14	GEN 1:14	Eyıts'ǫ Nǫ̀htsı̨ hadı, “Įdòo yat'a t'asìı wet'à dzęh nı̨ı̨dı̨ı̨ gǫ̀hłı̨ ha, wet'à dzę agǫht'e ha eyıts'ǫ to agǫht'e ha, weghàà dzędeè k'èhoedzǫ ha, eyıts'ǫ weghàà ı̨bèe, xat'ǫ̀, xok'e, edaèk'ǫ wek'èhoedzǫ ha,
42	GEN 2:11	Dehcho t'akwełǫ̀ǫ̀ sìı Pıshon wìyeh. Eyı dehcho Havılah nèk'e sǫǫ̀mbaekwo gǫ̀hłı̨ı̨ sìı ekǫ nèk'e welǫ ts'ǫ̀ nı̨ı̨lı̨ hǫt'e.
43	GEN 2:12	(Ekǫ sǫǫ̀mbaekwo nezı̨ı̨ gǫ̀hłı̨. Dzèh-łekǫǫ dèk'ǫ̀ǫ eyıts'ǫ kwe wèdaat'ı̨ı̨ sı gǫ̀hłı̨ hǫt'e.)
52	GEN 2:21	Eyıt'à gots'ǫ̀ K'àowo Nǫ̀htsı̨ Adam be nàtsoo t'à dètı̨į̀ ayį̀į̀là. Dǫ whetı̨ wets'ǫ Nǫ̀htsı̨ yechǫǫ̀ ı̨łè xàechì gà wekwǫ̀ ełets'ǫ̀ anayį̀į̀là.
70	GEN 3:14	Eyıt'à Nǫ̀htsı̨ gòocho ts'ǫ̀ hadı, “Hanì ts'èko ts'ǫ̀ eghàlaneedà ts'ıhɂǫ̀ tıts'aàdìı gık'èhodìı eyıts'ǫ whatsǫǫ̀ edegeedaa sìı gınahk'e nexè gots'eèdı ha hǫt'e. Dèè k'e nebò t'à k'enets'ì ha, eyıts'ǫ t'aats'ǫǫ̀ ı̨da gots'ǫ̀ ehtł'è nedè ha.
72	GEN 3:16	Nǫ̀htsı̨ ts'èko ts'ǫ̀ dıı hadı, “Bebìa k'è hòtł'ò eyanelı̨ ha, neza gòhłè nı̨dè sıì negha hoìla ha. Nedǫzhıì wekaneeɂà ha, eyıts'ǫ nedǫzhıì nets'ǫ̀ k'àowo elı̨ ha,” yèhdı.
82	GEN 4:2	Eyı tł'axǫǫ̀ Caın wechı Abel wegǫ̀hłı̨. Negechà agejà tł'axǫǫ̀ Abel sahzǫ̀ą-k'èdìı whelı̨, eyıts'ǫ wı̨ı̨de Caın dèè k'e t'asìı dehshee dǫǫ̀ whelı̨.
84	GEN 4:4	Hanìkò Abel wets'ǫ sahzǫ̀ą t'akwełǫ̀ǫ̀ gıgǫ̀hłı̨ı̨ xè łegek'àa sìı gıkwǫ̀ mǫ̀hdaa Nǫ̀htsı̨ ts'ǫ̀ yek'eehk'ǫ̀. Gots'ǫ̀ K'àowo Abel ghǫ, eyıts'ǫ sahzǫ̀ą-kwǫ̀ yets'ǫ̀ yek'eehk'ǫ̀ǫ sìı ghǫ sìghà nıwǫ.
88	GEN 4:8	Hagòjà tł'axǫǫ̀ Caın edechı ts'ǫ̀ hadı, “Dèè k'e t'asį̀ı̨ k'ełıìtło,” yèhdı. Dèè k'e k'eget'à ekò Caın hǫtsaa edechı Abel gà nàatła t'à ełaàyį̀ı̨hwho.
89	GEN 4:9	Eyıt'à gots'ǫ̀ K'àowo Caın ts'ǫ̀ hadı, “Nechı Abel welaedì?” yèhdı. “Wek'èehsǫ-le. Sechı wek'èhdìı aht'e nıìle,” Caın hadı.
