23246	MAT 2:8	Cuanta u yubi aj Herodes ca' jini, u täsqui bixicob tä Belén. U yälbijob ca'da: ―Corre cuxla tä Belén y sacänla jini ch'oc ixta que mach a pojlenla. Cuanta pojlilaba, tiquet a wälbenonla uc'a xicon no'on täcä cä ch'u'ul c'ajti'in.
23276	MAT 3:15	Aj Jesúsba u p'albi ca'da: ―Äctan c'ablacon bada, uc'a c'änä chich cä chenla upete lo que Dios yo utic. De ya'i mach u ni' äli cua' aj Juan. U c'ablesi chich.
23278	MAT 3:17	De ya'i ubqui ump'e t'an que ya' ti tä cielo, que u yäle' ca'da: ―Jinda une ni cä yajben Ajlo'. Tä' u ch'a'alesan cäjin.
23281	MAT 4:3	C'oti bajca an aj Jesús jini machca u yoli u yäc'ben u säte' t'oc Diosba, u yälben ca'da: ―Si totoj u yajlo'et Dios, älben ni ji'tunobda que sujlec de waj.
23284	MAT 4:6	U yälbi ca'da: ―Si totoj u yajlo'et Diosba, julu aba tä cab. Uc'a tz'ibi chich ayan ca'da: U xe u yäc'ben u ángelojob u cänäntanet. T'oc u c'äb u xe u ch'uye'et uc'a mach a jätz'e' a woc t'oc ji'tun.
23287	MAT 4:9	U yälbi ca'da: ―Upete ni jini que mu' a chänenba cä xe cä'benet ta' c'äb tuba a chen manda si a noctä täc pänte' a ch'u'ul c'ajti'inon.
23306	MAT 5:3	―Ayan ump'e u ch'a'aljinob machcatac yuwi tan u pixan cache' mach u che vale cua' tu jut Dios, uc'a tubajob chich bajca u chen manda ni Dios ya'an tä cieloba.
23417	MAT 8:3	Aj Jesús u t'äbsi u c'äb, u täli y u yälbi ca'da: ―Co chich. Pasic jini yaj ta' pächi. Jinchichba rato säti tuyac'o ni yaj jini de c'unen pächile.
23424	MAT 8:10	Jinq'uin u yubi aj Jesús ca' jini, tajch'icwäni u jut. De ya'i u yälbijob ca'da machcatac u te tu patba: ―Totojtoj cälbenetla, mach to bay cä chäne niuntu winic que u totoj tz'onän ca' u tz'onän uneba, pero niuntu de aj Israelob mach'an ca' jini.
23427	MAT 8:13	De ya'i aj Jesús u yälbi ni ajmanda ta cien soldado ca'da: ―Corre cux ta' wotot. Ca' chich a tz'onän ane, che' chich u xe tä ute. Jinchichba rato jini u yajpatan u yäq'ui uba.
23445	MAT 8:31	Ni tzuc pixanob u bon c'atbi aj Jesús ca'da: ―Si a xe a pa'senon t'ocob tuyac'o ni winicobdaba, äc'benon ochicon t'ocob tuyac'o ni u noj tomtä chitam ya'an nantiba.
23446	MAT 8:32	Une u yälbi ca'da: ―Cuxla jiq'uin. Unejob pasi tuyac'o ni winicob, bixijob tuyac'o u noj tomtä chitam. Tajtzäc ni u tomtä chitamob jini t'oc noj ancäre laj bixijob bajca isqui cab tu ti' nab, y u laj juli ubajob tä ja'. Upete laj chämijob tan nab.
23460	MAT 9:12	Jinq'uin u yubi aj Jesús ca' jini, u yälbijob ca'da: ―Machcatac t'oc u yutzi, mach c'änä uc'ajob ajtz'ac. Sec' jini machcatac c'ojojtacobba, unejob c'änä uc'ajob ajtz'ac.
23466	MAT 9:18	Aj Jesús mu'to u t'an t'oc ni gente, c'oti untu ajnoja taj judíosob, nocwäni tu pänte' u yälben ca'da: ―Quixic ch'oc atotaj chämi. La'ix ane, äc'ben a c'äb tu pam, y u xe chich tä cuxpan.
