24	GEN 1:24	Geb degi, Bab-Dummad sogdebalid: “Napagi bela ibmar-durgan na egad-egad-balibimaladba ambikumar: Ibmar-durgan-sunna-akwilemalad, ibmar-durgan-napagi-garmakdimalad, ibmar-durgan-sapurbarmalad, bela na egad-egad-balibimaladba ambikumar.” Deyob gunonikid.
26	GEN 1:26	Geb degi, Bab-Dummad sogdebalid: “Emisgindi, anmar, dule-obinyesun, anmar-sunnague anmar imakoed. Dulede, we-ibmar-durganmargi gangued-nika guoed: Uamargi, nuumargi, ibmar-durgan-sunna-akwilemaladgi, ibmar-durgan-sapurbarmaladgi, ibmar-durgan-napagi-garmakdimaladgi, bela we-ibmarmargi we-napneggi gangued-nika guoed.”
29	GEN 1:29	Geb degi, Bab-Dummad dulega sogdebalid: “We-napneggi bela gagan-nabir-gwag-nikumalad, degi, bela sapimar-e-sangi-gwag-nikumalad, an bemarga uked. A-ibmar-durba bela bemar-masga guoed.”
46	GEN 2:15	Nainu-nued-Edén-akwega, Bab-Dummad-Jehová, dule-ogwisnonikid, agi arbaegar.
51	GEN 2:20	Weyobi dule bela we-ibmar-durgan: Ibmar-durgan-sunna-akwilemaladga, bela nuumarga, bela ibmar-durgan-sapurbarmaladga, nug amisad. Degi-inigwele, Adánʼgardi e-bendaked sate gusad.
70	GEN 3:14	Geb degine, Bab-Dummad-Jehová naibega sogded: “Ar weyob be imaksasoggu, ibmar-durgan-akwilemaladba, degi, ibmar-durgan-sapurbarmalad-baiganba, bedi bur bule be ukabsalesun. Emi-iba-onodedgi, be napagi unimakdii gusun, degine, be-burgwedse, napa-madii be gusun.
78	GEN 3:22	Geb degine, Bab-Dummad-Jehová sogded: “Emigindi, dule anmar-sunnaa gunonimogad. Dulemarde ibmar-nued-wisi, degine, ibmar-isgana-wisi gunonikid. Ar dule sapi-e-san-dula-dule-imaked-guchale, degisadegu dula-gudii guoed. Degisoggu, melle dulemar we-sapi-e-san gwanegala, degi, melle gunnegala, dulemar-nainu-nuedgi-gudiid, an onogoed.”
81	GEN 4:1	Adán e-ome-Evaʼse-gochagu, Eva gurgin-nika gunonikid. Evaʼga susugwa uklenonikid, Caínʼye onugsasad. Ar Eva sogded: “Bab-Jehová na e-sogedba susugwa anga uksad.”
88	GEN 4:8	Ibagwengi, Caín e-urbaga sokalid, sapurba wis-garmakdii sanamarye. Geb ebo-sapurba-gudiidgi, Caín e-urba-Abel-sarsosad, geb oburgwisad.
103	GEN 4:23	Ibagwengi, Lamec e-omemarga sokalid: “Ada, Zila, an bemarga ibmar-sogoedi, nue be an-itomalo: Dule naibi-an-imaksad-ular, an oburgwisad. Machigwa an-sarsosad-ular, an oburgwisad.
105	GEN 4:25	Adán e-omese gochabargu, Eva susugwa-nikunonikid. Geb Eva sogded: “Caín, e-urba-Abel-oburgwissoggu, Bab-Dummad susugwa anga Abel-anar uknonikid.” A-ular, Eva a-susugwa Setʼye onugsasad.
142	GEN 6:4	Masmala-Bab-Dummadba-nanamalad, dulemar-sisgan-nikudmargu, mimmigan-baknonimalad. A-burwigan dule-mas-bipisuli gusmalad. Wemala, epennegwa dule-gala-ibegan, degi, dule-nuga-nika gusmaladid. A-akale, dule-masdummagan we-napneggi-nika gunonikid.
