10	GEN 1:10	Maʌ̃ra Ãcõrẽba bia unusia. Ẽjũã põãsara Ãcõrẽba trʌ̃ b̶ʌsia “egoro.” Baido ãbaa ũmenada trʌ̃ b̶ʌsia “pusa.”
11	GEN 1:11	Maʌ̃be Ãcõrẽba jarasia: –Egorod̶e ne quĩrãtanoa tununadua; chirua ta zaubari b̶eada idjab̶a nejõ bacuru sid̶a. Jũma maʌ̃ra ta zaud̶ia ara ãdji b̶ea quĩrãca tununamãrẽã.– Ara maʌ̃da egorod̶e ne quĩrãtanoa tunusid̶aa. Jũma chirua ta diabari b̶eara idjab̶a bacuru nejõ zaubari b̶ea sid̶a ãdji ta bara tunusid̶aa ara ãdji b̶ea quĩrãca tununamãrẽã. Maʌ̃ra Ãcõrẽba bia unusia.
14	GEN 1:14	Maʌ̃be Ãcõrẽba jarasia: –Urua b̶eada bajãne b̶ead̶adua naʌ̃ ẽjũã ʌ̃na b̶amãrẽã idjab̶a ãsara, diamasi ume quĩrã awara b̶amãrẽã. Maʌ̃gʌba cawabi b̶aya ewarida, poada idjab̶a sãʌ̃be ewari dromada od̶ida panʌda.–
21	GEN 1:21	Ara mãwã jarabʌrʌba Ãcõrẽba b̶eda waib̶ʌga b̶eada ocuasia. Dojãne zocai b̶eada quĩrãtanoa ocuasia. Idjab̶a i bara b̶eada quĩrãtanoa ocuasia. Maʌ̃ra idjia bia unusia.
36	GEN 2:5	chiruada põãjãrã sid̶a neẽ́ basía Ãcõrẽba naʌ̃ ẽjũãne wad̶ibid̶a cueda zebica bad̶a bẽrã. Baribʌrʌ egorod̶eba ʌ̃taa towaada odjabadjia naʌ̃ ẽjũã jũma b̶eguea oi carea. Idjab̶a ẽberãda neẽ́ basía ẽjũã oi carea.
38	GEN 2:7	Maʌ̃ne Ãcõrẽba egoro porad̶eba ẽberãda osia. Maʌ̃ ẽberã quẽbʌd̶e Ãcõrẽba jãrãpuasia ʌ̃yãba edamãrẽã. Mãwã ẽberãra zocai b̶esia.
43	GEN 2:12	Dji orora bio bia b̶ʌa. Idjab̶a ónice mõgara sid̶a bara b̶ʌa. Bacuru b̶a tũãpa b̶ʌ bedelio abada sid̶a bara b̶ʌa.
45	GEN 2:14	Maʌ̃arebema dora Tigri abadaa. Maʌ̃ dora Asiria purud̶eba ʌ̃mãdau odjabariare b̶ʌa. Jĩrũarebema dora Euprate abadaa.
50	GEN 2:19	Maʌ̃ne Ãcõrẽba egorod̶eba jũma animarã druabemada, jũma ĩbana sid̶a osia. Maʌ̃ animarã b̶eara ẽberãmaa enesia cãrẽ trʌ̃da ãdjiza b̶ʌcuai cawaya. Ara maʌ̃da ẽberã Adaʌ̃ba animarã b̶eara trʌ̃ b̶ʌcuasia. Animarã trʌ̃ra ãdjiza b̶esia Adaʌ̃ba trʌ̃ b̶ʌcuad̶a quĩrãca.
57	GEN 3:1	Jũma Ãcõrẽba ocuad̶a animarã cãyãbara damada crĩcha cawaara b̶asia djãrã cũrũgai carea. Maʌ̃ damaba wẽrãa jarasia: –¿Ãcõrẽba wãrãda jarasica jũma naʌ̃ néud̶e b̶ea nejõra bãrãba jõcara panʌda?–
59	GEN 3:3	Baribʌrʌ bacuru néu ẽsi nũmʌnebemada Ãcõrẽba jarasia: “Jãʌ̃gʌ nejõra jõrãnadua idjab̶a jidarãnadua. Mãwã od̶ibʌrʌ beud̶ia.”–
61	GEN 3:5	Ãtebʌrʌ maʌ̃ nejõ jõbʌda ewarid̶e bãrãba ab̶ed̶a jũma cawad̶ia biada, cadjirua sid̶a. Mãwã Ãcõrẽ quĩrãca crĩcha cawa panania. Maʌ̃gʌra idjia cawa b̶ʌa, maʌ̃ carea bãrãa jõbi ama b̶ʌa.–
63	GEN 3:7	Ara maʌ̃da ãdjia umena ab̶ed̶a cawasid̶aa ãdjira ãcad̶a panʌda. Maʌ̃ carea higojõ queduada ĩgud̶aped̶a jʌ̃sid̶aa.