23476	MAT 9:28	Jinq'uin ochi aj Jesús tama ump'e otot, c'otijob ni ajchoc' bajca an. Aj Jesús u yälbijob ca'da: ―¿A tz'onänla quira cache' cä chen trebe cä tz'äcälinetla? Unejob u p'alijob: ―A chen chich trebe a tz'äcälinon t'ocob ane, Cajnoja.
23478	MAT 9:30	Jini ajchoc' seb u laj jäbi uba u jutob y u chi chanäjob. Aj Jesús u c'alin älbijob ca'da: ―Iranla que mach xic yuwina'tan niuntu cache' cä tz'äcäletla.
23481	MAT 9:33	Cuanta u pa'säbi aj Jesús ni tzuc pixan tuyac'o ni a'uma', cayi u chen t'an. Ni gentejob que ya'an u chänenobba, tajch'icwäni u jutob, u yäle'ob ca'da: ―Mach bay cä chänila utic cua' chichca ca' jini tä Israel.
23482	MAT 9:34	Aj fariseojobba u yäle'ob ca'da: ―Ajnoja tuba tzuc pixanob u yäc'ben u poder u pa'sen tzuc pixan.
23491	MAT 10:5	Jindajob une ni doce u täsqui aj Jesús. U yälbijob cache'da u xe u chen. U yälbijob ca'da: ―Mach a ch'e'la ni bij que u bixe tu cab aj gentilob. Mach ochiquetla täcä tama u cab aj samaritanojob.
23532	MAT 11:4	Aj Jesús u p'albijob y u yälbi ca'da: ―Cuxla ca'an aj Juan, tz'aycäbenla cua' mu' a ubinla y cua' mu' a chänenla.
23553	MAT 11:25	De ya'i aj Jesús u chi c'änti'ya ca'da: ―Cä ch'u'ul c'ajti'inet cä Pap, Ajnojalet tuba cielo y u pancab. Mach a'bi ochic tu c'ajalinob cä t'an y cua'tac cä chen ni winicob que u yäle'ob que q'uen u c'ajalinobba, jini tä' yuwijob chich q'uen cua' chichcaba. A wäc'bi yuwina'tanob jini ca' a wälä bijch'ocobba.
23555	MAT 11:27	De ya'i u yäli aj Jesús ca'da: ―Upete cua' chichca cä Pap u laj äc'bon täj c'äb. Niuntu mach u nonoj chon conoce, sec' cä Pap. Niuntu mach u nonoj che conoce cä Pap, sec' no'on uc'a u Yajlo'on. Upete machca chichca co cä ye'ben cache'da an cä Pap, u xe chich u nonoj chen conoce täcä.
23560	MAT 12:2	Jinq'uin u chäni aj fariseojob cua' mu' u chenob, u yälbijob aj Jesús ca'da: ―Iran cache' mu' u chenob a wajcänt'an. Jini que mu' u chenobba, mach utz utic tu q'uin ch'ämbäji.
23568	MAT 12:10	Ajni ya'i untu winic tiquin untz'it u c'äb. Aj fariseojob u c'atbijob aj Jesús ca'da: ―¿Utz quira tz'äcälcac untu winic tu q'uin ch'ämbäji? ―U c'atbijob ca'da uc'a u jiranob si ajnic cache'da u sube'ob.
23569	MAT 12:11	Aj Jesús u p'albijob ca'da: ―Caba winic de anela que u cänäntan untu yoc oveja si yälic tama ch'en tu q'uini ch'ämbäji, ¿mach quira uxin u pa'sen jinchichba q'uin?
23582	MAT 12:24	Aj fariseojobba, jinq'uin u yubijob ca' jini, u yälijob ca'da: ―Jindaba mach t'oc u poder Dios u pa'sen tzuc pixanob. U pa'sen t'oc u poder aj Beelzebú, ni ajnoja tuba tzuc pixanobba.
23597	MAT 12:39	Aj Jesús u p'ali, u yälbijob ca'da: ―Machcatac pancab tä' malojob, que mach u ni' tz'ombejob u t'an ni mero Diosba, tä' yojob u chänen ump'e milagro. Mach uxin tä äc'binte u chänen niump'e cua' jini u c'atänob uneba. Ni u xe tä äc'binte u chänenba, sec' jini ca' u chi pasa aj Jonás ajt'an ta Diosba.