97	GEN 4:17	Caın edets'èkeè t'àı̨tè t'à wets'èkeè chekoa wets'ǫ ajà, eyıts'ǫ bebìa nìı̨htı̨, Enoch wìyeh. Ekò k'e Caın kǫ̀godeè gòhtsı̨, weza wıızì k'ę̀ę̀ Enoch gòyeh ayį̀į̀là.
100	GEN 4:20	Wets'èkeè Adah, Jabal nìı̨htı̨. Dǫ nı̨hbàa yìı nàgedèe xè tıts'aàdìı k'ègedìı dǫǫ̀ gha gocho elı̨.
101	GEN 4:21	Jabal wechı sìı Jubal wìyeh. Dǫ tł'ık'eetı̨ı̨ lanıı k'ègeezǫǫ eyıts'ǫ dechı̨shì t'à sǫnàgedèe k'ègeezǫǫ sìı gha gocho elı̨.
102	GEN 4:22	Wets'èkeè Zılah ededı̨ sı weza gǫ̀hłı̨, Tubal-Caın wìyeh. Ededı̨ sìı satsǫ̀ dekwoo eyıts'ǫ satsǫ̀ dezhìı t'à wet'à eghàlats'eedaa xàɂaa yàèhtsı̨. Tubal-Caın weba Naamah wìyeh.
105	GEN 4:25	Adam k'achı̨ edets'èkeè t'àı̨tè t'à wets'èkeè Eve k'achı̨ dǫzhìa nìı̨htı̨, Set wìyeh ayį̀į̀là. Eve hadı, “Caın, Abel ełaı̨hwho t'à wetł'axǫǫ̀ Nǫ̀htsı̨ k'achı̨ chekoa saı̨htı̨,” hadı.
192	GEN 8:8	Eyı tł'axǫǫ̀ asį̀į̀ dèè k'e tı whìle ajàa lì nıwǫ t'à k'àba lanıı xàèht'oò ayį̀į̀là.
193	GEN 8:9	Hanìkò ı̨łaà dèè k'e tı łǫ t'à k'àba t'asìı k'e nàwo ha wegha gǫ̀hłı̨-le t'à elàcho ts'ǫ̀ naèht'o. Noah yets'ǫ̀ dadıìtso gà elàcho yìı nayaachì.
194	GEN 8:10	Noah łǫ̀hdı̨ dzęę̀ ts'ǫ̀ naèhɂı̨ tł'axǫǫ̀ k'achı̨ k'àba xàèht'oò ayį̀į̀là.
195	GEN 8:11	Xèhts'ǫ̀ k'àba yets'ǫ̀ nǫ̀ǫt'o ekò ts'ı “olıve” wìyeh wets'ǫ ı̨t'ǫ̀ą xàyı̨ı̨hdlaa sìı weèdà yìchı̨ı̨ɂa nǫǫ̀! Eyı weghàà Noah dèè k'e tı whìle agòjà yek'èhoèhzà.
196	GEN 8:12	K'achı̨ łǫ̀hdı̨ dzęę̀ ts'ǫ̀ naèhɂı̨ tł'axǫǫ̀ k'achı̨ k'àba xàèht'oò ayį̀į̀là, hanìkò dıì t'à k'àba yets'ǫ̀ nǫ̀ǫt'o-le.
206	GEN 8:22	“Dıı dèè gòɂǫ gots'ǫ̀ dèè k'e t'asìı dehshe ha, eyıts'ǫ t'asìı dehshee sìı dǫ nàgehtsį̀ ha, edzaa eyıts'ǫ edıı sìı t'aats'ǫǫ̀ hagot'ı̨ ha, ı̨mbè eyıts'ǫ xok'e agot'ı̨ ha, eyıts'ǫ t'aats'ǫǫ̀ dzę eyıts'ǫ to agot'ı̨ ha,” Nǫ̀htsı̨ edets'ǫ̀ hadı.
