27	GEN 1:27	Bab-Dummad dule-obinyenonikid, na e-sunnague obinyenonikid. Bab-Dummad e-sunnague na imaksad. Machered, ome-ebo obinnisad.
59	GEN 3:3	Unnila nainu-nued-abargi sapi-wargwen-gwichid-e-sanbi geg anmar gunned. Bab-Dummad anmarga sogsado: ‘Melle a-sapi-e-sandi be gunmaloye, degine, melle be ebumarbaloye. Ar bemar guchale, bemar burgwemaloye.’
97	GEN 4:17	Caín e-omese-gochagu, e-ome gurgin-nika gunonikid. Machigwa-ega-uklesad, Enocʼye onugsasad. Caín, neggwebur urbenonikid. E-machi-nugba, we-neggwebur Enocʼye onugsanonikid.
98	GEN 4:18	Enoc, Irad-e-babad. Iradʼdi, Mehujael-e-babad. Mehujaelʼdi, Metusael-e-babad. Metusaelʼdi, Lamec-e-babmogad.
103	GEN 4:23	Ibagwengi, Lamec e-omemarga sokalid: “Ada, Zila, an bemarga ibmar-sogoedi, nue be an-itomalo: Dule naibi-an-imaksad-ular, an oburgwisad. Machigwa an-sarsosad-ular, an oburgwisad.
118	GEN 5:12	Cainán, birga-dulapaa-gakambe-nikadgi (70), e-machi-Mahalaleel gwalulesad.
121	GEN 5:15	Mahalaleel, birga-dulapaa-gakatar-nikadgi (65), e-machi-Jared gwalulesad.
122	GEN 5:16	A-sorba, Mahalaleel, birga-dulataled-ilabaabak gaka dulagwen-gakambe (830) napi-gudii gusad. Mahalaleel, machimala-baigan nikusbalid, degine, bunamala nikusbalid.
123	GEN 5:17	Degisoggu, Mahalaleel, bela birga-dulataled-ilabaabak gaka dulabake-gakambe-gakatar (895) dula-gudii gusad. Degi-birga-nika Mahalaleel burgwisad.
127	GEN 5:21	Enoc, birga-dulapaa-gakatar-nikadgi (65), e-machi-Matusalén gwalulesad.
128	GEN 5:22	Matusalén-gwalulesad-sorba, Enoc, birga-dulataled-ilapaa (300) Bab-Dummad-walikaa nanadii gusad. Enoc, machimala-baigan nikusbalid, degine, bunamala nikusbalid.
131	GEN 5:25	Matusalén, birga-dulabakebak-gakagugle-nikadgi (187), e-machi-Lamec gwalulesad.
132	GEN 5:26	A-sorba, Matusalén, birga-dulataled-ilagugle gaka dulabake-gakabo (782) napi-gudii gusad. Matusalén, machimala-baigan nikusbalid, degine, bunamala nikusbalid.
133	GEN 5:27	Degisoggu, Matusalén, bela birga-dulataled-ilabakebak gaka dulapaa-gakabakebak (969) dula-gudii gusad. Degi-birga-nika Matusalén burgwisad.
142	GEN 6:4	Masmala-Bab-Dummadba-nanamalad, dulemar-sisgan-nikudmargu, mimmigan-baknonimalad. A-burwigan dule-mas-bipisuli gusmalad. Wemala, epennegwa dule-gala-ibegan, degi, dule-nuga-nika gusmaladid. A-akale, dule-masdummagan we-napneggi-nika gunonikid.
162	GEN 7:2	Geb bela ibmar-durgan-swilidikmalad: Machered-walagugle (7), ome-walagugle, ur-dummadyaba be oubogo. Ibmar-durgan-swilidiksurmaladdi unnila machered-wargwen, ome-wargwen be oubogo.
207	GEN 9:1	Bab-Dummad Noéʼgi, degi, e-masmalagi ise-nued binsasad. Weyob ega sogsad: “Mimmigan-bukidar be nikumar, we-napneggi dula be omelomar, bela we-napneg-ugakaase ambikumar.
