2	GEN 1:2	Maʌ̃ne naʌ̃ ẽjũãra mĩã cawaiẽ́ b̶asia idjab̶a ne neẽ́ b̶asia. Pusa nãbuada pãĩmaba pãĩsosoa ũmasia. Maʌ̃ne Ãcõrẽ Jaureda pusa ʌ̃rʌ̃ domica b̶abadjia.
36	GEN 2:5	chiruada põãjãrã sid̶a neẽ́ basía Ãcõrẽba naʌ̃ ẽjũãne wad̶ibid̶a cueda zebica bad̶a bẽrã. Baribʌrʌ egorod̶eba ʌ̃taa towaada odjabadjia naʌ̃ ẽjũã jũma b̶eguea oi carea. Idjab̶a ẽberãda neẽ́ basía ẽjũã oi carea.
49	GEN 2:18	Maʌ̃be Ãcõrẽba jarasia: –Bia b̶ʌẽ́a ẽberã idub̶a b̶aida. Carebabari biada idji itea oya.–
51	GEN 2:20	Mãwã Adaʌ̃ba daupẽbada animarãra, ĩbana bajãne wãb̶aribadara, mẽãbema animarã sid̶a jũma trʌ̃ b̶ʌcuasia. Mãwãmĩna Adaʌ̃ itea carebabari biada wad̶i neẽ́ basía.
58	GEN 3:2	Wẽrãba panusia: –Mãwãẽ́a. Naʌ̃ néud̶ebema nejõra daiba jõnida panʌa.
60	GEN 3:4	Maʌ̃ne damaba wẽrãa jarasia: –Bãrãra beud̶aẽ́a.
68	GEN 3:12	Adaʌ̃ba panusia: –Bʌa mʌ̃́a wẽrã diad̶aba jõbisia.–
70	GEN 3:14	Maʌ̃ bẽrã Ãcõrẽba damara nãwã biẽ́ jara b̶ʌsia: Bʌa jãwã cũrũgad̶a bẽrã, mʌ̃a bʌra daupẽbada animarã idjab̶a mẽãbema animarã cãyãbara biẽ́ara b̶ʌya. Nãwã b̶aya: id̶iba ʌ̃taa bʌdji jãne nĩbaya idjab̶a ewariza bʌ itera egoro pora caita b̶aya ab̶a beubʌrʌd̶aa.
73	GEN 3:17	Maʌ̃ne Ãcõrẽba umaquĩrãa jarasia: Mʌ̃a bʌ́a jarasia jãʌ̃ nejõra jõrãmãrẽã. Mãwãmĩna bʌ wẽrã bed̶eada ĩjãsia. Maʌ̃ bẽrã mʌ̃a naʌ̃ ẽjũãra jũma biẽ́ b̶ʌya. Ʌrʌda, jũĩchichi sid̶a odjacuaya. Bʌra bio bia mĩga b̶aya bʌ néud̶ebemada coi carea. Idjab̶a bʌa chiruada co b̶aya.
78	GEN 3:22	Mãwãnacarea Ãcõrẽba jarasia: –Naʌ̃ ẽberãba jãʌ̃ nejõra jõna bẽrã biada cadjirua sid̶a jũma cawa b̶ʌa. Mãwã dadji quĩrãca b̶esia. Maʌ̃ bẽrã zocai b̶ai diabari nejõda idjía idu jõbid̶aẽ́a. Maʌ̃da jõsira beuca baya.–
85	GEN 4:5	Baribʌrʌ Caiʌ̃da idjia diad̶a sid̶a bia unuẽ́ basía. Maʌ̃ carea Caiʌ̃ra bio quĩrũsia. Ab̶ed̶a quĩrã cadjirua nũmesia.
