26	GEN 1:26	Mürin, Kot a apasa, “Sipwe föri aramas mi wewe ngenikich pwe repwe nemeni ekewe ikenen leset me ekewe mansüsü me ekewe man meinisin won unusen fanüfan.”
35	GEN 2:4	Iei uruwon mine a fis, lupwen Kot a föri läng me fanüfan. Lon ewe rän, lupwen Kot ewe Samol mi Lapalap a föri fanüfan me läng,
36	GEN 2:5	esamwo wor iräkis me fetil mi mär seni lon ewe pwül, pun Kot ewe Samol mi Lapalap esamwo apüngätiu üt, esamwo pwal wor eman aramas mi föri angangen tanipi.
38	GEN 2:7	Mürin, Kot ewe Samol mi Lapalap a föri eman aramas seni pwülün fanü o wussalong lon pwötün enienin ngasangasen manau. Iei usun manau a tori ewe aramas.
40	GEN 2:9	Iwe, seni lon ewe pwül Kot ewe Samol mi Lapalap a amärätä sokun irä meinisin mi apwapwai aramas le katol o mürina le mongö. Nge lukalapen ewe tanipi a amärätä ewe irän manau, pwal ewe irän silei öch me ngau.
46	GEN 2:15	Mürin, Kot ewe Samol mi Lapalap a alenia ewe aramas lon ewe tanipi Eten pwe epwe tanipini o tümwünü.
47	GEN 2:16	Iwe, Kot ewe Samol mi Lapalap a allük ngeni ewe aramas, “Ka tongeni mongö seni irän ei tanipi meinisin,
49	GEN 2:18	Mürin, Kot ewe Samol mi Lapalap a pwal apasa, “Esap öch pwe ewe aramas epwe chök eman. Üpwe föri eman alisian mi wewe ngeni.”
50	GEN 2:19	Iwe, Kot ewe Samol mi Lapalap a föri seni pwül sokun mönün lemäl, pwal sokun mansüsü meinisin. Mürin a uweereto ren ewe aramas, pun a mochen silei met epwe aita ngeniir. Nge mine ewe aramas epwe aita ngeni ekewe mönümanu, iei repwe iteni.
52	GEN 2:21	Iei mine Kot ewe Samol mi Lapalap a apüngätiu och möürüchou won ewe aramas. Iwe, lupwen an möür Kot a angeawu efoch chürärän o apacha ngeni fituk lemon ewe kinas.
53	GEN 2:22	Nge seni chürärän ewe aramas Kot ewe Samol mi Lapalap a föri eman fefin o uwato ren.
57	GEN 3:1	Iwe, ewe serepenit a tipachemsolä seni ekewe man meinisin Kot ewe Samol mi Lapalap a föriir. Iwe, a aisini ewe fefin, “Ifa usun, Kot a wesewesen apasa pwe ousap fokun mongö seni ekewe irän ei tanipi?”
64	GEN 3:8	Iwe, lekuniol, lupwen fansoun patapat, ewe mwän me pwülüan we ra rong pwe Kot ewe Samol mi Lapalap a fetal lon ewe tanipi. Iwe, ra op seni lein irän ewe tanipi.
65	GEN 3:9	Nge Kot ewe Samol mi Lapalap a köri ewe mwän o aisini, “Ia ka nom ie?”
69	GEN 3:13	Mürin, Kot ewe Samol mi Lapalap a aisini ewe fefin, “Pwota ka föri ei sokun?” Nge ewe fefin a pälüeni, “Ewe serepenit a atupuei, iei mine üa mongö.”
70	GEN 3:14	Iwe, Kot ewe Samol mi Lapalap a üreni ewe serepenit, “Pokiten om föri ei, en kopwe anümamau me lein ekewe manfesir me manmwacho meinisin. Kopwe tö won upwom o eni pwül lon ränin manauom meinisin.
77	GEN 3:21	Nge Kot ewe Samol mi Lapalap a föri üf seni ünüchen man o aüföüfa ngeni Atam me pwülüan we.
78	GEN 3:22	Mürin, Kot ewe Samol mi Lapalap a apasa, “Iei a fis pwe ewe aramas a wewe ngenikich, pun a silei öch me ngau. Nge esap tufich, pwe epwe pwal aitiela pöün o angei seni uän ewe irän manau o mongö pwe epwe manau tori feilfeilachök.”
79	GEN 3:23	Iei popun Kot ewe Samol mi Lapalap a asüela ewe aramas seni ewe tanipi Eten, pwe epwe tuw ewe pwül a för seni.