23619	MAT 13:11	Aj Jesús u p'ali u yälbijob ca'da: ―Anelaba a'bintet a wina'tanla jini que mach uyut entende ajniba, cache'da u xe u nonoj chen manda ni Dios tä cieloba bajca anetla. Unejobba mach äc'binti yuwina'tanob.
23632	MAT 13:24	De ya'i aj Jesús u yälbijob otro tz'aji ca'da: ―U manda ni Dios ya'an tä cieloba es ca' untu winic u päq'ui u jut u päc'äbi utzba tan u cab.
23639	MAT 13:31	U yälbijob tä cha'num otro ump'e tz'aji ca'da: ―U manda Dios bajca anonla pancab es ca' unxim yoc bec' mostaza, que u ch'e' untu winic tuba u päq'ue' tan u cab.
23641	MAT 13:33	Otro ump'e tz'aji u yälbijob tä cha'num ca'da: ―U manda ni Dios ya'an tä cieloba es ca' jini u yä'can tan waj tuba u yäc'ben jusicba. Jinq'uin untu ixic u ch'e' tz'ita' u yäq'ue' tama uxp'e noj t'ub de harina, de ya'i u laj xabän uba t'oc y u jusesan.
23644	MAT 13:36	Jinq'uin aj Jesús u laj täsqui ni gentejob bixic, ochi une tan otot. U yajcänt'anob u natz'ijob, u yälben ca'da: ―Älbenon t'ocob cache'da ni bäläb tz'aji tuba ni tzuc bänäla pä'qui tan trigoba.
23645	MAT 13:37	Aj Jesús u p'albijob ca'da: ―Machca u päq'ue' ni trigoba, no'on une que sutwänon de winic.
23660	MAT 13:52	Aj Jesús u yälbijob ca'da: ―Utz chich, uc'a upete machcatac yuwi ni ley taj Moisés, y bada u cäne' cache'da an u manda ni Dios ya'an tä cieloba, es ca' untu winic ajnoja tuba ump'e otot que mäx utz upete lo que u cänäntanba. Une u ch'e' u yäc'ben u lot cua' chichca u cänäntan tzijib o jelem.
23665	MAT 13:57	Mach u ni' olijob u yubinob u t'an. Aj Jesúsba u yälbijob ca'da: ―Untu ajt'an ta Dios sec' tan yotot y tan u cab mach totoj yo u yubinob u t'an.
23668	MAT 14:2	U yälbi u yajpatanob ca'da: ―Jini winic jini aj Juan ajc'ablesia une, acuxpi tan ajchäme. Jin uc'a ya'an poder tuyac'o tuba u chen ca' jini.
23670	MAT 14:4	Uc'a aj Juanba xi u yälben aj Herodes ca'da: ―Mach utz a ch'ämben u jit'oc a witz'in tuba a wit'oc.
23681	MAT 14:15	A'ochi q'uin, u yajcänt'anob aj Jesús u natz'i u yälben ca'da: ―Bajca anonlaba mach nätz'ä ayan otote, y atarde'i bada. Täscun jiq'uin ni noj q'uenel gente bixicob ixta bajcatac an bit caj tuba u mäne'ob cua' u c'uxe'.
23683	MAT 14:17	Unejob u p'albijob ca'da: ―Mach cä cänänta t'ocob cua' wida, sec' cinco waj y cha'tu yoc buch'.
23684	MAT 14:18	Aj Jesús u yälbijob ca'da: ―Täsbenonla wida ni waj y ni buch'.
23692	MAT 14:26	U yajcänt'anob, jinq'uin u chänijob cache' ya' u te untu tä xämba tu pan ja', c'ac'a' bäc'tijob. U yäle'ob ca'da: ―¡No' ajbäc'tesia ni jini! ―U chijob noj awät de bac'ät.
23699	MAT 14:33	De ya'i upete machca u bixe tama ni jucub jini u täq'ui u ch'u'ul c'ajti'inob, u yälbenob ca'da: ―Totojtoj chich, aneba u Yajlo'et chich Dios.
23715	MAT 15:13	Aj Jesús u p'albijob ca'da: ―Upete päc'äbi que mach u päq'ui ni cä Pap ya'an tä cieloba, u xe chich tä laj bojcan une.
