23233	MAT 1:20	Laja loꞌo nclyacua tiꞌ yu ni chaꞌ laca ngua juaꞌa̱, liꞌ nduꞌu tucua sca xca̱ jiꞌi̱ ycuiꞌ Ndyosi slo yu laja xcalá yu. Nchcuiꞌ xca̱ biꞌ loꞌo yu liꞌ: ―José ―nacui̱ xca̱ jiꞌi̱ yu―, ñati̱ tyaꞌa jiꞌi̱ jyoꞌo David laca nuꞌu̱ ―nacui̱―. Ná cutsi̱i̱ nuꞌu̱ caja clyoꞌo loꞌo Mariá, chaꞌ ca̱a̱ choꞌ toniꞌi̱ jinuꞌu̱. Siꞌi na cuxi nguaꞌni María biꞌ tsiyaꞌ ti; cña nu nguaꞌni Xtyiꞌi ycuiꞌ Ndyosi laca chaꞌ ntsuꞌu sñiꞌ Mariá juani.
23246	MAT 2:8	Loꞌo ndachaꞌ nguꞌ jiꞌi̱, liꞌ nchcuiꞌ rey loꞌo nguꞌ chaꞌ tsaa nguꞌ nde quichi̱ Belén. ―Yaa clya ma̱ ―nacui̱ rey jiꞌi̱ nguꞌ tii biꞌ―, clyana ma̱ ma ntucua tyi cubiꞌ biꞌ ―nacui̱―. Loꞌo si quije jiꞌi̱ ma̱, liꞌ xtyu̱u̱ ma̱ slo naꞌ chaca quiyaꞌ chaꞌ caca cuayáꞌ tiꞌ naꞌ macala ntsiya cubiꞌ biꞌ. Loꞌo naꞌ tsaꞌa̱ cuaꞌni tlyu naꞌ jiꞌi̱ cubiꞌ biꞌ nta̱ꞌ.
23263	MAT 3:2	―Ca tyujuꞌu tiꞌ cuꞌma̱ ―nacui̱ Juan jiꞌi̱ nguꞌ―, xtyanu ma̱ jiꞌi̱ chaꞌ cuxi nu ndyuꞌni ma̱ ―nacui̱―. Cua xana ti chaꞌ caca ycuiꞌ Ndyosi loo neꞌ cresiya jiꞌi̱ ñati̱ chalyuu.
23418	MAT 8:4	Xaꞌ nchcuiꞌ Jesús loꞌo yu liꞌ: ―Yaa clya nuꞌu̱ slo sti joꞌó ―nacui̱―. Cajua ta nuꞌu̱ msta̱ nu nacui̱ jyoꞌo Moisés chaꞌ ta na jiꞌi̱ ycuiꞌ Ndyosi loꞌo ndyaca tsoꞌo na jiꞌi̱ quicha nu ntsuꞌu jiꞌna. Ná cachaꞌ nuꞌu̱ jiꞌi̱ xaꞌ ñati̱. Taca ca cuayáꞌ tiꞌ lcaa ñati̱ chaꞌ cua ngua tsoꞌo nuꞌu̱, nu loꞌo cuna nguꞌ chaꞌ cua ngusñi sti joꞌó msta̱ nu nda nuꞌu̱.
23466	MAT 9:18	Laja loꞌo nchcuiꞌ Jesús loꞌo nguꞌ biꞌ, liꞌ ndyalaa sca nguꞌ judío nu laca loo; ndatu̱ sti̱ꞌ yu slo Jesús liꞌ, chaꞌ jña yu sca chaꞌ clyu tiꞌ jiꞌi̱: ―Cua ngujuii ca ti sca nu piti cunaꞌa̱ sñiꞌ naꞌ ―nacui̱ nu cusuꞌ jiꞌi̱ Jesús―. ¿Ha ná tsaa nuꞌu̱ slo naꞌ chaꞌ sta yaꞌ nuꞌu̱ lo nu piti biꞌ? ―nacui̱―. Jlo tiꞌ naꞌ chaꞌ nchca jinuꞌu̱ cuaꞌni chaꞌ tyuꞌú nu piti chaca quiyaꞌ.
23472	MAT 9:24	Nchcuiꞌ Jesús loꞌo nguꞌ liꞌ: ―Tyaa ma̱ tsoꞌo la ―nacui̱―. Na lajaꞌ ti nu piti re, siꞌi na ngujuii re. Nxtyí loꞌo tsa nguꞌ jiꞌi̱ Jesús liꞌ,
23549	MAT 11:21	―¡Tyaꞌna tsa cuꞌma̱ nguꞌ quichi̱ Corazín! ―nacui̱ Jesús―. ¡Tyaꞌna tsa cuꞌma̱ nguꞌ quichi̱ Betsaida! ―nacui̱―. Cua quiñaꞌa̱ tsa chaꞌ tlyu nu cua naꞌa̱ cuꞌma̱, pana ná ngujuꞌu tiꞌ ma̱ tsiyaꞌ ti jiꞌi̱ chaꞌ cuxi nu ndyuꞌni ma̱, ná nguxtyanu ma̱ chaꞌ biꞌ. La cuiꞌ juaꞌa̱ tya saꞌni la xñaꞌa̱ tsa nguꞌ quichi̱ Tiro loꞌo nguꞌ quichi̱ Sidón, nguꞌ xaꞌ tsuꞌ ngua nguꞌ biꞌ. Pana ná ngujui ñiꞌya̱ caca tyujuꞌu tiꞌ nguꞌ biꞌ jiꞌi̱ chaꞌ cuxi nu nguaꞌni nguꞌ, ná ngulochu̱ꞌ nguꞌ jiꞌi̱ chaꞌ cuxi biꞌ, chaꞌ bilya ñaꞌa̱ nguꞌ biꞌ chaꞌ tlyu ñiꞌya̱ nu ñaꞌa̱ cuꞌma̱ nguꞌ Israel; biꞌ chaꞌ ná ngua xñiꞌi̱ tiꞌ nguꞌ biꞌ. Ná ndyacuꞌ nguꞌ lateꞌ ngata, ni ná ngusuꞌba nguꞌ jii hique nguꞌ ñiꞌya̱ nu nduꞌni nguꞌ su nscua jyoꞌo.
23712	MAT 15:10	Loꞌo liꞌ ngusiꞌya Jesús jiꞌi̱ nu quiñaꞌa̱ tsa ñati̱ nu ndiꞌi̱ cajua chaꞌ ca̱a̱ nguꞌ cacua la xi, chaꞌ chcuiꞌ yu loꞌo nguꞌ liꞌ: ―Cuaꞌa̱ jyaca̱ ma̱ ―nacui̱ Jesús jiꞌi̱ nguꞌ―, chaꞌ caca cuayáꞌ tsoꞌo tiꞌ ma̱ ―nacui̱―.
23717	MAT 15:15	Liꞌ nchcuiꞌ Pedro loꞌo Jesús: ―Culuꞌu nuꞌu̱ jiꞌi̱ cua ñiꞌya̱ ndyuꞌu chaꞌ nu nda cui̱i̱ jiꞌi̱ na nu ndacu nguꞌ ―nacui̱―. Ná nchca cuayáꞌ tiꞌ ya.
23757	MAT 16:16	Hora ti nguxacui̱ Simón Pedro chaꞌ jiꞌi̱ Jesús liꞌ: ―Cristo laca nuꞌu̱ ―nacui̱―. Sñiꞌ ycuiꞌ Ndyosi nu luꞌú ca laca nuꞌu̱.
23773	MAT 17:4	Liꞌ nchcuiꞌ Pedro loꞌo Jesús: ―Xuꞌna ―nacui̱ Pedro jiꞌi̱―, tsoꞌo tsa chaꞌ ngaꞌa̱ ya re ―nacui̱―. ¿Ha tsoꞌo ntiꞌ nuꞌu̱ si cuiñá naꞌ sna tyaꞌa chcuaꞌya? Tsaca laca su tyiꞌi̱ ycuiꞌ nuꞌu̱, chaca su tyiꞌi̱ La Moisés, chaca su tyiꞌi̱ La Elías.