210	GEN 9:4	“Hanìkò t'asìı edoò t'à eda ne t'à bò ı̨łaà wedoò wets'ǫ̀-èlı̨ı̨ sìı aahdè ha-le.
227	GEN 9:21	Wets'ǫ jìetì mǫ̀hdaa yats'e t'à yeèhdeè ajà. Yeèhde t'à nı̨hbàa goyìı ı̨ht'edę whetı̨ nǫǫ̀.
233	GEN 9:27	Nǫ̀htsı̨ Jafet wenèè goı̨chà ayııle. Jafet, Shem wenı̨hbàa yìı nàwedè, Kanan got'ı̨į̀ t'aats'ǫǫ̀ yegha eghàlageedaa-dǫǫ̀ gıılè,” Noah hadıì edeza gots'ǫ̀ xàyaı̨htı.
237	GEN 10:2	Dıı Jafet weza agı̨ı̨t'e: Gomer, Magog, Madaı, Javan, Tubal, Meshek eyıts'ǫ Tıras.
242	GEN 10:7	Dıı Kush weza agı̨ı̨t'e: Seba, Havılah, Sabtah, Ramah eyıts'ǫ Sabteka. Dıı Ramah weza agı̨ı̨t'e: Sheba eyıts'ǫ Dedan.
245	GEN 10:10	Nımrod, Shınar nèk'e k'àowo elı̨ ekò wets'ǫ kǫ̀godeè t'akwełǫ̀ǫ̀ gòı̨làa sìı dıı hagìyeh ı̨lè: Babylon, Erek, Akad eyıts'ǫ Kalneh.
246	GEN 10:11	Nımrod eyı nèk'e gots'ǫ Asyrıa nèk'e ts'ǫ̀ k'àowo elı̨į̀ ajà. Ekǫ kǫ̀godeè Nıneveh, kǫ̀godeè Rehobot-Ir, kǫ̀godeè Kalah,
248	GEN 10:13	Mızram wets'ǫ dıı dǫ xàgeèɂaa agı̨ı̨t'e: Lud got'ı̨į̀, Anam got'ı̨į̀, Lehab got'ı̨į̀, Naftuh got'ı̨į̀,
251	GEN 10:16	Jebus got'ı̨į̀, Amor got'ı̨į̀, Gırgash got'ı̨į̀,
254	GEN 10:19	Eyıt'à gınèè sìı kǫ̀ta Sıdon gots'ǫ kǫ̀ta Gerar gots'ǫ̀ nıɂà, eyıts'ǫ kǫ̀ta Gaza haı̨wa ts'ǫ̀, eyıts'ǫ kǫ̀ta Sodom, kǫ̀ta Gomorah, kǫ̀ta Admah, eyıts'ǫ kǫ̀ta Zeboyım gots'ǫ̀ nıɂà, eyıts'ǫ kǫ̀ta Lasha haı̨wa ts'ǫ̀ gınèè nıɂà hǫt'e.
256	GEN 10:21	Jafet wechı Shem ededı̨ sı weza łǫ gòı̨lè. Shem, Eber weza hazǫǫ̀ gogha gıcho hǫt'e.
259	GEN 10:24	Arfakad, Shelah wetà hǫt'e, eyıts'ǫ Shelah, Eber wetà hǫt'e.
260	GEN 10:25	Eber weza nàke gǫ̀hłı̨: Įłè Peleg wìyeh. Ekò k'e dǫ ełets'ǫǫ̀ agejà t'à hawìyeh adlà. Peleg wechı Joktan wìyeh.
263	GEN 10:28	Obal, Abımel, Sheba,
264	GEN 10:29	Ofır, Havılah eyıts'ǫ Jobab. Eyı hazǫǫ̀ Joktan weza agı̨ı̨t'e.
276	GEN 11:9	Gots'ǫ̀ K'àowo dǫ gıyatıì eładı̨ı̨ xàɂaa ayį̀į̀là t'à eyı kǫ̀godeè sìı Babel gòyeh ajà. Ekǫ gots'ǫ sìı gots'ǫ̀ K'àowo dıı nèk'e hazǫǫ̀ ts'ǫ̀ dǫ ehkègı̨ı̨deè agǫ̀ǫ̀là.