219	GEN 9:13	Mogir-imbaba an sue-mesoedi, we-napnegbo an igar-mesoed-e-wilubga guoed.
222	GEN 9:16	Mogir-imbaba sue megnonikile, an dakoed. Agi, ani, Bab-Dummad, bela dulemarbo, degine, bela ibmar-durgan-we-napneggi-bukmaladbo degisadegu-igar-mesisad an ebinsaoed.
234	GEN 9:28	Muusaila-mulusad-sorba, Noé amba birga-dulataled-ilapaa gaka dulabo-gakambe (350) dula-gudii gusad.
237	GEN 10:2	Jafet-masmala, wemalad: Gomer, Magog, Madai, Javán, Tubal, Mesec, degi, Tiras.
241	GEN 10:6	Cam-masmala, wemalad: Cus, Mizraim, Fut, degi, Canaán.
248	GEN 10:13	Mizraim-wagan, wemalad: Ludim, Anamim, Lehabim, Naftuhim,
258	GEN 10:23	Aram-masmaladi, wemalad: Uz, Hul, Geter, Mas.
260	GEN 10:25	Heber machimala-warbo nikusmogad: Machi-sailagined Pelegʼye nugad. Ar ade, a-ibagangi dulemar aisakided. Peleg-e-urba, Joctánʼye nugad.
265	GEN 10:30	Wemar Sefar-yalagansik, Mesa-nadedgi, bukwagusmalad. We-yalagande dad-nakwedsik naid.
296	GEN 11:29	Abram, Sarai-nikusad. Nacorʼdi, Milca-nikusad. Milcaʼde, degi, Isca, Harán-e-sisgan gumalad.
305	GEN 12:6	Geb Abram Canaán-yalagi dogded. Siquem-neggweburse warmakdapid, bia sapi-islidikid-Moreʼye-nugad-gwichidse. Deunni, a-yalagangine, Canaán-dulemala bukwamalad.
326	GEN 13:7	Molimarga mas unnisulidba, Abramʼga-dule-moli-bebe-nikad-akwemalad, Lotʼga-dule-moli-bebe-nikad-akwemalad-ebo na uluardamalad. Aginbali, a-ibagangine, Canaán-dulemar, degi, Ferezeo-dulemar a-yargine amba bukwamarmogad.
337	GEN 13:18	Geb degine, Abram nade gudsunnad, e-dordonegmar-siid sesa gusad. Abram Hebrón-neggwebur-walik megnaded, sapi-islidikmalad-Mamreʼgi-bukwadse. Agi, Abram Bab-Jehová-nuggi, Bab-Jehováʼga-ibmar-ogumakar-ukleged-aila sobsad.
350	GEN 14:13	Ar dule-wargwen nabir wakichasoggu, Abramʼga bela ibmar sognonikid. Abramʼde Hebreo-duled. Abramʼde Amorreo-dule-e-sapi-dummagan-walik maid. We-Amorreo-dulede Mamreʼye nugad. Mamreʼdi, gwenadgan nikad, amarde wemalad: Escol, Aner. Wemala, Abramʼba naimaladid.
355	GEN 14:18	Geb degine, Salem-e-rey-Melquisedec, madu, degi, vino Abramʼga senonikid. We-Melquisedecʼde dule-irwa-Bab-Dummad-Bur-Biriginedse-goledid.
356	GEN 14:19	Geb degine, Melquisedec, Abramʼgi ise-nued-binsaedgi, weyob sogded: “Abram, Bab-Dummad-Bur-Birigined begi ise-nued binsaoed. We-Bab-Dummad, nibneg, degi, napneg bela obinnisadid.
357	GEN 14:20	Bab-Dummad-Bur-Birigined-e-nug odummolesun. A-Bab-Dummad be-isdarmaladgi-nakwega be-imaksad.” Geb degine, Abram bela ibmar-gannar-susadi, yopira-emarbi-sogambegi (10) mamarisad. A-gwensak Melquisedecʼga uksad (10%).
361	GEN 14:24	Andi an ibmar abesulid. Unnila sapingana-anba-gudidimalad-e-mas-guchamaladbi anga unnigualed. Degine, dule-anba-arbimalad, Aner, Escol, degi, Mamre, amardi igar-maidba ibmar sumaloed.