23817	MAT 18:21	Liꞌ ñaa Pedro cacua la chaꞌ cachaꞌ jiꞌi̱ Jesús: ―Xuꞌna ―nacui̱ jiꞌi̱ Jesús―, ¿ni lcua quiyaꞌ cuiꞌya naꞌ chaꞌ clyu tiꞌ jiꞌi̱ yu tyaꞌa naꞌ loꞌo ndyuꞌni yu chaꞌ cuxi loꞌo naꞌ? ―nacui̱―. ¿Ha tsoꞌo cati quiyaꞌ cuaꞌni clyu tiꞌ naꞌ jiꞌi̱ yu?
23897	MAT 21:2	―Yaa ma̱ nde lquichi̱ re ―nacui̱―. Yala ti quije sca huru nu ndu̱ ndyaaca̱ꞌ jiꞌi̱ ma̱; ndu̱ niꞌ loꞌo sñiꞌ niꞌ. Xati̱ꞌ ma̱ jiꞌi̱ naꞌni biꞌ, chaꞌ tya̱a̱ loꞌo ma̱ jiꞌi̱ niꞌ ca nde.
23916	MAT 21:21	Liꞌ nguxacui̱ Jesús chaꞌ jiꞌi̱ nguꞌ biꞌ: ―Chaꞌ liñi nchcuiꞌ naꞌ loꞌo ma̱ juani ―nacui̱―. Si chañi chaꞌ jlya tiꞌ ma̱ jiꞌi̱ ycuiꞌ Ndyosi, si siꞌi chaꞌ tucua ti chaꞌ ntsuꞌu tyiquee ma̱ nchcuiꞌ ma̱ loꞌo Ni, loꞌo cuꞌma̱ caca jiꞌi̱ ma̱ cuaꞌni ma̱ sca chaꞌ tlyu juaꞌa̱. Siꞌi chaꞌ quityi sca yaca ti chcuiꞌ ma̱ loꞌo ycuiꞌ Ndyosi liꞌ, masi taca chcuiꞌ ma̱ loꞌo caꞌya jua ndiꞌya̱: “Tyuꞌutsuꞌ nuꞌu̱, yaa xcua nuꞌu̱ nde lo hitya tyujoꞌo”, ñacui̱ ma̱ jiꞌi̱. Loꞌo liꞌ juaꞌa̱ caca jiꞌi̱, chaꞌ tyuꞌutsuꞌ caꞌya biꞌ.
24030	MAT 24:4	Liꞌ nguluꞌu la xi Jesús jiꞌi̱ nguꞌ biꞌ: ―Cuaꞌni tii tiꞌ ma̱, cuiꞌya ma̱ cuentya chaꞌ ná tucui cñiloꞌo jiꞌi̱ ma̱ ―nacui̱―.
24173	MAT 26:50	Liꞌ nacui̱ Jesús jiꞌi̱ Judas biꞌ: ―Tyaꞌa tsoꞌo naꞌ ngua nuꞌu̱ nquichaꞌ ―nacui̱―. ¿Ni cña lijya̱ nuꞌu̱ ca nde juani? Liꞌ ntejeyaꞌ nguꞌ tyaala biꞌ jiꞌi̱ Jesús, chaꞌ tyaa loꞌo nguꞌ jiꞌi̱.
24308	MRK 1:24	―¿Ñiꞌya̱ chaꞌ ntiꞌ nuꞌu̱ chcuiꞌ loꞌo naꞌ, Jesús Nazaret? ―nacui̱ nu quicha biꞌ―. ¿Ha cua ntiꞌ nuꞌu̱ cuaꞌni tye nuꞌu̱ chaꞌ jnaꞌ? ―nacui̱―. Pana nslo naꞌ jinuꞌu̱. Ycuiꞌ nu lubii laca nuꞌu̱, loꞌo cua nda ycuiꞌ Ndyosi jinuꞌu̱ lijya̱ ca nde.
24322	MRK 1:38	―Masi nclyana nguꞌ ꞌna ca nde, pana tya tsaa la na nde xaꞌ quichi̱ ―nacui̱ Jesús jiꞌi̱ nguꞌ―. Loꞌo jiꞌi̱ nguꞌ xaꞌ quichi̱ ntsuꞌu chaꞌ culuꞌu naꞌ chaꞌ tsoꞌo nu cuentya jnaꞌ ―nacui̱―. Biꞌ cña ntsuꞌu ꞌna chaꞌ cuaꞌni naꞌ nde chalyuu.
24346	MRK 2:17	Loꞌo ndyuna Jesús chaꞌ nu nchcuiꞌ nu nguꞌ tlyu biꞌ, liꞌ nacui̱ yu: ―Ná ntsuꞌu chaꞌ caca joꞌo jiꞌi̱ ñati̱ nu tsoꞌo ti tiꞌ ―nacui̱ Jesús jiꞌi̱ nguꞌ―, caca joꞌo jiꞌi̱ nguꞌ quicha ―nacui̱―. Loꞌo naꞌ ni, ná lijya̱ naꞌ chaꞌ culuꞌu naꞌ chaꞌ tsoꞌo jiꞌi̱ ycuiꞌ Ndyosi jiꞌi̱ ñati̱ nu nclyacua tiꞌ chaꞌ tsoꞌo tsa ycuiꞌ ca nguꞌ; na cua lijya̱ naꞌ ca nde chaꞌ culuꞌu naꞌ chaꞌ tsoꞌo biꞌ jiꞌi̱ ñati̱ nu jlo tiꞌ chaꞌ ntsuꞌu quiꞌya jiꞌi̱ nguꞌ ―nacui̱ Jesús.
24361	MRK 3:4	Liꞌ nchcuane Jesús jiꞌi̱ lcaa nguꞌ biꞌ: ―¿Ha ntsuꞌu chacuayáꞌ jiꞌna cuaꞌni na sca chaꞌ tsoꞌo tsa̱ nu ndiꞌi̱ cñaꞌ nguꞌ? ―nacui̱ yu jiꞌi̱ nguꞌ tlyu biꞌ―. ¿Ha tsoꞌo la si cuaꞌni na sca chaꞌ cuxi tsa̱ biꞌ? ―nacui̱―. ¿Ha ná tsoꞌo cuaꞌni na joꞌo jiꞌi̱ nguꞌ liꞌ, ntiꞌ ma̱? ¿Ha tsoꞌo la si ta na chacuayáꞌ cajaa nguꞌ quicha tsa̱ biꞌ lacua? ―nacui̱ Jesús. Ngaꞌaa ngujui la ñiꞌya̱ chcuiꞌ nu nguꞌ tlyu biꞌ loꞌo Jesús liꞌ.
24405	MRK 4:13	’¿Ha ná ngua cuayáꞌ tiꞌ ma̱ ñiꞌya̱ ntiꞌ ñacui̱ cui̱i̱ biꞌ? ―nacui̱ Jesús jiꞌi̱ nguꞌ biꞌ liꞌ―. ¿Ñiꞌya̱ caca ta ma̱ cuentya jiꞌi̱ xi xaꞌ la cui̱i̱ lacua, si ná nduna ma̱ chaꞌ nu nchcuiꞌ naꞌ biꞌ? ―nacui̱―.
24413	MRK 4:21	Chaca quiyaꞌ nda Jesús sca cui̱i̱ loꞌo nguꞌ biꞌ: ―Loꞌo nguaꞌa̱ na xee niꞌi̱ ca talya, ¿ha tacu̱ꞌ na lo xee biꞌ? ¿Ha sta na xee biꞌ neꞌ quiꞌña? ―nacui̱ Jesús jiꞌi̱ nguꞌ―. Ná nduꞌni na juaꞌa̱ ―nacui̱―. Cua̱ xi sta na xee chaꞌ tyaca̱ꞌ xee tyucui ñaꞌa̱ nde niꞌi̱.