81	GEN 4:1	Iwe, Atam a kon ren Efa pwülüan we, nge neminewe a pwopwo. Iwe, lupwen a nöüni Kain, Efa a apasa, “Üa nöüni eman ät ren än ewe Samol mi Lapalap alilis.”
83	GEN 4:3	Iwe, ekoch fansoun mürin a fis pwe Kain a eäni asor uän irä seni lon tanipin ngeni ewe Samol mi Lapalap.
84	GEN 4:4	Nge Epel a eäni asor mwänichien folenian sip pwal seni kirisir. Iwe, ewe Samol mi Lapalap a efich Epel me an asor,
86	GEN 4:6	Mürin, ewe Samol mi Lapalap a aisini Kain, “Pwota ka chou, nge met ka wowongau ren?
88	GEN 4:8	Iwe, Kain a kapas ngeni Epel pwin we, “Sipwe feila lemäl.” Nge lupwen ar nonomfengen ikenan, Kain a ü ngeni pwin, a turufi o niela.
89	GEN 4:9	Mürin, ewe Samol mi Lapalap a aisini Kain, “Ifa i pwiüm we Epel?” Nge Kain a pälüeni, “Üsap silei. Ifa usun, ngang chon tümwünün pwii?”
90	GEN 4:10	Nge ewe Samol mi Lapalap a üreni, “Met ka föri? Chan pwiüm we a köriei seni won pwül.
93	GEN 4:13	Iwe, Kain a üreni ewe Samol mi Lapalap, “A kon watte liwinin ai tipis. Esap ki ngeniei ai üpwe uwei.
95	GEN 4:15	Nge ewe Samol mi Lapalap a üreni, “Apwi! Iö epwe niikela, epwe angei chappan fän fisu.” Iwe, ewe Samol mi Lapalap a föri eu asisil won Kain pwe are eman epwe küna, esap niela.
96	GEN 4:16	Mürin, Kain a feil seni fän mesen ewe Samol mi Lapalap o imweimw lon ewe fanü itan Not ötiuen Eten.
99	GEN 4:19	Iwe, Lamek a pwülüeni ruoman fefin, eman itan Ata, nge eman itan Sila.
102	GEN 4:22	Iwe, Sila a nöüni Tupalkain, i eman mi silelap le föri pisek seni mächä. Nge fefinen Tupalkain itan Naama.
103	GEN 4:23	Iwe, Lamek a üreni pwülüan kewe, “Ata me Sila, oupwe rongorong ai kapas, ämi pwülüen Lamek, oupwe aüseling ai fos. Üa niela eman mwän pokiten a akinasaei, üa niela eman alüal pokiten a sukuei.
105	GEN 4:25	Iwe, Atam a pwal kon ren pwülüan we, nge neminewe a pwopwo o nöüni eman ät. Iwe, a aita ngeni Set, pun a apasa, “Kot a ngeniei eman nei siwilin Epel, ätewe Kain a niela.”
106	GEN 4:26	Set a pwal nöüni eman ät o aita ngeni Enos. Lon ena fansoun aramas ra popuetä le köri iten ewe Samol mi Lapalap.
109	GEN 5:3	Lupwen Atam a ierini ipükü ilik, a nöüni eman ät mi wewe ngeni püsin lapalapan, iwe, a aita ngeni Set.
110	GEN 5:4	Iwe, ükükün ierin manauen Atam mürin an nöüni Set walüpükü, a pwal wor nöün mwän me fefin.
112	GEN 5:6	Iwe, lupwen Set a ierini ipükü limu, a nöüni Enos.
113	GEN 5:7	Nge ierin manauen Set mürin än Enos uputiu walüpükü fisu, a pwal wor nöün mwän me fefin.
114	GEN 5:8	Nge ierin manauen Set meinisin tiwepükü engol me ruu. Mürin a mäla.
135	GEN 5:29	A aita ngeni Noa o apasa, “Ätei epwe angasakich seni weiresin angangen pöüch, pokiten ewe pwül a anümamau me ren ewe Samol mi Lapalap.”
138	GEN 5:32	Iwe, lupwen Noa a ierini limupükü, a nöüni Säm, Ham me Jafet.
141	GEN 6:3	Mürin, ewe Samol mi Lapalap a apasa, “Ngüni esap nonom lon aramas tori feilfeilachök, pun aramas fituk chök. Iwe, ränin manauan epwe ipükü rüe ier chök.”
143	GEN 6:5	Iwe, ewe Samol mi Lapalap a küna pwe än aramas föföringau a fokun wattela won fanüfan, nge ekiekin leluker a chök ngauala fansoun meinisin.