370	GEN 15:9	Bab-Jehová abin-sogded: —Anga be we-ibmar sedagoed: Moli-bebe-nikad-ome-birgapaagwad, sibad-birgapaagwad, sibad-wawaad-machered-birgapaagwad, sapur-nuu-gwagwen, degi, wagnuu-e-mimmi-gwagwen be anga sedabalo.
418	GEN 17:20	”Emi, be-machi-Ismaelʼga be ibmar-egichisadi, an be-itosbalid. Be-machi-Ismaelʼgine ise-nued an binsamogoed. Mimmigan-bukidar-nikuega an imakoed, degine, wagan-bukidar-merguega an imakbaloed. Ismael, dule-dummagan-nuga-nikamalad e-ambe-gakabogwad-e-dadga (12) an imakoed, degine, e-dulamar ichesur an imakoed.
425	GEN 17:27	Machergan-bela-Abraham-neguyagi-gudidimalad, e-maimar-e-neg-yagi-gwalulesmalad, dule-baidse maimar-manigi-baklesad, amar Abrahamʼba belagwable abgan-uka-duku-siked-igar imaksamalad.
426	GEN 18:1	Bab-Jehová sapimar-islidikmalad-Mamreʼgi-gwichid-dikarba Abrahamʼse magarosad. Deunni, yorukudba, Abraham e-dordoneg-yawagakgi siid.
431	GEN 18:6	Abraham gwae-gwae e-dordonegyaba-dogdegu, e-ome-Saraʼga sogded: —¡Gwaegwa! Madubur-bur-nued, nued-mergu madu-sobega be sue.
432	GEN 18:7	Geb degi, Abraham, moli-bebe-nikamalad-bukwadse abarmakdebalid. Moli-senigwad-bur-nued, bur-san-dutugwad susad. Geb degine, dule-ega-arbaedgala uksad. Geb a-dulede, gwae yog duar-imaksad, adi, mas-gunmalagar.
450	GEN 18:25	Dogdar-itole, dule-ibmar-isgana-imakdisulid, dule-ibmar-isgana-imakdiidba be oburgwer. Ebobela emarbi isgusadyob be imako itole. Mer deyob be sae. Bee be, bela dule-we-napneggi-bukmaladga, igar-naboged-e-dummadsoggu, ¿igar-innikii maidba be imakosurde? Eye. Be igar-innikii maidba imakoed.”
465	GEN 19:7	Geb Lot dulemarga sogded: —Aimar, an bemarse wilesakwaa egismar. Melle bemar galagwensuli neg-imakmalo.
475	GEN 19:17	Bato neggweburgi nosmargua, baliwitur Lotʼga sokalid: —¡Be abarmakdemar, mer be burgwemalagar! Mer bar yarganba gannar atako, deginbali, yalaganba be wakinmalo. Melle nebagi be obunnobalo. Ar degisulir, bemar burgwemaloed.
495	GEN 19:37	E-sisgwa-dummadga susugwa uklenonikid. A Moabʼye onugsasad. Agi, Moab-dulemar-bukwadi danikid.
522	GEN 21:8	Machigwa-Isaac dunguded, degine, mam-iargunonikid. Mam-iargusad-ibagi, Abraham iba-dummad onosad.
526	GEN 21:12	Ar Bab-Dummaddi Abrahamʼga sogded: “Melle be-machigi, degine, be-maigi nunmak be itoge. Ar ibi Sara bese egichialile, aba be ibmar sae. Ar ade, Isaac-waganbi be-wagan-sunnadga gumaloed.
530	GEN 21:16	Agarʼdi bannabasaar wilubba-banguedgi signaded. Ar ade, binsasad: “Machi burgwialir, an dakbisulid.” Agar sigidapgu, machi boalid.
531	GEN 21:17	Bab-Dummad, machigwa bosiid itosad. Bab-Dummad-e-baliwitur nibneg-akar Agarʼse gornonikid, ega sogded: “¿Agar, igi be itoge? Mer be bukib itoge, ar Bab-Dummad be-machi-bosiid itosad.
550	GEN 22:2	Bab-Dummad Abrahamʼga sogded: —Isaac, be-machi-wargwennagwad be nue-sabedi, Moriah-yalaganse be sede. A-yalagan-mosale, an bega yar-oyogoedgi be-machi be anga ogumakoed.