24440	MRK 5:7	Cui̱i̱ ngusiꞌya nu quicha biꞌ jiꞌi̱ Jesús liꞌ: ―¿Ñiꞌya̱ cña ntiꞌ nuꞌu̱ jnaꞌ? ―nchcuane yu quicha jiꞌi̱ Jesús liꞌ―. Nuꞌu̱ laca Jesús nu sca ti Sñiꞌ ycuiꞌ Ndyosi, ycuiꞌ Ni nu laca loo la ―nacui̱―. Chacuayáꞌ jiꞌi̱ ycuiꞌ Ndyosi, ná xcubeꞌ nuꞌu̱ jnaꞌ.
24492	MRK 6:16	Loꞌo ndyuna Herodes chaꞌ nu nchcuiꞌ xaꞌ ñati̱ jiꞌi̱ Jesús biꞌ, xaꞌ nchcuiꞌ rey biꞌ: ―Cua ndyuꞌú jyoꞌo Juan chaca quiyaꞌ ―nacui̱―. Naꞌ ngulo naꞌ cña jiꞌi̱ nguꞌ, loꞌo liꞌ nteje cuꞌ nguꞌ scuaꞌ que Juan biꞌ; pana ná tyiqueeꞌ Juan laca nu quiꞌyu re ―nacui̱ rey Herodes.
24498	MRK 6:22	Liꞌ ndyalaa sca nu cunaꞌa̱ cuañiꞌ sñiꞌ Herodías, ndyula quiyaꞌ nu cunaꞌa̱ biꞌ slo nguꞌ. Chaa tsa tiꞌ rey Herodes liꞌ, loꞌo juaꞌa̱ ndiya tiꞌ nguꞌ nu ndyacu slo loꞌo naꞌa̱ nguꞌ jiꞌi̱ nu cunaꞌa̱ cuañiꞌ ndyula quiyaꞌ. Nchcuiꞌ rey loꞌo nu cunaꞌa̱ cuañiꞌ biꞌ liꞌ: ―Cachaꞌ clya nuꞌu̱ jnaꞌ juani ti na ca chaꞌ tsoꞌo nu ntiꞌ nuꞌu̱ ―nacui̱ rey jiꞌi̱―. Ta naꞌ chaꞌ tsoꞌo biꞌ jinuꞌu̱ ―nacui̱―.
24675	MRK 10:18	―¿Ni chaꞌ laca ntiꞌ nuꞌu̱ chaꞌ ñati̱ tsoꞌo laca naꞌ? ―nacui̱ Jesús jiꞌi̱ liꞌ―. Sca ti ycuiꞌ Ndyosi laca nu chañi chaꞌ tsoꞌo laca Ni ―nacui̱―.
24711	MRK 11:2	―Yaa ma̱ ca quichi̱ sube ti ndacua ti ―nacui̱―. Loꞌo tyalaa ma̱ toꞌ quichi̱ biꞌ, hora ti ñaꞌa̱ ma̱ ndu̱ sca huru ndyaaca̱ꞌ nu bilya tyucua nguꞌ chu̱ꞌ. Sati̱ꞌ ma̱ jiꞌi̱, chaꞌ tya̱a̱ loꞌo ma̱ jiꞌi̱ ca nde.
24843	MRK 14:20	―Sca yu tyaꞌa nu tii tyucuaa tyaꞌa ma̱, biꞌ laca nu cujuiꞌ cresiya ꞌna jiꞌi̱ nguꞌ xñaꞌa̱ ―nacui̱ Jesús jiꞌi̱ nguꞌ―. Sca yu tyaꞌa ma̱ nu stuꞌba ti ndyacu loꞌo na neꞌ sca ti caꞌña scuaa re ―nacui̱―.
24860	MRK 14:37	Liꞌ ñaa Jesús chaca quiyaꞌ su ngaꞌa̱ nu sna tyaꞌa nguꞌ. Na lajaꞌ ti nguꞌ biꞌ liꞌ. ―Simón ―nacui̱ yu jiꞌi̱ Pedro―, ¿ha lajaꞌ tsa nuꞌu̱? ―nacui̱―. ¿Ha ná nchca talo nuꞌu̱ ni sca hora tii ti nuꞌu̱ xi?
24884	MRK 14:61	Ti̱ ti ndu̱ Jesús, ni sca chaꞌ ná nguxacui̱ yu tsiyaꞌ ti. Biꞌ chaꞌ xaꞌ nchcuane sti joꞌó nu laca loo la jiꞌi̱ yu liꞌ: ―¿Ha chañi chaꞌ Cristo laca nuꞌu̱? ―nacui̱―. ¿Ha nuꞌu̱ laca nu sca ti Sñiꞌ ycuiꞌ Ndyosi nu nduꞌni tlyu na jiꞌi̱? ―nacui̱ sti joꞌó biꞌ jiꞌi̱ Jesús.
24975	LUK 1:13	Nchcuiꞌ xca̱ biꞌ loꞌo yu liꞌ: ―Ná cutsi̱i̱ nuꞌu̱ Zacarías ―nacui̱―. Cua ndyuna ycuiꞌ Ndyosi chaꞌ nu tyaꞌna tsa nchcuiꞌ nuꞌu̱ loꞌo Ni, biꞌ chaꞌ cala sca sñiꞌ Elisabet clyoꞌo nuꞌu̱. Juan caca naa yu, juaꞌa̱ caca xtañi nu sta nuꞌu̱ jiꞌi̱.
24990	LUK 1:28	Loꞌo ndyalaa xca̱ slo nu cunaꞌa̱ biꞌ, liꞌ nchcuiꞌ loꞌo: ―Tsoꞌo ti tyiꞌi̱ nuꞌu̱ ―nacui̱ xca̱ biꞌ jiꞌi̱―, tyacaꞌa tsa nuꞌu̱ jiꞌi̱ ycuiꞌ Ndyosi. Tsoꞌo ndiꞌi̱ Ni loꞌo nuꞌu̱ ―nacui̱―. Quiñaꞌa̱ tsa chaꞌ tsoꞌo nda ycuiꞌ Ndyosi jinuꞌu̱, masi ná nduꞌni Ni juaꞌa̱ loꞌo xaꞌ la nu cunaꞌa̱.
25004	LUK 1:42	biꞌ chaꞌ cui̱i̱ tsa nchcuiꞌ maꞌ loꞌo María liꞌ: ―Tlyu tsa chaꞌ tsoꞌo nu nda ycuiꞌ Ndyosi jinuꞌu̱ ―nacui̱ Elisabet jiꞌi̱ María―. Ná cuaꞌni Ni juaꞌa̱ loꞌo xaꞌ la nu cunaꞌa̱. Loꞌo juaꞌa̱ tyacaꞌa tsa cubiꞌ nu ntsuꞌu jinuꞌu̱ cuentya jiꞌi̱ ycuiꞌ Ndyosi ―nacui̱―.
25052	LUK 2:10	Pana nchcuiꞌ xca̱ biꞌ loꞌo nguꞌ: ―Ná cutsi̱i̱ ma̱ tsiyaꞌ ti ―nacui̱―. Cua lijya̱ naꞌ re chaꞌ ta naꞌ sca chaꞌ tsoꞌo loꞌo ma̱ ―nacui̱―. Tsoꞌo tsa caca tyiquee lcaa ñati̱ xquiꞌya chaꞌ nu ta naꞌ loꞌo ma̱ juani ―nacui̱ xca̱ jiꞌi̱ nguꞌ biꞌ―.
25053	LUK 2:11	Cua lijya̱ naꞌ cachaꞌ naꞌ jiꞌi̱ ma̱ chaꞌ juani cua ngula sca cubiꞌ ca quichi̱ tyi ma̱, chaꞌ la cuiꞌ quichi̱ tyi jyoꞌo David laca biꞌ; cubiꞌ biꞌ laca nu cuityi̱ quiꞌya nu ntsuꞌu jiꞌi̱ ma̱. Biꞌ laca nu Cristo nu laca ycuiꞌ nu Xuꞌna na, nu cua nda ycuiꞌ Ndyosi jiꞌi̱ chaꞌ lijya̱ lo yuu chalyuu ―nacui̱―.
