpa ticabꞌa, y tunor uyaracꞌobꞌ axin aquetpa ticabꞌa ubꞌan. Jax taca aquetpa tuaꞌ caware que caquetpa de acuerdo tacarobꞌ tama tunor era, y tuaꞌ aquetpobꞌ tacaron, chenobꞌ e Siquem y utata.
1023	GEN 35:11	Y e Dios che cocha era: “Pues nen jax Adiosiren xeꞌ meyra ayan nicꞌotorer. Y cꞌani inwaret que chꞌijrsen meyra amaxtac tuaꞌ erer axin abꞌoro meyra tunor achꞌajnarir. Tamar achꞌajnarirobꞌ cꞌani alocꞌoy meyra nuquir chinamobꞌ, y ayan tin e tuaꞌ acꞌotoy aquetpa rey ubꞌan.
1052	GEN 36:11	Y uyunenobꞌ e Elifaz jax era: Ayan e Temán y ayan e Omar y ayan e Sefó y ayan e Gatam y ayan e Quenaz.
1053	GEN 36:12	Y e Elifaz ayan inteꞌ uman xeꞌ cꞌotoy quetpa inteꞌ uwixcar xeꞌ ucꞌabꞌa Timná xeꞌ uchꞌijrse inteꞌ uyar y uturbꞌa ucꞌabꞌa Amalec. Pues tunor era jax uchꞌajnarir e Ada xeꞌ jax inteꞌ uwixcar e Esaú.
1056	GEN 36:15	Pues jax era tin xeꞌ cay cꞌotoriobꞌ tujor tin e tuobꞌ uchꞌajnarir e Esaú. Pues tujam uyunenobꞌ e Elifaz xeꞌ yaxar unembꞌir tuaꞌ e Esaú, tin xeꞌ cay cꞌotoriobꞌ jax era: Ayan e Temán y e Omar y e Sefó y e Quenaz.
1063	GEN 36:22	Y e Lotán ayan uyunenobꞌ xeꞌ jax era: Ayan e Horí y ayan e Hemam. Y e Lotán ayan inteꞌ uwijtan xeꞌ ucꞌabꞌa Timná.
1075	GEN 36:34	Y conda chamay e Jobab cay cꞌotori e Husam xeꞌ tuaꞌ uchꞌajnarir e Temán.
1081	GEN 36:40	Pues jax era ucꞌabꞌobꞌ tin e cay cꞌotoriobꞌ xeꞌ chꞌajnarirobꞌ tuaꞌ e Esaú tama inteꞌ inteꞌ familia y tama inteꞌ inteꞌ lugar: Ayan e Timná y ayan e Alva y ayan e Jetet
1083	GEN 36:42	y ayan e Quenaz y ayan e Temán y ayan e Mibsar
1094	GEN 37:10	Y de allí e José ixin uchecsu e wayac era tut utata. Pero utata cay ucꞌaye y che: —¿Tucꞌa cꞌani aware taca e wayac era xeꞌ awira? ¿War ca abꞌijnu que atuꞌ y nen taca tunor awermanobꞌ ucꞌani tuaꞌ cacotuan toit? che utata e José.
1099	GEN 37:15	usati e bꞌir. Y entonces e José tajwina umen inteꞌ winic xeꞌ ubꞌna tuaꞌ y che: —¿Tucꞌa war ixana asajca? che e winic.
1110	GEN 37:26	Entonces ojron e Judá taca upiarobꞌ y che: —¿Tucꞌa tuaꞌ cachꞌami jay cachamse cawijtzꞌin y de allí aquetpato tuaꞌ cabꞌijnu cocha tuaꞌ camuqui uchamer?
1114	GEN 37:30	Y wacchetaca sutpa ixin esto tiaꞌ turobꞌ upiarobꞌ, y uyare y che: —E sitz machix turu. ¿Tucꞌa tuaꞌ cache coner? che e Rubén.
1126	GEN 38:6	Pues conda e Er xeꞌ jax e yaxar sitz cꞌapa chꞌi, e Judá ixin usicbꞌa inteꞌ ijchꞌoc tuaꞌ anujbꞌi tacar xeꞌ ucꞌabꞌa Tamar.
1129	GEN 38:9	Pero cocha e Onán war unata que e maxtac xeꞌ axin acuxpa taca e Tamar machi tuaꞌ aquetpa tuach, sino que axin aquetpa tuaꞌ usacun ani, machi ucꞌani. Y tamar era conda ixin uchꞌami ubꞌa taca uwixcar, uche ubꞌa tuaꞌ machi achecta uyar e ixic umener, cocha machi war ucꞌani tuaꞌ alocꞌoy uchꞌajnarir usacun tamar jaxir.
1131	GEN 38:11	Entonces e Judá uyare uyaribꞌ xeꞌ jax e Tamar y che: —Quiqui esto tuyotot atata y quetpen abꞌajner tama inteꞌ tiempo este que axin aꞌchꞌi niunen xeꞌ jax e Selá, y de allí erer inujbꞌi tacar, che e Judá uyare e Tamar. Pero e Judá machi ixto war ucꞌani tuaꞌ uyacta anujbꞌi e Selá tacar, y tamar era cay uyare e Tamar cocha era umen que war abꞌacta que bꞌajcꞌat axin achamay e Selá bꞌan taca cocha chamayobꞌ usacunobꞌ. Y entonces ixin e Tamar tuaꞌ aturuan tama uyotot utata.