69	GEN 3:13	Maʌ̃ bẽrã Ãcõrẽba wẽrãa iwid̶isia: –¿Bʌa cãrẽ cãrẽã jãwã osi?– Wẽrãba panusia: –Damaba mʌ̃ra cũrũgasia. Maʌ̃ bẽrã mʌ̃a jõsia.–
70	GEN 3:14	Maʌ̃ bẽrã Ãcõrẽba damara nãwã biẽ́ jara b̶ʌsia: Bʌa jãwã cũrũgad̶a bẽrã, mʌ̃a bʌra daupẽbada animarã idjab̶a mẽãbema animarã cãyãbara biẽ́ara b̶ʌya. Nãwã b̶aya: id̶iba ʌ̃taa bʌdji jãne nĩbaya idjab̶a ewariza bʌ itera egoro pora caita b̶aya ab̶a beubʌrʌd̶aa.
71	GEN 3:15	Idjab̶a mʌ̃a bʌra wẽrã ume dji quĩrũda b̶ʌya. Id̶iba ʌ̃taa bʌ warrara wẽrã warra ume dji quĩrũ baya. Bʌa wẽrã warrara jĩrũgarronane caya. Baribʌrʌ idjia bʌ borora berradʌgaya.
72	GEN 3:16	Maʌ̃ne Ãcõrẽba wẽrãa jarasia: Bʌ b̶iogoa b̶ʌd̶e mʌ̃a bʌra bia mĩgabiya. Warra tobʌrʌd̶e puad̶eba toya. Mãwã bia mĩga b̶aimĩna bʌ quima ume b̶a quĩrĩã b̶aya, baribʌrʌ idjia bʌra idji jʌwaed̶a erob̶aya.
73	GEN 3:17	Maʌ̃ne Ãcõrẽba umaquĩrãa jarasia: Mʌ̃a bʌ́a jarasia jãʌ̃ nejõra jõrãmãrẽã. Mãwãmĩna bʌ wẽrã bed̶eada ĩjãsia. Maʌ̃ bẽrã mʌ̃a naʌ̃ ẽjũãra jũma biẽ́ b̶ʌya. Ʌrʌda, jũĩchichi sid̶a odjacuaya. Bʌra bio bia mĩga b̶aya bʌ néud̶ebemada coi carea. Idjab̶a bʌa chiruada co b̶aya.
75	GEN 3:19	Ne coi carea traja b̶ʌd̶e bʌ dratud̶e jʌa zowua nũmaya ab̶a beubʌrʌd̶aa. Bʌra egoro porad̶ebemaa. Maʌ̃ carea bʌra wayacusa egoro pora baya.
79	GEN 3:23	Ara maʌ̃da Ãcõrẽba ẽberãra Edeʌ̃ néu ẽjũãnebemada ãyã jʌretasia ẽjũã o b̶amãrẽã. Ãcõrẽba idjira egorod̶eba osia. Maʌ̃ bẽrã idjira b̶ʌsia egorod̶e ne u b̶amãrẽã.
80	GEN 3:24	Ãcõrẽba ẽberãra ãyã jʌretaped̶a Edeʌ̃ néu ẽjũã ʌ̃mãdau odjabariare bajãnebema nezocarã i bara panʌda b̶ʌsia. Idjab̶a b̶ʌsia djõbada neco urua b̶ʌda, idub̶a pʌrrʌga tucua jira b̶ʌda. Maʌ̃gʌrãba zocai b̶ai diabari nejõra waga panesid̶aa ni ab̶aʌba jõrãmãrẽã.