87	GEN 4:7	Bʌa biada oibʌrʌ ¿bʌra b̶ʌsrid̶a b̶aẽ́ca? Baribʌrʌ bʌa biada oẽ́bʌrʌ cadjirua jʌwaed̶a b̶aya. Baribʌrʌ bʌa cadjiruara poyaida b̶ʌa.–
89	GEN 4:9	Maʌ̃ bẽrã Ãcõrẽba Caiʌ̃a iwid̶isia: –¿Sãma b̶ʌ bʌ djaba Abelera?– Maʌ̃ne Caiʌ̃ba panusia: –Cawaẽ́a. Mãwãra ¿mʌ̃ra idji acʌbarica?–
91	GEN 4:11	Bʌ djabada bead̶a bẽrã mʌ̃a bʌra biẽ́ b̶ʌya. Mʌ̃a bʌra idji oa erozoad̶amaʌba ãyã jʌretaya.
92	GEN 4:12	Bʌa ẽjũã obʌrʌmĩna bʌ néura bia zauca baya. Bʌra naʌ̃ ẽjũãne ara jãwã pʌrrʌa nĩbaya. Ʌ̃nãũi sid̶a neẽ́ b̶aya.–
93	GEN 4:13	Caiʌ̃ba Ãcõrẽa jarasia: –Mʌ̃ mãwã b̶aira jũmawãyã zarea b̶ʌa. Maʌ̃ra mʌ̃a droaẽ́a.
105	GEN 4:25	Maʌ̃ ewarid̶e Adaʌ̃ra wayacusa dji quima ume cãĩsia. Maʌ̃be dji quimaba umaquĩrã warrada tosia. Maʌ̃ne jarasia: “Caiʌ̃ba Abel bead̶acarea Ãcõrẽba mʌ̃́a dewara warrada Abel cacuabari diasia.” Mãwã dji warrara trʌ̃ b̶ʌsia Se.
107	GEN 5:1	Nama b̶ʌ́ b̶ʌa Adaʌ̃neba yõped̶ad̶ad̶ebemada. Ãcõrẽba ẽberãrã osid̶e ara idji quĩrãca osia.
135	GEN 5:29	Maʌ̃ne Lameba jarasia: “Ãcõrẽba naʌ̃ ẽjũãra biẽ́ b̶ʌsia. Maʌ̃ bẽrã dadjirã jʌwaba ẽjũã o panʌra zarea b̶ʌa, baribʌrʌ naʌ̃ warrabʌrʌ dadjirãra ʌ̃nãũbiya.” Mãwã dji warrara trʌ̃ b̶ʌsia Noé.
144	GEN 6:6	Maʌ̃ne Ãcõrẽra sopua b̶esia naʌ̃ ẽjũãne ẽberãrã od̶a carea. Idjimaarã biara b̶acasia ãdjira od̶aẽ́bara.
145	GEN 6:7	Nãwã crĩchasia: “Mʌ̃a ẽberãrãda, animarãda, animarã ãdji jãne wãbadada, ĩbana sid̶a jũma jõbiya. Mʌ̃a ãdjira od̶aẽ́bara biara b̶acasia.”
147	GEN 6:9	Nama Noéd̶ebemada nẽbʌrʌ b̶ʌa. Noéra ẽberã jipa b̶asia. Ãcõrẽ ume jipa nĩbabadjia. Idji ewarid̶ebemarã tãẽna ab̶abe idjidrʌ jarad̶i neẽ́ b̶asia.
149	GEN 6:11	Maʌ̃ne naʌ̃ ẽjũãne b̶eara Ãcõrẽ quĩrãpita biẽ́ duanesid̶aa baridua cadjiruara jũmawãyã o b̶ea bẽrã.
150	GEN 6:12	Ãcõrẽba naʌ̃ ẽjũã acʌbʌrʌd̶e wãrãda jũma biẽ́ b̶ʌda unusia jũma ẽberãrãba ne jũmane cadjirua o b̶ea bẽrã.
162	GEN 7:2	Dji mʌ̃́a babue diaida b̶ʌ animarãnebemada dji umaquĩrãrãda siete idjab̶a dji wẽrãrãda siete edadua, baribʌrʌ animarã mʌ̃́a babue diacara panʌnebemada ab̶a dji umaquĩrãda, ab̶a dji wẽrãda edadua.
185	GEN 8:1	Naʌ̃ ẽjũã ũ nũmasid̶e Ãcõrẽba Noéra jũma animarã jãba dromane duanʌ sid̶a quĩrãdoaẽ́ b̶asia. Maʌ̃ bẽrã Ãcõrẽba nãũrãda jũma naʌ̃ ẽjũãne tʌbisia, pusa edrebema baidora tʌdrʌbisia, idjab̶a cue sid̶a poabisia.