23717	MAT 15:15	De ya'i u p'ali aj Pedro, u yälbi aj Jesús ca'da: ―Chectesbenon t'ocob ni a wäli de cua' tä c'uxcanba.
23718	MAT 15:16	Aj Jesús u yälbijob: ―Anela täcä, ¿mach quira u totoj och ta' c'ajalinla?
23725	MAT 15:23	Pero aj Jesús mach u p'albi ni tz'ita'. De ya'i u natz'i u yajcänt'anob u yälbijob ca'da: ―Chen ca' chich u c'atän ni ixic jini y täscun bixic uc'a mach ni' tic tä t'an täc patla.
23726	MAT 15:24	Aj Jesús u yäli ca'da: ―Atäsquinton cä täclenob sec' aj Israelob, jini ca' a wälä oveja asätijobba.
23728	MAT 15:26	U p'ali aj Jesús, u yälbi ca'da: ―Mach utz ch'ämcac ni waj tuba u bijch'oc untu y julbintic wichu'.
23729	MAT 15:27	Jini ixic u p'ali ca'da: ―Toj chich une Cajnoja. Pero ni wichu' täcäba u c'uxe' chich ni u xixoma waj que u yälo yaba mesa bajca an u yum tä c'uxnan.
23748	MAT 16:7	U yajcänt'anob aj Jesús cayi u maläc äle'ob tan u c'ajalinob ca'da: ―Jini t'andaba u yäle' uc'a anajyi cäc'ala cä täsenla caxtran waj.
23755	MAT 16:14	Unejob u yälbijob ca'da: ―U yäle'ob cache' aj Juan ajc'ablesialet. Otrosjob u yäle' cache' aj Elíaset. Otrosjob u yäle' cache' aj Jeremíaset, o algún otro ajt'an ta Dios.
23756	MAT 16:15	De ya'i aj Jesús u c'atbijob tä cha'num ca'da: ―Y anelaba, ¿caxcajon a wäle'la?
23757	MAT 16:16	U p'ali aj Simón Pedro u yälbi ca'da: ―Aneba aj Cristojet, u Yajlo'et ni Dios cuxuba.
23764	MAT 16:23	Aj Jesúsba u suti uba, u yälben aj Pedro ca'da: ―Pasen bajca anon, Satanás. Ane a wo a ch'acbenon cä biji, uc'a ane mach a wäc'ä ta' c'ajalin jini yo Dios uticba. Aneba a wäq'ue' ta' c'ajalin jini yo winicob pancab uticba.
23765	MAT 16:24	De ya'i aj Jesús u yälbi u yajcänt'anob ca'da: ―Machca chichca yo ochic de cajcänt'anba, c'änä u yäctan u chen uba manda u juntuma. C'änä u c'älen cua' chichca tz'ibajtesia ca' chich cä c'älen no'on y u tzäypätinon.
23774	MAT 17:5	Mu'to u t'an aj Pedroba, tutz'i ump'e noj bucla tä cielo, tajc'äntz'alan, u bälijob u yuxtumajob. Jinchichba rato jini ump'e t'an ubqui tama ni bucla jini, u yäle' ca'da: ―Jinda cä Yajben Ajlo'. T'oc une ayan cä ch'a'aljin. Ubinla u t'an une.
23778	MAT 17:9	Jinq'uin jaque u chenob tu pam ni noj tz'ic jini, aj Jesús u yälbijob ca'da: ―Mach to a wälbenla niuntu ni a chänilaba ixta que cuxpacon tan ajchämejob, no'on que sutwänon de winic.
23780	MAT 17:11	Aj Jesús u p'albijob ca'da: ―Toj chich, ni jun ta Dios u yäle' cache' aj Elías u xe tä te najtäcä y u xe u laj äq'ue' tu toja upete cua' chichca.
23794	MAT 17:25	Aj Pedro u yäli: ―U toje' chich une. Ochi tama ni otot bajca an aj Jesús. Mach to u yälbe cua' jinq'uin aj Jesús u yälbi ca'da: ―¿Cache' a wäle' ane, Simón? Ajmandajob pancab, ¿caxcatac u yäc'ben u toje' ni taq'uin que u ch'uch'inte tuba gobiernoba? ¿U ch'ocob quira o ni mach jin u ch'ocobba?