553	GEN 22:5	Geb degine, Abraham e-maimarga sogded: —Wegi bemar moli-uayasuidmala an-edarbemalo. Machigwa-anbogwa Bab-Dummad-e-nug-odummogega andi naoed. Geb degine, gannar anmar bese nonikoed.
556	GEN 22:8	—Machi, Bab-Dummad anmarga sibad-wawaad-senigwad udagoed, anmar ega ogumakar ukegar. Deyob, ebogwa imakenadap gusmalad.
560	GEN 22:12	Bab-Jehová-e-baliwitur Abrahamʼga sogded: —Melle machigwa be oakaloge. Melle be naibi-imake. Ar bato an wisid, be Bab-Dummad-dobee nanadiid. Ar be gwen sogsasulid, an-machi-wargwensakad melle be anga ukodeeye.
568	GEN 22:20	Degi-undaradgine, Abrahamʼga soglenonikid, e-urba-Nacor machimala-nikamoye, Milca ega baksaye.
570	GEN 22:22	Deginbali, Nacor-e-masmala-baigan, Milcaʼbo-baksabalid, wemalad: Quesed, Hazo, Pildas, Jidlaf, degi, Betuel.
571	GEN 22:23	We-Betuelʼde Rebeca-e-babad. Wemar-walabaabakadi (8) Nacor-machimalad, Milca-ebo baksadid. Nacorʼde Abraham-e-urbad.
572	GEN 22:24	Deginbali, Nacor, Reúma-ebo baid-machimala nikusbalid. Reúmaʼde e-ome-dikarbalidid. We-ebogwa machimala-baksadi, wemalad: Teba, Gaham, Tahas, degi, Maaca.
578	GEN 23:6	—¡Dummad, bega an sogmardo! Ar Bab-Dummad anmar-abargine, dule-dummadga be-susad. Degisoggu, be-ome-mui anmar-neg-uan-bur-nuedgi be dige. Ar anmar-wargwensaar bega sogosulid: Melle be-ome-e-mui be anmar-neg-uangi digye.
581	GEN 23:9	‘Anga, e-nainu-dikarba-akwasaila-ollor-siid, Macpelaʼye-nugad, manigi ukye.’ Ar e-mani-gargeguedba, an bennukoed. Ar degiir, geb an neg-uan wegi nikuoed.
589	GEN 23:17	Weyobi, Mamre-dad-nakwedsik Efrón-nainu-Macpelaʼgi-naidi, Abrahamʼgadga gunonikid. A sogleged, nainu, akwasaila-ollor-siid, bela sapimar, Abrahamʼgadga gunoniye.
591	GEN 23:19	Geb agine, Abraham akwasaila-ollor-siidgi e-ome-Sara-mui-digsa gusad. We akwasaila-ollor-dummad, Macpela-nainugi siid, Mamre-dad-nakwedsik. Mamre-neggweburde Hebrónʼye nugbalid, Mamre-neggwebur Canaán-yargi siid.
602	GEN 24:10	Geb a-sorbali, Abraham-e-mai moli-yargan-mureged-warambe (10) susad. Abraham-ibmar-nuegan-nikad binsa-ukega susbalid. Geb degine, Mesopotamia-yarse, Nacor-neggweburse naded.
607	GEN 24:15	Abraham-e-mai amba yoo Bab-Dummadse-goled bergue, dakded, yagwa-gwensak e-gukingi buglu-sii daniki. Dakleargua, we-yagwade Betuel-e-sisgwad, Rebecaʼye nugad. Betuelʼde Milca-e-machid. Milcaʼdi Nacor-e-omed. Nacorʼdi Abraham-e-urbad.
611	GEN 24:19	Abraham-e-mai nue-gobsagua, Rebeca ega sogded: —Moli-yargan-muremaladga an dii weemogoed, adi, bela na dii-gobbimaladba gobmalagar.
616	GEN 24:24	Yagwa abin-sogded: —An Betuel-sisgwa. An-babde Nacor-machid, Milcaʼbo baksadid.
625	GEN 24:33	Abraham-e-maiga mas guakwaa sisgu, Abraham-e-mai sogded: —Mas-inse an gunnosuli. Bina an bega ibmar-sogbied soggwelergebed. Labán abin-sogded: —Degite, sogdo.