191	GEN 8:7	Ewaped̶a ĩbana ne mĩguia cobarida ẽdrʌbisia egoro põãsada unui cawaya. Maʌ̃ ĩbanara wãped̶a waa zeẽ́ basía, ãtebʌrʌ pʌrrʌa wãb̶ari nĩbabadjia do errubʌrʌmisa.
193	GEN 8:9	Maʌ̃ puchirãra jãba dromanaa waya jẽda zesia sãma b̶arida unuẽ́ bẽrã. Maʌ̃be Noéba puchirãra idji jʌwaba edaped̶a jãba dromane ed̶a b̶ʌsia.
196	GEN 8:12	Waya siete ewari jʌ̃ãped̶a Noéba wayacusa puchirãra wãbisia. Maʌ̃ne puchirãra waa Noémaa zeẽ́ basía.
205	GEN 8:21	Maʌ̃ babue diad̶ara Ãcõrẽba bia unusia. Maʌ̃ne jarasia: –Id̶iba ʌ̃taa mʌ̃a naʌ̃ ẽjũãra waa biẽ́ b̶ʌẽ́a, ẽberãrãba caibe ed̶aʌba ãdji sod̶e cadjirua od̶idrʌ crĩcha b̶eamĩna. Idjab̶a mʌ̃a jũma zocai b̶eara waa quinibiẽ́a mʌ̃a od̶a quĩrãca.
217	GEN 9:11	Mʌ̃a bed̶ea b̶ʌbʌrʌra naʌ̃gʌa: naʌ̃ ẽjũãne zocai b̶eara waa dopapaba jõbiẽ́a. Waa naʌ̃ ẽjũãra ũ wãẽ́a naʌ̃ ẽjũãne b̶ea quininamãrẽã. Mʌ̃a bed̶ea b̶ʌd̶ara wãrãda mãwã b̶aya.–
221	GEN 9:15	Maʌ̃gʌd̶eba mʌ̃a quĩrãneba b̶aya mʌ̃a bãrã ume animarã ume bid̶a bed̶ea b̶ʌd̶ara. Waa dopapara wãbiẽ́a naʌ̃ ẽjũãne b̶ea quinibi carea.
228	GEN 9:22	Mãwã tab̶ʌd̶e dji warra Caʌ̃da ed̶a zesia. Caʌ̃ra Canaaʌ̃ zeza basía. Maʌ̃ne Caʌ̃ba idji zeza ãcad̶a tab̶ʌda unuped̶a idji djabarã dajadaare panʌ́a jarad̶e wãsia.
229	GEN 9:23	Maʌ̃ carea Seʌ̃ba Jape bid̶a borob̶ada ab̶a edasid̶aa. Maʌ̃ borob̶ara ãdji equiad̶e b̶ʌd̶aped̶a ãdaunaa wãsid̶aa ãdji zezamaa. Maʌ̃be araa acʌd̶aẽ́ ãdji zezara ãnẽb̶ari b̶ʌsid̶aa. Mãwã ãdji zeza cacuara ununaẽ́ basía.
231	GEN 9:25	Maʌ̃ carea jarasia: Caʌ̃ warra Canaaʌ̃ra mʌ̃a biẽ́ jara b̶ʌya. Canaaʌ̃ra idji zeza djabarã nezoca ed̶aara b̶ʌda b̶aya.
236	GEN 10:1	Dopapa wãnacarea Noé warrarã Seʌ̃ba, Caʌ̃ba, Jape bid̶a warrarãda unucuasid̶aa. Nama b̶ʌ́ b̶ʌa ãdjid̶eba yõped̶ad̶ad̶ebemada.
270	GEN 11:3	Ewari ab̶a ãbaa nãwã bed̶eadruasid̶aa: “Egoroda mõgara quĩrãca od̶aped̶a tʌbʌd̶e bád̶adrʌ de od̶i carea.” Ara maʌ̃da egorora mõgara quĩrãca od̶aped̶a básid̶aa mõgarara neẽ́ bad̶a bẽrã. Maʌ̃be cãdorronada edasid̶aa maʌ̃ mõgara quĩrãca od̶ara carad̶i carea.