25090	LUK 2:48	Loꞌo juaꞌa̱ nguꞌ cusuꞌ jiꞌi̱ nu piti biꞌ ni, ndube tsa tiꞌ nguꞌ biꞌ loꞌo naꞌa̱ nguꞌ jiꞌi̱ yu chaꞌ stuꞌba ti ntucua yu loꞌo nguꞌ tlyu biꞌ. Liꞌ nchcuiꞌ xtyaꞌa̱ yu loꞌo yu: ―¿Ni chaꞌ laca nguaꞌni nuꞌu̱ juaꞌa̱, sñiꞌ? ―nacui̱―. Quiñaꞌa̱ tsa ngulacua tiꞌ naꞌ loꞌo sti nuꞌu̱ macala su ndyanu nuꞌu̱.
25101	LUK 3:7	Quiñaꞌa̱ ñati̱ ndyalaa su ndu̱ Juan chaꞌ tyucuatya nguꞌ. Liꞌ nchcuiꞌ Juan loꞌo nguꞌ quiñaꞌa̱ biꞌ: ―Ñiꞌya̱ ntiꞌ cuaña tyaala, juaꞌa̱ ntiꞌ cuꞌma̱ ―nacui̱ Juan―. ¿Ha cua nchcutsi̱i̱ nguꞌ jiꞌi̱ ma̱ lacua? ¿Ha juani ndube tiꞌ ma̱ chaꞌ xcubeꞌ ycuiꞌ Ndyosi jiꞌi̱ ma̱ loꞌo tye chalyuu? ―nacui̱―.
25110	LUK 3:16	Liꞌ nchcuiꞌ Juan loꞌo lcaa nguꞌ nu ndiꞌi̱ biꞌ: ―Loꞌo hitya ti ntyucuatya naꞌ jiꞌi̱ ma̱ ―nacui̱ Juan―, pana cua ca̱a̱ ti chaca ñati̱ slo cuꞌma̱ nu nchca la jiꞌi̱ que naꞌ. Loꞌo naꞌ cuaꞌni tlyu naꞌ jiꞌi̱ ñati̱ biꞌ. Tsoꞌo tsa cña ngujui ꞌna ntiꞌ naꞌ, masi caña ntsuꞌu quiyaꞌ ñati̱ biꞌ sati̱ꞌ naꞌ juata. Loꞌo nu ñati̱ biꞌ ni, ná tyucuatya yu jiꞌi̱ nguꞌ loꞌo hitya ti, pana cuaꞌni yu chaꞌ tyanu Xtyiꞌi ycuiꞌ Ndyosi neꞌ cresiya jiꞌi̱ nguꞌ, nu loꞌo tyucuatya yu jiꞌi̱ nguꞌ. Loꞌo liꞌ cuaꞌni lubii Ni jiꞌi̱ nguꞌ biꞌ loꞌo xee jiꞌi̱ Ni, chaꞌ juaꞌa̱ caca tsoꞌo tyiquee nguꞌ ―nacui̱―.
25138	LUK 4:6	Liꞌ nchcuiꞌ nu xñaꞌa̱ biꞌ loꞌo yu chaca quiyaꞌ: ―Ta naꞌ chacuayáꞌ jinuꞌu̱ chaꞌ caca nuꞌu̱ loo jiꞌi̱ lcaa chalyuu jua ―nacui̱ nu xñaꞌa̱ biꞌ―, chaꞌ caja lcaa na nu ndiꞌi̱ jua jinuꞌu̱ ―nacui̱―. Ntsuꞌu chacuayáꞌ biꞌ jnaꞌ. Loꞌo juaꞌa̱ ta naꞌ chacuayáꞌ biꞌ jiꞌi̱ cua ñaꞌa̱ ca ñati̱ nu ntiꞌ naꞌ chaꞌ caca loo ―nacui̱―.
25140	LUK 4:8	Liꞌ nguxacui̱ Jesús chaꞌ jiꞌi̱: ―Tyatsuꞌ nuꞌu̱ slo naꞌ, Satanás ―nacui̱―. Lo quityi jiꞌi̱ ycuiꞌ Ndyosi ndiꞌya̱ nchcuiꞌ: “Sca ti jiꞌi̱ ycuiꞌ Ndyosi nu Xuꞌna ma̱ cuaꞌni tlyu ma̱ jiꞌi̱, sca ti chaꞌ jiꞌi̱ ycuiꞌ Ni ngaꞌa̱ chaꞌ taquiyaꞌ ma̱ nde chalyuu”. Siꞌi loo nuꞌu̱ tyu̱ sti̱ꞌ naꞌ lacua ―nacui̱ Jesús jiꞌi̱.
25186	LUK 5:10	Loꞌo tyucuaa nu quiꞌyu sñiꞌ Zebedeo nu ngaꞌa̱ neꞌ chaca yaca niꞌi̱ biꞌ, nu naa Jacobo loꞌo nu naa Juan ni, loꞌo nguꞌ biꞌ ndyutsi̱i̱ tsa nguꞌ; la cuiꞌ tyaꞌa ndyaꞌa̱ Simón cña laca nguꞌ biꞌ. Liꞌ nchcuiꞌ Jesús loꞌo Simón: ―Ná cutsi̱i̱ ma̱ ―nacui̱―. Tya tsubiꞌ la cua laca ti cña nguaꞌni ma̱, xcuiꞌ cña cuta cualya nguaꞌni ma̱; pana juani, ta naꞌ xaꞌ cña jiꞌi̱ ma̱, chaꞌ ca̱a̱ loꞌo ma̱ jiꞌi̱ xaꞌ ñati̱ ca slo naꞌ ―nacui̱ Jesús jiꞌi̱ Simón, juaꞌa̱ jiꞌi̱ tyaꞌa ndyaꞌa̱ yu cña.
25207	LUK 5:31	Liꞌ nguxacui̱ Jesús chaꞌ jiꞌi̱ nguꞌ biꞌ: ―Ñati̱ nu tsoꞌo tyucui ñaꞌa̱, ná clyana nguꞌ biꞌ jiꞌi̱ sca nu joꞌo; nguꞌ quicha laca nu ndyaana jiꞌi̱ sca nu joꞌo ―nacui̱―.
25224	LUK 6:9	Liꞌ nda Jesús sca chaꞌ loꞌo nu nguꞌ nu nduꞌni ti chaꞌ tacati biꞌ: ―¿Ni cña tsoꞌo la chaꞌ cuaꞌni na tsa̱ tacati lacua? ―nacui̱ Jesús jiꞌi̱ nguꞌ biꞌ―. ¿Ha sca cña tsoꞌo cuaꞌni na liꞌ? ¿Ha tsoꞌo la cuaꞌni na sca cña cuxi liꞌ, ntiꞌ ma̱? ―nacui̱―. ¿Ha tsoꞌo la si cuaꞌni lyaá na jiꞌi̱ ñati̱ tsa̱ biꞌ, chaꞌ ná cajaa nguꞌ liꞌ? ¿Ha tsoꞌo la ntiꞌ cuꞌma̱ masi ta na chacuayáꞌ cajaa ñati̱ liꞌ? ―nacui̱ Jesús jiꞌi̱ nguꞌ.
25235	LUK 6:20	Nguxñaꞌa̱ Jesús jiꞌi̱ nu nguꞌ nu ndyaca tsaꞌa̱ jiꞌi̱, liꞌ nguxana nchcuiꞌ yu loꞌo nguꞌ ndiꞌya̱: ―Tsoꞌo ntsuꞌu tyiquee cuꞌma̱ masi tiꞌi ti ndiꞌi̱ ma̱ nde chalyuu ―nacui̱―. Ycuiꞌ Ndyosi laca nu ñaꞌa̱sii̱ jiꞌi̱ ma̱, chaꞌ biꞌ nu laca Xuꞌna ma̱.
25236	LUK 6:21	’Loꞌo juaꞌa̱ tsoꞌo ntsuꞌu tyiquee cuꞌma̱ masi ñiꞌya̱ ntiꞌ si ntyuteꞌ tsa ma̱ juani, chaꞌ lye tsa ntiꞌ ma̱ cuna ma̱ sca chaꞌ liñi ―nacui̱―. Ca tiyaꞌ la, liꞌ caca tyaalaꞌ tiꞌ ma̱. ’Loꞌo juaꞌa̱ tsoꞌo ntsuꞌu tyiquee cuꞌma̱ masi xñiꞌi̱ ti tiꞌ cuꞌma̱ ndiꞌi̱ ma̱ chalyuu juani, chaꞌ ca tiyaꞌ la ca chaa tiꞌ ma̱ liꞌ ―nacui̱ Jesús―.