145	GEN 6:7	A-ular, Bab-Jehová sogded: “An dule-obinnisad we-napneggi an obelogodo. Degine, bela ibmar-durgan, bela ibmar-durgan-napagi-garmakdimalad, degi, nuumar an obelobalodo. An we-ibmarmar-obinnisadgi, nue-nunmak an itoged.”
158	GEN 6:20	Bela ibmar-dula na egad-egad balibimaladba, abin-abin war-warbo ur-dummadyaba beba ubomogo: Bela nuumar, bela ibmar-durgan, bela ibmar-durgan-napagi-garmakdimalad, adi, bela amar durgumarmogagar.
168	GEN 7:8	Ibmar-durgan-swilidikmalad, ibmar-durgan-swilidiksurmalad, nuumar, ibmar-durgan-napagi-garmakdimalad,
171	GEN 7:11	Noé birga-dulataled-ilanergwa-nikadgi (600), nii-warbogwad-ibambe-gakagugledgi, dii-wilasailadgi bela napa-urba-dii-sailagan-mamaid utuded, degine, nibneggi-dii-sailagan-mamaid argaded.
173	GEN 7:13	Noé, ur-dummadyaba-dogsad-ibagi, wemar eba dogsamarmogad: E-ome, e-machi-Sem, e-machi-Cam, e-machi-Jafet, degi, e-masmala-omegan. We-dulemarbi ur-dummadyaba dogsamalad.
174	GEN 7:14	Wemarba bela ibmar-durgan-na-egad-egad-balibimalad dogsamarbalid. A-ibdurgan wemalad: Ibmar-durgan-sapurbarmalad, ibmar-durgan-sunna-akwilemalad, ibmar-durgan-napagi-garmakdimalad, nuumar, degi, bela ibmar-sakan-nikamalad. We-ibmar-durgan, Noéʼba ur-dummadgi dogsamarmogad.
181	GEN 7:21	Weyob bela ibmar-durgan-we-napneggi-bukwad burgwisad: Nuumar, ibmar-durgan-sunna-akwilemalad, ibmar-durgan-sapurbarmalad, ibmar-durgan-unimalad, degi, bela dulemar burgwismarmogad.
183	GEN 7:23	Weyob bela we-napneggi we-ibmarmar obelolesad: Dulemar, ibmar-durgan, ibmar-durgan-napagi-garmakdimalad, degi, nuumar, amar bela burgwismalad.
185	GEN 8:1	Geb degine, Bab-Dummad Noéʼgi, degi, ibmar-durgan-sapurbarmaladgi, ibmar-durgan-sunna-akwilemaladgi, bela ur-dummadyaba-bukwadgi binsaded. Bab-Dummad we-napneggi burwa ogornonikid. Geb degi, dii ilided.
188	GEN 8:4	Geb nii-walagugled-ibambe-gakagugledgi, ur-dummad Ararat-yalagangi megidapid.
197	GEN 8:13	Degidgine, Noé birga-dulataled-ilanergwa-gakagwensak-nikadgi (601), napneg nue dingusad. Nii-gebe-gwisguded-ibagwenadgi, Noé ur-dummad-e-uas earisad. Geb agi dakded, napa dingusnai.
201	GEN 8:17	Ibmar-dula-gudidimalad ur-dummadyaba-bukwad bela be onobalo: Nuumar, ibmar-durgan, degi, ibmar-durgan-napagi-garmakdimalad, adi, amar bela we-napneg-naid-ugakaase mimilemalagar. Deginbali, dula ichesur mergumalaga, we-napneg-naidgi bela ambikumalagar.”
203	GEN 8:19	Bela ibmar-durgan ur-dummadyaba-bukmaladi na-egad-egad-balibimaladba, ainismarmogad: Bela ibmar-sapurbarmalad, degi, bela ibmar-durgan-akwilemalad, bela ibmar-durgan-napagi-garmakdimalad, bela nuumar, ur-dummadgi ainismalad.
204	GEN 8:20	Geb agine, Noé, Bab-Jehová-nug-odummogega, ibmar-ogumakar-ukleged-aila sobsad. Geb Noé bela ibmar-durgan-swilidikmalad, degi, nuumar-swilidikmalad akar-akar-ugakaase susad. Geb degine, ailagi ogumakar Bab-Jehováʼga uksad.