81	GEN 4:1	Maʌ̃be Adaʌ̃ra dji quima Eva ume cãĩsia. Evara b̶iogoa b̶eped̶a warra tosia. Maʌ̃ne Evaba jarasia: “Mʌ̃a umaquĩrã warrada erob̶esia Ãcõrẽba carebad̶a bẽrã.” Mãwã dji warrara trʌ̃ b̶ʌsia Caiʌ̃.
84	GEN 4:4	Maʌ̃ne Abelba oveja zaquerã dji naãrã toped̶ad̶ada beaped̶a dji dragada Ãcõrẽa diasia. Ãcõrẽba Abelera idjia diad̶a sid̶a bia unusia.
90	GEN 4:10	Ãcõrẽba jarasia: –¿Cãrẽ cãrẽã bʌ djabara jãwã beasi? Idji oa egorod̶e erozoad̶aba jĩgua jara b̶ʌa mʌ̃a jipa cawa omãrẽã.
97	GEN 4:17	Caiʌ̃ra idji quima ume cãĩsia. Dji wẽrãra b̶iogoa b̶eped̶a Enocoda tosia. Maʌ̃ Enoco tosid̶e Caiʌ̃ba puruda o b̶asia. Dji puru trʌ̃ra dji warra trʌ̃ quĩrãca Enoco trʌ̃ b̶ʌsia.
104	GEN 4:24	Bariduaba Caiʌ̃da beaibʌrʌ, Ãcõrẽba maʌ̃gʌra bio cawa oya. Baribʌrʌ bariduaba mʌ̃da dji cũdra carea beaibʌrʌ Ãcõrẽba maʌ̃ ẽberãra aud̶uara cawa oya.
141	GEN 6:3	Edaped̶ad̶acarea warrarãda yõsid̶aa. Maʌ̃ warrarãra naʌ̃ ẽjũãne drasoa waib̶ʌa warisid̶aa. Ãdjirãra trʌ̃ b̶ʌga b̶easia maʌ̃ drõãenabema ewarid̶e, nocoarebema ewarid̶e bid̶a. Ãdjirã carea Ãcõrẽba jarasia: “Mʌ̃a ẽberãrãa ʌ̃yãba diasia zocai pananamãrẽã baribʌrʌ djara bẽrã beud̶ia. Poa ciento veintebe b̶ead̶ia.”
156	GEN 6:18	Baribʌrʌ mʌ̃ra bʌ ume bed̶ea b̶ʌya bãrã ẽdrʌ edai carea. Bʌda, bʌ warrarãda, bʌ quimada, bʌ ãĩgurã sid̶a jãba dromane b̶adod̶ia.
158	GEN 6:20	Ĩbanada, dewara animarãda, animarã ãdji jãne wãbada sid̶a umé uméa bʌmaa zed̶ia bʌa ãdjirã zocai wagamãrẽã.
159	GEN 6:21	Idjab̶a cod̶i careabemada jʌrʌ peped̶a wagadua bãrãba maʌ̃ animarã bid̶a co panani carea.–
167	GEN 7:7	Dopapa carea Noéra jãba dromane ed̶a wãsia. Dji warrarãda, dji quimada, dji ãĩgurã sid̶a ed̶a wãsid̶aa.
171	GEN 7:11	Noé seisciento poa b̶asid̶e ara maʌ̃ poad̶e jed̶eco ab̶a aud̶u diecisiete ewari b̶ʌd̶e ũ wãsia. Ara maʌ̃ ewarid̶e pusa edrebema baidora ʌ̃taa bogadrʌ ze nũmesia, idjab̶a cue sid̶a bio ze nũmesia.
173	GEN 7:13	Cue ze nũmesid̶e Noéra idji warrarã Seʌ̃, Caʌ̃, idjab̶a Jape sid̶a jãba dromane ed̶a wãsid̶aa. Noé quimada, dji ãĩgurã sid̶a ed̶a wãsid̶aa.
176	GEN 7:16	Animarã b̶eaza ed̶a wãsid̶aa dji umaquĩrãda dji wẽrãda, Ãcõrẽba Noéa jarad̶a quĩrãca. Noé ed̶a wãnacarea Ãcõrẽba dji ed̶a wãbadara jũãtrʌ nũmʌsia wagai carea.