25239	LUK 6:24	’Pana tyaꞌna tsa cuꞌma̱ nguꞌ culiyaꞌ; masi chaa tsa tiꞌ ma̱ nquichaꞌ, cua laca ti tyempo caca chaa tiꞌ ma̱ ―nacui̱―.
25261	LUK 6:46	Tya nda Jesús chaca cui̱i̱ loꞌo nguꞌ liꞌ: ―¿Ni chaꞌ nduꞌni tsa ma̱ jnaꞌ chaꞌ Xuꞌna ma̱ laca naꞌ, pana ná ndaquiyaꞌ ma̱ jiꞌi̱ chaꞌ nu nchcuiꞌ naꞌ loꞌo ma̱? ―nacui̱―.
25278	LUK 7:14	Liꞌ ya̱a̱ Jesús cacua la slo nguꞌ biꞌ, ngusta yaꞌ yu chu̱ꞌ caju̱. Liꞌ ndatu̱ nguꞌ nu ndyiꞌya jiꞌi̱ jyoꞌo biꞌ, nchcuiꞌ Jesús loꞌo nu jyoꞌo biꞌ: ―Yu cuañiꞌ nuꞌu̱ ―nacui̱―. Tyacaꞌa̱ clya nuꞌu̱.
25295	LUK 7:31	―Ná tsoꞌo tsiyaꞌ ti ñiꞌya̱ nu nduꞌni ñati̱ chalyuu tyempo juani ―nacui̱―.
25308	LUK 7:44	Loꞌo nxñaꞌa̱ Jesús ca su ngaꞌa̱ nu cunaꞌa̱ biꞌ, liꞌ xaꞌ nchcuiꞌ loꞌo nu Simón biꞌ: ―Cuiꞌya nuꞌu̱ xi cuentya ñiꞌya̱ nu ndyuꞌni nu cunaꞌa̱ cua ―nacui̱―. Nu loꞌo ndyalaa naꞌ toniꞌi̱ jinuꞌu̱ tsa̱, ná nda nuꞌu̱ hitya tyaati̱ quiyaꞌ naꞌ; pana nu cunaꞌa̱ cua ni, cua nguiꞌí̱ choꞌ quiyaꞌ naꞌ loꞌo hitya cloo choꞌ, cua nguxquityi choꞌ quiyaꞌ naꞌ loꞌo quicha̱ꞌ que choꞌ.
25360	LUK 8:46	Liꞌ xaꞌ nguxacui̱ Jesús chaꞌ jiꞌi̱ nguꞌ chaca quiyaꞌ: ―Chañi chaꞌ cua ndyalaꞌ sca ñati̱ jnaꞌ ―nacui̱―. Ngua tii naꞌ chaꞌ juersa ꞌna ndyaa nguaꞌni joꞌo jiꞌi̱ sca ñati̱.
25366	LUK 8:52	Nxiꞌya tsa xi xaꞌ la nguꞌ ndiꞌi̱ nguꞌ nde liyaꞌ xquiꞌya chaꞌ ngujuii nu cunaꞌa̱ piti biꞌ. Liꞌ nchcuiꞌ Jesús loꞌo nguꞌ biꞌ: ―Ná xiꞌya ma̱ ―nacui̱―. Siꞌi na ngujuii nu quicha re, na lajaꞌ ti re ―nacui̱ Jesús jiꞌi̱ nguꞌ.
25502	LUK 11:28	Liꞌ nguxacui̱ Jesús chaꞌ jiꞌi̱: ―Siꞌi chaꞌ biꞌ ―nacui̱―. Tsoꞌo la ntsuꞌu tyiquee ñati̱ nu cuaꞌa̱ jyaca̱ jiꞌi̱ lcaa chaꞌ nu nda ycuiꞌ Ndyosi loꞌo nguꞌ, nu taquiyaꞌ jiꞌi̱ lcaa chaꞌ biꞌ.
25607	LUK 13:20	Chaca quiyaꞌ nda Jesús sca cui̱i̱ loꞌo nguꞌ: ―Chaca chaꞌ chcuiꞌ naꞌ loꞌo ma̱ ñiꞌya̱ caca loꞌo laca ycuiꞌ Ndyosi loo neꞌ cresiya jiꞌi̱ ma̱ ―nacui̱―.
25739	LUK 17:19	Liꞌ nchcuiꞌ Jesús loꞌo nu quiꞌyu biꞌ: ―Tyatu̱ nuꞌu̱ chaꞌ tyaa nuꞌu̱ juani ―nacui̱―. Cua ngua tsoꞌo nuꞌu̱ juani chaꞌ jlya tiꞌ nuꞌu̱ chaꞌ nu nda naꞌ loꞌo nuꞌu̱.
25775	LUK 18:18	Ndacua ndu̱ sca ñati̱ tlyu nu laca loo jiꞌi̱ nguꞌ judío. Liꞌ nchcuane yu biꞌ jiꞌi̱ Jesús: ―Mstru, tsoꞌo tsa nduꞌni nuꞌu̱ ―nacui̱―. ¿Ñiꞌya̱ cuaꞌni naꞌ chaꞌ caja chalyuu nu ná ngaꞌa̱ chaꞌ tye ꞌna? ―nacui̱ nu quiꞌyu biꞌ.
25842	LUK 19:42	―Masi tsa̱ juani ti nu loꞌo tya ndyiji xi tyempo jiꞌi̱ ma̱, si tyajaꞌa̱ ma̱ cuna ma̱, taca ta naꞌ sca chaꞌ loꞌo ma̱; tsoꞌo tsa caca jiꞌi̱ ma̱ liꞌ, ti̱ ti tyiꞌi̱ ma̱ liꞌ. Pana juani ―nacui̱ Jesús―, ná nchca ca cuayáꞌ tiꞌ ma̱ chaꞌ re, chaꞌ cua ntsuꞌu yacu̱ꞌ ti chaꞌ re jiꞌi̱ ma̱ ―nacui̱―.
26092	LUK 24:32	Hora ti nacui̱ tsaca jiꞌi̱ tyaꞌa: ―¿Ha ná chañi chaꞌ tsoꞌo tsa ngua tiꞌ na? ―nacui̱―. Ti̱ ti ngutiꞌi̱ cresiya jiꞌna loꞌo lijya̱ ycuiꞌ nchcuiꞌ loꞌo na tyucui̱i̱, nu loꞌo nda yu chaꞌ loꞌo na, ñiꞌya̱ nu nchcuiꞌ quityi cusuꞌ ―nacui̱ jiꞌi̱ tyaꞌa.
26098	LUK 24:38	Liꞌ nchcuiꞌ Jesús loꞌo nguꞌ biꞌ: ―¿Ni chaꞌ laca ntsi̱i̱ ma̱ ndiꞌi̱ ma̱? ―nacui̱―. ¿Ni chaꞌ laca nclyacua tsa tiꞌ ma̱? ―nacui̱ yu jiꞌi̱ nguꞌ―.
26142	JHN 1:29	Ca chaca tsa̱ naꞌa̱ Juan chaꞌ cua lijya̱ ti Jesús slo. Loꞌo liꞌ nacui̱ Juan jiꞌi̱ ñati̱ nu ndu̱ slo: ―Ñaꞌa̱ tsoꞌo ma̱ jiꞌi̱ nu cusuꞌ cua ―nacui̱―. Cua ngusubi ycuiꞌ Ndyosi jiꞌi̱ nu cua chaꞌ caca yu sca msta̱ luꞌú, chaꞌ cuityi̱ lcaa quiꞌya nu ntsuꞌu jiꞌi̱ ñati̱ chalyuu ―nacui̱―.