1132	GEN 38:12	Entonces conda numuy cora año chamay uwixcar e Judá xeꞌ ijchꞌoc tuaꞌ e Súa. Y conda sisa cora e cꞌuxner lo que war unumse ubꞌa tama uchamer uwixcar, e Judá ixin esto tama e chinam Timnat tiaꞌ war asujsa utzutzer uyoveja, y ixin ubꞌan e Hirá xeꞌ ajlugar tama e chinam Adulam cocha war atzay uwira ubꞌa taca e Judá.
1133	GEN 38:13	Pero conda cꞌotoy unata e Tamar que upixam ixin esto tama e chinam Timnat tuaꞌ utacre asujsa utzutzer uyoveja,
1134	GEN 38:14	ixin ulocse ubꞌujc xeꞌ jarbꞌir taca e succhij bꞌan ani cocha cay uche e ixictac ixnix conda achamay uviejo inteꞌ ixic, y ubꞌochꞌi ut tacar inteꞌ payuj tuaꞌ machi anatanwa chi jaxir umen tin e turobꞌ yajaꞌ, y de allí ixin turuan tama uyocher e chinam Enaim, xeꞌ turu tama ubꞌirar e chinam Timnat. Y bꞌan uche umen que cꞌotoy unata que e Selá ayix meyra ujabꞌ, pero que upixam merato uche anujbꞌi tacar jaxir.
1138	GEN 38:18	Entonces ojron e Judá y che: —¿Tucꞌa acꞌani tuaꞌ inwajqꞌuet? che e Judá. Y che e ixic: —Ajcꞌunen awanillo xeꞌ ayan acꞌabꞌa tamar xeꞌ chꞌur tama anuc taca e tzꞌojnoc y e bordón lo que qꞌuecher amener, che e ixic. Entonces e Judá uyajcꞌu tunor lo que cꞌajna umener, y de allí ixin chꞌan taca e ixic, y jaxir cuchuan incojt uyar.
1141	GEN 38:21	Entonces cay uyubꞌi tuaꞌ e winicobꞌ tama e lugar yajaꞌ y che: —¿Tiaꞌ turu e ixic xeꞌ unata uchoni ubꞌa xeꞌ ajlugar Enaim xeꞌ turu ani tama utiꞌ e bꞌir? che e Hirá. Entonces ojronobꞌ e winicobꞌ y chenobꞌ: —Pues tama e lugar era matucꞌa e ixictac xeꞌ unatobꞌ uchoni ubꞌobꞌ, chenobꞌ e winicobꞌ era.
1143	GEN 38:23	Entonces ojron e Judá y che: —Pues erer aquetpa taca e ixic tunor lo que inwajcꞌu tama inyajr. Porque jay casutpa coybꞌi tuaꞌ e gente otronyajrto que: ‘¿Tiaꞌ turu e ixic?’ bꞌajcꞌat axin asactzeniobꞌ tamaron. Pero cocha inwebꞌtix ixin incojt bꞌiqꞌuit chivo tuaꞌ ani inwajcꞌu bꞌan cocha quetpa tuaꞌ inche, pues ma cocha más cocha machi atajwi e ixic, che e Judá.
1144	GEN 38:24	Pues conda numuy uxteꞌ mes, cꞌotoy arobꞌna e Judá cocha era y che: —Pues e Tamar xeꞌ jax awaribꞌ machi cay ucojco ubꞌa, y coner war ucojco uyar umen que chꞌajma umen inteꞌ winic, che arobꞌna e Judá. Entonces ojron e Judá y che: —Locsenic patir e chinam y putanic este que achamay, che e Judá taca inteꞌ nuxi nuc.
1145	GEN 38:25	Pero conda war aloqꞌuesna najtir e chinam, e Tamar uyare tuaꞌ arobꞌna upixam cocha era y che: “Pues uwinquir tunor lo que qꞌuecher nimener era jax tuaꞌ e winic xeꞌ uchien inquetpa inwawan conda uchꞌamien. Chꞌujcun awira chi tuaꞌ e anillo era xeꞌ ayan e tzꞌojnoc tamar, y chꞌujcun awira chi tuaꞌ e bordón era”, che e Tamar.
1146	GEN 38:26	Y conda e Judá uwira tunor era ojron y che: “Pues e ixic era war uche lo que imbꞌutz, y jax nen xeꞌ ixien inche e mabꞌambꞌanir tacar cocha machi inche bꞌan cocha aquetpa ani tuaꞌ inche cocha machi inche anujbꞌi taca e Selá xeꞌ jax niunen xeꞌ cumix”, che e Judá. Y tamar era uyare tuaꞌ machi achamesna. Pero mix tiaꞌ sutpa uchꞌami ubꞌa taca e Tamar otronyajr.
1147	GEN 38:27	Pues conda cuxpa uyar e Tamar, uwira que cuach uchꞌurcabꞌ.