178	GEN 7:18	Dora ewariza ʌ̃taa ũ wãsia. Waib̶ʌa ũ wãsia. Maʌ̃ bẽrã jãba dromara baido ʌ̃rʌ̃ pʌrrʌga ũmesia.
191	GEN 8:7	Ewaped̶a ĩbana ne mĩguia cobarida ẽdrʌbisia egoro põãsada unui cawaya. Maʌ̃ ĩbanara wãped̶a waa zeẽ́ basía, ãtebʌrʌ pʌrrʌa wãb̶ari nĩbabadjia do errubʌrʌmisa.
197	GEN 8:13	Noé 601 poa b̶asid̶e naʌ̃ ẽjũãne dora jũma errusia. Ara maʌ̃ poad̶e dji nabema jed̶ecod̶e nabema ewarid̶e Noéba jãba droma de ẽcarrara ogapetasia. Maʌ̃ne ẽjũãra põãsa b̶ʌda unusia.
200	GEN 8:16	–Bʌra, bʌ quima, bʌ warrarã, bʌ ãĩgurã sid̶a jãba dromaneba ẽdrʌd̶adua.
201	GEN 8:17	Idjab̶a ẽdrʌbigadua jũma animarã bʌ ume duanʌra: ĩbanada, animarã daupẽbadada, animarã ãdji jãne wãbada sid̶a jũma naʌ̃ ẽjũãne wãnaped̶a yõnamãrẽã.–
202	GEN 8:18	Ara maʌ̃da Noéra, dji quima, dji warrarã, dji ãĩgurã sid̶a ẽdrʌsid̶aa.
204	GEN 8:20	Maʌ̃be Noéba mõgarada ʌ̃tʌ pã buesia animarã Ãcõrẽa babue diai carea. Mãwã oped̶a Ãcõrẽa babue diaida b̶ʌ animarãda, ĩbana sid̶a ab̶a ab̶a beacuasia. Beacuaped̶a mõgara ʌ̃tʌ pã bued̶a ʌ̃rʌ̃ Ãcõrẽa babue diasia.
217	GEN 9:11	Mʌ̃a bed̶ea b̶ʌbʌrʌra naʌ̃gʌa: naʌ̃ ẽjũãne zocai b̶eara waa dopapaba jõbiẽ́a. Waa naʌ̃ ẽjũãra ũ wãẽ́a naʌ̃ ẽjũãne b̶ea quininamãrẽã. Mʌ̃a bed̶ea b̶ʌd̶ara wãrãda mãwã b̶aya.–
221	GEN 9:15	Maʌ̃gʌd̶eba mʌ̃a quĩrãneba b̶aya mʌ̃a bãrã ume animarã ume bid̶a bed̶ea b̶ʌd̶ara. Waa dopapara wãbiẽ́a naʌ̃ ẽjũãne b̶ea quinibi carea.
237	GEN 10:2	Japed̶eba yõped̶ad̶ara naʌ̃gʌrã basía: Gomer, Magog, Madai, Javaʌ̃, Tubal, Mesec, Tiras sid̶a.
238	GEN 10:3	Jape warra Gomerd̶eba yõped̶ad̶ara naʌ̃gʌrã basía: Asquenaz, Ripat, Togarmá sid̶a.
239	GEN 10:4	Jape warra Javaʌ̃neba yõped̶ad̶ara naʌ̃gʌrã basía: Elisá, Tarsi, Quitiʌ̃, Rodaniʌ̃ sid̶a.
241	GEN 10:6	Caʌ̃neba yõped̶ad̶ara naʌ̃gʌrã basía: Cus, Mizraiʌ̃, Put, Canaaʌ̃ sid̶a.
242	GEN 10:7	Caʌ̃ warra Cusd̶eba yõped̶ad̶ara naʌ̃gʌrã basía: Sebá, Havila, Sabtá, Raamá, Sabteca sid̶a. Raamáneba yõped̶ad̶ara Chebá idjab̶a Dedaʌ̃ basía.
248	GEN 10:13	Caʌ̃ warra Mizraiʌ̃neba yõsid̶aa naʌ̃gʌrãda: Ludiʌ̃, Anamiʌ̃, Lehabiʌ̃, Naptuhiʌ̃,
251	GEN 10:16	Idjab̶a Canaaʌ̃neba yõsid̶aa jebuseorãda, amorreorãda, gergeseorãda,
255	GEN 10:20	Jũma maʌ̃gʌrãra Caʌ̃neba yõsid̶aa. Ãdjirãza ãdji ẽberãrãra erob̶easia, ãdji bed̶eara quĩrã awara b̶easia, ãdji druara awara erob̶easia, idjab̶a ãdji puru sid̶a awara erob̶easia.