208	GEN 9:2	Bela we-napneggi ibmar-dula-gudidimalad be-dobedba bemar-asabin gwakidmaloed: Bela ibmar-durgan-gukumalad, bela ibmar-durgan-napaginmalad, bela ibmar-durgan-napagi-garmakdimalad, bela ibmar-durgan demarginmalad. Bela-a-ibmar-durgangi be obine gumaloed.
216	GEN 9:10	Degine, bela ibmar-dulamalad bemarba ur-dummadyagi-bukwa-ainisad: Nuumar, ibmar-durgan-sunna-akwilemalad, ibmar-durgan-sapurbarmalad. ”Bela we-ibmar-durgan-we-napneggi-bukmaladbo an igar mesoed.
218	GEN 9:12	”An bemar-ebo, degine, an bela ibmar-durganbo-igar-mesnaidi, degisadegu maiguoed. A-e-wilubgan weyob maiguoed: Sue maiguoed.
228	GEN 9:22	Canaán-e-bab-Cam, e-bab-Noé uka-swiri-mai-daksagu, nodegusad. E-iamar-warbogwad-magaba-gwichidga sogdapid.
240	GEN 10:5	Wemar, Jafet-wagan gumalad. Wemar, demar-gakaba ambikusmalad. Gaya emar-emarbi sunmakmalad. Degine, na e-dadgan-e-dadganba, dulemar na emar-emar ambikusmalad.
254	GEN 10:19	Canaán-dulemar e-yar-gasadi, wemalad: Sidón-neggweburgi onoded, Gerar-yalasik, Gaza-neggweburse warmaksad. We-yar-e-neggweburmarde, wemalad: Sodoma, Gomorra, Adma, degine, Zeboimʼsik, Lasa-neggweburse.
255	GEN 10:20	Wemar, Cam-e-wagan gumalad. E-dadgan-e-dadganba, degine, gaya emar-emarbi-sunmake ambikusmalad. Yar-egad-egad, degine, dulemar emar-emarbi ambikusmalad.
256	GEN 10:21	Deginbali, Jafet-e-ia-Sem, machimala-nikusmogad. Heber-masmala, bela Sem-wagan gumalad.
266	GEN 10:31	Wemar Sem-e-wagan gumalad. E-dadgan-e-dadganba, degine, gaya emar-emarbi-sunmake ambikusmalad. Yar-egad-egad, degine, dulemar emar-emarbi ambikusmalad.
272	GEN 11:5	Geb Bab-Jehováʼdi, dulemar-neggwebur-dummad-sobnanaid, degine, dulemar-neg-matusulid-sobnanaid-dakega aidenonikid.
273	GEN 11:6	Geb Bab-Jehová binsaded: “Wemar, unnila dulemar-soggwenna gued, unnila gaya-soggwenna sunmakmalad. We-arbaedgebe-imaklenaid-obelosmalale, sogdamarbaloed, arbaed-baid anmar imakmarbarye. Degisoggu, bar galegosurmalad.
316	GEN 12:17	Degine, Faraón e-negse Abram-e-ome-Sarai-sesad-ulale, Bab-Jehováʼdi Faraón, degi, e-negyaginmalad-sabsur-odurdaksad, boni-dummagan ega uksad.
329	GEN 13:10	Lot bela Jordán-diwarsik Zoar-neggweburse neba-naid dakded. A-nebagi dii nue-nika, degine, Bab-Jehová-nainu-nuedyob-daklege dakalid. E-daklegedde Egipto-yaryob daklebalid. Ar Bab-Jehová Sodoma-neggwebur, degi, Gomorra-neggwebur-obelogoed-iduale, we-neggweburmar yeer daklegenad.
333	GEN 13:14	Lot Abramʼgi-bangusad-sorba, Bab-Jehová Abramʼga sokalid: “Be-maidgi be dad-nakwedsik, dad-argwanedsik, dad-nakwed-argan-nuedsik, dad-nakwed-argan-sapiledsik nue be neg dako.
338	GEN 14:1	Deunni, we-reymar negdakmamaid: Sinar-e-rey-Amrafel, Elasar-e-rey-Arioc, Elam-e-rey-Quedorlaomer, degi, Goim-e-rey-Tidal, wemar, neg-dakmaid.