281	GEN 11:14	Shelah taènǫ weghoò ekò weza Eber wegǫ̀hłı̨.
282	GEN 11:15	Weza Eber wegǫ̀hłı̨ tł'axǫǫ̀ Shelah dı̨akw'eènǫ-daats'ǫ̀-taı (403) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.
283	GEN 11:16	Eber taènǫ-daats'ǫ̀-dı̨ (34) weghoò ekò weza Peleg wegǫ̀hłı̨.
284	GEN 11:17	Wezaa Peleg wegǫ̀hłı̨ tł'axǫǫ̀ Eber dı̨akw'eènǫ-daats'ǫ̀-taènǫ (430) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.
293	GEN 11:26	Terah łǫ̀hdı̨ènǫ weghoò tł'axǫǫ̀ weza taı gòı̨lè; Abram, Nahor eyıts'ǫ Haran gıgǫ̀hłı̨.
294	GEN 11:27	Dıı sìı Terah wegodıì hǫt'e: Terah weza taı gǫ̀hłı̨, Abram, Nahor eyıts'ǫ Haran gìyeh. Haran ededı̨ sìı Lot wetà hǫt'e.
296	GEN 11:29	Abram eyıts'ǫ Nahor į̀łah hoget'ı̨ ı̨lè. Abram wets'èkeè Sarayı wìyeh, eyıts'ǫ Nahor wets'èkeè Mılkah wìyeh. Eyı ts'èko sìı Haran wetì hǫt'e. Haran sìı Mılkah eyıts'ǫ Iskah gıtà hǫt'e.
298	GEN 11:31	Terah edeza Abram, eyıts'ǫ edekwı Lot (Haran weza) eyıts'ǫ weza ts'èkeè Sarayı edexè goòwa. Kanan nèk'e ts'ǫ̀ agede ha gı̨ı̨wǫ t'à Kaldea got'ı̨į̀ gınèk'e kǫ̀godeè Ur gòyeh gots'ǫǫ̀ xàgeède. Hanìkò kǫ̀godeè Haran gòyeh ts'ǫ̀ nègı̨ı̨de ekò ekǫ nàgedè agejà.
300	GEN 12:1	Gots'ǫ̀ K'àowo Abram ts'ǫ̀ hadı, “Nenèè gots'ǫǫ̀ aąde. Nèot'ı̨ eyıts'ǫ netà wekǫ̀ agı̨ı̨t'ee sìı gıts'ǫǫ̀ aąde. Edı̨į̀ ts'ǫ̀ anede ha sìı nets'ǫ̀ haehsı̨ ha.
303	GEN 12:4	Eyıt'à Nǫ̀htsı̨ weyatıì k'e Abram edenèè ts'ǫǫ̀ xàèhtła. Wesah Lot yexè ajà. Abram łǫ̀hdı̨ènǫ-daats'ǫ̀-sı̨làı (75) weghoò ekò kǫ̀ta Haran gots'ǫǫ̀ xàèhtła.
305	GEN 12:6	Abram, kǫ̀ta Shekem gà Moren wets'ǫ ts'ı nechàa nàı̨ɂaa haı̨wa ts'ǫ̀ ekǫ nèk'e hazǫǫ̀ k'ehohwho. Ekìıyeè k'e Kanan got'ı̨į̀ eyı nèk'e nàgedè ı̨lè.
306	GEN 12:7	Ekǫ nèk'e gots'ǫ̀ K'àowo Abram ts'ǫ̀ wègoèht'į̀, hayèhdı, “Jǫ dèè gòɂǫǫ sìı nets'ıhɂǫ̀ǫ-dǫǫ̀ gıghàehɂà ha,” yèhdı. Eyıt'à Abram, eyı nèk'e gots'ǫ̀ K'àowo ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨.
307	GEN 12:8	Ekǫ gots'ǫ kǫ̀ta Bethel wexa sa k'àɂàa ts'ǫnèe shìh xàwheɂaa ts'ǫ̀ nììtła. Ekǫ edenı̨hbàa nàı̨hgè. Kǫ̀ta Bethel dą̀ą ts'ǫ̀ goòɂàa eyıts'ǫ kǫ̀ta Ayı gòyeh sa kàɂàa ts'ǫ̀ goòɂàa, eyı kǫ̀ta nàke wege edenı̨hbàa nàı̨hgè. Ekǫ gots'ǫ̀ K'àowo ts'ǫ̀ t'asìı k'eehk'ǫ̀ gha k'achı̨ kwe-ladà whehtsı̨ eyıts'ǫ gots'ǫ̀ K'àowo ts'ǫ̀ xàyaı̨htı.