257	GEN 10:22	Seʌ̃neba yõped̶ad̶ara naʌ̃gʌrã basía: Elaʌ̃, Asur, Arpaxa, Lud, Araʌ̃ sid̶a.
258	GEN 10:23	Seʌ̃ warra Araʌ̃neba yõped̶ad̶ara naʌ̃gʌrã basía: Uz, Hul, Gueter, Mas sid̶a.
261	GEN 10:26	Joctaʌ̃neba yõped̶ad̶ara naʌ̃gʌrã basía: Almodad, Selep, Hazar-mavet, Jerá,
264	GEN 10:29	Opir, Havila, Jobá sid̶a. Jũma maʌ̃gʌrãra Joctaʌ̃ warrarã basía.
266	GEN 10:31	Jũma maʌ̃gʌrãra Seʌ̃neba yõped̶ad̶arã basía. Ãdjirãza ãdji ẽberãrãra erob̶easia, ãdji bed̶eara quĩrã awara b̶easia, ãdji druara awara erob̶easia, idjab̶a ãdji puru sid̶a awara erob̶easia.
267	GEN 10:32	Jũma maʌ̃gʌrãra Noé warrarãneba yõsid̶aa. Dopapa wãnacarea ãdjirãra ãyã wãbʌrʌd̶aped̶a ãdjiza druada osid̶aa. Mãwã jũma naʌ̃ ẽjũãne duanesid̶aa.
270	GEN 11:3	Ewari ab̶a ãbaa nãwã bed̶eadruasid̶aa: “Egoroda mõgara quĩrãca od̶aped̶a tʌbʌd̶e bád̶adrʌ de od̶i carea.” Ara maʌ̃da egorora mõgara quĩrãca od̶aped̶a básid̶aa mõgarara neẽ́ bad̶a bẽrã. Maʌ̃be cãdorronada edasid̶aa maʌ̃ mõgara quĩrãca od̶ara carad̶i carea.
271	GEN 11:4	Maʌ̃be jarasid̶aa: –Jãʌ̃be puruda od̶adrʌ. Idjab̶a de ʌ̃tʌ drasoga b̶ʌda od̶ia. Dji de borora ab̶ed̶a bajãnaa tẽũbid̶ia. Mãwã osid̶ara dadjirãra trʌ̃ b̶ʌga b̶ead̶ia idjab̶a ni ab̶aʌba dadjirãra namabemada ãyã memenebid̶aẽ́a druaza wãnamãrẽã.–
272	GEN 11:5	Ẽberãrãba puru idjab̶a de ʌ̃tʌ drasoga b̶ʌ o panʌra Ãcõrẽba bajãneba acʌd̶e zesia.
273	GEN 11:6	Maʌ̃ne Ãcõrẽba jarasia: –Ãdjirãra jũma ãbaa duanʌa idjab̶a ab̶ari bed̶ead̶e bed̶eabadaa. Maʌ̃ bẽrã jʌwa b̶ʌsid̶aa jãʌ̃ de drasoga b̶ʌra od̶i carea. Maʌ̃ba bariduada o quĩrĩã panʌbʌrʌ poya od̶ia. Dadjia mãwã iduaribid̶aẽ́a.
275	GEN 11:8	Ara maʌ̃da Ãcõrẽba jũma naʌ̃ ẽjũãne b̶ea ẽberãrãra quĩrãtanoa bed̶eabisia cawa ũrĩrãnamãrẽã. Mãwã dji puru trʌ̃ra b̶esia Babel. Maʌ̃ bẽrã ẽberãrãba puru o pananara idu b̶ʌsid̶aa. Mãwã Ãcõrẽba ãdjirãra mamaʌba druaza wãbʌrʌbigasia.
298	GEN 11:31	Abraʌ̃ zeza Tarera caldeorã puru Urd̶eba ẽdrʌsia Canaaʌ̃ druad̶aa wãi carea. Idji warra Abraʌ̃da, idji wiuzaque Loda, idji ãĩgu Sarai sid̶a edesia. Baribʌrʌ Haraʌ̃ purud̶e jũẽne wãnaped̶a mama panesid̶aa.