639	GEN 24:47	”Geb degine, an ese egichided: ‘¿Be doa-sisgwa?’ ”Bunagwa an-abin imaksad: ‘An Betuel-sisgwaye. An-babde Nacor-machiye, Milcaʼbo baksadye.’ ”Geb degine, an ega e-asugi olasu yosad, geb deginbali, e-sakwamargi sakwagi-nasikleged an ega nasiksabalid.
648	GEN 24:56	Abraham-e-maidi abin-sogded: —Melle bar an-igar gamalo. We-an-bese-nonikidi Bab-Jehová bela ibmar-nueganbi-guega imaksad. Degisoggu, gannar an-dummad-negse-naed be an-imakmarsun.
661	GEN 25:2	A-omebogwa, mimmigan-nikusad wemalad: Zimram, Jocsán, Medán, Madián, Isbac, Súa.
663	GEN 25:4	Madián-e-masmaladi, wemalad: Efa, Efer, Hanoc, Abida, degi, Elda. Bela-wemala Cetura-e-wagan gumalad.
668	GEN 25:9	E-masmala, Isaac, degi, Ismael, Mamre-dad-nakwedsik akwasaila-ollor-siid-Macpelaʼye-nugadgi, Abraham-digsamalad. A-nainude, Efrónʼgadinad. Efrónʼde Zohar-machid, Het-duled.
672	GEN 25:13	Ismael-e-masmala e-gwalulesadba ilemakar naid. Weyob nugmalad: Nebaiot. A e-machi-dummad, geb a-yarba, Cedar, Adbeel, Mibsam,
673	GEN 25:14	Misma, Duma, Massa,
686	GEN 25:27	Masmala-warbogwad dungudmalad. Esaú ibmar-make-duledid. Sapurba-gudiile, yeer-itodaed. Jacobʼdi dule-boo-daedid. Neggi-gudiile, bur-yeer-itodaed.
695	GEN 26:2	Agine, Bab-Jehová Isaacʼse magarosad, ega sogded: “Melle be Egipto-yarse nao. Bia an bega sogoe, agi be megoed.
703	GEN 26:10	Ar Abimelecʼdi abin-sogded: —¿Ar ibiga-wede deyob be anmar-imaksa? Machered-gwensak, we-neggweburgined ar be-omese gochana, isguega be anmar-imaksanad.
717	GEN 26:24	A-mutikidgine, Bab-Jehová Isaacʼse magarosad, ega sogded: “Ani, an be-bab-Abraham-e-Bab-Dummadid. Melle be dobguo, an beba gudiguad. An-mai-Abraham-ulale, begi ise-nued an binsaoed, wagan-bukidar an bega ukoed.”
729	GEN 27:1	Isaac bato nue selebagusad, degi, aku-atakgusbalid. Ibagwengine, Isaac, e-machi-dummad-Esaúʼse gochad. Geb ega sogded: —¡Machi! Esaú abin-sogded: —Degite. ¿Ibua?
730	GEN 27:2	Geb Isaac sogdebalid: —Mag be an-daked, an nue-selebagusad. Ukiar sunna an burgwed.
736	GEN 27:8	Machi, degisoggu, nue be an-itogo. An-ibmar-bega-sogoedba, bela be imako.
741	GEN 27:13	Ar e-nandi Jacob-abin sogded: —Machigwa, be ukabsaleye sogele, ani an ukabsalegoed, bedi ollordo. Degisoggu, an-ibmar-bega-sognaidba be imake. Sibad-mimmi-senigana-warbo be anga sedage.
748	GEN 27:20	Geb degine, Isaac e-machiga sogded: —Machi, ¿igi nabir bato be ibmar abingusbinne? Jacob e-bab-abin sogded. —Bab-Dummad-Jehová gwae-gwae ibmar-abinguega an-bendaksad.
753	GEN 27:25	Geb degine, e-bab Jacobʼga sogded: —Machi, anga be mas dake, adi, be-ibmar-maksad an gunnegar. Geb a-sorba, an-ise-nued-begi-binsaed an bega sogoed. Jacob e-babga mas daksasunnad, degi, ega vino senonibalid. Isaac nue-mas-guchad, degi, nue-gobsabalid.