23795	MAT 17:26	Aj Pedro u p'albi ca'da: ―Ni u yäc'ben u toje'ba, jin une ni mach jin u ch'ocobba. Aj Jesús u yälbi ca'da: ―Ca' jiniba, mach u yäc'binti u toje' cua' ni u ch'ocobba.
23799	MAT 18:3	U yälbijob ca'da: ―Totojtoj cälbenetla, si mach a q'uexe a c'ajalinla tuba mach a ni' chen a tanäla, y si mach sujlequetla ca' bijch'oc, mach uxet tä ochela bajca u chen manda ni Dios ya'an tä cieloba.
23818	MAT 18:22	Aj Jesús u yälbi ca'da: ―Mach cälbet que a chen perdona siete vez. C'änä a chen perdona ixta setenta veces siete.
23841	MAT 19:10	U yajcänt'anob aj Jesús u yälbijob ca'da: ―Si ca' jini ayanob jini machca u lotojanba, mejorica mach lotojac untu.
23842	MAT 19:11	Aj Jesús u yälbijob ca'da: ―Pero mach upete u chen trebe ajnic sin que lotojac, seq'uen jini machcatac Dios u yaqui tuba ajnic ca' jini.
23845	MAT 19:14	Aj Jesúsba u yäli ca'da: ―Äctanla tic ni bijch'oc bajca anon. Mach a ch'acbenla u biji, uc'a ca' jinijob une ni ya'an bajca u chen manda ni Dios ya'an tä cieloba.
23849	MAT 19:18	Une u yäli: ―¿Catac anba? Aj Jesús u yälbi: ―Mach a chen tzämsa. Mach a sacän a tz'ijte'. Mach a chen xuch'. Mach a sube' a lot t'oc jop'ojti'.
23851	MAT 19:20	Jini ch'oc winic u yälbi ca'da: ―Upete ni jini cä chen chich ca' u yäle', desde p'i'on to. ¿Caxcamba jiq'uin u chen falta ta cä chen?
23852	MAT 19:21	Aj Jesús u yälbi ca'da: ―Si a wo c'alin ajniquet tu toja, corre chono upete lo que a cänäntan, y laj pucben pobrejilba u taq'uini. De ya'i tiquet a tzäypätinon. Ca' jini a xe a cänäntan q'uen cua' chichca tä' choj u valor tä cielo.
23854	MAT 19:23	De ya'i aj Jesús u yälbi u yajcänt'anob ca'da: ―Totojtoj cälbenetla cache' untu ajtaq'uini mach u se'en pojle bij tuba ochic bajca u chen manda ni Dios ya'an tä cieloba.
23857	MAT 19:26	Aj Jesús u chämben u jut u yajcänt'anob, u yälbenob ca'da: ―Winicba mach u che trebe u japän uba. Pero Diosba u chen trebe u japänonla, uc'a uneba mach'an niump'e cua' que mach u chen trebe u chen.
23859	MAT 19:28	Aj Jesús u yälbijob ca'da: ―Totojtoj cälbenetla cache' jinq'uin Dios u xe u tzijibesan u pancab, jinq'uin no'on que sutwänon de winicba cä xe tä chumtä pan ni chumlib bajca cä xe cä chen manda t'oc cä poder, anela täcä a xe tä chumtäla bajca an jini doce chumlib tuba xiquetla de ajmanda taj Israel, uc'a a wiranla si u chi tu tojajob ni doce grupo de u ch'ocob aj Israelob. Jin une ni a xe tä äc'bintela uc'a a wäctila upete tuba a tzäypätinonla.
23882	MAT 20:21	Une u yälbi: ―¿Cua' a wo? Ni ixic u yäli ca'da: ―Co que a'ben ni cä ch'ocobda chunwänicob ta' ch'ejpa bajca a xe de ajmanda, untu ta' noj y untu ta' tz'ej.
23883	MAT 20:22	Aj Jesús u p'ali ca'da: ―Mach a wi cua' a c'atän. ¿U ch'e' quira a c'älenla tz'ibajtesia ca' chich no'on cä c'älen, ca' a wälä a wuch'enla jini cä xe cuch'en no'on, y ca' a wälä c'ablaquetla ca' chich cä xe tä c'ablan no'on? Unejob u yäli: ―U ch'e' chich cä c'älen t'ocob.