144	GEN 6:6	Iwe, ewe Samol mi Lapalap a lamalamala ren an föri aramas won fanüfan, letipan a pwal fokun weires ren.
148	GEN 6:10	Iwe, a wor ülüman nöün Noa mwän iter Säm, Ham me Jafet.
161	GEN 7:1	Iwe, ewe Samol mi Lapalap a üreni Noa, “Oupwe tolong lon ewe waimw ämi me chon leimwom, pun ngang üa küna pwe en ka pwüng mwen pilom kana.
165	GEN 7:5	Iwe, Noa a föri meinisin mine ewe Samol mi Lapalap a allük ngeni.
173	GEN 7:13	Lon ewe chök ränin, Noa me nöün kewe iter Säm, Ham me Jafet pwal pwülüan me pwülüen nöün kewe ülüman mwän ra tolong lon ewe waimw,
176	GEN 7:16	eman ätemwän me eman liefefin. Ra tolong, pun iei usun Kot a allük ngeni Noa. Mürin, ewe Samol mi Lapalap a apüngala ewe asam.
204	GEN 8:20	Mürin, Noa a senätä eu rongen asor fän iten ewe Samol mi Lapalap. Iwe, a angei eman man seni iteiten sokun man mi limöch me iteiten sokun mansüsü mi limöch, o eäniir asoren kek won ewe rongen asor.
205	GEN 8:21	Nge lupwen ewe Samol mi Lapalap a tini pwoöchün ewe asor, a ekieki lon lelukan, “Üsap chüen anümamaua fanüfan pokiten aramas. Üa silei pwe ekiekin leluken aramas a ngau seni lekisikisin. Üsap chüen arosala mönümanau meinisin, usun üa piin föri.
224	GEN 9:18	Iwe, iten nöün Noa kewe mwän ra towu seni lon ewe waimw: Säm, Ham me Jafet. Nge Ham semen Kanaan.
229	GEN 9:23	Mürin, Säm me Jafet ra angei och mangaku, ra anomu won afarer o fetalsökürülong pwe repwe pwölüöla semer we lon an selela. Iwe, meser ra kul seni semer we pwe resap küna lon an selela.
232	GEN 9:26	A pwal apasa, “Sipwe mwareiti ewe Samol mi Lapalap än Säm we Kot. Nge Säm epwe nöüni Kanaan amanau.
233	GEN 9:27	Kot epwe awattela fanüen Jafet, nge epwe imweimw lon imwen Säm. Iwe, Jafet epwe nöüni Kanaan amanau.”
236	GEN 10:1	Iei mwirimwirin nöün Noa kewe mwän Säm, Ham me Jafet. Iwe, a wor nöür mwän mürin ewe noter won fanüfan.
242	GEN 10:7	Nge nöün Kush mwän: Sepa, Hawila, Sapta, Raama me Sapteka. Nge nöün Raama mwän: Shepa me Tetan.
250	GEN 10:15	Iwe, Kanaan semen Siton nöün we mwänichi me Het.
252	GEN 10:17	chon Kiw, chon Ark, chon Sin,
253	GEN 10:18	chon Arwat, chon Semar me chon Hamat. Mürin, chon ekewe ainangen Kanaan ra chöfetal,
254	GEN 10:19	pwe kiännin fanüer a seni Siton wenewenen Kerar tori Kasa, a pwal weneiti Sotom me Komora, Atma me Sepoim, pwal tori Lasa.
256	GEN 10:21	Iwe, Säm ewe mwänichi pwin Jafet i än nöün Eper kewe mwän meinisin lewo.
257	GEN 10:22	Iwe, nöün Säm mwän: Elam, Ashur, Arpaksat, Lut me Aram.
259	GEN 10:24	Iwe, Arpaksat semen Shela, nge Shela semen Eper.
261	GEN 10:26	Iwe, ekewe mwirimwirin Joktan ekewe chon Almotat, chon Selef, chon Hasarmawet, chon Jera,
263	GEN 10:28	chon Opal, chon Apimael, chon Sepa,
265	GEN 10:30	Iwe, kiännin fanüer seni Mesa tori Sefar lon ewe fanü mi chukuchukutä, mi nom ötiu.
266	GEN 10:31	Ir meinisin mwirimwirin Säm lon tettelin ar ainang, ar fos, fanüer me mwür.
272	GEN 11:5	Iwe, ewe Samol mi Lapalap a feitiu me läng pwe epwe nengeni ewe telinimw me ewe imw tekia ekewe aramas ra aüetä.
