13944	PSA 1:1	DICHOSO y taotao, ni ti mamomocat gui pinagat y manaelaye, ni y ti sumasaga gui chalan manisao, ni y ti matatachong gui siyan ayo sija y manmanmofefea.
13945	PSA 1:2	Lao guiya lay Jeova, ayo y minagofña, ya y layña jajaso, jaane yan puenge.
13946	PSA 1:3	Ya taegüijeja y trongcon jayo ni y matanme gui oriyan sadog, ya guaja tinegchaña gui tiempoña, ya y jagonña ti umalayo; ya todo y finatinasña mumemegae.
13947	PSA 1:4	Lao ti taegüine y manaelaye; lao parejo yan y paja ni y güinaefe ni y manglo.
13948	PSA 1:5	Sa enao na ti mangajujulo y manaelaye gui sentensia; ni y manisao gui y inetnon manunas.
13949	PSA 1:6	Sa si Jeova jatungo y chalan manunas: lao y chalan manaelaye ufanmalingo.
13950	PSA 2:1	SA jafa na manlalalo y nasion sija, ya y taotao sija manmanjaso y banida?
13951	PSA 2:2	Manotojgue y ray sija gui tano, ya y prinsipe sija manafaesen entalo sija contra si Jeova, yan contra y pinalaeña, ilegñija:
13952	PSA 2:3	Nita yulang y guinideña, ya nasuja guiya jita y godeña.
13953	PSA 2:4	Ya y sumasaga gui langet uchumachaleg: ya y Señot jamofefea sija.
13954	PSA 2:5	Ayo nae cumuentos yan sija yan y linalaloña: ya y binibuña ninafañatsaga sija.