308	GEN 12:9	Eyı tł'axǫǫ̀ Abram ekǫ gots'ǫ dèhtła, ekìı-ka nèk'e Negev gòyeh ts'ǫ̀ ajà.
309	GEN 12:10	Ekìıyeè k'e Kanan nèk'e sıì bò whìle agòjà t'à Abram Egypt nèk'e ts'ǫ̀ ajà. Ekǫ whaà-lea ts'ǫ̀ nàı̨dè.
310	GEN 12:11	Egypt nèk'e ts'ǫ̀ nıwà-lea nègı̨ı̨de ekò Abram edets'èkeè Sarayı ts'ǫ̀ hadı, “Hoɂıì ts'èko wèdaat'ı̨ı̨ anet'e.
312	GEN 12:13	Sedè anet'e nı̨ı̨dı nǫǫ̀, hanì-ı̨dè nets'ıhɂǫ̀ ełaàsegèhwhı ha-le xè nezı̨į̀ sets'ǫ̀ nageɂa ha,” Abram edets'èkeè èhdı.
313	GEN 12:14	Abram Egypt nèk'e nègı̨ı̨de ekò Egypt got'ı̨į̀ Sarayı gıaɂı̨ ekò ts'èko sıì wèdaat'ı̨ nǫǫ̀ gı̨ı̨wǫ.
315	GEN 12:16	K'àowocho, Sarayı wets'ıhɂǫ̀ Abram ts'ǫ̀ nezı̨į̀ nageɂa. Sahzǫ̀ą eyıts'ǫ ejıe łǫ gıghàı̨la, eyıts'ǫ tłı̨tsoa werezhıì eyıts'ǫ wedets'è łǫ gıghàı̨la, eyıts'ǫ dǫzhìı eyıts'ǫ ts'èko eghàlageedaa-dǫǫ̀ łǫ gıghàı̨la, eyıts'ǫ tıts'aàdìıcho t'asìı k'elee hanıı sı łǫ gıghàı̨la.
316	GEN 12:17	Hanìkò gots'ǫ̀ K'àowo Abram wets'èkeè ts'ıhɂǫ̀ k'àowocho eyıts'ǫ wèot'ı̨ tàda nàtsoo t'à eyagı̨ı̨lı̨į̀ agǫ̀ǫ̀là.
317	GEN 12:18	Eyıt'à k'àowocho Abram kayaı̨htı, hayèhdı, “Dànìghǫ hanì sets'ǫ̀ eghàlaı̨da? Dànìghǫ eyı ts'èko nets'èkeè hǫt'e, sets'ǫ̀ haı̨dı-le nǫǫ̀?
319	GEN 12:20	Eyıt'à k'àowocho edecheekeè ts'ǫ̀ goı̨de t'à Abram nageèhɂà. Wets'èkeè eyıts'ǫ t'asìı hazǫǫ̀ wets'ǫ sìı xè nageèhɂà.
320	GEN 13:1	Eyıt'à Abram edets'èkeè eyıts'ǫ t'asìı hazǫǫ̀ wets'ǫ sìı xè Egypt nèk'e gots'ǫǫ̀ nageèhde. Ekìı-ka nèk'e Negev gòyeh ekǫ ts'ǫ̀ agejà. Wesah Lot yexè at'ı̨.