271	GEN 11:4	Maʌ̃be jarasid̶aa: –Jãʌ̃be puruda od̶adrʌ. Idjab̶a de ʌ̃tʌ drasoga b̶ʌda od̶ia. Dji de borora ab̶ed̶a bajãnaa tẽũbid̶ia. Mãwã osid̶ara dadjirãra trʌ̃ b̶ʌga b̶ead̶ia idjab̶a ni ab̶aʌba dadjirãra namabemada ãyã memenebid̶aẽ́a druaza wãnamãrẽã.–
273	GEN 11:6	Maʌ̃ne Ãcõrẽba jarasia: –Ãdjirãra jũma ãbaa duanʌa idjab̶a ab̶ari bed̶ead̶e bed̶eabadaa. Maʌ̃ bẽrã jʌwa b̶ʌsid̶aa jãʌ̃ de drasoga b̶ʌra od̶i carea. Maʌ̃ba bariduada o quĩrĩã panʌbʌrʌ poya od̶ia. Dadjia mãwã iduaribid̶aẽ́a.
274	GEN 11:7	Biara b̶ʌa dadjira wãnaped̶a ãdji bed̶eara quĩrãtanoa bed̶eabid̶ida ara ãdub̶a cawa ũrĩnaẽ́ duanenamãrẽã.–
277	GEN 11:10	Nama b̶ʌ́ b̶ʌa Seʌ̃neba yõped̶ad̶ad̶ebemada. Dopapa wãnacarea poa umé b̶ʌd̶e, Seʌ̃ 100 poa b̶asid̶e, dji warra Arpaxada unusia.
294	GEN 11:27	Nama b̶ʌ́ b̶ʌa Tared̶eba yõped̶ad̶ad̶ebemada. Tareba naʌ̃ warrarãda unusia: Abraʌ̃da, Nacoda, Haraʌ̃ sid̶a. Maʌ̃ Haraʌ̃ra Lo zeza basía.
297	GEN 11:30	Maʌ̃ Saraira warra neẽ́ b̶asia warra toca bẽrã.
300	GEN 12:1	Ewari ab̶a Ãcõrẽba Abraʌ̃a jarasia: –Bʌ druara, bʌ ẽberãra, bʌ zeza ded̶ebemarã sid̶a ameped̶a wãdua. Mʌ̃a druada bʌ́a acʌbiya mamaa wãmãrẽã.
302	GEN 12:3	Bʌ carebabʌdara mʌ̃a carebaya. Bʌ biẽ́ obʌdara mʌ̃a biẽ́ b̶ʌya. Bʌd̶eba mʌ̃a naʌ̃ ẽjũãne b̶ea purura jũma carebaya.–
309	GEN 12:10	Maʌ̃ ewarid̶e jũma Canaaʌ̃ druad̶e jarrabada zesia. Maʌ̃ne Abraʌ̃ra Egiptod̶aa b̶ad̶e wãsia cod̶ira ab̶ed̶a neẽ́ bẽrã.
312	GEN 12:13	Maʌ̃ba mʌ̃ quĩrã djuburia jaradua bʌra mʌ̃ djabawẽrãda. Mãwãra mʌ̃ra bead̶aẽ́a, ãtebʌrʌ bʌd̶eba mʌ̃ra bia b̶eya.–
316	GEN 12:17	Baribʌrʌ Abraʌ̃ quima Sarai carea Ãcõrẽba dji borora, idji de dromane panabada sid̶a cacua biẽ́ b̶ʌcuasia.
317	GEN 12:18	Maʌ̃neba dji boroba cawasia Saraira Abraʌ̃ quimada. Maʌ̃ bẽrã Abraʌ̃ra trʌ̃biped̶a jarasia: –¿Cãrẽ cãrẽã mʌ̃́a jaraẽ́ basi Saraira bʌ quimada? ¿Cãrẽ cãrẽã bʌ djabawẽrãana asi? Mʌ̃a bʌ quimara berara edasia. ¿Cãrẽ cãrẽã mʌ̃ra jãwã osi? Za b̶ʌa bʌ quimara. Edaped̶a isabe wãdua.–
325	GEN 13:6	Baribʌrʌ Abraʌ̃ra Lo sid̶a bio bara panʌ bẽrã ẽjũãba araẽ́ basía. Maʌ̃ carea ab̶ari ẽjũãne ãbaa poya pananaẽ́ basía.