339	GEN 14:2	A-ibagangi, deunni, we-reymar-walabakegwad, baigan-reymar-ataled-ebo bila-onogega na atosmalad. We-reymar-walataled atosmarmogad: Sodoma-e-rey-Bera, Gomorra-e-rey-Birsa, Adma-e-rey-Sinab, Zeboim-e-rey-Semeber, degi, Bela-e-rey. We-Bela-neggweburde, Zoarʼye nugbalid.
344	GEN 14:7	Quedorlaomer, degine, reymar-eba-gudidimalad we-dulemar-sogabakegwadgi-nakwisgu, gannar aibiris armalad. Geb Enmispatʼye-neg-nugadse nonimalad. We-Enmispatʼde, Cadesʼye nugbalid. Rey-Quedorlaomer, degi, reymar-eba-gudidimalad Amalec-dulemar-yalaganba bela ibmar obelonadap gusmalad. Deyob Amorreo-dulemar-imaksamarbalid. We-Amorreo-dulemarde Hazezon-Tamar-yalagangi bukwamalanad.
346	GEN 14:9	Agi, we-reymar-e-ataled, baigan-reymar-warbakegwadbo uludmalad. Ebo-ulusmaladi, wemalad: Elam-e-rey-Quedorlaomer, Goim-e-rey-Tidal, Sinar-e-rey-Amrafel, degi, Elasar-e-rey-Arioc, we-reymar ulusmaladid.
353	GEN 14:16	We-reymar-ibmar-sesadi, Abram bela gannar susad. Deyobi, Abram e-niga-Lot-galesad onosad, degi, bela gannar Lot-e-ibmar susbalid. Deginbali, omegan-onosbalid, degi, bela dule-baigan-galesmalad amba onosbalid.
355	GEN 14:18	Geb degine, Salem-e-rey-Melquisedec, madu, degi, vino Abramʼga senonikid. We-Melquisedecʼde dule-irwa-Bab-Dummad-Bur-Biriginedse-goledid.
362	GEN 15:1	Weyob-gusad-sorbali, Abram negburgan-daksad. Agi, Bab-Jehová ega sunmakded, ega sogded: “Abram, melle be dobguo, ar sigu-abgaedyobi, an be-irwa gwisgudioed. Degine, bega-ibmar-nued-uklegoedi, bega ibmar-dummadga guoed.”
363	GEN 15:2	Abram Bab-Jehová-abin sogded: —Bab-Jehová-Bela-Negsemaid, ar be wisid, an mimmigan-sated, degite, ibmar-dummad be anga ukoye sogedi, ¿ar wede ibi-nuedga anga guosunna? Degisoggu, bela-an-ibmar-nikadi, we-anga-neg-daked-Damasco-dule-Eliezer, an-sorba bela ibmar gaoed.
370	GEN 15:9	Bab-Jehová abin-sogded: —Anga be we-ibmar sedagoed: Moli-bebe-nikad-ome-birgapaagwad, sibad-birgapaagwad, sibad-wawaad-machered-birgapaagwad, sapur-nuu-gwagwen, degi, wagnuu-e-mimmi-gwagwen be anga sedabalo.
379	GEN 15:18	A-ibagi, Bab-Jehová Abram-ebo igar mesisad. Agi Abramʼga sogded: —We-yala be-waganga an ukoed, Egipto-diwar-maid-akar, diwar-dummad-Éufrates maidse.
380	GEN 15:19	Yarmar an bega sogedi, wemardo: Ceneo-dulemar-bukwad-yala, Cenezeo-dulemar-bukwad-yala, Cadmoneo-dulemar-bukwad-yala,
381	GEN 15:20	Het-dulemar-bukwad-yala, Ferezeo-dulemar-bukwad-yala, Refa-dulemar-bukwad-yala,
382	GEN 15:21	Amorreo-dulemar-bukwad-yala, Canaán-dulemar-bukwad-yala, Gergeseo-dulemar-bukwad-yala, Jebuseo-dulemar-bukwad-yala, bela we-yalamala an be-waganga ukoed.
385	GEN 16:3	Deunni, Abram birgambegus (10) Canaán-yargi maid. Geb a-ibagangine, Sarai bunagwa-Egiptoʼgined-Agarʼye-nugad, Abramʼga urmaksad, ese golegar.