321	GEN 13:2	Abram sahzǫ̀ą eyıts'ǫ ejıe łǫ wets'ǫ ajà, sǫǫ̀mba degoo eyıts'ǫ sǫǫ̀mbaekwo łǫ wets'ǫ t'à dǫ ahxee whelı̨.
323	GEN 13:4	Ekǫ t'aa t'akwełǫ̀ǫ̀ kwe ełeka nèyı̨ı̨wa t'à kwe-ladà whehtsı̨ ı̨lè. Abram eyı k'achı̨ Nǫ̀htsı̨ ghàsǫedı.
324	GEN 13:5	Ekìıyeè k'e Lot edeɂeh Abram xè at'ı̨ ı̨lè. Ededı̨ sı sahzǫ̀ą, ejıe, eyıts'ǫ tł'ǫhbàa łǫ wets'ǫ.
326	GEN 13:7	Eyıt'à Abram wets'ǫ tıts'aàdìı-k'èdìı-dǫǫ̀, eyıts'ǫ Lot wets'ǫ tıts'aàdìı-k'èdìı-dǫǫ̀ ełeghǫgeet'ı̨į̀ agejà. Ekò k'e Kanan got'ı̨į̀ eyıts'ǫ Perız got'ı̨į̀ eyı nèk'e nàgedè ı̨lè.
327	GEN 13:8	Eyıt'à Abram edesah Lot ts'ǫ̀ hadı, “Ełèot'ı̨ ats'ı̨ı̨t'e t'à ełek'èch'a ats'ııdì-le. Sets'ǫ tıts'aàdìı-k'èdìı-dǫǫ̀, eyıts'ǫ nets'ǫ tıts'aàdìı-k'èdìı-dǫǫ̀ ełek'èch'a hogıhtsį̀-le.
330	GEN 13:11	Lot sa kàɂàa ts'ǫnèe Jordan deh nıɂàa gà dèè hazǫǫ̀ edegha yį̀į̀hchì t'à ekǫ ts'ǫ̀ ajà. Eyıt'à Lot eyıts'ǫ Abram į̀łak'aà agejà.
331	GEN 13:12	Abram Kanan nèk'e nàdè eyıts'ǫ wesah Lot Jordan deh nıɂàa gà kǫ̀ta gòlaa sìı gota nàdè. Kǫ̀ta Sodom gòyeh gà edenı̨hbàa nàı̨hgè.
333	GEN 13:14	Lot Abram ts'ǫǫ̀ naèhtła tł'axǫǫ̀ gots'ǫ̀ K'àowo Abram ts'ǫ̀ hadı, “Eyı nàąwo gots'ǫ yeè chı̨k'è ts'ǫ̀ k'eęt'į̀, sazı̨ nèk'e, sa kàɂàa eyıts'ǫ dą̀ą sı ts'ǫ̀ k'eęt'į̀.
336	GEN 13:17	Dıı dèè hazǫǫ̀ neghàehłe ha hǫt'e, eyıt'à dıı dèè hazǫǫ̀ wek'e k'eı̨tło,” gots'ǫ̀ K'àowo Abram ts'ǫ̀ hadı.
337	GEN 13:18	Eyıt'à Abram edenı̨hbàa hazǫǫ̀ nàı̨wa. Hebron nèk'e Amor got'ı̨į̀ Mamer wets'ǫ ts'ı nechàa nàwheɂaa ts'ǫ̀ tàèhtła. Ekǫ gots'ǫ̀ K'àowo ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨.
339	GEN 14:2	Kǫ̀ta Sodom gots'ǫ k'àowocho Bera, kǫ̀ta Gomorah gots'ǫ k'àowocho Bırsha, kǫ̀ta Admah gots'ǫ k'àowocho Shınab, kǫ̀ta Zeboyım gots'ǫ k'àowocho Shember, eyıts'ǫ kǫ̀ta Bela (dıì Zoyar gòyeh) gots'ǫ k'àowocho xè ełegegǫ.
345	GEN 14:8	Eyı tł'axǫǫ̀ kǫ̀ta Sodom gots'ǫ k'àowocho, kǫ̀ta Gomorah gots'ǫ k'àowocho, kǫ̀ta Admah gots'ǫ k'àowocho, kǫ̀ta Zeboyım gots'ǫ k'àowocho, eyıts'ǫ kǫ̀ta Bela (dıì Zoyar gòyeh) gots'ǫ k'àowocho, edekǫ̀ta gots'ǫǫ̀ xàgeède t'à shìhge dèè nıɂàa Sıdım gòyeh ekǫ ełegegǫ gha sınìgı̨ı̨de.