327	GEN 13:8	Maʌ̃ bẽrã Abraʌ̃ba Loa jarasia: –Dadjira ab̶ari ẽberãrã bẽrã bia b̶ʌẽ́a ijarad̶ida; bia b̶ʌẽ́a bʌ animarã wagabadara mʌ̃ animarã wagabada ume ijara pananida.
334	GEN 13:15	Jũma naʌ̃ ẽjũãra mʌ̃a bʌ́a, bʌd̶eba yõbʌdarãa bid̶a diaya ewariza bãrãne bamãrẽã.
336	GEN 13:17	Mʌ̃a bʌ́a naʌ̃ ẽjũãra diai bẽrã dji drasoara dji jed̶ea sid̶a acʌd̶e wãdua.–
341	GEN 14:4	Maʌ̃ Quedorlaómeba Sodomanebema boroare panʌra idji jʌwaed̶a doce poa erob̶asia. Baribʌrʌ trecebema poad̶e maʌ̃gʌrãba Quedorlaómera waa ĩjãnaẽ́ basía.
357	GEN 14:20	Ãcõrẽ dji Dromaara b̶ʌra bio biya quirua. Idjia bʌ dji quĩrũrãra bʌ́a poyabisia. Maʌ̃ne Abraʌ̃ba ne jũma jãrĩnanebemada die juachabʌrʌza Melquisedéa ab̶a dia wãsia.
358	GEN 14:21	Mãwãnacarea Sodomanebema boroba Abraʌ̃a jarasia: –Mʌ̃́a diadua mʌ̃ ẽberãrã ẽdrʌ edad̶ada. Baribʌrʌ bʌa nebia waya jãrĩnara edadua, mʌ̃re sid̶a edadua.–
359	GEN 14:22	Maʌ̃ne Abraʌ̃ba Sodomanebema boroa jarasia: –Edaẽ́a. Mʌ̃a wãrã arada Ãcõrẽ dji Dromaara b̶ʌ, naʌ̃ ẽjũã idjab̶a bajã od̶a ume nãwã bed̶ea b̶ʌsia: mʌ̃a bʌrera edaẽ́a. Ni maãrĩara quiru sid̶a edaẽ́a. Bʌ jĩrũne jʌ̃bari jʌ̃cara sid̶a edaẽ́a. Mãwã edaẽ́a bʌa jararãmãrẽã mʌ̃ra ne bara b̶ʌsida.
361	GEN 14:24	Mʌ̃ nezocarãba coped̶ad̶a awara mʌ̃a waa quĩrĩãẽ́a. Baribʌrʌ mʌ̃are djõ panana Anerba, Escolba, Mamre bid̶a ara ãdjia quĩrĩãbʌdada edad̶ia.–
363	GEN 15:2	Maʌ̃ne Abraʌ̃ba jarasia: –Ay, Ãcõrẽ, ¿cãrẽ cãrẽã mʌ̃ra ne bara b̶ʌi? Mʌ̃ra warra sid̶a neẽ́ b̶ʌa. Mʌ̃ beud̶acarea mʌ̃a erob̶ʌra mʌ̃ nezoca Elieze Damasco purud̶ebemaba jũma edaya.–
364	GEN 15:3	Idjab̶a Abraʌ̃ba jarasia: –Bʌa mʌ̃́a warra unubiẽ́ b̶ʌ bẽrã mʌ̃a erob̶ʌra nezoca mʌ̃ ded̶e tod̶aba jũma edaya.–
365	GEN 15:4	Maʌ̃ne Ãcõrẽba Abraʌ̃a jarasia: –Eliezeba bʌa erob̶ʌra edaẽ́a, ãtebʌrʌ bʌ warra araba edaya.–
371	GEN 15:10	Ara maʌ̃da Abraʌ̃ba maʌ̃ animarã b̶eara jũma enesia. Eneped̶a, beaped̶a, ẽsidra drapetaped̶a, orro ab̶a dewara orro ume quĩrã djica cob̶ʌsia. Ĩbanara drapetaẽ́ basía.