419	GEN 17:21	An-bebo-igar-mesisaddina, Isaac-ebogwa igar-maigu an imakoed. Sara birgagwense we-ibaganse bega mimmi bakoed.”
420	GEN 17:22	Bab-Dummad Abraham-ebo-sunmaknaid-bergusgua, nade gusad.
432	GEN 18:7	Geb degi, Abraham, moli-bebe-nikamalad-bukwadse abarmakdebalid. Moli-senigwad-bur-nued, bur-san-dutugwad susad. Geb degine, dule-ega-arbaedgala uksad. Geb a-dulede, gwae yog duar-imaksad, adi, mas-gunmalagar.
450	GEN 18:25	Dogdar-itole, dule-ibmar-isgana-imakdisulid, dule-ibmar-isgana-imakdiidba be oburgwer. Ebobela emarbi isgusadyob be imako itole. Mer deyob be sae. Bee be, bela dule-we-napneggi-bukmaladga, igar-naboged-e-dummadsoggu, ¿igar-innikii maidba be imakosurde? Eye. Be igar-innikii maidba imakoed.”
458	GEN 18:33	Bab-Jehová, Abraham-ebo-sunmaked-bergusgu, na naded. Abrahamʼdi gannar e-dordoneg-siidse nonikid.
459	GEN 19:1	Nue neg-gutulesa, baliwitur-warbogwad Sodoma-neggweburse modapmalad. Deunni, Lot, neggwebur-doged-yawagakgi siid, ar ade, agi gusgu dummagan ambikunonidamalad. Lot, a-dulemar-warbogwad-daksagua, abin nadegusad. Lot dulemar-warbogwad-asabin napase e-bebe ebulegedse dulluu imaksad.
473	GEN 19:15	Ar bato neg-oibodanigussoggu, baliwiturmar Lotʼga sokalid: —¡Gwaegwa! Be nae. Be-ome, degine, be-sisgan-warbogwad be sede. Ar be sedsulile, anmar we-neggwebur-sabsur-odurdaksokalidba, bemar burgwemarmogoed.
499	GEN 20:3	A-mutikidba, Bab-Dummad Abimelecʼse gabgi nonikid, ega sognonikid: —Be we-ome-sealid-ular, be burgo. Ar we-omede sui nikad.
503	GEN 20:7	Ar emigindi, ome e-suiga gannar be berbena. Ar we-machered Bab-Dummad-gayaburba-barsogedsoggu, be-ular Bab-Dummadse goloed, adi, mer be burgwegar. Ar omegwa gannar e-suiga be berbenasulirdi, be, degi, be-gwenadgan burgwemaloed.
508	GEN 20:12	Ar nabiri, we-omegwa an-bunad. An-bab-e-sisgwad, an-nandi e-nansulid. Deginbali, we-ome, an-omebalid.
513	GEN 20:17	Geb degine, Abraham Bab-Dummadse goted, geb Bab-Dummad Abimelec-onugusad, degi, e-ome-onugusbalid. Deginbali, e-maimar-omegan-onugusbalid, adi, nabir sunna mimmi-bake gumalagar.
518	GEN 21:4	Isaac ibabaabakgus-gwalulesadgi (8), Abraham Bab-Dummad-ega-sogsadba, Isaacʼga abgan-uka-duku siksad.
528	GEN 21:14	Neg-oibosadgi, wakudaryalaba, Abraham Agarʼga madu, degi, buglugi dii ega uksad. Abraham Agar-gukingi bela ega ibmar nasiksad. Geb degi, Agarʼga e-machi-Ismael-uksagu, barmisad. Agar nadegusad, Beersebaʼsik nega-dulesulidganba bipirmakdii gusad.
535	GEN 21:21	Sapingwagusgu, Parán-nega-dulesulidgangi-maidgi, e-nan ega ome-Egiptoʼgined uksad.
557	GEN 22:9	Abraham, degi, e-machi-Isaac-ebo Bab-Dummad-ega-yar-sogsadse modapmargu, Abraham Bab-Dummadga-ibmar-ogumakar-ukleged-aila sobsad. Geb a-aila-birgi sapan urbisad. Geb degine, e-machi-Isaac-edichagu, we-aila-birgi sapan-birgi Isaac-mesisad.