349	GEN 14:12	Abram wesah Lot kǫ̀ta Sodom nàde ı̨lè t'à eyı k'àowocho dı̨ Lot eyıts'ǫ t'asìı hazǫǫ̀ wets'ǫ sìı edexè agı̨į̀là.
350	GEN 14:13	Dǫ ı̨łè goch'à kwı̨èhsaa sìı ekǫ dàgòjàa sìı Hebrew got'ı̨į̀ Abram ts'ǫ̀ hadı. Ekò k'e Abram, Amor got'ı̨į̀ Mamer wets'ǫ ts'ı nechàa nàwheɂaa gà nàde ı̨lè. Eyı dǫ Mamer sìı Eshkol eyıts'ǫ Aner gìot'ı̨ hǫt'e. Eyı dǫ hazǫǫ̀ Abram xè ełets'àgedı gha nàowo gèhtsı̨ ı̨lè.
351	GEN 14:14	Eyıt'à Abram wesah nıgıìchì ghǫ godı ıìkw'o ekò wecheekeè gıts'ıhɂǫ̀ǫ-dǫǫ̀ sìı taekw'eènǫ-daats'ǫ̀-hoònǫ-daats'ǫ̀-ek'èdı̨ (318) dǫ haàtłǫǫ ełegegǫ gha hoghàgeètǫǫ sìı gokayaı̨htı gà kǫ̀ta Dan gòyeh haı̨wa ts'ǫ̀ k'àowocho dı̨ Lot nıgıìchìı sìı k'è geède.
352	GEN 14:15	Eyı toò Abram dǫ hazǫǫ̀ łats'ıgǫǫwa gà k'àowocho dı̨ ts'ǫ̀ łegıagǫ t'à ekòet'ıì goghǫ geèhnǫ. Kǫ̀ta Damaskus gòyeh wete ts'ǫ̀ kǫ̀ta Hobah gòyeh ts'ǫ̀ nagodegeèzhì.
354	GEN 14:17	Abram, k'àowocho Kedorlomer, eyıts'ǫ wexè k'àowocho eyıì-le goghǫèhnǫ gots'ǫ nǫ̀ǫtła ekò, kǫ̀ta Sodom gots'ǫ k'àowocho shìhge dèè nıɂàa Shaveh gòyeh (dıì K'àowocho Gıts'ǫ Shìhge Dèè Nıɂàa gòyeh) ekǫ Abram ts'ǫ̀ èhtła.
355	GEN 14:18	Eyı tł'axǫǫ̀ kǫ̀ta Salem gots'ǫ k'àowocho Melkızedek wìyeh, łèt'è eyıts'ǫ jìetì Abram ts'ǫ̀ yeèwa. Ededı̨ sìı Nǫ̀htsı̨ Enıìyah Deè wets'ǫ yahtıı elı̨ ı̨lè.
356	GEN 14:19	Abram ts'ǫ̀ sìghà nıwǫ t'à dıı hadıì Abram ts'ǫ̀ xàyaı̨htı, “Nǫ̀htsı̨ Enıìyah Deè elı̨ı̨ sìı Abram xè sìghà hòɂǫǫ̀ ayııle. Ededı̨ sìı yak'e eyıts'ǫ dèè sı whehtsı̨ı̨ hǫt'e.
357	GEN 14:20	Nǫ̀htsı̨ Enıìyah Deè elı̨ı̨ sìı weghàsǫts'eedı welè. Dǫ nek'èch'a gı̨ı̨lı̨ı̨ sìı netł'aà nègòı̨la hǫt'e,” Melkızedek Abram ts'ǫ̀ hadı. Eyı tł'axǫǫ̀ Abram ełegegǫ gots'ǫ t'asìı hazǫǫ̀ nèyı̨ı̨waa sìı wets'ǫ hoònǫ-ı̨łè yahtıı Melkızedek ghàyı̨ı̨la.
358	GEN 14:21	Kǫ̀ta Sodom gots'ǫ k'àowocho Abram ts'ǫ̀ hadı, “Sı̨ t'aa dǫ seghàgı̨ı̨le. Eyı wedę t'asìı hazǫǫ̀ edegha wek'èı̨dì,” yèhdı.