374	GEN 15:13	Mãwã b̶ʌd̶e Ãcõrẽba Abraʌ̃a jarasia: –Bʌra drõã b̶ed̶acarea necai waraga jaid̶aped̶a tʌb̶arid̶ia. Baribʌrʌ cawa b̶adua bʌd̶eba yõi purura djãrã druad̶e b̶aida. Maʌ̃ druad̶ebemarãba ãdjirãra nezocarãda b̶ʌd̶aped̶a cuatrociento poa bia mĩga eropanania. Baribʌrʌ ãdjirã biẽ́ o panʌra mʌ̃a biẽ́ b̶ʌya. Maʌ̃be bʌd̶eba yõi purura mamaʌba ne bara ẽdrʌya.
377	GEN 15:16	Maʌ̃ cuatrociento poa bad̶acarea bʌd̶eba yõi purura namaa jẽda zeya. Maʌ̃ ewarid̶e mʌ̃a amorreorã naʌ̃ ẽjũãne duanʌra cawa oped̶a naʌ̃ ẽjũãra bʌd̶eba yõi purua diaya. Bʌ zocai b̶ʌ ewarid̶e mʌ̃a ãdjirãra cawa oẽ́a ãdjia cadjirua od̶ida panʌra wad̶i jũma od̶aẽ́ panʌ bẽrã.–
378	GEN 15:17	Queud̶acarea pãĩma nũmesia. Mãwã b̶ʌd̶e cawaẽ́ne cuguru waib̶ʌa cowa nũmʌda idjab̶a cãdorrona ĩbĩrã urua nũmʌ sid̶a odjad̶aped̶a dji animarã drapetad̶a ẽsi wãsid̶aa.
384	GEN 16:2	Ewari ab̶a Saraiba Abraʌ̃a jarasia: –Mʌ̃ra Ãcõrẽba warra toca wẽrãda b̶ʌd̶a bẽrã, mʌ̃a bʌ́a bed̶ea djuburiaya mʌ̃ nezocawẽrã ume cãĩmãrẽã. Ãĩbẽrã mʌ̃a warrada idjid̶eba erob̶aisicada.– Saraiba jarad̶ara Abraʌ̃ba ĩjãsia.
387	GEN 16:5	Maʌ̃ bẽrã Saraiba Abraʌ̃a jarasia: –Bʌdrʌ bed̶ead̶e b̶ʌa Agaraba mʌ̃ igara b̶ʌ carea. Mʌ̃a bʌ́a idjira diasia quima quĩrãca. Baribʌrʌ idji b̶iogoa b̶ʌ cawasid̶eba ʌ̃taa mʌ̃ra igara b̶ʌa. Ãcõrẽbʌrʌ cawa b̶ʌa caida bed̶ead̶e b̶ʌda: mʌ̃da wa bʌda.–
388	GEN 16:6	Maʌ̃ne Abraʌ̃ba Saraia jarasia: –Acʌdua, bʌ nezocawẽrãra bʌ jʌwaed̶a b̶ʌa. Bʌdjia quĩrĩã b̶ʌ quĩrãca odua.– Ara maʌ̃da Saraiba dji nezocawẽrãra biẽ́ o b̶esia. Maʌ̃ carea dji nezocawẽrãra mĩrũ wãsia.
394	GEN 16:12	Idjira ni ab̶aʌ jʌwaed̶a b̶aẽ́a. Jũmarã ume djõ b̶aya. Idjab̶a jũmarãda idji ume djõ b̶ead̶ia. Idji ẽberãrãnebemada jĩga b̶abari baya.
403	GEN 17:5	Maʌ̃ bẽrã bʌra waa Abraʌ̃ ad̶aẽ́a. Id̶iba ʌ̃taa bʌ trʌ̃ra Abrahaʌ̃ ad̶ia, mʌ̃a bʌra zocãrã puru zezada b̶ʌbʌrʌ bẽrã.