561	GEN 22:13	Abraham dakded, sibad-wawaad-machered sapi-imbaba e-bebegi galesnai. Abraham agi sunaded. Sibad-wawaad-machered-susgua, ogumakar e-machi-anar Bab-Dummadga uksad.
567	GEN 22:19	Abraham bia-e-maimar-obesa, ase gannar nonikid. Degine, bela Beerseba-neggweburse nade gusmalad. Agine, Abraham megidapid.
570	GEN 22:22	Deginbali, Nacor-e-masmala-baigan, Milcaʼbo-baksabalid, wemalad: Quesed, Hazo, Pildas, Jidlaf, degi, Betuel.
589	GEN 23:17	Weyobi, Mamre-dad-nakwedsik Efrón-nainu-Macpelaʼgi-naidi, Abrahamʼgadga gunonikid. A sogleged, nainu, akwasaila-ollor-siid, bela sapimar, Abrahamʼgadga gunoniye.
590	GEN 23:18	Het-dulemar, degi, dule-bela-neggweburgi-dogmamaid, nue-amar-daksii gusmarmogad.
594	GEN 24:2	Ibagwengine, Abraham e-mai-bur-undargus-arbadiidse gochad. We-mai bela ega ibmar-dakega gudiid. Abraham a-maiga sogded: —Be anga ise-sogar-ibmar-sogegala, an-dua-urba be-argan be mese.
622	GEN 24:30	E-sus e-bun-Rebeca olasu-yoi, degi, sakwagi-nasikleged-nai daksad. Degine, Labán itosbalid, igi e-bun-Rebeca machered-ega-ibmar-sogsagusadi, e-nanga sognai. Geb Labán, Abraham-e-maise naded. Abraham-e-mai, degi, moli-yargan-muremalad amba dia-walik bukwamalad.
629	GEN 24:37	An-dummad ise-sogar-ibmar-imakega an-imaksad, anga sogsad: ‘Anmar we-Canaán-yargi-maidgi, melle an-machi e-yagan-nikuega be imakoye.
633	GEN 24:41	Ar an-gwenadgan yapa bega e-sisgwa-ukerdina, adi, be ise-sogar-anga-sogsadi, bar beginsurye, adi, be ollorguoye.’
644	GEN 24:52	Abraham-e-mai deyob-ega-soge-itosgu, Bab-Jehová-asabin yokorgi sindigar sigided, napase e-bebe-ebulegedse dulluu imaksabalid.
665	GEN 25:6	Abraham omegan-baiganba-mimmi-nikusmaladgardi, unnila ibmar ega wis ichesaar binsa uksad. Amba Abraham dula-gudigua, e-mimmigan-baigan e-machi-Isaacʼgi dikasur dad-nakwedsik barmisad.
690	GEN 25:31	Jacob abin-sogded: —Nabirdo. Degiile, ar be machi-sailaginedsoggu, bela-bega-ibmar-uklegoed, be anga udagodo.
691	GEN 25:32	Esaú abin-sogded: —An ukudba burgwedanisoggu, anga-bela-ibmar-uklegoed, an bega ukodo. ¿Ar ibiga bar an we-ibmar abesunna? An abesuli.
693	GEN 25:34	Geb degine, Jacob, Esaúʼga ingwa-burwi-gisi-dualed madubo ega uksad. Esaú masgunned-bergusgua, degi, gobsabargua, gwisgusad, geb nadegusad. Weyob, Esaú na machi-sailagined-guedgi bela-ega-ibmar-uklegoedi, baisur-daksad.
704	GEN 26:11	Geb degine, Abimelec bela e-sordamarga igar mesisad: —Ar dule-wargwen we-machered-ibgwensur-imakalile, igidibe, e-omese achaalile, we-dule oburgwilegoye.
717	GEN 26:24	A-mutikidgine, Bab-Jehová Isaacʼse magarosad, ega sogded: “Ani, an be-bab-Abraham-e-Bab-Dummadid. Melle be dobguo, an beba gudiguad. An-mai-Abraham-ulale, begi ise-nued an binsaoed, wagan-bukidar an bega ukoed.”