23884	MAT 20:23	Aj Jesús u yälbijob: ―A xe chich a ch'e'la ni tz'ibajtesia que cä ch'e' no'on, ca' a wälä a wuch'enla ni cä xe cuch'en no'onba y ca' a wälä a c'ablanla ca' chich cä xe tä c'ablan no'on. Pero tuba cälbenetla chunwäniquetla täc noj y täc tz'ej, mach no'on une cä xe cäle' caxca une u xe tä chumtä ya' jini. Cä Pap une u xe u yäle', uc'a ya' chich an tu c'ajalin caxca une u xe tä chumtä ya' jini.
23886	MAT 20:25	Aj Jesús u joq'uíjob, u yälbijob ca'da: ―A wila chich cache' untu ajmanda tama ump'e noj cab, tu manda chich ayan upete gente. Nuc ajt'äbälajobba ayan chich u poder tuba u cocoj äc'ben ni gente u tz'omben u t'an.
23897	MAT 21:2	u yälbijob ca'da: ―Cuxla tama jini caj nätz'äba. Ya'i a xe a pojlenla untu na' tzimim cächä ayan, t'oc untu ch'oc tzimim. P'änäla, y täsbenonla u cha'tumajob wida.
23906	MAT 21:11	Ni gente u bixe nämte' t'oc aj Jesúsba u yälijob ca'da: ―Jinda ni aj Jesús, ajt'an ta Diosba, ya' u cäji tä Nazaret, tama noj cab tä Galileaba.
23914	MAT 21:19	U chäni untec te' higo nätz'ä tu ch'ejpa bij. Bixi bajca an. Mach u pojli niump'e u jut, seq'uen u yopo namás. U yälbi ca'da: ―Aneba mach bay uni' xin tä ajtä a jut. Jinchichba hora jini, nonoj tiqui ni te' higo.
23916	MAT 21:21	U p'ali aj Jesús, u yälbijob ca'da: ―Totojtoj cälbenetla, si a totoj tz'onänla y mach ajnic niump'e cua' ta' c'ajalinla que u yäle' que mach u che trebe u chen Dios lo que a c'atänla, machica a chela sec' ni acä chi no'on t'oc te' higoba. Pero si a wälbenla ni noj tz'icda: “Pasen wida y julu aba tan nab”, che' chich u chen.
23920	MAT 21:25	Jini c'ablesia que u chen aj Juanba, ¿caxca une u yäc'bi u chen? ¿Dios quira o winicob pancab? Unejob ti tu c'ajalinob u maläc äle'ob ca'da: ―Si cälbenla cache' Dios u yäc'bi u chen, une u xe u yälbenonla ca'da: “¿Cua' uc'a jiq'uin mach a tz'ombila?”
23922	MAT 21:27	Jin uc'a unejob u yälbijob aj Jesús ca'da: ―Mach cuwi t'ocob. Aj Jesús u p'ali täcä ca'da: ―Ni no'on täcä, mach cälbetla caxca t'oc u poder cä chen upete jinda.
23926	MAT 21:31	¿Caxcamba de ni cha'tu ajlo' jini u chi ca' chich u yoli u pap u chen? Unejob u yäli: ―Ni ajnojaba. Aj Jesús u yälbijob ca'da: ―Totojtoj cälbenetla cache' ajcojtaq'uinob y jini ixictacob u nume u sacän u tz'ijte'obba más u xe u ch'e' ochicob bajca u chen manda ni Dios ya'an tä cieloba, y mach anela.
23936	MAT 21:41	U yajnojajob pale y noxibilbajob u p'alijob ca'da: ―Jini ajpatanob malojobba u xe u laj tzämsen sin que u ch'ämben yajin, y u xe u yäc'ben tu c'äbob otros ajpatan ni u caba päc'äbi, jini machcatac u xe chich u yäc'ben u jut ni päc'äbi u yum tu xe u chen u jutba.
23937	MAT 21:42	De ya'i aj Jesús u yälbijob ca'da: ―Mach to quira bay a tziquila ni jun ta Dios tz'ibiba, ni u yäle' ca'daba: Ni ji'tun u yälijob ajcheraj otot cache' mach utzba, jin une ni ch'ämqui tuba mero u ch'ixma otot. Ajnoja chich u chi ni jini, tä' utz tä chäninte.