406	GEN 17:8	Idjab̶a bʌ b̶abari ẽjũãra bʌ́a, bʌd̶eba yõbʌdarãa bid̶a mʌ̃a diaya. Mʌ̃a bãrãa jũma Canaaʌ̃ druara diaya ewariza bãrãne bamãrẽã. Maʌ̃ne mʌ̃drʌ bãrã Ãcõrẽ baya.–
412	GEN 17:14	Maʌ̃ carea baridua umaquĩrãba idji cacuada wẽãgoẽ́bʌrʌ, maʌ̃ ẽberãra bãrãnebemada ãyã b̶ʌd̶ida panʌa, mʌ̃a bãrã ume bed̶ea b̶ʌd̶ara igara b̶ʌ bẽrã.–
413	GEN 17:15	Maʌ̃ awara Ãcõrẽba Abrahaʌ̃a jarasia: –Mʌ̃a bʌ quima Saraira nãwã bia b̶ʌya: idjid̶eba mʌ̃a bʌ́a warrada wãrãda diaya. Maʌ̃ awara idjid̶eba puruda zocãrã yõnia idjab̶a idjid̶eba ẽberãrã bororãda odjad̶ia. Maʌ̃ carea bʌ quimara waa Sarai arãdua, ãtebʌrʌ idji trʌ̃ra Sara adua.–
417	GEN 17:19	Maʌ̃ne Ãcõrẽba panusia: –Mãwãẽ́a. Bʌ quima Sarabʌrʌ umaquĩrã warrada bʌ́a to diaya. Bʌa idji trʌ̃ra b̶ʌdua Isa. Mʌ̃a bʌ ume bed̶ea b̶ʌd̶ara jõca baya. Maʌ̃ bẽrã maʌ̃ bed̶eara idjab̶a Isa itea b̶aya, idjid̶eba yõbʌdarã itea bid̶a.
419	GEN 17:21	Baribʌrʌ mʌ̃a bʌ ume bed̶ea b̶ʌd̶ara Isa itea b̶aya. Id̶iba poa ab̶a babʌrʌd̶e Isara Saraba bʌ́a to diaya.–
438	GEN 18:13	Maʌ̃ bẽrã Ãcõrẽba Abrahaʌ̃a jarasia: –¿Cãrẽ cãrẽã Sarara ipid̶asi? ¿Cãrẽ cãrẽã crĩcha b̶ʌ idji djora b̶ʌba warrara poya toẽ́da?
439	GEN 18:14	¿Mʌ̃a ne jũma poya o b̶ʌẽ́ca? Mʌ̃a jarad̶a quĩrãca za zei poad̶e mʌ̃ra bʌmaa wayacusa zeya. Maʌ̃ ewarid̶e Saraba umaquĩrã warrada to erob̶aya.–
440	GEN 18:15	Maʌ̃ne Sara dauperabʌrʌba jarasia: –Mʌ̃ra ipid̶aẽ́ basía.– Baribʌrʌ Ãcõrẽba jarasia: –Mãwãẽ́a. Mʌ̃a cawa b̶ʌa bʌra ipid̶asida.–
449	GEN 18:24	Jãʌ̃ purud̶e ẽberã jipa b̶eada cincuenta panʌbʌrʌ, ¿bʌa ãdji purura jũma ãrĩca? Bʌa maʌ̃ cincuenta ẽberã jipa b̶ea carea ¿ãdji puru ãrĩ crĩcha b̶ʌra idu b̶ʌẽ́ca?
450	GEN 18:25	Bʌa ẽberã jipa b̶eara ẽberã cadjiruarã ume ãbaa quinibicaa. Bʌra jũma naʌ̃ ẽjũãne b̶ea cawa obaria. Mãwãra ¿bʌa jipa cawa oẽ́ca?–
451	GEN 18:26	Maʌ̃ne Ãcõrẽba panusia: –Mʌ̃a Sodoma purud̶e jipa b̶eada cincuenta unuibʌrʌ, maʌ̃ cincuenta ẽberãrã carea jãʌ̃ purura ãrĩẽ́a.–
452	GEN 18:27	Wayacusa Abrahaʌ̃ba jarasia: –Mʌ̃ Boro, mʌ̃ra ne wayaa neẽ́ b̶ʌ quĩrãca bʌ ume bed̶ea b̶ʌa. Mʌ̃ra ẽberãda quirumĩna, egoro quĩrãca b̶ʌmĩna, tʌbʌ pora quĩrãca b̶ʌmĩna, mʌ̃ra bʌ ume wad̶i idu bed̶eabidua.
453	GEN 18:28	Ãĩbẽrã cincuenta jipa b̶ead̶ebemarãda bʌa juesuma unuẽ́sicada. Maʌ̃ juesuma unuẽ́ carea ¿ãdji purura jũma ãrĩca?– Maʌ̃ne Ãcõrẽba panusia: –Mʌ̃a jipa b̶eada 45 unuibʌrʌ, ãdji purura ãrĩẽ́a.–