26145	JHN 1:32	Chaca quiyaꞌ tsoꞌo tsa nchcuiꞌ Juan chaꞌ jiꞌi̱ Jesús loꞌo nguꞌ: ―Cua naꞌa̱ naꞌ loꞌo ngutuꞌu Xtyiꞌi ycuiꞌ Ndyosi nde cua̱ ya̱a̱ nguaꞌya lo Jesús ñiꞌya̱ ndaꞌya sca paloma ―nacui̱―.
26163	JHN 1:50	Loꞌo liꞌ nguxacui̱ Jesús chaꞌ jiꞌi̱ Natanael: ―¿Ha biꞌ chaꞌ jlya tiꞌ nuꞌu̱ jnaꞌ ―nacui̱ yu―, xquiꞌya chaꞌ cua nchcuiꞌ naꞌ loꞌo nuꞌu̱ chaꞌ cua naꞌa̱ naꞌ jinuꞌu̱ ca neꞌ yaca quityi biꞌ? ―nacui̱―. Chaꞌ xca ti laca biꞌ, tonu la chaꞌ ñaꞌa̱ nuꞌu̱ nde loo la.
26216	JHN 3:27	Liꞌ nguxacui̱ Juan chaꞌ jiꞌi̱ nguꞌ biꞌ: ―Tsa lo cua ti cña nchca jiꞌi̱ scaa na cuaꞌni na, tsa ñaꞌa̱ nu nda ycuiꞌ Ndyosi chacuayáꞌ cuaꞌni scaa na ―nacui̱―.
26236	JHN 4:11	―Cusuꞌ ―nacui̱ nu cunaꞌa̱ biꞌ jiꞌi̱ Jesús―, quiꞌñi tsa tyuu re; ná loꞌo cubeta jinuꞌu̱ ―nacui̱―. ¿Ñiꞌya̱ caca culo nuꞌu̱ hitya chaꞌ cuaꞌni cuꞌú nuꞌu̱ ꞌna? ―nacui̱―.
26237	JHN 4:12	¿Ha tlyu la nuꞌu̱ que jyoꞌo cusuꞌ Jacob jiꞌna nu nda tyuu re jiꞌi̱ ya? ―nacui̱―. Ndyiꞌyu jyoꞌo biꞌ hitya tyuu re, loꞌo juaꞌa̱ ndyiꞌyu sñiꞌ yu, loꞌo scu̱ꞌ nguꞌ ndyiꞌyu hitya re.
26239	JHN 4:14	Loꞌo coꞌo nguꞌ hitya nu ta naꞌ, ngaꞌaa tyucua nguityi nguꞌ tsiyaꞌ ti liꞌ ―nacui̱―. Ta naꞌ sca lo hitya coꞌo nguꞌ nu cuaꞌni cuꞌú cresiya jiꞌi̱ nguꞌ. Ndiꞌya̱ laca biꞌ: ñiꞌya̱ si laca sca su̱u̱ hitya nde neꞌ cresiya jiꞌi̱ nguꞌ, juaꞌa̱ ná ngaꞌa̱ chaꞌ tye chalyuu jiꞌi̱ nguꞌ liꞌ.
26243	JHN 4:18	Cua caꞌyu quiyaꞌ ngujui clyoꞌo nuꞌu̱ saꞌni la, loꞌo juaꞌa̱ siꞌi clyoꞌo laca nu quiꞌyu nu ngaꞌa̱ loꞌo nuꞌu̱ juani ―nacui̱―. Liñi tsa chaꞌ nu nchcuiꞌ nuꞌu̱ loꞌo naꞌ.
26244	JHN 4:19	―Cusuꞌ ―nacui̱ nu cunaꞌa̱ biꞌ―, cua ngua cuayáꞌ tiꞌ naꞌ juani chaꞌ tii tsa nuꞌu̱; sca nu laca tuꞌba jiꞌi̱ ycuiꞌ Ndyosi chaꞌ nchcuiꞌ Ni loꞌo ñati̱ laca nuꞌu̱ ―nacui̱―.
26246	JHN 4:21	―Cuaꞌa̱ jyaca̱ nuꞌu̱ jnaꞌ ―nacui̱ Jesús jiꞌi̱ nu cunaꞌa̱ biꞌ―. Cua ngulala ti tyempo chaꞌ ngaꞌaa cuaꞌni tlyu ma̱ jiꞌi̱ ycuiꞌ Ndyosi nde caꞌya tacati cua, ni siꞌi ca quichi̱ Jerusalén ―nacui̱―.
26250	JHN 4:25	Loꞌo liꞌ nguxtyacui nu cunaꞌa̱ biꞌ chaꞌ loꞌo Jesús chaca quiyaꞌ: ―Nda naꞌ cuentya chaꞌ cua ca̱a̱ ti sca ñati̱ tlyu nu ta ycuiꞌ Ndyosi jiꞌi̱ chaꞌ ca̱a̱ chalyuu, nu caca naa Cristo ―nacui̱―. Loꞌo ca̱a̱ yu biꞌ, liꞌ culuꞌu liñi yu lcaa chaꞌ tucui jiꞌna.
26259	JHN 4:34	Ndiꞌya̱ nacui̱ Jesús jiꞌi̱ nguꞌ biꞌ liꞌ: ―Loꞌo nduꞌni naꞌ cña jiꞌi̱ ycuiꞌ Ndyosi Sti naꞌ, liꞌ ndyaalaꞌ tiꞌ naꞌ ñiꞌya̱ si cua ndyacu naꞌ, ñiꞌya̱ si cua ndyoꞌo naꞌ hitya ―nacui̱ yu―. Ngaꞌa̱ chaꞌ cuaꞌni tye naꞌ cña nu nda Ni ꞌna lijya̱a̱ nde chalyuu ―nacui̱―.
26260	JHN 4:35	¿Ha ná chañi chaꞌ nu nchcuiꞌ nguꞌ ndiꞌya̱? “Loꞌo caca jacua coꞌ, loꞌo ti caca clacua” ―nacui̱ Jesús jiꞌi̱ nguꞌ nu ndyaca tsaꞌa̱ jiꞌi̱―. Pana chaca chaꞌ ñacui̱ naꞌ jiꞌi̱ ma̱ juani, chaꞌ xñaꞌa̱ ma̱ xi jiꞌi̱ ñati̱ quiñaꞌa̱ jua nu cua lijya̱ ti slo na ―nacui̱―. Ntiꞌ tsa nguꞌ biꞌ cuna nguꞌ chaꞌ nu chcuiꞌ naꞌ loꞌo nguꞌ. Ñiꞌya̱ laca sca xtya̱ nu tsoꞌo tsa ndyatsi, chaꞌ cua ngulala ti caca clacua, juaꞌa̱ laca nguꞌ biꞌ.
26298	JHN 5:19	Liꞌ nguxacui̱ Jesús chaꞌ jiꞌi̱ nguꞌ judío biꞌ: ―Ta naꞌ sca chaꞌ liñi loꞌo ma̱ juani ―nacui̱ yu―. Ná sca cña caca cuaꞌni naꞌ ycuiꞌ ti naꞌ, naꞌ nu laca̱ Sñiꞌ ycuiꞌ Ndyosi. Ñiꞌya̱ cña nu ñaꞌa̱ naꞌ chaꞌ nduꞌni Sti naꞌ, juaꞌa̱ ti cña nduꞌni naꞌ ―nacui̱―.
26304	JHN 5:25	Loꞌo juaꞌa̱ ta naꞌ chaca chaꞌ liñi loꞌo ma̱ ―nacui̱―. Cua ngulala ti hora, cua la cuiꞌ hora ndyalaa juani, chaꞌ xiꞌya naꞌ nu laca̱ Sñiꞌ ycuiꞌ Ndyosi jiꞌi̱ lcaa ñati̱ nu ndiꞌi̱ chalyuu; ñiꞌya̱ laca si na cua ngujuii nguꞌ laca, xquiꞌya chaꞌ cuxi nu ntsuꞌu jiꞌi̱ nguꞌ. Loꞌo cuna nguꞌ biꞌ chaꞌ nu chcuiꞌ naꞌ loꞌo nguꞌ, liꞌ caja chalyuu tsoꞌo jiꞌi̱ nguꞌ, lcaa ñati̱ nu xñi chaꞌ jnaꞌ ―nacui̱ Jesús jiꞌi̱ nguꞌ―.