733	GEN 27:5	Isaac-Esaúʼga-ibmar-sogsadi, Rebecaʼdi bela itosad. A-ular, Esaú sapurba e-babga ibmar-maknadgu,
736	GEN 27:8	Machi, degisoggu, nue be an-itogo. An-ibmar-bega-sogoedba, bela be imako.
755	GEN 27:27	Jacob e-bab-wagar-uega e-bab-walikaa nonigua, e-bab, Jacob-mor-yoid usad. Geb degine, Isaac, Jacobʼgi-nued-ise-binsadedba, ega weyob sogded: “Eye, weyob an-machi-Esaú yapanned. E-yapannedi sapuryob yapanned Bab-Jehová sapurgi ise-nued binsasadyob yapanned.
761	GEN 27:33	Isaac geger-itoged, nue-wawanmake sogded: —Degite, ¿wede doa be-iduar ibmar-maksad, yeer-gulle anga senonisunna? Be-nonikid-iduar, dule-anga-mas-senonikid bela an guchad. Bato be-iduar-dule-arbidga, egi ise-nued-binsaed bela an ega sogsad. Ar emigindi, bato egi ise-nued binsalessunnad. Geg bar an oakaloged.
765	GEN 27:37	Geb degi, e-bab-Isaac abin-sogded: —Be-dummadga-gued-igar Jacobʼga an uksad. Bela e-gwenadgan e-maiga-gued-igar, an ega uksabalid. ”An-ise-nued-egi-binsaedba, an ega sogsabalid: Bitigi orosgi-dakleged-bukidar nikuena gadinye, degine, vino-bukidar nikubalina gadinye. Ar emigindi, machi, ¿igi-bar-an-saosunna?”
788	GEN 28:14	Be-wagan we-napneg-ukub-merguedyob bela-bela mergu guoed. Degine, be-wagan dad-nakwedsik, dad-argwanedsik, dad-nakwed-argan-nuedsik, dad-nakwed-argan-sapiledsik bela aisakis ambikuoed. Degine, bebali bela dule-yar-baid-baidgi-bukwamalad, degi, be-waganbali, egi ise-nued binsalegoed.
796	GEN 28:22	”We-akwa an ogwichisad, we Bab-Dummad-e-negga guoed. ”Bab-Dummad, bela ibmar-be-anga-ukoedi, ambegi gwensak (10%) an bega ukoed.”
819	GEN 29:23	A-mutiki, Labánʼdi e-sisgwa-Lea-sesad, Jacobʼga ukdapid. Jacobʼdi Raquelʼye biensoggu, aga Leaʼse gochasunnad.
835	GEN 30:4	Weyob Raquel e-sui-Jacobʼga e-mai-Bilha-uksad, adi, Jacob Bilhaʼse golegar. Geb degine, Jacob Bilhaʼse gochad.
840	GEN 30:9	Lea geg bar mimmigan-bake-itoargu, e-mai-Zilpaʼye-nugad, Jacobʼga uksad, adi, Jacob Zilpaʼse golegar.
845	GEN 30:14	Ibagwengine, orosgi-dakleged-trigo-weed-ibagangine, Rubén sapurba naded. Agi, sapi-bipi-sanmar mandrágoraʼye-nugad amisad. A-sapi-bipi-sanmar e-nan-Leaʼga sesad. Raquel a-sanmar-daksagu, Leaʼga sogded: —Mandrágora-e-sanmar be-machi-bega-senonikid, wis be anga udamoga.
848	GEN 30:17	Bab-Dummad Lea-ese-goled-itosadba, Lea bonigwar gunonisunnad. Lea wesega Jacobʼga masmala walatargus bakdanikid.
856	GEN 30:25	Raquel goe-José-baksad-sorbali, Jacob Labánʼga sogded: —An-yarse gannar an naega be anga igar uke.
861	GEN 30:30	An-nonikid-idu ibmar-ichee-be-nikadi, bega napiragwad merguded, ar ade, an bese nonikid-akar Bab-Jehová ise-nued begi binsasad. Degite, ¿emide, sana an-mimmiganga an na arbadmogosunna?
863	GEN 30:32	Emi an be-sibadmar-abargi, bela sibad-wawaadmar-gutu-nanaimalad, mata-matamalad, sibad-wawaad-senigan-sichigana egwaoed. Deginbali, sibadmar-gutu-nanaimalad, mata-matamalad an egwabaloed, adi, weyob-daklemalad angadga guegar. We-ibmar-durgangi be an-bennukodo.