301	GEN 12:2	Bʌd̶eba puru dromada mʌ̃a yõbiya, bʌra bia b̶ʌya, trʌ̃ b̶ʌga b̶ʌya, idjab̶a bʌd̶eba dewararãda bia duanania.
306	GEN 12:7	Mama Ãcõrẽra Abraʌ̃ma odjaped̶a nãwã jarasia: “Mʌ̃a naʌ̃ ẽjũãra bʌd̶eba yõbʌdarãa diaya.” Maʌ̃be Abraʌ̃ba mõgarada ʌ̃tʌ pã buesia ara maʌ̃ Ãcõrẽ idjima odjad̶aa bia bed̶eai carea.
307	GEN 12:8	Mãwãnacarea Abraʌ̃ra Beteld̶eba ʌ̃mãdau odjabariare b̶ʌ eyad̶aa wãsia. Mama idji wua dera osia. Idji wua demaʌba Betelera ʌ̃mãdau b̶aebariare b̶asia. Ʌ̃mãdau odjabariare Hai puruda b̶asia. Idji wua de caita wayacusa mõgarada ʌ̃tʌ pã buesia Ãcõrẽa ewari iwid̶i carea.
308	GEN 12:9	Mamaʌba Abraʌ̃ra ʌ̃nãũ eda wãsia ab̶a Negue abada ẽjũãnaa.
309	GEN 12:10	Maʌ̃ ewarid̶e jũma Canaaʌ̃ druad̶e jarrabada zesia. Maʌ̃ne Abraʌ̃ra Egiptod̶aa b̶ad̶e wãsia cod̶ira ab̶ed̶a neẽ́ bẽrã.
310	GEN 12:11	Egiptod̶e jũẽbod̶od̶e Abraʌ̃ba dji quima Saraia jarasia: –Bʌra wãrãda wẽrã quĩrãwãrẽã b̶ʌa.
311	GEN 12:12	Egiptod̶ebemarãba bʌ unubʌdad̶e jarad̶ia: “Jãʌ̃ra idji quimaa.” Maʌ̃ bẽrã mʌ̃ra bead̶ia. Baribʌrʌ bʌra zocai b̶ʌd̶ia edad̶i carea.
313	GEN 12:14	Abraʌ̃ jũẽnacarea Egiptod̶ebemarãba unusid̶aa idji quima Saraira quĩrãwãrẽã b̶ʌda.
314	GEN 12:15	Dji dromarã bid̶a unusid̶aa Saraira wãrãda bio quĩrãwãrẽã b̶ʌda. Maʌ̃ bẽrã ãdjia Egiptod̶ebema boroa Saraid̶ebemada bia jarasid̶aa. Ara maʌ̃da ãdji boroba Saraira idji ded̶aa edebisia.
315	GEN 12:16	Sarai carea Egiptod̶ebema boroba Abraʌ̃ra bia osia. Abraʌ̃a diacuasia ovejada, pacada, burroda, nezoca umaquĩrãda, nezoca wẽrãda, cameyo sid̶a.
320	GEN 13:1	Mãwãnacarea Abraʌ̃ra dji quima ume Egiptod̶eba jẽda wãsia Negue ẽjũãnaa. Jũma idjia erob̶ʌra edesia. Idji tẽãbea Lo sid̶a idji ume wãsia.
322	GEN 13:3	Maʌ̃be Negued̶eba jẽda ʌ̃nãũ eda wãsia idji wua de erob̶ad̶amaa, Betel puru idjab̶a Hai puru ẽsi.
323	GEN 13:4	Idjia mõgara ʌ̃tʌ pã bued̶ama jũẽped̶a Ãcõrẽa ewari iwid̶isia.
326	GEN 13:7	Maʌ̃ awara Abraʌ̃ animarã wagabadada Lo animarã wagabada ume ijarabadjid̶aa. Idjab̶a cananeorãda, perezeorã sid̶a mama b̶easia.
327	GEN 13:8	Maʌ̃ bẽrã Abraʌ̃ba Loa jarasia: –Dadjira ab̶ari ẽberãrã bẽrã bia b̶ʌẽ́a ijarad̶ida; bia b̶ʌẽ́a bʌ animarã wagabadara mʌ̃ animarã wagabada ume ijara pananida.