26311	JHN 5:32	Ntsuꞌu chaca nu jlo tiꞌ chaꞌ liñi laca chaꞌ nu nchcuiꞌ naꞌ, loꞌo juaꞌa̱ jlo tiꞌ naꞌ chaꞌ liñi nchcuiꞌ nu biꞌ ―nacui̱―.
26314	JHN 5:35	Nu Juan ni ―nacui̱ Jesús liꞌ―, nda yu chaꞌ jnaꞌ loꞌo nguꞌ ñiꞌya̱ si laca yu sca xee nu ndubi tsa, nu nda xee tyiꞌi̱ ca chu̱ꞌ su ndiꞌi̱ yu biꞌ. Loꞌo juaꞌa̱ tsoꞌo xi ngua tiꞌ ma̱ loꞌo nchcuiꞌ Juan loꞌo ma̱ liꞌ ―nacui̱―.
26317	JHN 5:38	Ná ndyanu chaꞌ nu nchcuiꞌ Sti naꞌ neꞌ cresiya jiꞌi̱ ma̱, chaꞌ ná jlya tiꞌ ma̱ jnaꞌ chaꞌ laca naꞌ Sñiꞌ ycuiꞌ Ndyosi nu cua nda Ni ꞌna lijya̱a̱ chalyuu ―nacui̱―.
26335	JHN 6:9	―Ndu̱ sca nu piti quiꞌyu re ―nacui̱ Andrés―, loꞌo xi caꞌyu tyaꞌa xlyá tejeꞌ jiꞌi̱, loꞌo tucua tyaꞌa cualya sube jiꞌi̱ ―nacui̱―. Pana ná tyuꞌu scua chaꞌ biꞌ chaꞌ cacu ñati̱ quiñaꞌa̱ re ―nacui̱ Andrés jiꞌi̱ Jesús.
26352	JHN 6:26	Liꞌ nda Jesús sca chaꞌ loꞌo nguꞌ: ―Ndube tsa ti naꞌ chaꞌ cua lijya̱ ma̱ yaana ma̱ jnaꞌ xquiꞌya chaꞌ nda naꞌ xlyá nu ndyacu ma̱ tsubiꞌ ti ―nacui̱―. Nguaalaꞌ tiꞌ ma̱ loꞌo ndyacu ma̱ liꞌ. Chañi chaꞌ xquiꞌya chaꞌ biꞌ lijya̱ ma̱ yaana ma̱ jnaꞌ, siꞌi xquiꞌya cña tonu nu nguaꞌni naꞌ cuentya jiꞌi̱ ycuiꞌ Ndyosi.
26353	JHN 6:27	Tsoꞌo la ―nacui̱ Jesús liꞌ―, si cuaꞌni cña tiꞌ ma̱ chaꞌ caja sca chaꞌ nu talo jiꞌi̱ ma̱; chañi chaꞌ tyaalaꞌ tiꞌ ma̱ liꞌ, si caja chalyuu nu ná ngaꞌa̱ chaꞌ tye jiꞌi̱ ma̱. Nu na cacu na ni, xtyiꞌi ti talo na biꞌ, yala ti quiñuꞌu̱ na biꞌ. Pana naꞌ nu lijya̱a̱ chaꞌ caca naꞌ ñati̱, ta naꞌ sca chaꞌ tsoꞌo jiꞌi̱ ma̱ nu cuaꞌni chaꞌ tyaalaꞌ tiꞌ ma̱, loꞌo ná tye tsiyaꞌ ti chaꞌ biꞌ jiꞌi̱ ma̱ ―nacui̱―. Na cua nda ycuiꞌ Ndyosi Sti naꞌ chacuayáꞌ jnaꞌ chaꞌ ta naꞌ chaꞌ tsoꞌo biꞌ jiꞌi̱ ma̱.
26358	JHN 6:32	Liꞌ nchcuiꞌ Jesús loꞌo nguꞌ chaca quiyaꞌ: ―Liñi tsa chaꞌ nu nchcuiꞌ naꞌ loꞌo ma̱ juani: Ycuiꞌ Ndyosi Sti naꞌ laca nu ta chaꞌ tsoꞌo nu cacu ma̱, la cuiꞌ chaꞌ biꞌ laca nu ndyuꞌu nde su ndiꞌi̱ ycuiꞌ Ni; siꞌi la cuiꞌ chaꞌ ñiꞌya̱ nu nda jyoꞌo Moisés ndyacu nguꞌ cua saꞌni ―nacui̱―.
26361	JHN 6:35	―Ñiꞌya̱ nduꞌni tyaja loꞌo ndye ndyacu na jiꞌi̱, juaꞌa̱ cuaꞌni naꞌ loꞌo ñati̱, si xñi nguꞌ chaꞌ jnaꞌ ―nacui̱ Jesús liꞌ―. Ta naꞌ sca chalyuu jiꞌi̱ nguꞌ su xcuiꞌ ndyaalaꞌ tiꞌ nguꞌ ―nacui̱ Jesús jiꞌi̱ nguꞌ biꞌ―. Loꞌo lcaa ñati̱ nu tyuꞌu chaꞌ jiꞌi̱ nguꞌ loꞌo naꞌ, ngaꞌaa jña la nguꞌ xaꞌ lo na cacu nguꞌ; loꞌo xñi nguꞌ chaꞌ jnaꞌ, ngaꞌaa tyucua nguityi nguꞌ liꞌ ―nacui̱―.
26365	JHN 6:39	Na cua ntiꞌ Sti naꞌ chaꞌ ná chcunaꞌ ni sca ñati̱ nu cua ngusñi chaꞌ ꞌna. Loꞌo liꞌ cuaꞌni naꞌ chaꞌ tyuꞌú nguꞌ chaca quiyaꞌ loꞌo cua tye ti chalyuu ―nacui̱―.
26369	JHN 6:43	Liꞌ nguxtyacui Jesús chaꞌ loꞌo nguꞌ: ―Ngaꞌaa chcuiꞌ tsa ma̱ loꞌo tyaꞌa ma̱ jiꞌi̱ chaꞌ nu nda naꞌ loꞌo ma̱ tsa̱ ―nacui̱―.
26373	JHN 6:47	Liñi tsa chaꞌ nu nda naꞌ loꞌo ma̱ juani, chaꞌ ñati̱ nu ngusñi chaꞌ jiꞌi̱ ycuiꞌ Ndyosi ni, cua laca ngujui chalyuu nu ná ngaꞌa̱ chaꞌ tye jiꞌi̱ nguꞌ ―nacui̱―.
26384	JHN 6:58	Naꞌ laca̱ nu chaꞌ tsoꞌo nu cacu nguꞌ biꞌ ―nacui̱ Jesús jiꞌi̱ nguꞌ―, chaꞌ ngutuꞌu naꞌ nde slo ycuiꞌ Ndyosi lijya̱ naꞌ lo yuu; siꞌi la cuiꞌ tyaꞌa na nu ndyacu jyoꞌo cusuꞌ jiꞌna lo nati̱ꞌ btyi cua saꞌni ―nacui̱―. Ngaꞌaa luꞌú nguꞌ biꞌ juani, masi cua ndyacu nguꞌ chaꞌ biꞌ nu ngua saꞌni liꞌ; pana loꞌo caja chaꞌ tsoꞌo biꞌ jiꞌi̱ ma̱ chaꞌ cacu ma̱ ―nacui̱―, ná ngaꞌa̱ chaꞌ tye chalyuu jiꞌi̱ ma̱ liꞌ.
26394	JHN 6:68	Liꞌ nguxacui̱ Simón Pedro chaꞌ jiꞌi̱ Jesús: ―Cusuꞌ ―nacui̱―, ¿ma nde ntsuꞌu chaca seꞌi̱ su tsaa ya chaꞌ cuna ya lcaa ñaꞌa̱ chaꞌ liñi nu nchcuiꞌ nuꞌu̱? Ná ngaꞌa̱ chaꞌ tye chalyuu jiꞌi̱ ya si cuaꞌa̱ jyaca̱ ya jiꞌi̱ chaꞌ nu nchcuiꞌ nuꞌu̱ ―nacui̱―.