273	GEN 11:6	Mürin, ewe Samol mi Lapalap a apasa, “Eu chök mwichen aramas ir meinisin, nge eu chök ar fos lefiler. Ekärän iei poputän met ra föri, nge mürin repwe chök föri meinisin mine ra ekiekin föri, nge epwe chök tufich ngeniir.
275	GEN 11:8	Iei usun ewe Samol mi Lapalap a atoropasafeseniir won unusen fanüfan. Iwe, ra ükütiu me aüetä ewe telinimw.
276	GEN 11:9	Iei mine ewe telinimw a iteni Papilon, pun ikenan ewe Samol mi Lapalap a alikofifi fosun aramas meinisin, a pwal atoropasafeseniir seni ikenan tori won unusen fanüfan.
277	GEN 11:10	Iei uruwon mwirimwirin Säm. Iwe, ruu ier mürin ewe noter won fanüfan, lupwen Säm a ierini ipükü, a nöüni Arpaksat.
278	GEN 11:11	Iwe, ierin manauen Säm mürin än Arpaksat uputiu limepükü, a pwal wor nöün mwän me fefin.
279	GEN 11:12	Iwe, lupwen Arpaksat a ierini ilik me limu, a nöüni Shela.
280	GEN 11:13	Nge ierin manauen Arpaksat mürin än Shela uputiu föpükü ülüngat, a pwal wor nöün mwän me fefin.
281	GEN 11:14	Iwe, lupwen Shela a ierini ilik, a nöüni Eper.
282	GEN 11:15	Nge ierin manauen Shela mürin än Eper uputiu föpükü ülüngat, a pwal wor nöün mwän me fefin.
287	GEN 11:20	Iwe, lupwen Reu a ierini ilik me ruu, a nöüni Seruk.
288	GEN 11:21	Nge ierin manauen Reu mürin än Seruk uputiu ruupükü fisu, a pwal wor nöün mwän me fefin.
289	GEN 11:22	Iwe, lupwen Seruk a ierini ilik, a nöüni Nahor.
290	GEN 11:23	Iwe, ierin manauen Seruk mürin än Nahor uputiu ruupükü, a pwal wor nöün mwän me fefin.
296	GEN 11:29	Iwe, pwülüen Apram Sarai, nge pwülüen Nahor Milka. Iwe, Haran semen Milka me Iska.
297	GEN 11:30	Nge Sarai esap nöünöü, pun a rit.
298	GEN 11:31	Iwe, Tara a angei Apram nöün we me Lot nöün Haran pwin Apram we, pwal Sarai pwülüen Apram. Iwe, ra towu seni ewe telinimw Ur lon ewe fanü Papilon, pwe repwe feila lon ewe fanü Kanaan. Nge lupwen ra tori ewe telinimw Haran, ra imweimw ikenan.
300	GEN 12:1	Lon ewe fansoun ewe Samol mi Lapalap a üreni Apram, “Kopwe towu seni fanüom, seni aramasom pwal seni imwen semom, pwe kopwe feila lon ewe fanü ngang üpwe aiti ngonuk.
303	GEN 12:4	Iwe, lupwen Apram a ierini fik me limu, a sai seni Haran, usun ewe Samol mi Lapalap a üreni, nge Lot a eti.
304	GEN 12:5	Iwe, Apram a angei Sarai pwülüan we me Lot nöün pwin, pwal pisekir meinisin ra achufengeni me nöür kewe chon angang ra nöüniir amanau me lon Haran. Iwe, ra towu pwe repwe feila lon ewe fanü Kanaan. Iwe, lupwen ra tori,
305	GEN 12:6	Apram a saifeil lon ewe fanü tori ewe leni itan Sikem, ia a wor ie ewe irä ook mi pin än More. Lon ena fansoun ekewe chon Kanaan ra nom lon ewe fanü.
306	GEN 12:7	Iwe, ewe Samol mi Lapalap a pwä ngeni Apram o üreni, “Ei fanü üpwe ngeni mwirimwirum kana.” Mürin, Apram a senätä eu rongen asor ikenan fän iten ewe Samol mi Lapalap mi pwä ngeni.
307	GEN 12:8	Seni ikenan a feila ngeni ewe fanü mi chukuchukutä ötiuen Petel. Iwe, a aüetä imwan imw mangaku lefilen Petel mi nom lotou me Ai mi nom ötiu. Nge ikenan a pwal senätä eu rongen asor fän iten ewe Samol mi Lapalap o fel ngeni.