23943	MAT 22:2	―Jini bajca u chen manda ni Dios ya'an tä cieloba, u c'ote t'oc ca' untu ajnoja pancab jinq'uin u chen ump'e q'uin ch'uje tuba u lotojesan u yajlo'.
23959	MAT 22:18	Aj Jesúsba yuwi chich cua' an tan u c'ajalinob, u yälbijob ca'da: ―Anela ajsusuccheriajetla, ¿cua' uc'a a sacänla cache' a'benonla cä säte'?
23962	MAT 22:21	Unejob u yäli: ―Taj César. Aj Jesús u yälbijob: ―Äc'ben aj César lo que es tuba aj César. Äc'ben Dios lo que es tuba Dios.
23970	MAT 22:29	Aj Jesús u p'ali, u yälbijob ca'da: ―Sutu a chen entendela, uc'a anela mach totoj a wila ni jun tz'ibi ta Diosba, y cache'da an u poder ni Dios.
23983	MAT 22:42	―¿Cache'da a wäle'la ane, caxca une naj Cristo jini u yaqui Dios tuba ajnojaba? ¿Caxca u yajlo'? Aj fariseojob u p'ali ca'da: ―U yajlo' aj David une.
23989	MAT 23:2	―Jini que tä' yuwijob ni ley taj Moisésba y aj fariseojob nämä tä paq'uin chumtä bajca u ye'e' ni u t'an Dios u tz'ibi aj Moisésba.
24029	MAT 24:3	Jinq'uin ya' chumca tu pam ni noj tz'ic u c'aba' Olivasba, u natz'i u yajcänt'anob u c'atbenob u juntuma ca'da: ―Älbenon t'ocob, ¿caxca q'uin u xe u chen pasa ni a wäliba? ¿Cua' jini u xe tä chäncan uc'a wina'tintic cache' ya' a te, y cache' atz'äcti q'uin tuba xupic u pancab?
24030	MAT 24:4	Aj Jesús u p'ali, u yälbijob ca'da: ―Iranla jiq'uin, mach me'ixto ajnic machca u sucpecänetla.
24041	MAT 24:15	’A xe a chänenla u yute cua' chichca mach utz tama ni ch'u'ul otot ixta u yäq'ue'ob cua' chichca tuba ch'u'ul c'ajti'cac en lugar de Dios, jini que mach yo Dios u chänenba. Jin une ni u yäli aj Daniel, ajt'an ta Dios oniba cache' u xe u chen pasa ―machca u tzique', c'änä u chen entende―.
24090	MAT 25:13	De ya'i aj Jesús u yälbijob ca'da: ―Wäybetanla jiq'uin, uc'a anela mach a wila camba q'uin ni cua' hora cä xe tä sujtä, no'on que sutwänon de winic.
24125	MAT 26:2	―A wila chich cache' chabi u tä'can ni q'uin ch'uje ta paxcu', y no'on que sutwänon de winicba cä xe tä äc'can tä c'äbä tuba äc'cacon tä cruz.
24128	MAT 26:5	U yälijob täcä: ―Mach yo cä q'ueche'la tama ni noj q'uin ch'ujeba, uc'a mach xic u jobän uba ni caj.
24141	MAT 26:18	Uneba u yäli ca'da: ―Cuxla tan caj tu yotot untu winic, y älbenla ca'da: “Ni Maestro u yäle' ca'da: Tz'ita' yo ta tz'äctac ni q'uin tuba tzämsinticon. Ta' wotot cä xe cä c'uxe' ni cua' tä c'uxcan ta paxcu' t'oc cajcänt'anob”.
24144	MAT 26:21	Mu'to u c'uxnanobba, u yäli ca'da: ―Totojtoj cälbenetla, untu de anela u xe u yäq'ue'on tä c'äbä.
24146	MAT 26:23	Aj Jesús u p'ali ca'da: ―Jini nämte' u jup'e' u c'äb t'oc no'on tan platoba, une ni u xe u yäq'ue'on tä c'äbä.
24148	MAT 26:25	De ya'i aj Judas jini que u xe chich u yäq'ue' tä c'äbäba, u yäli ca'da: ―¿No'on wäreca, Maestro? Aj Jesús u yälbi: ―Ane chich a totoj äli.