26404	JHN 7:7	chaꞌ ná liyeꞌ tiꞌ nguꞌ ñaꞌa̱ nguꞌ jiꞌi̱ ma̱; pana liyeꞌ tsa tiꞌ nguꞌ ñaꞌa̱ nguꞌ ꞌna, chaꞌ nchcuiꞌ liñi naꞌ loꞌo nguꞌ cuentya jiꞌi̱ chaꞌ cuxi nu nduꞌni nguꞌ ―nacui̱―.
26425	JHN 7:28	Biꞌ chaꞌ cui̱i̱ nchcuiꞌ Jesús ca su ndu̱ yu nclyuꞌu jiꞌi̱ nguꞌ neꞌ laa tonu biꞌ: ―Chañi chaꞌ nslo ma̱ ꞌna, chañi chaꞌ jlo tiꞌ ma̱ mala ngutuꞌu naꞌ ―nacui̱―, pana siꞌi cuentya jnaꞌ lijya̱ naꞌ ca nde. Sca ti ycuiꞌ Ndyosi nda ꞌna lijya̱a̱ chalyuu, loꞌo juaꞌa̱ ná nslo ma̱ jiꞌi̱ nu biꞌ ―nacui̱―.
26430	JHN 7:33	Liꞌ nacui̱ Jesús jiꞌi̱ ñati̱ nu ndiꞌi̱ neꞌ laa tonu biꞌ: ―Tya tyiꞌi̱ naꞌ la xi loꞌo ma̱ nde lo yuu chalyuu ―nacui̱―, loꞌo liꞌ tyaꞌa naꞌ slo ycuiꞌ nu Xuꞌna naꞌ nu nda ꞌna lijya̱a̱ ca nde ―nacui̱―.
26460	JHN 8:10	Ndacaꞌa̱ Jesús chaca quiyaꞌ, liꞌ nacui̱ yu jiꞌi̱ nu cunaꞌa̱ biꞌ: ―¿Macala ndyaa nguꞌ jua? ―nacui̱―. ¿Ha tya ndu̱ nu ngusta quiꞌya jinuꞌu̱?
26471	JHN 8:21	Liꞌ xaꞌ nchcuiꞌ Jesús loꞌo nguꞌ: ―Tsaꞌa naꞌ ―nacui̱ yu―, liꞌ tsaana ma̱ jnaꞌ ca su ndyaꞌa̱ naꞌ, pana ná quije naꞌ jiꞌi̱ ma̱ tsiyaꞌ ti ―nacui̱―. Tya lyiji quije naꞌ jiꞌi̱ ma̱ loꞌo cajaa ycuiꞌ ma̱ ñaꞌa̱ loꞌo cresiya cuxi jiꞌi̱ ma̱, pana ná caja chacuayáꞌ tsaa ma̱ ca su tyiꞌi̱ naꞌ liꞌ.
26478	JHN 8:28	Biꞌ chaꞌ tya nchcuiꞌ la Jesús loꞌo nguꞌ liꞌ: ―Tiyaꞌ la loꞌo sicua̱ ma̱ jnaꞌ lo crusi, liꞌ caca cuayáꞌ tiꞌ ma̱ chaꞌ laca naꞌ ñiꞌya̱ nu ni naꞌ jiꞌi̱ ma̱, naꞌ nu lijya̱a̱ chalyuu chaꞌ caca̱ ñati̱ ―nacui̱ Jesús―. Ná sca cña nduꞌni naꞌ chacuayáꞌ jiꞌi̱ ycuiꞌ ca naꞌ; ycuiꞌ Ndyosi Sti naꞌ, biꞌ laca nu nguluꞌu ꞌna lcaa ca chaꞌ nu nchcuiꞌ naꞌ ―nacui̱―.
26486	JHN 8:36	Naꞌ nu laca̱ nu sca ti Sñiꞌ ycuiꞌ Ndyosi ni, loꞌo cuaꞌni lyaá naꞌ jiꞌi̱ ma̱, chañi chaꞌ ngaꞌaa caca tatsaa nguꞌ jiꞌi̱ ma̱ chaꞌ cuaꞌni ma cña cuxi chaca quiyaꞌ ca su ndiꞌi̱ ma̱ ―nacui̱―.
26494	JHN 8:44	Ycuiꞌ nu xñaꞌa̱ laca sti cuꞌma̱, loꞌo juaꞌa̱ ntiꞌ ma̱ cuaꞌni ma̱ la cuiꞌ cña nu ngulo nu biꞌ jiꞌi̱ ma̱. Tya loꞌo nguxana chalyuu, tya liꞌ nguxana ndyuꞌni ñuꞌu̱ nu biꞌ jiꞌi̱ cresiya jiꞌi̱ ñati̱ ―nacui̱ Jesús―. Ná ngutuꞌu nu biꞌ ca su ntsuꞌu su̱u̱ chaꞌ liñi, ná ntsuꞌu chaꞌ liñi jiꞌi̱ nu biꞌ tsiyaꞌ ti ―nacui̱―. Loꞌo ñiloꞌo nu biꞌ jiꞌi̱ ñati̱, xquichaꞌ ycuiꞌ ca laca chaꞌ cuiñi nu nda nu biꞌ loꞌo nguꞌ. Sca nu cuiñi laca nu xñaꞌa̱, biꞌ laca sti lcaa nu cuiñi.
26504	JHN 8:54	Loꞌo liꞌ nacui̱ Jesús: ―Ná tsoꞌo naꞌ tsiyaꞌ ti si cuaꞌni naꞌ chaꞌ caca tlyu ycuiꞌ ca ti naꞌ, pana ycuiꞌ Ndyosi Sti naꞌ nduꞌni chaꞌ caca tlyu naꞌ ―nacui̱―. Nduꞌni ma̱ chaꞌ Sti ma̱ laca ycuiꞌ Ndyosi;
26539	JHN 9:30	Liꞌ nguxtyacui nu quiꞌyu biꞌ chaꞌ loꞌo nguꞌ fariseo biꞌ: ―Tlyu tsa chaꞌ nda ma̱ loꞌo naꞌ juani ―nacui̱―. Nde cua ti ndu̱ sca nu quiꞌyu nu nguaꞌni ca ti joꞌo cloo naꞌ, loꞌo ná jlo tiꞌ ma̱ tsiyaꞌ ti ma nde ngutuꞌu yu lijya̱ yu ―nacui̱―.
26540	JHN 9:31	Jlo tiꞌ lcaa tyaꞌa na chaꞌ ná ndaquiyaꞌ ycuiꞌ Ndyosi jiꞌi̱ chaꞌ nu nchcuiꞌ ñati̱ cuxi loꞌo Ni; ndaquiyaꞌ Ni jiꞌi̱ nguꞌ loꞌo nchcuiꞌ ñati̱ nu nduꞌni tacati, ñati̱ nu nduꞌni cña nu ngulo Ni jiꞌi̱ ―nacui̱―.
26558	JHN 10:8	Ná ndaquiyaꞌ xlyaꞌ biꞌ jiꞌi̱ ñati̱ nu ya̱a̱ yala la, chaꞌ xcuiꞌ nu cuaana laca nguꞌ biꞌ; tsa cuꞌ ti ntyucuaana nguꞌ na nu ntsuꞌu jiꞌi̱ tyaꞌa ñati̱ nguꞌ ―nacui̱―.
26560	JHN 10:10	’Tsa cuꞌ ti cña cuaana nduꞌni nu nguꞌ cuaana biꞌ ―nacui̱ Jesús―. Ndyaꞌa̱ nguꞌ biꞌ chaꞌ cuaꞌni ñuꞌu̱ nguꞌ jiꞌi̱ ñati̱, chaꞌ chcunaꞌ cresiya jiꞌi̱ ñati̱ biꞌ; na cua lijya̱ naꞌ chaꞌ ta naꞌ chalyuu tsoꞌo jiꞌi̱ ñati̱, su caca tyiꞌi̱ nguꞌ tyucui tyiquee nguꞌ liꞌ ―nacui̱―.